محنة الهوية المصرية

[Faro]

دى واسعة شويّة يا أستاذ فارو

ممكن تكون واسعة شوية يا دكتور محبط ..... ولكنك ذكرت دعني أفترض صحت ماتقول ... وهذا مأفترضته أنا بناء على تصرفات الحكام العرب الماضية والحالية.

أما عن الوحدة الأروبية فكان الغرض منها تفادى تكرار حروب الماضي والوقوف ضد الخطر الأحمر والتحرر من الهيمنة الأميريكية.

تقصد حرب الخليج الثانية بالطبع

أقصد حرب1991 ... نعم لقد كانت الكويت جزأ من العراق ولكن تم الإعتراف بها كعضو دائم فى الجامعة العربية.

أما عن لبنان فلن تجد لبناني مسيحي أو مسلم يؤكد أن الشام هى لبنان وسوريا لإن لبنان هى منشأ الفينيقيين.

لو كانت ستنفجر على رأس تونس أو مصر لكانت أمريكا قد تعامت وتركت ليبيا تفجّرها أوّلا

لحسن الحظ لقد أخطأت المخابرات الأمريكية فى قرائة مايدور فى رأس القذافي لأنها تفكر فى حماية إسرائيل .

فى المشمش

الأردن, فلسطين و إسرائيل فى حاجة ملحة للماء ومصر مازالت تملك حصة وفيرة منه.

و مبادئ أيضا

قال الراوي ياسادة يا كرام ... كان هناك مايسمى مبادئ.

نظرة إلى الشارع المصري عند حدوث الأزمات وإستخدام البطاقات وإنتشار السوق السوداء ونظرة إلى تهافت الحكام العرب للحصول على رضاء بــــوش.

يجب علينا تقوية أنفسنا إقتصاديا وعسكريا قبل أن نعلن إنتمائنا لما يسمى الأمة العربية.

تم تعديل 16 فبراير 2004 بواسطة Faro

[Byte]

لو انت صح و الباقي كلهم غلط تبقي انت غلط و علشان تبقي صح لازم تبقي غلط

عشان كده انا بقول بكل قوتي : انتم صح...

نهر الجنون يعنى؟ ماشى ياعم!

انا كمان لما باشوف دعوة الرجوع الى مصر القبطية بافتكر wag the dog :lol:

وهو مثل يطلق عندما يحرك مشكلة صغيرة (او كيان صغير) مشكلة او كيان اكبر

فيكون المنظر كأن الديل هو الذى يهز الكلب، لا الكلب هو الذى يهز الذيل!

[Mohammad Abouzied]

بعد قرائتي للجرعات المكثفة من المداخلات الاخيرة التي تعقبها دائما حالة توهان... افتكرت جملة سمعتها من فترة كانت بتقول :

لو انت صح و الباقي كلهم غلط تبقي انت غلط و علشان تبقي صح  لازم تبقي غلط...

عشان كده انا بقول بكل قوتي : انتم صح...

:lol: و بالمناسبة اريد ان ابدي اعجابي الشديد بشخصية مغترب الغرباوي التي في رايي ستفوق شخصية الطراودي المتامرك....

My Compliments

الصحيح انك اقتنعت اننا صح بس مش ها تقدر تقول اننا صح

[Mohammad Abouzied]

قال الراوي ياسادة يا كرام ... كان هناك مايسمى مبادئ.

نظرة إلى الشارع المصري عند حدوث الأزمات وإستخدام البطاقات وإنتشار السوق السوداء ونظرة إلى تهافت الحكام العرب للحصول على رضاء بــــوش.

يجب علينا تقوية أنفسنا إقتصاديا وعسكريا قبل أن نعلن إنتمائنا لما يسمى الأمة العربية

بالتجربة بلاد كتير لجأت لمبادئها عندما سائت ظروفها الاقتصادية ، فالحالة الاقتصادية الصعبة هي التي جعلت من القوميات واللجوء الي الكنيسة في الدول الشيوعية في الملاذ الاخير لها بعد فشل الشيوعية وعليها تفككت هذه الدول حسب قومياتها وتم فتح الكنائس من جديد ورجعت روح الدين والعقيدة تأتي لهم من جديد ، واصبحو اصحاب مبادئ عن ذي قبل

[فــيــروز]

آخ

انا اللى جبته لنفسى طبعا :)

احاول ارد فى السريع قبل ما باقى زمايلى ييجوا و الشغل يكبس ولا الموضوع يتقفل

ده انا حلمت امبارح ان الموضوع اتقفل قبل ما ارد وصحيت من النوم باقول خير اللهم اجعله خير

