دستة عيال .. وليخسأ الحاقدون!

[أحمد سيف]

معليش اسمحلي يا أخ أحمد سيف

أنا أعتبر هذا الكلام في اتهام لربوبية رب العالمين

ربنا هو اللي بيخلق وهو اللي بيكفل الرزق للعباد جميعا مؤمنهم وكافرهم

احنا علينا ناخذ بالأسباب بس

معليش يا سيدي بلاش ندخل الموضوع في اتهامات تمس العقيدة ومحاكمة للنوايا ... خلي النقاش ماشي كويس

ديننا قال ناخذ بالأسباب والتخطيط للمستقبل بصورة علمية هو أحد هذه الأسباب

انت قبل كده ناقشتني في النواحي العلمية والمنهجية وتجاوبت معك ... لكن اتهام زي ده أنا ما أقبلوش

يبقى الحاجه شلبية مُطالبه إنها تقعد تخلف وتُنتج لمدة 30 سنة على ودنه ويا ويلها لو قالت أخد نفسي بين العيال ..

وهي أساساً كان عندها 25 .. يبقى يفضل خط الأنتاج شغال إلى أن يكون عندها 55 سنة ...

ماليش دعوة باللي بيقوله الطب وإن الست صحتها وجنينها بيتأثر بعد سنة الـ 35 وكثير جداً جداً نرى حالات حمل وولادة متعثرة بعد سن الثلاثين .. سمعت قبل ذلك إن كل حمل بيكبر الست سنتين ....... واساساً فرصتها في الحمل بتضعف كثيراً بعد الـ 40 ...

وبرضوا أولاً وأخيراً .. أتفق مع الإخوة اللي ذكرونا بالحديث الشريف " كلكم راع وكلكم مسئولٌ عن رعيته "

فخلف يا عم إن شالله تجيب فريقين كورة ... لكن خلي بالك هاتُسأل عن كل شيء خاص بتنشأتهم ..

وشد حيلك عشان لما يبقى عندك 12 عيل وكلهم في دراسة وهاتقعد مع كل واحد نصف ساعة يومياً تذاكر له ... ( يعني يادوب تفتح الكتاب وتقفله ) يبقى محتاج 6 ساعات يومياً بدون ثواني راحه ...

ولما تبقى ساكن في شقة بها حمام واحد زي معظم مستوياتنا في مصر ( ماليش دعوة بالأرستقراط اللي ولاد الذين عندهم حمامين في نفس الشقة )

يبقى إعمل حسابك الصبح وإنت رايح شغلك .. والعيال رايحه المدرسة ... يعني بنتكلم في 14 راس ... وكل واحد مسموح له يستخدم الحمام 10 دقايق فقط وإلا نقطع عنه الميه والكهربا .. يبقى عايزين ساعتين كل صباح حمام بس .. يعني الواحد يحجز قبلها بيومين عشان يدخل يزور معالي الوزير .. ويا ويله يا سواد ليله اللي يفكر ياخد دش الصبح .. دُش ؟ خسئت وثكلتك مامتك ... بتاع الدُش اللي غاوي نضافة ده كده ممكن ينطرد بره نطاق العائلة ..... أو يملا حله ويجيب كوز وياخد شاور في البلكونة ...

وقِس على ذلك بقى الحاجه شلبية اللي هاتعمل أكل لـ 14 حته 3 مرات في اليوم ...

وتكوي هدوم لـ 14 راس ...

انا مش صعبان عليه غير اللي هايقف في الفرن يشتري عيش اليوم بيومه لـ 14 نفر ... نقول في 4 أرغفة يومياً .. يعني 48 رغيف عيش بلدي غير الفينو .. أهو ده هاياكل ضرب !!!

الله يخزي شيطانك يا حاج سيد ... دا انتا حكايه والله

تم تعديل 4 فبراير 2009 بواسطة أحمد سيف

[MZohairy]

استعجب احيانا من ايراد بعض الأمثله الناجحه في موضوعنا هذا مثلا لأسره اثمرت ثمرات جيده بالرغم من كثرة عدد اطفالها

و نتج عنها رجال متعلمون و مراكز جيده في المجتمع

و يتناسى الأخوه الاف الأسر المصريه الفقيره المعدمه كبيرة العدد و التى تعيش عيشة غير آدميه تحت خط الفقر بكيلومترات

بالطبع للحاكم و الحكومه دور في هذه المعاناه ولا شك في ذلك

لكن الن يزيد نصيب الفرد في مثل هذه الأسر من كل شيئ اذا نقص عدد افراد الأسرة؟

و لن اتكلم هنا عن الرعايه المطلوب تقديمها من الاب و الام للأطفال سواء كانت رعايه تربويه او صحيه او تعليميه

سأتكلم فقط من الجانب المادي

الن يحظى اطفال اسرة فقيره قليلة العدد بحياة افضل من اطفال اسره فقيره كبيرة العدد بإفتراض تساوي دخل الاسرتين؟

[فــيــروز]

لدىّ سؤال للمؤيّدين لفكرة إنجاب الدسته : هل أنتم فى الطريق فعلا لاتّخاذ خطوات حقيقيه لتنفيذ هذا الاقتراح ؟!!

