في حد فتح سوبر ماركت قبل كدا ؟

[HanaaOsama]

السلام عليكم ايها الساده و السيدات الافاضل

هل في حد فتح سوبر ماركت قبل كدا يقولنا خبرته في الموضوع ده ؟

[عاشق الترحال]

أي خبره تقصدها وعاوز تعرف أيه تحديدا يعني من ناحية البضاعه ولا راس المال ولا ايه بالظبط .

[HanaaOsama]

أي خبره تقصدها وعاوز تعرف أيه تحديدا يعني من ناحية البضاعه ولا راس المال ولا ايه بالظبط .

اولا شكرا لرد حضرتك

أقصد خبرات حد عمل المشروع ده قبل كدا من كل النواحي

المشروع يبدو سهل نشوف الناس بتوع الجمله و نجيب بضاعة وخلاص

لكن اكيد ممكن يكون في مشاكل قبلت الناس الي عملت المشروع ده قبل كدا

و ده الي بسأل عنه ؟

في نقاط كتير ممكن الواحد ميكنش عارفها او مش عارف يسأل عنها

لو بدأنا بالاجراءات :-

اعتقد في موافقات من الصحة و التموين و الحي و ......

و كمان : التعامل مع الشركات المانحة لتلاجات عرض بيكون ازاي زي ( كوكاكولا و شركات الايس كريم و الشيكولاته و ..... )

و علشان تبدأ مشروع زي ده في مكان ( مش حيوي ) تقدر تقدر هتجيب بضاعة اد ايه عشان تاريخ صلاحيتها مينتهيش قبل بيعها )

[عاشق الترحال]

هقول لحضرتك عن اللي إحنا عملناه بالضبط أو عاللي أنا فاكره لأن الموضوع من كام سنه .

بالنسبه للمحل

أولا المحل عندك ولا هتأجريه ؟؟ وهل المحل له رخصه ولا لأ ؟ ونشاطها ايه ؟

كل ده ممكن تطنشيه في حالة كنت في منطقه شعبيه زي حالاتنا ويكون اللي ميتسموش بتوع التهليب واللي عاوزين الرشاوي بعيد

عنكم وربنا عامي عينهم عنكم . وطبعا لازم المحل يبقى له عداد كهربا تجاري مستقل وعداد ميه مستقل وكده .

المهم هتحتاجي طبعا شهاده صحيه للي واقف في المحل علشان بتوع الصحه .

هتحتاجي شوية ديكورات وأرفف وميزان وقطاعه جبنه رومي ولانشون وشويه حركات كده .

بالنسبه للبضاعه

ممكن لو لكم علاقه بتاجر جمله تاخدو منه بضاعه آجل وتتفقوا تدفعوا له كل فتره وطبعا بيحتاج مقدم وبيسجل عليكم اللي متبقى

لحد ما المشروع يقف على رجله .

بالنسبه للثلاجات والشركات فممكن تكلموا مناديب المبيعات ينزلوا لكم بضاعه علشان تفرشوا المحل بس معظمهم لو ميعرفكوش

هينزل لكم بالكاش مش آجل لحد ما يعرف نظامكم في الدفع وبعدين ينزل لكم آجل .

فيه شركات كبيره مبتصدق تلاقي سوبر ماركت كبير ونظيف في مكان حلو وبيعملوا عنده عروض كويسه ويأجروا من رف يعرضوا عليه

منتجاتهم ويعطوا له كوبونات مجانيه ياخد بيها بضاعه من الشركه ببلاش ولما بيعمل معاهم شغل ومسحوبات العميل تزيد بيعملوا له

يافطات كبيره بإسم المحل ويحطوا عليها شعار الشركه بتاعتهم وتقدري تعملى كده مع أكتر من شركه حتى لو كانوا منافسين .

بالنسبه للبيبسي وكوكاكولا هتنزل لكم ثلاجات بس بعد كام مره ولو كان السوبر ماركت كبير ممكن ينزلوا الثلاجات على طول في

البدايه .

