مذكرات طبيبة صغنونة فى الصحراء

[بنت شعنونة]

المرادي انا بكتب وحالتي النفسية غبية جدا

لا هيا حلوة لا وحشة

ف معلش والسماح مقدما لو ما عرفتش اعبر او اقول الل جوايا صح

"وش مش طايق نفسه " + "وش محرج"

انا كتبت الموضوع دا 90% منه عشان اسلم عليكوا عشان السفر و 10% زعل... "وش لسا مش طايقني برضه"

كل مشاعر الدنيا جوايا دلوقتي

فرح . زعل.. خوف.. رعب.. استعداد.. طب.. فشل.. حزن.. كلللللل المشاعر هاتلاقوها جوايا

ان شاء الله السفر خلاص يوم السبت الفجر..

ها اقعد هناك شهر وانزل اخر الشهر اجازة 3 ايام

دا النظام هناك

اول مرة ابعد عن بابا واخواتي وانام بعيييييد عنهم.. خايفا اوي عليهم كلهم.. واخويا كمان داخل الجيش يعني كله ها يبقى بعييد عني

عندي احساس برعب قااااااتل لا حاجا تجرى لحد وانا بعيدة كدا

"وش بيعيط"

عندي احساس بالفشل ماشي معايا من هنا لحد هناك

مرعووووبة منه جدا

احسن اعمل مصيبة هناك

او ما ابقاش قد "المسؤووووولية"

افف بقيت اكره الكلمة السودا دي..

فرحانا جدا جدا اني ها ابقى لوحدي بعيييييد عن المشاكل واجرب بقى العيشة كانسان مستقل بذاته مرة من نفسي

بدون شيلان هم حد "ولو اني ها اشيله برضه"

عاوزة اعمل اني مخاصما العيال اخواتي وانا ماشيا عشان اوحشهم ويبطلوا يغلسوا عليا وانا معاهم "يمكن يتعدلووووووووو ويبقوا يرجعوا بدري"

زعلانة اوووووي اني ها ابعد عنكم

مطروح مافهاش سايبر كافيه اصلا باين ولا فيش كمبيوتر في الوحدة "مركز حضر"

دا غير انه المكان فااااااااضي على ان الواحد يخرج البلد اصلا

ف ها توحشوني جدا جدا جدا جداااااا

عمالة اخد حاجات غريييييبة معايا؟؟

اشي صابون على اشي لبن؟؟!!!!!!!! على كاكاو على بطانية لعى مبيد حشري!!!!

حاسا اني رايحا صحراء جرداء لا زرع فيها ولا ماء فعلا!!!!!

"وش مرعوب من اللي جاي"

نيجي بقى لل 10%

زعلالالالالالالالالالالانة

مش منكم

لا مني انا... "وش محرج وحزين"

لآني عملت حاجا والناس اتضاقت منها وانا ما عرفتش اصلحها

بتضايق جدا جدا لما اعمل حاجا بايخا

صحيح كلنا بشر وبنغلط

بس اهوا... اوقات يبقالي اخطاء غبية فعلا.. مع ان ربنا العالم ان كان قصدي هزار برء ونشر خبر اتنشر في الجرايد فعلا..

عتب..

بعتب على اللي زعل من الموضوع

ليه بقى..

لما يبقى عندي طالب مؤدب في الفصل "واحتمال يكون محبوب حبة يعني" ولما يجي يعمل اول غلطة ليه

اروح ماسكة كرباج ولسعاه ضربة قدام كللللللل المدرسة...

...........

ياااااه صعبة اوي على نفسه دي

خصوصا لما يكون فاكر انه تلميذ مؤدب فعلا.. ومش مشاغب

ودا اللي حسيته

ما انكرش اني غلطت

انما حد طب يا خدني على جنب وقلي ايه اللي هببتيه دا..

انا فعلا مش زعلانة من حد

كتامندو دا اخويا وهوا عارف اني عمري ما ها ازعل منه ابدا

وفيروز حبوبة وعاقلة وانا فعلا مش زعلانة منها

انما هوا عتب للناس الل اتضايقت من الموضوع مش اكتر..

"وش حزين"

الزعل الل بجد بقى..

ان الموضوع نفسه اتشال

موضوع الأعتراض

وانا كنت سافرت ومالحقتش اشوف مين كتب ايه او ايه الل انكتب فيه..

بجد زعلت جدا انه اتشال...

وزعلت اني اشوف غلاوتي عندكم واقولكم انا ماشيا وماحدش يقول حاجا كدا؟؟؟؟؟؟!!!!!

