اذهب الي المحتوي
د هشام ابراهيم

مين بيحب العربيات ؟

Recommended Posts

أنا فى مرحلة قرار شراء عربيه جديده .. أوّل مرّه أشترى عربيه .. فهل ممكن أعرض فى هذا الموضوع الموديلات التى أفكّر فيها و آخدر آراءكم ولاّ كده يبقى برّه الموضوع؟ بجد مش هازعل لو طلع السؤال برّه الموضوع بس بدل ما أغيّر اتجاهه ..
اللهم صلي عالنبي ... شكل البليه لعبت وهانطلق الميكروباظات .... كاتش وود

فيروز

انتي عارفه ان احنا اخوات من ايام الجيزة

خدي بقى الموقع ده ... وادعي لي

موقع لمعرفة اخر اسعار السيارات في مصر كاش او بالتقسيط بنظام اسلامي واللي يحب النبي يسقف

ويالا هاتي من عندك عشان ننصحك ... وماتنسينيش في لفه بالعربية وهاجيب عربيتي وممكن طلع نفحط سوا في طريق المطار

طبعاً هاتسأليني عن معنى كلمة " مطار " على اساس انك عارفه معنى التفحيط n2&(

شارك هذه المشاركه


رابط المشاركه
شارك

شكرا يا س.س. على الموقع ده بقى مرجع لراغبى الشراء و البيع .. حاجه كده زى مراجع "عادل إمام" :) لا بجد خدمه متميّزه فعلا بيقدّمها الموقع ده ..

شجاعه فظيعه منّك تفكّر تاخد لفّه بالعربيه معايا !! :cry: أنا لسّه متعلّمه السواقه ماليش شهرين !! طبعا تأخّرت كثيرا جدّا أنا عارفه بس ياللاّ كل شئ بأوان ..

باختصار شديد عشان بس خايفه أكون باخرج بالموضوع عن مساره ..

عاوزه أشترى عربيه و عاوزاها هاتشباك و ماتسألنيش ليه .. شكلها بيعجبنى و خلاص و كمان مش عاوزه عربيه كبيره عشان مشاكل الركن .. الميزانيه 100 ألف جنيه ..

معنديش طلبات غير يكون فيها تكييف و تكون أتوماتيك عشان موضوع تغيير السرعات ده بيعمل لى تربنه فى دماغى و أنا باسوق و بانسى آخر سرعه كنت عليها كانت كام .. n2&(

بافكّر جدّيا فى "الفيات" جراند بونتو .. باشوف "البيجو" 207 أو 307 و أدوّر وشّى و أقول أستغفر الله العظيم :sad: اللهم اخزيك يا شوشو .. نحّيت ال 207 من تفكيرى لأنّى أظنّها صغيّره و قرأت إن دى من أسوأ صفاتها .. و 307 طبعا خارج الميزانيه .. بتعجبنى بردو ال "أوبل" أسترا و كذلك ال "بولو" لكن كل هؤلاء الجميلات خارج الميزانيه .. -_-

مش متحمّسه بشدّه للعربيات الكورى زى "الهيونداى" و "الكيا" رغم إن بعض زملائى بيقولوا فيهم شعر .. و بصراحه فكّرت أضغط على نفسى و أزوّد 30 ألف و أشترى "فورد" فيستا بس دى فكره نوعا ما مستبعده لأن "الفورد" مش منتشره أوى فى "مصر" .. mfb:

يعنى الخلاصه "الفيات" جراند بونتو أقرب حاجه لما أفكّر فيه .. مش عاوزه عربيه جبّاره بس فى نفس الوقت مش عاوزاها تكون بتموت لو حطّيت فيها شنط سفر مثلا أو ركّبت فيها تلاته تانيين معايا .. :cry1:

فى انتظار الترشيحات و التعليقات .. بالمناسبه .. كل الموديلات اللىّ قلت إنّها بتعجبنى اخترتها بناء على الشكل بشكل أساسى .. أنا هايفه جدّا فى الموضوع ده ولا أنكر :) و بعد الشكل يأتى الاسم على اعتبار أنّه سيكون له مردود فى أداء العربيه ..

تم تعديل بواسطة فــيــروز

شارك هذه المشاركه


رابط المشاركه
شارك

أنا في مصر كنت متعقد من السواقه ... يعني تقريباً كنت باسوق في الهبل بس ..

وكان دايماً عندي عقُده حاجه كده زي " الفلافيوليزم " وحاسس إني لو سوقت يبقى هاتعجن في العربية وواحد بتاع كارو ييجي يلبس في عربيتي هو والحمار .. وأنا بصراحة بأخاف عالحمار ...

- لكن حكم الزمن بقى .. والعضمه كبرت والواحد ما بقاش في صحه يجري ورا ميكروباظات ... أو ياخد له كوعين تلاته في وشه وهو راكب في الأتوبيس ... لكن المواصلة الوحيده اللي لسه متواصل معها حتى الان هي مترو الأنفاق ... واي مشوار موجود قريب من خط المترو فبأركن العربية وأستقل المترو أسرع وأوفر ...

- لما جيت السعودية قعدت فترة مش محتاج عربية ... العُزاب تحركاتهم قليلة .. وفي باص في الشركة .. وفي زملاء مقاطيع مثلي عندهم عربيات ... وكانت الحياة جميله ...

- كبرت وأحلويت ونويت أكمل نص ديني ... وهنا المتجوز لو ما عهوش عربية يبقى هايخسر نص دينه .. وهايطلع تلاته ( .... ) ... ما علينا ما علينا ...

- ولإن كتر الحزن بيعلم البُكا ... فما أحتاجتش أتعلم السواقه ... لكن دخلت مدرسه عشان عملت فيها قنفد وما طلعتش رخصة من مصر وكانت زمان بتطلع بالنيه ... يعني تنوي تطلع رخصة كنت تلاقيها عندك ... والله بصورة البطاقة فقط .. نديها لأصحابنا الواصلين ... تاني يوم يجيبها لك لحد البيت ... لكن المدرسة أفادتني بصراحه ...

- أشتريت هنا العربيه قبل ما أطلع رخصه ... سجلتها بإسم الشركة ..

- وطلعت رخصة بعد كده براحتي ...

