حوارات لا ننساها

[shahd]

ي: نفسي اتمشى دلوقتي والدنيا بتمطر

م: يلا بينا نتمشى سوى

ي: عايزة اتمشى لوحدي ..

م: عشان يقولوا عليكي مجنونة

ي: عايزة أتمشى من غير ما يكون في الشارع أي بني ادم

[لولا]

المكان الحرم المكى بمكه.

لسه داخله من باب الحرم متوجهه نحيه الكعبه.

احد الرجال الملتحيين : استغفر الله العظيم ، أستغفر الله العظيم!

إتقى الله ، اتقى الله !!

-انا : مذهوله تماما ، وبقيت ابص فى الراجل وفى جوزى !

-الرجل الملتحى : وكمان كاشفه لوجهك .. الا تخافين الله ؟

-جوزى : اتقى الله انت وامشي من قصادى ، أقسم بالله لولا احترامى

لبيت الله ، مش ليك ، انا كنت عرفت ارد على اسلوبك دا وكلامك.

انا: خلاص مفيش داعى ترد عليه اصلا .

جوزى:استغفر الله عظيم .. طب بتعيطى ليه ؟

انا:مش عارفه .. حاسه انه جرحنى قوى وفى بيت ربنا

وكمان بصلى زى ما اكون وحده فاجره .

انا:هو انا عشان دخلت الحرم كاشفه وشي ابقى فاجره فى نظر سعادته؟

ابقى فتنه ؟ وهو اصلا جاى الحرم يصلى ويطوف ويعمل عمره ولا جاى يفتتن

بالبنات والستات الى جايه تتعبد وكلهم احتشام؟

ومين قال اصلا ان تغطيه الوش دى واجب من اساسه؟

جوزى:انت حتحطى دماغك بدماغ الناس دى ، ربنا يهديه خلاص.

[السويفي]

]الصديقه: ممكن اسألك سؤال بس تجاوبني عليه بصراحه

الصديق:اسألي يا ستي

الصديقه: هو انا حلوه

الصديق: phn: bv:- :P :wub: لا تعليق

[لولا]

-هو: انتى بقيتى يائسه خالص ! فين التفاءل بتاعك ؟

- هى : يأس .. تفاءل ! يعنى ايه ؟ ايه الفرق ؟ فى اختلاف فى الطعم !

-هو:انتى مكنتيش كده .. انتى اللى كنتى بتدينى الأمل

-هى :الأمل دا بيكون ليه هدف .. ايه الهدف ؟ معنديش هدف .. معنديش حاجه.

هو: حاله اكتئاب دى ؟!

-هى : يعنى ايه اكتئاب ؟ شيء برضه مضاد لكلمه تانيه.. تكمله يأس وتفاءل !

مسلسل شويه متضادات . مش حاسس ان طبيعى المعانى تختلط كلها عندى

مش حاسس ان كل شيء حولينا مالوش معنى .. باهت .. او يمكن مالوش لون

اصلا.

-هو:احنا اللى بنحدد نشوف الحياه ازاى ، لما بنفرح بنشوفها حلوه ، ولما

بنتكئب بنشوفها من غير لون .

-هى :طيب لما نبقى مش شايفين الحياه اصلا ، يبقى دا ايه !!!

[لولا]

-هو: عادل صعبان عليا قوى ، حالته مع شرين تصعب على الكافر.

هى:ليه بتقول كده ، هما مش بيحبوا بعض

-هو: فعلا بيحبوا بعض ، بس كل واحد بطريقته .. هو بيحبها بالطول ،وهى بتحبه بالعرض

وعمرهم كدا ما حيتقابلو.

هى:بس شرين قالتلى انها بتحبه.

هو:يابنتى دى بتعامله بمنتهى البرود، يوصلها لغايه البيت ويستناها تطلع وتشاوره من البلكونه

...وتطلع وتغير هدومها ولا حتى تعبره لا ببصه من البلكونه ولا برنه موبايل.!!

