اذهب الي المحتوي
MZohairy

هل شباب الستينات عاشوا حياه افضل ? سؤال لأبو محمد العزيز

Recommended Posts

ماشى يا مايسترو .. بس خليك جنبى الله يخليك :ninja: ..

زى اليومين دول من حوالى 45 سنة أنا كنت طالب صغير فى الجامعة .. كلى حماس .. وكان ممنوع علينا أنا واخواتى الشباب (كلهم كانوا أكبر منى) الخروج يوم الجمعة قبل الساعة 5 مساءً .. لأن الغدا كان لازم الجميع يحضره .. ويجلس جميع الأخوة والأخوات .. العزاب .. والمتزوجون والمتزوجات بأولادهم والوالد والوالدة .. رحمة الله على من غادر دنيانا

فيه يوم من أيام الجمعة لا يمكن أنساه .. واحنا قاعدين على الغدا جت سيرة قوانين الإسكان .. والدى عليه رحمة الله كان متضايق جدا من القوانين دى .. هو كان عنده عمارة فى موقع ممتاز فى محرم بك نزل عليها التخفيض مرتين .. وأصبحت الشقة 5 غرف وصالة إيجارها 2 جنيه ونص شهريا (إلى الآن على فكرة) .. أنا اتسحبت من لسانى وقلت له .. طب دى حاجة ما تزعلش .. هو ده العدل .. نظر لى عبر طاولة الطعام وسألنى : عدل ازاى يابو عقل ؟ .. قلت له هو فيه كام مالك وكام مستأجر .. صحيح المُلاَّك قل إيرادهم بس دول أقلية أما الأغلبية فزاد إيرادهم .. وبعدين المُلاَّك عندهم فلوس بنوا بيها العمارات .. أما المستأجرين فدول ما حيلتهمش فلوس يبنوا بيها مساكن لنفسهم .. قال لى طيب إنت عارف إنك لو اتجوزت واحتجت لشقة فى العمارة بتاعة ابوك مش ممكن ننهى أى عقد مع أى مستأجر عشان نفضيلك شقة ؟ ... يعنى المستأجرين اللى فى العمارة أصبحوا تقريبا هم ملاَّك العمارة الحقيقيين .. قلت له ماهو ده يبقى عين العقل .. بدل ما أقلية هى اللى تبقى ملاَّك ، الأغلبية يشاركوهم .. هو ده التعاون على البر ... قال لى الظاهر ان انا غلطت لما قلتلك يابو عقل .. الظاهر ان جمال عبد الناصر لحس عقلك .. وبقيت ماشى وقاعد معانا من غير .. وهنا خرجت منى الكلمة التى ما ندمت على كلمة قلتها مثلما ندمت على تلك الكلمة .. قلت له ، ده شئ متوقع من الرجعيين اللى تهمهم مصلحتهم أكتر من مصلحة البلد .... ساد الصمت لثوانى خلتها سنوات .. قطعه والدى بصوت خفيض ولكنه حزين .. "قوم روح كل لوحدك فى المطبخ وما تاكلش معايا تانى" ... لم أذهب إلى المطبخ بل ذهبت إلى الحجرة التى كنت اتقاسمها مع أخى الأكبر منى مباشرة .. وبعد لحظات لحقنى أخى هذا ومعه أكبر إخواتى يرحمه الله .. وجدانى أبكى .. وكان بكائى سببا فى تحول نظرات الغضب فى عيونهم إلى نظرات حنونة وراحا يربتان على كتفى ويسألاننى : بتعيط ليه ؟ .. إنت مش عارف انت قلت إيه يا فالح ؟ .. أجبت : "عارف وهو ده اللى مزعلنى .. بابا كان باين عليه زعلان منى قوى .. وكمان اتحرمت من قعدتى معاكم على السفرة !!! " ... فابتسم أخى الأكبر وخرج لدقائق ليدخل غرفتى مرة أخرى ويأخذنى تحت إبطه إلى الخارج قائلا : :إتأسف لبابا .. هو قال حيقبل أسفك .. يالله روح" ... خرجت مطأطئ الرأس ، تأسفت .. فأجلسنى الوالد عليه رحمة الله إلى جواره وقال لى مازحا : " بقى انا باقول عليك ابو عقل ، تطلع ابو جلمبو ؟ biggrin.gif يا بنى أنا زعلى مش على نفسى .. أنا ساكن فى ملكى واربعة وعشرين قيراط .. أنا قلقان عليك انت واخوك واختك اللى لسه ما تجوزتوش .. بالشكل ده مش حتلاقوا شقق تسكنوا فيها .. ولو انتم لقيتم ولادكم مش حيلاقوا" .. قلت : "إزاى بقى والمساكن أصبحت رخيصة وكل واحد يقدر يسكن ؟" .. أجاب : "الكلام ده يمكن يكون صحيح اليومين دول والكام سنة اللى فاتوا .. بس بعد كده أى واحد موفر له قرشين مش ممكن حيبنى عمارة ويسكنها إلا إذا كان عبيط أو مجنون"

