اذهب إلى المحتوى
محاورات المصريين

يوميات " كلية بهية الخاصة"


Scorpion

Recommended Posts

أهداء :

الي Cleo العزيزة التي بموضوعها " عندي أمتحانات " رجعتني الي أحلي فترة في عمري .

هذه قصة خيالية و لا تمت للواقع بصلة و كل تشابه بين أسماء أو حوادث هي بمحض الصدفة البحتة.

المكان : كلية بهية الخاصة

مبني الكلية عبارة عن عدد 2 Sections بينهم مكتب الأدارة، فناء به شجرة جميز كبيرة... كافيتريا و صالة صغيرة.. و حجرة الأساتذة و المعيدين.

مدير الكلية : أستاذ دكتور عادل أبو زيد حاصل علي درجة الزمالة من جامعة أسكو ببهتيم البلد

نائب المدير : باشمهندز هشام عبد الوهاب الشهير بالرايق

نائب المدير : الطفشان باشا أستاذ العربي و الدين و التاريخ و الجغرافيا و بتاع كله بالأضافة لمسئوليته المطلقة علي حسابات الكلية.

أساتذة و معيدين : مصري .. متسائل... رجب الثاني.. أبن مصر..Freefreer .... Mhesham... و آخرين لكنهم في أعارة في السعودية

أخصائي شئون أجتماعية و غسيل مخ : دكتور أبو حلاوة الشهير ب مستر بايب

شروط الألتحاق : فقط الألتزام بأدب الحوار و محاولة الأحترام المتبادل.. لا تقيد بالسن يعني من سن 17 الي 77 ( زي مجلة سمير كده ) المهم دفع المصاريف الي طفشان باشا.

أسلوب الدراسة : بخلاف أي كلية أخري.. في هذه الكلية الطلاب هم الذين يقرروا مواد الدراسة و مناقشتها.. و الدكاترة يتابعوا

التاريخ : يوم كأي يوم

::::::::::::::::::::::::::::::::::::::::::::::::::::::::::::::::::::::::::::::::

::

أبتدأ توافد الطلبة علي الكلية

في مكتبه و أمام تل من الأوراق ينادي الدكتور عادل : القهوة يا عم محمود..

في نفس اللحظة تتصاعد الأصوات بين المدرجات دليلآ علي مناقشة جديدة في طريقها الي التصاعد...

د. عادل : يا فتاح يا عليم.. فيه ايه عالصبح يا طفشان..

طفشان : دول يا سيدي شوية طلبة ورثوا.. و بيتناقشوا يستثمروا الورث أزاي.. آخر حاجة قرروا يشتروا حتة أرض في الصحراء و يبنوا عليها 3 عمارات و يتنافسوا مين اللي حيخلي عمارته تشد أكبر عدد من السكان.

د. عادل : و دول حيعملوها أيجار و لا مفروش و لاتمليك ؟

باشمهندز هشام : و الله أنا كان رأيي أنهم يشترولهم حاجة مفيدة بالمبلغ ده .. يعني رونالدو مثلآ ..

د. عادل : ها ها ها .. حلوة.. بس و النبي يا طفشان أنا مصدع لوحدي و واخد 3 أسبرينات قبل ما آجي.. أطلع أديهم بق خليهم يهدوا وحياة أبوك.. أنا كان مالي و مال الشغلانة المهببة دي ..

طفشان : ماشى يا دكتور.. و النبي يا أبو حلاوة سيبك من البايب دلوقتي و تعالي معايا نشوف أخرتها ايه معاهم.

أثناء خروجهم كادوا يصطدموا بلانسلوت و Butterflyspirit و Cleo أثناء جريهم في أتجاه المدرج..

الطفشان : ما تحاسبوا يا ولاد ايه الصربعة دي.. بالحق.. واد يا لانسلوت.. انت دفعت المصاريف ياد ؟

- هو أنا هادفعها كام مرة... أشتروا بقي كومبيوتر زي ما البنوك عاملة.. بدل ما تقلب في الدفاتر كل ما تشوفونا.. عن أذنك يا دكتور...

- ماشي يا غلباوي.

Butterfly spirit : هو أحنا بنجري ليه ما تهدي شوية يا Cleo.

