اذهب إلى المحتوى
محاورات المصريين

أخبار فيروس أنفلونزا الخنازير في مصر


pink rose

Recommended Posts

  • الردود 47
  • البداية
  • اخر رد

أكثر المشاركين في هذا الموضوع

أكثر المشاركين في هذا الموضوع

لسه باخد نفسي إلا وأقرأ هذا الخبر في جريدة المساء بتاعت الحزب الوطني أبو مؤتمر هانجيب أجلك انت

الخنازير..خرجت عن السيطرة

128 إصابة جديدة منها 75 بالمدارس والجامعات.. والقاهرة في المقدمة

الصحة تعترف: الإجراءات الحالية لا تكفي.. لردع الفيروس

"المساء" تكشف الفوضي.. في حميات العباسية

خرجت أنفلونزا الخنازير عن السيطرة.. ظهرت 128 حالة إصابة جديدة منها 75 بالمدارس والجامعات واحتلت القاهرة المرتبة الأولي في سجل الإصابات.

اعترف د. عبدالرحمن شاهين المتحدث الرسمي باسم وزارة الصحة بأن الإجراءات الصحية الحالية لم تعد كافية لردع الفيروس مطالبا المجتمع بأكمله بالتصدي لأنفلونزا الخنازير.

من جهته أكد د. حاتم الجبلي وزير الصحة أن الهدف من اجازة العيد عشرة أيام هو التقاط الأنفاس بعد المعركة الشرسة التي خاضتها وتخوضها وزارة الصحة والأجهزة المختلفة لمحاربة الوباء إلا أنه توقع في الوقت نفسه ازدياد أعداد المصابين خلال الفترة القادمة.

قرر د. الجبلي الزام المستشفيات الخاصة باستقبال المصابين بأنفلونزا الخنازير وتخصيص 5% من الاسرة بها لهذا الغرض مهددا بإغلاق أي مستشفي يخالف تلك التعليمات.

من جهة أخري كشفت "المساء" من خلال يوم قضته في مستشفي حميات العباسية عن مدي الفوضي المنتشرة بالمستشفي وسوء حالة النظافة وعدم الاهتمام الكافي بالمرضي والمترددين عليه للكشف عن إصابتهم بأنفلونزا الخنازير.

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

يعنى أنا نفسى أعرف ...

لو الدولة ما وفرتش اعتمادات مالية واهتمام عالى المستوى بمستشفيات الحميات فى الظروف دى .. ممكن يعملوا كدا إمتى؟

[وسط]!Question everything

[/وسط]

رابط هذا التعليق
شارك

إلزام المستشفيات الخاصة باستقبال حالات أنفلونزا الخنازير

هذا أمر هام جداً .. على أن يتم الرقابة المستمرة على تلك المستشفيات .. والضرب بيد من حديد على المخالفين

صباح المشمش

او على رأي الشوام

صباح الموشموش

لما يبصوا جوه يبقى بعده كده يبصوا بره

قصدي لما يظبط مستشفياته الحكومية وخصوصاً مستشفى حميات العباسية اللي مرمي عليها العبء كله يبقى يضرب يا عم ابو أدهم بيد من صفيح على الباقي وخصوصاً الخاصة اللي ما بيشوفوش منهم الا كل خير

موقف واقعي عشته بحذافيره

من اسبوعين عشت لحظات من اللي بتخلي الواحد يموت في الرعب

بنت نسيبي أخو المدام هنا .... تعبت في مصر ... عندها سنة وشهرين سيادتك .... ووصلت درجة حرارتها إلى 39.5 .. فأخوه جري بيها الساعه 1 بالليل على مستشفى الحميات .... والبنت وصلت لدرجة الاغماء والتشنج ... وكان عندها بقى لها يومين أسهال .... خلي بالك من دي ... دخلوا الطواريء ... فقالوا له أقف في الدور يا سيد

والمستشفى زحمه مووووووت في الوقت ده تخيل ؟

وإحنا معاه خط مفتوح على التليفون

قولنا له أدخل للدكتور وأديله التليفون إحنا بنتلكم دولي يابني

الدكتور مشكور قال ولو ... خليك في الطابور

والبنت مغمي عليها خلي بالك وخايفين تكون زفت خنازير

فين وفين

ههههههههههههههههههههه

طردوه بره وأدوا له " تحاميل " حضرتك سوري يعني

فقلنا له يا بني أدم تحاميل إيه البنت بتموت بغض النظر عن خنازير ولا خفافيش .... وعندها أسهال كمان .. ادخل لمدير المستشفى

ههههههههؤ ؤ ؤ ؤ ؤ.. دخل للراجل وقابله بكل ترحاب وقدم له شاي بالياسمين مع تشيز كيك .. وقال له بكل ود : إطلع بره هو ده اللي عندنا