* أول حب في حياتي ... مش عشان هي أول عربية لأ ... عشان قلبي اللي اختارها وعقلي إقتنع بيها ... وتوكلت على الله وروحت خلصت في يوم واحد ... فاتحه وكتب كتاب وزفاف وكله في السريع ... كانت مرسيدس شبح ... آه ياني ... صحيح صدق الشاعر إبن الذين اللي قال ( نقل فؤداك حيث شئت من الهوا ... وإن كبر إبنك خاويه ) كنت باخاف عليها من الهوا الطاير .. وقبل ما تقول عاوزه أشرب أمبو بنزين كنت بأقول لها شبيكي لبيكي ... والصيانه دي كانت على طول صيانة وقائية ... وعمرها ما قلت بأصلها معايا ... وسافرت بيها كتير سواء داخل السعودية أو خارجها .... أمشي على 120 ماشي ... 140 ما بتقولش لأ ... والله العظيم مره سافرت جده رايح جاي كذا مره على 180 و 200 ( وبانصح الشباب الصغير إنها ما يشموش كُله ولا يجروا بالطريقة دي وأنا نفسي توبت وبقى أخري 140 لما الدنيا تطربق ويكون ورايا الديوان حتى .. لان اكتر من كده يبقى كإن الواحد بيرمي نفسه من الدور العاشر على أرض أسفلت في طريق سريع كله عربيات وإن سلم من الوقعه مش هايخلص من العربيات اللي ماشية وممكن تدوس على إيده وإيده تتجزع ) .... والظاهر إن الكحكه في إيد اليتيم عجبه ... فتقريباً كنت بمعدل كل شهر بأعمل حادثه مش أنا اللي غلطان فيها ... وفعلاً العين فلقت الحجر وكأني أول وأخر واحد جاب عربيه ... لدرجة إن مراتي أتعقدت منها وحصل لها عقده نفسيه وهلاوس سمعيه وبصرية وقالت لي طلقها طلقها وياني يا هي في البيت ... وزي ما يكون العربية قلبها حاسس وقالت أنا أنسحب بكرامتي من حياته أحسن ما يرميني في الشارع .. والمره الوحيده اللي كانت غلطتي في الحادثة كنت هاموت أنا ومراتي وابني ... وراحت عزيزة ... وشيعناها لمثواها الأخير في موكب جنائزي مهيب حضره كل وكلاء السيارات .... وشركة التأمين عوضتني مادياً ... لكن ماحدش قدر يعوضني عاطفياً ؟ ... و

مارضيتش أشتري مرسيدس تاني وقلت خلاص المره دي جت سليمه ... المره الجاية بقى ممكن أندفن جواها ...

بالمناسبة دي كان إسمها عزيزه عبد الحميد ...

* في هذوها الأثناء وقعت قدامي حته هوندا سيفيك بتاعت واحد صاحبي كان مسافر وعايز يبيع ... بس حاجه محترمه وشكلها رقيق وصغننه ومن عيله ( عيلة سوزوكي المشهورة بالمحله ) وأنا أسرع واحد في الدنيا يشتري أي حاجه ... وطالما مقتنع ودارس الحاجه دي فبأخلص على طول من غير تردد .... وعاشت زوبه معايا سنتين .. فعلاً والله يا جماعه قلبي زي ما يكون كان مقفول بالضبة والمفتاح ومش راضي يحب حد غير عزيزة ... ونصيحة من واحد حبيب قديم ... ما تصدقش المقولة اللي بتقول الحب بييجي بعد الجواز ... آه ممكن يكون حب عشرة وعيش وملح ييجي مع السنين .. لكن مش حب غرام وهيام - مين هيام دي ؟ - وكنت حاسس بيها فعلاً وهي بتحبني من طرف واحد وأنا كارفها وزي ما تكون مرات أبويا ... لدرجة والله انها عاشت سنتين معايا ما أشتكت ولا قالت مره آي وراحت لميكانيكي ... لكن حظها الأسود إنها دخلت حياتي بعد المرسيدس .. واللي يجرب المرسيدس يبقى سنته ما يعلم بيها الإ ربنا .. ولو أشترى اي حاجه بعدها مش في نفس المستوى .. بيحس إنه راكب مِعزه .... وفي يوم وقفت مع نفسي وقفت رجاله وقلت خلاص .. أنا مش قادر اكمل .. وهاسرح بنت الناس دي تسريحاً جميلاً وأديها كامل حقوقها - رُخص وورق واستمارة - وهي ربنا يسهل لها والحمد لله إن ما كانش عندنا عيال كاوتش ... وربنا يوعدها بسيد سيدي وواحد يقدرها ويحطها في جراجه قصدي عينه ... وكان قرار صعب لكن لابد منه ... وعشان تحرجني وتسيبني أتألم نفسياً .. بيعتها بمكسب .. يعني كانت كريمة وبنت اجاويد لأخر لحظه ... لكن أنا برضوا بني أدم وعندي أحساسيس وحركات وماقدرش اعيش مع واحده وأنا عاصر على نفسي لمونه ...

* في أخر أيامها أتعرفت على واحده من عيله تانية وكانت بنت ناس ... تقريباً كانت أستعمال طبيب ... وقلت مش إشكال طالما باحبها وبتحبني كل شيء يتصلح وممكن أغفر لها لو كان لها ماضي .... وجبت متسوبيشي لانسر ... وإلى حد ما كانت وسط ما بين زوبه - الهوندا - وعزيزة - المرسيدس - وسمتها ( كايداهم ) ... ويعني نقدر نقول إن مشاعري ناحيتها كانت ممكن تتعدل وتقوى مع الأيام والمشاوير ... لكن أرتكبت غلطه في حقها لن تغتفر ونزلت بيها مصر ... ودي كانت نهاية فرقة عزيز عيد والممثلة كايداهم .. ولأني مش حافظ المطبات هناك ... فكنت بأكل كل مطب ومطب لحد ما جابوا أجلها .. ومانفعش معاها تنفس صناعي ولا عمليات زرع أعضاء - قطع غيار - وقلت انا مش هافتح مستشفى ولا فاضي كل شويه يصحوني من النوم وألحق كايداهم تعبانه وألحق كايداهم بتطلع في الروح أجري يا عم عالمستشفيات وعطله ووقف حال .... وطلقت كيداهم ... بخسارة بسيطة بس اعتبرت الخسارة دي نفقة مُتعه ليها .... بس بشكل عام كانت قويه وبنت حلال لكن تيجي ساعت قطع الغيار بتبقى اغلى من الهوندا والكورولا ...

* في الأثناء دي عشت تجربة طياري كده ... فعلاً كان شغل مراهقين وقلت أجيب حاجه عائلية كبيرة .. وجبت فورد زفت 8 راكب ... وحاجه هجمه زي الأتوبيس والظاهر إن ما كانش في بيننا توافق احجام .. أنا تقريباً 6 حصان وهي يمكن 25 ...وفي فرق سُرعات بيننا ... لكن فعلاً مشاعر المراهقة أحياناً بتبقى خادعه والواحد بيبقى مندفع ورا عواطفه ... وخسرتني الجلد والسقط وصرفت عليها بالهبل .. وخسرتني كل فلوسي لحد ما فوقت وبعتها سكراب ... كُهنه يعني ... وقلت فعلاً ده ذنب حسن الهلالي ... قصد ذنب زوبه وكايداهم ..