Cleo : لأ معلهش مدي شوية ...النهاردة فيه محاضرة زي العسل أقترحها سي السيد عن ماتش كورة بيرشحوا فيه جمال أنه يبقي المدرب الجديد لفريق مصر القومي.. و عايزة الحقها من الأول.

أثناء مرورهم علي الكافيتريا وجدوا مجموعة أخري تتناقش حول أسباب أنهيار أقتصاد مصر و تبعيته لأوامر ماما أمريكا و بعد مناقشات عديدة وافق الجميع علي أقتراح حيزوم بمقاطعة الكوكاكولا و عدم دفع حساب المشاريب لعم محمود اللي بيبيع منتجات الكفرة... و لكن عندما أبتدأ عم محمود في اللطم .. رجع Proud و دفع الحساب كله..

أنضم الجميع الي القافلة حتي وصلوا لمدرج رقم واحد و هناك كان سي السيد يجلجل بصوت جمهوري في خطاب ثوري حماسي :

- أنا جامد .. أنا جدع .. أنا حلو .. جمال ما ينفعش الكوتش.. الجوهري مافيش غيره.. أحسن و عهداله ما أروح الأستاد تاني ..هما فاكرين أيه ما أحنا برضه بنلعب كورة و بنفهم في الترقيص... و بعدين من فضلكم يا حريم تبطلوا رغي لما أتكلم... أحنا هنا بنناقش مصير الكرة المصرية... يعني كلام كبير أوي.. و أنتم عمالين تقرقروا زي الفراخ.. اشي الدنيا حر.. اشي المحشي شاط .. اشي ألبس أيه قدام أبويا.. ما تبطلوا بقي جاتكم السوارس...

فجأة تحول لون شعنونة الخمري الجميل الي أحمر قاتم..و أنفجرت كمدفع رشاش 33 مللي :

- جري ايييييييييييييييييييييييييييييييييه يا سي السييييد..ده أنت قاصدني أنا بقي.. لأ يا خوووووويا فتح عينك.. أحسن و ديني أخلي ألف قطة سودة تعدي قدامك النهاردة.. أنا محبطة لوحدي.. هتيجي تزودها أعلنها عليك و علي كل الرجالة اللي زيك حرب مشعننة.. و أنا ورايا نسوان ياكلوا نوا المشمش...

يتبع

كل اللي حيلتي زمزمية أمل... و إزاي تكفيني لباب القبر


"صلاح جاهين"


رابط هذا التعليق
شارك

  • الردود 66
  • البداية
  • اخر رد

أكثر المشاركين في هذا الموضوع

أكثر المشاركين في هذا الموضوع

الاخ سكوربيون

من واقع التجارب السابقة

الروايات الرمزية قد تسبب اشكالات

فعضو مثلا لا يعجبه ما وضع على لسانه في القصة

و لذلك اقترح انه اذا اعترض اي عضو على ما قيل، ان يرسل الى سكوربيون مباشرة رسالة pm و يطلب فيها ان يحذف دوره في الرواية

و يقوم سسكوربيون بمراجعة المداخلات السابقة و يفعل ذلك

و شكرا

الشعب اراد الحياة و القيد انكسر

رابط هذا التعليق
شارك

أنا والله نيتي سليمة يا شباب...و آخر حاجة عايزها من الموضوع ده أني أزعل حد بل بالعكس نفسي أقدر أرسم أبتسامة علي وشوشكم كلكم... الفكرة جات في دماغي من يومين و صدقوني مراتي افتكرت أني أتجننت بجد لأني فضلت ليلة بحالها أضحك لما أتخيلت أننا بنعيش في مكان واحد مع بعض و طبيعة العلاقاتو الحوارات اللي ممكن تتولد بيننا ..و كانت كلهل أفكار بهيجة.. و علي الأساس ده أنا أوافق أخي ألطفشان علي أقتراحه.. و مش حاكمل قبل يومين تلاتة ...

