اذهب الي المحتوي
إنشاء باب جديد بعنوان سد النهضة الإثيوبي لكل الموضوعات المتعلقة بسد النهضة ×
ســيد مرزوق

انطباعات مغتربين عن مصر بعد زياراتهم لها

Recommended Posts

السلام عليكم ورحمة الله وبركاته أخوتي وأخواتي الأحباء

عزيزي الفاضل د. وليد , والله نفس الشعور وأكتر , معلش أنا حاليا أستحق لقب ( محبط ) عن جدارة بقالي أكتر من شهر , بعد عودتي من إجازة في مصر لمدة شهرين عرفت فيها معنى إن الواحد يكون مغترب , وتحطمت كل الصور الجميلة التي كانت معششة في دماغي عن بلدي ( قبل سرقتها ) , وباختصار شديد ...... راجع من هناك ..... متعققققققدددددددد ( على رأي شعنونة ) !!!

فكرت أعمل توبك جديد عن إنطباعاتي عن مصر حاليا بعد زيارتي الأخيرة ودراستي للأوضاع عامة , ولكني وجدت الكثير من الموضوعات تناقش معظم ما يدور في خاطري , فآثرت السكينة , واكتفيت بالفرجة ..... على ما تفرج باذن الله .

حاسس ... إننا .... ماشييييين .... في نفق .... ضيق .... طويل ... ضلمة ... وكل مادا بيضيق أكتر وأكتر ...... ومش شايف أي ضوء في نهايته .......

حد شايف حاجة يا جماعة ؟؟؟؟؟

________

هذا الموضوع عبارة عن مداخلات مفصولة من موضوع اخر

ليست لانها خارج الموضوع، بقدر ما هو موضوع هام يجب مناقشته على حدة

الطفشان

الادارة

شارك هذه المشاركه


رابط المشاركه
شارك

عدت من مصر من حوالي عشرة ايام

اعتقدت ان انا خرجت بنفس الانطباع و ان كان في نفس الوقت بقدر كبير من الاعجاب بهذا البلد القادر علي التحمل و الصبر و استمراره في الحياة و هو بيغزل برجل حمار

شارك هذه المشاركه


رابط المشاركه
شارك

عدت من مصر من حوالى شهر ، وهذه المره إضطرتنى ظروف ما أن أجوب أوساط مصر من قاعها لقمتها بمعنى الكلمه ، إحتكيت بجهلاء وبأنصاف متعلمين وبمتعلمين وبمثقفين وبنخبوين ، عدت وأنا متيقن يقين لا يطاوله شك أننا كلنا فى تناغم ووئام مذهل على قلب رجل واحد إسمه "السلبيه" وهو من يحدد ويقرر كل أمر من أمور حياتنا

ملحوظه هامه جدا ـ من لا يصدقنى فليقرأ الموضوع الذى فتحه سى السيد اليوم فى باب السياسه الداخليه تحت عنوان مؤشر خطير ، وإن كنت أختلف معه فى العنوان فما أورده لايؤشر على شئ كما ظن هو لأن الشئ المعنى واضح وجلى حتى للعميان

شارك هذه المشاركه


رابط المشاركه
شارك

كنت فى المحروسة من اسبوعين تقريبا (شفت ماتش موريشس هناك) ... و أول مرة انزل مده بالقصر ده، 9 أيام بالتمام ...

المهم، دى شوية أنطباعات عن الزيارة السريعة:

- عمار يامصـــــــر: أخوكم دخل المطار و قلبه بيدق. الكدب خيبه ... قلت ها يجرونى من قفايا علشان كتاباتى فى المنتدى الموقر ده. بس كانت مفاجأه ظريفة ان ماحدش لعبك المسائل. كله مشى كالمعتاد ... حتى التعليقات المتخلفة بتاعت البهوات ظباط الجوازات هى هى ... عمالين ينفخوا دخان السجاير فى وش الركاب ... لفته حضاريه جميلة!

- البلد فى حالة رعب و طوارئ بسبب الأمتحانات لدرجة مبالغ فيها جدا.

- الأسعار نار! الحكومة فعلا بتستهبل ... الناس ها تجيب فلوس منين؟

- الأعلام عامة ... صحف، مجلات، تلفزيون ... كلها و صلت للحضيض ... الأخبار تضغى عليها أخبار الأثارة الجنسية أو الجن و العفاريت أو فضايح الناس ... طبعا كل ده بجانب الشق الأساسى و هو النفاق و الرياء للعائلة المقدسة سبب نعمة مصــــر و المصريين.