"هوا انتوا ما صدقتوااااااااا والا ايييييييييييييييه"!!!

"وش مفروس"

وقلت لما ارجع ها الاقي مظاهرات في الشوارع بقى وبتاع

بس يالله بقى

خدعوووووووووووووونييييييييي

معلش انا عمالة اعك في الكلام

بس اعذوروني بجد نفستي غلط في غلط اليومين دول

بس على قلبكوووووواااااا برضه

حتى لو 3 ايام كل شهر... " ها اعيط تاني"

وبجد بجد

انا بحبكم جداااا

وماتزعلوش مني....

"سي حنفي...... ماتزلعش مني ابدااااااااااا"

[فــيــروز]

"سي حنفي...... ماتزلعش مني ابدااااااااااا"

حففك !!

يا لينا .. قصدى يا شانا مش عارفه اقول لك ايه

انا مش عاوزه اتكلم فى موضوع الزعل تانى

عاوزه اتكلم فى موضوع السفر

يمكن لانى باحس انه من التجارب المهمه جدا فى حياة اى انسان و بتديله خبره عظيمه و بتسيب فى نفسه اثر لذيذ .. ده احساسى بيه يعنى

عشان كده يا ريت تحاولى تكتبى مشاعرك و انطباعاتك فى التجربه دى لان اكيد فى يوم من الايام هيبقى جميل انك تقريها و تستعيدى ذكرياتها ..

ان شاء الله تبقى اد المسئوليه وتوفقى فى عملك الجديد و يكون هذا العمل طريق جديد الى رضا ربنا ..

كان فيه مظاهرات فعلا بس قوات الامن المركزى بقيادة كابتن محمد ابو زيد دخلت الجماهير الغفيره العشه من بدرى بدرى نظام بيتك بيتك :-) ويا ريت حد يكون عنده نسخه من الموضوع عشان تشوفى المظاهرات على الفيديو حيث انها فاتتك لايف

تمنياتى لك بكل توفيق و سعاده ان شاء الله و مستنيين مغامرات شعنونه مع الناس المطحونه

[بنت شعنونة]

ربنا يخلكي يا فيروز...وربنا يسمع منك يااااااارب

على فكرة يا جماعا

من دقيقة واحدا بس

انا عرفت ان ماما سلوى كمان زعلانة جداااا

وبتفكر تسيب المنتدى لآنها حست ان الكلام موجه لها هيا كمان...

لكن انا فهمتها كلام كتامندو الل قالهولي

وربنا يسهل ومش تزعل بقى..."وش محرج"

[mnman]

شانا...........

لا لا لا .... مش ناقص غير انك تحلفي بغربتك... السلوم فردة كعب من الاسكندرية.... اكيد حتوحشينا كلنا.... بس صدقيني هو اول اسبوع يعدي و الوقت بعد كدة فريرررررررررررررررررررررررة.... حد يصدق ان انا بقالي في السعودية 8 شهور.... الوقت بيعدي زوووووووووو..... و مش حتلحقي تفتقدي حد الا وتتلاقي الشهر خلص......

ثم انا سمعت ان السلوم مش بلد مقطوع كدة...... انتي رايحة السلوم ولا مرسي مطروح..... لو مرسي مطروح يبقي جميل جدا.... لو السلوم انا واثق انك حتصرفي امورك بطريقة تبهرك انتي نفسك.... كلنا كدة لما نكون داخلين علي شئ جديد نبقي مرتبكين و خايفين لكن اول منلاقي نفسنا جوة المعمعة بنتصرف ولا بوش في زمانة.. أضحكي بقي وفكيها وتروحي وترجعي بالف سلامة والسلام امانة للاخ العقيد.....

[متفائل]

لما لقيتك يا شانا كاتبة موضوع مقتضب كده ألت أكيد زعلانة شوية

بلاش تبقي حساسة أوي و الجماعة مكانوش يقصدوكي في موضوع ( نانسي ) كانو بصراحة أصدين رد حشيش (حشيش أوعا تضرب)

ان شاء الله تستفيدي من تجربة السلوم وربنا يوفقك في عملك وفي حياتك كلها

وان شاء الله تلاقي سيبر تكلمينا منه

وياريت تكتبلنا يوميات شعنونة في السلوم باسلوبك الرشيق

على فكرة ممكن ترتاحي أوي في الاجواء النقية و البعيدة عن الخنقة بتاعة القاهرة (بحر وصحراء وطبيعة بسيطة مش معقده ممكن تريحك جدا جدا انا مجرب الحكاية دي لمدة سنة في العريش وسنتين في ليبيا ) كان نفس الظروف البيئية

ومككن تاخدي اقتراح سي السيد في الاعتبار

وترجعيلنا بالعربية الجيب الفور باي فور

[بنت شعنونة]

سقراط...

