اذهب الي المحتوي
ذهبية

عايزة اشترى خاتم الماس وعايزة نصيحتكم ؟؟

Recommended Posts

على فكرة الالماظ مش كل حد يفهم فيه

حتى الجواهرجيه فيهم الى يقولك لا الماظ انا مبفهمش فيه

و علشان كده زى ما مش كل محلات الدهب بتبيع الالماظ

مش كل المحلات برضه بترضى ترجع تشتريه منك

خصوصا فى المحافظات بخلاف طبعا القاهرة او اسكندريه

شارك هذه المشاركه


رابط المشاركه
شارك

عنوان الموضوع "عايزة أشترى خاتم ألماس و عايزة نصيحتكم" و أرى أن على الإلتزام فى حدود هذا العنوان - و خاصة أنى مازلت مستجدا فى محاورات المصريين - لكن هل يعنى هذا ألا أناقش السؤال أصلا ؟

هل على أن يكون ردى فى حدود إشترى من فلان أو من علان ؟ أظن كدة لا أكون honest reader

طبعا فى البداية حقك الذى لا ينازعك فيه أحد أن تملى الذهب و أن تفكرى فى شراء الألماس أو حتى شراء الأنتيكات التى يتكلمون عنها !

المبرر المنطقى للتفكير فى شراء خاتم ماسى بدلا من شراء خاتم دهب هو أحد سببين أولهما أنتك إنتقلت إجتماعيا من طبقة إلى طبقة نتيجة وصول ثروة نقدية كبيرة إليك .. أو أنك من خلال علاقاتك و قراءاتك توصلت أن الماس يمثل إستثمارا جيدا مقارنة بالذهب.

لن أناقش حكاية النقلة الإجتماعية هذه و التى هناك آلاف الأسباب لتحققها ليس لأى منا الحق فى مناقشتها.

الحقيقة الأكيدة و إسألى حضرتك و تأكدى منها أن تجار المجوهرات لا يشترون القديم إلا بتراب الفلوس و فى إستثناءات قليلة عندما تشترين شبكة مثلا فربما البائع يعطيكى حق إسترداد ما دفعتيه فيها ناقص 15% إذا أعدتيها فى ظرف سنة ..... يمكن سؤال قريباتك أو معارفك هل قام أحدهم ببيع أى من مقتنايته الماسية ؟

و يمكن علشان يقولون diamond for ever or never

سأضع لك رابطين أحدهما لشركة كبيرة لبيع المجوهرات الماسية و هو http://www.bluenile.com/

و موقع مقال آخر بالإنجليزية يتحدث عن الأساطير أو قل الأفكار الغير حقيقية السائدة عن الماس و الرابط هو http://ezinearticles.com/?Diamond-Myths&id=504335

طبعا أن أكتب مش كمجرد عضو جديد فى محاورات المصريين و لكنى أتصور أنى أكتب لإبنتى أو شقيقتى.

و قبل أن أنتهى ... إذا كان شراء الخاتم كشبكة لإبنك أو إبنتك فهنا قدرتك أو قدرتى على النقاش تتوقف.

شارك هذه المشاركه


رابط المشاركه
شارك

اشكركم يا اخواتى كلكم على الاهتمام ة المرور على الموضوع

شكرا يا newcomer على المرور و على المعلومات القيمة محلات القاهرة و اسكندرية احسن فى المجال دة

شاب مصرى طيب ابعتلى انت التشكيلة على البريد الخاص لو عجبنى هابقى ابعت لك الفلوس برضة على البريد الخاص متقلقش احنا بينا ثقة و بعدين احنا بين حقد و حسد دة احنا اخوات

موضوع النصب دة فعلا معاك حق انا كنت لسة راجعة من محلات الذهب اسال لاقيت ان محلات الذهب لهمش سيرة الا على محل ذهب ضايغ يعنى مشهور فى السوق اتنصب علية من زبون و بتوع الدهب جايبين سيرنة استغرب ازاى ضائغ ينصب علية

قالوا ليا ان الزبون او العصابة المنظمة على حد قولهم جابوا لة قطعة الماظ مغشوشة يعنى الطبقة العاليا بس هى اللى الماظ فقط ة الباقى زجاج وللاسف انغش

سالت و اكتشف دة ازاى قالوا ليا لما سافر الى القاهرة يوديها لمحل هناك

اكتشف عملية النصب يعنى مش بتوع الذهب الل بيغشوا الزباين كمان تخيل

شارك هذه المشاركه


رابط المشاركه
شارك

الاخ وجدى

طبعا مش عارفة اشكرك ازاى على كم المعلومات الهايلة بجد افدتنى جداا جدا

انا فعلا مكنش عندى اى معلومة نهائى عن الالماظ على الاقل الان اعرف انا باتكلم عن اية و قيمتة اية

انا نزلت فعلا اسال لاقيت الاتى.............

