تحليل الشخصية من خلال الصورة الرمزية

[سهل جدا]

*

*

الموضوع دا شاغلني من زمان أوي.. من ساعة لما بدأت أشترك في المنتديات

هل بإمكان علماء النفس إنهم يحدّدوا شخصية العضو المشترك في المنتدى من خلال اختياره لصورته الرمزية؟!!

فمثلا لو العضو اختار صورة طفل.. هل يعني ذلك مثلا أنه يحب الوضوح والصراحة كالأطفال أم أن هذا يعني أنه يعوّض نقص ما عنده بهذه الصورة؟؟

ولو اختار العضو مثلاً صورته الشخصية الحقيقية كصورة رمزية, فهل يعني هذا أنه مريض بالنرجسية والحب المفرط للنفس مثلاً أم أن هذا يعني أنه شخص واضح ولا يخشى مما يقوله لأن شخصيته الافتراضية على الانترنت هي نفسها شخصيته الحقيقية في الواقع؟؟

كذلك هل يمكن تحليل الشخصية من خلال طريقة تعامل العضو مع صورته الرمزية ..

بمعنى , لو إن العضو دائم التغيير لصورته الرمزية , فهل هذا يعني إنه إنسان هوائي ولا يثبت على مبدأ في حياته العامّة.. أم أنه شخص إيجابي يحب التغيير دائما للأحسن

وفي المقابل لو أن العضو ثابت على صورته الرمزية، لا يغيّرها أبدا، فهل هذا يعني أنه إنسان ثابت على مبادئه في حياته العامّة, أم يعني أنه إنسان سلبي لا يحب التغيير ..

الأسئلة ديه محيّراني فعلاً, وأتمنى أن أجد جوابا من إخواني المهتمّين بعلم النفس

لأني بفكّر أغير صورتي الرمزية :angry:

وحتى اللي مش دارس علم نفس, أهو بردو ممكن ينوّرنا بمعلومة من هنا ولا من هنا

[tantrum]

أعتقد يا أخ سهل أن إستخدام الصورة الرمزية أو الأسم أو التوقيع لن يعطى أى نتيجة دقيقة لتحليل الشخصية لعدة أسباب أهمها أنه دائما ما يتأثر إختيار هذه الرموز بحاتلك النفسية أثناء التسجيل.

و لكنى سأحاول أن أحلل شخصيتك

أنت شاب مصرى متغرب تعمل بجده متدين غيور على دينك لكن سريع الغضب تحب بروست البيك جدا.

v

v

v

v

v

v

v

V

V

ملاحظة:

أنا حللت شخصيتك من خلال ردودك ... وهذا ما أقصده ليه تتعب نفسك فى التحليل من الرموز و أمامك الردود مرأة صافية لشخصية كل فرد.

[لولا]

تحياتى استاذ سهل ..

فعلا الصوره ..التوقيع من المستحيل ان تكون الحكم فى تحديد شخص المتحدث وصفاته

يمكن من متابعة مشاركات العضو التعرف على شخصيته بشكل واضح ومدى ثقافته ومدى ثبات آرائه

وعمق ثقافته على المدى البعيد من المتابعة ..

تثبيت الصورة او تغيرها بعد فتره ليس من المنطقى ان تصدر فيه احكام قطعيه تخص الشخصيه وتحدد معالمها .. فقد قيل تحدث حتى اراك ..

الصوره مجرد رمز .. احيانا يختارها اصحابها بعنايه واحيانا مجرد ملىء فراغ لربط الإسم بصورة فقط .

لولا

[حسام يوسف]

هوة مش هيدي تحليل كامل للشخصية

لكن ممكن يعبر عن ملمح أو أكتر عنها

يعنى مثلا صورة حضرتك بتقول انك بتحب الطبيعة جدا

وممكن أستنبط منها برضة فكر ديني ملتزم معين لأن حضرتك حطيت صورة طبيعية مش صورة انسان

وممكن الصورة لو اتكررت بين أكثر من عضو يبقى معناها عند العضو س غير العضو ص

يعنى لما حضرتك تحط صورة طفل ممكن نفسرها مثلا انه حبك للأطفال

في حين لو وضعتها أنا مثلا يبقى لأنى بحب البراءة

طبعا ده اجتهاد منى واحتمالات الخطأ أكثر من الصحة

فتقبل تحياتى

[doudy]

احنا ممكن نعمل موضوع نسميه صورتك الرمزية ليه؟

و كل واحد يقول ايه مدلول صورته الرمزية جواه

و بكدة ممكن نتعرف على شخصية كل عضو من خلال صورته الرمزية

:blush2:

[elfakhrany]

أنا عن نفسى بحط الصورة اللى أحس انها لذيذة ممكن أطفال أو طبيعة أو كارتون أو صورة شخصية .. مش حاسس ان ده ليه علاقة بالشخصية خالص .. جمعه مباركة :blush2:

[rewsha]

ازيك يا دودي .بقالى كتير ماشوفتكيش

.لكن هاختلف معاكي في الراْي .