* كبرت في السن بقى وابتديت أدخل على الأربعين .. لكن لسه بصحتي والله ... وأنتو عارفين إن سن الأربعين هو سن الحكمه وبداية التحضير لمرحلة الزبادي المنزوع الدسم ... وقلت ما بدهاش بقى ... ودور يابني على حاجه زيرو تكمل بيها اليومين اللي فاضلين لك وتتعكز عليها وتجدد لك شبابك ... وفعلاً أشتريت السنة الي فاتت سيارة من سلالة الجيب العالي ... مش عالي قوي ... لكن فور باي فور ومحندقه وقلت خلاص بقى ما بقاش فيه حيل ولا صحه للتغيير ... وجبت دايهاتوس تيريوس ... حاجه ياباني بعيون ضيقة .. وفي نفس الوقت تستحمل المطبات والبلاوي بتاعت مصر ...أينعم خدت كتف قانوني ولسه بأتعالج منه بقى لي حوالي 3 شهور .. لكن كله يهون ... واحد صاحبي عنده مرسيدس قديمه بس مطلعه عينه ... فجالي بيقول لي تعالى لو سمحت شوف العربية فيها أيه مش عاوزه تدور وأنت مرسيديساوي قديم ويمكن إيدك يبقى فيها البركه وتشتغل معاك ... نزلت معاه الباركنج وقلت له وسع وصلي عالنبي وسمعني سقفه جامده ... اخدت المفتاح وفتحت باب العربية وبأقعد على كرسي القيادة .. وحيث إني إتعودت إن الجيب بتطلع وبعدين تقعد ... مش زي باقي العربيات السيدان بتنزل تحت وتقعد .. ومش مدي خوانه أيها الأفاضل وبأقعد فوق .. أتاري الكرسي تحت وأقوم واقع حتت واقعه .. يجيلي فيها مزق في ضهري ورجلي .. ولحد دلوقت شغال مسكنات لما خلاص زهقت ...

بشكل عام التريوس حلوه .. اينعم لا يمكن مقارنتها باللاند كروزر أو الفورتيشنر او البرادو لكن ممكن نعتبرها اختهم الصغيرة ... ولإنها 1500 سي سي فمش بتجري قوي خصوصاً بعد الـ 140 لكن أنا سني ما بقاش سن جري وتفحيط .. ونويت لما أنزل بيها مصر واستقر .. ابقى أغير موتورها وأجيب لها حاجه 1800 او 2000 سي سي ...

دي حكايتي مع الزمان قصدي مع العربيات

-----------------

إستنيني يا فيروز يا بنتي .. أهدى بس كده من الذكريات المؤلمة دي وأضرب شُب عصير لمون مشبر وأرجع أنصحك نصيحة أب لبنته .... وأقول لك تعملي إيه ... ولو إني شايف إنك تديلي الميت باكو دول أستثمرهم لك في كروت الشحن .. وأرجعهم لك بعد سنة 160 تشتري بيهم حاجه محترمه ...

شارك هذه المشاركه


رابط المشاركه
شارك
لو فى مصر يلزمك دبابة :roseop:

فيروز

عندي حاجه ميركافا إستعمال يهود ... بس بحالتها ... أسرناها في حرب 56 ...

مواصفاتها

6 سلندر ... جنوط سبور .... فاتحه سقف .... بنزين 80 .... دواخل وعفشه فبريكة .... صالون جلد ....

قُولي أشتريت يا معلم سين سين والله يبارك لك ...

نص كاش دلوقت .. توتو على كبوته .. ( مش عدم ثقة فيكي .. لا والله ... لكن اصل في ناس مكلمني عليها وفلوسهم حاضره .. بس أنا قلت لهم لأ فيروز بنتنا اولى ومش هايجينا أعز منها ... ده احنا جايبنها على 4 صبيان )

ونص لما نسجلها في وزارة الدفاع ... وتستلمي الرخص والخوذة ...

شارك هذه المشاركه


رابط المشاركه
شارك
طبعا عمري ما نسيت اول عربيه بَرشَت عليها في حياتي .. ومع انها كانت عربية جوز خالتي إللا اني لا اخفي نظرات الإعجاب الأولى المتبادله بيني وبينها اللي اتطور لشعور حب حقيقي وصادق حسيت بيه مع أول تدويره للموتور اللي عزف وقتها أحلى سيمفونية للحب الخالد ...

فهو حب لم يعرف كلمة المستحيل ولم يقف حاجز الشكل أو المظهر الخارجي بيني وبينها في يوم من الأيام بل كان المضمون والجوهر هو عنوانه الوحيد ...

أقدملكم اول حب في حياتي

فيات 132

موتور 1800 cc

دفع خلفي

زجاج أمامي كهربائي

لا تحتاج لنظام الـ air pags لإنها بالفعل سيارة مصفحه

الباشا الكبير :closedeyes:

ال-١٣٢ أسطورة ما فيش كلام و عربية سطرت تاريخ عريض

ليا واحد صاحبي برضه متيم بيها و بكل انتاج فيات و ايطاليا

كلام حضرتك عن العربيات متهيألي كل واحد فينا ممكن يستخدمه علي حبه الأول في عالم السيارات الساحر

بالنسبة لحكاية الصاج و الوسائد الهوائية ....الموضوع ده شاف تحول كبير جدا ....زمان فكرة الامان إن العربية يبقى الهيكل بتاعها قوي و يستحمل الصدمات و تلاقي العربيات القديمة كلها كده تقيلة و ناشفة و تخش في أي عربية جديدة تفعصها .....انما لاقوا إن الحماية للركاب مش كفاية خصوصا في الحوادث الكبيره و الأنقلاب حفظنا الله جميعا ....طلعت بعد كده نظرية الخلية الآمنة و مناطق الأنهيار في تصميم العربية و الوسائد الهوائية .....مع الصدمة العنيفة تلاقي العربية كلها انهارت انما بعيد عن الصالون و تلاقي العربية total loss انما اللي فيها سلام ...الوسائد الهوائية عامل ....الموتور اللي بيقع لتحت بدل ما يدخل جوه مقصورة الركاب ...إلخ

زيادة بقي في عوامل الامان دلوقتي بقوا يصمموا العربيات علشان تبقى أمان علي اللي حواليها ...يعني في حالة لا قدر الله العربية خبطت بني أدم من المشاه تسبب أقل أذي ممكن

المشكلة الحقيقية في مصر بقي إن العربيات الحديثة من غير وسائد هوائية بقت لا طالت بلح الشام و لا عنب اليمن ....الحكومة معتبراها كماليات و ضرايبها كتير ...الوكلاء بيستهبلوا و يشيلوها علشان أكبر ربح ممكن و المستهلك مش فارقة معاه ما دام العربية رخيصة

أسف علي الاطالة بس الموضوع ده عاملي حالة أزبهلال :D

يا دك اسمحلي اني ادافع عن ال132واختلف معاك في نقطة الـ total loss :lol: ..

العربية دي بالذات زي ماقلت قبل كدا ماتعرفش المستحيل ..

وانا هنا بتكلم عن وضعها اللي مايقدرش حد في مصر ممكن ينكره ..