هنا يأتى دور الجماهير المخلصة التى تنتفض وتشد من أزر من فى أرض الملعب وتحمّسهم

وهنا يأتى دور كابتن الفريق (المستنيرين و المصلحين) الذى يحاول صحصحة لاعبيه

وهنا يأتى دور الجهاز الفنّى (النخبة المثقّفة) من خارج الملعب لتصحيح الأوضاع

وهنا يأتى دور مجلس الإدارة (النخبة الحاكمة)لبحث مكامن الخلل

واذا لم ينجح كل هذا؟ واستمر الفريق فى ادائه السيئ؟ هل يمكن ان يمنعه احد من الهبوط لدورى المظاليم؟ الم يحدث مرات عديده ان غادر الجمهور الملعب اعتراضا و امتعاضا من سوء الاداء ولم يلمه احد !! ده طبعا بعد التشجيع لفتره و التدليل لفتره و الدبدبه فى ارض الملعب لفتره وفى الآخر .. الناس قامت مشيت وهى حاسه انها عبيطه انها خرجت من بيوتها تشجع فريق بيتدلع

ويبقى الأساس فى كل هذا......... هو......الجماهير المخلصة

كلنا عارفين ان الجماهير المخلصه وضعها حتى الآن فى المدرجات و بس

وان اختيار اللعيبه و التشكيل كله يخضع لاختبارات ليس لها فيها اى خيار

وتقريبا نقدر نقول الخيار الوحيد الباقى لهذه الجماهير هو اما ان تشجع اللعبه الحلوه عندما تظهر او تصفر احتجاجا على سوء الاداء

لأنها ليست فقط هى القوّة الدافعة و المحمّسة و الشاحذة للهمم و التى تعلن لمن فى أرض الملعب أن هناك من يُستَحَقُّ النصر من أجلهم, بل هى أيضا القادرة على الضغط على من بيده الإصلاح

فى مباريات عديده الجماهير شجعت فرقها تشجيع جنونى ورغم هذا هذه الفرق لم تحقق الانتصار !! مطلوب ايه تانى من الجماهير يا ترى؟ تنزل تلعب بدل الفرقه؟

وإذا تم الإصلاح

قشطه جداااااااااااا :) اهو كل شئ فى موضوعنا متوقف على هذه الجمله العظيمه البسيطه

فستكون هذه الجماهير المخلصة هى الفائزة الحقيقية فى نهاية المطاف...لأنّها قد حافظت على الكيان الذى تنتمى إليه و عبرت به و معه من الهزيمة إلى النصر

انا ليس لدى ادنى شك فى هذا .. لكن كل هذا يرتبط بمدى الدور الفاعل و المؤثر لهذه الجماهير على مجلس الاداره وعلى التشكيل ..

أما إذا إستسلمت الجماهير للهزيمة و غادرت المدرّجات فهى لم تكن جماهير قد أتت لمساندة فريقها الذى تنتمى إليه بل أتت لتشاهد ما إذا كانت حالة الفريق تسمح بإستكمال الإنتماء إليه أم لا (وهو شيئ غير منطقى من وجهة نظرى)

الجماهير حين اتت لمشاهدة المباراه و شجعت الفريق ادت ما عليها من دور .. استمر التشجيع رغم سوء الاداء و الفريق بردو مبلط فى الخط و متخيل انه بيضغط على مجلس الاداره باساءة الاداء للوصول لمنافع شخصيه فى النهايه ضاربا عرض الحائط بالجماهير المخلصه اللى جت من كل انحاء البلد

هل من الممكن ان نلوم الجماهير -التى ادت دورها فى الحضور و التشجيع- اذا يئست من الفريق و طالبت بتغييره !! الجماهير نيتها من البدايه ايه؟ الم تكن التشجيع لانها تنتمى؟ لكن ما تراه امامها يشككها فى استحقاق الفريق للانتماء اليه .. يعنى هى لم تبدا بسوء النيه بالعكس .. كانت حسنة النيه و اعطت الفريق فرصه و اتنين و عشره وهو بردو متنيل بنيله !! :rolleyes:

الإشكاليّة هى : ما هو المفروض عمله حين يحدث ذلك؟؟

هل :

1) يتم هجره و إدارة الظهر له والبحث عن بديل له

2) يتم الشد من أزره و مساندته فى محنته

3) يتم دراسة أوضاعه عقلانيّا من أجل إعادته للإنتصارات

أنا عن نفسى....أختار 2 .... و ...3

جميل جدا وانا اتفق مع هذه الاختيارات لكن لماذا نهمل العامل الزمنى؟ يعنى يا ترى هنفضل متمسكين بهذين الاختيارين الى اى مده؟ للابد؟

مممم... وهل من المفترض أن يترتّب على إجابة هذا السؤال أى نتائج تخص إنتماء مشجّعى الفرق الضعيفة لفرقهم؟؟؟

لا هو النتيجه التى اردت ان اصل اليها ان تشجيع الفرق الضعيفه ليس اختيار الاغلبيه :) وبالتالى يمكن اعتباره اختيار شخصى جدا لا يعبر عن القاعده المفروض اتباعها

فيه فرق بين التشجيع (الإنتماء) و الإعجاب

ده صحيح .. عشان كده من يشجعون الفرق الضعيفه عددهم قليل ونسبتهم كذلك ولاسباب عاطفيه لا اعتقد انها وحدها ما يمكن الركون اليه

