اذهب إلى المحتوى
محاورات المصريين

خرشوف على طريقتى


Salwa

Recommended Posts

احبائى.

انهاردة حقول لكم اكثر من طريقه لعمل الخرشوف.

اولا...مسلوق...ودى سهل جدا...ننظف الخرشوف وننزع القلب ونقسمه على 4 ونسلقه فى ماء يغطيه..وبعد مايستوى نضع عليه

ملح وفلفل وزيت زيتون وعصير ليمون.

ثانيا....مشوى...ننزع بعض الورق الخارجى من الخرشوف...وبالسكين

نشيل اول الاوراق...بحيث ميكونش زى الوردة...يعنى يبقى مسطح.

نغسله كويس جدا،طبعا، ونضع على سطحه قليل من ملح وفلفل

وثوم وزيت زيتون....وندخله الفرن....

يؤكل بنزع الاوراق...ورقه ورقه...واكل الجزء من ناحيه القلب..ثم القلب

ثالثا.....الخرشوف المحشى.

ننزع الاوراق الخارجيه....ثم نسلق الخرشوف نصف سوا...وبملعقه

صغيرة ننزع الاشواك التى فى قلب الخرشوفه.

نكون محضرين لحمة،عصاج،نحشى الخرشوف..ونرصه فى صينيه

او برام،حسب مزاجكم،ونحضر الصلصه ب......تحمير3 فص ثوم متخرطين صغير..فى زيت زيتون ثم نضع فوقه كوب ونصف عصير طماطم

ثم نضيفه على الخرشوف وندخله الفرن.

ممكن نغطيه بورق الومنيوم....كده ياخد وقت اقل فى الفرن...وقبل

مانطلعه من الفرن ب5 دقائق نشيل ورق الالومنيوم علشان يتحمر

الوجه.

رابعا...محشى الخرشوف...بارد.

نجهزه...زى اللى باللحمه...بس ده نسلقه شوية اكثر.

نحشيه بخليط من..تونة وطماطم وفلفل اخضر وزيتون اخضر وممكن

معجون كابوريا...ممكن جمبرى مسلوق.

وبالهنا والشفا.

سلامى.

(وَمَنْ يَقْتُلْ مُؤْمِناً مُتَعَمِّداً فَجَزَاؤُهُ جَهَنَّمُ خَالِداً فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَاباً عَظِيماً)

[النساء : 93]

رابط هذا التعليق
شارك

كتبت سلوى

ثالثا.....الخرشوف المحشى.  

ننزع الاوراق الخارجيه....ثم نسلق الخرشوف نصف سوا...وبملعقه  

صغيرة ننزع الاشواك التى فى قلب الخرشوفه.  

نكون محضرين لحمة،عصاج،نحشى الخرشوف..ونرصه فى صينيه  

او برام،حسب مزاجكم،ونحضر الصلصه ب......تحمير3 فص ثوم متخرطين صغير..فى زيت زيتون ثم نضع فوقه كوب ونصف عصير طماطم  

ثم نضيفه على الخرشوف وندخله الفرن.  

ممكن نغطيه بورق الومنيوم....كده ياخد وقت اقل فى الفرن...وقبل  

مانطلعه من الفرن ب5 دقائق نشيل ورق الالومنيوم علشان يتحمر  

الوجه

هذا هو ماقصدته

شكرا جزيلا

مصر أكبر من نظام الحكم الفردى الديكتاتورى الإستبدادى

الذى فرضه علينا عسكر حركة يوليو فى الخمسينات

وصار نظاما لحكم مصر

برنامج الرئيس الإنتخابى لإسكان فقراء الشباب ..

سرقه مسؤولون وزارة الإسكان مع المقاولين ..!

رابط هذا التعليق
شارك

  • بعد 7 سنة...

ربنا يفتحها عليكي فين ماكنتي ياسنيوريتا المحاورات ..

اول امبارح اشتريت خرشوف مجمد .. بيني وبينك عمري ماعملته .. كان في ذهني اعمله باللحمة المفرومة كنت سمعت عن الطريقة دي زمان بس مكنتش متاكده هي بالصلصة بس ولا في بشاميل كمان .. قلت هبقى ادخل على النت اشوف الطريقة وانشغلت .. النهرده لقيت الموضوع ده بالصدفة في قائمة الموضوعات المشابهة وتقريبا كده عرفت الطريقة والاهم اني حسيت الموضوع مبعوت لي بشكل شخصي يفكرني بالكيسين الي في الفريزر ..

