اذهب الي المحتوي
إنشاء باب جديد بعنوان سد النهضة الإثيوبي لكل الموضوعات المتعلقة بسد النهضة ×

أكل المهلبية والطرائف المدرسية


Recommended Posts

بالتأكيد إن جميعنا لديه مواقف طريفة أثناء مشوار التعليم الذي أخد ييجي 16 سنة على الأقل من عمرنا ( مع الإعتذار للمدبلرين ) وفي التوبيك ده بالصلاة عالنبي ياريت كل واحد يحكلنا عن اطرف هذه الطرائف ...

وأول واحد هايحكي هو صاحب المحل قصدي صاحب التوبيك ..

- من اولى إبتدائي وانا كنت بأبص بنظرات حقد وحسد للعيال بتوع الفرقة الموسيقية اللي بيعذفولنا احلى ألحان نشاز وقت طابور المدرسة وكنت اتحين الفرصة للقفز على كرسي المايسترو وأتعتق من الطابور والثني والمد وصفا وإنتباه ولا أكننا في الجهادية ... وبالفعل تحقق المراد وبإستخدام الحيل الطفولية مع بعض الأسافين الجهنمية محسوبكوا بقى المايسترو " س س سحاب " وده في سنة خامسة .... وكانت فرحة ما بعدها فرحه ... وفي مرة حبيت اعمل مفاجأة للمدرسة وروحت مجهز لهم لحن من دماغي وقولت للفرقة إيه رأيكم نفاجيء به البشر وهما واقفين في الطابور - مش فاكر اللحن بس أظن أنه كان حاجة فرايحي -وفعلاً في أثناء الطابور روحت مدي الإشارة للفرقة وهاتك ياعزف ... ولم نكمل اللحن وهاتك ياضرب فينا من المدرسين والطلبة والفراشين وكل واحد ربنا قدره على حاجة عملها ومن بعدها تم سحب عصا المايسترو مني ورجعت للصفوف الخلفية مع الحاقدين على الفرقة الموسيقية .... ومن بعدها حلفت حتى ما أعدي جنب أي آلة موسيقية خاصة آلات النفخ .

رابط المشاركه
شارك

- طلعت سنة ساتة وكنت عقلت شوية وقولت أشبع رغبتي الفنية وأبحث عن مجال أآخر غير المزيكا أفجر فيه طاقاتي الإبداعية وبالفعل قد كان وأنضممت لفرقة المدرسة المسرحية ..

وأثناء هذه الفترة عملت حتتين - قصدي مسرحيتين -

-الأولى قمت بدور واحد صعيدي من بتوع زمان وحاجة يعني ماتقولش لعدوك مسوجر .. وروحت أعيط لبابا وأقوله ماليش دعوة انا عايز جلابية صعيدي مخططة ولاسه ( شال ) وشبشب فلاحي .. يابني يهديك يرضيك وانا مصمم وقولتله أنت برفضك ده هاتدمر حياتي الفنية وهاتخلي جورج أبيض وعزيز عيد يشمتوا فيه .. وفعلاً قام الوالد - الله يرحمه - بتوفير الملابس والإكسسوارات اللازمة للدور وبقيني نلف نعرض المسرحيات دي في المدارس التانية وحققت نجاح منقطع الجماهير .

- المرسحية التانية بقى كانت بتتكلم عن طاعة الوالدين وتم إسناد دور شاب فلاتي وعاق لوالدية وكل العبر فيه للعبد الله لدرجة إني كرهت نفسي في الدور ده .. وبرضوا حققت نجاح معقول بس أقل من الاولانية .

وبعد التجربة الطويلة والحافلة دي قعدت مع نفسي وقولت يا واد يا س س إنت لازم تعتزل وإنت في قمة عطاءك ومجدك الفني واعلنت إعتزالي ورجعت لصفوف النقاض وأكتفيت بما تركته من تراث فني يسري التاريخ المرسحي المصري خلال حقبة الثمانينيات .