طب.......ما كل المصريين معجبين بلعب البرازيل.....هل معنى كده إنهم يشجّعوا البرازيل لو لعبت أمام مصر؟؟؟

لا هو معناه ان لو الاتحاد السكندرى لعب مع الاهلى وكان فيه شخص بيشجع الاتنين لانه اسكندرانى وكان الانتصار من نصيب الاهلى لان اداؤه كان اقوى المشجع مش هيقدر يعترض !! هو ممكن يتمنى فى قرارة نفسه الفوز للاتحاد لكن هذا لن ينفى انه لم يكن جديرا بالفوز حتى يحسن اداؤه ويستحق الفوز لاسباب مهاريه وليس لاسباب عاطفيه .. العواطف "وحدها" لا تجعل الفريق الخاسر يكسب

هذا هو تعريف الإنتماء

اذا كان هذا تعريف الانتماء يبقى كثيرون فى مصر ليس لديهم انتماء اذن

لان من يشجع الاتحاد لاسباب عاطفيه هم اهل اسكندريه فقط بينما اهل الاسماعيليه تلاقيهم بيشجعو الاسماعيلى لنفس الاسباب و بتوع بورسعيد بيشجعوا المصرى لنفس الاسباب و الباقيين بيشجعوا الاهلى و الزمالك فهل يمكن ان نقول ان اى مجموعه من هذه المجموعات ليس لديها انتماء؟

عمل كده مش بس علشان بيحب الإتحاد , ومش بس كان عنده الإمكانية لعمل شيئ للإتحاد... ولكن لأنه لمّا لقى جماهير الإتّحاد ملتفّة حوالين فرقتها و بتشّجعها وهيّه حالتها تصعب على الكافر أدرك أن هناك ما يستحق أن يتم عمل شيئ من أجله للإتحاد

انا رايى انه عمل شئ للاتحاد لان الفريق فيه الرمق وهذا هو العامل الرئيسى

لن اجادل و اقول ان وجود الجماهير عامل مشجع فقط وليس مؤثر لكن ليس هو العامل الرئيسى

الظاهر إنك مش واخده بالك إننا مشجّعين و لعّيبه فى نفس الوقت

الظاهر اننا مختلفون فى هذه النقطه :)

وهل معنى قولى أنه يولد مع الإنسان أنه يخرج معه للحياة فى نفس اللحظة؟؟؟معنى كلامى أنه يتشكّل مع تشكيل شخصيّة الإنسان

جميل جدا :) اذن هو شئ قابل للتشكل و التغير .. و الانسان خلال رحلة حياته ومع تكون شخصيته يتغير وقد يتغير انتماؤه ويغير من تشجيع الاهلى لتشجيع الزمالك مثلا بناء على ما يراه امامه من نتائج لكل منهما !!

إذا كان التغيير من أجل تشجيع فريق يحصد البطولات يبقى المسألة ليست مسألة البحث عن هويّة أو إنتماء..... يبقى المسألة أنانيّة و محوريّة حول الذات لأنهم يسعون بذلك لمصلحة شخصيّة تتمثّل فى ضمان التهييص المستمر و راحة البال و الفرفشة وعدم المعاناة أو مكابدة الهزيمة

التغيير لان الفريق لا يستحق التشجيع !! ولا ادرى ما الهدف من تشجيع فريق بصفه ابديه رغم انه لا يستحق التشجيع

واذا كان هناك جيل ارتبط بالفريق لاسباب عاطفيه او لانتمائه لهذا الفريق فكيف يتكون لدى الاجيال التاليه نفس الانتماء اذا لم تر ما يجذبها لهذا الفريق من البدايه !! وكيف يمكن اقناعهم بجدارة هذا الفريق بالتشجيع اصلا !!

ولا افهم ما علاقة اعطاء كل ذى حق حقه بالتهييص و راحة البال

وهل شغل البال هدف فى حد ذاته حتى نتمسك بالفريق الخيبان حتى لا نوصم بالانانيه و البحث عن راحة بالنا فقط

المثال الذى ذكرته يمكن ان نرد عليه بمثال الشخص الذى هاجر ولم يقل انه يقطع علاقاته باهله او وطنه او عشيرته ولكنه يؤثر البعد فى مهجره ورغم هذا يؤكد على انتمائه و تمسكه بهويته !! فهل الانتماء هو فقط ان اقول انى باحب مصر و اهلها و العروبه هويتى و انتمائى وافعالى بتقول اشياء اخرى

خلينا نسال سؤالك الذى سالته من بضعة اسطر عن الانتماء

ما هو الانتماء؟ حب من بعيد لبعيد !! ام مجموعه من الاغانى و الشعارات نتغنى بها حتى لا يرمينا الغير اننا رمينا هويتنا عند اول اختبار و آثرنا السلامه و راحة البال