فيه حد لغاية هنا معترض ؟؟؟؟

بس ما قلتليش رأيك يا طفشان.. دورك عاجبك ولا أخلي البطل يقتلك في تاني حلقة ؟

وش واحد سرق ريشة هشام عبد الوهاب و عمال يدور علي الحبر

كل اللي حيلتي زمزمية أمل... و إزاي تكفيني لباب القبر


"صلاح جاهين"


رابط هذا التعليق
شارك

بس ما قلتليش رأيك يا طفشان.. دورك عاجبك ولا أخلي البطل يقتلك في تاني حلقة ؟

هو في بطل؟

اسمه ايه؟

سكوربيون؟

و اللي بيمثل هو فريد شوقي؟

الشعب اراد الحياة و القيد انكسر

رابط هذا التعليق
شارك

الطفشان كتب:

هو في بطل؟

فى رأيي المتواضع، البطل الحقيقى لم يظهر بعد (هذا ان ظهر) خاصة ان القصة ما زالت فى مشهدها الأول، و لم يظهر بعد جميع "الممثلين"

حيث ذكر العزيز" Scorpion ":

يتبع

أعجبتنى فكرة هذا الموضوع كثيرا، وخاصة تلك المقطوعة:

أحنا هنا بنناقش مصير الكرة المصرية... يعني كلام كبير أوي.. و أنتم عمالين تقرقروا زي الفراخ.. اشي الدنيا حر.. اشي المحشي شاط .. اشي ألبس أيه قدام أبويا.. ما تبطلوا بقي جاتكم السوارس...

و أتفق مع اقتراحكما:

علي الأساس ده أنا أوافق أخي ألطفشان علي أقتراحه.. و مش حاكمل قبل يومين تلاتة ...

Scorpion كتب:

فيه حد لغاية هنا معترض ؟؟؟؟

لا لحد هنا انا عن نفسى ما عنديش أى أعتراض، و أقترح ترك الكاتب يكمل باقى مشاهد يوميات بهية

(وش واحد "بيجر" ناعم، لحسن دورة مع "الكومبارس" يطلع مهبب و هو مش ناقص!!!)

... أن واحدة من آساليب النُظم الديكتاتورية هى :

liberte_dexpression-28365515.jpg

وهى بكل أسف كانت ومازالت مٌنتشرة ومُستخدمة في بلدنا الحبيب وعلى كافة المستويات بلا إستثناء !

رابط هذا التعليق
شارك

...النهاردة فيه محاضرة زي العسل أقترحها سي السيد عن ماتش كورة بيرشحوا فيه جمال أنه يبقي المدرب الجديد لفريق مصر القومي.. و عايزة الحقها من الأول.  

أظن دى محاضرة زى دى ممكن تخلينى أسيب التعليم و أروح أسرح بجرانين فى الشارع...!!!!

_16643_mubarak-olmert-5-6-06.jpg

وَمَنْ يَتَوَلَّهُمْ مِنْكُمْ فَإِنَّهُ مِنْهُمْ إِنَّ اللَّهَ لا يَهْدِي الْقَوْمَ الظَّالِمِينَ

المائدة - 51

nasrallah1.jpg

مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ

الأحزاب - 23

رابط هذا التعليق
شارك

كتبت كليو

أظن دى محاضرة زى دى ممكن تخلينى أسيب التعليم و أروح أسرح بجرانين فى الشارع...!!!!

 

 

دا اذا شفتى الشارع تانى اصلا

(وش واحد مرعوب وبيتلفت حواليه)

وليس بعامر بنيان قوم***اذا اخلاقهم كانت خرابا

رابط هذا التعليق
شارك

.

النهاردة فيه محاضرة زي العسل أقترحها سي السيد عن ماتش كورة  بيرشحوا فيه جمال أنه يبقي المدرب الجديد لفريق مصر القومي...
أنضم الجميع الي القافلة حتي وصلوا لمدرج رقم واحد و هناك كان سي السيد يجلجل بصوت جمهوري في خطاب ثوري حماسي :

-

أنا جامد .. أنا جدع .. أنا حلو .. جمال ما ينفعش الكوتش.. الجوهري مافيش غيره.. أحسن و عهداله ما أروح الأستاد تاني ..هما فاكرين أيه ما أحنا برضه بنلعب كورة و بنفهم في الترقيص... و بعدين من فضلكم يا حريم تبطلوا رغي لما أتكلم... أحنا هنا بنناقش مصير الكرة المصرية... يعني كلام كبير أوي-

نشنت يا فالح وديتني فى داهية يا عقرب.

