اذهب الي المحتوي
إنشاء باب جديد بعنوان سد النهضة الإثيوبي لكل الموضوعات المتعلقة بسد النهضة ×
Byte

يوميات الاسبوع الاول في كندا - متقال في مونتريال!

Recommended Posts

اوحي الي احد اعضاء المنتدي اللي بيستعدوا للسفر بفكرة هذا الموضوع بكلمة واحدة: انه جاي ومايعرفشي حد! وده بالظبط اللي حصل لي :D

انا كنت فاكر اني هاوصل المطار الاقي مسئولين لمساعدتي، وكان فيه مسئولين فعلا مضوني الطلب الخاص بمنحة الاطفال(بالنسبة للطفلين هاتكون حوالي 200 دولار شهريا) واخدولي معاد للتقديم علي التأمين الصحي، وعندما علموا اني ليس لي معارف في مونتريال، حاولوا يحجزوا لي غرفة في بيت شباب ولما لم يجدوا، حجزوا لي لليوم التالي واقمت هذا اليوم في اوتيل جنب المطار. :alien:

عندما ذهبت الي بيت الشباب في اليوم التالي واسمهYMCA

ذهبت لآخد دش في الحمام، ولدهشتي وجدت فتاه في الحمام اللي جنبي بتاخد دش والحيطة اللي بيننا نص حيطة! يعني بالعربي كنت عادي ان الناس تشوف بعض من غي حتي الشراب بتاع عادل امام!

:)

فرحت واخد زوجتي وابنتي الصغيرة الي اوتيل تاني 4 ستارز اسمهHoward Johnsons بتكلف 85 دولار في الليلة وقعدنا فيه 3 ايام لحين البحث عن شقة.

التعب اللي تعبته في التنقلات بالشنظ والعيلة خلاني اشتري عربية تالت يوم، برغم ان المواصلات في كندا سهلة، ودي كانت غلطة، لاني اخدت 6 مخالفات 5 منهم ركن في الممنوع في اول اسبوع

1. مخالفة للركن في مكان ممنوع(لم اري اللافته لانها كانت في اول الشارع)

2. مخالفة للركن جنب حنفية الحريق (لا يوجد لافته لأنه قانون معروف)

3. مخالفة للركن في مكان ركن المعوقين(لم افهم ان علامة الكرسي المتحرك تعني ممنوع الركن)

4. زهقت من المخالفات، قلت ابقي استني لما اشوف عربية بتسيب مكانها اللي راكنه فيه واركن مكانها ، تاني يوم لقيت عربيتي بس اللي واقفة عالرصيف وواخده مخالفة، لأن ده كان يوم تنظيف الرصيف ده

5، مخالفة لم افهم سببها حتي الآن ! ركنت جنب رصيف بارك ال view port في مونتريال، والظاهر ان الراجل اللي بيدي مخالفات شاف عربيتي وافترض انها راكنة غلط بالتعود، فاداها هي والميت عربية اللي راكنه قدامها ووراها مخالفات

6. مخالفة لدخول شارع ممنوع الدخول فيه ، برغم ان الشارع اتجاهين ، لكن كان ممنوع الدخول من التقاطع اللي دخلت منه

:D  :alien:  :dozingoff:

قيمة المخالفة حوالي 40 دولار للركن في الممنوع، ولكن لا يخصم منك نقط استحقاق او جدارة، مخالفة الدخول في الممنوع حوالي 150 دولار، مخالفة السرعة من 130 الي 400 دولار

???  :devil:

والي الحلقة القادمة ;)

شارك هذه المشاركه


رابط المشاركه
شارك

في اول اسبوع بيكون عليك كان مشوار مهم ، مشوارين منهم للتقديم علي الرقم القومي SIN وكارت التأمين الصحي،وهما اهم كارتين تحملهم في كندا . والرقم

الرقم القومي لا يتغير حتي بعد اخذ الجنسية ولا تستطيع العمل بدونه كما انه يكون بمثابة المفتاح الذي تستطيع عن طريقه الهيئات الحكومية والبنوك الحصول علي كل البيانات عنك.