-هى:نو واى معقوله . طب هو بيعمل ايه؟

-هو:ولا حاجه ! بيحبها. كبيره لما بنروحله شقته

نلاقيه متجنن ساعات وعمال يشتم فيها!

-هى: عارف بيشتم ليه ؟ انا فهمت خلاص.

-هو:ليه يا فيلسوفه؟

-هى:عشان لما بيصرخ بيحس انه كده بيثور، بيثور على حبه ليها الى بتقابله بالبرود دا

.. فكر كده ايه اللى يخليه يصرخ ويشتمها وهى مش قصاده؟

كل حاجه جواه كانت بتسرخ ، بيثور على قلبه.. فبيصرخ.. مجرد صوت ،يدوى فى الفراااااااغ!!

[لولا]

-هى: اهلى وحشونى قوى

-هو : طب كلميهم يا حبيبتى

-هى: مقدرش

-هو:ليه

-هى:عشان وحشونى قوى

-هو:لغز دا

-هى: مش لغز..عجز! تفتكر لما اسمع صوتهم هعرف اتكلم

هعرف اقولهم انا كويسه خالص ،انا مبسوطه محدش يقلق عليا.

-هو:معليش حاولى تتكلمى عادى عشان محدش يقلق عليكى

-هى:ومين قالك انى مش بتكلم عادى فى كل مره .. مين قالك

انى مش بقتل كل حاجه جوايا قبل ما ارفع السماعه عشان

عارفه كويس ان بابا يقدر يشوفنى ويحسنى حتى لو كانت

بينا بس سماعه.

نفسي مبقاش كبيره .. عايزه ابقى طفله زى زمان..عايزه

اعيط فبابا يسكتنى وماما تحضنى.. خلاص مش عايزه ابقى كبيره!

[galaxy]

حوار بين زميله مع خطيبها..........كانوا مخطوبين عن حب :closedeyes:

هي.......يعني ايه مش فاهمه.......ازاي بتحبني وازاي محدش يقدر يساعدك علي الخروج من ازمتك ولا حتي انا؟

هو.............انا بس اللي اقدر اعدي البوابه دي...........انا لسه ما خرجتش.........بس لو عايز اخرج وانساكي ..........هخرج.

هي....ياااه كل دا جواك مني.......حاسه بتعب .....عايزة اروح .......

هو .............هاتي ايدك .........وتعالي هوصلك

هي ............لا انا عارفه السكه............

هو.............يصعب عليا تمشي وانتي كدا ...........

هي .....معلش...........عايزة اتعود بقي اني امشي لوحدي.........

وانتهت الخطوبه......... :closedeyes:

.

[galaxy]

العروسه..... مش عارفه يا ماما مش مرتاحه ........

الام.........طب ليه ............اديني مبرر

العروسه.......كلام كتير بيتغير...........مش بحب الراجل اللي بيغير كلامه....

الام........طب ما تشوفي تاني

العروسه.........لا ...........دا مبدأ.......

[galaxy]

البنت.............وحضرتك بتقضي يومك ازاي

العريس.......انا بصحي سته ونص اكون في العربيه في طريقي كدا سبعه بالظبط

البنت.........يعني يا دوب تفطر وتصلي الفجر وتنزل

العريس........لا بصلي في الموقع بقي لما بفتكر

البنت..........تفتكر؟

العريس...........يعني علي تسعه ...تسعه ونص

البنت............بس دا اسمه صلاه الضحي

العريس.........لا اصل انا مش بحب الكذب ابدا ومش بحب اتظاهر بحاجه مش بعملها.............الا الكذب

العريس............بس انا عصبي شويتين

البنت.............بجد؟؟

العريس..............اوي ............انا اترفدت من شركتين قبل كدا بسبب العصبيه

البنت.........ليه كدا؟؟

العريس............ابدا يا ستي اصل اتنرفزت وضربت المدير........