لان الصوره الرمزيه الواحد بيغيرها ممكن تبع حاته النفسيه فعلا .وممكن واحد تبقى الصوره بتاعته ثابه وواحد صورته متغيره

طيب انا مثلا .مش حاطه صوره خالص

هاتحلليني ازاي

انا شايفه فعلا ان اكتر حاجه تخلي الواحد يعرف شخصيه اللي قدامه هيه انك تقرائي ردوده وتعرفي اتجاهاته من اْراؤه

وانا متاْكده ان ناس كتير قوي هاتوافقني الراْي ده

بس السؤال بقه هوه .ياترى بعد قراءة كام رد للعضو تقدري تحللي شخصيته ؟

[arora]

يا جماعة انا مش عارفة اغير الصورة الرمزية بتاعتى علشان تحلولى شخصيتى

ارجو من الادارة الاهتمام

بتظهر رسالة انه يوجد خطا ولابد من الاتصال بالادارة

اشكركم

تم تعديل 10 يوليو 2009 بواسطة arora

[مغتربة]

اعتقد اننى من الاشخاص الذين يحرصون تماما على تطابق صورتهم الشخصيه او توقيعهم مع ما يريدون ان يعبروا عنه

سواء صورتى الرمزيه او توقيعى فانا انتقيتهم بعنايه شديده ليعبروا عما اريد

فصورتى الرمزيه تتطابق تماما عن رؤيتى لشخصيتى الحقيقيه

و اخترتها من بحثت بين كثير من الصور حتى وجدت ضالتى

لذلك من يستطيع تحليلها بشكل ناجح سيكون وقف حقا على شخصيتى الحقيقيه

و كذلك كل حرف فى توقيعى انتقيته بحيث يعبر تماما عن رؤيتى و فلسفتى الخاصه فى الحياه

اعترف انه الامر ليس ذاته للكل

و كل انسان له طريقته فى الاختيار

لذلك يقترب التحليل المبنى على الصوره او التوقيع من شخصيه صاحبه الحقيقيه او يبتعد بهذا المقدار

دمت بالف خير

[ايهاب سالم]

ولو اختار العضو مثلاً صورته الشخصية الحقيقية كصورة رمزية, فهل يعني هذا أنه شخص واضح ولا يخشى مما يقوله لأن شخصيته الافتراضية على الانترنت هي نفسها شخصيته الحقيقية في الواقع؟؟

:closedeyes:

[سهل جدا]

ملاحظة:

أنا حللت شخصيتك من خلال ردودك ... وهذا ما أقصده ليه تتعب نفسك فى التحليل من الرموز و أمامك الردود مرأة صافية لشخصية كل فرد.

أهلا بك أخي الكريم tantrum

فعلا , كلام حضرتك مظبوط, وهو إن ردود العضو هي أكثر شيء يوضح شخصيته

لكن .....

أنا شايفك حضرتك حاطط صورة لواحد بيصرّخ بصوت عالي جدا, ودا معناه ...... :closedeyes:

تحياتى استاذ سهل ..

فعلا الصوره ..التوقيع من المستحيل ان تكون الحكم فى تحديد شخص المتحدث وصفاته

يمكن من متابعة مشاركات العضو التعرف على شخصيته بشكل واضح ومدى ثقافته ومدى ثبات آرائه

وعمق ثقافته على المدى البعيد من المتابعة ..

تثبيت الصورة او تغيرها بعد فتره ليس من المنطقى ان تصدر فيه احكام قطعيه تخص الشخصيه وتحدد معالمها .. فقد قيل تحدث حتى اراك ..

الصوره مجرد رمز .. احيانا يختارها اصحابها بعنايه واحيانا مجرد ملىء فراغ لربط الإسم بصورة فقط .

لولا

أهلا بك يا مدام لولا

كلام حضرتك مضبوط إلى حد كبيرة

لكن في الحقيقة أنا عندي عادة في شخصيتي الحقيقية, مش عارف أطبقها في شخصيتي الافتراضية على الانترنت..