كما تبدأ في نفس الوقت في فتح حساب في البنك حتي تستطيع الحصول علي شقة ، ولفتح الحساب يفضل ان تثبت الدولارات التي تحملها علي الباسبور في المطار لأن البنك لازم يسألك عن مصدر الفلوس. كل البنوك بتحط مصاريف علي حركات السحب والاضافة ومافيش فرق بينهم يستدعي مجرد التفكير والمقارنة. بعد ان تستقر ،افتح حساب في بنك President's choice financial لأنه البنك الوحيد في كندا اللي ما بياخدش اي مصاريف عالحركات، وبيديك Points كمان

عند البحث عن شقة: اصعب واغلي مدينتين هما تورونتو وفانكوفار، وتورونتو اصعب لأن معظم المهاجرين بينزلوا عليها، واول صعوبة هو ان معظم الشركات المؤجرة لاتوافق علي التعاقد مع من ليس له عمل دائم في كندا. ويشفع لك ان يكون لك رصيد كبير في البنك( ماتقلقوش، هنا اي مبلغ فوق ال 10 آلاف بيعتبروه رصيد كبير.

انا مشكلة الشقة بالنسبة لي كانت اسهل لأني نزلت في مونتريال، وهي من اجمل مدن كندا ولها طابع اوروبي ولكن بها اعلي نسبة بطالة. ولقيت شقة غرفة نوم واحدة ب 550 دولار في الشهر شاملة الكهرباء(ايجار شقة بنفس المستوي في تورونتو يزيد عن 1100) ولكني وقعت في مشكلة ان العقد كان سنوي ، وبالتالي عندما وجدت عمل في محافظة اخري بعد 3 اشهر ، عرضت علي صاحب الشقة 3 اشهر مقابل ان لا يقاضيني، فلم يقبل واصر علي ان يأخد قيمة العقد بالكامل. فما كان مني الا ان عملت اعلان عن Sublet وللاغراء قدمت للمستأجر الجديد 3 اشهر مجانا، في تورونتو بيكون شهر واحد كفاية في الاغلب لأن فيه ازمة شقق. كثير من المصريين في مونتريال تخلصو من المشكلة دي بان اخذوا شقة في مونتريال بايجار شهري بزيادة 100 دولار. وهو نظام موجود بكثرة في مانيتوبا ونيوبرونزويك ايضا، ولكنه نادر في تورونتو.

علي بال ما ستلمت الشقة كنت رحت محل used furniture واشتريت عفش بسيط ، واتفقت معاهم علي تسليمه لي في الشقة في يوم استلامها.

وطبعا في خلال الفترة دي كنا علي طول بناكل في مطاعم تركي ولبناني علشان الاكل الحلال (مطعم الباشا في وسط البلد عليه كفتة وشاورمة ماحصلوش)

المساعد الاول لك في كل هذه المشاوير هو شيئان يجب ان يكونا معك من اول يوم

1. ال Yellow pages وهو دليل تليفون مقسم بحسب المواضيع، والWhite pages وهو دليل تليفون مقسم بترتيب الاسماء، ولكن يوجد في آخره الBlue pages وهو دليل تليفون للمصالح الحكومية

2. خريطة تورونتو: وهي نوعان : نوع ب2 او 3 دولار، والنوع الذي افضله ب10 دولار ويكون علي شكل كتاب ، ويكون اسهل في البحث سواء راكب سيارة او اوتوبيس او سابواي. بالاضافة لوجود فهرس بآخره للاماكن الهامة(مدارس مستشفيات مكتبات .. الغ ) والوصول الي الاماكن عن طريق الخريطة من اسهل ما يكون لدرجة اني لما نزلت  اجازة لمصر كنت اتمني وجود خريطة!

ويلي ذلك ذهابك الي شركة التليفونات المحلية، وهي Bell Canada في تورونتو ولازم يكون معاك عقد الشقة للتقديم علي التليفون، وان كان ايجار شقتك لا يتضمن الكهرباء فتقوم بالاتصال بشركة الكهرباء لتوصيل الكهرباء وتخطرهم بالتاريخ الذي ستستلم الشقة فيه

.....والي الحلقة القادمة :)  :D  :alien:  :alien:  :D  ;)

شارك هذه المشاركه


رابط المشاركه
شارك

I think they have stopped asking about the lease agreement to apply for a telephone as i applied just 2 days ago and they asked for t pieces of ID and my Landing paper and my address where the tel will be. And also to make a deposit of 200 $ and will be refunded after 6 months,

Next day i called them and got my new number, the day after the telephone was working halawa  :P

- I also applied for a credit card, they will hold 1200 $ as a deposit for one year and will give u credit card with limit of 1000$ as u donot have credit history in Canada, after one year they will review you case and will increase the limit automatically and then u can take your depodit back

This bank is Nova Scotia

شارك هذه المشاركه


رابط المشاركه
شارك

من اول يوم في الشقة واجهتني 3 مشاكل :

1. مشكلة الشطافة: سبق تعرضنا لها وقلنا ان المصريين بيحلوها بطريقة من تلاتة: استخدام الكوز، او يتفننوا ويعملو شطافة,وده اللي انا عملته، او يتبعوا المثل القائل ان كنت في روما فافعل كما يفعل الرومان :P

2. مفتاح الشقة يوجد نسخة منه مع ال superintendent اوالcaretaker. وده مبدأ مطبق علي جميع الشقق بلا استثناء ، ولا يوجد حل سوي تركيب ترباس داخلي!