انا باسال نفسى سؤال من ساعة ما الموضوع بدا و اقول

لو تخيلنا اننا كلنا تركنا الوطن العربى لاوربا او امريكا مثلا .. وفضلنا نقول الحقيقه نحن نعتز باصولنا العربيه و بهويتنا ومتمسكين بها هل يكفى هذا لان يمنحنا الآخرون صك الانتماء؟ واذا كنا فضلنا المصلحه الشخصيه -التى اشعر الآن انها بقت كلمه عيب- و تركنا بلادنا للبحث عن فرص افضل فى بلاد اخرى يكون من حق الغير ان يتهمنا بالانانيه و الانتهازيه و التفرغ للبحث عن المصلحه؟ يا ترى ممكن ننتمى كلنا من على بعد عشان الصوره بقت مهزوزه دلوقت امام عينى !!

عارف انا باقول الكلام ده ليه؟ لان الحقيقه من كلامك و كلام باقى الاخوه الافاضل عن موضوع البحث عن المصالح و الانانيه و النظره الفرديه و خلافه بدات اشك فى انى انا لوحدى اللى بافكر كده رغم ان اى انسان او لنقل معظم الناس هنا فى الغالب بيفكروا اولا فى مصالحهم الشخصيه .. وانا مش باقول ان ده عيب او حرام بالعكس .. انا بس مستغربه من اعتبار هذا حاجه غريبه او مستهجنه مؤخرا !!!!!!

يا عزيزتى.......... لو لم يكن هذا هو منهجنا بعد نكسة 67 لما ظل لدينا رجالا صنعوا نصر 73

عفوا يا محبط .. انا لا اتكلم فى مدى ست سنوات الهزيمه .. كما ان تلك الفتره كان بها ما يؤكد على اننا لم نستسلم للهزيمه فكان حقا علينا جميعا ان نتشبث بالامل فى النصر وقد كان

لكن اما تكون الاحوال على ما هى عليه لسنوات طوال وليس هناك اى رغبه فى الاصلاح الا خوفا على الكرسى ورغبة فى توريث الحكم يبقى من حقنا نقول : يروحوا فى ستين الف داهيه غير ماسوف عليهم

ممكن يكون التشبيه كالعامل الذى لم يعجبه أحوال المصنع فقرّر عدم الإستمرار فى العمل به (رغم أن العامل كان أمامه خيارا أصعب وإن كان أجدى......وهو أن يحاول العامل أن يحسّن من أحوال المصنع من موقعه على رأس العمل..... وهو خيار يحتاج إلى صبر وجلد و عرق و تعب... ويحتاج أيضا إلى جماعيّة فى تبنّى هذا الخيار من أغلبيّة العمّال.... وبالك إنتى.....لو فيه واد عامل فرود و مشرف ورديّة محترم و مهندس فاهم و نيّته خالصة و قرّروا يتلمّوا على بعض و يخلّوا العمّال يتبنّوا خيار تحسين أحوال المصنع فأعتقد أن النتيجة حتكون أفضل ليهم كلّهم و مش بس للمصنع من لو كل واحد فيهم مصمص شفايفه و ساب المصنع و دوّر له على مصنع تانى)

متفقين تماما .. لكن الحاصل غير كده .. الحاصل ان العامل اما حاول يجمع زملاءه على راى واحد راح فرد منهم راح خبص عليه عشان يعمل بونط عند المدير والعامل اترفد .. يا ترى مفروض ساعتها بردو يتمسك بالمصنع عشان لا يتهمه احد بالتخاذل والرغبه فى ترييح النفوخ و توفير الجهد؟

أنا متعجّب من منطق كل من يريد أن يسلّم بالهزيمة لمجرّد أننا أصبحنا عرضة للهزيمة...

مش يمكن ده لاننا لا نتحرك الا بعد ان نهزم !! ويبدو اننا لا نعمل بكفاءه الا تحت هذه الظروف السوده وغيرها لا

محدش بيحب يتهزم يا محبط :) لكن يبدو ان بعض الامم لا تنجح الا بعد ان تمر بهزيمه ثقيله وضربه قويه على الراس قد تقتلها وقد تكون ما يشبه القلم وتتسبب فى اعادة الحياه اليها

ولو قلنا إننا ضعفنا قوى ومافيش فايدة نبقى إنهزاميين

من المبهج و المفرح اننا نعرف ان فيه فايده .. يبدو ان خلافنا عن المعطيات اللى تخلى الواحد منا يقول فيه فايده .. ويمكن انت تكون شايف شئ يخليك تقول ان فيه فايده وانا مش شايفاه

ولو قلنا إننا ضعفنا قوى و كل واحد يلحق يشوف نفسه نبقى نفعيّين

الحقيقه انا لن ادعى ان حاليا لا افكر بهذه الطريقه .. طبعا مش على حساب غيرى ولكن .. الظروف حوالينا بتقول ان ناس كتير بتفكر كده يمكن من غير حتى ما تاخد بالها