البنت.......... :closedeyes: :closedeyes: :closedeyes:

[galaxy]

انا.............. انتي زعلانه ليه عشان فشلتي يعني؟مش مطلوب منك انك تكوني ناجحه علي طول.

اعز صديقاتي..............انا كدا ضاعت سنه من عمري.دا غير اللي خسرته..انا تعبانه اوي ..الم ويأس فظيع

انا............ اي فشل بعده نجاح..ويمكن يكون الفشل دا هو سبب النجاح بعد كدا ..ولما هتبصي وراكي وقتها هتكوني مدينه للحظه دي بكل النجاح.....

تم تعديل 15 أغسطس 2008 بواسطة galaxy

[galaxy]

الجده............كل يا حبيبي مش كده........عشان تكبر....شايف وشك بقي عامل ازاي هتبقي مش حلو كدا

الحفيد............مش حلو ازاي يا انا......مش انتي قلتيلي اني انا شكلك؟؟

[لولا]

-هو: مش عايزه نخرج ؟

-هى:مليش نفس

-هو:بقالك اكتر من شهر عل الحال دا .. تعالى نروح نتعشي بره

-هى:مليش نفس

-هو:طب تحبى نكلم احمد ومراته يجو يزورنا

-هى:مليش نفس

-هو:طب تيجى نروح (مكتبه جرير) فى كتب جديده حلوه نزلت نشترى كام كتاب

-هى:مليش نفس!!

-هو:طب مبقتيش تتابعى المسلسل التركى اياه ليه ؟

-هى:مابقاليش نفس !

-هو: انا عرف انك جواك حاجات كتير ومخنوقه من الملل والروتين والصيف هنا

بس بجد انتى كده بتقلقينى عليكى.حتى شغلك مبقتيش تجيبى سيرته.

طب عامله فيه ايه ؟ كلمينى عنه ؟

-هى : مليش نفس اتكلم عنه !

-هو: طب خلاص روحى اقعدى عل المنتدى بتاعك .

-هى : مهو دا اللى حعمله !!!!!!!!!!!!!!

[moheltohamy]

د. الشامي...

دانتا عندك علي ده حتت سكّرة

وانتو اللي مش مقدرين ، الراجل مش لاقي الساعة! ويا ريت حد حاسس بالمأساة الإنسانية اللي هوه فيها! لكن هنقول إيه... الدنيا تلاهي!

أنا ضحكت ضحك ع الرد بتاعه ده... بصراحة ؛ ده اللي يصبّرك ع العيشة (حتى لو كانت في مصر!)

لولا...

أنا رأيي تروحي تفتحيلك قهوة لوحدك! إنتي بقيتي معلّمة وصاحبة كار!

وانا اللي كنت شايف نفسي باضيع بسبب المنتدى ده! دانا لا عيّان ولا شفت العيا ، مقارنتن بيكي

وبيتهيألي طالما جيت هنا ، يبقى لازم كباية الشاي اللي كنتي بتقولي لمهيب عليها ، قبل ما تشتغلي صبي ف الأهوة عنده ، أيام ما كنتي صبي في أهوة حسام...

أيام تانية طب...

رحت أنا والشلة بتاعتي نعتكف ليلة 27 رمضان في الجمعية الشرعية...

أفوجأ إن شريف (واد صايع من دفعتنا بس دخل تجارة - وحشيش وبانجو وحريم) ، معتكف برضه معانا!

أنا اتفقعت بصراحة... بقى ده اللي ما سابش حاجة ما عملهاش ، هيتساوى بينا اللي أقصى قلة أدب إننا بنبص ع البنات ونحلم بيهم (الأولى لك والثانية عليك)!

ورحت كلّمت الإمام بتاعنا - راجل من فئة المعتدلين - الشيخ عمر الشرقاوي:

- بقى ينفع حضرتك لو طلعت دي ليلة القدر ، نتساوي بواحد عمل كل بلاوي الدنيا كلها؟

- يا سيدي وانتا مالك... هوه انتا دافع له حاجة من جيبك؟!!