بس سؤال بعد اذنك لو عندك فكرة ..

بالنسبة للخرشوف المجمد هو طبعا مجهز مسبقا زي الاطباق كده .. هل اسلقه برضه نصف سليق الاول ولا احط فيه العصاج مباشرة وعلى الفرن ؟ ؟

وشكرا جزيلا على الطريقة الي جاري تنفيذها باذن الله ..

..إذا دعتك قدرتك على ظلم الناس فتذكر قدرة الله عليك ..

رابط هذا التعليق
شارك

اهلا اهلا عزيزتى ضحى .

نورتى المكان ..

يااااه...الموضوع ده له كام سنة دلوقت؟؟؟

شوفى ياستى ..طبعاا الخضار المجمد بيكون مسلوق نصف سلق ..

يعنى حضرتك مثلا تطلعى الأكياس من الفريزر قبل التحضير بربع ساعة ..

تكونى مجهزة العصاج....يعنى بصلة مفرومة فرم كبير شوية تحمريها الأول ( زى ماتحبى ف زيت او سمن ..انا شخصيا بستعمل زيت الزيتون ) ولما يبقى لونها اصفر شوية تضعى اللحم وتضيفى ملح وفلفل ..

تحشى الخرشوف ..

تكونى محضرة الصلصة زى ما كتبت ( من كام سنة ) يعنى ثوم مقطع صغير تحمريه وتضيفى الطماطم المعصورة او صلصة جاهزة ...يعنى تضيفيها ف الصينية وفوق الخرشوف شوية ..

لو عايزة تضعى باشميل ...مفيش اى مشكلة ..

ممكن تعملى شوية باشميل ..(( انا بعمل كدة على فكرة )) ..وتضيفيها فوق كل خرشوفة فقط..

لاحظى انك وضعتى صلصة ف الصينية ..

وعلى الفرن ...

يعنى بتطلع شكلها شيك قوى ..باينة وردات ف الصينية ..

شوفى ياضحى ؟؟؟

خالتى كانت بتعمل الخرشوف بطريقة ....!!! حقولك عليها بس دى عاوزة يعنى طولة بااااااال..بس والله سهلة قوى قوى ..

تعملى الخرشوف عادى( بعد سلقه لو كان صابح يعنى ) وتحشية لحمة مفرومة معصجة ..

وتلفى كل خرشوفة يعنى واحدة واحدة ف ورق جلاش ..

او عجينة جلاش رفيعة ..يعنى تعمليه وحدات ..

تدهنيها بالبيض وتدخليها الفرن ..

بيبقى تحفة ..

يعنى تقطعيها على اتنين ويبقى لها تلات الوان ..

وآهو تغيير ..

اصل الصراحة انا بحب الخرشوف ..

وبحب البسلة مع الخرشوف كمان بتبقى ممتازة للولاد ..جربى تعمليها ومعاها كفتة تسقطيها فيها وتبقى وجبة كاملة .

اى خدمة انتى تؤمرى ..

بالهنا والشفا..

:roseop: :rolleyes:

(وَمَنْ يَقْتُلْ مُؤْمِناً مُتَعَمِّداً فَجَزَاؤُهُ جَهَنَّمُ خَالِداً فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَاباً عَظِيماً)

[النساء : 93]

رابط هذا التعليق
شارك

الله يسعدك ..

وصفك للطريقة خلاني تحمست لتجربته .. بيني وبينك على قدر مااكلت وذقت من اشياء غريبة اعتقد والله اعلم اني عمري ماذقت الخرشوف لاني مش متخيلة طعمه خاصة بعد ماقلتي لي انه ممكن ينحط في ورق جلاش ..

هجرب باذن الله الطريقة العادية بالصلصة واحتمال اعمل جزء صغير عليه بشاميل وباذن الله المرة الجايه هجرب حكاية الجلاش دي .. وطبعا لو بقي لي صوابع بعد مااذوقه اكيد هكتب لك عملت ايه ..

شكرا جزيلا ..

..إذا دعتك قدرتك على ظلم الناس فتذكر قدرة الله عليك ..

رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة
×
×
  • أضف...