يا ناس ياللي بترقبوا المنتدى الراجل ه دسيسة وعايز يوقعني فى شر اعمالي .. أنا بحبك يا جيمي ... سير على بركة الله وإحنا معاك ... درب منتخب الكره ومنتخب الجود كمان ولا يهمك ماهي بلدكوا وأنت أبن العمده ، وأبن العمده حتماً ولابد يبجى عمده ... ويجعله عامر .هــــــــــاع مين هناك .

وبالمناسبة دي أنا ألفت أغنية وطنية علشان رئيسنا الجديد وهي مكونة من ألف بيت لكن هاٌقوكم المطلع بس وحيث إن المطلع صعب فعايز زقة لو سمحتم وهي بتقول :

- أنا بحب جيمي وجيمي يحبني

- أركب المرجيحة وهو يزقني

كمل تأليف يا سكوربيونو يمكن نكتشف فيك موهبه تفوق موهبة الكاتب الراحل حشيشوفيتش ويمكن كمان تخطف منه جايزة نوفل للآداب ( آداب يعني قصص وروايات .. مش الآداب اللى بالي بالك )

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

ايوا كدا يا سكوربويووووون

ما تسكتلوووووش

اديله في سنانه

انا يلقح علي كلالالالالالالالالالالالالالالام

لييييييييييييييييييييييه يعني؟؟؟؟؟؟ "وش ماسك صفيحة الجاز"

دا انا نعمــــــــــــــــــة الله و الأجر عــــــــلـــــــى الله..

لو عزت اي مساعدة في التأليف صفرلي بس

اختك

ام ســــــــــمــــــر

وانا من البلد ديييييييييييي

رابط هذا التعليق
شارك

أنا جامد .. أنا جدع .. أنا حلو .. جمال ما ينفعش الكوتش.. الجوهري مافيش غيره.. أحسن و عهداله ما أروح الأستاد تاني ..هما فاكرين أيه ما أحنا برضه بنلعب كورة و بنفهم في الترقيص... و بعدين من فضلكم يا حريم تبطلوا رغي لما أتكلم... أحنا هنا بنناقش مصير الكرة المصرية... يعني كلام كبير أوي

صباح الهنجفه يا سى سيد وكنت معترض على مشروع الميكروباس بتاعى

قابلنى بقى لو جبت عجلة حتى....يالهوى...هيا حصلت تعترض ..وعلى مين

على الكابتن الكبير وعم الشباب ....

هذه رسالة مسجلة لحضرة الرائد شيرين..والله يا فندم إحنا كويسين قوى

والحال عال العال وأى حد معترض إحنا منعرفوش

شكرآ

وش واحد ماشى فى لاظوغلى و بيمد جامد عشان يروح الشارع التانى

" إملأ عيناك بوجه من تحب فسوف تفتقده كثيراً فى يومٍ ما"

رابط هذا التعليق
شارك

ما كادت شانا تنتهي من كلامها حتي انبري mnman .. مالك يا شانا طايحه ليه ياختي..اهدي لا يطقلك عرق.. أنتي لسه ليكي عين تتكلمي و لا نسينا المراجيح و البمب و الأسلحة الفاسدة...

شانا : الله ه بقي فيه ضرب تحت الحزاااااااااااااام.. ده انتم داخلين بقي براااااااااااااابطة المعلم.. طب و الله....

و هنا تدخلت nora : معلهش يا أختي.. ممكن أرد أنا عليهم .. و ما كادت شانا توميء بالايجاب... حتي تحولت ملامح nora الرقيقة الي خليط من ملامح زينات صدقي و نبوية شَكَل .. و قالت أثناء رميها للقطة الصغيرة التي لا تفارق ابدآ ذراعها : جري أيييييييه يا شاب انت و هو .. انتم صدقتم نفسكوا بجد ولا ايييييه.. ده انتم من غيرنا و لا حاجة.. بس فالحين طول النهار من غير شغلة و لا مشغلة.. يا مرميين قدام التليفزيون يا قدام الكومبيوتر... لأ.. أصححححححححححوا.. من النهاردة المزيكا حتتغير..