3. تشترك مع سكان العمارة في استخدام غسالات عامة بعملات معدنية مخصصة لسكان العمارة، وطبعا دي حاجة - بالنسبة لبعضنا، مش مرغوب فيها وخصوصا لما شفت البلاوي اللي بتتحط في الغسالات دي! وعادة لا يكون مسموح لك بادخال غسالة الي الشقة، ولكني دخلت واحدة سرا فيما بعد

ولكن بعد الاستقرار في الشقة ، تصبح الحياة اهدئ قليلا، وتبدأ بعدها تاخد بالك انك وصلت كندا لأن آخر حاجة بتكون فاكرها هي لحظة وداعك لأهلك في مطار الريان الدولي :P   :dozingoff:

شارك هذه المشاركه


رابط المشاركه
شارك

بدأت البحث عن عمل من اول يوم لي في كندا واشتريت كل الجرايد من وانا في المطار.

واصبت بخيبة امل من قلة الوطائف المعلنة في خلال اليومين الاولين، ولكني اكتشفت مع جريدة السبت ان معظم الاعلانات تنشر يوم السبت ، بل يوجد ملحق خاص بالوظايف الخالية Career

واول خطوة كانت اني اغير الResume لتوافق الطريقة الكندية، ولعدم وجود كميوتر معي وقتها ، ذهبت الي احد المكاتب المتخصصة في كتابة الResume بجوار سكني، وكنت استخدم نفس المكتب بعد ذلك لارسال الResume بالفاكس، اما لارسالها بالايميل فكنت اذهب للمكتبات العامة وهي موجوده في كل حي ومجانية

وارسلت مئات من ال Resume وعملت عشرات من ال interviews ولكن لم اوفق في الحصول علي عمل لمدة 3 اشهر! والسبب في ذلك هو عدم اتقاني للفرنسية ، وعدم وجود خبرة كندية والتي لا افهم معناها حتي الآن!

مع اول انترفيو، رحت احلق شعري، وكانت تجربة مش ظريفة لم اكررها حتي الآن، وخصوصا بعد ان قرأت في الجرائد عن القبض علي حلاقات في منظقة لافال لانهم كانوا يعرضون علي الزبائن حلاقة شعرهم وهم توبلس مقابل 10 دولار زيادة(تكلفة الحلاقة 12 دولار) وايضا بسسب تخوفي من الامراض خاصة الايدز! فاشتريت ماكينة (تمنها 25 دولار) ومن يومها وانا باحلق لنفسي.

برغم صعوبة الحصول علي الوظيفة الاولي في مجال تخصصك، فالوظائف الكاجوال سهلة، والكنديون شعب ودود حقيقة وعندما يعلموا انك تبحث عن عمل يحاولوا مساعدتك ويوجهوك للاماكن اللي طالبة عمال، ولكن بالنسبة لي كان قراري اما العمل في مجالي او العودة الي مصر الو السعودية

ملحوظة: الجريده المحلية تختلف باختلاف المحافظة: في اونتاريو مثلا تورونتو ستار، في مانيتوبا وينيبيج فري بريس

شارك هذه المشاركه


رابط المشاركه
شارك

معلومات جميلة وواقعية واستكشاف آفاق جديدة

ولكن

ما هى شروط زيارة كندا

هل لا بد من الهجرة وانتظار اجراءات الهجرة أم تعطى تأشيرة للزيارة

تحياتى

شارك هذه المشاركه


رابط المشاركه
شارك

شكرا أخى فرى

ولكن هل معظم المقيمين فى كندا ومنتظرين الجنسية

كسروا فيزة الزيارة واستمروا فى الاقامة وعملوا واستقروا

والسلطات متساهلة معهم الى أن يعدل وضعهم وتقنن اقامتهم

وأعرف ان الهجرة لها اجراءات طويلة ويجب أن تنتظر فى بلدك ما يقرب من خمس سنوات الى أن يسمحوا لك بالهجرة

وهل توجد تأشيرة كندية للعمل مثل الخليج التى تلزم صاحب تأشيرة الزيارة للخروج الى البحرين أو ايران والدخول مرة ثانية بتأشيرة العمل