انت تأمر.. ها اجيبلك ناقة معايا من السلوووووم محملة ياقوت ومرجااااااان و رز معمررررر

لايت هاوس.. انا حكيييت اهو اديكي عرفتي اللي فيها

واامرررري يا جميل اي حاجا من مطروح

المهم مش اكتر من ربع كيلو لب عشان اللب هناك بقى ب 12 جنيييييييه "وش مفروس"

واحد...

والله لو عليا لا ها اروح ولا اجييييي

بس

ماحدششششش باكلها بالساهل..

يالا تعالوا معايا

احب ما على قلبي

والله نعمل دولة جوا الدولة... "وش ناوي على حبسه"

عمي فريييي

ربنا يخليك يارب

واهي هااااانت

النهاردا مطروح

بكرا السلوم

بعده ليبيا

بعده ايطاليا

ههههههاااااااااننننننننننت

وانا حاجزا عزوووومة غدا عند حضرتك في كندااااااا

لانس..

ما انا لما ببقى زعلانة ببقى مؤدبة خالص كدا "وش امور"

بس اهو رجعت ارغي تاني..."وش شرير"

سي السيد..

انت بتقول فيها؟؟

طب تصدق وتامن بالله

زمايلي هنا بيتكلموا معايا عشان اجيبلهم حشيش؟؟؟

وقالولي على مكان بيعه هناك

وان القرش في مصر ب 80 جنيه وان النص كيلو في مطروح ب 60 جنيه

وبيتكلموا جد الله يحرقهم؟؟؟

بس انا بجد ناوية تاني شهر انزل ليبيا

الناس شجعتني اوي اني انزل اتسوق من هنااااك

قالولي كرتونة الزت المستورد اللي عندنا تعملها 70 او 90 جنيه

عندهم تعملها حوال 4 دينار (4 دينار = 40 جنيه)

يعني يابلاش

وبجد ناوية اعمل فكرة البيزنس دي بحق وحقيقي

بس لما اركز كدا واعرف الجو هناك عامل ازاي واعمل جوووو لنفسي مع اهل البلد "وش علاء مبارك"

منماااان..

دعواتك يا فندم " وش بيحدف طوب "

اخي متفائل

شفت بقى مين الل بقى بيطيب خااااطر ميييين دلوقتييييي

"وش ميت ضحك"

ماشي ماشي

خدت انت الدور بتاعي وبقيت بتطيب خاطري...: ))

الله يسعدك يارب

هوا فعلا انا حساسة شوبة اليومين دول عشان الدربكة دي

بس انت عارف

مش بعرف ازعل اد كدا " وش عيلة"

وكدا والا كدا ها اشوفكم اكيد كل اخر شهر ان شاء الله

عشان احكيلكم عملت ايه في الناس هنااااااااااك

بس يارب ما تنسووووونييييشششششش "وش محرج"

[بنت شعنونة]

نا اقولك يا فرح

بصي يا ستى انا تقديري م.ب.ع "مقبول بالعافيييية" او بالاصح ن.ب.د = " ناجحه ببركة داعاء الوااااالديييييين"

المهم ف تقيديري يجيبلي حاجا اسمها ارياف يعني وحدات صحية اللي ما بنشتغلش فيها تقريبا دي

وبما انه انا توزيعي مطروح ف اول واحد رحتله قالي انتي تتوزعي السلوم " ربنا يهده"

رحت بعدها للمدير الرسمي فقالي ان توزيعي وحدات ف ها يرأف بحالي و يوديني الكيلو 4 "وحدة صحية ف الصحراء بحق حقيقي والله"

رحت لمدير المدير.. دا كبير القعددددة بقى

قال انتي عاوزة ايه؟؟ قلتله عاوزة سكن ادمي وشغغغغغللللل

انا مش عاوزة اقعد عاوزة اشتغللل

قالي وانا بشجع حماس الشباب ف ها اوديك المستشفى بس انتي ما لكش مستشفيات خلي بالك

كلللللللللل داااااااا كلالالالالالالام

والفعل الرسمي لما يستلموا مني الورق رسميا يوم السبت ان شاء الله

ف دعواااااااااااتكم بقىىىىى

استاذ اجيبت. ربنا يخليك ياااااارب وارجع سلييييمة واستفيد من التجربة دي

س.س

خل باااااااااالك مطروح السلاح رخييييييص فيهاااااا "وش خط مطروح الشراني"