فلما مثلا لواحد زي حالاتي معاه كورولا وبها كل الكماليات ووسائل الأمان بيبقى عامل لطلعته بيها الف حساب وبيدعي يرجع لبيته تاني من غير ما يقع في حفره في وسط الطريق او سواق ميكروباص رخم يزنق عليه لغاية ما يلبسه في عمود او يطلعه فوق رصيف ..وساعتها بقى يا باشا تطلع بيها على التوكيل وتشوف الويل .. لدرجة إن أخويا وهو معاه لنسر وبيرفض يروح شوارع بعينها زي الحسين والعتبه وشارع عبد العزيز وحالف يمين ثلاثه مايخطيش عتبتهم بالعربيه ..

لكن الـ132 ..يا سلاااام :lol:

كفاية انك وانت قاعد قدام الدركسيون بتاعها عمرك ماتخاف من الطريق ولا اللي ماشي عليه ..

دا غير العديد من المواقف والطرائف اللي صادفتني مع العربيه دي بالذات ممكن ابقى اتكلم عليها في وقت لاحق ..

وربنا يروقلنا دماغك وبالك دايما يا دك :roseop:

شارك هذه المشاركه


رابط المشاركه
شارك
لو فى مصر يلزمك دبابة :closedeyes:

فيروز

عندي حاجه ميركافا إستعمال يهود ... بس بحالتها ... أسرناها في حرب 56 ...

مواصفاتها

6 سلندر ... جنوط سبور .... فاتحه سقف .... بنزين 80 .... دواخل وعفشه فبريكة .... صالون جلد ....

قُولي أشتريت يا معلم سين سين والله يبارك لك ...

نص كاش دلوقت .. توتو على كبوته .. ( مش عدم ثقة فيكي .. لا والله ... لكن اصل في ناس مكلمني عليها وفلوسهم حاضره .. بس أنا قلت لهم لأ فيروز بنتنا اولى ومش هايجينا أعز منها ... ده احنا جايبنها على 4 صبيان )

ونص لما نسجلها في وزارة الدفاع ... وتستلمي الرخص والخوذة ...

اهم حاجة الاير باج.

ملعوبة

يا س س :roseop:

شارك هذه المشاركه


رابط المشاركه
شارك
أنا في مصر كنت متعقد من السواقه ... يعني تقريباً كنت باسوق في الهبل بس ..

وكان دايماً عندي عقُده حاجه كده زي " الفلافيوليزم " وحاسس إني لو سوقت يبقى هاتعجن في العربية وواحد بتاع كارو ييجي يلبس في عربيتي هو والحمار .. وأنا بصراحة بأخاف عالحمار ...

بصراحه ده كان انطباعى بردو طول الوقت .. كل ما أشوف أتوبيس ماشى جنب عربيه ملاّكى أتخيّله هيدهسها تحته و أبقى شايفه فيلم رعب عمره ما بيحصل غير فى خيالى !! و لاّ عربيات النقل أمّا تبقى ماشى فى أمان الله و فجأه يحب سوّاق النقل يهرّج معاك فيضرب كلاكس من بتوعه و تلاقى نفسك اتنفضت خبطت فى سقف العربيه من الخضّه ..

بس زى ما بتقول العضمه كبرت و شغلى بعد ما كان فى "الزومالك" هيبقى فى "مصر الدديده" و مش هالاقى سوّاق تاكسى يبص لى أصلا و أنا باتجرّأ و أشاور له

ده غير دخلة "رمضان" كل سنه و انت طيب و دى بتبقى المواصلات فيها -بكل أنواعها- تهذيب و تأديب و إصلاح ..

إستنيني يا فيروز يا بنتي .. أهدى بس كده من الذكريات المؤلمة دي وأضرب شُب عصير لمون مشبر وأرجع أنصحك نصيحة أب لبنته .... وأقول لك تعملي إيه ... ولو إني شايف إنك تديلي الميت باكو دول أستثمرهم لك في كروت الشحن .. وأرجعهم لك بعد سنة 160 تشتري بيهم حاجه محترمه ...

خد راحتك يا عم كويّس إنّك فتحت "تانك" الذكريات و "شنطة" المعلومات و بعده هتدّينى "زقّه" فى عالم السيارات و الميكروباظات .. مش محتاج تاخد "سرعه" كبيره فى الحديث ..

اول حاجة انت مقيمة فين?

لو فى مصر يلزمك دبابة :lol:

آه فعلا مقيمه فى "مصر" .. أصل لو مش فى "مصر" كان بقى سهل أشترى أى عربيه و نشوف هنرتاح مع بعض ولاّ لأ و يحصل انفصال هادئ لو لم نتكيّف معا زى ما عمل قدوتنا "س.س." .. لكن أنا عايشه فى "مصر" و أسكن فى المهندسين و عملى سيكون فى "مصر الجديده" خلال شهرين إن شاء الله .. و لهذا مابقاش موضوع العربيه يحتمل التأجيل .. مشكلة الدبابه إنّى مش هالاقى مكان للركن و بعدين هاطلعها إزّاى دى لو لبست جيبه ولاّ فستان !! يا عيب الشوم :roseop:

فيروز

عندي حاجه ميركافا إستعمال يهود ... بس بحالتها ... أسرناها في حرب 56 ...

مواصفاتها

6 سلندر ... جنوط سبور .... فاتحه سقف .... بنزين 80 .... دواخل وعفشه فبريكة .... صالون جلد ....

قُولي أشتريت يا معلم سين سين والله يبارك لك ...

نص كاش دلوقت .. توتو على كبوته .. ( مش عدم ثقة فيكي .. لا والله ... لكن اصل في ناس مكلمني عليها وفلوسهم حاضره .. بس أنا قلت لهم لأ فيروز بنتنا اولى ومش هايجينا أعز منها ... ده احنا جايبنها على 4 صبيان )

ونص لما نسجلها في وزارة الدفاع ... وتستلمي الرخص والخوذة ...

الله ..

هى معاها خوذه !! :closedeyes:

أصل من زمان نفسى ألبس خوذه .. :lol:

هى لقطه طبعا بس مفيش منها موديل يشرب بنزين 90 !! أصل ال 80 ده انقرض يا ريّس و هيعمل لك مشاكل و انت بتبيعها فى "مصر"

شارك هذه المشاركه


رابط المشاركه
شارك
أنا فى مرحلة قرار شراء عربيه جديده .. أوّل مرّه أشترى عربيه .. فهل ممكن أعرض فى هذا الموضوع الموديلات التى أفكّر فيها و آخدر آراءكم ولاّ كده يبقى برّه الموضوع؟ بجد مش هازعل لو طلع السؤال برّه الموضوع بس بدل ما أغيّر اتجاهه ..