أما عن نوعية البضاعه ففي البدايه أنصحك تخليكي في البضاعه اللي في متناول الجميع يعني الطبقه بتاعتنا المتوسطه دي

لحد ما تشوفي السوق أخباره أيه معاكي ولو لقيتي طلب على سلعه معينه أو بضاعه معينه غاليه شويه بس ليها زبون طبعا

بتجيبيها على أد الطلب علشان متبقاش تقيله عندك في السوبر ماركت .

شوفي حضرتك عاوزه تسألي عن أيه تحديدا علشان أقدر أفتكرلك بالظبط ولو كنتي من المنصوره ممكن أساعدك .

تحياتي bngn::

[HanaaOsama]

في كام سؤال كدا من مداخلة حضرتك

حضرتك بتقول لازم شهاده صحية للي واقف في المحل ؟

انا مش فاهمة اوي موضوع الشهاده الصحية ده لكن افتكر بيقي فيه شهاده باسم صاحب المحل ( الي فتح النشاط ده )

يعني مش لازم هو الي واقف يبيع و لا انا مش فاهمة الموضوع ؟

و كان حضرتك بتقول لو محل شكله نضيف و كبير بتوع الشركات المانحة للتلاجات بيدوله تلاجة علطول ؟

احنا سمعنا ان الي عايز تلاجة بيسجل اسمة و ياخد دور و يستني بقي سنه ولا اكتر علي حسب الشركة سواء ايس كريم او حاجة ساقعة و لا الحكاية ديه كمان ليها شغل اخر ...

( بالمناسبة انا و زوجي لا نريد ابدا تمشيه الامور بالرشاوي وما الي ذلك ) و الاوارق و الرخصة و العداد و كل شئ سليم

بالمناسبة حضرتك بتقول لو المحل في مكان مش تحت العين و الناس الي ميتسموش يكونوا بعيد يبقي احسن ....

ليه سؤال في الحته ديه : لو اوراقك و كل شئ سليم ايه هو الي ممكن يتلككوا عليه لو انت مغلس معاهم ؟

[عاشق الترحال]

بالنسبه للشهاده الصحيه حقيقه أنا مش فاكر بالضبط بس على حد علمي إن الشخص اللي واقف فى محل له نشاط غذائي بيبقى لازم له شهاده صحيه ومن ضمنها السوبر ماركت بس زوج حضرتك ممكن يروح لأقرب وحد صحيه أو مديريه صحه قريبه ويستفسر هناك .

بالنسبه للتلاجات بتاع بيبسي وكوكاكولا والآيس كريم كانوا نزلوها لنا عادي جدا بس بعد كام مره من التعامل وبعدين كانت عربية الشركه بتيجي لحد المحل تغير الفوارغ وتظبط البضاعه بتاعتهم في التلاجه معرفش الحال اتغير بقى ولا لأ.

بس لو شفتوا حد معرفه هناك يخلصهالكم على طول ومش بالفلوس ولا بالرشاوي بس بالــ( كوسه ) :happy:

ممكن لو تعرفوا مندوب في شركه من الشركات دي يظبط لك كل شئ وبيبعت لكم مناديب من الشركات التانيه كمان .

وكمان شركات زي يونيليفر بتاع ( ليبتون وكلوس أب وسيجنال والمنتجات دي ) وهنكل( صابون فا وبرسيل غير ه .. )

وبروكتور وجامبل ( إريال وتايد وبابرز ... وغيره ) بتعرض لك منتجاتها اللي بتشتريها من المندوب بتاعهم وكمان يأجروا منك الرف ويعطوكي بضاعه مجانا عليه في سبيل عرض منتجاتهم . وبينزلولك أرفف ديكورات ويفط وبانارات وهدايا وغيره بس طبعا عالمسحوبات والعرض .

وشويه شويه لما بتعرف الشركه نظامكم في الدفع وأنكم ملتزمين معاهم بيقدروا يطلعوا لكم آجل وتاخدوا بضاعه وتدفعوا آخر الشهر .

وكل ده متوقف برضه على مساحة المحل يعني لو كان المحل صغير مش هتلاقي اهتمام كبير ولو كان المحل كبير وفي مكان حيوي هتلاقي الكل بيتسابق على انه يدخلكم عميل عنده في الشركه .

