أدباء الإنترنت....أو البلوجرز

[icehearted girl]

السلام عليكم أهالي المنتدي الكرام :lol:

بصراحة المنتدي داكان عاجبني من فترة كبيرة بس فقط كنت أكتفي بالمتابعة ودلوقتي بنزل أول مواضيعي

:P :

يلا بقي تصفيق حااااااااااااااااد

ايه دا ايه دا بس هش كفاية خلونا نتكلم بجد بقي :happy :

هرجع بالذاكرة ورا كام سنة_أكيد مش كتير يعني_ أيام مكنت في ابتدائي لسه..كانت أكتر هواية بحبها هي القراءة

تقريبا مكنتش بنام غير وايدي فيها كتاب

كنت كمان بخطط اني اقعد اجمع كتب ولما أكبر تبقي عندي مكتبة كبيرة

لدرجة اني كنت بستمتع بشراء الكتب اكتر من اهتمامي بالقراءة نفسها :happy:

ومن فترة كدا كنت بحب اكتب اوي_اينععم كل فين وفين _ بس كنت بحب اكتب ديما

كنت بعشق أي ورقة وقلم..اكنوا دول أقرب صديقين ليه wst::

ومن فترة دخل ال dsl دارناااااااااا يولاد... وبدأ بحثي عن الكتب داخل المكتبات يقتصر في البحث عنها في المكتبات الإلكترونية

بدأ حبي للصحافة يقتصر علي الكتابة والنشر في الموقع الإلكترونية فقط :blink:

حتي قلمي..جف حبره واستبدلته بكيبورد

ولما فكرت شوية حسيت أني بدأت افقد اهم هوايتيم في حياتي..القراءة والكتابة

طب انا وعلي أد حالي...

طيب في كام شخص كان ممكن يكون كاتب وأديب حقيقي..سجنت موهبته داخل هذا الجهاز

وتبدلت أحلامهم بالالتحاق بالصحيفة الفلانية الي مجرد مدونة يكتب بها مايشاء

هل هو الاستسهال وعدم المحاولة للوصول للهدف بجدية

أم القيود اللي تتحط بها أحلامنا هي التي جعلتنا نتجه لعالم بلا قيود ينطلق فيه طرقعات الكيبورد بدلا من اللسان..؟!!

خيفة بجد

خيفة في يوم من الايام يتولد شخص زي العقاد

اجي ادور علي كتبه ..ملاقيش غير لينكات :lol: :lol: :lol:

حد حاسس بللي بقوله؟؟؟؟

[الجدار]

طيب ايه الفرق ؟؟

أنا مش شايف ان في اختلاف بين الورقة وبين الشاشة

يعني الأتنين بيوصلوا لفكرة واحده

وفي ميزة في الأنترنت انك تقولي اللي عايزاه من غير قيود ومن غير رقابة

غير الكتب اللي تكلفتها عالية ومخاطر الخسارة أعلى

انا برضو كنت مدمن قراية وكنت بحلم أعمل مكتبة كبيرة من الكتب زي مكتبة جدي

ولما نزلت الكتب على الأنترنت واحده واحدة بقيت بحب كتب ال Pdf من على الأنترنت بجد واللي خلت الواحد يلاقي كتب من أندر ما يمكن

وببلاش من غير ما تدفعي مليم ومن غير ما تقومي وتدوري في المكتبات

انا معاكي ان الكتاب ليه طعم تاني

بس احنا لازم نواكب التطور يعني نحاول نستفيد من التكنولوجيا زي العالم كله

دي وجهة نظري المتواضعة

ومرحباً بيكي

[kazabaza]

نورتي المنتدي (و لو اني مش بكتب كتير)

الكتاب له طعم و رائحه

و في تفاعل خفي بين الواحد و الكتاب

و احساس بسعاده مختلفه اثناء القراءة

مش عارف اذا في حد تاني بيلاحظ موضوع رائحة الكتاب ده؟

دي كلها حجات مش موجوده في ال PDF

[التونسى]

انا شايف عكسك تماما .. انا شايف ان الكتابه عبر النت .. احسن بكتييييييييييييييييييييير جدا من الكتابه فى صحيفه او مجله او اى وسيلة نشر اخرى لاسبااااااااااااااااااااااااااااااب عديده

منها

*انتى الرقيبه الوحيده على قلمك .. وكتاباتك تمر الى القارئين بدون اى فلاتر او تعديلات او اضافات او حذف

*مش محتاجه لا واسطه ولا فلان بيه ولا علان باشا عشان يسمح ليكى تكتبى فى احدى المطبوعات او الوسائل الاعلاميه