رابط المشاركه
شارك

انا حبدأ احكى قبل المدرسة بشوية

أنا قضيت أول 6 سنين من عمرى فى قريتنا مع جدتى (رحمة الله عليه) كنا بنروح الكتاب واتذكر ان كتير جدا وانا رايح الكتاب انا وزمايلى كنا نعدى على شجرة توت نملا جيوب البيجاما والجلابيات وكنا نروح وشنا كله اسود واحمر من اكل التوت والهدوم عليها لوحات سرياليه من عصير التوت.

فاكر مرة كنت مش حافظ سورة وسيدنا كان عنده عصايه مرعبه وخلاص حيضربنى وبدأت أعيط واصوت وكانت الدار بعيده عن الكتاب بمسافة مش ممكن تسمع الصوت من هناك نهائى انا لسه فاكر وجدتى جاى جرى علشان تحوش عنى الضرب والله وصلت قبل ما يبدأ يضربنى (الله يرحمها ويسكنها فسيح جناته)... كانت طيبة جدا.

رابط المشاركه
شارك

بعيدا عن موضوع اكياس الكشرى اللى كانوا العيال يشتروها فى المدرسه و يخرموها من الطرف عشان ياكلوا الكشرى منها .. ودى كانت حاجه بتوترنى اوى الصراحه :-)

ايام زمان كان فيه بيت جدتى .. وكانت الاسره كلها تتجمع فيه وكل الاحفاد سوا .. كانت ايام جميله جدا

وكان المنطقه اللى هى ساكنه فيها كلها بيوت مش عمارات .. وكل بيت له جنينه صغيره

وعشان كان ممكن البيت الواحد يبقى فيه اكتر من دور للابناء كان كل واحد يعمل له جرس

حتى بيت جدتى كان فيه تلات اجراس

وانا كنت مغرمه جدا انى ارن على الاجراس كلها عشان اعرف اصواتها ايه عشان اصوات الاجراس عندنا ماكانتش حلوه زى بتاعة الناس التانيين

كل يوم اخرج مع بنت خالتى العزيزه -رحمها الله- و نبدا نلف على بيوت الجيران

ونظرا لانى كنت لسه مش باطول الاجراس اللى كانوا بيشعلقوها فوق كان لازم عشان ارن الجرس -قبل ما اطلع اجرى انا وهى- انى اتسلق الباب

وفعلا كانت لعبه لذيذه جدا .. نرن كل اجراس البيت و نطلع نجرى و نتفرج على السكان من بعيد وهما بيدوروا مين رن الجرس

لغاية ما فى يوم من الايام اخترنا بيت احد اصدقاء خالى .. فيه كام جرس هاموت عشان ارنهم .. و طلعت فوق الباب و رنيت و هوب بانزل .. نزلت غلط على رجل واحده .. آآآآآآآآآآآآآآآآآآآآه .. رجلى فكت ..

وطبعا مفيش اى وقت حتى للتالم او العياط .. كان لازم نجرى بسرعه خصوصا الناس يعرفونا وهيبقى منظرى زباله

اضطريت انسحب بصعوبه شديده جدا وانا باجر رجلى بصعوبه .. وطبعا رقدت فى البيت من غير ما حد يعرف جرى لى ايه و بنت خالتى كل شويه تيجى تقف لى على الباب و تبتسم بتعاطف عشان هى الوحيده اللى عارفه سر اصابتى و اعتزالى الملاعب للابد من بعدها

بس من كام شهر كنا ماشيين فى المنيل و شفت بيت فيه اجراس كتير .. ولم يمنعنى عن ممارسة هوايتى القديمه غير يافطه مكتوب عليها "احترس من الكلاب" icon_redface.gif اما عالم غلسه صحيح icon_mad.gif

رابط المشاركه
شارك

فيـــــروز

بعيدا عن موضوع اكياس الكشرى اللى كانوا العيال يشتروها فى المدرسه و يخرموها من الطرف عشان ياكلوا الكشرى منها .. ودى كانت حاجه بتوترنى اوى الصراحه

ده بيسموه فى علم النفس البدنجانى ... حسره ولوعة الصلصة المحرمه، إنك كنتى عايزة تعملى زيهم وتضربيلك كيس بس مش قادرة علشان العلقة اللى كنتى حتخديها فى البيت لو عرفوا.

احنا صاحيين قوى للكلام اهوه.