أقسم بالله زي ما بأحكي كده .... الولد يا عيني صغير وعنده 20 سنة ... وعمال يعيط وهو شايف البنت بتموت وعينيها أتقلبت وخشبت وقطعت النفس وهما شايفين كده

وكويس إن كان معاه فلوس كتير .. أخد العربية وأعصابه بايظه وطلع على مستشفى خاص في مدينة نصر وأول ما شافوا حالتها كده كانوا هايضربوه

ودخلوها العناية المركز وفضلت لحد 6 الصبح وإحنا معاه وكنا بنموت كل ثانية

والحمد لله أنقذوها

عاش جمال مبارك مفجر الثروة ... ويعيش أبوه كمان لحد ما يخلص علينا

حمدا لله على سلامتها ..انا والله وانا بقرأ الموضوع كنت على اعصابى ..

انا ليا ذكريات هناك فى العباسية ..منذ اربع سنوات كانت ابنتى لسه عمرها ستة اشهر ..وكنا نازلين نجهز لفرح اختى

البنت سخنت فجأة وجبنا دكتور فى البيت كتبلها على ادوية ..مجابتش فايدة

ونحطها فى طبق كبير مليان مية وتطلع برضه سخنة

ناديت جارتى وقالتلى اقرب مكان ليكى العباسية

وانا كنت متوقعة ان المستشفى احسن حاجة فى التعامل مع السخونية ..اصل هنا فى المانيا حصل لأبنى نفس الحكاية وهو فى نفس العمر وحجزوه ليلة هناك مع انه حالته كانت افضل بكتير من اخته

المهم دخلت .. والدكتور قالى حطيها هنا عشان اكشف عليها ..وكان بيشاورلى على مكتبه

وفعلا وضعتها على المكتب وكشف عليها وكتب نفس الدوا اللى الدكتور كان كاتبه وقالى ادخلى جوه فى بانيو مليان ماء طبعا غسلت رجليها بس ومشيت بسرعة

ولما عرفوا الناس بعد كدا انى اخدتها مستشفى العباسية للحميات قالولى احمدى ربنا انها طلعت سليمة

مفيش اهتمام خالص وحاسة انها ملهاش لازمة

رابط هذا التعليق
شارك

الموضوع تطور ...

ودخل منحنى جديد

على السعودية أكتر من مصر

امبارح أكتشفوا حالة جديدة لأنفلونزا الخنازير في مصر لشخص كان يؤدي العُمرة ورجع مصر ...

فيا ترى يا هل ترى الراجل ده اخد العدوى منين ؟

خصوصاً إن السعودية تتعامل مع الموضوع بمنتهى البساطة وكإن ما عندهاش ملايين بييجوا عشان العمره وكل سنة وإنتو طيبين رجب بدأ وداخلين على رمضان والحج والضحايا هاتبقى للرُكب

قلنا دفع الضرر مُقدم على جلب المنافع .. ما حدش سمع

ويا جماعة اللي أدى العُمرة والحج قبل ذلك عليه أن يُفكر مره ثانية في ظل هذه الظروف ... إتهمونا بمعاداة الأسلام ...

ألا قد بلغنا اللهم فأشهد ..

اللي مخوفني كمان الاجراءات الاحترازيه الشكليه فقط

يعني انا كنت في دبي الاسبوع اللي فات وكنت راجع علي الخطوط السعوديه ونازل مطار جده وفي الطياره ادونا ورقه عشان نملاها فيها بيانات المسافرين كامله عشان لو اكتشفوا اصابه حد من الطياره يلموا المسافرين ويفحصوهم المهم اني قعدت املاها بكل دقه ورقم جواز سفرك ورقم تليفون شخص قريب منك وعنواين المنزل والعمل وفي الاخر ماحدش اخد مننا الورقه لا في الطياره ولا في الجوازات؟؟؟؟؟؟؟

نفس اللي حصل معايا وانا جاي جده لاول مره من شهرين

وقعدنا نكتب ونكتب

وفي الاخر خدنا الورق وروحنا بيه البيت هههههههههه

ولا حد قالنا انتو فين ولا جايين منين

وفي المطار ما حدش بس عل

تم تعديل بواسطة KAhamid
رابط هذا التعليق
شارك

بعتذر من الخروج عن الموضوع بس بما ان الشيء بالشيء يذكر ..

قصة نسيب حضرتك استاذ سيد بتفكرني بموقف حصل لي من ثلاث سنين تقريبا ..

كنت في مصر وقتها .. وفجأه على الساعه اثنين بليل لقيت بنتي بتعمل صوت غريب كده وفجاه بدات اكرمكم الله تستفرغ بطريقة غير عاديه عمري ماشفتها قبل كده .. كان عمرها وقتها يمكن سنتين او اقل شويه مش فاكره ..