*عالمية النشر والانتشار حيث انه يستطيع اى شخص فى العالم يمتك الانترنت ان يقرا لكى ويتابعك بسهوله ومجانا

*اهم واخطر وافضل ما فى النشر على الانترنت من وجهة نظرى هى نقطة ال feed back او رجع الصدى .. اى تفاعل المتلقى مع مع ما كتبتيه ورأيه له وتعليقه او تعقيبه عليه .. ومن هنا تستطيعين ان تقيسى بدقه مدى قوة وتاثير افكارك او موضوعاتك فى الاخرين .. وفى ساعتها .. مش لسه بقى حتستنى جوابات القراء فى البريد وياعالم حتوصل ولا متوصلش

******بس بقى اخطر عيب لمسألة النشر على النت وده انا عانيت منه شخصيا فى بعض ازجالى الشعريه .. هو ان كتاباتك معرضه للسرقه من قبل الاخرين ونسبها بكل بجاحه ووقاحه لانفسهم .. او على الاقل يتم اقتباس كتاباتك ونقلها وتداولها بالمواقع الادبيه والمنتديات بدون ذكر اسمك .. مما يؤدى لضياع حقك الادبى

انتى بس يمكن تكونى كلاسيكيه بعض الشئ وحاسه برهبه من استبدالك الكتابه بالقلم والورقه .. انا عن نفسى بحن كتير انى امسك الورقه والقلم واكتب خواطرى وارهاصاتى الشعريه .. لكن بصراحه النت ده طفره رهيبه .. ووسيله كويسه تقدرى تقيسى بيها مستوى كتاباتك خصوصا ان فيه منافسه شرسه لان الاف مؤلفه بتكتب فيه .. والبقاء طبعا للاكثر موهبه وتجديد وافكار وتأثير

نسيت ارحب بيكى ..نورتى المنتدى بموضوعك الاول وان شاء الله ربنا ما يقطعها عاده :mellow:

مع خالص تحيتى

التونسى

تم تعديل 14 مارس 2009 بواسطة التونسى

[سهل جدا]

أوافق الأستاذ التونسي

النت فعلا أتاح المجال لكل من لديه موهبة الكتابة وليس لديه الإمكانات المادية أن ينشر كتابته

ولكن تبقى المشكلة الأزلية.. وهي أنا ما كتب على النت لا يوثق به بقدر ما كتب في الكتب

[الباشمهندس ياسر]

مبدئيا اهلا بيك معانا

و ان شاء الله تستفيدى و تفيدى

بالنسبة للمسألة اللى حضرتك بتناقشيها

الموضوع اصبح ذو حدين

الحد الاول : مفيد لانه سمح لناس كتير تطلع على كتب .. كان صعب عليها انها تتمنى تشوفها اصلا

و كمان سمح لناس تانية انها تكتب و تتعرف بين الشباب و تطلع مواهب زى الشباب اللى بتتبناهم دار الشروق للنشر

الحد الثانى مضر جدا

لان العلم يأبى الا ان يتلقى و لان الكتاب يأبى الا ان يمسك و يركز فيه بالحواس كلها

لذلك دائما بقول ان التعليم الالكترونى بقى عامل زى الوجيه الجاهزة لا طعم ولا لون ولا ريحة

و طبعا مع تمام احترامنا لكل الاراء

و مرة تانية نورتى المنتدى

[icehearted girl]

الجدار...وهو من إمتي الاستمتاع بالهواية بيقدر بثمن؟؟

يعني لو حضرتك بتحب كرة القدم وتمن تأجير الملعب هتوفره ومتلعبش؟؟ اكيد لا

وزي مقلت لحضرتك استمتاعي باقتناء الكتاب اهم بكتير من قراءته انا في الحقيقة متفقة مع kazabaza

لان دي مش مهنة هتختفي زي الكاتب المصري القديم

دي هواية في البداية وبتنتهي بحرفة

طا اغير ازاي بروفايلي

كنت كاتبه فيه الطب مهنتي والصحافة حرفتي :) wst::

انما بصراحة التونسي أثار نقطتين عجبوني جدا

الا وهما الرقابة الشخصية والفيد باك

حضرتك واثق في نفسك بدرجة كافية تقدر تعمل بيها كنترول علي اللي يتقال ويتكتب

انما ولاد حضرتك مثلا واخواتك متضمنش المضمون اللي هما هيلاقوه في اي مدونة

خصوصا ان اصحابها يعني مش ملائكة تمشي علي الارض

وكمان التوثيق زي مقال سهل جدا

دي مشكلة بتحصلي كتير

سواء في مواضيع بكتبها بيتم نقلها بدون الاعلان عن المصدر

انتهاءا بفكرة برنامج تليفزيوني..حتي اخويا في قصة كان كاتبها لذيذة جدا اكتشت انها بتنشر في كل المنتديات