ولو قلنا إننا ضعفنا قوى و مش فارقه معانا نبقى متبلّدين

ممممم .. اعتقد ان هذا النوع من الحوارات بيقول انها فارقه معانا :) على الاقل لحد دلوقت

ولو قلنا إننا ضعفنا قوى ولقينا نفسنا شمتانين يبقى إحنا مش إحنا.. إحنا ناس تانيين

شمتانين فى مين؟ :) انا شخصيا شمتانه فى فئه معينه من البشر وهى بتتحرك فى خوف و فزع خوفا على الاوضاع التى ظنت انها استقرت لها لسنين طوال و دلوقت بيجروا فى كل اتجاه مدعين الاصلاح .. وهو فى الحقيقه اصلاح يعود فى الآخر عليهم وعلى مصالحهم بس .. ولهذا لا اشعر باى اسف عليهم

يبقى : الإقتناع.... الإحترام...... تلاقى  المفاهيم....قبول الهويّة الجديدة والإرتياح لها أو الإنسجام معها.. (وهى ليست عاطفة كما يترائى لكِ بقدر ماهى المكوّن الإنسانى و المجتمعى للأمر)

اذن لو تم هذا الامر لهويات جديده غير عربيه سنتقبل الامر بروح رياضيه؟ "ده سؤال على هامش المناقشه" خصوصا ان الامور الانسانيه تتغير مع مرور السنين .. ببطء اينعم لكنها تتغير :) مثلا مثلا يعنى حالة اللغه العربيه اللى يصعب على الكافر لدرجه تجعلك تتخيل المجتمع فى المستقبل وقد انقسم لجزئين : جزء يتحدث لغات غير عربيه بطلاقه ولا يجيد العربيه الا طشاش .. وجزء يتحدث العاميه فقط و العربيه بالنسبة له لغه مقعره يتحدث بها ناس دمهم تقيل !! ربنا يستر

الهويّة العربيّة تقاوم بمنتهى الشراسة وهى فى قاع إنحطاط لم يسبق لها أن وصلت إليه.. ولا زالت صامدة.... و ستظل كذلك........

ان شاء الله

هناك فرق بين الإنتماء و التبعيّه

هناك فرق بين الهويّة و النفعيّة

الغريبه ان من شجع الفريق من البدايه استنادا على حرفية ادائه لا يوصم بالنفعيه بل يرحب به ويعتبر انه قام بالاختيار الصحيح

كما ان هذا لا يجيب عن سؤالى فيما يتعلق بالاجيال التاليه .. التى لن يكون لديها ارتباط عاطفى مع الفريق الخيبان فهل يا ترى ستوصم هى الاخرى بالنفعيه و التبعيه؟

ياعزيزتى..... جميع الدول العربية يجمعها (من المنظور البريجماتى الصرف) وحدة المصير

يا محبط ما انت عارف هذا و انا كمان درسته فى كتب التاريخ

وكل ما ذكرته من اسباب للوحده جميل على المستوى النظرى لكن ليس له اى وجود على المستوى التطبيقى

إوعى تكونى من مدرسة مفيد فوزى والاّ حاجه

انا سالت نفسى امبارح هو انا ليه باتكلم فى الموضوع ده كده؟ :) ولقيت الاجابه انى بادور على حل من اتنين

يا اما اقتنع ان الهويه العربيه لا غنى لنا عنها من خلال كلامك ويبقى كويس لانى حتى الآن لم ابحث لنفسى عن اختيار آخر

يا اما هاقتنع ان فعلا هى يمكن الاستغناء عنها و ابتدى ادور على حاجه تانيه

[Scorpion]

إقتباس (Scorpion @ Feb 17 2004, 01:03 AM)

بعد قرائتي للجرعات المكثفة من المداخلات الاخيرة التي تعقبها دائما حالة توهان... افتكرت جملة سمعتها من فترة كانت بتقول :

لو انت صح و الباقي كلهم غلط تبقي انت غلط و علشان تبقي صح لازم تبقي غلط...

عشان كده انا بقول بكل قوتي : انتم صح...

و بالمناسبة اريد ان ابدي اعجابي الشديد بشخصية مغترب الغرباوي التي في رايي ستفوق شخصية الطراودي المتامرك....

My Compliments 

الصحيح انك اقتنعت اننا صح بس مش ها تقدر تقول اننا صح

يا سلام يا كوتش.... حضرتك يعني خليتني مقتنع نظام شئت أم أبيت برضه...

أنا مش بقول أنكم صح... ده انا بقول أنا غلط

عشان كده قررت أن أمسح من نافوخي بأستيكة كل العصور اللي عدت علي حتة الأرض اللي أتولدت عليها ...

قررت أن يكون وجودها ابتدي بس بدخول العرب...و قبل كده كله كان برابرة و تخلف...و أم كلثوم عمالة تغني اللي شفته قبل ما تشوفك عينيا عمر ضايع يحسبوه أزاي عليا...

و مش حهاتي جملة بجملة هنا... ماعنديش صبركم...