مفيش الا محلين او تلاتة بالضبط اللى بيشتغلوا فى الالماظ و بياخدوا توكيل شركة اسمها ارام ليها كذا فرع فى كذا محافظة بالاضافة الى القاهرة و الاسكندرية طبعا

و عرفت ان ااقل وزن للخاتم 30., و ان فعلا زى ما انت قولت درجة اللون H و النقاء VS1 AND VS2

و ان الفرق بينهم فى السعر حوالى 5000 جنيهة

وان زى ما انت قولت الفص بيختلف حسب لقطع مش الحجم

و اللعب بقى من بتوع الذهب بيكون فى نسبة التخفيض يعنى كل قطعة عليها السعر بتاعها بالدولار

هما بقى بيقولك هنعمل لك تخفيض 45% او 35%

حسب كل ضائع و انك زبونة يعنى لكن بقى موضوع الخسارة قالى هتخسرى لما بتبيعى 10% من تمنة

سالتة طيب قيمتة بتزيد ازاى قالى حسب زيادة الدولار فى السوق

و فعلا لقيت زى ما قولت الفرق بين الفص المفتوح والمقفول حوالى 3000 جنيهة بس دة طبعا لو انا ثقة ان الضائع ما بدل الفص

فعلا كان كلام حضرتك فى ارض الواقع بعد ما سالت لاقيتة زى ما انت قولت بالضبط

شارك هذه المشاركه


رابط المشاركه
شارك

اتفق مع حضرتك يا سى السيد فى تعليقك على وجدى فعلا بيفهم احسن من بتوع الذهب نفسهم و الله وفادنى اكتر منة

جيسكا توامى شكر ا هلى مرورك الكريم و ياترى مزاجك اية النهاردة طنينى عليكى

الحج فوزى كلامك واقعى جداااا و انا واقعية و عملية

فعلا انا اقتنعت بكلام الاخوة و صرفت نظر على موضوع لان مش هيحقق ليا الهدف من الشراء

بندق افندى اسعدنى مرور حضرتك على الموضوع و مشاركة حضرتك فية اخيرا خرجت من المطبخ و شاركتنا بعض اهتماتنا اشكرك مرة اخرى على التعليق المفيد الصحى :rolleyes:

ربنا يزيدك انتى كمان يا فلانة يارب و تجوزى اولادك انتى و احنا يارب

سهراااااااااان كلامك ضحكنى موووووووت و كل ما افتكرة اقعد اضحك مرسى يا سيدى على اسمى الجديد

بس اطمن انا مش هاغيرة لانى غيرت راى ومش هاشترى الماظ يعنى هافضل ذهبية وبس

و اللى نعرفة احسن من اللى منعرفوش

doha اشكرك على المرور و طبعا شاركك الراى فى شكر الاستاذ وجدى اللى فعلا كلامة اقيم من الالماظ

tark ml

انت لسة بتدور على خاتم المدام بس و النبى لما تلاقية او ع ترجع فى رايك

مغتربة

معاكى حق فعلا و بعد السؤال اكتشفت ان بتوع الذهب نفسهم بيخافوا منة لا يبعوة ولا يشتروا و نصحونى لا امالقاهرة لا الاسكندرية خاصة من السرجانى

honsat reader

طبعا انت اسم على مسمى طبعا من حقك انك تناقشنى فى السؤال الا ما كنت وضعتة

ام سبب الشراء مش نقلة اجتماعية هو السبب التانى انة يمكن يكون استثمار احسن من الذهب

طبعا كلام حضرتك وكلام الاخوة الاعضاء فدنى جدا لان بجد لم اكن اعرف اى شىء

وبعد التفكير و السؤال قررت عدم الشراء لان السبب الحقيقى كان الاستثمار لكن من اللى شوفتة بعد السؤال و من كلام حضراتكم انة غير مجدى

وانا مش من هواة المنظرة او التفاخر او الجرى وراء المسميات لانى عملية و احب اضع المال فى مكانة الصح