تحققت نبوءة والدى .. فبعد حوالى عشر سنوات كنت أبحث عن شقة عندما خطبت الحاجة ام محمد .. ووجدتنى عاجزا أمام أرقام خلو الرجل الفلكية .. فقد كانت الخلوات تتراوح بين 400 جنيه ، و800 جنيه !!!!!!!!!!!!!!! وكان الإيجار الشهرى يتراوح بين 15 جنيه و30 جنيه !!!!!!!!!!!!!!!!

شايفك يللى بتبتسم .. smile.gif ما تبتسمش أرجوك ..

كان مرتب الخريج الجديد 20 جنيه بيصفوا على 17.5 .. وكان المهندسين أسعد حظا .. فقد كانت النقابة تدفع لنا بدلا شهريا قيمته 9 جنيه .. بعد الخصومات كان صافى المرتب حوالى 25 جنيه ... وكنا بنتعين على الدرجة السابعة .. ودى هى والدرجة السادسة وأعتقد الخامسة كمان كانت علاوتهم السنوية جنيه ونص بحالهم .. يصفوا على جنيه وربع تقريبا بعد الخصومات ... نحوش بقى مهر وشبكة وخلو رجل فى قد إيه ؟؟؟ !!!!!!!

كان مهر بنت الناس الطيبين خريجة الجامعة 200 جنيه (فى المتوسط يعنى) ... والشبكة كانت فى نفس الحدود .. والعريس برضه عليه التلاجة والبوتاجاز والتليفزيون والنجف والمطبخ ولو العروسة غاليه عليه يبقى لازم يجيب لها غسالة بالكهربا ده غير الراديو ، وكماااااااااااااان مُلة السرير .. ما تضحكوش ... مُلة السرير دى كانت بعشرة جنيه

عارفين بقى عن أى جنيه أتحدث ؟ ..

أنا فاكر شبكة ام محمد .. كان جرام الدهب عيار 21 أيامها مقرب من الجنيه ... يالله حنقول جنيه مصحح ... دلوقت الجرام ده بكام يا مؤمن انت وهو ؟ ... 125 جنيه ... صح ؟ ....

إحسبوا بقى المطلوب من العريس أيامها كان كام بفلوس اليومين دول

مهر 200 × 125 = 25000

شبكة 200 × 125 = 25000

خلو 400 × 125 = 50000

المُلاَّ اللى ضحكتوا عليها كان سعرها 1250 جنيه

أكمِّل ولآَّ تكملوا انتم ؟

مرتب الخريج كان 17.5 × 125 يعنى نقول تقريبا 2200 جنيه

يدفع منهم أقل إيجار (ما كانش فيه تمليك) 15 × 125 = 1875 جنيه

يتفضل لسعادته 325 جنيه

على فكرة .. علبة السجاير 20 سيجارة كليوباترة كان سعرها 11 قرش .. يعنى لو سعادة الخريج كان بيشرب علبة فى اليوم يبقى كده كان بيشتغل بسجايره ..... من غير شاى ولا قهوة