انفزعت من منظرها ودي كانت اول مرة تحصل لها حاجه زي كده خاصه لما حرارتها ارتفعت وكان باين عليها الاعياء .. فجأه بلا مقدمات لقيتها عيانه وعلى آخرها زي مابيقولوا ..

قعدت اعد الدقائق قبل الساعات على مالصبح يطلع واخذناها وطلعنا على اقرب مستشفى لينا ..

احنا ساكنين في المحلة .. تحديدا في السبع بنات وفي هناك مستشفى خاص راقي كويس اخذتها ليه الساعه سته الصبح كده قالوا لنا للاسف معندناش طبيب اطفال مناوب ممكن يكشف عليها ويديكم العلاج الاكيد .. قلنا لهم طيب نعمل ايه قالوا روحوا مستشفى مش متذكرة اسمها قالوا دي كبيرة واكيد تلاقوا فيها

كان رعبي كله انها تكون حالة تسمم لان قبلها باقل من شهر كان في ابن قريبة لنا في سنها ومتوفي بنفس الاعراض ..

اخذنا تاكسي وقلنا له مستشفى كذا ولما عرف الحالة قالنا وتتبعوا نفسكم ليه روحوا مستشفى الحميات الحكومي .. طبعا استنكرنا موقفه بس سكتنا وقلنا في ذهننا اصله ميعرفش .. قلنا له بس ودينا دي وخلاص هي مستشفى كويسه .. المهم وصلنا المستشفى الي قالوا عليها وتكرر المشهد بحذافيره .. مفيش دكتور يكشف عليها اطلعوا بيها على مستشفى كبيرة تانيه اظن كانت مستشفى حباظه ..

برضه طلعنا بيها جري على المستشفى الثالثه الخاصه الكبيرة المشهورة والي تعتبر هي دي احسن حاجه في المحلة ملقيناش فيها حد في الوقت ده ممكن يكشف عليها او يحدد ان كان تسمم ولا عندها ايه .. وكل ده والبنت كل شويه تستفرغ وربنا العالم بحالتنا ساعتها ..

معرفناش نروح فين .. وتذكرنا كلام السائق الي نصحنا بالمستشفى الحكومي .. فسالنا الدكتور او الشخص الي استقبلنا في حباظه مش متذكرة قلنا له نروح على الحميات ولا كده قال ماشي روحوا بيها دي اكيد تلاقوا فيها مناوب ..

خذناها جري ورحنا على هناك ..

لاول مرة ادخل المستشفى دي وان كنت بشوفها على طول لانها في الطريق مابين المحلة حيث اسكن وطنطا حيث بلدي الاصلي ..

قالوا لنا ادفعوا كشف ( نص جنيه ) وانتظروا الدور بتاعكم لان ده وقت تغيير نباطشيه فشويه على ما تدخلوا للدكتور ..

قعدنا وكل شويه الحالات عماله تزيد حوالينا .. وكلهم حالات مايعلم بيها الا ربنا .. يعني انا خايفه على بنتي لانها بنتي والوحيده لكن برضه الامهات التانيين شايلين اطفال ( شفت طفل لونه احمر من شده الحراره .. احمر بجد مش مجازا ) وكلهم تعبانين وكلهم حالتهم مايعلم بيها الا الله ومفيش هنا واسطه بقى ان بنتي تدخل الاول لمجرد انها بنتي مهو كل دول لهم اهل برضه ..

في هذه الاثناء كانت ماما في السعوديه وكانت بتتصل بي عل الموبايل كل خمس دقائق تقريبا ( فكرتني بيها يااستاذ سين سين )

وكل شويه تستعجلنا .. عملتم ايه .. اطلعوا بيها على طنطا .. اطلعوا بيها على طنطا ..

اعصابي اساسا كانت تلفانه واتصالاتها المتكررة تلفت لي اعصابي اكتر واكتر .. وخوفها وقلقها الغير طبيعي على البنت خلاني اقول انها وكطبيبه وطالما قلقانه كده يبقى اكيد الحاله ( سيريوس ) وده خلاني اموت من الرعب اكتر ..

وفيين دخلنا على الطبيبه .. كشفت عليها بسرعه وادتها مجموعه من الادوية قالت بعضها اصرفوها من الصيدلية هنا ( مجانا ) والبعض اشتروه من برا .. رحنا عملنا زي ماقالت ..

ماما اتصلت .. ( شخطت في ) وقالت انتي هتضيعي البنت .. دي اكيد دكتورة امتياز مبتفهمش حاجه اطلعي بيها على طنطا ..

اخذتها وزي ماقالت و( طلعت ) على طنطا ..

انارايحه لدكتور استشاري هناك بيتابعها من يوم مااتولدت .. ملقيتوش طلع في الاسكندرية وهيجي بليل ..