يا رب مايكونش سؤال شخصى تصعب الإجابه عليه لخصوصيته ..

الحمد لله أنا عندي ربع دستة لغاية دلوقتي

وربنا يدي الصحة لـ (سلهة جدا) أقصد المدام

وتكمل الدستة , وإلا هايكون لي تصرف تاني :blink:

صدقينى الاولاد عزوة ليك و لنفسهم كمان بينهم و بين بعض لان محدش ضامن عمره

شفت بقى انا اول وحده ترد عليك و بصراحه تامه ازاى

يا الله بقى ادعيلى دعوة حلوة بان ربنا يرزقنى و يرزقك و نجوز ولادنا لبعض

قولى امين

فعلا , الأولاد عزوة

بحس كده إن الأم لما يكون حواليها ولاد كثير بتشعر بأمان وانتعاش

ألاحظ هذا الشيء جدا على الأمهات اللي عندها أولاد كثير

بعكس اللي مخلفة عدد قليل .. لا تشعر بنفس السعادة

وربنا يرزقك دستة يا ستي

ويكون فيهم بنات كمان

ويا رب بناتك يتجوزوا وهم صغيرين

إن شاالله حتى وهم عمرهم عشر سنين

إيه المشكلة يعني ما هو المفتي قال حلال :sad:

نفهم من هذا أن كثيرين من المؤيّدين للفكره لم يضعوها بعد موضع التنفيذ الفعلى و لكلّ أسبابه و لها احترامها بالطبع !! لكن السؤال هو طالما كل المشاركين تقريبا يتحدّثون عن حالات لا تخصّهم بل تخصّ غيرهم و هم ليسوا معنا بالمنتدى كى يشرحوا لنا التجربه بمزاياها و عيوبها علام الحماس للفكره و المتحمّسين لم يخوضوها بعد بل قد يكون لدى كثيرون منهم نفس الأسباب التى يعلنها المتحفّظون على الفكره فى الرغبه فى تنشئة أبناء من منطق الكيف و ليس الكمّ .. و إذا كان على القرآن الكريم فقد قال الله سبحانه و تعالى فيه "كَمْ مِنْ فِئَةٍ قَلِيلَةٍ غَلَبَتْ فِئَةً كَثِيرَةً بِإِذْنِ اللَّهِ وَاللَّهُ مَعَ الصَّابِرِينَ" و إذا كان على "الصين" و قوّتها البشريه فهى حاليا لديها قوانين صارمه لتحديد النسل فهل أنت على استعداد للاقتباس منها التجربه بنتائجها أم سنقتبس التجربه دون اقتباس آثارها و نتائجها؟

الأمثله المرتبطه بالجدّه التى أنجبت دسته و غيرها أمثله لا تخصّ العصر ولا الظروف التى نعيش فيها الآن .. ليس هذا فقط بل أن زوجة فلان قد تكون مختلفه عن جدّته التى أنجبت و ربّت دسته و هو شخصيا شخص مختلف عن جدّه الذى كان مسئولا عن هذه الدسته و الأسره الأولى كلّها عاشت فى ظروف مختلفه تماما عن تلك التى تعيشها الأسره الثانيه و بمعطيات مختلفه تماما و المفروض أن يكون النموذج الأقدم ساريا فى عصر غير العصر و زمن غير الزمن و اللىّ يقول غير كده يخسأ أو يكن من الحاقدين .. ليه؟ :blink:

تم تعديل 4 فبراير 2009 بواسطة فــيــروز

[سهل جدا]

استعجب احيانا من ايراد بعض الأمثله الناجحه في موضوعنا هذا مثلا لأسره اثمرت ثمرات جيده بالرغم من كثرة عدد اطفالها

و نتج عنها رجال متعلمون و مراكز جيده في المجتمع

و يتناسى الأخوه الاف الأسر المصريه الفقيره المعدمه كبيرة العدد و التى تعيش عيشة غير آدميه تحت خط الفقر بكيلومترات

الأمثلة الناجحة في الجانبين

أعني الأسر الكبيرة فيها قصص ناجحة وأخرى فاشلة

وكذلك الأسر الصغيرة فيها قصص ناجحة وقصص فاشلة

وما أقوله وقاله بعض الأخوة الأعضاء أن النجاح والفشل ليس له علاقة بعدد أفراد الأسرة كما تقول يا حاج مزهوري :rolleyes:

نفهم من هذا أن كثيرين من المؤيّدين للفكره لم يضعوها بعد موضع التنفيذ الفعلى و لكلّ أسبابه و لها احترامها بالطبع !! لكن السؤال هو طالما كل المشاركين تقريبا يتحدّثون عن حالات لا تخصّهم بل تخصّ غيرهم و هم ليسوا معنا بالمنتدى كى يشرحوا لنا التجربه بمزاياها و عيوبها علام الحماس للفكره و المتحمّسين لم يخوضوها بعد

