ملف عن اجراءات تأشيره العمل للسعوديه خطوه خطوه

[ozoozo 314]

انا وجدت ان في ناس كتير لايصه في موضوع اجراءات تاشيره العمل بتاعه السعوديه عشان كده هاعمل الملف ده خطوه خطوه (بالحونين يعني ) وكل يوم هاكتب اللي اقدر عليه

وياريت تدعولي ان تاشيرتي انا كمان تخلص عشان عندي شويه مشاكل:

1-بعد ما الكفيل يكلمك في التليفون انك اتقبلت ونجحت في المقابله يروح هو باعت جواب الوكاله علي مكتب السفريات الي بيتعامل معاه في مصر + العقد 0(القنصليه لا تتعامل مع افراد انما مع مكاتب التسفير المعتمده لديها فقط)

2-تروح المكتب وتمضي العقد وتاخده معاك عشان تروح التامينات تغير البطاقه بالمهنه اللي في العقد عشان لازم المهنه تطابق مع الجواز

3-تروح التامينات في شارع الالفي وتروح تامينات العاملين بالخارج وتدفع 80 دولار وتكون جايب معاك ورق بطاقه مستعجل من العباسيه ب75 جنيه(بتطلع بعد 3 ايام) عشان يتختم بس في مشكله هنا لو انت في شركه خاصه ومتأمن عليك لازم تطلع من التامينات بتاعتها ولو في الحكومه يبقي لازم اجازه.

4-بعد كده تاخد ورق البطاقه المختوم وتروح العباسيه وبعد3 ايام تاخد البطاقه الجديده مبروك يا نجم

5-تروح للجوازات اللي انت تبعها وتاخد صورتين خلفيه بيضاء ولو معاك الباسبور القديم تاخده عشان يتلغي وتطلع البازابورت المميكن الجديد بتاع البني أدمين وتدفع 110 جنيه وتاخده بعد يومين

6-في اليومين دول تروح الجامعه توثق الشهاده بتاعتك من امين عام الجامعه ولو انت طب او صيدله لازم الشهاده الكارتون غير كده ممكن المؤقته

7-بعد الجامعه تروح اي مكتب تصديق للخارجيه وتدفع 11 جنيه وتاخد الشهاده

8-غالبا هتلاقي المهنه لاتناسب المؤهل الدراسي بتاعك يبقي لازم شهاده خبره ودي تشوفلك اي حد معاه سجل تجاري وتاخده الشهر العقاري وتكون مظبط شهاده خبره بنفس المسمي الوظيفي ولازم يكون السجل متجدد وبعد كده تروح الخارجيه توثقها زي الشهاده. وفي خطوه كمان مكتب السفريات بيعملها في الحاله دي انه يجيب جواب من الكفيل انه عارف ان مؤهلك غير المهنه بس هو عايزك انت بالذات هما معاهم صيغه معروفه.

9-بعض المهن تحناج شهاده قياس مهاره ودي تروح مكتب العمل تعملها وغالبا المهن دي زي فني اي حاجه او عامل اي حاجه تحتاج مهاره زي ميكانيكي ومبيض..... الخ

10-اخ احنا نسينا الجواز زمانه اتحرق اوكي تروح الجوازات تاخد الباسبور وبعد كده تاخد الورق ده كله في زكيبه وتروح مكتب السفريات.

11-مكتب السفريات هايعملك تسجيل علي النت بتاع شركه التاشيرات الالكترونيه الجديده انجاز ويديلك الرقم

12-تاخد الرقم وتروح بيها معامل وزاره الصحه بشارع الشيخ ريحان (تنزل مخطه مترو السادات وتسأل هناك)عشان تحليل الفيروس وتدفع 120 جنيه وصورتين خلفيه بيضاء

13-بعد مايخدوا العينه هايدولك كارت تستلم بيه بعد 3 ايام وطبعا من غير ما اقول لازم تكون هناك الساعه 8 او 8.30 عشان تكون علي الساعه 10 او 11 مخلص بعد كده تطلع تتمشي من الوزاره الي شركه جامكا GAMCA في 6 شارعه عاءشه التيموريه بجاردن سيتي امام قسم قصر النيل هاتديهم الباسبور علي الباب وتقعد 10 دقايق وبعدين هايدولك جواب تحويل لمستشفي من خمس مستشفيات تبعهم

14-تاخد الجواب وتروح المستشفي اللي كاتبينها في الجواب وتروح المستشفي وتدفع 180 جنيه ويعملولك شويه تحاليل وكشف نظر وباطنه ويقلعوك البنطلون اي والله مش عارف ده كشف ايه وتاني يوم تيجي تاخد النتيجه وممكن تخليها مع نتيجه الفيروس عشان يبقي مشوار واحد

15-شوفت نسبنا ايه يامعلم ... الفيش تروح بصورتين خلفيه بيضاء تعمل فيش وتكتب فيه الغرض السفر للسعوديه

16-تجيب زكيبه تانيه غير الاولانيه اللي اتملت وتعبي بقيت الورق وتطلع علي مكتب السفريات وتديله 3صور خلفيه بيضاء

17-المكتب يقدم الورق للقنصليه يوم الاحد او التلات والتأشيره تاخدلها 10 ايام وبعد يومين من التقديم لو ما اترفضش الورق يبقي كده تمام.