فعلا كمية مكثفة تصيب الشخص بالقرف و الأشمئزاز.

- اللامبالاه: الغريبة أن كل من قابلت ... سواء معرفة او خلاف ذلك ... فاهم كل اللى بيحصل و لكن فيه حالة بلادة و سلبية و لامبالاه لابد وأن التاريخ ها يسجلها لهذا الشعب. و طبعا الردود دايما جاهزة:

- عايزين نربى العيال

- مانتم ياعم قاعدين بره و الكلام سهل

- طيب ماترجع انتا و تورينا ها تصلح الحال أزاى

- مخطط أسرائيلى

- مخطط أمريكى (دى جديده موديل السنه دى)

- البنات بتستهبل: أيه شغل الأستعباط ده؟ انا اللى أسمى جاى من أمريكا كنت ماشى فاتح بقى فى القاهرة. معلهش ياجماعة بس احب أعرف البنات دول أزاى بيخرجوا من بيوتهم لابسين كده؟ ده أحنا كده بنهزر بقى ياعزيزى آرثر !!

- ان ماعملتش صجر الحمام يااكلك: أقرا على نفسك الفاتحه لو قلت لحد "لوسمحت" أو "من فضلك" أو "شكرا" ... قول على نفسك يا رحمان با رحيم ... ها تتاكل ياننوس! أنا عارف أن كلامى ممكن يزعل بعض الناس ... لكن الحق مايزعلش (النظرية بتقول كدة) ... لازم تبقى رزل و غتت و بلط و صدغ و جلمف و بجح علشان تقضى مصالحك ...

- لسة برضة الواحد بيحس بالأمان و راحة البال فى مصــــر.

- لسة برضة أجمل سمك (سامعنى يا سي السيد؟!) فى مصــــر.

- أعتقد انى الوحيد اللى ماكنش سايق عربية Jeep !!

_____________________________________

لينكس واخد اسفين جامد قوى لينكس

أخصائي فلنكات سكة حديد كوبري الناموس

شارك هذه المشاركه


رابط المشاركه
شارك

أحكي لكم انا عن زكرياتى بدون ترديد ما ذكره باقى الاخوة حيث ان الانطباعات واحدة

فى المطار وكان ميعاد وصول الطائرة بالليل و يبدوا ان ميعاد وصول الطائرة كان مفاجأة لضباط الجوازات لا يوجد اى منهم فى مكانه ثم تعالت الاصوات يا على يا صلاح يا محمد طيارة اليابان وصلت يلا بسرعة و حضر الباشا و أخذ الجوازات و طبعا رمقنى بنظرات كلها شك و ريبة ثم وضع الجوازات بجواره و اخذ ينظر لى و لاسرتى وانا صامت و منتظر و بعد 5 دقائق قال لى اتفضل طيب ليه كان الانتظار مش عارف .

المهم فى الصالة و فى انتظار الحقائب كثير من الناس كانو يعرضون المساعدة بشكل استفزازى

خرجت و رفض الشيال ان يأخذ 20 جنيه فى عمل لم يستغرق 15 دقيقة

وبدون تكرار انطباعات الاخوة اذكر لكم بعض المواقف المضحكة وه انطباعات ابنتى 4 سنوات

بابا الراجل ده وحش بيرص العيش على الرصيف

بابا الولد ده بيرمى زباله فى الارض

بابا خد خلى علبة الايس كريم الفارغة دى معاك لانه مفيش صندوق زبالة

بابا فى دوشة وصوت وحش

بابا التراب دخل فى عنيه

بابا شفت حمار فى الشارع

بابا فى حشرات واقفة على الفاكهة اللى عند الفكهانى

بابا الدكتور ده وحش لان معندوش مكان للعب

بابا عاوزة ....................مفيش يا حبيبتى

بابا ممكن العب هنا ..................لا

بابا انا تعبت

بابا انا عاوزة ارجع اليابان تانى

شارك هذه المشاركه


رابط المشاركه
شارك

لينوكس كتب

أخوكم دخل المطار و قلبه بيدق. الكدب خيبه ... قلت ها يجرونى من قفايا علشان كتاباتى فى المنتدى الموقر ده

الناس دي بقت تهرج ، انا متأكد إني أديتلهم الأسم صح وبالكامل .. لينوكس عبده لينوكس الشهير بلينو ( يظهر أنهم كانوا مشغولين بماتش مصر ومدغشقر )

-

لسة برضة أجمل سمك (سامعنى يا سي السيد؟!) فى مصــــر.