وهي إني دائما بحب أتأمل في تعبيرات وجه من يحدثني جيدا.. لأن دا في الغالب بيعطيني دلالات معيّنة..

أما النظر إلى الصورة الرمزية في المنتديات فلا يعطيني دلالات مثل التي استنبطها من خلال النظر إلى الشخصية الحقيقية ..

هوة مش هيدي تحليل كامل للشخصية

لكن ممكن يعبر عن ملمح أو أكتر عنها

يعنى مثلا صورة حضرتك بتقول انك بتحب الطبيعة جدا

وممكن أستنبط منها برضة فكر ديني ملتزم معين لأن حضرتك حطيت صورة طبيعية مش صورة انسان

وممكن الصورة لو اتكررت بين أكثر من عضو يبقى معناها عند العضو س غير العضو ص

يعنى لما حضرتك تحط صورة طفل ممكن نفسرها مثلا انه حبك للأطفال

في حين لو وضعتها أنا مثلا يبقى لأنى بحب البراءة

طبعا ده اجتهاد منى واحتمالات الخطأ أكثر من الصحة

فتقبل تحياتى

أهلا بك أخي المهذّب حسام يوسف

أتفق معك في إن الصورة الرمزية لا تعطي دلالة على شيء واضح بنسبة 100 %

لكن ألا تتفق معي أنها قد تعطي دلالة ولو بنسبة 60 في المية مثلا في بعض الأحيان !

وبالمناسبة , أنا لا أرى تحريم الصور الألكترونية أو الشمسية, وإنما أرى تحريم الصور المرسومة باليد لذوات الأرواح, لأن فيها نوع من المضاهاة كما جاء في الأحاديث الشريفة ..

عموما دا مش موضوعنا ..

دمت بود

[سهل جدا]

احنا ممكن نعمل موضوع نسميه صورتك الرمزية ليه؟

و كل واحد يقول ايه مدلول صورته الرمزية جواه

و بكدة ممكن نتعرف على شخصية كل عضو من خلال صورته الرمزية

:closedeyes:

فكرة حلوة , يا ريت حضرتك تفتحي الموضوع ده

أنا عن نفسى بحط الصورة اللى أحس انها لذيذة ممكن أطفال أو طبيعة أو كارتون أو صورة شخصية .. مش حاسس ان ده ليه علاقة بالشخصية خالص .. جمعه مباركة :closedeyes:

أهو انت بالذات يا أستاذ فخراني, استنبطت من صورك الرمزية شيء واضح

وهو إنك شخص بسيط, مش شايل همّ لبكرة

عايش اليوم بيومه

صحّ ولا نووووو :blush2:

انا شايفه فعلا ان اكتر حاجه تخلي الواحد يعرف شخصيه اللي قدامه هيه انك تقرائي ردوده وتعرفي اتجاهاته من اْراؤه

وانا متاْكده ان ناس كتير قوي هاتوافقني الراْي ده

بس السؤال بقه هوه .ياترى بعد قراءة كام رد للعضو تقدري تحللي شخصيته ؟

أحيانا من ردّ واحد يمكن الشخص يفصح عن نفسه, وأحيانا من عدة ردود

يا جماعة انا مش عارفة اغير الصورة الرمزية بتاعتى علشان تحلولى شخصيتى

ارجو من الادارة الاهتمام

بتظهر رسالة انه يوجد خطا ولابد من الاتصال بالادارة

اشكركم

ازاي ؟؟

روحي حضرتك إلى لوحة التحكم .. تعديل الصورة الرمزية

وبعدين ارفعي الصورة من على جهازك

[سهل جدا]

لذلك من يستطيع تحليلها بشكل ناجح سيكون وقف حقا على شخصيتى الحقيقيه

و كذلك كل حرف فى توقيعى انتقيته بحيث يعبر تماما عن رؤيتى و فلسفتى الخاصه فى الحياه

طيب , تسمحي لي أن أحاول :closedeyes:

ولو اختار العضو مثلاً صورته الشخصية الحقيقية كصورة رمزية, فهل يعني هذا أنه شخص واضح ولا يخشى مما يقوله لأن شخصيته الافتراضية على الانترنت هي نفسها شخصيته الحقيقية في الواقع؟؟

:closedeyes:

أيوه يا أستاذ إيهاب, انت مقتنع بالجملة ديه عشان حضرتك دائما بتحطّ صورك انت والعائلة الكريمة (ربنا يخليهملك)

بس كونك دائما بتغير صورك الرمزية , فهذا عند علماء النفس قد يكون له تفسير.. مش كده ولا إيه ؟؟

[tantrum]