سيدتي الفاضلة

أولا أهلا و سهلا بحضرتك و أكيد مشاركاتك في صميم الموضوع و ما فيش تغير مسارات و لا حاجة :closedeyes:

مبدئيا حضرتك قدامك اختيارين

١ - تجيبي عربية مستعملة في الأول بما انك متعلمة جديد تقعد سنة أو سنتين

في حدود ٤٠ أو ٥٠ ألف ...الموقع إلي قال عليه سين سين ممكن يفيد حضرتك تلاقي إيه في الرانج ده

المزايا حتتعلمي السواقة أحسن و مش حتبقى خايفة علي العربية قوي خصوصا في الاول .....حتتعبك شوية في الصيانة و التصليح بس الحقيقة ديه كلها خبرات حتفيدك بعد كده باذن الله

العيب الاساسي غير الفلوس إن سوق المستعمل في مصر ما بيحكموش أي قواعد و لو مش شارية العربية من واحد بتثقي فيه تماما ممكن جدا تتعرضي للنصب و الأحتيال

٢ - تجيبي عربية زيرو من الأول

لو كده فحضرتك ماشية في الأتجاه الصحيح في التفكير في هاتشباك في حدود ١٠٠ ألف ....

الهاتشباك مناسب أكتر لشوارع القاهرة و صراحة مش عارف ليه موضة السيدان اللي ما لهاش أي معني إلا لو حد غاوي يسافر كتير و بياخد معاه شنط كتير أو بيستخدم العربية لنقل اغراض كبيرة الحجم

١٠٠ ألف رانج معقول جدا .....عربية برستيج و في نفس الوقت مش غالية قوي قلبك يتقطع عليها مع كل مطب أو خربوش مسمار

في الفئة ديه

- الجراند بونتو هايلة كعربية العيب الاساسي التوكيل .....صراحة مش بس الفيات ...فيه توكيلات كتير في مصر سيئة ..... الحقيقة اغلبهم سيئين ...توكيل الفيات متوسط مش وحش قوي نديله ٤/ ١٠ ..... ميزة العربية غير التصميم الجميل و ادائها المتميز انها اعتمادية و ١٤٠٠ سي سي فاستهلاك البنزين أقل من ال-١٦٠٠ زاي كتير من العربيات التانية

في نفس الفئة برضه لو عايزة تقارني عندك ٣ عربيات فيهم كتير من بعض لانهم في الآخر نفس المجموعة الام VW

١- البولو ......المشكلة الأساسية التوكيل ....من أسوأ التوكيلات في مصر يستحق ٠ / ١٠ ...كمان شايل كماليات كتير و جايب العربية من الصين علي حد علمي

٢ - ابيزا من سيات ....التوكيل معقول ٥/ ١٠ ....العربية مش منتشرة قوي و ديه ميزة و عيب .....فيه تصميم جديد نازل قريب خلال كام أسبوع أنا صراحة عاجبني جدا .....موديلات ٢٠٠٩ بالتصميم القديم لسه موجودة برضه و ممكن تاخدي عليها خصم كويس أول ما الموديل الجديد ينزل

٣ - فابيا من سكودا التوكيل برضه ٤/ ١٠ ....العربية هايلة تصميمها غريب شوية بس أداء و متانة و اعتمادية كويسين

استبعدي تماما البيجو .....توكيل من أسوأ ما يمكن .....تحت الصفر يعني و العربيات رهيفة جدا و اعطالها كتير و برضه استبعدي الفورد ما لهاش سوق في مصر

الكوري بيثبت نفسه يوم بعد يوم ..... لكن أنا زاي حضرتك ما باحبهوش فمش حاتكلم عنه

أخيرا فيه اختيار انك تجيبي جولف في حدود المبلغ ده لو مش حتشتري تقسيط حتبقى موديل ٢٠٠٤ أو ٢٠٠٥ و لو حالتها كويسة يبقى ما فيش أحسن من كده

تحياتي يا أفندم و تحت أمرك في أي استفسار

شارك هذه المشاركه


رابط المشاركه
شارك
وكان دايماً عندي عقُده حاجه كده زي " الفلافيوليزم " وحاسس إني لو سوقت يبقى هاتعجن في العربية وواحد بتاع كارو ييجي يلبس في عربيتي هو والحمار .. وأنا بصراحة بأخاف عالحمار ...

................................................

عندي حاجه ميركافا إستعمال يهود ... بس بحالتها ... أسرناها في حرب 56 ...

......

ما لكش حل يا سين سين باشا :closedeyes:

علي فكرة أنا كل عربية جبتها ليا أو للمدام برضه كان ليها إسم

يوسي ...اونا ....فالي ... زقزوقة .... كرملة ... تريو ...فرفورة ....لكلوكة :roseop:

شارك هذه المشاركه


رابط المشاركه
شارك
اول حاجة انت مقيمة فين?

لو فى مصر يلزمك دبابة :closedeyes:

موافقك تماما يا سنيور ....دبابة و يا ريت تبقى أبرامز علشان الميركافا بتاعة سين سين باشا راحت عليها خلاص ...... ممكن كمان بلدوزر أو لودر للاستخدامات البسيطة زاي التسوق ....... و للاطفال نجيبلهم همفي :roseop:

شارك هذه المشاركه


رابط المشاركه
شارك
يا دك اسمحلي اني ادافع عن ال132واختلف معاك في نقطة الـ total loss :lol: ..

العربية دي بالذات زي ماقلت قبل كدا ماتعرفش المستحيل ..

وانا هنا بتكلم عن وضعها اللي مايقدرش حد في مصر ممكن ينكره ..

فلما مثلا لواحد زي حالاتي معاه كورولا وبها كل الكماليات ووسائل الأمان بيبقى عامل لطلعته بيها الف حساب وبيدعي يرجع لبيته تاني من غير ما يقع في حفره في وسط الطريق او سواق ميكروباص رخم يزنق عليه لغاية ما يلبسه في عمود او يطلعه فوق رصيف ..وساعتها بقى يا باشا تطلع بيها على التوكيل وتشوف الويل .. لدرجة إن أخويا وهو معاه لنسر وبيرفض يروح شوارع بعينها زي الحسين والعتبه وشارع عبد العزيز وحالف يمين ثلاثه مايخطيش عتبتهم بالعربيه ..

لكن الـ132 ..يا سلاااام :lol:

كفاية انك وانت قاعد قدام الدركسيون بتاعها عمرك ماتخاف من الطريق ولا اللي ماشي عليه ..

دا غير العديد من المواقف والطرائف اللي صادفتني مع العربيه دي بالذات ممكن ابقى اتكلم عليها في وقت لاحق ..