كنت متخيلةان الالماظ قيمة تزيد مع الايام اكثر بكثير من الذهب لكن اكتشفت العكس

لكم كل التحية اختكم ذهبية

خلينا فى الذهب احسن اللى يخرج من دراة ومش هاكمل بقى

شارك هذه المشاركه


رابط المشاركه
شارك
طيب ايه رايكم فى الدهب الابيض وهل يعتبر استثمار جيد مقارنة بالذهب العادى

مشكله الذهب الابيض انه بمرور الوقت بيصفر

احسن استثمار اذا كان الرغبه هى فقط للاستثمار الجنيهات الذهبيه و السبائك التى تباع فى الخليج ( و بعض المحلات فى مصر )

يليها المشغولات من عيار 22 او 21

و على فكره هناك موديلات جميله جدا من العياريين دول فى الشغل الخليجى و الهندى

تم تعديل بواسطة مغتربة

شارك هذه المشاركه


رابط المشاركه
شارك
يعنى كده الدهب الابيض بيفقدقيمته هو كمان

الذهب الابيض زى الاصفر

سواء فى سعر الجرام او موضوع المصنعيه ما فيش فرق

لكن المشكله ان المشغولات الذهبيه الى من الذهب الابيض بمرور الوقت بتصفر و بالتالى ساعات متعرفش تلبس الحاجه لان شكلها بقى مش و لا بد

يعنى الى تشترى دهب ابيض للبس و الزينه تاخد فى اعتبارها انه بمرور الوقت شكله بيتغير و ممكن متعرفش تلبسه بعد كام سنه

شارك هذه المشاركه


رابط المشاركه
شارك
بس اطمن انا مش هاغيرة لانى غيرت راى ومش هاشترى الماظ يعنى هافضل ذهبية وبس

و اللى نعرفة احسن من اللى منعرفوش

ياخبر ..غيرتى رايك :rolleyes:

على فكرة يا ذهبية حقولك حاجه .. امتلاك خاتم الماظ عند اى ست فيه متعه كبيرة جدا لا يمكن ابدا يقارن بالدهب

صحيح المسألة خسرانة جدا من ناحية الإستثمار لكن هو حيكون شيء تسعدى بيه نفسك .. حيبقى من ضمن مجوهرات العيلة..

فكرة اقتناء خاتم الماظ لأى وحده مقتدرة انا بصنفها تحت بند ضرورة .. يعنى حقيقى ساعة شيك مع خاتم الماظ اعتقد اكتر شياكه

من اى حاجه تانيه .. ولا يمكن ابدا ابدا تبطل موضتهم مهما عدى الزمن .

عموما ممكن تلغى الفكرة فى الوقت الحالى لكن مش على طول :rolleyes: صدقينى الموضوع يستاهل جدا وحيفضل طول العمر معاك ..

الحاجات دى ................ بلاش تاخدى فيها رأى الرجاله ابدا :lol:

لولا

شارك هذه المشاركه


رابط المشاركه
شارك
السلام عليكم ورحمة الله....

شوفي أنا حاجيبلك الحكاية من أولها...وبأحذرك من الأول أنا ممل حبتين...

الألماظ عادة له أربع خواص بتحدد قيمته... معروفين بالfour Cs...وهما

cut...وبتحدد مدى الدقة التي تم بها قطع وتلميع الفص وحاقولك حكايته...

color... أو اللون...

calrity... أو نقاء الفص...

carat...أو القيراط وبيقيس كتلة الفص..

حاقولك بقى حكاية كل خاصية....

أولاً القطع من أهم خواص فص الألماظ ومع لك أقلها من حيث إهتمام أو معرفة الناس بها... والقطع بالمناسبة حاجة ووشكل الفص حاجة تانية... يعني الفص ممكن يكون دائري أو ماركيز أو برينسيس أو قلب.. وفيه اشكال تانية كتير... لكن إحنا إلى بنتكلم عليه هنا هو الطريقة إلى أتقطع بها الشكل ده... والقطع بيكون على أساس نسب معينة... وكل ما كانت النسب دي مظبوطة كل ما الفص يدي بريق ووهج أكتر... وعلشان كدة ممكن تلاقي فص قيراط بيلعلع في إيد صاحبته وفص تاني إتنين قيراط نفس اللون والنقاء بس تبصي له تحسيه مطفي... الفرق في النسب...فلو كان الفص مفلطح زيادة عن اللزوم أو عميق زيادة عن اللزوم الضوء مش حينعكس منه... وللأسف فيه ناس كتير مايتفهمش ده ويجيوا يشتروا الفص الجواهرجي يطلع لهم فصين واحد مفلطح وواحد نسبه مظبوطه... لما تشوفيهم الفص المفلطح يديكي إحساس إنه أكبر من حجمه... لكن بريقه (وبالتالي سعره) ما بيكونش زي الفص المظبوط...