اعتقد اننى من الاشخاص الذين يحرصون تماما على تطابق صورتهم الشخصيه او توقيعهم مع ما يريدون ان يعبروا عنه

سواء صورتى الرمزيه او توقيعى فانا انتقيتهم بعنايه شديده ليعبروا عما اريد

فصورتى الرمزيه تتطابق تماما عن رؤيتى لشخصيتى الحقيقيه

و اخترتها من بحثت بين كثير من الصور حتى وجدت ضالتى

لذلك من يستطيع تحليلها بشكل ناجح سيكون وقف حقا على شخصيتى الحقيقيه

و كذلك كل حرف فى توقيعى انتقيته بحيث يعبر تماما عن رؤيتى و فلسفتى الخاصه فى الحياه

اعترف انه الامر ليس ذاته للكل

و كل انسان له طريقته فى الاختيار

لذلك يقترب التحليل المبنى على الصوره او التوقيع من شخصيه صاحبه الحقيقيه او يبتعد بهذا المقدار

دمت بالف خير

أسمحيلى أن أختلف معك يا أخت مغتربة

فأنت تقولى أنك أخترت الصورة لتتطابق عن رؤيتك لشخصيتك.. و حقيقة شخصية الفرد هى ما يراها الأخرون و هم الذين يحددوها...فالصورة عندك فعلا تعطى إنطباع شديد بالبراءة و طمأنينة النفس و انعدام الأحقاد و ما شابه ذلك إلا أن ذلك يمكن أيضا الإحساس به واقعيا من خلال جمل عفوية فى مواضيعك و ردودك.

و توقيعك يعبر عن إحترامك لرأى الأخرين و لكنه كان سيعدم المصداقية إن لم تؤيد كلماتك ذلك - و قد فعلت- أما بيتى الشعر فى نهاية توقيعك فلم أفهمهما جيدا.

ما اقصده هو أن كلماتنا ستعبر عنا أفضل من الكلمات التى نقتبسها.

و تقبلى تحياتى

[tantrum]

هوة مش هيدي تحليل كامل للشخصية

لكن ممكن يعبر عن ملمح أو أكتر عنها

يعنى مثلا صورة حضرتك بتقول انك بتحب الطبيعة جدا

وممكن أستنبط منها برضة فكر ديني ملتزم معين لأن حضرتك حطيت صورة طبيعية مش صورة انسان

وممكن الصورة لو اتكررت بين أكثر من عضو يبقى معناها عند العضو س غير العضو ص

يعنى لما حضرتك تحط صورة طفل ممكن نفسرها مثلا انه حبك للأطفال

في حين لو وضعتها أنا مثلا يبقى لأنى بحب البراءة

طبعا ده اجتهاد منى واحتمالات الخطأ أكثر من الصحة

فتقبل تحياتى

أعتقد يا أخ حسام أنه لو إجتمع علماء النفس و أطبائها لتحليل صورتك الرمزية فسيصابوا بالجنون و لن يصلوا لشىء.

[ايهاب سالم]

أيوه يا أستاذ إيهاب, انت مقتنع بالجملة ديه عشان حضرتك دائما بتحطّ صورك انت والعائلة الكريمة (ربنا يخليهملك)

بس كونك دائما بتغير صورك الرمزية , فهذا عند علماء النفس قد يكون له تفسير.. مش كده ولا إيه ؟؟

أسألك بنتي لأن هيا اللي بتغيرها :closedeyes:

إنما بما إنك فتحت الموضوع

ممكن تفهمني ليه بتشارك بإسم مستعار

هل نضع وجه مستعار في حياتنا الطبيعيه

إذن لماذا نشارك هنا بأسماء مستعاره

طبعا أنا أستثني السيدات لطبيعة مجتمعنا الشرقي

وشكرا لدعائك و ربنا يخليلك أولادك و يكرمك فيهم

تم تعديل 10 يوليو 2009 بواسطة ايهاب سالم

[ايهاب سالم]

أعتقد يا أخ حسام أنه لو إجتمع علماء النفس و أطبائها لتحليل صورتك الرمزية فسيصابوا بالجنون و لن يصلوا لشىء.