[بنت شعنونة]

اضحككم عليا بقى

طبعا انا قلقانا جداااا جدااااا

و وضبت الشنطة بتاعت السفر الل اااااااااااااااااااااااااااااااااددد كدددددداااااااااااااا يجي 8746873648732648762756438765 مرة

مرة اخد لبس شتوي ومرة صيفي ومرة الأتنين ومرة ارمي دا كله برا ومرة احط بطانبة ومرة ارميها

لما قربت اتجنن

بصوا بقى التححححححف الل انا واخداها معايا

دا اخر ترتيب للشنطة خلوا بالكوا

لسا في يجي187 ترتيب من هنا لبكرة كمان "وش ميت ضحك"

- بطانية.. مكوة.. صابون مواعين!!!!!...طشت!؟!؟!؟..فليت.. بيروسول..؟!؟!... داوني بتاع الريحة بتاع الهدوم بتاع الغسالة!!!!! ( ها اموت اعرف واخداه ليييييه)

يجي 76 جوز جزمة .. 2 سماعة طبية!!!!.. نازلة اشتري جهاز ضغط كمان حبة مش عارفا ليييييه؟؟؟؟

علبة كاكاو عشان بحبه.. 2 نوع بن!!!!!... 2 علبه لبن!!!!!.. علبة ذرة صفرا عشان بحب اكلها!!!!!!!!!!!!!!!!!؟؟؟؟؟!!!!!!

ايه تاني ايه تاني؟؟؟

اه التلفزيون الصغنن بتاعي بس ما لقتلوش مكان ف ها اخدوا النزولة الجايا..

ايه تاني ايه تاني؟؟؟

هممممم

استنوا ابص في المتحف الل واخداه دا واقولكم...

ماحدش عنده حاجا كمان قولهالي اخدها معااااايااااااا؟؟؟؟؟!!!!

[maksoof]

ماحدش عنده حاجا كمان قولهالي اخدها معااااايااااااا؟؟؟؟؟!!!!

نسيتي تحطى "مكسوف" فى الشنطة ؟

[sos]

لاتنسى راديو صغير جيد

مع السلامة يا دكتورة /شانا

اصبحت دكتورة رسمى بكل ما تحوى الكلمة من تبعات

[linux]

معقول تنسي دول؟:

مصحف

مطواة

كيلو لب أسمر و كيلو لب أبيض

كورة شراب

علبة حلاوة طحينية

مخلل بتنجان بالفلفل و التوم

معجون سنان

يجيي تولتوميت كتاب!!

شفتى بقي أني عايز مصلحتك ... مع أنك سلمتي على كل الناس ماعادا أنا و عم مهيطل العجلاتي ... سقطنا سهوا !!

[Salwa]

شانا حبيبتى..

رغم انى قلت لك ان السفرية دى مهمة جدا جدا حتى بالنسبة لك نفسيا...

بعكس ما انتى متوقعة..

بقولك تانى...خدى كل الأمور بمرح ذكى...أو..بذكاء مرن.

وحذار انك من كسوفك..تجدى نفسك بدون ما تشعرى بتطحنى نفسك ..بلا داع..

بمعنى..؟

خليكى كما انتى انسانة طيبة خدومة مع من يستحق فقط..

واعتبرى دى..فسحة ودراسة زيادة وتأمل..وتقديم الخير فى الشهر الفضيل

وحاتعرفى ناس جديدة..ومجتمع جديد..ومين عارف بكرة فيه ايه؟؟؟

لازم تاخدى معك اجندة...اكتبى لنا يوميات شانا فى الصحراء الغربية.

اكيد حاتبقى احلى من يوميات نائب فى الأرياف..لتوفيق الحكيم.

لأن طبعا..توفيق الحكيم..مكانش دمه عسل كدة زيك..ولا كان بيكتب بس

اللى يخطر على باله..

عموما اكثرنا فى رمضان برضه بيكون مشغول.

كل سنة وانتى طيبة ..

اوعى تنسى تاخدى معاكى..منشفتين وطقمين سرير على الأقل...اوعى تنامى فى أى مكان على حاجة مش بتاعتك..أو..تستعملى منشفة مش بتاعتك..واوعى لو معك زميلة...ان تستعمل اشياءك الخاصة.ـ مشط..وخلافه..