باشمهندس ياسر جميل ان حد يستخد الانترنت للحصول علي مايستطيع في الحقيقة

انما ميستبدلش بيه ما يستطيع الحصول عليه

ايه يا جماعة كلكو قاعدين ترحبوا حاف كدا ومشفتش حاجة تتشرب ولا جوز فراخ اتحط قدامي يعني :mellow:

[الباشمهندس ياسر]

باشمهندس ياسر جميل ان حد يستخد الانترنت للحصول علي مايستطيع في الحقيقة

انما ميستبدلش بيه ما يستطيع الحصول عليه

ايه يا جماعة كلكو قاعدين ترحبوا حاف كدا ومشفتش حاجة تتشرب ولا جوز فراخ اتحط قدامي يعني :mellow:

طب حضرتك داخلة وايدك فاضيه

كده ينفع برده يا دكتوره

ولا الجماعه بتوع لندن خلوكى تمشى انجليزى

[icehearted girl]

هههههههههههههههههه

لا لا لا دا عنوان تتويهي

انا داخلة بكرتونة انتي بيوتكس اهو اللي عاوز يشيل

العلبة بخمسه جنيه

والحسابة بتحسب

[icehearted girl]

انا وصحابي فعلا بنمشي انجليزي زمان كل واحد يدفع لنفسه

دوقتي بنمشي الماني

احنا الاتنين بنمشي ومبندفعش

[فــيــروز]

بصفتى من أصحاب المدوّنات لازم أقول إنّى مش فاهمه المشكله بالظبط :happy:

يعنى الموهبه -لو موجوده- لن تضيع بتغيّر الوسيط الذى تخزّنى عليه أفكارك أو تنشريها من خلاله .. بدل ما كنتى بتخزّنيها على ورق بتخزّنيها على CD أو على موقع على الإنترنت .. فما الذى سيضيّع الموهبه إذن !!

المدوّنات و غيرها من وسائط ليست هى السبب فى انزواء أصحاب المواهب و إنّما هى عدم وجود قنوات حقيقيه لهؤلاء كى يبرزوا مواهبهم و ينالوا التقدير الذى يستحقوه .. و هذا الشئ ليس قاصرا على أصحاب موهبة الكتابه حتى نتصوّر أن النت هى السبب ؛ بل يتعرّض لها مثلا لاعبو كرة القدم اللىّ مابقاش فيه -زى زمان- كشّافين يدوروا فى القرى يكتشفوهم ؛ و يتعرّض لها المطربون فلا تجدى سوى أنصاف و أرباع بل و أعشار الموهوبين يظهروا على شاشات الفضائيات لا لشئ سوى لأن معاهم فلوس ؛ و نفس الشئ تجديه متحققا فى مجال التمثيل و ظاهرة أبناء الممثلين "الفَشَله" ليست عنّا ببعيد ..

المشكله مشكلة مناخ عام لا يتيح الفرصه للمواهب الحقيقيه كى تظهر و تلقى الرعايه المستحقه .. و صدّقينى لو ظهر "عقّاد" جديد و كان يستحق هذا التوصيف عن جداره لن يقف فى وجهه عوائق أو حواجز .. بس هو يظهر

تحيّاتى و مرحبا بكِ

[icehearted girl]

العفو يا فيروز

انا كمان عندي مدونتي الخاصة بي

اللي بكتب فيها بعيدا عن تسلطات القائد او غيره من القوانين والظروف الملزمة

بس منكرش ان الطاقة اللي بطلعها فيها

ثبطت كتير من عزيمتي ديما اني التحلق باحدي الصحف

يعني استسهال زي مقلت في البداية

[سامح بيه]

يا جماعه انتم بصراحه حيرتونى يعنى الحديث كان الاول عن الكتب الالكترونيه فهممت بان اشترك وفجاه انخلط الحديث بين المدونات والكتب الالكترونيه وثم صار فى الاخر عن المدونات واهميه المدونات .....طيب ايه الحكايه

لكن الكتب الالكترونيه بصراحه تتميز بالطمع وللون والراحه كمان بشرط التأقلم عليها ...دمتم بخير

[kazabaza]

بصراحه انا كمان اتلخبط

احنا بنتكلم عن الكتاب العادي و الكتاب الالكتروني

و لا اليه النشر العادي و النشر الالكتروني و المدونات

انا كنت اقصد في مداخلتي ان اذا في كتاب من ناشر معين و في نسخه و رقيه و نسخه الكترونيه

"يعني الاتنين هيخضعو لنفس قواعد النشر"

هفضل النسخه الورقيه للاسباب الي قلتها قبل كده.