عامل تاني هو الpolishing أو التلميع لو صح التعبير... الفص بعد ما يتم قطعه بيتم تلميع كل الأوجه بتاعته... جودة التلميع ده برضه بتفرق جامد في بريقه بعد كدة...

درجات القطع خمسة: Ideal-Premium-very good-good-poor

الideal والpremium مابيفرقوش في الround أو الفص الدائري... بس بيفرقوا في الأشكال التانية...

نخش على الخاصية التانية...اللون..

والمقصود باللون هنا هو قياس مدى وجود لون من عدمه... فكل ما كان الحجر شفاف كل ما يسمح بمرور الضوء من خلاله وبالتالي يعطي بريق أكتر... ولأن عملية تكون حجر الماس نادراً ما تعطى حجر شفاف مائة في المائة بالتالي اللون يعتبر من العوامل الأساسية في قيمة الفص... (بالمناسبة الكلام ده كله على الماس العادي أو الأبيض زي ما بيقولوا... أما الماس الملون...فده بيبقى نادر جداً وغالي جداً... ودي حدوتة تانية ممكن نبقى نتكلم عليها بعدين)...

درجات اللون بتبدأ من D و تتدرج حتى X... كون D شفاف تماماً وX تقريباً أصفر... عادة الماس إلى بيتركب في الخواتم بيكون من D لحاد J بعد كدة بيبقى الصفار واضح...

نيجي على النقاء... وهو درجة نقاء الحجر...طب نقائه من إيه؟ في معيارين لنقاء حجر الماس... النقاء الداخلي والنقاء الخارجي... وعادة المعيار بيكون بالنقاء الداخلي كونه مرتبط بالحجر نفسه... حاوضح أهه...

النقاء الداخلي... يعني نقاء الحجر من الداخل من أي شوائب أو فقاقيع هواء أو شروخ...

وده ماحدش له دخل فيه... ده مرتبط بالبالظروف إلى تعرض لها حجر الماس خلال عشرات الألاف من السنين ليتكون... النقاء الخارجي يعني نقاء سطح الحجر من الخدوش والى عادة بتحصل وقت تقطبع الحجر...

والنقاء درجاته هي: F أو Flawless، وبعدين IF أو Internally Flawless يعني نقي تماماً من الداخل بس فيه بعض الخدوش على السطح، VVS1,VVS2 أو very very slightly included وده بتكون الشوائب فيه قليلة جداً ومن الصعب جداً رؤيتها بواسطة خبير تحت تكبير عشر مرات، VS1, VS2 أو very slightly included ويتكون رؤية الشوائب فيها صعبة تحت تكبير 10 مرات، SI2, SI1 أو slightly included ويتكون الشوائب سهلة الرؤية تحت التكبير ، وأخيراً I1, I2, I3 أو Included وفيه تكون الشوائب مرئية للعين المجردة...

نيجي بقى على أخر خاصية وهي القيراط أو كتلة الحجر... والقيراط يساوي 200ميليجرام من الماس...(وبالمناسبة كلمة قيراط جاية من carob أو الخروب... وكان الناس بيستخدموا بذر الخروب قديماً في الوزن...ودي لها حكاية ممكن أبقى أحكيهالك بعدين) ما علينا... حجر الماس عادة ما يستخرج بأحجام صغيرة وكل ما حجمه يكبر كل ما تمنه يزيد... والعلاقة بين الوزن والسعر مش linear... يعني تمن فصين كل فص فيهم واحد قيراط لا يساوي تمن فص اتنين قيراط... لأن فرصه إستخراج حجر ينفع يتقطع أتنين قيراط ليست نصف فرصة إستخراج حجر ينفع قيراط... بل أقل من ذلك بكتير... ودي برضه لها حواديت ممكن نبقى نحكيها... المهم علشان نقول يا خاتم يبقى بنتكلم على الأقل في فص ربع قيراط وإنتي طالعة بقى... عندك لحاد 20 قيراط لو عايزة... بس عادة فص من نص ل واحد قيراط يعمل خاتم كويس... من واحد لواحد ونص يعمل خاتم محترم... من واحد ونص لأتنين تبقى من علية القوم... وفوق الأنتين ماما تزعقلي... :rolleyes:

طبعاً انا باهزر العبرة مش في الخاتم العبرة في إلى لابسة الخاتم)

ولاد الحلال بقى جم وأضافوا C خامسة ألا وهي الcertificate... والأصل هو أن الماس لما بتشتريه من الجواهرجي فأنتي مافيش حاجة تضمن ليكي المواصفات بتاعة الفص غير الكلام بتاع الجواهرجي...فلو قالك ده فص لون H ونقاء VVS1 فأنتي مش حاتعدي وراه... والجميل إن معظم جواهرجية مصر لما يطلعلك فص يروح قايلك ده H و VVS1، عمري ما شفت جواهرجي قاللي ده فص SI مثلاً مع إن الVVS1 ده المفروض نادر جداً...بلدنا كلها VVS1... :rolleyes: ما علينا... المهم إن الفص لما بيكون معتمد بيكون مقفول جوه غطاء بلاستيكي ومعاه شهادة فيها كل خواص الفص...والغطاء عليه مايكروفيش بالشهادة دي... المعامل إلى بتعتمد الفصوص مش كتير أشهرها GIA, AGS, EGL, IGI... تكلفة إعتماد الفص بتكون حوالي 300 دولار... وعلشان كدة الفص المقفول بيبفى اغلى من المفتوح بحوالي ألفين أو تلات ألاف جنيه... وبالتالي لو بتشتري فص ب25 أو 30 ألف وطالع يبقى من الحكمة إنك تدفعي ألفين جنيه زيادة وتبقى متأكدة من إلى بتشتريه...

بالمناسبة ممكن تشتري فص غالي ومن غير شهادة لة بتثقي في الجواهرجي... خاصة لة ده جواهرجي العيلة مثلاً وببتعاملوا معاه من سنين طويلة وهو أصلاً جواهرجي ألماظ (مش بتاع دهب وربنا فتح عليه) يعني فاهم ودارس وله سمعته وتاريخه... فهو مش حايغامر بسمعته أو إنه يخسر عائلة بتتعامل معاه لسنين  بأنه يخمك... بس للأسف دول قلة جداً جداً جداً في مصر....

طيب بعد ماوجعت دماغك اجيبلك الخلاصة...

الموضوع بيعتمد على حاجة واحدة بس... إنتي عايزة إيه من فص الألماظ ده...

لو بتدوري على حاجة تبان كبيرة والسلام والناس يقولوا ياحلاوة... يبقى إنتي ضيعتي وقتك في القراية

أما لو بتدوري على القيمة الحقيقية يبقى تحطي فلوسك في فص محترم بشهادة حتى لو صغير... بس فيه تريكات ممكن أقولهالك...

مثلاً... سعر قيراط الماس مقسم لشرائح على حسب حجمه... كل شريحة نص قيراط... يعني من 0.5 لحاد0.99 قيراط دي شريحة سعر... من 1.00 لحاد 1.49 قيراط دي شريحة تانية... كل نص بتطلعى شريحة والسعر بيزيد بشكل لوغاريتمي... فمثلاً لو فص 0.48 قيرط تلاقي تمنه 1100 دولار مثلاً... وفص تاني بنفس النقاء واللون ودرجة القطع بس 0.54...تلاقيه ب1800 دولار... مع إن الفرق 0.06 ده لا يذكر... ومستحيل تلاحظي إن فيه فرق في الحجم بين الأتنين بالعين المجردة ومع ذلك التمن أكتر بستين في المية فقط لأنه دخل من شريحة لشريحة أعلى... فا دي حاجة تاخدي بالك منها علشان ماتصرفيش فلوس على الفاضي...

حاجة تانية... بالنسبة للنقاء... شوفي.. طالما مش I... فالشوائب في الفص فعلاً غير مرئية بالعين المجردة... فالموضوع موضوع قيمة مش جمال... فلو مش ناوية تبيعي الفص دي في يوم من الأيام أو الفص عاجبك جداً بس مثلاً نقائه SI... فدي مش مشكلة أوي لأنه شئ مش بيتشاف إلا بعدسة... أما لو عايزة القيمة الفعلية يبقى على الأقل VS1...ويستحسن لو VVS... طبعاً السعر بيفرق...