مش فاهم يعني هاخض التجربة ازاي وأنا لسه شاب في أوائل الثلاثينات

يعني هاخلف دستة إمتى وازاي

لكن النية موجودة , وربنا يسهل

وبعدين أنا لما طرحت الموضوع ما كنتش أقصد تجارب شخصية

أنا أتكلم بشكل عام

إن زيادة الأعداد أمر مرغوب فيه شرعا وعقلا

[MZohairy]

وما أقوله وقاله بعض الأخوة الأعضاء أن النجاح والفشل ليس له علاقة بعدد أفراد الأسرة

ابدا

زيادة العدد ليست هي كل عوامل الفشل بالتأكيد

لكن علاقتها بالفشل علاقه وطيده و طبيعيه و مفهومه و منطقيه جدا و البعض يفضل تغافلها برغم وضوحها

[سهل جدا]

معليش اسمحلي يا أخ أحمد سيف

أنا أعتبر هذا الكلام في اتهام لربوبية رب العالمين

ربنا هو اللي بيخلق وهو اللي بيكفل الرزق للعباد جميعا مؤمنهم وكافرهم

احنا علينا ناخذ بالأسباب بس

معليش يا سيدي بلاش ندخل الموضوع في اتهامات تمس العقيدة ومحاكمة للنوايا ... خلي النقاش ماشي كويس

ديننا قال ناخذ بالأسباب والتخطيط للمستقبل بصورة علمية هو أحد هذه الأسباب

انت قبل كده ناقشتني في النواحي العلمية والمنهجية وتجاوبت معك ... لكن اتهام زي ده أنا ما أقبلوش

يا أستاذ أحمد ما تزعلش

مش انت يا سيدي راجل مسلم وبتصلي وكل يوم بتقول في الصلاة: الحمد لله رب العالمين

أهو معنى (رب العالمين) ديه أيه المتكفل بيهم ويرزقهم

زي ما بنقول على الأب إن هو رب الأسرة , أي المتكفل بالأسرة

فعشان كده قولت إن كلامك فيه اتهام لربوبية رب العالمين

طيب قد يقول قائل , هناك مجاعات تحدث في العالم كثيرة , فما سببها

والجواب: أن سبب المجاعات هو الظلم والإسراف في مناطق أخرى

وأنه في الوقت الذي يموت فيه أناس جوعا, فهناك أناس يموتون من كثرة الأكل والتخمة

تحياتي لك :rolleyes:

[MZohairy]

مش انت يا سيدي راجل مسلم وبتصلي وكل يوم بتقول في الصلاة: الحمد لله رب العالمين

أهو معنى (رب العالمين) ديه أيه المتكفل بيهم ويرزقهم

زي ما بنقول على الأب إن هو رب الأسرة , أي المتكفل بالأسرة

لا يا راجل؟؟؟ :blink:

اهو كده الموضوع مفهوم :rolleyes:

احنا نخلف و رب العالمين عليه الباقي!!!!!! :blink:

رب العالمين بيرزق يا سيدي الفاضل من يعقل الأمور و ينظم حياته و يخطط لها تخطيطا سليما

مش بيرزق اي حد بيخلف و خلاص الله يكرمك

حتى الدوده اللي في بطن الجبل بيرزقها عشان بتتحرك و تدور على أكلها

حرام عليك يا سهل جدا

ارجوك كفاك تسطيحا للأمر حتى لا يأخذ القارئ غير المسلم عن الاسلام فكره سيئه و يتراجع عن التفكير في الدخول اليه بسببك

اشكرك وادعوا الله لك بالصحه و الستر

[سهل جدا]

لا يا راجل؟؟؟ :blink:

اهو كده الموضوع مفهوم :rolleyes:

احنا نخلف و رب العالمين عليه الباقي!!!!!! :shutup:

إيه ده يا زوهيري بيه , انت مش مصدق ولا إيه

طب خد عندك :

يقول رب العالمين: {قُلْ مَنْ يَرْزُقُكُمْ مِنَ السَّمَاوَاتِ وَالْأَرْضِ قُلِ اللَّهُ}

ويقول رب العالمين: {قُلْ مَنْ يَرْزُقُكُمْ مِنَ السَّمَاءِ وَالْأَرْضِ أَمَّنْ يَمْلِكُ السَّمْعَ وَالْأَبْصَارَ وَمَنْ يُخْرِجُ الْحَيَّ مِنَ الْمَيِّتِ وَيُخْرِجُ الْمَيِّتَ مِنَ الْحَيِّ وَمَنْ يُدَبِّرُ الْأَمْرَ فَسَيَقُولُونَ اللَّهُ فَقُلْ أَفَلَا تَتَّقُونَ}

رب العالمين بيرزق يا سيدي الفاضل من يعقل الأمور و ينظم حياته و يخطط لها تخطيطا سليما

حتى العبيط والأهبل ربنا بيرزقه برضه ..