خذتها وطلعت على مستشفى خاص وطلبت استشاري قالوا لي منقدرش نعمل شيء مبيجيش دلوقت ولازم تنتظري لبليل برضه ..

هنا بدأت اعقل الامور .. وكنت اديتها جرعه من الدواء والحقن الي كتبتها دكتورة الحميات وبالتاكيد الجرعه مش بتشتغل في ساعتها وانما بتاخذ وقت .. بدأت اطمئن عليها وقلت هوديها بس لدكتور بليل كتحصيل حاصل خاصه مع ( الزن ) الغير طبيعي من والدتي ومن بعده زوجي في ان لازم الاستشاري يشوفها ..

بليل اخذتها للدكتور الاستشاري وكشف عليها واعطاها بالملي نفس الادوية الي كتبتها لها دكتورة الحميات مع فارق بسيط بس اننا تكلمنا معاه شويه وشرح لنا مثلا ليه مديلها حقن مش دواء عادي عشان هي بترجع فمش هينفع تاخذ حاجه بالفم .. بس كده ودفعنا المبلغ اياه الي اكيد انتم عارفينه لدكتور جامعي استشاري وطلعنا واحنا مبسوطين وسعداء اننا اطمئنينا على البنت والحمد لله جات بسيطه ..

خدت لها كام يوم على مابدات تتعافى بعدين الحمد لله شفيت تماما ..

القصة دي علمتني حاجتين اتنين ..

اولا ان مستشفيات الحميات فيها امكانيات جبارة .. ايوه ممكن يكون فيها شيء من الاهمال او ان العدد فيها كبير بس فعلا فيها اطباء وفيها ادوية وكله ببلاش تقريبا اكيد في فئات من الشعب بتستفيد منها بشكل يمكن احنا الي متعودين نروح عيادات خاصه مش حاسين بيه .. بجد تحية لكل الناس الي بتعمل فيها بصمت دي ..

وثانيا اني بطلت اقول لماما على اي حاجه تخص مرض بنتي الا بعد ماتخف او كنوع من الاستشارة فقط لاني اكتشفت ان قلب الام بيتغلب دائما على عقل الطبيب والاهم ان الي ( برا ) مبيكونش شايف الوضع الي ( جوا ) فبيقلق بزياده ويقلقنا معاه ..

تعرف يااستاذ سين سين .. يمكن لو نسيب حضرتك مكلمكمش ومكنتوش معاه ( اون لاين ) وقت وقوع المشكلة مكانش كل القلق ده حصل وكان الموضوع عدى بلا تذمر او شكوى ..

واكيد بعتذر مرة تانيه لخروجي عن الموضوع ..

..إذا دعتك قدرتك على ظلم الناس فتذكر قدرة الله عليك ..

رابط هذا التعليق
شارك

بليل اخذتها للدكتور الاستشاري وكشف عليها واعطاها بالملي نفس الادوية الي كتبتها لها دكتورة الحميات مع فارق بسيط بس اننا تكلمنا معاه شويه وشرح لنا مثلا ليه مديلها حقن مش دواء عادي عشان هي بترجع فمش هينفع تاخذ حاجه بالفم .. بس كده ودفعنا المبلغ اياه الي اكيد انتم عارفينه لدكتور جامعي استشاري وطلعنا واحنا مبسوطين وسعداء اننا اطمئنينا على البنت والحمد لله جات بسيطه ..

وثانيا اني بطلت اقول لماما على اي حاجه تخص مرض بنتي

عزيزتى ضحا ...هما دول اهم حاجتين

ان الواحد لازم ميقلش للناس الغاليين عليه.. على مرضه او مرض احد من اولاده

الحاجة التانية ان اهم حاجة الواحد يطمن مش مشكلة ندفع اكتر ..انا احيانا ..لما بكون فى مصر ..باخد ابنى فى الصباح للمستشفى ومش بقتنع ولازم اخده العيادة بالليل للاستشارى ..وبيكون والله فى اختلاف فى التشخيص

يعنى الدكتور الامتياز اللى فى المستشفى قالى انه احتقان فى الزور

وبالليل الاستشارى قالى لوز مع صديد ..خرجت من عنده وقلت لازم اروح لطبيب ثالث للتأكد ..وفعلا رحت لطبيب اخر فى عيادته اكدلى انه لوز مع صديد..وتحيا مصر

وانا ناوية افتح توبك للحديث عن الطب هنا فى المانيا ..بس مشغولة هذه الفترة وكمان مش عايزة اعقد الناس اللى فى مصر .. حصل شوية مواقف بتعقد وبتخوفنى من الرجوع لمصر ..يعنى بعد الواحد ما تعود على النظام هنا مش عارفة هنعمل ايه بعد كدا وديه من اسوأ ما فى الغربة

رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة

×
×
  • أضف...