آآآآآآآآآآآه ... ياقلبى يا كتاكت .. ياما انت مليان وساكت

أكمِّل يا مايسترو ولاَّ كفاية كده ؟

الحوار الدائر هذه الأيام عن تخفيض الدعم ذكرنى بهذا الموضوع

أدهشتنى المقارنة بين موقفى من قوانين الاسكان وموقفى من قرار تخفيض الدعم

ظاهريا هناك تناقض واضح

زمان أنا مع التخفيض .. والآن أنا مع الزيادة

هل حقا هناك تناقض ؟

هل تغير تفكيرى وأنا فى السبعين عن تفكيرى وأنا العشرين ؟

شارك هذه المشاركه


رابط المشاركه
شارك

ظاهريا هناك تناقض واضح

زمان أنا مع التخفيض .. والآن أنا مع الزيادة

هل حقا هناك تناقض ؟

هل تغير تفكيرى وأنا فى السبعين عن تفكيرى وأنا العشرين ؟

بالتأكيد خبرات الأيام تغير القناعات القديمة إذا كانت مبنية على نمط يخالف قوانين الخلق

تخفيض الايجارات وتثبيتها وفتح أجلها بحيث لاينتهي إلا بقرار من لايملك كانت كلها قرارات مخالفة لكل المقاييس والأعراف لانها صادرة ممن لايملك ومدفوعة عنوة ممن يملك، ولذلك كانت نتائجها كارثية ولازلنا نعاني منها حتى الآن وستستمر الى ان يشاء الله لها ان تتوقف.

تطور الاحداث التي تبعت تخفيض الايجارات، يستلزم منا ان نربطه بقرار "الدعم" الذي كان في حدود المليون ونصف ليتطور ويصل لاكثر من ربع ميزانية الدولة.

بالتأكيد تفكيرك في سن العشرين كانت قناعاته الفكر الاشتراكي الناصري ،

أما الآن فلك فكرك المستقل الذي بنيته على قراءاتك وخبراتك وملاحظاتك لما يجري على مدار سنوات العمر.

شارك هذه المشاركه


رابط المشاركه
شارك

الأمل فى ربنا أن يكون المستقبل أحسن.... لكن برغم كل الصعوبات أقسم بالله كانت الستينات و أوائل السبعينات أيام ذهبيه... كانت الناس راقيه المشاعر و السلوك... و الدنيا هادئه و الدين لله... عسى أن يكون غدا أحسن من اليوم

شارك هذه المشاركه


رابط المشاركه
شارك

الحوار الدائر هذه

الأيام عن تخفيض الدعم ذكرنى بهذا الموضوع

أدهشتنى المقارنة بين موقفى من قوانين الاسكان وموقفى من قرار تخفيض الدعم

ظاهريا هناك تناقض واضح

زمان أنا مع التخفيض .. والآن أنا مع الزيادة

هل حقا هناك تناقض ؟

هل تغير تفكيرى وأنا فى السبعين عن تفكيرى وأنا العشرين ؟

لا تناقض في التفكير

و أذكر رأي والد حضرتك رحمة الله عليه

الذي تنبأ بما حدث لاحقا من احجام الناس عن البناء بهدف التأجير...و قد كان

التفكير العقلاني الناضج لا يتناقض

حضرتك فقط كنت في العشرين

و كان ينقصك النضوج

الذي يخلصنا تدريجيا مع ازدياد الوعي و الخبرات من الحماس الزائد المصحوب بالتهور و رؤية الأمور من جانب واحد سطحي و ظاهري

هذا كل ما في الأمر

:)

شارك هذه المشاركه


رابط المشاركه
شارك

Join the conversation

You are posting as a guest. If you have an account, sign in now to post with your account.
Note: Your post will require moderator approval before it will be visible.