و سأشجب الفراعنة الكفرة

و سأستنكر القبطية الجاهلة البربرية

و بالروح بالدم نفديكي يا عروبة

و تحيا الجمهورية العربية المتحدة....

تم تعديل 17 فبراير 2004 بواسطة Scorpion

[Farida]

يا جماعه انتوا ناسيين ان اللى بيلعب فى الملعب مننا برضه المشكله فى المتفرجين قاعدين يتفرجوا و يتفرجوا و يروحوا يناموا و خلاص .... انا رأيي ان التشبيه ينقصه الكثير ما علينا ...

اللى انا ملاحظاه ان معظم اللى بيتكلم على الإنتماء عايش بره و حكايه الهويه معلهش حاتفرق معانا فى ايه ؟؟؟؟؟؟ المهم قيمتنا فيما ننتجه و احنا انتاجنا صفر كبيييييير ايه اللى استفدته من انى زماان كنت و كنت و عملت و سويت و ايه اللى فرق ان العرب لما دخلوا كان فتح و لا كان مش فتح المهم الحاضر و المستقبل شوفوا امريكا كانت ايه و ابتدت ازاى و بقت ايه ...... انا دلوقتى الدين الإسلامى هو دين الأغلبيه و اللغه العربيه هى اللغه الرسميه و جغرافيا احنا فى مكان اسمه مصر ....الموضوع دين و لغه و مكان احنا فين من ده كله قصدى المهم ايه اللى بيربط الناس ايه اللى احنا بنعمله ؟؟اللى جوه بيعملوا ايه و اللى بره بيعملوا ايه بدل الكلام ؟؟؟؟؟؟؟؟؟

[إبن مصر]

بهدوء وبدون عصبيه يا سكوب!!!

انت الان متعصب وبتهاجم شىء لم تطالب انت به نفسك فى الماضى على حسب ما اتذكر..

فبالراحه كده يا حبيب قلبى..

اولا :

الفراعنه على عينى وراسى حضاره يتمنى العالم ان ينتمى اليها لا غبار على ذلك... ولكن انا وانت نعرف انهم من ناحيه الايمان والعقيده كانوا على باطل!!!!

صح؟

يبقى ايه لازمته التهكم !!!!!!!

ثانيا القبطيه المسيحيه ( وليس البربريه ... **** حين تتحدث عن احد فترات تاريخ مصر بما يحويه من زخم وان دام ل 700 سنه فهو تاريخ يفخر به العالم... فاهم.....) فلا ينكر الا جاهل ما لهذه الفتره من اهعميه ناريخيه.. للديانه المسيحييه!!!!!

فاول دير فى العالم كان فى مصر..

واول من ترهبن فى العالم كان فى مصر.....

وعصر الشهداء اطلق على ما تم فى مصر.....

اكبر عدد من القديسين فى العالم من مصر.....

هل ذهبت الى المتحف القبطى؟

هل تعرف عنه شيئا .... هل يذهب اليه مسيحيى مصر الى فى رحلات الكنيسه او الكرماس؟

هل تعلم لما سميت المعادى باسمها يا استاذ....

سميت نسبه الى المنطقه التى عبرت منها العائله المقدسه الى الضفه الاخرى من النيل فى طرقهم الى اسيوط........باستخدام المعديات

فاطلق عليها المعادى منذ هذا الحين.....

**** ولا تقل بربريه.....لا اسمح لك وانا المصرى المسلم العربى ان تتفوه هكذا بحق تاريخى...

اما ما يخص العرب .... ياعربى ....

فلا انا ولا انت ولا التاريخ يذكر اسم قائد حركه مقاومه العرب المحتلين لمصر القبطيه..

ولا انا ولا انت ولا التاريخ يذكر المجازر و التنكيل الذى عانى منه شعب مصر ( على غرار شعب الاندلس بعد سقوطها ) ليتحول من المسيحيه الى الاسلام..

ولا انا ولا انت ولا التاريخ يذكر معارك الاحتلال القويه والتى مات فيها ابناء مصر الاقباط المسيحيين وهم يحاربون الغزاه العرب اللهم الا معركه الاسكندريه وانت تعلم وانا اعلم والتاريخ ذكر انها حسمت للمسلمين العرب بمساعده اهل الاسكندريه...

يبقى ليه التهكم!!!!!!

ثانيا لم اسمع هذا الاعتراض من قبل حين اشرت الى العوام ..... يبقى فيه حاجه اتغيرت..

ماشى

بس التاريخ والى فى القلب عمره ما يتغير يا صاحبى........

بل اسمح لى ان اذكرك بما قاله الانبا جريجروس فاكره طبعا .....

فى خطبته الشهيره فى ثوره19 ...

اذا كان الانجليز اتوا ليحتلوا بلادنا دفاعا عن قبط مصر ... فانا اقل.....

ليمت القبط وليعش المسلمين احرارا.......وعلى فكره الخطبه دى كانت فى جامع

حصل ولا لأ؟؟؟؟؟؟؟؟

رد يا مصرى....