سمعك يا شق .. ما أنا الشهر اللى جاي إن شاء الله نازل للقراميط كلها ( أوعى تبلغ عني خليك جدع )

مصري كتب

بابا انا عاوزة ارجع اليابان تانى

حرام عليكوا . طب جاملونا أو أكذبوا علينا خلونا نقضي يومين حلوين فى مصر من نفسنا علشان نرجع للطحن من تاني.

أرى يا أخواني ان تنظروا لمصر خلال إجازتكم بنظرة السائح الأجنبي الذي يرى البريت سايدز بس .

هاحكيلكم على حكاية ظريف حصلت السنة اللي فاتت .

مدير شركتنا قرر يقضي أجازته فى مصر وبالفعل راح قعد شهر في شقة مفروشة هو وعائلتة الكبيرة ما شاء الله في عباس العقاد بـ 500 ج في اليوم بـــــــــس ( لقطه !!!! ) ، أقسم بالله له سنة دلوقت كل مانقعد أنا وهو يقعد يحكي لي عن مصر وهو منبهر من النظام والنظافة وكمية البنات والستات المحجبات المحتشمات فى الشوارع والأسعار الرخيــــــــــصة جـــــــــــــداً جـــــــداً وزوق ورقة وعذوبة سواقين التكاسي لدرجة أنه أتفق مع سواق تاكسي بيجو أستيشن 7 راكب فى اليوم بـ 150 ج ( بس ) وكل مايعوزه يكلمه على موبيله يجيلي فريرة .. ولا الفكهانية والمطاعم يا عيني يا عيني على الجمال .

ولا لما كان بيتغدى فى مطعم فرايديز والأسعار الجنان اللى عندهم ( 250 ج مينيمم تشارج ) يا بلاش .

أنا شكيت أن الراجل يكون راح حته تانية غير القاهرة ، ولو تعرفوا حجم الدعاية اللى عملها بين أصدقائة هنا ... ولا ممدوح البلتاجي نفسه وجاب معاه كمية صور علشان يفرجهلهم .

أنا كنت بأسمع كده وعايز أفرفر من الضحك ومش قادر .

أيه رأيكم ؟!!!!!!

شارك هذه المشاركه


رابط المشاركه
شارك
لازم تبقى رزل و غتت و بلط و صدغ و جلمف و بجح علشان تقضى مصالحك ...

أنت كدا بجد جبت الخلاصة

هى دى الحقيقة المرة

تكلم الناس بقرف تحترمك وتقولك يا بيه ويا باشا!!!!!!!

لو أنسان طيب راح يقضى مصلحة، عمره ما حيخلصها

لو بلطجى حتخلص حاجتك!!!

أنا مش عارف

المعادلة بقت مقلوبة وفى حاجات كتير أوى غلط وبصراحة شايف سكة الأصلاح ضلمة طالما أن الفساد طال أفراد البلد وأصبحت عندهم البدائل للعيش مع الفساد... وللأسف الغالبية العظمى خلاص أقلمة نفسها

(وش حزين وبيتحسر على مستقبل مصر)

وللأسف أحنا تربينا على الخوف وخصوصا من السلطة وكانت أول تعاليم الآباء للأبناء هى ألا تتكلم فى السياسة وأذا أتكلمت يبقى كلم نفسك أو أقفل بابك كويس ووطى صوتك... حتى الكلام والفضفضة هنا فى المنتدى بقت حاجة تخوف! فأصبح هم الناس هو أذاى آكل وأشرب وأربى العيال ... طبعا كل ده كويس بس أزاى بدون حتى أعتراض على قرار سياسى مثلا... هو سياسة يعنى أيه الأول؟؟؟ مش برده هى العملية اللى تتقرر بها الحقوق والتى تسيطر على كل كبيرة وصغيرة فى البلد... طيب أذا البشر دى متكلمتش أذا فقد رضيت بفقد حقوقها والى الأبد...