رابط المشاركه
شارك

ذكريات داعبت فكري وفني

مش عارفة يااولاد ابتدي حكايتي مع الزمان منين بالضبط

واحنا في ابتدائي كان عندنا شوية محرمات

ممنوع شرب الحمص اللى في الشارع

ممنوع اكل الدوم

ممنوع

ممنوع

وانا للاسف الشديد كنت مطيعة قوي

وكنت بابص اللعيال بحسرة لانهم بيعيشوا حياتهم وياكلوا دوم ويمصوا عسلية ويشربوا حمص وانا لا

( امي بتعمل لنا الحمص في البيت انضف " ده رايها هي طبعا " ) بس انا كان عندي وجهة نظر تانية وهي ان زميلاتي بياكلوا ويشربوا اللى عايزينه وانا لأ

وكنوع من التمرد في الخباثة كده عملتها مرة

ولاجل البخت المهبب الحمص اندلق على المريلة وعمل فيها بقعة لم يستطع الزمن ان يعالجها ( هييييييييييه وش امينة رزق بتتنهد )

ويكان يوم ماطلعتلوش شمس لما روحت

ونلتقي في حلقة قادمة ان شاء الله ومحكايتي مع الزمان

رابط المشاركه
شارك

بمناسبة حكايات الطفوله و بيت جدتى

فى يوم من الايام و احنا صغيرين قررنا اننا عاوزين نكنس شارعنا <_<

الشارع اصلا كان نضيف يعنى مفيهوش قمامه لكن فيه تراب زى كل شوارع مصر

كنا عاوزين يبقى من غير تراب بقى كمان :angry:

مش فاكره هى كانت فكرتى انا ولا لا لكنى اذكر انى تحمست بشده للفكره و استجاب اقاربى و اخوتى من الاحفاد لهذه الفكره

وكمان استجابوا اصدقاءنا ممكن كانوا يسكنون بالشارع اللى فيه بيت جدتى :angry:

وبدانا العمل فى اليوم التالى بحماس فظييييييييييع :angry:

مش عارفه اصلا كان ايه هدفنا من الموضوع ده !! يمكن كنا عاوزين ارض الشارع تبقى زى ارض الملعب !!

طبعا فى البيت اما اكتشفوا الموضوع و اننا عمالين نكوم اكوام تراب فى السله الخاصه ببيت العائله رقعوا بالصوت <_<

لان البيه الزبال كده مش هياخد المخلفات دى لان شغله يقتصر على جمع القمامه مش التراب خصوصا انه كان طشت تراب محترممممم :angry:

وبعد ما خلصنا العمل الشاق فى اليوم ده و قعدنا جنب البيت سعداء بما انجزناه بقت العربيات تعدى و تعفر الشارع واحنا مليانين حسره وقهر ;)

وتانى يوم بالفعل الافندى الزبال طنش خالص طشت التراب .. ومش محتاجه اقول ان الشارع كان فى طريقه للعوده الى ما كان عليه .. :(

اما حد من عيلتى بيفكرنى بالموضوع ده دلوقت و يقعد يضحك و يتريق باحس بخجل شديد جدا <_< وماعتقدش ان عندى الشجاعه اللى كانت عندى زمان عشان مجرد اعرض فكره شبيهه على اى حد من جيراننا فى البيت مثلا <_< هييييه دنيا .. الا ليت الشباب .. :rolleyes:

رابط المشاركه
شارك

أنا بقي مش عارف احكي اية ولا اية... ابداء من واحنا صغار ولا واحنا في الجامعة... لو من الصغر فدي عايزة مجلادات طبعا... المهم وعلشان وجع الدماغ نخش في الموضوع....

انا ماليش غير اخ واحد اكبر مني بسنة واحدة :( اة والله واحد بس ومن غير حلفان...ولو مش مصدقين اسئلوا انكل هو عارف كل حاجة... المهم انا و اخويا كنا نعمل كل عملة و اختها مصيبة... مرة الوالدة ربنا يخليها اشترت نجفة جديدة و كانت في قمة السعادة ... المهم هي نزلت مع الوالد من هنا في زيارة و الاهلي قرر يهزم ريال مدريد.. مش مهم مين الاهلي و مين ريال مدريد... المبارة كانت حامية الفطيس وهوببببببببببببببببببببببب الكورة جت فين.....