بجد زعلت منك يا سكوب ما كنتش اتخيل انى هارد واحتج عليك فى يوم من الايام...

يبقى نجحوا فى الى عايزينه....

مبروك عليك وعلينا.....

ولسه للى ما بيفهمش معناها بقولها تانى

انا مصرى عربنى الاسلام......

ابن مصر

[Byte]

قشطه جداااااااااااا

بلا عرباوى بلا فرعوناوى

الظاهر ان معظم المصريين اليومين هويتهم شعبولاوى روش طحن عديم اللون والطعم والرائحة!

نسميه الهوية البامباكاوية طحن!

تم تعديل 17 فبراير 2004 بواسطة Byte

[Mohammad Abouzied]

حيلك شوية يا سكوب انا مش قدك

مين قالك اننا بنمسح كل شئ ما عدا العربية بالعكس انتم الي عوزي نتنكرو على العربية وجودها مع انها موجودة واصولها وجذورها منكم انتم يعني ابو العرب سيدنا اسماعيل امه مين ما هي ستنا هاجر وهي اصلها ايه كان من مصر يبقى ازاي عاوزنا نمحي كل العصور الي فاتت ولكن الوقت الحالي وصلت لايه يا سكوب انك عربي وضمن منظومة العروبة والقومية العربية

طيب مين اقرب الناس لأقباط مصر على مر التاريخ هل دولة البطالمة ولا دولة الرومان ولا الدولة العربية ؟؟؟

انت جاوب بنفسك

هل تعتقد ان اليهود لو حققو حلمهم واستولى على مصر هل سوف يتركو الاقباط لانهم مصريين ويطردو المسلمين لانهم عرب ؟؟

انت جاوب بنفسك

عندما فرضت بريطانيا الحمايه على مصر واحتلتها قبل الحرب العالمية الاولى هل انصفت الاقباط على المسلمين العرب في مصر ولا ضربت الكل ولم تفرق بين مصري مسلم او مصري مسيحي واعتبرتهم كلهم عرب

انت جاوب بنفسك

يا عزيزي سكوب الاقباط المسيحيين هم اكثر الناس طلبا بالعروبة لانهم حسين بها ومندمجين معها

والمسيحي القبطي اكثر تمسكا ببلدة ولا يبيعها ولا يبيع عروبتها مهما سائت به الاحوال

أما من يدعي عكس ذلك فاما جاهل بأقباط مصر وخطهم الوطني او يحاول عمل جدار نفسي لتحطيم التألف الاجتماعي بين المصريين وسبق قلت لك ان 5% من ابناء مصر اقباط مسحيين وملتزمين بالدين المسيحي افضل من 100% لو كانو مصريين غير ملتزمين وملحدين

[إبن مصر]

قشطه جداااااااااااا

بلا عرباوى بلا فرعوناوى

الظاهر ان معظم المصريين اليومين هويتهم شعبولاوى روش طحن عديم اللون والطعم والرائحة!

نسميه الهوية البامباكاوية طحن!

مداخله غريبه ولكن بما ان حريه التعبير عن الرأى مكفوله فلك مطلق الحريه ان تقول ما تريد حتى ولن لم يفهمه احد او اضطررت لشرحه كالعاده كى يفهمه الناس طالما فى حدود اداب الحوار..

حقك

[Mohammad Abouzied]

حكم البرابره ساد مصر فترة حكم البطالمة والتي انحصر حكمها على شمال مصر فقط اما جنوبها وقع في ايدي البربر فعلا

[إبن مصر]

ليس هذا ما قصده سكوب بالبرابره يا محمد!!!!

انا عارف جزاك الله كل خير .. ولكن سكوب قصد شيئا اخر هو يعلمه وانا اعلمه...

[فــيــروز]

قشطه جداااااااااااا

بلا عرباوى بلا فرعوناوى

الظاهر ان معظم المصريين اليومين هويتهم شعبولاوى روش طحن عديم اللون والطعم والرائحة!

نسميه الهوية البامباكاوية طحن!

طيب وليه بس كده يا اخ بايت !! :)

الحقيقه المشكله اللى تاعبانى فى الحوار معاك حاجه واحده

انك بتعمل تصنيفات و تعميم بسرعه خالص .. وممكن تضع قاعده بناء على افكارك و تتخيل ان من يختلف معها خارج على الناموس :) "يطلع ايه الناموس ده" :) مع ان الاختلاف ده هو سبب ثراء الحوار

واللى يعرف يقول قشطه خالص يعرف يقول كلام مجعلص من نوعية "اسمح لى اختلف مع سيادتك وليكن ما يكون" :rolleyes: يعنى موضوع القشطه ده على راى واحد روش الهدف منه اننا نمشى شوية اكسجين فى الحوار عشان رطب قوى

:)