الناس فى مصر بأختصار مش هبلة ولا عبيطة...لأ... دول عرفين أنهم بيتسرقوا ليل نهار...وعارفين أن حاميها حراميها! وبما أن الألسن مقطوعة وما باليد حيلة وأن مفيش شكوى حد بيسمعها ..فالناس شافت طريق أسهل للتغلب على هذا الغلب بأن تتاجر بالكلام على بعضها البعض وأن تفش غلّها فى نفسها وأن تسرق نفسها وكل واحد عرف طريقه كويس...

للأسف فساد الحاكم مقدور عليه أما فساد شعب فلا حل له ألا أحلاله بأجيال جديدة لنج... جيل لا يخاف ألا ممن خلقه...جيل لا يهاب فى الحق لومة لائم... جيل يستطيع أخذ حقوقه بالقوة مهما كلفه الأمر...

شارك هذه المشاركه


رابط المشاركه
شارك

يعني انا مش موافق علي بعض الكلام التي اتقال

الحقيقة انا لا اقود في مصر توفيرا للوقت و لراحة البال و اقضي مشاويري بالتاكسيات في عدة مرات و ليس مرة واحدة عندما كنت احاسب سائق التاكسي و طبعا الواحد بيحسب المشوار باليورو و الجنيه 15 سنتيم فقط يعني ما يجيبوش عيش حاف

عندما كنت احاسب السائق السائق بيقول لي يا بيه الفلوس دي كتير المشوار يستحق اقل من كده و بدل الخمسة جنيه اللي باعطيهاله بيأخذ 3 جنيه و الموقف تكرر اكثر من مرة

في محل عصير قصب حبيت ان اترك للولد مبلغ صغير بقشيش راسه و الف جزمه انه لن يقبله لأنه بياخذ اجره بالفعل

طبعا ممكن احكي امثلة اخري لناس بتطلب رشوة عيني عينك و ناس اخري بتعذب الناس و بتوجع قلبها لله في لله بدون رغبة في رشوة او اي شئ اخر

صوابعك مش زي بعضها و مصر ما زال فيها الجيد و الجيد جدا كما فيها السئ و النص نص

و الفقر و الحاجة و العوز في مصر هما اكبر اسباب فساد من يبغي ان يكون شريفا و لو استئصلناهم من مجتمعنا اكيد ستكون الاحوال افضل كثيرا جدا

شارك هذه المشاركه


رابط المشاركه
شارك

د / حلاوه كتب

صوابعك مش زي بعضها و مصر ما زال فيها الجيد و الجيد جدا كما فيها السئ و النص نص

و الفقر و الحاجة و العوز في مصر هما اكبر اسباب فساد من يبغي ان يكون شريفا و لو استئصلناهم من مجتمعنا اكيد ستكون الاحوال افضل كثيرا جدا

الدكتور س س يختلف معاك يا د /أبو حلاوه ( الدكاتره وقعوا فى بعض يا رجالة )

عمر الفقر ماكان دافع للرشوة او إبتزازا الناس بأي شكل من الأشكال ، بدليل حاجة بسيطة يوسف عبد الرحمن الحرامي مساعد يوشع والي .. هل ده كان فقير بالعكس ده راجل مرتبه وبدلاته 400.000 ج شهرياً ومع ذلك لم يشبع حتى سقط سقوطاً مريعاً .

بلاش مثال عن الديناصورات اللى زي دول ، الست الغلسه اللى كذا مره أشوفها بتنظف حمام الرجالة فى المطار ( مش عارف ليه ست !!!! ) جيوب البالطو اللى لابسه صيف وشتا مليان فلوس من التغتيت على الناس وماتخلكش تخطي الحمام إلا أما تدفع المعلوم يعني لا تقل عن 200 جنية ( خلي بالك ده فى وردية واحدة ) يعني أكتر من مرتبي هنا .... هل دي الفقر اللى بيدفعها لكده يعني هي يلزمها كام علشان تعدي المرحلة دي وتكتفي بمرتبها وتقنع بما قسمه الله لها.

أكبر أسباب الفساد فى مصر هو فساد القمة ، وبما أن القمة تتبع القاع فهاتبقي فاسدة هي كمان ، وهايقولولك يا عم ماهو فلان الكــــــــــــــــــــبير يبسرق وماحدش بيكلمه أشمعنى أنا .