وربنا يروقلنا دماغك وبالك دايما يا دك :closedeyes:

الله يخلي حضرتك

معاك طبعا ال-١٣٢ بتكتسب مزايا كتير فوق أي عربية في مصر علشان قاعدة البوز ......قاعدة معروفة لاي حد سايق في مصر ....لو حطيت بوز عربيتك في الأول يبقى الأولوية في المرور ليك ....طبعا سواقين الماكروباظ أكتر ناس بيكسروا القاعدة ديه خصوصا مع العربيات مرهفة الأحساس زاي الكورولا أو الانسر .....دول ما يسدوش مع ال-Booz base

انما ال-١٣٢ و الادا و الفيات القردة و النص نقل خصوصا لو من غير رفارف ما بتفرقش معاهم الكلام ده :D

تحياتي يا باشا :roseop:

شارك هذه المشاركه


رابط المشاركه
شارك

الدكتور هشام قائد اوركسترا الحجرة عندنا في الاجنص .. يا سلام يا ولاد

اركن يا دوك على جنب عشان عايز امسك في خناق فيروز

---------

يا فيروز هانم

ايوه انتي

يعني انتو تركبوا عربيات .. وتقلقوا راحتنا ؟

روحت النهاردة يا ستي خائر القوى وضعيف البنيه .. وقلت انام شويه .. والغلطة المتكررة ...سيبت الموبيل مفتوح .. وما كملتش نص ساعه الا واختي بتتصل بيه من مصر .. وبتقولي : بارك لي ؟ قلت لها ايه ؟ قالت لي اشتريت عربية النهاردة

آه والله

وهي لسه نازله مصر من 4 ايام

فقلت لها مبروك .. قالت لي هي مراتك ما حكيتلكش حصل لنا ايه امبارح ؟ قلت لها لأ

اتاريهم نزلوا روكسي هما الاثنين يشتروا اسدالات وتحاجيب ومراتي مشيت بدري علشان الاولاد مع جدتهم .. ومافيش نص ساعه الا واتصلت بأختي بتعيط ... البنت يا عيني اتسلقت في الشمس ومافيش تاكس كلب عاوز يقف لها ... كالمعتاد انا بيحصل معايا كده ... وكأن التكسجية بيبقوا نازلين يلينوا العربيات ... وقالت لي ووقفنا احنا الاتنين نوقف تاكس لمدينة نصر لحد ما الشمس كلت راسنا .... فحلفت مية يمين انزل اشتري عربيه وان شالله ماحد حوش

على فكره هي مستجده زيك

وطلعنا لها الرخصة وهي قاعدة تحت الجميزة السنة اللي فاتت ولسه ما بتعرفش فردة الكاوتش من فردة الحلق هههههههه

واخويا هايعلمها بقى

شوفي يا ستي ...

هما اشتروا نيسان صني اوتوماتيك من الشركة المصرية ... 2009 طبعاً ... السعر 86 النص دلوقت .. والنص التاني على اربع سنين ... بفوايد 18 الف ...

اي خدمة

على فكرة في حدود المبلغ بتاعك كنت هانصحك بنيسان ... ياباني ووراها شركة محترمة ... والسيلينج فاليو بتاعتها كويسه ... وليها مكيف تلاجه ... هنا في السعودية قطع غيارها رخصيه .. اعتقد في مصر كذلك ... هو الوكيل بتاعها " سعودي " اسمه سعودي وهو رئيس شعبة مصنعي السيارات في مصر على ما اعتقد .

اللانسر برضوا عربية جامده وشيك قوي قوي قوي .. لكن عيبها قطع غيارها غاليه .. لكن الموتور الميتسوبيشي من اقوى المواتير

الكرولا هاتبقى عاليه عليكي وبعد الميه وخمسين

اسمعي كلام الدكتور هشام ..

بس ليه تعليق بسيط

انتي شاريه عربيه عشان تريحي دماغك

يبقى لازم فيها تكييف كويس .. وسيبك من كلام الكفتجيه بتاع ان التكييف بيجيب اجل العربية وحمل على الموتور والكلام ده ... المكيفات شغالة فحت هنا ليل نهار

اقول لك سر .... انا صيف شتا مشغل التكييف ..

صيف عشان الحر

لكن السر بقى ... شتا عشان لو فتحت الشباك اللي جانبي شعري بيتنعكش ويطير وبابقى زي امنا الغوله ( امنعوا الضحك ... الشعر الحرير عالجبين يهفهف ويرجع يطير وكدهوت )

الحاجه التانية ... ما تشتريش عربية اقل من 1600 سي سي على اساس يبقى عزمها كويس خصوصاً مع تشغييل التكييف لإنه بالتأكيد سحب العربية والتكييف شغال غير وهو مش شغال .

عايز بقى حد يكلمنا عن الماتريكس عامله ايه في مصر ... هي في الحدود دي وعاليه وهاتش باك خلقه .. لي صديق شغال في شرم الشيخ ومعاه ماتريكس بقى له سنتين .. هاسأله وارد عليكي .

اخوكي سيد فتيس

شارك هذه المشاركه


رابط المشاركه
شارك

والله انا كنت عايز اخد رايكم انا عايز اجيب الالنترا 2009 والحق اجيبها واستفيد بخصم سنه الصنع و كمان 5% عن كل سنه

قولت لنفسى بدل مشترى عربيه مستعمله وتكون كويسه هتجيبلها 25-30 الف - طيب المبلغ ده ادفعه فى حته هيونداى النترا

والباقى على سنتين وتبقى ذى الفل - وعلى الاقل مواصفاتها وعربيه بتاعت شغل - وبانت قوى هنا فى السعوديه كل اليموزينات قلبت من

نويوتا للهيونداى وهى 1600 فول اوبشن

مع انى هتجنن على حته تويوتا RAV4 or fortuner

بس اعمل ايه فى الجمارك الى هتاخد عليها 135%

وهترخصهالى اتوبيس

المهم اجيب الالنترا من هنا واقعد بيها الكام سنه دول وانزل بيها ولا ايه ؟

شارك هذه المشاركه


رابط المشاركه
شارك
الدكتور هشام قائد اوركسترا الحجرة عندنا في الاجنص .. يا سلام يا ولاد

اركن يا دوك على جنب عشان عايز امسك في خناق فيروز

يا أفندم العفو قائد أوركيسترا إيه بس ده أنا غلبان :roseop:

سعادتك فيروز باشا عايزة عربية هاتشباك و ما بتحبش الكوري .... يبقى لا الصني تنفع و لا الانسر و لا الماتريكس يا سين سين باشا ......الماتريكس بالذات كوري و كروس أوفر مش هاتشباك ..... هي صراحة عربية كويسة و الناس اللي جابوها أتبسطوا منها ....عيبها الوحيد توكيلها ...أسوأ توكيل في مصر عن جدارة ....كان فيه حملة علي النت أصلا اسمها تغور من وش غبور من كتر الشكاوي من التوكيل

معاك طبعا يا هندزة في موضوع السحب مع السي سي الأعلي انما ما تنساش إن شوارع المحروسة عادة السرعة القصوي فيها ١٠ كم بالكتير :lol:

تحياتي يا باشا :closedeyes:

شارك هذه المشاركه


رابط المشاركه
شارك
والله انا كنت عايز اخد رايكم انا عايز اجيب الالنترا 2009 والحق اجيبها واستفيد بخصم سنه الصنع و كمان 5% عن كل سنه

................