آه لامؤاخذه يابن مصر .. انا مش قصدى والله اخرج على الموضوع انا بس حبيت اوضح للاستاذ بايت موضوع القشطه و الكريم شانتيه ده ايه سببه :)

تم تعديل 17 فبراير 2004 بواسطة فــيــروز

[se_ Elsyed]

هو ممكن نعلق ولا خلاص قفلتو الحلقه وبترشوا ميه فى الاستوديو ولا ايه؟

سأعطيكى المجال.....سأعطيكى المجال....سأعطيكى المجال

:rolleyes: :) :)

الله يسامحك يا وليد ..... انا لو كرهت المنتدى هاتبقى أنت السبب الأول .... يا عم ده الواحد عايز ياخد إجازة أسبوع بدون مرتب علشان يقرأ تعليقاتك في أي موضوع ....

أخوك س س الصغير لي عندك طلب والله يخليك ماتكسفنيش ....

ممكن ممكن ممكن يعني تعمل لنا ملخصات زي اللي كانت بتتباع قدام الجامعة وتوزعها على الغلابة اللي زيي .... بــــــليز يا جبار ...

س س ( واحد روحه في مناخيره ... تخيلوا إنتوا شكله يبقى عامل إزاي )

[Scorpion]

الفاضل ابن مصر...

سهر الوالد ادامه الله لي علي تاديبي... فاحسن تربيتي و تاديبي...

و لن اعتقد ان في سني الان ساكون بحاجة الي قرين لي ليعلمني الادب الذي لا اجده في كثيرا من المداخلات هنا...فاذا كنت لم تفهم مغزي مداخلتي... فهذه مشكلتك ...ولكن لا تتعلل بقلة ادبي...فلن اسمح لكائن ماكان ان يسمح لنفسه بنعتي هكذا..

اما اذا كنت بمداخلتك هذه تريد ان تبلغني رسالة فلقد نجحت تماما في ذلك... رسالتكم وصلت...

يا خسارة...

تم تعديل 17 فبراير 2004 بواسطة Scorpion

[إبن مصر]

تم حذف ما ألمك واعتذر عنه لكتابتى له بنفس الروح التى كتبت انت بها مداخلتك...

اعتذر لك ثانيه..

ولو فعلا الرساله وصلت ماكنتش كتبت يا خساره!!!

انا الى باقولهالك ... ياخساره

اعتذر ثالثه.

ابن مصر

[فــيــروز]

وبعدين بقىىىى

من فضلكم من فضلكم .. ماتخرجوش عن اطار الموضوع الاساسى بزعله مفتعله :)

ويا ريت مايبقاش فيه الحساسيات دى بين اتنين اصدقاء من زمن طويل

يا ريت الاخوه ابن مصر و سكوربيون يصفوا الموضوع بينهم وبين بعض على الرسائل الخاصه ويعاتبوا بعض و يخلصوا كل الزعل ويرجعوا تانى للموضوع بروح صافيه ..

واحده حشريه :rolleyes:

[Byte]

كل حديثنا السابق عن الهوية كان عن الهوية التى نتمناها ، الهوية التى نتخيل وجودها ، الهوية التى فى خاطرى!

فالهوية القبطية - الفرعونية ، فى الواقع شبه معدومة!

اما الهوية العربية فشبه مضمحلة

اما الهوية المصرية بس ، فراجعوا مداخلة براود

ان شئت ان نتحدث عن هويتنا الحالية على ارض الواقع فهى هوية اللمبى، وهو ما جعل كلمة القشدة جدا تستوقفنى

هى هوية الشباب الطحن

هى هوية بكام

العروبة بكام

مصر بكام

اهلى بكام

هى هوية ال بدون هوية

ياترى كلامى وضح يابن مصر، ولا لسة محتاج معانى مفردات

فى الحقيقى بقالنا سنين بنعيد نفس الكلام ، والواحد بقى فاكر انه مش محتاج يشرح قصده

لدرجة انى كنت بافكر نقول

المشكلة 177

ونحزن

المشكلة 315

ونضحك بسخرية!

عموما، فعلا المنتدى فاضى الايام دى ، ربما هربا من الفكر الطالبنى كالعادة!

يمكن الافضل الواحد يسمع كلامك وياخد اجازة يريح فيها دماغه

[Mohammad Abouzied]

يابيت لو الواحد اول مرة يسمع عن المشكلة رقم 315 ازاي يضحك بسخرية ، بالتأكيد الواضح حاليا هو ان المصري عربي شاء ام ابى حتى لو كانت هذه الجملة تزعلهم ولكن هل ممكن الواحد يتبرأ من ابوه ومن امه ويقول محدشي أخذ رئي في اختيار من هو ابي ومن هي امي

فنحن ولدنا كدا وسوف نموت كدا سواء رضينا ام ابينا

ولكن ما تتكلم عنه يابيت هو التربية والغزو الثقافي الخارجي وهذا سوف يضيع ويختى اجلا ام عاجلا إذا سادت الثقة واتضحت الامور للشباب المصري المضلل