ولكن لو كنا شعب مش لاقي ياكل إلا العيش والملح لكن قمته سليمه هاتلاقي الناس تلقائياً ماشيه بما يرضي الله وماحدش هايفكر يعمل كده إلا العناصر اللي الشر متأصل فى طباعها ودول ليهم عقابهم الرادع .

شارك هذه المشاركه


رابط المشاركه
شارك
بابا انا عاوزة ارجع اليابان تانى

الظاهر ان الولاد كلهم زى بعض

بعد تجارب عديده لجعل اولادى يستمتعوا باجازتهم لقيت ان الحل الامثل هو تمضيه جزء و لو بسيط من الاجازه فى مكان تانى غير مصر على الاقل يبقى شفنا دول تانيه و ناس تانيه و يبقى اسمه تغيير

و لولا وجود العائله فى مصر ماكنتش نزلت مصر و خصوصا فى الصيف

فى مصر الناس محتاجه تعرف يعنى ايه سياحه و يعنى ايه سائح جاى لمصر عشان يستمتع بوقته مش عشان يضحكوا عليه و ينضفولو جيوبه و يخلوه يحرم يكرر الزياره

بابا انا تعبت

بابا انا عاوزة ارجع موزمبيق تانى

شارك هذه المشاركه


رابط المشاركه
شارك
يوسف عبد الرحمن الحرامي

دعنا لا نبنى أحكاما يقينية كهذه من خلال الصحف وما تصرح به أجهزة رقابية وحتى محاكم إستثنائية .. وكلنا يعلم المناخ المحيط بها الآن

شارك هذه المشاركه


رابط المشاركه
شارك
يوسف عبد الرحمن الحرامي

دعنا لا نبنى أحكاما يقينية كهذه من خلال الصحف وما تصرح به أجهزة رقابية وحتى محاكم إستثنائية .. وكلنا يعلم المناخ المحيط بها الآن

ماشي يا عم مصري .... علشان خاطرك أنت بس .

جورج كتب

ان الحل الامثل هو تمضيه جزء و لو بسيط من الاجازه فى مكان تانى غير مصر على الاقل يبقى شفنا دول تانيه و ناس تانيه و يبقى اسمه تغيير

أنت كده جبت جون وفي المقص كمان ... هو ده الحل وكلام فى سرك ده اللي أنا ناوي أعمله ... أن شاء الله هاروح أقضي كام يوم فى البحرين عند حشيش حبيبي ربنا يفك ضيقته ويرجعهولنا من جبال لبنان بالسلامه .

قلبي بيقولي : من ساعت يا واد يا س س ما حشيش عرف أنك هاترمي الهلب عليه كام يوم أنا ومانمان ، وهو قال ماليش دعوة بالمنتدى واللي فيه ده مش هاييجي من  وراه غير غرامة العزومة

لكن أنا بأوجه له النداء الأخير علشان يرجع وهو مطمئن : ماتخافش ياعم حشيش يابو الكرم كله .. أنا هاجيب كبستي ولحمتي معايا .

شارك هذه المشاركه


رابط المشاركه
شارك
الناس دي بقت تهرج ، انا متأكد إني أديتلهم الأسم صح وبالكامل .. لينوكس عبده لينوكس الشهير بلينو ( يظهر أنهم كانوا مشغولين بماتش مصر ومدغشقر )

لأ ... أنا اللى حظى كويس ... طيارتى وصلت فى نفس ميعاد طيارة القطب الشمالى و الصالة أتملت بطاريق ... تهت فى الزحمة

سمعك يا شق .. ما أنا الشهر اللى جاي إن شاء الله نازل للقراميط كلها ( أوعى تبلغ عني خليك جدع )

قراميط؟! أزاى بس؟؟ أنا حسب معلوماتى المكان اللى حايخدوك فيه مسموح فيه بعيش و حلاوة و صندوق دخان!! انما قراميط ... دى جديدة

______________________

لينكس أبو دومه لينكس

بحار وحدانى فى بحر قلزم

شارك هذه المشاركه


رابط المشاركه
شارك

سى السيد كتب :

هو ده الحل وكلام فى سرك ده اللي أنا ناوي أعمله ... أن شاء الله هاروح أقضي كام يوم فى البحرين عند حشيش حبيبي ربنا يفك ضيقته ويرجعهولنا من جبال لبنان بالسلامه .