شااااااااااااااااطرين في النجفة... المهم ان الاضرار كانت كسر احد اذرع النجفة المكونة من ستة اذرع.... انا و اخويا صدمنا :wacko: ... طيب نعمل اية نعمل اية.... وش واحد ابليس... تفتق ذهننا عن خلع الذراع المصاب نهائيا و التخلص منة بالطرق السلمية إلا وهي الرمي في الشارع... وطبعا بعد جهد مضني فصلنا الكهربا و خلعنا الذراع و قمنا بتوزيع باقي الاذرع علشان يبان ان مافيش حاجة و كلة سليم... الادهي من كدة ان الوالد والوالدة حتي لحظة كتابة هذة السطور ميعرفوش.... اوعي حد يديهم خبر :) :o .... وجت سليمة ونفدنا من علقة سخنة... وكنا وقتها في أعدادي....

مرة كنت بتخانق في الشارع مع واحد معرفوش... اصل انا اخويا غلبان وزي بابا بيقول ان انا دايما مسبب المصايب و المشاكل... المهم انا كنت في قمة مجدي ولياقتي الكراتيهية و نازل ضرب في الواد (وش واحد متخرشم لبكرة) المهم اخويا حب يساعد راح رافع حجر من الشارع و جي علي الخناقة عايز يضرب المعتدي الغاشم... يجي ينشن ميعرفش يجي ينشن متجيش و فجأة قرر و نفذ وهوب الطوبة جت في راسي انا.. لوريل وهاردي.... و الدمااااااااااااااااااااء انهار انهار الواد خاف و جري واخويا اتسمر في مكانة...المهم طبعا رحت المستشفي و خت 5 غرز حلوين و طبعا الوالد متوصاش المهم صاحبكم ميطلعش خسران ابتزيت اخويا ليعمل الي انا عايزة يأقول لبابا ان انت الي عورتني... واخد منة نصف المصروف و هتلي مية اشرب و هات الشنطة... والله سعات لما افتكر يصعب عليا اخويا ااقوم اكلمة في التليفون اسلم علية اصلة كان غلبان معايا قوي.... بس خلاص ربنا هدنا وهدانا فييييييين ايام زمان......

منمان كيدز...

رابط المشاركه
شارك

[/sizحكايات المدرسه هى ايام جميله جدا كان كل المشكله فى الهروب من المداكره وكنا ننام احلى نوم لكن الشىء اللى فعلا غريب اننا كنا بنرجع من المدرسه ونلعب شوية كوره وبعدين نرجع البيت ناخد علقه علشان التاخيير وتنييل الهدوم وبعدين ناكل وننام وبعدين نقعد نداكر وجدول ودوشه وفى الوسط نتفرج على كام مسلسل فى التليفزيون والغريب اننا عندنا وقت لكل ده دلوقتى الاطفال معندهمش وقت لاى شئ يدوبك ياكلوا ويعملوا الواجب والساعه تبقى 10 ولا 11 ويناموا من غير اى متع من اللى عشناها ىا ترى ايه السبب فى قلة البركه حتى فى الوقتe]

رابط المشاركه
شارك
  • 6 years later...

مساء المواضيع المطرقعه

افتكرت موقف دلوقتي ايام ما كنت في ابتدائي

اصلا في الابتدائية (ما عدا سنة 6 لاننا سافرنا وقتها الامارات) كنت بلا فخر دائما عروسة المدرسة في حفلة اخر السنة

كان دايما في حفلة اخر السنة بيعملولوا ديفيليه و اختكم ريمو كانت دايما هي مسك الختام في فستان العروسة