Optimistic : هو انتي أتجوزتي و احنا مش واخدين بالنا ولا ايه.. وبعدين من امتي طلعلوكم حس.. هما هربوا امتي من القفص بتاع ميدان التحرير يا خواننا.. هو مين اللي كان نباطشية حراسة عليهم النهاردة ؟

أمير: أنا سلمتها لأبن مصر من ييجي 3 ساعات دلوقتي

أبن مصر : ما حدش يجيب سيرتي .. الله يخرب بيوتكم

و ابتعد عن الجميع ببيجامته المقلمة المقطعة و نظارة شمس سوداء تخفي أثر لكمة خطافية مباشرة جهة العين اليسري...

Optimistic : أحنا مش قولنا بلاش متجوزين يطلعوا حراسة .. الله يكسفكم.. و هنا أبتدأ الصياح من جديد بين الكل.. و طارت عبارات مثل... انتم مكانكم المطبخ... ناقصات عقلآ و دينآ.. الرجال خيرون عن النساء.. ما يحكمش... و كانت أكثر الجميع حنقآ هي فريدة : يا ناس ده احنا في الجامعة مش في حارة الطرابيشي... ده زمن ايه المنيل ده؟

فقط تدخل أبو حلاوة الذي يحظي بأحترام الجميع جعل الكل يسكتوا للحظة :يا جماعة ( أنفاس متوالية من البايب ) أهدوا شوية.. زمن الستات اللي يقعدوا في البيت ولي... دلوقتي كلنا متساويين.. ما فيش فرق بين الرجل و الست.(نَفَس). بين الحمار و البردعة (نَفَس).. بين الراس و القملة( نَفَس طويل).. و ايد واحدة ما تصقفش.. يعني وريني بشطارتك يا فالح أنت و هو حتصرفوا علي بيوتكم أزاي بمرتب نفر بطوله و ده لو لقيتوا شغل من أصله علي عيلة مش أقل من 4 / 5 انفار.

تحديد النسل هو الحل .. صرخ White Heart بأعلي صوته... أحنا فالحين بس في أنتاج العيال... روحوا خان الخليلي و هتعرفوا أن عندي حق .. طب شوفوا اليابانيين و سوني صان بتاعهم عاملين أيه...

- ييييييه...تاني.. طبعآ ما هو علماني... يا ابني نقطنا بسكاتك و لا أقولكم سيبوني عليه و أنا افصفصه لما أعرفله مِلة.. أرتفع صوت ..... محتدآ

وايت : مش من حقك.. أحنا كلنا متساويين.. و من حقي أقول رأيي.. أنا طالب زيي زيك و بأدفع المصاريف.

الطفشان : مصاريف... لأ معلهش.. كارت الAmerican express بتاعك طلع مضروب يا خويا.. و أنت موقوف لغاية ما تدفع اللي عليك

Wa7ad : معلهش و النبي يا دكتور.. سيبوه ده المسئول عن فريق الأناشيد بتاع الكلية.. و الحل بسيط.. حطوا كل المصاريف علي حساب Scorpion ... ما هو قالها مرة بعضمة لسانه...

الطفشان : أنا ما باكلش من الكلام ده... Scorpion بتاعكم ده باين عليه فشار و فنجري بُق... ثم هو فين بقالو 3 ايام مش باينله أثر...

لانسلوت بصوت خافت : اصل ... أصل أنا قافل عليه

- قافل عليه فين

- في أوضة الفيران

- ليه

- يعني.. موضوع كده كان بيني و بينه

- موضوع ايه

- موضوع روميات.. كان حب يعمللي فيه طلياني قمت لبيته

- رومي ايه و مخلل ايه.. أرحموني بقي ...

و ابتدأ الخناق من جديد بين الكل ... وفجأة من بعيد.. من تحت شجرة الجميز الواقعة بفناء الكلية ابتدأ صوت عود حنون يعلو ..يصاحبه صوت الأستاذ مصري الهاديء يغني :

يسبق كلامنا سلامنا يطوف عالسامعين معنا...

عصفور محندق يزقزق كلام موزون و له معني..

عالأرض سمرة و قمرة و ضفة و نهر و مراكب...

ورفاق مسيرة و صورة حشد و مواكب في عيون صبية بهية عليها الكلمة و المعني...

مصر يا أما يا بهية.. يا ام طرحة و جلابية.. الزمن شاب و انتي شابة..