يا عمى بلا كبسه بلا لحمه

احنا نخطف رجلنا و نروح له زياره فى ربوع لبنان

شارك هذه المشاركه


رابط المشاركه
شارك
بابا انا عاوزة ارجع اليابان تانى

حرام عليكوا . طب جاملونا أو أكذبوا علينا خلونا نقضي يومين حلوين فى مصر من نفسنا علشان نرجع للطحن من تاني.

ماحنا برضه مستنيتك لما تنزل و ترجع تكتب هنا انطباعاتك!

شارك هذه المشاركه


رابط المشاركه
شارك

أنطباعات مختلفة لدى بنتى عن مصـــر ... من زيارة السنه اللى قبل اللى فاتت:

- حفظت أعلان "توشيبا العربى"

- أخف دم دم المصريين

- مافيش أجمل من شرم الشيخ مع ولاد عمها و عماتها

- مصر احسن من أمريكا علشان مافيش نوم بدرى فى مصر و لا فيه واجب و كله بيدلع العيال

- بابا بيبقى مفرفش أكتر فى مصر

- خروجات و فسح على طول مع عائلات ماما و بابا

- أيه الحر ده؟

- أظرف مكان فى الدنيا هو خان الخليلى

- كان ها يغمى على لما شفت حمام محشى على السفرة

- أيه الحر ده؟

- أول مرة أعرف الم الوداع

______________________________________________

لينكس باتشان لينكس و ولده هاتلى الحصان يابويا

لواء اركان حرب عريف صول مجارى ترع سرس الريان العايمة

شارك هذه المشاركه


رابط المشاركه
شارك

مش عارف

بس ان افتكرت مقولة لتشارلز ديكنز ..

بيقول فيها

:

عندما نرجع الي بلادنا .. نعتقد ان كل شيء تغير .. بينما نكون نحن اكثر الاشياء التي تغيرت !!!

مش عارف .. ان بقالي تقريبا سنة ونص برة مصر . ومش عارف لما هارجع .. هاحس ان مصر اتغيرت ,, لاء ان انا اللي اتغيرت

شارك هذه المشاركه


رابط المشاركه
شارك

الأخ العزيز ابو خليل

أعتقد أننا بنكون أتغيرنا بس مصــر بتكون أتغيرت برضه.

العملية شبه نسبيه ... مصــر فى تغير مستمر: سواء من حيث المناخ، المبانى، الطرق، أخلاق الناس، الأسعار، التقاليع ... الخ

أحنا برضه فى تغير مستمر: سواء من حيث الشكل، السن، الطباع، الثقافة، الحساسية الزائدة و الرغبة فى أثبات لأنفسنا أن قرار الرحيل كان سليم ... الخ

بيحصل هنا أن الوافد من الخارج (المغترب) بيلاحظ بسرعة حاجات المصرى المقيم لايلاحظها لأنه "أتعود" عليها أو أن التغير جاء تدريجى. تصدق بالله ... شوف أنا كام مرة شفت فيلم "الأيدى الناعمة" ... حفظته من كتر ما شفته ... عمرى مثلا ما خدت بالى أن لما مريم فخر الدين و صلاح ذو الفقار كانوا بيأكلوا آيس كريم (جروبى) فى جنينة الحيوانات، أنهم رموا غطيان الكوبايات على الأرض!

مثال بسيط بس يبين لك قصدى.

أبتديت أخد بالى بعد ماعشت فترة فى الخارج حيث القاء المهملات فى الشارع جريمة يعاقب عليها القانون!

كمثال آخر، لما نزلت مصــر و شفت بنات بيشربوا شيشة فى أماكن عامة.

أنا بحاول على قد ما أقدر أنى أخد الكويس من الناحيتين ... معادلة صعبة بس مش مستحيلة لأن الناس هما هما مهما سافرت ... فيه الكويس و الوحش و أبن ........

_____________________________________________________

لينكس سبارس لينكس

متخصص جراحة الأكلان، حاصل على الزمالة من جامعة براغيتوا بجرجا

شارك هذه المشاركه


رابط المشاركه
شارك

حقيقةً ترددت كثيراً قبل أن أكتب إنطباعي عن زيارتي الأخيرة لمصر والتى كانت طويلة بالنسبة لي فقد مكثت شهراً بالتمام والكمال وسبب ترددي هو أن يكون هناك نوع من التحامل أو التجني مني على بلدي التى مازلت أحبها .