و بما ان في عروسة يبقى اكيد في عريس

اييييييييييه و ياما عدى عليا عرسان

انما في حفلة سنة تالته (بالنسبالي) كان العريس (6 ابتدائي )موز موز بجد

المهم الحفلة خلصت و في طريق العودة للبيت

لقيت حد بينادي عليا في قارعه الطريق

ريم .............. ريم

بالتفت لقيت الواد الموز

و قفت و قولتله نعم لقيته بيقولي

انا بحبك

ااان اااااااان اااااااااااااااااااااااان

ريمو وشها جاب الوان يا جماعه و الله

المهم استجمعت شجاعتي و رديت بمنتهى البرود

انت مش مؤدب على فكرة ايه الكلام قليل الادب اللي بتقوله دا

و اخدت ديلي في سناني و طيران على البيت

و كان اخر يوم اشوفه فيه

مش قولتلكم حفلة اخر السنة

اهيء اهيء اهيء :blush2:

رابط المشاركه
شارك

انا مش عارفه لو ابنى عمل الى انا كنت بعمله فى المدرسه ممكن اعمل فيه ايه

يهقتله يهنتحر

اللطيف فى الفصل بتاعنا اننا كونا كلنا حوالى 35 فرد شله واحده ولاممكن ابدا ابدا حد يفتن على التانى المهم

يوم من ذات الايام قررنا نيجى بلبس مخالف طبعا المشرفه ماعجبهاش و راحت واخدانا بربطة المعلم وحبسانا فى غرفة المديره لحين انتهاء اليوم الدراسى

غلطت غلطة السنين لانالمديره ماكنتش موجوده قفلنا على نفسنا الاوده واكبر حته فيها كان اد الفتفوته السجاده رجعت فتل فتل و الستاير اتعمل منها شيز وبنطلون

المكتب اتكسر و التليفون اتدشدش ورق الحيطه ولعنا فيه

حتى التروفيز والجوايز اترمت من الشباك فى حوش المدرسه الى جنبنا

تصوروا شوية عيال 13او 14 سنه فى غرفه 6 متر فى 6 متر ممكن يعملوا فيها ايه

بجد ابويا و الابهات الىجم عشان يستلمونا جالهم صرع من منظر الاوده

قلت ادب بصراحه ماتتوصفش على فكره انا ماعملتش ايتها حاجه كل ماهنالك انى اقترحت ان احنا نخبى اوراقها عشان تعد تدور عليهم و الموضوع فضل يتطور يتطور لما بقى جنايه واهدار للماال العام

بس طبعا مستحيل كنت افتن على صحابى

المهم الست لما شافت الاوده بالمنظر ده طلع عليها كلمه واحده وصلت التليفون ربناة يسامحكوا وصلة التليفون

ولحد انهارده كان نفسى افهم اشمعنا وصلة التليفون الى كانت مضايقها ما الاوده كانت مزبله كلها

و ديه كانت احدى ايامنا الهاديه جدا فى المدرسه

عمما طوال تلات سنين فتره الثانويه عامه بتاعتى كان فيه عربية بوكس قدام المدرسه

ده احنا كنا متشردين اخر حاجه

يتبع

رابط المشاركه
شارك

تانية ابتدائي، و العبد لله كان ضعيف قوي و باقضي نص ايام الدراسة في البيت عيان!!

المهم جالنا مدرب كاراتيه في المدرسة... وطبعا باعتباري من رياضيي المدرسة الفظاع، اشتركت في الكاراتيه...

المدرب قضي السنة بالكامل ما بيعملش حاجة غير انه يحضرنا للعرض المدرسي في حفلة أولياء الأمور آخر السنة... يعني من الآخر مناظر...

جت حفلة المدرسة... و وقفنا طابورين قدام بعض... واحد يهاجم، و التاني يدافع قصاده زي المراية...

و طبعا عشان تبقي مسبوكة... الباشا لازم يعد من واحد لعشرة بالياباني!! و احنا طبعا مش فاهمين حاجة... و كل ما يعد واحدة الطابور المهاجم يهاجم و هو بيقول (هااا)، و الطابور المدافع يدافع بانه يرجع للخلف و هو يحمي وجهه بذراعه!! بس الحمد لله، كان بيعد من واحد لتسعة (هوش بوش حس بس) بصوت معقول... و لما يجي يقول عشرة يروح مزعق جامد... يقوم الطابور المهاجم يزعق جامد قوي...