المفاجأه اللي ميعرفهاش ناس كتير إن دي صورة حسام الحقيقيه :closedeyes:

دي صورة الرسام العالمي اللاسع سلفادور دالي

تم تعديل 10 يوليو 2009 بواسطة ايهاب سالم

[سهل جدا]

إنما بما إنك فتحت الموضوع

ممكن تفهمني ليه بتشارك بإسم مستعار

هل نضع وجه مستعار في حياتنا الطبيعيه

إذن لماذا نشارك هنا بأسماء مستعاره

طبعا أنا أستثني السيدات لطبيعة مجتمعنا الشرقي

على فكرة أنا مقتنع تماما إن أفضل شيء للعضو إنه يسجّل باسمه الحقيقي

لأن دا أكبر ضمان ليه وللآخرين إنه لن يكتب إلا ما هو مقتنع به

لكن في المنتديات أنا بسجّل نفسي باسم مختلف لأسباب خاصة

أسألك بنتي لأن هيا اللي بتغيرها :closedeyes:

وأنا أسألها ليه

أنا هاحلّلك شخصيتها >>>>>>>>>>>>>>>

بس بعد إذنك هاستعين بالصبي بتاعي :closedeyes:

ولد يا بلية

نعمين يا معلّم سهل جدا

هات يا واد العدّة أما نحلّل الشخصية ديه

ماشي يا معلّمي: العدّة جاهزة

طيب ... استعنّا على الشقا بالله ..

شوف يا سيدي بنت حضرتك بتحبّك طبعا

وفي نفس الوقت عارفة إنك بتحبها جدا وما تقدرش ترفضلها طلب...

وهذا الحبّ المفرط منك جعل لها شخصية قوية جداً عليك لدرجة إنها تقدر تتدخّل في حياتك الشخصية (ومنها كمبيوترك) وتفرض رأيها عليك وتغيّر الصورة الرمزية وقتما شاءت..

إيه رأيك بقى أنفع ميكانيكي ... قصدي أنفع دكتور نفساوي :blush2:

[حسام يوسف]

أعتقد يا أخ حسام أنه لو إجتمع علماء النفس و أطبائها لتحليل صورتك الرمزية فسيصابوا بالجنون و لن يصلوا لشىء.

المفاجأه اللي ميعرفهاش ناس كتير إن دي صورة حسام الحقيقيه :closedeyes:

دي صورة الرسام العالمي اللاسع سلفادور دالي

الله يحظك يا عم ايهاب

:blush2:

والله العظيم ضحكت لما شفت رد الزميل اللى بيستغرب من صورتى

وضحكت لما شفتك بتقول ان دي صورتى الحقيقية

افرض حد صدق يعنى؟ :blink:

الحقيقة يعنى انا مش مجنون ولا لاسع زي سلفادور دالى العبقري

وياريتني كنت فى عشر جنونه الفنى الرائع smk:

لكن أنا حطيت صورته ليه فى كل المنتديات والفيس بوك وثبتها ليه لأعجابى بيه

ماتتصوروش الراجل ده تعب قد ايه

وكل أساتذته قالوا عليه فى معهده انه مش بيعرف يرسم اصلا

ونسبه ضايعه

فكفر بيهم وبكل اللى بيقولوه

لحد ما نال شهرة واسعة

ومحدش فاكر اسم اللى اتريقوا عليه فى أول حياته

وبيعجبنى دايما فى لوحاته لعبه بالادراك البشري

بيتعمد ال optical illusion

أو الخداع البصري

وبيتعمد دايما عدم تمثيل الأشياء بأبعادها ونسبها الحقيقية

ده غير لوحه اللى فيها أفكار وفلسفات لم يتطرق ليها حد قبله

باختصار أنا بقدر جدا التمرد الصحي جدا ده على الفكر التقليدي

وبقدر جدا الموهبة

وبقدر جدا اللى بيثق فى نفسه وفى موهبته

حتى لو الكل قالوا غير كدة

اسف لو كنت خرجت عن الموضوع

بس حبيت أوضح حبى وتقديري لسلفادور دالى

المجنون الجميل :closedeyes:

تم تعديل 10 يوليو 2009 بواسطة حسام يوسف

[ام بودى]

اوقات الصورة الرمزية بتكون عامل مساعد فى تكوين انطباع معين لكن اكيد ردود الشخص ومشاركاتة تبقى هى الفيصل وهى الشئ الحقيقى الذى يظهر ملامح الشخصية دون ان يدرى صاحبها باستطاعة اى حد ان يغير صورتة الرمزية ليعطى انطباعا معينا عنة كالبراءة الوضوح الالتزام الخ... ولكن من السهل اكتشافة من كتاباتة وردودة مرة بعد مرة ,

المفاجأه اللي ميعرفهاش ناس كتير إن دي صورة حسام الحقيقيه

ياخبر يا استاذ حسام معقولة دى صورتك الحقبقبة لأانت اكيد بتهزر اوعى تكون مبتهزرش