وبالنسبه للبضاعه طبعا طلبات زباين المنطقه اللي انتي فيها هيا اللي بتفرض عليك بضاعتها .

بالنسبه للتلاكيك هقولك حاجه فيه فريقين من الناس

الفريق الأول بيقول ( الأيد اللي متعرفش تعضها بوسها ) ودول نظام مشي حالك وراضي الزبون علشان يسيبنا في حالنا .

الفريق الثاني بيقول ( إمشي عدل يحتار عدوك فيك ) طالما أوراقك سليمه يبقى لو حب حد منهم حب يغلس عليكم إخبطوه شكوى محترمه هيتلم على طول .

ولك أن تختاري :sad:

معلش أنا عاوز أساعدك بس إكمني سايب الموضوع ده من حوالي 5 سنين أو اكتر فمش فاكر تفاصيله كويس.

ربنا يوفقكم ويكتب لكم الخير :sad: :sad:

[HanaaOsama]

اشكرك " عاشق الترحال " علي الرد

و ربنا يسهل ان شاء الله في الموضوع ده

هو حضرتك بتقول كان من زمان ( 5 سنين ) هو المشروع اتقفل ولا ايه

[عاشق الترحال]

اشكرك " عاشق الترحال " علي الرد

و ربنا يسهل ان شاء الله في الموضوع ده

هو حضرتك بتقول كان من زمان ( 5 سنين ) هو المشروع اتقفل ولا ايه :happy:

أيون للأسف المشروع اتقفل

بس لظروف خاصه ملهاش دعوه بالمشروع نفسه من حيث الربح والخساره وكده لكن بسبب ظروف عائليه إضطرتنا لغلقه وتأجير المحل .

وإن شاء الله ممكن أفكر أفتحه تاني في الفتره الجايه .

تحياتي :D

تم تعديل 3 فبراير 2010 بواسطة عاشق الترحال

[HanaaOsama]

اشكرك " عاشق الترحال " علي الرد

و ربنا يسهل ان شاء الله في الموضوع ده

هو حضرتك بتقول كان من زمان ( 5 سنين ) هو المشروع اتقفل ولا ايه :wub:

أيون للأسف المشروع اتقفل :wub:

بس لظروف خاصه ملهاش دعوه بالمشروع نفسه من حيث الربح والخساره وكده لكن بسبب ظروف عائليه إضطرتنا لغلقه وتأجير المحل .

وإن شاء الله ممكن أفكر أفتحه تاني في الفتره الجايه .

تحياتي :lol: :lol:

ان شاء الله المره الي جايه تكون افضل md2:

[HanaaOsama]

ليا سؤال لو سمحتم :-

هو في طرق لحفظ مثلا الجبنه العاديه الي بالكيلو في السوبر ماركت ولا عادي

و كذلك المخللات او اي نوع بضاعة معين هل لهم طرق حفظ معينه ؟

[HanaaOsama]

الساده و السيدات الافاضل

معقوله محدش من اعضاء المحاورات الكرام فكر يفتح سوبرماركت قبل كدا ؟؟؟؟!! غير استاذ " عاشق الترحال "

[7odahassan]

انا اقدر ارشحلك شركة ممتازة متخصصة في بيع ثلاجات العرض وتجهيزات السوبر ماركت في مصر

هتفيدك أنك تجهز السوبر ماركت من جميع أنواع ثلاجات العرض المختلفة مثل: ثلاجة عرض الجبن والألبان وثلاجة عرض اللحوم وثلاجة عرض المشروبات

اسمها شركة إيجي تريد ثلاجات العرض وتجهيزات السوبر ماركت

http://supermarketrefrigerateddisplay.com/

[Guest سوال هام]

بعد اذنكوا ينفع موظف يفتح المشروع دا وكمان الشهاده الصحية تكون بإسمه 

[Guest Ahmed]

طب لو سمحتوا انا عاوز اتواصل مع شركات البيبسي والشيبسيهات وخلافه . اوصلهم ازاي