يمكن أنا غشيم شوية فى موضوع كندا مع أن أخى وحبيبى فرى مصرى كنداوى

تحياتى

Edited By ragab2 on June 13 2002 7:03pm

شارك هذه المشاركه


رابط المشاركه
شارك

شوف يا سيدى .. ناس كسروا الفيزا معرفشى .. اجراءات الهجرة اقصاها سنتين .. السلطات هنا اعتبرها متساهلة .. لا يوجد بحث  فى الشوارع على الفيزا .. و الشرطة لا تحتك بك ابدا .. القدوم الى هنا ثم مباشرة اجراءات الهجرة .. اظن ممكن .. لا توجد تأشيرة عمل .. و لكن وجود خطاب تعيين من شركة ما يسهل الهجرة .. و هذا ليس موضوعا للتلاعب .. الحالات الأنسانية مسوغ قانونى للهجرة

ناس كثيرة هاجرت لا لشيئ الا لأن بلادهم فى حالة حرب .. عراقيين و أفغان و بلاد اخرى كثيرة

امريكا مصطدمة مع كندا هذه الأيام .. لأنهم بيتهمومهم بالتساهل فى اجراءات الهجرة .. و ان ارهابيين يتسللون الى امريكا عن طريق كندا

و هذا اغلق ابواب رزق فى وجوه العديد من الناس .. و خسر اناس اعمالهم و هذه احد ضرائب الأرهاب و التطرف الدينى التى يدفع ثمنها الأبرياء

شارك هذه المشاركه


رابط المشاركه
شارك

يعنى الواحد

يزور كندا للزيارة أو السياحة

وبعد انتهاء التأشيرة سواء شهر أو شهرين يظل فى كندا انتظارا للجنسية بعد سنتين

حتى لو علموا أن وجوده غير قانونى

أم يظل يجدد ويمد فى التأشيرة حتى يستطيع الاقامة قانونى الى أن يحصل على الجنسية والهجرة

معلش دوشتك معايا

بس الموضوع مشوق فعلا

تحياتى

شارك هذه المشاركه


رابط المشاركه
شارك

Dear Ragab

There is nothing called that u come by visit visa to Canada and stay for two years then u get the citizenship....this doesnot happen at all. there is rules and regulations for immigration even. U must apply from outside Canada for immigration. Even if u stay like that u will be illegal...plus u cannot work as u have no Social number and also u cannot rent a room....specially after sep 11 every thing became strict.....There is a system here but we immigrants see it easy as we have all the papers they need in any office or any place so that we donot feel any difficulty...A small example....what if u get sick and need medecine? or need to see a doctor? u even cannot do that and if u do u will spend a lot of money...

I advice anyone to seek the legal channels to save himself from hassle.

شارك هذه المشاركه


رابط المشاركه
شارك

كلام مصراوي صح!

لا تستطيع الحضور زيارة ثم التقديم علي هجرة بعد ذلك!

كما ان وجودك الغير قانوني في كندا يفقدك كل المزايا : العمل ، التأمين الصحي ، الويلفير.. الخ.

طرق الدخول الي كندا:

1. الهجرة: وهي يجب التقديم عليها من خارج كندا

2. الزيارة: وهي ليست سهلة لجميع الجنسيات! وعليه اما تكون بناء علي دعوي من احد اقربائك الكنديين، او ان تقدم ما يثبت انك غني ويقتنعوا انك فعلا جاي سياحة

3. الدراسة

4. الRefuget status ,وهي حالة معظم الافغان والايرانيين والعراقيين!

بالنسبة لاجراءات الهجرة ، استغرقت معي شهرين عن طريق مكتب كيبيك في مصر الذي تم غلقه!

شئ آخر: سمعت انه تمت الموافقة علي التشدد في شروط الهجرة، واعتبار الماجيستير الحد الادني

وعلي هذا ، بالنسبة للمصريين، اي طريق غير الهجرة يؤدي الي الخسارة ، الا اذا كنت فعلا جاي زيارة وراجع : مثلا عايز تتعرف علي احوال البلد بنفسك مثلا قبل الهجرة

اما الوظائف الكاجوال، فهي الوظائف المؤقتة ، وغالبا ماتكون وظائف الحد الادني للاجور (7 دولار في الساعة) وليس بها تأمين صحي او تأمين بطالة! وامثلتها الشغل في البنزينات والدولار ستورز والمطاعم

وقد استطعت العمل في مجالي بدون خبرة كندية لأن مجالي هو ال IT وهو مجال به نقص في العالم كله. والمجال الآخر هو اساتذه الجامعات، ولا اعلم مجال ثالث تستطيع العمل فيه في تخصصك مباشرة(مهندس، دكتور، دكتور اسنان، صيدلي، لازم تعادل الاول وده بياخد سنه علي الاقل من العمل الجاد) ولكن مستوي دخول الدكاترة ودكاترة الاسنان في السماء!