حاجة تالتة... اللون... والخدعة هنا هو إنك تشوفي إنتي حتركبي الفص على خاتم دهب أبيض أو بلاتين ولا دهب أصفر... فلو حتحطيه على دهب أصفر يبقى مافيش معنى للون نقي أوي لأن كدة كدة الفص حيعكس لون الدهب ويبان مصفر شوية... يبقى مثلاً ممكن تروحي للون I أو حتى J... أما لو حيتركب على دهب أبيض يبقىH... وعادة أعلى من H مش حيفرق كتير إلى في الأحجام الكبيرة (2 قيراط فأكبر)...

يعني... ده ملخص كدة على السريع... هو الموضوع كبير... وكل نقطة من إلى قلتهوملك لها موال وحكاية...

بقولك إيه...

ماتخليكي في الدهب أحسن... :lol:

تحياتي...

اللة ينور عليك ونعم الشرح والامانة

سيدى لك منى الشكر على اسهامك بتوضيح كيفية التعامل فى الشراء للماس لقد اوجزت وانجزت تقبل منى التحية

عزيزى فية شيء هام الا وهو الماس تعرض هذة الايام الى هبوط حاد فى سعرة ومن المنتظر نزولة الى ادنى سعر حتى شهر اكتوبر القادم ...

ودة من خبراء الصناعة فى العالم وليس مصر وتم الاسبوع الماضى اغلاق بعضآ او كثير من مناجم استخراج الماس فى افريقيا لهذا السبب لأن تكلفة الأنتاج استخراجة مكلفة نظرآ لتدنى سعرة

نصيحة الى الاخت ذهبية ...

الشراء لشيء جديدليس عندى فكرة بة لا بد من الأحتراز او ان تتأكدى كما قيل لكى من البائع لان فى مصر والدول العربية ايضآ من يتاجر فى الماس من باب التجارة فقط وليس التقنية تحياتى

شارك هذه المشاركه


رابط المشاركه
شارك
عزيزى فية شيء هام الا وهو الماس تعرض هذة الايام الى هبوط حاد فى سعرة ومن المنتظر نزولة الى ادنى سعر حتى شهر اكتوبر القادم ...

ودة من خبراء الصناعة فى العالم وليس مصر وتم الاسبوع الماضى اغلاق بعضآ او كثير من مناجم استخراج الماس فى افريقيا لهذا السبب لأن تكلفة الأنتاج استخراجة مكلفة نظرآ لتدنى سعرة

المشكلة في الماس إنه لا يخضع للعرض والطلب كبقية السلع... يعني مثلاً الذهب يخضع لقوانين العرض والطلب منذ الأزل... فلو قل المعروض أو زاد الطلب أرتفع السعر تلقائياً... الماس لأة... لأنه سلعة تحتكرها شركة DeBeers... أو على الأقل حتى وقت قريب جداً كانت تحتكر 80 في المية من السوق العالمي...وهي التي تحدد السعر... بل أزيدك من الشعر بيت وأقولك هي أصلاً إلى خلقت من الماس سلعة... ومعظم العادات التي تراها من تقديم خاتم ماسي في الزفاف وتقديم خاتم ماسي كل عيد زواج هي نتاج أساليب تسويقية أتبعتها الشركة على مدار القرنين إلى فاتوا...ودي لها حكاية شرحها يطول...

الخلاصة إن الماس أينعم حجر نادر...أينعم يتطلب مهارة خاصة في تقطيعه... لكن لو كان يخضع لقوانين العرض والطلب لكان أرخص من ذلك بكثير...

وهناك حتى انواع كثيرة من الماس المخلق معملياً وإلى تمنه مايجيش عشر تمن الماس الحقيقي وبعض هذه الأنواع ممكن تخدع أجعص جواهرجي...طبعاً كل نوع له عيب أو شئ يخلفه عن الماس الحقيقي بس ده موضوع تاني لوحده... لكن قريباً جداً ممكن تجد ماس مخلق معملياً لا يختلف في شئ عن الماس الطبيعي زي ما حصل كدة في اللؤلؤ...وساعتها تلاقي عواجيز الفرح يمصمصوا شفايفهم ويقولوا "شوفي ياختي العريس العرة... جايبلها شبكة ألماظ"

ماعلينا...