و هو رايح و انتي جاية...جاية فوق الصعب ماشية.. فات عليكي ليل و مية.. و أحتمالك هو هو و أبتسامتك هي هي.. تتضحكي للصبح يصبح بعد ليلة و مغربية..تطلع الشمس تلاقيكي معجبانية و صبية يا بهية ..

الليل جزاير جزاير يمد البحر يتنيها..

و الفجر شعلة حتعلي و عمر الموج ما يطويها..

و الشط باين مداين عليها الشمس طوافة...

ايدك في أيدنا .. ساعدنا.. دي مهما الموجة تتعافي...

بالعدل ساد الجماعة .. و بالأصرار نخطيها..

و للحظة سكت الجميع مشدوهين ينظروا لبعضهم.. في هذه الأثناء كان دكتور عادل قد نجح أخيرآ في أحتساء قهوته و خرج موجهآ سؤاله الي الجميع : هو الموضوع أبتدي أزاي.. و عندما بدأ الجميع للأجابة في نفس الوقت..

- بس بس بس..مش عايز أعرف اسباب.. الأدارة قررت انهاْ المحاضرة دي.. شوفولكم غيرها.. و الا أقولكم.. أنا بقالي فترة عايز أحل مشكلة كبيرة.... فيه مؤامرة علي الجامعة و عايزكم كلكم تشتركوا معايا في حلها.. يمكن لو أشتركنا كلنا في مشروع واحد ربنا يهديكم و تبطلوا نقار شوية... ماشي يا شباب ؟

همهم الجميع بالموافقه و خرجوا.....

يتبع

تم تعديل بواسطة Scorpion

كل اللي حيلتي زمزمية أمل... و إزاي تكفيني لباب القبر


"صلاح جاهين"


رابط هذا التعليق
شارك

مش ممكن يا سكوب .. ملعوبه وكل الكلام اصحابه قالوه قبل كده ( دا انت خطر يا راجل) خليتنى زى المجنون وبنت مصر بتقول ( خير الله ام اجعله خير وانا واقع على الارض من الضحك ... من قلبى والله .. ربنا يضحك قلبك علطول يا رب .

واسمحلى اعدل شىء على ابن مصر ..

( امير : انا سلمتهم لابن مصر من 3 ساعات ..

لانسلوت : ابن مصررررررر( بصرخه رعب ) انا شفته من ساعه بيجرى فى ميدان التحرير ببجامه مخططه مقطعه وال.. ال ..

امير : ال .. ايه انطق..

لانسلوت : ال .. كان فيه اطفال كتيييييييييييييييييير قوى بتجرى وراه وبتحدفه بالطوب وازايز الببس .......)

....ابن مصر ..

ربنا يعدى الليله دى على خير ..

إن ربا كفاك بالأمس ما كان.... يكفيك فى الغد ما سوف يكون

 

رابط هذا التعليق
شارك

حلوة يا ابو المواهب

بين الحمار و البردعة (نَفَس).. بين الراس و القملة( نَفَس طويل)..

حتة متكلفة قوي قوي!!!

ما يقولهاش غير حشيش

و هو بيشد نفس من الجوزة

(يا رب تطمننا عليك يا حشيش، بدل ما الكل بيسأل عليك و متشحتفين)

تحديد النسل هو الحل

حلوة برضه

الطفشان : مصاريف... لأ معلهش.. كارت الAmerican express بتاعك طلع مضروب يا خويا.. و أنت موقوف لغاية ما تدفع اللي عليك

و انت يا سكوربيون موقوف لغاية ما تدفع اللي عليك!

و الا اقول لك؟

حاحجز على ايراد القصة اللي بتكنتبها دي

الشعب اراد الحياة و القيد انكسر

رابط هذا التعليق
شارك

فقط تدخل أبو حلاوة الذي يحظي بأحترام الجميع جعل الكل يسكتوا للحظة :يا جماعة ( أنفاس متوالية من البايب ) أهدوا شوية.. زمن الستات اللي يقعدوا في البيت ولي... دلوقتي كلنا متساويين.. ما فيش فرق بين الرجل و الست.(نَفَس). بين الحمار و البردعة (نَفَس).. بين الراس و القملة( نَفَس طويل).. و ايد واحدة مل تصقفش.. يعني وريني بشطارتك يا فالح أنت و هو حتصرفوا علي بيوتكم أزاي بمرتب نفر بطوله و ده لو لقيتوا شغل من أصله علي عية مش أقل من 4 / 5 انفار. 
صرخ White Heart بأعلي صوته... أحنا فالحين بس في أنتاج العيال... روحوا خان الخليلي و هتعرفوا أن عندي حق .. طب شوفوا اليابانيين و سوني صان بتاعهم عاملين أيه... 