مجرد نصائح ..اعملى بيها وحاترتاحى..

ربنا يحميكى يابنتى انتى وكل شبابنا..

سلامى.

[بنت شعنونة]

مصحف 

مطواة 

كيلو لب أسمر و كيلو لب أبيض 

كورة شراب 

علبة حلاوة طحينية 

مخلل بتنجان بالفلفل و التوم 

معجون سنان 

يجيي تولتوميت كتاب!! 

وانا اقدر ما اسلمش عليك يا ليونكسسسس يا رفيق الكفاااااااااح في شغلانة مش بحبهااااااا

المصحف و المطوة و التولتوميييييت كتاب معايااااااا بس لسا ما حطيتهمش في الشنطة

غالبا ها اخد شنطة تانية كمان "اااااااه يانييييي"

علبة الحلاوة و البتنجاااان و اللب دول من هناااااك يا فندم

بس بجد كنت ناسبة معجون السنان وانت فكرتنييييييي

اخي العزيز sos

نفسي اخد الراديو بجد بس مش لاقيا مكان ف ها اخليه السفرية الجايا ان شاء الله

وربنا يكرمك على كلالالامك ليا ويارب ابقى كدا فعلا يارب

استاذ مكسوووووف

الشنطة منفجرة اصلا من دلوقتيييييي

بس انا واخداكم كلللكم جواا قلبي ورموووووش عنيا " وش شادية في فيلم عودة الحب الضال"

ماما سلوى..

اوعى تنسى تاخدى معاكى..منشفتين وطقمين سرير على الأقل...اوعى تنامى فى أى مكان على حاجة مش بتاعتك..أو..تستعملى منشفة مش بتاعتك..واوعى لو معك زميلة...ان تستعمل اشياءك الخاصة.ـ مشط..وخلافه.. 

مجرد نصائح ..اعملى بيها وحاترتاحى..

شكرااااا يا ماما

انا فعلا ماكنتش عاملة حساب الحاجاااات دي خااااالص "وش مزهوووول"

انا شكلي كدا ها اخد دولاب مش شنططططططة

وافتكرت دلوقتي سجادة الصلاة وانا معاكم

وصورة لبابا واخواتي

ومج عشان الشاي مع اني مش بشرب شاي

ولسا ما اشتريتش شبشبببببببببب

اففففففف

ها انتحرررررررررر

مع ان نزلت النهاردا واشتريت شمعة معطرة ونسيييت كللللل الحاجات التاااانية !!!!!!!!!!!!!!!

"وش واحدا هبلة باين والا ايه!!!"

[حشيش]

وما تنسيش تاخدى معاكى مجموعة صور لحشيش

[بنت شعنونة]

هههههههههههههههههه

الله يهدك يا حشيشششششش

انا خدت معايا بابيتو شبه دا

وبابيتو قطة صغنووووونة

عندي تويييييتي كبيييييييييييييير خفت اخده لا يقولوا مجنونة

[فــيــروز]

ربنا معاكى يا شعنونه

خلى بالك من نفسك .. ودايما موفقه ان شاء الله ..

[بنت شعنونة]

ربنا يخليكي يا فروووووز يارب

وعقبااااالك كدا لما نباركلك

بس اكيييييد مش السلووووووم "وش بيشد في شعره"

[freefreer]

طبعا المطوة فى شنطتك مش ممكن تنسيها.. لو فيه مسدس صغير ياريت تاخديه للتعامل مع العصابات اللى هناك .. خدتى سشوار .. و عندى ليكى نصيحة كبيرة بحق و حقيقى .. و خبره .. الحياة فرص فانتهزيها .. طلعى كل اللى اتعلمتيه هناك .. وحاولى الإستزادة دائما .. اديها شغل بكل ما أوتيتى من قوه .. ان الله لا يضيع اجر من أحسن عملا .. و حتوحشينا قوى .. و المنتدى حيضلم لغاية ما ترجعى تنوريه تانى ..

[se_ Elsyed]

!...طشت!؟!؟!؟[/size

!!!!

أموت واعرف خدتية إزاي ده وأنهي شنطة دي اللي تاخد طشت غسيل ؟ إوعي تكوني واخداه في قفه معاكي ؟

[SANAA]

سى السيد كتب

أموت واعرف خدتية إزاي ده وأنهي شنطة دي اللي تاخد طشت غسيل ؟ ؟

هي حطاه علي رفرف العربيه من فوق،،وكل شويه تقول للسواق خد بالك من الطشت