فقد عانيت الأمرين خلال هذا الشهر من زحام فظيع لا يطاق وفوضى عارمه فى الشارع وبشر لا يحترموا بعضهم البعض وأنعدم لديهم الحياء وكل شخص يفعل ما يحلو له وليذهب الآخرون إلى الجحيم ، فتجد هذا يرفع صوت الكاسيت لأعلى درجه وذلك يلقي بالقمامة فى الشارع وآخر يسير بسيارته عكس الأتجاه ويسب ويلعن الآخرين الذين يعترضون على ذلك ناهيك عن إنعدام الضمير عند معظم من تتعامل معهم فى المصالح الحكومية لكى تنهي أى معاملة لديك .

إضافة إلى فساد الذوق العام من أغاني هابطة وأفلام خليعة سواء في محتواها او حتى أسم الفيلم نفسه ، فتصوروا أنهم يعلنون عن أسم فيلم الآن فى السنيما يسمى " أوعى وشك " ......... !!!!!! فيه إسفاف أكثر من هذا ؟ إذن فماذا نتوقع من أطفالنا الصغار عندما يصل إلى مسامعهم هذه الألفاظ المسفه .

بإختصار .. " بلدنا الحبيبة مصر أصبحت دولة يحكمها سائقي ومافيا الميكروباصات حيث الفوضى والبلطجة وتجد كل شخص له قانونة الخاص الذي يمشي عليه فى ظل إنعدام التواجد الامني فى الشارع المصري .

شارك هذه المشاركه


رابط المشاركه
شارك

انا لسه راجع من يومان بس وبصراحة في مزايا ايضا خاصة اني ركبت مصر للطيران وافضل ما لاحظته هو الاستعانة بمضيفات من تايلاند بدل المصريات المتعاليات المتعجرفات وكمان وجدت في الطيارة اثنين من ضباط الجوازات لانهاء اجراءات السفر ودا كان شئ عظيم بالنسبة لي خاصة انني كنت متعقد جدا في الوقوف في طوابير الجوازات علشان اخذ ختم الدخول بعد ملئ البيانات وبصراحة كمان وانا راجع لاقيت ضابط الجوازات لم يعير اي اهتمام لتصريح العمل بتاعي كأنه واثق انه سليم او واثق من شخصي خاصة وانا راجع بالاضافة ان امناء الشرطة على مدخل المطار كانو عارفيني وبيرحبو بي ومش عارف هل انا مشهور عندهم كدا ؟؟؟ يمكن كنت بدربهم زمان مش عارف ولا يمكن لبسي وشكلي باين عليهم الكبتنه

ولكن الي غاظني فعلا تشيك موظفي شركة مصر للطيران على فيزة العودة للسعودية وهل هي سليمة ولا انتهت واخذ هذا التشيك اكثر من عشر مرات وكذلك تسبب في تأخير قيام الطيارة ساعة كاملة عن ميعادها وحتى داخل اطيارة قبل الاقلاع بدأو في التشيك بأسلوب الكمسارية حاجة تغيظ

وعند استعمالي حمامات المطار وجدت يافطة مكتوب عليها ممنوع الاكراميات فخرجت وكانت معي بنتي لان وقتها لانها مسافرة في نفس الوقت وقلت لها تروح الحمام على سبيل التجربة في كفتريا المطار ولكنها امرت بدفع خمسة جنية لان شكلها اجنبي وبعدها نزلت معاها واستريت طبعا الفلوس

اما عن الزحام في الاسكندرية وخاصة ميامي كانت مسار اعجاب شديد لابنتي لماذا المصريين لا ينامون فأضررت ان اكذب عليها وقلت لها ان الشعب المصري مقسم نفسه جزئين

قسم ينام في الليل ويعمل في النهار والقسم الاخر ينام في النهار ويعمل في الليل لتفادي الزحام الشديد وتقريبا اقتنعت !!!!!!!!