لكن الذي لا يأخذ بالأسباب يعتبر مقصر وسيحاسب على تقصيره

لكن على فكرة كلامي اللي انت علقت عليه كان موجه للأخ أحمد سيف

وكان الكلام في قضية تانية خالص

هو كان بيقول إن الأرض وما فيها من رزق مش هاتكفي الناس لو كل واحد خلف دستة لأن العدد سيتضاعف وتضيق الأرض بهم

وهنا كان اعتراضي الشديد

لأن ربنا لو قدّر إنه يخلق (مثلا 100 مليار إنسان) هايعرف يرزقهم , لأنه هو رب العالمين

اشكرك وادعوا الله لك بالصحه و الستر

لو بتحبني صحيح إدعيلي ربنا يرزقني دستة عيال، أو دستة ونص وتعالى بص :blink:

تم تعديل 4 فبراير 2009 بواسطة سهل جدا

[أحمد سيف]

يا أستاذ أحمد ما تزعلش

مش انت يا سيدي راجل مسلم وبتصلي وكل يوم بتقول في الصلاة: الحمد لله رب العالمين

أهو معنى (رب العالمين) ديه أيه المتكفل بيهم ويرزقهم

زي ما بنقول على الأب إن هو رب الأسرة , أي المتكفل بالأسرة

فعشان كده قولت إن كلامك فيه اتهام لربوبية رب العالمين

طيب قد يقول قائل , هناك مجاعات تحدث في العالم كثيرة , فما سببها

والجواب: أن سبب المجاعات هو الظلم والإسراف في مناطق أخرى

وأنه في الوقت الذي يموت فيه أناس جوعا, فهناك أناس يموتون من كثرة الأكل والتخمة

تحياتي لك

يا أستاذي الفاضل ... الله عزّ وجلّ قادر على كل شئ ... ولا أحد يجادل في ذلك

ولكن الله تعالى قد قضت حكمته بأن يضع لهذا الكون سنن ونواميس يسير عليها ... وهذا من مظاهر قدرة الله أنه خلق هذا الكون كآلة غاية في الروعة والإتقان والدقة

ونحن هنا نحاول أن نخطط لمستقبلنا وفقا للقواعد التي قدرها الخالق عزّ وجلّ لنا في هذه الدنيا ... وليس في ذلك أي نوع من الإنكار لقدرته بل هو اعتراف بها

كون أننا ما زلنا لا نفهم بعض الظواهر الطبيعية بشكل كامل مثل الأعاصير والزلازل والأمطار والفيضانات فذلك لا يعني أنها تحدث دون آلية تحدد توقيتاتها ونظام سنّه الخالق العظيم لها ... والتفسيرات "الغائية" التي تقدمها حضرتك لموضوع المجاعة لا تفسر أبدا لماذا يعاقب الله عز وجل -ومن أسماءه "العدل" - بعض عباده بجريرة البعض الآخر

لا أريد أن أستطرد في هذا الجزئية الفرعية أكثر من ذلك حتى لا يضيع جوهر الموضوع

تحياتي لك

[tarek hassan]

أما التربية فإني رأيت رجلا غنيا ومعه ولد واحد أنفق حياته كلها وماله له وفي النهاية لم يفلح في جعله مواطنا صالحا

انا زعلان منك يا طارق والله

زعلان لأني عارف انك متأكد ان كلامك ده مش قاعده قابله للتعميم و أمامه اضعافه من الحالات التي تثبت العكس و مع ذلك اوردت مثالك للاستدلال على صحة كلامك

ده كلام برضه يا طارق؟

تحياتي

أستاذ : زهيري

بارك الله فيك

وفي أولادك

وجعلهم قرة عين لك

القاعدة العامة هي عكس ما ذكرت له مثالي

وكلامي هو الحالة الخاصة معاك

أنا لا أجزم أنني على صواب

وأنا قصدت بكلامي عدم التعميم اللي أنا موافقك عليه

بس اللي يخلف دستة ليس آثما ولا هو لا سمح الله متخلف رجعي

واللي يكتفي بولد واحد ليس آثما

كل واحد عارف شمس داره بتطلع منين

وأرى أن القلة أو الكثرة غير مرتبطة بصلاح الأولاد من عدمه ولكني احتاج للنظر للواقع نفسه

وأرى أن الولد الواحد ربما يكون بارا أو لا يكون بارا بي في حالة الكبر

وكثرة الأولاد ربما يرجي بها أن يوجد من بينهم من هو أقرب نفعا لي حينما يتقدم بي السن

ومعلوم أننا آباء لأولادنا الآن من حيث الرعاية والقيام عليهم ولكن بكره هيكونوا هم بمثابة آباءنا من حيث قيامهم برعايتنا لما نكبر

وأرى أن القلة والكثرة غير مرتبطة بالتفوق ونحتاج للنظر في الواقع لنستشهد

وأرى أن الرزق لا يقل مع كثرة العدد

فالله الذي يرزق الصين وهي حوالي مليار ونصف نسمة والهند وهي أكثر من مليار بسمة

قادر على أن يرزق مصر اللي لم تبلغ مائة مليون نسمة

ومتزعلش يا أستاذ زهيري احنا بنتعلم منك

تم تعديل 4 فبراير 2009 بواسطة tarek hassan

[abaomar]

الغريب اننا لا نجد اطلاقا اى حملات تنظيم النسل فى امريكا مثلا او اى دوله اوروبيه

و الكلام كله فى الدول ذات التعداد العالى من المسلمين كمصر و الموضوع قديم من ايام ..انظر حولك ..الاختيار لك

حسنين و محمدين ..اسره صغيره تساوى حياه افضل ....و كل هذا الهراء

امريكا و أي دولة أوروبية أو استرالية أو يابانية... وصل بيهم اهتمامهم الزايد عن الحد بتوفير أفضل حياة ممكنة لولادهم ان عددهم بدأ في الانخفاض التدريجي... ليه يطالبوا الناس بتنظيم النسل اذا كان الناس منظمة و زيادة لوحدهم... زي بالظبط اللي خلي ما عندهمش حملات لمحو الأمية... عشان مافيش أمية!!