[لولا]

-هى : شفت تهامى بيقول عليا ايه فى الموضوع بتاع الحوارات

-هو : تهامى مين ؟

-هى:دكتور تهامى بتاعى كنداااااااااااااااااا

-هو: ايوه عرفته .. انتى محسسانى ان الناس دى زى ما يكونوا الجيران مثلا!!

-هو : بيقول ايه بقى ؟

-هى : بيقول عليا عيانه بالمنتدى .. وياريت كده وخلاص ، دا بيقولى انى سبت قهوه

حسام وانى كنت صبى قهوجى هنا ودلوقت غيرت القهوه لهنا

.. تخيل بيقول كده وانا اللى كنت شريكه فيها على راى حسام الله يذكره بالخير

-هو : بصى يا بنتى .. انتى حتاخدى على كلام تهامى .. ما انتى عارفه دا راجل

شغال فى البحر وفى بريمه يعنى ربنا يكون فى عونه ..الناس دى من كتر عزلتها

وابتعادها عن الناس بيبقى كلامها كده دبش شويه :blink:

بس اكيد مش قصده اذا كان هو نفسه فاتح قهوه هناك فى توبيك كندا وشغال خدمه

على الزباين :blink:

-هى : والله ليك حق .. انا حروح اقوله اللى بيته من قزاز ميحدفش الناس بالطوب :closedeyes:

-هو: وانت فكره حيسكت .. دا لسانه متبرى منه :blush2:

-هى : انت حتقولى ما انا عارفه ..اول حاجه حينط يقولى انا على الأقل بخدم فى القهوه

بتاعتى مش عند الناس.

بس انا طبعا مش حسكت حرد عليه وأقوله.. قهوه ايه يا بو قهوه..القهاوى هنا ملك الحكومه

ولا انت عشان حاطط اسمك على الباب سدقت نفسك . :closedeyes:

[shahd]

طالبة في سادسة ابتدائي في طابور المدرسة

الأبلة: واقفة هنا ليه يا حبيتبي

الطالبة: امال اروح فين يا ابلة؟؟

الأبلة: روحي على فصلك اولى ابتدائي

الطالبة: بس ده فصلي ياابلة انا في سادس

الأبلة: انا اسفة يا حبيبتي

الطالبة: :aslam: :bro:

نفس الحوار يتكرر مع نفس الطالبة و ابلة ثانية

تم تعديل 18 أغسطس 2008 بواسطة شهد

[عصام]

إبنى (كان عمره 3 سنين) وهو يشير إلى رجله خلف ركبته اليمنى ويتألم: بابى إلحقنى

أنا: مالك يا يوسف؟

يوسف: الحتة دى بتوجعنى أوى

أنا: إسمها إيه الحتة دى؟

يوسف (بعد تفكير): باط رجلى !!

[لولا]

-هو: أكيد وحشِك النيل والشتا فى مصر ؟

-هى: النيل ..

ياااه ساعات بحس انى نفسي اشم ريحته.. واسمع صوته بالليل .. نفسي بس اسرح فيه.

النيل دا منى ..النيل دا مش شويه ميه صدقنى .

النيل دا بيجرى جوه كل مصرى ..حاجه كده مع الدم..تحس فيه روح مصر كلها،دمها،كيانها.

والشتا .. أكيد بتشتاق للشتا فى مصر.. بشتاق لروحى نفسها البردانه وسط الشتا هناك.

مصر كلها وحشتنى .. بلدى كلها وحشتنى .. مصر مفيش حاجه ممكن تكون زيها فى الإحساس

احلى حاجه فى مصر ان فيها روح.. روح محدش يحس بيها الا اللى يعيش بعيد عنها.