- ييييييه...تاني.. طبعآ ما هو علماني... يا ابني نقطنا بسكاتك و لا أقولكم سيبوني عليه و أنا افصفصه لما أعرفله مِلة.. أرتفع صوت ..... محتدآ 

وايت : مش من حقك.. أحنا كلنا متساويين.. و من حقي أقول رأيي.. أنا طالب زيي زيك و بأدفع المصاريف. 

هـو ده اللى بيحصل

كلنا بنتخانق و نرجع اصحاب و حبايب تانى

و لذلك اقترح انه اذا اعترض اي عضو على ما قيل، ان يرسل الى سكوربيون مباشرة رسالة pm و يطلب فيها ان يحذف دوره في الرواية 

و يقوم سسكوربيون بمراجعة المداخلات السابقة و يفعل ذلك

أنـا اعترض

يا وطنى : كل العصافير لها منازل

الا العصافير التى تحترف الحريه

فهى تموت خارج الأوطان

ـ نزار قبانى ـ

103.gif

رابط هذا التعليق
شارك

حلوة أوي أوي يا سكوربيون ... شفت بقي إن الحصار المفروض عليك في إيطاليا جاب نتيجة و خلي مواهبك تظهر ... و لأني أنا اللي فرضت الحصار فإني أطالب بجزء من إيراد القصة ... "وش بيضرب عصفورين بحجر يخلص من موضوع الحصار و كمان يعمل قرشين" ....

ماشي يا غلباوي.

أنا غلباوي ..... أنا غلباوي ..... هيه هيه .... و النبي ممكن أغير الرتبة بتاعتي اللي بتظهر علي جنب و أخليها "عضو غلباوي" .....

أحلي ما في القصة زي ما قال البعض إنها مما قال الأعضاء بالفعل و هو ما يعطيها قدرة علي التقبل عند أبطال القصة ....

كمل يا سكوب (حلو الإسم ده يا إبن مصر و هنستمر عليه زي ما عملنا مع أوبتي) ....

أهم حاجة عايز أقولها .... أوعي – و أنا بأحذر أهو - .... و لو حصل اللي أنا بأحذر منه هأزود الحصار علي إيطاليا كلها ....

أوعي تتأخر في الأجزاء اللي جاييه ....

رحم الله الأفاكاتو وإخناتون وإسكنهم فسيح جناته

__

وجوه في العاصفة - هل تحب عملك - كيف تعمل الأشياء - أزمة الحد الأدني

رابط هذا التعليق
شارك

فقط تدخل أبو حلاوة الذي يحظي بأحترام الجميع جعل الكل يسكتوا للحظة :يا جماعة ( أنفاس متوالية من البايب ) أهدوا شوية.. زمن الستات اللي يقعدوا في البيت ولي... دلوقتي كلنا متساويين.. ما فيش فرق بين الرجل و الست.(نَفَس). بين الحمار و البردعة (نَفَس).. بين الراس و القملة( نَفَس طويل).. و ايد واحدة مل تصقفش.. يعني وريني بشطارتك يا فالح أنت و هو حتصرفوا علي بيوتكم أزاي بمرتب نفر بطوله و ده لو لقيتوا شغل من أصله علي عية مش أقل من 4 / 5 انفار.

عموما يا سكوربون { نفس طويل من الجوزة-- كحة و احد محترف جوزة من زمان } انا شايف نفسي فعلا في قصتك برغم من بعض الاختلافات الطفيفة

الرئيس مسئول عن كل ما تعاني منه مصر الأن

لا

رابط هذا التعليق
شارك

الجزء التانى اتاخر لية

دة اكيد هيأثر على المسيرة التعليمية

على كدة مش بعيد بهية تشيلها مادتين

.........

.........

اااااااهههه انا فهمت دة كلة لية عشان ناخد دروس

(المؤامرات شغالة اللة ينور كل دة عشان تقدر تكفى مصاريف الرومى

رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة

×
×
  • أضف...