أهي الأخت ذهبية صرفت نظر أصلاً... بس إلا صحيح يا ذهبية... وأنتي بتلفي لاقيتي جواهرجي قالك على فص إنه أقل من VS... الموضوع ده أصله معقدني... بلدنا كلها برلنت يا جدعان.... :lol:

تحياتي...

شارك هذه المشاركه


رابط المشاركه
شارك

الأخت ذهبية صرفت نظر أصلاً... بس إلا صحيح يا ذهبية... وأنتي بتلفي لاقيتي جواهرجي قالك على فص إنه أقل من VS... الموضوع ده أصله معقدني... بلدنا كلها برلنت يا جدعان....

ازيك يا استاذ وجدى

و الله وانا بالف و دخلت محلات كتير احترت بجد من محلات الذهب بشكل

محدش شكرا فى حد ابدااااااااااااااااااااااااا

كنت اخرج من المحل دة ادخل غيرة الاقى التانى عمل نفسة مصلح اجتماعى و بينصحى لله فى الله انى مخدش من فلان و فلان لانة بيغش

ارجع للاولانى الاقية يقولى اوعى تشترى منة دة بيغش وكل واحد بيكلمنى عن التانى بالدليل و الحجة

و الشهادات و الورق كمان و مش هاقولك كمان اية كان بيجيبلى الخاتم و ينزلة تحت الاضاءة علشان اشوف الفرق بينة و بين غيرة

و يسالنى هو التانى قالك كام و جاب لك فص كلة امتياز اتحداكى دة نصاب هذة الاسطوانة سمعتها من

جميع المحلات الى بتشتغل فى الالماس لدرجة انى حسيت انى بكلم عصابة بجد

حسيت ان الموضوع نصب فى نصب عموما اجابة سؤالك يا استاذ وجدى

انا شوفت كذا فص مقفولين كلهم vs1 لا ام vs2 مفيش ااقل من كدة خالص

الاختلاف فى تقديرات الفص فية كلة EXCELLENT و GOOD و VERY GOOD

مفيش ااقل من كدة و كلة طبعا H

لكن بجد اللى شوفتة فى عالم الالماس ان مفيش لة اى قاعدة لتسعيرتة او مقياس للحكم على ان الجوهرجى دة نصاب او لا مش زى الذهب لو عيار و تسال واحد واتنين

الالماس لو بتاع الذهب معرفش يضحك عليك فى الفص هيعملها فى الخاتم نفسة ومش هتعرف لان سعرة مش مكتوب علية هو اللى بيحدد السعر على مزاجة

انك هتخسر فية عشرة فىالمية من تمنة فى اى وقت بعتة فية وسعرة مش بيزيد

يعنى هو مجرد منظرة لا اكثر و لا ااقل دة اللى شوفتة بنفسى و الحمد الله لانى كنت فاهمة غلط خالص

شارك هذه المشاركه


رابط المشاركه
شارك
Guest freestyler

هوا انا لو معايا خاتم الاماس جديد ومش مستعمل و سعره غالى وشاريه من برا مصر... فين فى القاهره الاقى محلات لناس عندهم خبره وبيفهمو فى الالماس وبيشتروه ؟؟ حد يعرف اى حاجه عن اى محلات اقدر ابيعلهم الخاتم الى عندى ؟؟؟

شارك هذه المشاركه


رابط المشاركه
شارك

يعني اقل تمن لفص و يكون مجدي فعبلا شراة من حيث حجمة و بريقة

يعني الواحد ميجبش فص بالشئ الفلاني و يلاقي الفص الزركون شكلة احلي و بيلعلط اكتر منة

و بالنسبة لسعر اعادة البيع ؟ و سعر التبديل كمان ؟ هل منخفض جدا

يعني اسمع لو اتفك الفص من لفتة بينزل في لحظتها النص

شارك هذه المشاركه


رابط المشاركه
شارك

اتجه نسبة كبيرة من الشباب المقبلين على الزواج إلى اقتناء الشبكة من الماس بعد الارتفاعات الكبيرة فى أسعار الذهب حيث أن خاتم الماس أصبح سعره معقولا وفى متناول الكثير.

شارك هذه المشاركه


رابط المشاركه
شارك

Join the conversation

You are posting as a guest. If you have an account, sign in now to post with your account.
Note: Your post will require moderator approval before it will be visible.

زوار
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


×
×
  • اضف...