لكن موضوع الاغاني والصوت العالي كان نصيبة كبيرة لم يعالج الا بسدادات الاذن والحبوب المنومة

واليوم الوحيد الي ارتحنا فيه فعلا كان عند الاستاذ عادل ابوزيد في الساحل الشمالي في قرية الريفيرا ويظهر انا اقتنعت بضرورة وجود فيلا لي في الساحل الشمالي بعد هذه التجربة

حتى ولو قالو عليا اني من الحيطان الكبار

عموما الشهر عدا ولسه وداني بتزن والسمع ضعف جدا ومش عارف هذه الحالة ها تستمر ولا لأه ؟؟؟؟؟

شارك هذه المشاركه


رابط المشاركه
شارك

Join the conversation

You are posting as a guest. If you have an account, sign in now to post with your account.
Note: Your post will require moderator approval before it will be visible.

زوار
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


  • محاورات مشابهه

    • الى الاخوة مغتربين جده

      السلام عليكم حد يعرف فرع راجحى فجدة يكون موظفينه كويسين وسهلين فالتعامل ,, غلبت افتح حساب لازم خطاب تعريف مالكفيل ( صعب اجيبه حاليا ) وناس قالولى تلاكيك وخلاص وجرب فرع تانى!!!!!!! او حد رائيه بنك تانى افضل يكون عنده نفس المميزات ومنتشر زى الراجحى..

      في المغتربين المصريين - egyptian expatriates

    • ياريت حد عندة خبرة يفيدنا يا مغتربين يا محترمين

      هل يمكن عمل إستقدام بعد تغيير المهنه؟؟؟؟؟ سمعت أنه لايمكن عمل إستقدام لوجود المسمى الأصلى بالتأشيرة بجواز السفر هل الكلام دة صحيح ولا يوجد حل للموضوع دة وما هى البدايه والتكلفه لأم و3 أولاد برجااااء الإفادة يا إخوة الخير

      في المغتربين المصريين - egyptian expatriates

    • انطباعات مبدئية عن كتاب البرادعي الجديد عصر الخداع

      انتهيت للتو من قراءة مقدمة كتاب البرادعي الجديدعصرالخداع وهذا هو انطباعي المبدئي يبدأ الكتاب بمشهد في احد مطاعم بغداد بين البرادعي وهانز بليكس -مفتش الوكالة - لو تذكرونه - ومسئولين عراقيين احدهما مستشار صدام للشئون العلميه وهو عراقي يحمل الدكتوراه في الفيزياء ويتحدث الانجليزية كأهلها والاهم انه لم يكن عضوا في حزب البعث علي غير المعتاد في عراق صدام المهم ان ذلك المستشار كان واضحا جدا في كلامه مع البرادعي وبليكس قال بوضوح لهما ..كلاكما يعرف ان المشكلة ليست في حيازة الاسلحة النووية او محاول

      في سياسة دولية

    • بعيدون ولكن، برنامج عن مغتربين مصر

      السلام عليكم و رحمة الله و بركاته, شكراً جزيلا لكم على استضافتكم لي في هذا المنتدى الرائع. في الواقع, إن حبي لمصر و شغفي بها دفعني لأن أعد مشروع التخرج الخاص بي عنها خصيصا و بالأخص عن مغتربيها الذين عشت معهم و اختلطت بهم و أحببتهم, نعم, أنا لست مصرية. أنا فلسطينية مقيمة في دبي و أدرس الصحافة و الإعلام في الجامعة الأمريكية بدبي, و أنا على أبواب التخرج. و هذا شرح مبسط عن فكرة برنامجي الذي سأقوم ببدء بتصويره قريباً. برنامج اجتماعي سياسي ترفيهي عن المغتربين العرب و تطلعاتهم لأوطانهم الكثير منا

      في الإعلام المصرى

    • مغتربين فى الخليج ....مهاجرين فى كندا

      الواحد مننا شغال فى الخليج ...مرتب ظريف...بيت لطيف... عربية جديدة........و شوية فلوس تحويش كمان... طب اية اللى بيخلية يفكر يهاجر على كندا......و كمان يبقى بيمووت عليها و قلبو يهفهف كل ما تيجى سيرتها...حب حب يعنى يمكن: 1- عل رأى المثل It's always greener on the other side 2-الواحد عارف انو راجع راجع ...فنرجع على كندا احسن 3- فى مصر حياة من غير فلوس....فى الخليج فلوس من غير حياة 4- الواحد اتعود على شوية النظام و النضافة فى الخليج 5-عادى يعنى تغيير ....او زهق .... أخواننا اللى سبقونا ...و

      في الحياة و الهجرة إلى كندا life and immigration to Canada

×
×
  • اضف...