الكلام كله في الدول ذات التعداد العالي من المسلمين... عشان هي دي الدول اللي معدل الوفيات العالي انخفض بفضل الطب و التكنولجيا... انما معدل الولادة لم ينخفض بعد بما يكفي كي يشعر الناس بتحسن تدريجي في مستوي المعيشة... نفس السيناريو كان هيحصل في أفريقيا... لولا الايدز اللي خارب الدنيا هناك...

ربنا عرفوه بالعقل... لو الزيادة السكانية دي ما تمش وقفها بالعقل و الحكمة... هتقف بالأمراض و الأوبئة...

يا اما امكانياتنا تنمو مع نمو التعداد... يا اما التعداد هيقف بطريقة مؤلمة لضعف الامكانيات...

الزميل رار

الانخفاض التدريجى فى الاعداد هناك كارثه بالنسبه لهم و المانيا كما قرأت بصدد تجنيس بعض الاجانب لمعادله ذلك النقص.

انخفاض الانجاب هناك نتيجه طبيعيه لحاله الانفلات الاجتماعى النابعه من فساد العقيده

و التى ادت الى شيوع العلاقات المحرمه و التى اوجدت حاله زهد فى الزواج و الارتباط الشرعى

مما قلل معدلات الانجاب العامه و تجد الان بعض البلدان معدل الزياده السكانيه صفر اى يتساوى معدل الانجاب

و الوفيات و الحاصل ان مع الوقت يقل تعداد السكان ...

يا رار اكرر مصر بلد غنى بالامكانيات و سوء التوزيع و الاداره هو الذى ذلك الخلل الرهيب و تلك الفجوه

المزعجه بين افراد ذلك الشعب....

يكفى اننا كما قال الاخوه نحيا على 4 % من مساحه مصر التى يخترقها النيل من اقصى الجنوب الى الشمال

و بها شبه جزيره سيناء المليئه بالخيرات الطبيعيه بل لقد قرأت ان زراعه المنطقه الحدوديه مع السودان كفيل بحل

مشكله مصر الغذائيه تماما و تحويل مصر لبلد منتج .

لديك قوى عامله متوفره و رخيصه و لديك المياه و الجو الرائع ..فماذا ينقصك و لديك ايضا بترول و غاز و تطل على بحرين كبيرين

بسواحل تتعدى الثلاث الاف كيلو و قناه السويس و الكثيييير يا رار

ثم تقول لى ضعف امكانيات...

بالمناسبه هل الكنيسه المصريه تدعم تحديد النسل ام تشجع على زيادته و تدعم تلك الاسر ؟ قليل من العدل .......

[abaomar]

السلام عليكم

الاخوه الكرام جزاكم الله خيرا

الى الحريصين على مسأله الرزق

.

( (ُقلْ أَئِنَّكُمْ لَتَكْفُرُونَ بِالَّذِي خَلَقَ الْأَرْضَ فِي يَوْمَيْنِ وَتَجْعَلُونَ لَهُ أَندَادًا ذَلِكَ رَبُّ الْعَالَمِينَ {9} وَجَعَلَ فِيهَا رَوَاسِيَ مِن فَوْقِهَا وَبَارَكَ فِيهَا وَقَدَّرَ فِيهَا أَقْوَاتَهَا فِي أَرْبَعَةِ أَيَّامٍ سَوَاء لِّلسَّائِلِينَ)10 فصلت.

.

( أَفَرَأَيْتُمْ مَا تَحْرُثُونَ (63) أَأَنْتُمْ تَزْرَعُونَهُ أَمْ نَحْنُ الزَّارِعُونَ (64) الرحمن

.

(أَفَرَأَيْتُمْ الْمَاءَ الَّذِي تَشْرَبُونَ (68) أَأَنْتُمْ أَنزَلْتُمُوهُ مِنْ الْمُزْنِ أَمْ نَحْنُ الْمُنزِلُونَ (69) الرحمن

.

(وَلا تَقْتُلُوا أَوْلادَكُمْ خَشْيَةَ إِمْلاقٍ نَحْنُ نَرْزُقُهُمْ وَإِيَّاكُمْ إِنَّ قَتْلَهُمْ كَانَ خِطْئاً كَبِيراً )31 الاسراء

.