شارك هذه المشاركه


رابط المشاركه
شارك

شكرا جزيلا

للاخوة بايت وفرى ومصراوى بالخارج ومصرى كندى

على معلوماتهم السخية والمفيدة

وأدعو الشباب الى التقدم للهجرة قبل زيارة كندا حتى لا يتعرضوا للمهانة

والتى قد تأخذ شهرين كما تفضل وذكر الاخوة ولا تتكلف أكثر من عشرة آلف جنيها على حد علمى

جازاهم الله خيرا وفيرا

Edited By ragab2 on June 28 2002 04:51am

شارك هذه المشاركه


رابط المشاركه
شارك

كما ذكرت في المقدمة ، اني اول ماجيت كندا نزلت في مونتريال ، وقضيت فيها 3 اشهر.

ومن بين 4 عواصم محافظات عشت فيها في كندا ، استطيع القول ان مونتريال اكثرها اباحية، ( وصاحبة اكثر نسبة جمال ايضا :D  :sneaky2: (

وهذه الاباحية كانت صدمة بالنسبة لي!

فعادي جدا ان تجد اتنين يقبلون بعضهم "بوس سيما" في قارعة الطريق، وربما تروح مشوا وترجع تلاقيهم لسة بيبوسوا بعض، علي رأي صلاح منصور ، حــــبـــــكت :D  ???

كل ماطلع البلكونة ، الاقي في وشي اوضة نوم الجيران، وهم مش فارقة معاهم يركبوا ستارة، وصحتهم حلوة علي طول ، قلت بلاها البلكونة :0  :D

اما التليفزيون، فبعد حذف افلام ال Blue nuit ,وال rated : R, pg-18, pg-14, يتبقي ال PG و ال G. ال PG برضه مش مضمون ، ممكن يحتوي nudity ، وبكده مايتبقاش الا ال G ودي معظمها افلام والت ديزني

ولكن اكثر شئ نرفزني ، هو عندما كنت اعمل مقابلة مع Head hunter وقاللي ان مدير مركز المعلومات ، اللي هايكون رئيسي في الشغل ، Gay ، ولكنه انسان طيب ومحترم جدا، وسألني : ياتري ده ممكن يكون مشكلة بالنسبة لي؟ :)  :sneaky2:  طب بزمتكم تردوا تقولوله ايه؟

انا ركزت المرة دي عالاباحية في المجتمع الكندي، علشان موضوع كان بيتناقش في صفحة اخري مرتبط قليلا بهذا ، وربنا يستر علي مجتمعنا ولا نحتاج يوما للمقارنة :sneaky2:

ولكن الكويس في الموضوع انه نادر جدا ما تبدأ فتاة في معاكستك ، وفي الاحوال النادرة التي يحدث فيها هذا ، يكفي الصد برفق ، وهم ما بيكرروش المحاولة :blush: ، وعلي فكرة، حكاية ان البنات الاجانب بيموتوا في الشعر الاسود الاكرت وخصوصا لو كان مصري ، دي اشاعة من افلام حسن يوسف ، لكن يثيرهم الجسم الرياضي، وما بينكسفوش يعبروا عن كده ، علشان كدة يفضل لبس هدوم واسعة ، وخصوصا ان زوجاتنا المصريات ، مع ثقتهم فينا ، مخهم صغير،

طبعا انا كلامي موجه للمحافظين ، اما اللي جاي كندا علي طريقة عنتر شايل سيفه، ربنا يستر عليه ، نسبة الايدز هنا رهــــــــيــــــــبة، ده لو ما كانش عتده وازع من الدين

والي آخر حلقة عن السواقة في الSnow وال Blizzard لأن لي فيهم تجارب جميلة  :D

شارك هذه المشاركه


رابط المشاركه
شارك

هاهاهاهاها .. ربنا يسامحك .. اضحكتنى حتى مدت اموت ضحكا .. هاهاهاها

بقى فضلت تشطب فى المحطات لغاية ما فضلك ميكى ماوس .. هاهاها

اما عن باقى المواضيع ..

..لأ الحمد لله تورونتو مافيهاش الكلام دة خالص .. و فى انتظار باقى مغامراتك ..

:inlove:

شارك هذه المشاركه


رابط المشاركه
شارك

السواقة في كندا من اسهل ما يكون لالتزام الجميع بقواعد المرور، ولكن المشكلة الرئيسية التلج في الشتاء ، ومشكلة اقل صعوبة ، المطر في الصيف!