سيدي الفاضل الالنترا الجديدة من أفضل ما أنتجت هيونداي و سبب رئيسي لارتفاع أسهم الشركة في السوق العالمي هي و الموديلات الجديدة جينيسيس و سانتا في

اللي مش حاقدر أرد عليه الجدوي الأقتصادية من شرائها من الخليج و النزول بيها مصر ...أولا ما عنديش فكرة عن القواعد و الضرايب بتاعة جلب عربية لمصر ثانيا حتي لو عرفتهم ما أضمنش انهم ما يتغيروش بكره

طبعا لو فيه حد من الأخوة الافاضل يقدر يفيد في الموضوع ده فيبقى ألف شكر ...نصيحتي المخلصة هات العربية اللي إنت عايزها و لما تنوي تنزل مصر باذن الله يبقى يحلها ألف حلال .....مجرد رأي شخصي

شارك هذه المشاركه


رابط المشاركه
شارك
- الجراند بونتو هايلة كعربية العيب الاساسي التوكيل .....صراحة مش بس الفيات ...فيه توكيلات كتير في مصر سيئة ..... الحقيقة اغلبهم سيئين ...توكيل الفيات متوسط مش وحش قوي نديله ٤/ ١٠ ..... ميزة العربية غير التصميم الجميل و ادائها المتميز انها اعتمادية و ١٤٠٠ سي سي فاستهلاك البنزين أقل من ال-١٦٠٠ زاي كتير من العربيات التانية

في نفس الفئة برضه لو عايزة تقارني عندك ٣ عربيات فيهم كتير من بعض لانهم في الآخر نفس المجموعة الام VW

١- البولو ......المشكلة الأساسية التوكيل ....من أسوأ التوكيلات في مصر يستحق ٠ / ١٠ ...كمان شايل كماليات كتير و جايب العربية من الصين علي حد علمي

٢ - ابيزا من سيات ....التوكيل معقول ٥/ ١٠ ....العربية مش منتشرة قوي و ديه ميزة و عيب .....فيه تصميم جديد نازل قريب خلال كام أسبوع أنا صراحة عاجبني جدا .....موديلات ٢٠٠٩ بالتصميم القديم لسه موجودة برضه و ممكن تاخدي عليها خصم كويس أول ما الموديل الجديد ينزل

٣ - فابيا من سكودا التوكيل برضه ٤/ ١٠ ....العربية هايلة تصميمها غريب شوية بس أداء و متانة و اعتمادية كويسين

أخيرا فيه اختيار انك تجيبي جولف في حدود المبلغ ده لو مش حتشتري تقسيط حتبقى موديل ٢٠٠٤ أو ٢٠٠٥ و لو حالتها كويسة يبقى ما فيش أحسن من كده

تحياتي يا أفندم و تحت أمرك في أي استفسار

أوّلا شكرا جزيلا على الرد المفصّل ده ..

ثانيا فيه حاجه محيّره بالنسبه لى فى موضوع السى سى ده ..

يعنى فيه ناس بتقول مهم تكون العربيه مش أقل من 1600 و ناس تانيه تقول لأ الهورس باور أهم و السى سى مش هو المقياس !! و أنا بصراحه مش فاهمه العلاقه ولا بتتحسب إزّاى و بتتحسّ فى إيه فى أداء العربيه؟

على فكره "فابيا" من "سكودا" كانت على رأس ترشيحاتى فعلا بس فيه ناس حذّرونى من صعوبة الحصول على قطع غيار لها و لهذا فكّرت فى "الفيات" لأنّها منتشره أكتر حسب تصوّرى ..

طيب سؤال كمان معلش .. هى مش "الجولف" قريبة "البولو" و تنتجهم نفس الشركه؟ بل أن هناك من يقول أن "جولف" تمّ تطويرها إلى "بولو" فهل "جولف" مش بتتصنّع فى "الصين" زى "البولو"؟

شارك هذه المشاركه


رابط المشاركه
شارك
يا فيروز هانم

ايوه انتي

يعني انتو تركبوا عربيات .. وتقلقوا راحتنا ؟

روحت النهاردة يا ستي خائر القوى وضعيف البنيه .. وقلت انام شويه .. والغلطة المتكررة ...سيبت الموبيل مفتوح .. وما كملتش نص ساعه الا واختي بتتصل بيه من مصر .. وبتقولي : بارك لي ؟ قلت لها ايه ؟ قالت لي اشتريت عربية النهاردة

آه والله

وهي لسه نازله مصر من 4 ايام

فقلت لها مبروك .. قالت لي هي مراتك ما حكيتلكش حصل لنا ايه امبارح ؟ قلت لها لأ

اتاريهم نزلوا روكسي هما الاثنين يشتروا اسدالات وتحاجيب ومراتي مشيت بدري علشان الاولاد مع جدتهم .. ومافيش نص ساعه الا واتصلت بأختي بتعيط ... البنت يا عيني اتسلقت في الشمس ومافيش تاكس كلب عاوز يقف لها ... كالمعتاد انا بيحصل معايا كده ... وكأن التكسجية بيبقوا نازلين يلينوا العربيات ... وقالت لي ووقفنا احنا الاتنين نوقف تاكس لمدينة نصر لحد ما الشمس كلت راسنا .... فحلفت مية يمين انزل اشتري عربيه وان شالله ماحد حوش

على فكره هي مستجده زيك

وطلعنا لها الرخصة وهي قاعدة تحت الجميزة السنة اللي فاتت ولسه ما بتعرفش فردة الكاوتش من فردة الحلق هههههههه

واخويا هايعلمها بقى

شوفي يا ستي ...

هما اشتروا نيسان صني اوتوماتيك من الشركة المصرية ... 2009 طبعاً ... السعر 86 النص دلوقت .. والنص التاني على اربع سنين ... بفوايد 18 الف ...

اي خدمة

على فكرة في حدود المبلغ بتاعك كنت هانصحك بنيسان ... ياباني ووراها شركة محترمة ... والسيلينج فاليو بتاعتها كويسه ... وليها مكيف تلاجه ... هنا في السعودية قطع غيارها رخصيه .. اعتقد في مصر كذلك ... هو الوكيل بتاعها " سعودي " اسمه سعودي وهو رئيس شعبة مصنعي السيارات في مصر على ما اعتقد .

اللانسر برضوا عربية جامده وشيك قوي قوي قوي .. لكن عيبها قطع غيارها غاليه .. لكن الموتور الميتسوبيشي من اقوى المواتير

الكرولا هاتبقى عاليه عليكي وبعد الميه وخمسين

اسمعي كلام الدكتور هشام ..

بس ليه تعليق بسيط

انتي شاريه عربيه عشان تريحي دماغك

يبقى لازم فيها تكييف كويس .. وسيبك من كلام الكفتجيه بتاع ان التكييف بيجيب اجل العربية وحمل على الموتور والكلام ده ... المكيفات شغالة فحت هنا ليل نهار

اقول لك سر .... انا صيف شتا مشغل التكييف ..