و الكثير يا اخوتى ثقوا تماما فى قدره و رزق الله و تفرغوا لعبادته و لا يشغلكم موضوع الرزق فانه مقدر قبل الخلق

و لا يمنعنا هذا من السعى فى الارض و طلب الاسباب مع الاعتقاد ان كل شئ بقدر .

و الله الذى رزق هؤلاء فى جوف الشجره لن يعجزه رزق مئات المليارات على سطح الارض و لله الحمد.

.

و ادعوا لى ان يرزقنى الله بدستتين او اكثر عسى الله ان يهبنى من يكون سببا لدخول الجنه بصالح دعائه ...أمين

[لولا]

طيب بما اننا تجاوزنا تماما نقاش كراتين ( جمع دسته :blink: )العيال اللى بيخلفوها الناس الفقيره جدا والمشاكل التى بيعانوها وانعكاسها على المجتمع ، والقضيه اصبحت الناس الأغنيه حاليا وتحبيب فتح باب الإنجاب على مصراعيه فربنا يسهل يا جماعه ... الموضوع كده بقى ............... سهل جدا :rolleyes:

تحياتى

لولا

[tarek hassan]

الغريب اننا لا نجد اطلاقا اى حملات تنظيم النسل فى امريكا مثلا او اى دوله اوروبيه

و الكلام كله فى الدول ذات التعداد العالى من المسلمين كمصر و الموضوع قديم من ايام ..انظر حولك ..الاختيار لك

حسنين و محمدين ..اسره صغيره تساوى حياه افضل ....و كل هذا الهراء

هناك شعار يضاف لما سبق وهو

اسأل استشير

شعار به خطأ صرفي لم يصححه أحد من سنوات عديدة

وصحيحه لفظا

اسأل استشر

(الجواب باين من عنوانه)

[لولا]

مش عارفه ليه افتكرت الفيلم بتاع عبد المنعم مدبولى وكريمه مختار ... هو كان اسمه ايه يالولا .. اسمه ايه .. اسمه ايه ........ أيوه " ام العروسه "

الشهاده لله الراجل مكنش مقصر فى حاجه .. لو كان يطول يقطع من نفسه ويجيب لعياله كان عمل .. ربنا يديه الصحه .. اكمنى مش متأكده

صحته بالطريقه اللى كان عايشها كانت حتساعده لغايه العيال الصغيره ما تكبر كمان و تعتمد على نفسها ولا كان حيفيص فى السكه :rolleyes:

طب هو لو فيص فى السكة ..كريمه مختار كانت حتشتغل عشان تصرف على العيال ولا اكبر واحد من الصبيان كان حيسيب التعليم ويكمل تربيه معاها ؟؟

طب هو مين اللى حيجوز كل دول ؟؟ الراجل بدأ يهلوس من جوازتين يادوب للبنات ..... اُمال لما يكمل طابور العيال دا حيكون حصله ايه ؟؟

يا جماعه انا مشفتش الفيلم لآخره .. اللى شافه يكملهولى لو سمحتوا ... عايزة اعرف البنت الصغيره ام لسان ونص اللى كان اسمها دينا عبدالله

فى الفيلم .. باباها لحق يجوزها ولا كان خلاويص ودع بعد جوازة بنته رقم خمسه وسبوع بنته رقم اربعه وخطوبه ابنه رقم اتنين وكتب كتاب السادس :blink:

لولا

تم تعديل 4 فبراير 2009 بواسطة لولا

[أبو محمد]

يعني لو أنا فيت قوي وراجل مقتدر وعندي شقة كبيييييييييييييرة وفيها غرفتين نوم أطفال ... وأساساً أساساً صحتي مسعداني ... وروحت متوكل على الله وجايب الدستة ... يبقى هافرق بينهم في المضاجع إزاي ؟

إيه هارص كل 6 حتت في أوضة فوق بعض ؟

ولا هاعمل السراير بالطول ؟

هو انت طول عمرك كده يا سين سين .. مهولاتى :rolleyes:

يا ريس ماهو انت حتجوز البنات وهم عندهم ست سنين .. يعنى مش حتحتاج تعمل لهم مضاجع فى بيتك .. المضاجع حتبقى فى بيت الزوجية :blink:

[abaomar]

السلام عليكم

الاخت الكريمه لولا

و هو الراجل اللى بيجوز

.بيه و من غيره ..رقم خمسه هاتتجوز و سبوع بنته رقم اربعه هايتعمل و خطوبه ابنه الثانى هاتتم و كتاب السادس هايتكتب

بإذن الله ...كل ما سبق رزق قدره الرازق ..

صعب جدا يا لولا الحكم على الواقع من تلك النماذج الهزليه التى تجيئ فى سياق حمله تحديد النسل التى تكلمنا عنها

و سبحان الله كلما زادت ضراوه الحمله زاد النسل ..........و الله خير الماكرين

[لولا]

السلام عليكم

الاخت الكريمه لولا

و هو الراجل اللى بيجوز

.بيه و من غيره ..رقم خمسه هاتتجوز و سبوع بنته رقم اربعه هايتعمل و خطوبه ابنه الثانى هاتتم و كتاب السادس هايتكتب

بإذن الله ...كل ما سبق رزق قدره الرازق ..