في اول اسبوع ، احتكيت بمشكلة المطر ، والمشكلة في ال Hydroplaning وهي تحدث بعد المطر الغزير الذي يترك برك مائية في ألاماكن المنخفضة او الشوارع الغير مستوية، فإذا كنت تقود سيارتك بسرعة وفوجئت بأحد هذه البرك، فان السيارة تطير فوق الماء، تمام مثل الطائرة المائية ، ومن هنا جاءت تسمية ال Hydroplanning ، وتؤدي الي فقد السيطرة نسبيا علي السيارة، وحل هذه المشكلة سهل، ماتسوقش بسرعة في المطر علشان تلحق تهدي لما تشوف برك!

المشكلة الثانية هي التلج، واول مرة تعرضت لها كان بعد 4 اشهر من وصولي كندا، وكنت عالHighway وماشفتش قبل كدة تلج في حياتي، ولكن التلج بدأ يسقط وأنا سايق، ومش عارف ان ده تلج، فاكره شوية تراب وخصوصا ان مع تساقط التلج زجاج السيارة بيغبر كل شوية، الي ان وقفت لتزويد البنزين ، ولقيت الدنيا كلها بيضاء امامي، الشوارع والشجر والسماء، جالي رعب ، وخصوصا لما افتكرت اني كنت سايق علي سرعة 130!

بعدها اتعلمت قواعد السواقة في التلج، وهما قاعدتين بساط : ماتسوقش بسرعة، وماتحودش وتضرب فرامل في نفس الوقت!

اما القاعدة التالتة فتخص السواقة وقت هبوب Snow Blizard وهي انك تقعد في البيت وماتسوقش. ودي برضه اتعلمتها عملي لما خلونا نمشي بدري من الشغل لأنه متوق هبوب Blizard والرؤية هاتكون صفر في خلال ساعتين. عادة كان الطريق للبيت يأخذ نص ساعة ، لكن يومها اخد مني ساعة ونص ، بدأنا لما الرؤية كانت لمدي عشر أمتار، وكنا سايقين بسرعة 40 كيلو عالهايواي! ووصلنا لما كانت مدي الرؤية مترين وكنا ماشيين بسرعة 10 كيلو، ولما وصلت الرؤية ل5 متر، تركت السواقة لزميلي الكندي لأني ماقدرتش امشي خطوة زيادة، وكانت طريقتنا دائما ان نسير خلف سيارة أخري ونستعملها كمرشد لنا لمعرفة انحناءات الطريق :)

ولكن الغريب اني وجدت بعض السيارات تمرق جنبنا بسرعة 70 و80 كيلو ، وعندما سألت زميلي كيف يرون الطريق قال انهم لا يرون ، ولكن يعتمدون علي حفظهم للطريق والحاسة السادسة :)

اما اخطر تجربة لي فكانت ايضا عالهاي واي بين مونتريال وفريديريكتون ، وكان التلج نازل بكثرة ولكن من غير عاصفة(يعني الرؤية كويسة ، لكن الطريق مزحلق) وكنت سايق علي سرعة 100 كيلو(ماينفعش تقطع مسافة 800 كيلو بسرعة اقل من كدة)  :)  :nervous:

ولكن لسوء حظي ان سواق النقل اللي ماشي ورايا ماعجبتوش سرعتي وقرر يتخطاني، ولكن الظاهر انه رجع نام تاني وهو بيتخطاني (مشهور عن سائقي النقل النوم عالطريق) ودخل في حارتي، فكان رد الفعل الغريزي اني انا كمان انحرفت يمين، ودي كانت الغلطة اللي انا عملتها! لأنه لما جيت اعدل نفسي قبل ماخش في الditch كان طبيعي اني افقد السيطرة علي السيارة(راجع قواعد السواق بعاليه ، مافيش هزار) ،ولما تفقد السيطرة عالسيارة وانت سايق في التلج اياك تدوس فرامل ، لأن ده يزيد الأمور سوءا! ولكني وجدت السيارة متجه بسرعتها الي عامود نور! :devil: ، فاصبت الفرامل امرا لا مفر منه، وكانت النتيجة اني تفاديت الاصطدام بالعامود بسرعة 100 كيلو ، الحمد لله، ولكن السيارة بقت تعمل خمسات بعرض الطريق، عندما تصل الي هذه المرحلة فاهم دعوة تدعيها لربنا ان ماتجيش سيارة تانية  في الوقت ده  من اي اتجاه! وتحاول تسيطر عالسيارة من غير ما تدوس فرامل! ولكن هيهات ، حضنت عامود تاني بسرعة 80 كيلو في الساعة (ده اللي قالوه في تقري الحادثة :D )