[Scorpion]

- والا يا أحمد ... احنا نعرف بعض من امتي

- ينظر الي باستعجاب .... ماااالك ؟؟

- ماليش .. انا بسألك بجد ... احنا نعرف بعض من امتي

- ايه الأسئلة الغبية دي .. ما انت عارف اجابتها .. من ايام ابتدائي ..

- طب بجد يا أحمد ... عمرك ما فكرت انك مصاحب واحد كافر

- نظرة مذهولة .. يعقبها صمت

- ما ترد ياللاه

- ايوه .. بس مش كافر كافر ... يعني مش الكافر اللي الناس بتفكر فيه ... نوع كده من الكفر اللي ما بيأذيش

- هو فيه كافر بيأذي و كافر لأ ... هو ايه الأستهبال ده ... ما تتكلم و انت لسانك مبرد من ساعت ما عرفتك ... يعني لما حاموت ليا و الا مالياش جنة ...

- يا ابني احنا لو سمعنا لكل واحد حلاقي نفسي برمي عليك يمين الطلاق ...

[لولا]

سؤال الفتوى مختصر : هل يجوز كتابة هههههه أو وضع وجهه ضاحك ؟

سؤال الفتوى : يحدث كثيرا في المنتديات عند الردود أن يكتب العضو أو العضوة تعبيرا عن الضحك ( هههههه ) أو يضع وجهه ضاحك فما الحكم إذا كان ذلك بين النساء ولكن ممكن أن يقرأه الرجال ؟ وما الحكم إذا كان بين عضو وعضوة ؟

جواب الفتوى

الحمد لله والصلاة والسلام على رسول الله وعلى آله وصحبه أجمعين

وبعد :

أما بالنسبة لكتابة هذه الكلمة أو وضع وجه مبتسم فليس فيه شيء

أما حدوث ذلك بين رجل وامرأة فهذا باب شر ويدخل في فتنة النساء التي نهى النبي صلى الله عليه وسلم عنها بقوله إياكم والدخول على النساء

وعليه يمنع بين الرجال والنساء لما يترتب عليه من المفسدة

حوار منقول عن منقول :sad:

واظنه من الحوارات التى لايمكن ان تنسي wst::

تم تعديل 22 أغسطس 2008 بواسطة لولا

[مصرى لم يندثر أثره]

حوار دار من سنوات تليفونيا مع أمى الله يرحمها

أنا محاولا جاهدا أن أخفى نبرات صوتى المشحون بمشاكل خنقتنى: ألو يا ماما....ازيك و ازاى صحتك ؟

أمى: مالك يا حبيبى ؟ مال صوتك ؟

أنا و قد عقد لسانى الذهول من قدرتها على قراءة ما بى: أبدا يا ماما بس حبيت أطمن عليكى

أمى: ما تحاولش أنا عارفاك كويس ....أحكيلى ايه فيك...أيه اللى مزعلك

أنا و قد خنقتنى العبرات: انتى عارفة يا ماما أوقات كتير بأكون بس عاوز أسمع صوتك....بيدينى شىء من الاطمئنان ان لسه فيه حد بيحب لى الخير....دون مقابل..

أمى: انت عارف انك روحى و حياتى....أوعى تخلى حاجة تزعلك فى غربتك....

الأن تذكرت المقولة شديدة الصدق: "اذا ماتت الأم نادى منادى فى السماء: أيها الانسان ذهبت التى كنت ترحم من أجلها"

الله يرحمك يا أمى

ما إن قرأت عباراتك حتى رغرغت عيناى بالدموع

لقد ذكرتنى بالحب بدون مقابل بالحب الذى تدون فيه الدوواين ولاتستطيع ان تصف قطره من سيله المنهمر .........لا استطيع التعليق بأكثر من ذلك الان

رحم الله والدتك ووالدتى وحميع المسلمين ............ امين

تم تعديل 26 أغسطس 2008 بواسطة مصرى لم يندثر أثره