[الي اللقاء في الجزء التاني ....... اجراءات ما بعد التأشيره[]

تم تعديل September 6, 2008 بواسطة ozoozo

[almasry 0]

أنا رحت شارع الألفي ( نقابة المهن العمالية ) وقالولي لازم تجيب استمارة 6 علشان نغيرلك المهنة ( المهنة عندي محاسب بشركة قطاع خاص ) ، واذا كنت مش عاوز تجيب استمارة 6 يبقى تروح تغير البطاقة لحاصل على بكالوريوس تجارة وبعدين تيجي نغيرهالك عامل وكده نتفادى موضوع استمارة 6.

ولما رحت لمكتب السفريات قالي اسرع حل ان السعودي يبعتلك عقد عامل (صوري) وتروح للسجل المدني يغيرلك المهنة بالبطاقة من غير وجع الدماغ ده كله .

[ahmedr 0]

الف شكر على المعلومات يا غالى وربنا يوفقك

[شريف حمدي 0]

غالبا هتلاقي المهنه لاتناسب المؤهل الدراسي بتاعك يبقي لازم شهاده خبره ودي تشوفلك اي حد معاه سجل تجاري وتاخده الشهر العقاري وتكون مظبط شهاده خبره بنفس المسمي الوظيفي ولازم يكون السجل متجدد

أولا أخي القدم لك الشكر علي موضوعك اللي المفروض يكون مثبت لانه هام جدا جدااااااااااا

بالنسبة لشهادة الخبرة مثلا هو لابد طبعا ان اللي يعمل لك شهادة خبرة تكون الشركة بتاعته بتشتغل في نفس المجال يعني لو هتطلع مثلا فني كمبيوتر يبقي لازم الشركة تكون شغالة في مجال الكمبيوتر صح ولا مش مهم؟؟؟؟؟

يعني مثلا انا كنت شغال في شركة شبكات مبيعات وطبعا تركيب شبكات وخطوط ممكن يطلعوا لي شهادة فني الكترونيات؟؟؟

ثانيا اشكرك جدا علي الايضاحات اللي انت قلتها لي في التليفون بجد حسيت انك عايز تفيدني بجد ومش بتزهق من كتر الاسئلة

انت قلت تحليل جامكا ده فيه كشف جديد اسمه قلع البنطلون ولم تقل ماذا بعد قلع البنطلون بيكشفوا علي اية يعني؟؟؟؟؟؟؟؟

السؤال المهم جداااااااااااااااااااا جداااااااااااااااااااااااااااااا

هو شهادة قياس المهارة اللي من القوي العاملة تغني عن شهادة الخبرة ؟؟؟؟؟؟؟ أم ليس لها أهمية طالما انت مؤهل عالي وكمان معاك شهادة خبرة

ولو حد يقدر مثلا يجيب لنا الصيغة بتاعه جواب الكفيل اللي هي بتتكلم عن الموافقة علي الشخص ومعرفة مؤهلة عشان ابعتها للراجل عشان يبعتها عشان انجز بسرعة كدة ان شاء الله

تحياتي لك ويا رب تخلص مشوار سفرك ده بسرعة

ياسر

تم تعديل September 7, 2008 بواسطة شريف حمدي

[ozoozo 314]

1-اعتقد ان شهاده الخبره دي بدعم موقفك مع قياس المهاره لكن لا اعلم تحديدا اذا كانت تنفع بدل شهاده الخبره ولا لا لكن اعتقادي الشخصي انك لازم تعملها وهابعاتلك رساله علي الخاص اقولك ازاي

2-كشف جامكا بيبص علي الجسم كله عشان يشوف اذا كنت عامل عمليات قبل كده ولا لا يعني بتقلع كده زي كشف الجيش.