وبعد ما خبطت في العامود ، رحمة من الله:) ان التلج خلي معامل الاحتكاك مع الارض ضعيف بالاضافة الي ان العامود طار، فانحرفت والا كان الحضن هايبقي ابدي :0

ولكن الانحراف كان جامد شوية فانقلبت السيارة علي ضهرها، وبعدين وشها ، وبعدين ضهرها ، وبعدين وشها، وبعدين ضهرها ، وبعدين وشها الي ان استقرت علي .. ضهرها علي بعد 150 متر من مكان الاصطدام بالعامود ، خمس قلبات كاملة كانت كافية لأن اعتقد اني ميت لامحالة قبل ان تستقر السيارة! وما كنت افكر فيه في هذا الوقت هو شيئين: ياتري انا خارج من البيت علي وضوء حتي اكون من الشهداء، وحمدت الله علي ذلك، وماذا كان في الكاسيت في هذا الوقت؟ وحمدت الله انه كان شريطا لعمر عبد الكافي، فشعرت بهدوء والاطمئنان النسبي علي نفسي ، ولكني احسست بالهلع عندما تذكرت عائلتي، مافيش فايدة ،نقص الايمان ملازمنا حتي لحظة الموت ???  :dozingoff:

ولأني كنت اعتقد اني مت خلاص بعد ماستقرت العربية، فقد مكثت مكاني بضع ثوان لا احرك طرف، هو الميت بيتحرك :) ، ولما طال انتظاري لعزرائيل ، قلت لنفسي يمكن اكون لسة عايش، فتحسست اطرافي وعلمت من الاحساس بالألم اني حي :xmas: ، فازداد طمعي ، وبدأت اتحسس وجود كسور شديدة أو دماء غزيرة ، ولدهشتي، لطفا من الله، لم اجد شيئأ البتة ، والفضل لله ثم لحزام الأمان!

استغرق الخروج من السيارة وانا رأسي لتحت والسيارة معجونة تماما Total loss ربع ساعة ، وعندما توجهت للطريق ، وجد سيارة اخري كانت قد رأت الحادثة والعربية المدغدغة والدخان طالع منها ويتصل ب 911 ،فسألني : ياتري لقيت حد عايش في العربية دي؟ فرديت عليه : لأ مافيش حد كان فيها غيري!  :alien:  طبعا الراجل نط في مكانه :انننننتتتتتت ككككككككنتتتتت فففففففي اللللععررربببيية ددددي؟ وكان علي وشك يجري كأنه شاف عفريت!

رجال البوليس كانوا في المكان في ظرف 5 دقائق، وهم غاية في اللطف والرقة، تمام زي عندنا في مصر :sneaky2: ، وكانوا مصرين ياخدوني للاسعاف، ولكني لم اري داعي، ولكن زملائي قالوا لي فيما بعد اني كان لازم اروح معاهم تحسبا لأس شئ يحدث في المستقبل كضمان لحقي.

ولأن سائق النقل لم يقف ( وعلي فكرة عدم الوقوف ده جناية ولو كان اتمسك كان راح السجن) فاعتبرت الحادثة Hit and run ودفعت لي شركة التأمين تمن العربية كما دفعت للمحافظة تمن عامود النور (ده لوحده 3 آلاف دولار :(  

ولكن تأميني زاد بنسبة 100 % لمدة 3 سنين بعدها :angry:

و... سوقوا علي مهلكم :P

شارك هذه المشاركه


رابط المشاركه
شارك

عزيزى بايت ... الف مليون حمدالله على السلامة .. دا احنا كنا حنتحرم من كاتب كوميدى عظيم ..  :inlove:

مش قادر اللومك .. قدر و لطف الحمد لله

طبعا السواقة فى الثلج فى غاية من الخطورة .. و خاصة البلاك ايس .. و دة ان يكون حصل مطر قبل كدة و نظرا للبرد الشديد تجمد الماء على الأسفلت .. مشكلا طبقة شفافة و يكون زلقا مثل الزجاج بالظبط

تقوم تسوق على 100 يا راجل برضه .. الحمد لله اللى جت على قد كده

وسلامات

:inlove:

شارك هذه المشاركه


رابط المشاركه
شارك

Join the conversation

You can post now and register later. If you have an account, sign in now to post with your account.
Note: Your post will require moderator approval before it will be visible.