طيب كلام سليم و متمرنين عليه و تمام التمام... يوم الحفلة بقي المدرب عد من واحد لتمانية، و احنا شغالين تمام... و جه يعد تسعة بالياباني، علي صوته شوية... لقيت الواد اللي قدامي راح هاجم و مزعق في وشي جامد... رحت مخضوض و واقع علي اللي جنبي... راح واقع علي اللي جنبه... زي الدومينو كده... و لقيتلك الناس كلها بتضحك علي... و المدرب بيقومني و بيقولي "الله يفضحك"...

رابط المشاركه
شارك

انشئ حساب جديد او قم بتسجيل دخولك لتتمكن من اضافه تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل ؟ سجل دخولك من هنا.

سجل دخولك الان
  • محاورات مشابهه

    • التغذية المدرسية مكانها قمة الأولويات

      رغم ما تعانيه بريطانيا حاليا فقد قررت الإستمرار في تقديم الوجبة المدرسية حتى في الاجازة الصيفية  ما سبق كان إستهلالا لابد منه قبل الثورة  اي قبل ٦٨ سنة كانت المدارس تقدم وجبة للتلاميذ و كانت المدارس الثانوية مزود بمطابخ و مطاعم  في غفلة من الزمان توقف كل هذا  و تقلص إلى بسكوتة تعطى يوميا للطفل  زياد بهاء الدين يثير القضية و يجعلها في قمة مسئوليات الدولة  الطفل يذهب إلى المدرسة خصيصا من أجل الوجبة :  : «ليس الحل حيال ما جرى أن نوقف توزيع الوجبة المدرسية، ولا أن نكتفى بتوزيع ال

      في التعليم و العمل - education & employment issues

    • اجراءات توثيق الشهادات المدرسية

      السلام عليكم ارجو افادتى بالنسبة لنوثيق الشهادات المدرسية وملفان المدرسة من الخارجية هل يوجد خطوة قبل التوثيق مثل اعتماد من وزارة التربية والتعليم اومن ادارة تعليمية ولكم جزيل الشكر

      في التعليم و العمل - education & employment issues

    • كمبيوترات محمولة بدلا من الكتب المدرسية توفرمليار سنويا لمدة6سنوات

      إلى رئيس الوزراء ووزير التعليم الحاليين ومن سيأتى بعدهم : قرأت أن ميزانية طباعة الكتب المدرسية مليار و32 مليون جنيه وهذه ميزانية سنوية تزداد بزيادة عدد الطلاب وهناك ميزانية تابعة لها وهى ميزانية الطباشير ودهان السبورات وعلى ما اعتقد أنه توجد فى مصر حوالى 40 ألف مدرسة تستهلك كميات من الطباشير لو قلنا بمتوسط ألف جنيه =40000×1000=40000000 جنيه وأما دهان السبورات فلو قلنا أن تكلفة السبورة 20جنيه فى عدد 500000 فصل فالناتج هو10000000 جنيه بالقطع يضاف لهم نتيجة استعمال المدرسين للطباشير وهى أمراض الص

      في التعليم و العمل - education & employment issues

    • معرض الغرائب والطرائف

      جايبلكم مجموعة صور غريبةوطريفة وكل صورة تحتها التعليق المناسب من وجهة نظري ياللا نبدأ بسم الله سبحان الله ضد الجاذبية الوجه الاخر للقمر الفرس يكسب أوووووووووووووف

      في معرض الصور

    • خبراء الأرصاد الجوية المهلبية

      من حوالى أربع سنين و فى شهر ديسمبر قررت أنا و جوزى نطلع سفرية سريعة كده لاسكندرية يومين نغير جو بس من بابا الاحتياط نطمن الأول أخبار الجو ايه ليكون فيه نوة و الامطر و نتبهدل فى الطريق المهم قلنا نطمن و نتصل بهيئة الأرصاد الجوية و نشوف ايه الأخبار و كان مفاد المكالمة ان الجو مش مستقر و هتمطر هناك قلنا آآآآآآه طاب و بعدين خلاص بلاها العربية نسافر بالقطر و فعلاً . رحنا و الجو كان تحفة و لا مطر و لا يحزنون :lol: من اسبوعين برضو مطرت تلج فى القاهرة و الجو كان لطيف مش برد يعنى و طلعوا بتوع الأرص

      في موضوعات خفيفة

×
×
  • اضف...