3-الصيغه مش عندي بالظبط بس اعتقد اي صيغه تنفع طالما تؤدي المعني وهو ان الكفيل يريدك انت بالذات رغم علمه انك بكالوريوس كذا لكنك عندك خبره بمسمي الوظيفه ومكتب السفريات هايعرف احسن مني

[almasry 0]

يعني لو عامل عمليات حتترفض والا ايه ؟

[ozoozo 314]

لو عمليه ليها جرح قطعي واضح اعتقد بيعملو الاول سونار عشان يتاكدو انك مش شايل حاجه كلي مثلا وبعدين يأما يعدوك او يطلبوا ان الكفيل يبعت جواب انه عارف حالتك وموافق عليك واعتقد ان العمليات العاديه زي الزايده مفيهاش حاجه..... المهم المستشفيات دي بتحاول تشتغل الناس علي اد ماتقدر عشان تعمل فحوصات بفلوس تانيه

يعني لو نظرك ضعيف مثلا ومش لابس نضاره لازم تعمل كشف نضاره وتروح تعملها وتيجي تعيد الكشف بيها

[se_ Elsyed 1,725]

ما شاء الله

تسلم إيديكم يا ولاد

المنتدى بقى مليان اساتذه

كده أموت وانا مستريح وأطمئن إن باب المغتربين في إيد امينة

[ozoozo 314]

احنا تلامذتك ياريس

بس هانحتاج مساعدتك في الجزء الثالث ...... ما بعد السفر (من المطار ..لاستلام العمل ...لاستخراج الاقامه)

[ozoozo 314]

ياريت تدعولي يا جماعه ورقي هيخش السفاره يوم التلات ومنتظر اخدها المره دي

اعتقد تأشيره امربكا اسهل من تأشيره السعوديه دي

يارب ابقي مغترب يارب

[iloveegypt 7]

ربنا يوفقك الى ما فيه الخير

وفعلا موضوع اكثر من رائع

[شريف حمدي 0]

ان شاء الله نقول لك مبروك بإذن الله يوم الثلاثاء

لانك تستاهل كل خير فعلا

[almasry 0]

حد يعرف نمرة تليفون معمل جامكا علشان انا كلمت الدليل وماكنش موجود عنده

[ozoozo 314]

طب عيزها ليه يمكن اقدر اساعدك

[ozoozo 314]

ده رابط الجزء الثاني

http://www.egyptiantalks.org/invb/index.php?showtopic=65117

[شريف حمدي 0]

الف مبروك علي الـتأشيرة ياستاذ محمد الف مبروك

ادعي لنا احنا كمان نسافر وناخد الــتأشيرة بعد العيد لان السفارة اعتقد انها قفلت اليومين دول

[غريب الخبر 1]

لو سمحت يا استاذ محمد كنت عايز اعرف لو انا معايابكالوريوس وشغال فى الخكومة واخدت اجازة ودلوقتى شغال بقالى سنة فى السعودية وعايز ارجع اغير المهنة فى مصر لانى جبت فيزا تانية (كهربائى) ولو سمحت عايز اعرف اعمل ايه خطوة خطوة وهتاخد وقت قد ايه؟

وجزاك الله خيرا

[ozoozo 314]

اولا انت هاتقدر تجيب خطاب عدم ممانعه من الكفيل السابق ولا لا عشان تقدر تخش المملكه تاني؟؟؟

ثانبا الحته دي لعبه سين سين هايفيدك اكتر مني انا ممكن اقولك تعمل ايه في مصر لكن جوه السعوديه هو ادري

[غريب الخبر 1]

مفيش مشكلة يا محمد باشا فى خطاب عدم الممانعة واخلاء الطرف لكن انا بسال حضرتك بخصوص تغيير المهنة لانى بصراحة مفهمتش الجزء الاول بتاع حضرتك كويس وبالذات تغيير المهنة يا رات بس توضيح النقطة بتاعت تغيير المهنة

[عمرعمرعمر 0]

استاذي العزيز

انا اسف علي المداخلة

احب اسالك سؤال ضروري

انا اعمل طبيبا و احتاج شهادة خبرة من مستشفي خاصة في مصر او السعودية مدتها حوالي سنة و نصف طبعا مضروبة

لانها هتفرق معايا كتير في الراتب يعني زيادة الراتب متوقفه عليها

علما بانني اعمل اخصائي مختبر و حاصل علي الماجستير 2005

فياريت حضرتك تدلني ازاي اعملها و لو عملتها ازاي اوثقها من الشهر العقاري يعني هل لازم صاحب المستشفي يروح معايا و لا هاخد معايا اوراق بس او زي ما حضرتك قلت اي واحد معاه سجل تجاري

علما بانني مستعد اني اسلك اموري باي طريقة بس المهم الشهادة تييجي

و برضة احب اعرف الناس ان انا مش باخد حق مش حقي و لكنني فعلا مفروض معايا خبرة 3 سنين بعد الماجستير و لكن وزارة الصحة لغوا الاعتراف بالخبرة في المستوصفات الخاصة زي اللي انا شغال فيه للسنة الثالثة

و شكرا