زوار
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


  • محاورات مشابهه

    • يوميات الإقامة الجبرية .. في مدينة مغلقة

      كل يوم قرار جديد  كي يقطعوا المدد عنه .. هذا الوباء اللعين .. اليوم قرار صارم .. كل الدولة مغلقة .. ممنوع الأنتقال من مدينة لمدينة ..  بل ممنوع الأنتقال بدون سبب جاد داخل نفس المدينة .. و حتي لو كنت اعيش في منطقة بعيدة نسبيآ عن بؤرات الفيروس .. و لكنه زار البعض هنا ايضآ ... دعوات جادة تصل الي حد التجريم لأبقاء الناس في بيوتها ... كي اذهب لشراء احتياجات المنزل او حتي للصيدلية لشراء دواء حماي يجب ان يكون معي اقرار شخصي بخط سيري و سبب خروجي من المنزل .. و اذا ثبت لكمائن الشرطة ان اقراري هذا كاذب سأ

      في موضوعات شخصية

    • أتجوز ؟؟؟؟ ولا أشطب الشقة الاول...........

      انا بقالى شهر بكلم بنفسى ..... اجيبها يمين شمال مش راضية تظبط قولت لنفسى ياعم انت مغلب نفسك ليه ........... (اسال & استشير) حبايبك المحاوراتية وهما هيقولولك المفيد لانهم اكتر منك معرفة وخبرة وكمان ناس كتيرة ممكن تكون مرت بالتجربة دى الاول للمعلومة انا مقيم فى السعودية ومعنديش اى تخطيط للسنتين الجايين شكلهم ايه لحد دلوقتى :blink: (ودى حاجة غيظانى لانى مش بعرف اعيش من غير تخطيط) الفكرة انى عندى شقة فى احدى المدن الجديدة (ولسه عليها اقساط) عشان اشطبها محتاج 21 شهر ابتداء من الشهر الجاى يع

      في موضوعات شخصية

    • قراءة في يوميات مهاجر(3)

      قراءة في يوميات مهاجر(3) تلتصق أول زيارة في ذهن المهاجر؛ فهي التي ترسم صورة المستقبل سواء عاد صاحبنا إلى وطنه الأم أمْ استمرتْ مسيرته المستقيمة أو المتعثرة. النجاح والفشل نسبيٌ؛ ويرتبط بالهدف من السفر وبما ينتظره القريبون منه، فمن سافر للمال فقط فلن تعثر في ذاكرته إلا على اللون الأخضر، فالدولارات هي الأوراق المقدسة! ومن سافر لأسباب عاطفية أو عائلية أو هروبا من واقع يُضيـّـق عليه الخناق غير من سافر غاضبا ومتمردًا وثائرًا على أوضاعه في البيت والمدرسة والجامعة والعمل و.. البطالة. ومن ساف

      في المغتربين المصريين - egyptian expatriates

    • قراءة في يوميات مهاجر(1)

      هذه اليوميات بطلب كريم من المشرفين على ( محاورات المصريين)! قراءة في يوميات مهاجر(1) السفر حالة حبٍ مع المجهول، وعشق مع أحلام في مستقبل لا تدري كنهَه، وآمالٌ في صباح مشرق جميل حتى لو لم تكن محاطا بظلام دامس! في فيلم ( سكة سفر) للمخرج والسيناريست بشير الديك ، وهو ثاني فيلمين له بعد ( الطوفان )؛ سُئل في حديث صحفي عن الفكرة خلف الفيلم فكان ردُّه: إن كل مصري يستخدم كلمة سفر في أكثر أحاديثه، تقريبا، فهو سيسافر، أو عائد من السفر، أو تلقىَ رسالة من قريب مهاجر، أو رتّب مستقبلـَـه المجهول انط

      في المغتربين المصريين - egyptian expatriates

    • قراءة في يوميات مهاجر (2)

      قراءة في يوميات مهاجر (2) كنت أحلم بالسفر إلى فرنسا، ربما لشعوري بالأمان اللغوي، فلغتي الأولى كانت الفرنسية، فوقع حظي في لندن(1972) حيث كانت انجليزيتي ضعيفة. كنا في مدرسة العروة الوثقى برأس التين من الذين أسعدهم الحظ باختيار اللغة الثانية من بين الانجليزية والفرنسية والألمانية والروسية والايطالية.. كان ذلك في عهد الرئيس جمال عبد الناصر عام 1958! واخترت الفرنسية وكنا تسعة عشر تلميذا، واختار 300 تلميذ الانجليزية واثنان اختارا الروسية وواحد فقط وقع اختياره على الايطالية، وكان الصفر م

      في المغتربين المصريين - egyptian expatriates

×
×
  • اضف...