زوار
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


  • محاورات مشابهه

    • شعب مصر العزيز .. للأمام انظر .. ولا تنشغل بغير الطريق

      يقول جمال حمدان فى "قناة السويس نبض مصر"     ويقول فى موسوعة "شخصية مصر" الصادرة في 1981:     وها هى مصر فى أغسطس 2015 تضع أقدامها ثابتة على الطريق لتبنى فوق ما تم بناؤه وتطور ما هو موجود وتستكمله  وليتوقف شعبها عن النظر إلى تلك القناة "العنق" على أنها مجرد ممر ملاحى ولينظر إلى الإمام ولتسر قافلته ولنبدأ فى القراءة والمشاهدة والتعلم عن ما يسمى "مشروع تنمية محور قناة السويس" ولننس ما قيل وما يقال .. ولننظر فقط إلى الإمام    للإمام أنظر   فالقافلة تسير .. والكلاب تعوى .. وستظل

      في مسائل إقتصادية - economic issues

    • الملك محمد السادس: " شعبي العزيز لا تسمح لأحد أن يعطيك دروسا في دينك"

      http://hibapress.com/details.php?id=49583   استغل الملك محمد السادس  اليوم  خطاب الاحتفال بعيد العرش لتحذير كافة شعبه  من الانسياق وراء الأفكار الخاطئة والمعتقدات المتطرفة القادمة من الشرق والغرب فى اطار تزايد حركات التطرف الارهابى فى العالم.   وفى هذا السياق خاطب الملك شعبه قائلا.. شعبى العزيز لاتسمح لأحد أن يعطيك دروسا فى دينك  مؤكدا على ضرورة التمسك بوحدة المذهب المالكى الذى يوحد الهوية الدينية المغربية قائلا..حافظوا على هويتكم وعلى مذهبكم السنى.  

      في سياسة دولية

    • الى العزيز حسين امبابى - فرص الهجرة الضائعة

      العزيز حسين امبابى، قرأت مؤخرا موضوعا للعزيز المدير, يستفسر فيه عن طرق الهجرة المتاحة له, و قرأت ردودك أيضا.   لا أخفى عليك إعجابى بحماسك و لهفتك للهجرة و السفر, و إدراكك للواقع العام الذى تشهده مصر فى ايامنا هذه.   خلينى اقلب بلدى بقى عشان البساط يبقى أحمدى و يبقى الكلام على مية بيضا و على عينك يا تاجر و اللى ما يشترى يتفرج. :) بص يا حسين... انت عايز الحق ولا ابن عمه؟ ابن عمه؟ طيب انا هقول لك الحق و لا اسألك عليه من أجر, إنما اجرى على الله.   الحماس و الطموح و اللهفة و الشوق كويسين جدا

      في الملتقى العام لزوار محاورات المصريين

    • بصائر ذوي التمييز في لطائف الكتاب العزيز كتاب تقلب صفحاته بنفسك

      بصائر ذوي التمييز في لطائف الكتاب العزيز كتاب تقلب صفحاته بنفسك ـــــــــــــــــــــــــــــــــــــــــ بصائر ذوي التمييز في لطائف الكتاب العزيز المؤلف: مجد الدين محمد بن يعقوب الفيروزابادي المتوفى سنة 817 هـ المحقق: محمد علي النجار كتاب يبحث في بعض علوم القرآن فيحتوي على مقدمة فيها فضل القرآن وشئ من المباحث العامة المتعلقة به كالنسخ ووجوه المخاطبات ثم يأخذ في ذكر مباحث تتعلق بالقرآن سورة سورة على ترتيبها المعروف في المصحف فيذكر في كل سورة مباحث تسعة : موضع النزول وعدد الآيات والحروف

      في هدى الإسلام

    • تعرف على المغنى بوب عزام صاحب أغنية " أنا بحبك يامصطفى " الشهيرة فى الستينات

      الكثير منا يشاهد أغنية " مصطفى يامصطفى أنا بحبك يامصطفى " ونرددها ونغنيها ولكن نجهل من هو المطرب الذى غناها وأين هو ولم نعرف عنه شيىء واليوم سوف أتحدث عن صاحب ومغنى هذه الأغنية الشهيرة وياللمصادفة الغريبة أنها الأغنية الأشهر والوحيدة التى غناها فى مصر ولم يغنى غيرها ونالت صدى واسع مع الشعب المصرى بل والعالمى أيضاً والتى ما زالت تتردد حتى يومنا هذا أنه هو المطرب المصرى " بوب عزام " وأسمه الأصلى هو جورج وديع عزام ولد فى 24 أكتوبر عام 1925 فى اسكندرية وتوفى فى موناكو الفرنسية فى 24 يوليو عام 2004 و

      في الفنون

×
×
  • اضف...