صعب جدا يا لولا الحكم على الواقع من تلك النماذج الهزليه التى تجيئ فى سياق حمله تحديد النسل التى تكلمنا عنها

و سبحان الله كلما زادت ضراوه الحمله زاد النسل ..........و الله خير الماكرين

صدقى يا ابو عمر ليس الخلاف هنا على الرزق ذاته .. الله سبحانه وتعالى خلق عباده و يرزقهم ولا نقاش فى ذلك ابدا ما يكفل لهم العيش .. لقمة العيش

وليس مصاريف العلاج والأدويه الحفلات والسبوع والشقق والتجهيزات لأثنا عشر طفلا والأب موظف محدود الراتب !!.

ولكنك تتحدث بمنطق لا افهه من زوايه ترك التفكير والتخطيط والتواكل على الله إن كان الأب فى الفيلم قد زوج اثنتان واقام سبوع ثالثه وعقد قران خامس

فاقول لك ان ذلك قد حدث ليس لأن الله يرزقه .. ولكن لأنه كان فيلم !! ساخر كما قلت !! بعيد عن واقعنا الحالى .. حاليا لا الدنيا رخيصه ولا الشقق ايجار قديم..ولا المواصلات مثل الماضى .. ولا الأسعار مثل الماضى .. ولا احتياجات الأطفال مثل الماضى .. ولا التعليم الحكومى المجانى الممتاز مثل الماضى .. ولا شيئ مثل الماضى .

موظف راتبه بسيط جدا وينجب كل هؤلاء هل ستتوفر له فرصه ان يقوم بتجهيزهم من أساسه من مجرد راتب وبدلات ؟؟

نعم انا لا انظر للفيلم يا ابو عمر ... تعرف لماذا .؟؟؟ لأنه هزلى ..كوميدى ..ضاحك !!

والحياة ليست كذلك يا ابو عمر .. الحياة ليست كذلك .. واظنك تعرف الحياة. تعرف مرارتها وقسوتها وما صارت عليه .

تعرف كم شابا فى مصر تخطى الثلاثين والخامسه والثلاثين ولم يتزوج .. كم شاب لا تظهر له بارقه امل بإمتلاك شقه او القدره على دفع ايجار جديد

او تجهيز اقل القليل أمام رواتب بسيطه وغلاء فاحش وعدم وجود اب يسند الإبن ويساعده ماديا .

هؤلاء يسعون فى الأرض ,, يعملون بأقصى طاقه .. ويرزقهم الله كفاف يومهم .. ولا نقول له اذهب وتزوج بدون شقه وبدون عفش وسوف يرزقك الله لأنك أطعته

وحصنت نفسك وتزوجت ، لا نقول له انجب وانجب فبذلك امرنا الله وسوف يرزقك الله لتدخلهم المدارس والجامعات وتشترى لهم كسوة الصيف والشتاء ومسلتزمات المدارس ومصاريف المرض والعلاج ومبلغ للطواريء ..حادث عمليه جراحيه .. مصيبه !!.

لا اعرف لماذا اشعر من الحديث الدائر هنا وكأننى من كوكب آخر وأتحدث عن أشياء غير موجوده فى مصر وكل شيئ تمام و100% واننى وغيرى نختلق العقبات

ونتخيل المشاكل التى تنشأ من الإندفاع الأهوج فى انجاب عدد لا محدود مع عدم وجود امكانيه جيده لتوفير احتياجاتهم وننكر رزق الله لقلة الإيمان !!.

لا أعرف لماذا لسنا كلنا فى مصر الآن ونتداول الحديث ونعيش الحياة بظروفها وننجب الإثنا عشر هناك والرزق على الله !!

أظننى ارتدى النظارة السوداء ..

فضلا ليعطنى احدهم نظارته الورديه لأرى الواقع من خلالها قليلا وانسى كل الحقائق من حولى !!.

لو طالما هذا هو منطق الأشياء .. فلماذا لم يرزق الله كل هؤلاء الشباب ليتزوجوا ؟؟؟ ولماذا لم يرزق كل هؤلاء المشردين فى الشوارع ؟؟

ولماذا ولماذا ... والف لماذا .... اى رزق تقصدون بالضبط ؟؟ الأكل والشرب للبقاء على قيد الحياة ؟؟ لأن هذا هو الرزق العام الذى اعرفه

ويرزقه الله لعباده ولا نختلف عليه .. ما سواه يحتاج لعمل وتفكير وتخطيط وتقييم للحياة والظروف المحيطه والإمكانيات التى يشترط توفرها قبل انجاب

الدسته والكرتون فى ظروف هذا الزمان .

فقط لكن واضحين جدا ..

كل من تحدث هنا هو مغترب .. اجزم ان مستواه حتما لنقل ميسور .. لا ضرر ربما فى ان ينجب عدد اكبر مما قد ينجبه لوكان يعيش فى مصر بإمكانيات مصر

.. بحبوحه العيش هنا اذا تواقفت مع مقدرته العاطيفه والفكريه للتربيه فهنيئا له وللوطن بما سوف ينجب .