صيف عشان الحر

لكن السر بقى ... شتا عشان لو فتحت الشباك اللي جانبي شعري بيتنعكش ويطير وبابقى زي امنا الغوله ( امنعوا الضحك ... الشعر الحرير عالجبين يهفهف ويرجع يطير وكدهوت )

الحاجه التانية ... ما تشتريش عربية اقل من 1600 سي سي على اساس يبقى عزمها كويس خصوصاً مع تشغييل التكييف لإنه بالتأكيد سحب العربية والتكييف شغال غير وهو مش شغال .

عايز بقى حد يكلمنا عن الماتريكس عامله ايه في مصر ... هي في الحدود دي وعاليه وهاتش باك خلقه .. لي صديق شغال في شرم الشيخ ومعاه ماتريكس بقى له سنتين .. هاسأله وارد عليكي .

اخوكي سيد فتيس

عشان تعرف بس يا "س.س." المعاناه اللىّ بنلاقيها مع سوّاقين التاكس ..

ده أنا ناويه بإذن الله أمّا ربنا يكرمنى و أشترى العربيه أنزّل إعلان أغيظ فيه سوّاقين التاكس و أقول لهم خسرتوا زبونه لُقطه عمركم ما هتعوّضوها !!

طيب بما إنّك جبت سيرة "النيسان" فيه "نيسان" تيدا هاتشباك بس مش عارفه ليه شكلها مش مريّحنى و شايفاها متوحّشه كده و أنا رأيى إن لازم الواحد يكون بيحب عربيته و معجب بيها مش يشتريها مصلحه و خلاص يعنى يشتريها بعقله و قلبه مع بعض مش بس قرار عقلى بحت .. :D

بخصوص التكييف .. طبعا مابقاش التكييف أوبشن بأى شكل من الأشكال عشان كده قلت إنّه هو و الأتوماتيك أهم شئ بالنسبه لى فى رفيقة الكفاح المنتظره .. ياقى الكماليات زى السنتر لوك و الزجاج الكهربى و المرايات مش شايفه إنّها هتفرق بشدّه معايا ولو موجوده طبعا خير و بركه بس مش أهم شئ ..

بخصوص "الماتريكس" هى ما شاء الله ملت "مصر" خلال الكام سنه اللىّ فاتوا .. بس فيه زميل فى العمل بيقول لى سيبك من "الهيونداى" و "الشيفروليه" و الحاجات الجديده دى كمان سنتين و هيبقى شكلهم كأن بقالهم عشر سنين و مش هيستحملوا .. صحيح أخبار "الشيفروليه" إيه يا جماعه فيه "أوبترا" هاتشباك بردو .. بس بردو نفسيا فيه حاجز بينى و بين "الشيفروليه" كماركه بشكل عام مش عارفه ليه ;)

شارك هذه المشاركه


رابط المشاركه
شارك

يا أفندم العفو قائد أوركيسترا إيه بس ده أنا غلبان :lol:

سعادتك فيروز باشا عايزة عربية هاتشباك و ما بتحبش الكوري .... يبقى لا الصني تنفع و لا الانسر و لا الماتريكس يا سين سين باشا ......الماتريكس بالذات كوري و كروس أوفر مش هاتشباك ..... هي صراحة عربية كويسة و الناس اللي جابوها أتبسطوا منها ....عيبها الوحيد توكيلها ...أسوأ توكيل في مصر عن جدارة ....كان فيه حملة علي النت أصلا اسمها تغور من وش غبور من كتر الشكاوي من التوكيل

معاك طبعا يا هندزة في موضوع السحب مع السي سي الأعلي انما ما تنساش إن شوارع المحروسة عادة السرعة القصوي فيها ١٠ كم بالكتير :D

تحياتي يا باشا ;)

صحيح الطمع قلّ ما جمع بس مايمنعش نعرف الفرق بين الاتنين .. يعنى إيه كروس أوفر !! أصلى كنت باتعامل معاها فعلا باعتبارها هاتشباك :D

شارك هذه المشاركه


رابط المشاركه
شارك
سيدي الفاضل الالنترا الجديدة من أفضل ما أنتجت هيونداي و سبب رئيسي لارتفاع أسهم الشركة في السوق العالمي هي و الموديلات الجديدة جينيسيس و سانتا في

طيب بمناسبة الإلانترا "عامله شغل جامد فى مصر بالمناسبه" .. هل يمكن مقارنة الهيونداى I30 بها ولاّ دى سكّه و دى سكّه تانيه خالص؟ ;) أنا هاكتفى بهذا القدر من الأسئله لحد السنه الجايّه :D

على فكره ده موقع بيعرض بعض التقييمات لأنواع مختلفه من العربيات .. أهم شئ كنت باستفيد بيه من الموقع رؤية العربيه من خلال الصور و الفيديوهات اللىّ بيعرضها الموقع لها بالإضافه للتقييم من مختلف النواحى بس الصراحه مش دايما كنت بافهم ..

whatcar

تم تعديل بواسطة فــيــروز

شارك هذه المشاركه


رابط المشاركه
شارك

Join the conversation

You are posting as a guest. If you have an account, sign in now to post with your account.
Note: Your post will require moderator approval before it will be visible.

زوار
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


  • محاورات مشابهه

    • أخوكم محتاس..و عمال يفكر..حد بيفهم في العربيات هنا؟

      أخوكم محتاس معايا ييجي 500 ريال..و عاوز أجيب عربية جديدة لانج..شفت شوية الاعلانات دي..و بصراحة محتار عربية جديدة من الوحش..عبد اللطيف جميل..حوت التويوتا في السعودية يا سيدي علي المرسيدس ولا نخلينا في الجيب ولا الدودج؟ ولا نخلينا في دي؟؟ ووعد مني..بعد ما نشتري العربية ان شاء الله..ليكوا عندي حفلة باربيكيو فظيعة..و طبعا هتبقي علي حساب أخونا سين سين..وسيحيي الحفل اثنين من ألمع نجوم الفن في العالم العربي ريا و سكينة

      في موضوعات خفيفة

    • كحت العربيّات فى الشارع.....و"هاكّر" النت البارع - منظور جديد....فى أفق المجتمع البشرى

      أستطيع أن أجزم أن تاريخ البشريّه الحديث فى العالم الغربى انقسم الى مرحلة ماقبل الانترنت ومرحلة مابعد الانترنت فلقد أصبحت جميع مظاهر الحياه فى العالم الغربى أون لاين..........كانوا يتسوّقون فى المحال التجاريّه فأصبحوا يتسوقون عبر النت من خلال الأون لاين شوبنج.......كان الطلبه يذهبون للمكتبات العامه للبحث عن المراجع فأصبحوا يقومون بذلك عبر النت.......كان كلب العائله يجرى من فتحته فى باب المنزل منطلقا نحو الحديقه ليحضر الجريده لرب المنزل فأصبح الأخير يقرأها عبر النت , كان الأصدقاء يجتمعون فى منزل

      في موضوعات جادة

×
×
  • اضف...