تلك خيارات شخصيه .. لا احد سوف يمنعه .. ما قد ارى انا انه اساسيات اسعى لتوفيرها لأولادى قد يراه الغير ليس ذا اهميه بالتالى سيرتفع سقف عدد الأبناء

الذى سيرغب فى انجابه نظرا لما سوف يوفره لهم . كل حسب مايرى ومقدرته وحريته الشخصيه التى يتحمل نتائجها كراع مسؤول عن رعيته

عدم توفر ظروف مناسبه لإنجاب عدد كبير تقتضى ان نكون من الصراحه مع انفسنا ان نعترف اننا ننجب اولاد نحملهم هموم ومتاعب ونحرمهم من حقوق

كثيره لهم فى الحياه .. احساس الأمومه والأبوه لمن امكانياته ضعيفه تكفيه طفلان لإشباع الغريزة الأساسيه للأمومه والأبوه ..لا داعى للدسته لمجرد ان يخسأ الحاقدون!!

وعليه .. قد ترى الفيلم ساخر يا ابو عمر .. لك الحق ..كان الفيلم قبل ثلاثين عاما ربما يتحدث عن مأساة عائله مصريه يعانى رب اسرتها بشيئ

من السخريه .. ولكن السخريه هى وجه آخر للمراره..

حاليا بعد الثلاثين عاما .. ارى الواقع أشد مراره ..

أراه علقم يا ابو عمر .. علقم مر حتى النخاع !!.

انا من جمهوريه مصر العربيه .. عنها اتحدث .. عن واقعها اتحدث .. عن اى شيء انتم تتحدوثون ؟؟

عن واقع اهل مصر فى مصر .. ام واقع اهل مصر خارج مصر ( مغتربين ) .

عن المستوى المتوسط فما فوق .. ام عن الفقراء .. ام ان المسأله للتعميم للكل ؟؟!!!

على فكرة ..

عندى سؤال .. نفس هذا الموضوع لو كان يتم تدواله حاليا فى منتدى مصرى قاعدته الأساسيه ليست من المغتربين الميسورين الحال

ولكن من اهل مصر ممن يعيشون فيها 100%، هل كان النقاش

سينحى ذات المنحى كما هو هنا وكانت سترفع رايات الدسته والكرتون ؟؟

انتوا بتتفرجوا على تسعين دقيقه والعاشره مساء ؟؟

الناس اللى بتطلع كل يوم فى البرامج دى وحالتها ضنك من الشعب المصرى ولا دول من دول تانيه ؟؟

الفقر اللى فى البلد دا اشاعه ولا تهيؤات ؟؟

هو احنا هنا بنشجع مين بالضبط يخلف دسته ؟؟ معلش بعيد السؤال .. ممكن توضيح اكتر .. اصل دماغى قفلت على الفجر كده .

وبعدين انا كنت قريت موضوع مواقع الزواج !!

وتشجيع التعدد !!

كان من ضمن الأسباب ان الزوجه بتتغير بعد الجواز وبتبقى تخينه ومش بتعجب .. دا من اربعه .. امال بعد كماله العدد دسته ؟؟!!

.. واهلا بالتعدد .. ربنا بيرزق .. فى السماء رزقكم وما توعدون !!

أهلا بفتح الأبواب .. دسته .. تعدد .. نسهل البنات من عشر سنين ونجوزها ... وكله من الإسلام !!

اخ ... كنت حمشي من غير ما اقول ... وليخسأ الحـــــــــــــــــــــــــــــــــــــــــــــــــــــــاقدون :rolleyes:

تحياتى

لولا

تم تعديل 5 فبراير 2009 بواسطة لولا

[aimen]

الله ينور عليكى يا مدام لولا

قلتى اللى كان نفسى اقوله ومش عارف اعبر عنه

بس عندى نقطة واحدة اضيفها

كام واحد من اللى اتكلموا وقالوا عاوزين دستة ان شاء الله - عندهم اطفال فوق الثلاث ؟؟؟

وفعلا يبدوا ان هناك بشر - اللى هو احنا - عايشين فى عالم تانى غير العالم اللى الناس عايشه فيه

[سهل جدا]

الأخ الحبيب طارق حسن

قرأت تعليقاتك كلها في هذا الموضوع وأتفق معك فيها سوى هذه الجزئية ..

واللي يكتفي بولد واحد ليس آثما

كل واحد عارف شمس داره بتطلع منين

لا , اللي يكتفي بولد واحد أو ولدين مثلا من أجل الخوف من الفقر فهذا يكون آثما

كما أفتى بذلك كثير من العلماء

أما لو اكتفى بعدد قليل لظروف خاصة , أو لأسباب أخرى (غير الخوف من الرزق) فهذا له حكم آخر

تيحاتي لك

بالمناسبه هل الكنيسه المصريه تدعم تحديد النسل ام تشجع على زيادته و تدعم تلك الاسر ؟ قليل من العدل .......

السؤال ده مية مية , أتمنى أجد جواب عنه :blush2:

وهو يؤكد لي حقيقة معينة؛ لعل بعض الأخوة هنا أفصحوا عنها