900 جنيه خلو رجل

[Scorpion]

هناك موضوع أود أن اناقشه معكم ... و مدخلي اليه سيكون هذا المبلغ الذي وضعته كعنوان (مؤقت).... فحتي أكون محايدآ أريد أن أعرف ...

مبلغ 900 جنيه سنة 1971/ 1972 كم يساوي الآن سنة 2008 ؟؟

[bentmasria]

يا مواضيعك يا سكوب أقولك انا عربية ابويا الله يرحمه الباسات ال 2000 سى سى موديل 72 كان تمنها ال 900 جنيه اللى بتحكى عليهم زيرو ودلوقتى الباسات ال 1600 سىسى واللى مافيهاش ربع الصاج اللى فات وموش المانى تمنها 225000 جنيه وموش بكل الكماليات وبحسبة بسيطة يبقى 250 ضعف بس ده لو حسبنا بالقيمة الشرائية وحسبتى على ادى بس رسالتك وصلت لان المرسيدس ام 750000 كان تمنها وقتها 2500 جنيه مصرى ولما غليت سنة 82 بقت تخيل بعشرة الاف جنيه بحالهم تقريبا تلت ثمن عمارة فى شارع شريف ايامهاشفت بقى بقينا فين

البنت المصرية

[MZohairy]

كان عندنا شغاله مقيمه سنة 72 بتاخد 3 جنيه في الشهر

متهيألي حاليا مش حتاخد اقل من 900

يعني 300 ضعف

يعني ال 900 دلوقتي كأنهم 27000 جنيه تقريبا

و لو عايز الصح شوف سعر الدهب وقتها و اعمل مقارنه

[Scorpion]

بس يا زهيري يا حبيبي 300 ضعف يعملوا 270.000 جنيه .. مش 27.000 .. أعتقد ان فيه صفر طار منك ....

عالعموم تحليلك وصل بالمتوسط الي 300 ضعف

و العزيزة البنت المصرية متوسط تحليلها كان تقريبآ 250 ضعف

و لو أخدنا متوسط تحليلكم انتم الأتنين يديني 275 ضعف ...

نقدر نشتغل علي المتوسط ده و الا فيه حد من الأخوة الزملاء له رأي آخر ....

آديني أهه ... مستني بال 

و أول ما حيكون عندنا رقم ثابت حنشتغل ....

[أبو محمد]

هناك موضوع أود أن اناقشه معكم ... و مدخلي اليه سيكون هذا المبلغ الذي وضعته كعنوان (مؤقت).... فحتي أكون محايدآ أريد أن أعرف ...

مبلغ 900 جنيه سنة 1971/ 1972 كم يساوي الآن سنة 2008 ؟؟

كان جرام الدهب عيار 21 فى الوقت ده بحوالى جنيه واحد ... وزى انت ما تعبتنى بموضوعك ده ... حسيبك تتعب وتجيب سعره اليومين دول وتقول لى مرتب الحكومة للخريج الجديد أيامها واللى كان 20 جنيه يساوى كام دلوقت :closedeyes::sad:

[Scorpion]

بعد بحث سريع يا ابو محمد لقيت ان متوسط سعر الجرام للدهب عيار 21 ... 140 جنيه

و بناء عليه متوسط الزيادة يكون 140 ضعف

بس ده فرق كبير بينه و بين المتوسط اللي وصلناله من شوية .. تقريبآ الدوبل .... معقول مافيش طريقة رياضية سليمة تخلينا نقدر نحسبها صح ....

يا محاسبين المحاورات و بانكيراهاتها ... ما تدلدلوا جردلكم في الموضوع ده ...

[Simba]

شوف يا سيدي

انا ابويا في السبيعينات اشتري ارض بيتنا المتر بجنيه وربع واشتري في نفس الشارع ارض لية انا واخويا بنفس التمن وقال لما نكبر كل واحد يبنيها بس اول ما جاله في المتر تلاتة جنيه هاص وزقطط وباعها وبني لنا شقتين في البيت

ليت الزمان يعود يوما

[حسام يوسف]

بحييك يا سكوب ع الموضوع

ولونة هيرفع الضغط برضة

انابحب اعمل حاجة عشان اعرف الفلوس دى تعمل اية دلوقتى

اقارنة بسعر الدهب وقتها

وتفضل الفاضل ابو محمد وقالها قبلى

والحاجة التانية

اللحمة

بس شوف بقى سعرها كان كام

انا مواليد 74مش هعرف افيدكم

احسبهالنا وقول

لأنى حاسس انها هتدى رقم مهول

[Alshiekh]

متوسط سعر الذهب كان 90 قرش ، ( 87 قرشا أو 78 قرشا ، الارقام مش مجمعة كويس ! ) وحاليا 14000 قرش يبقى حوالى 160 ضعفا ،

طيب ليه النسبة لم تظهر بنفس المعدل ؟ لان سنة 1971 الرزاز اللى اخترع ضريبة المبيعات ماكانش اشتغل وزير بعد ، كان لسه غفير ، فلو خصمنا ضريبة المبيعات من الفرق الحالى سنجد انها تقريبا الـ 160% لأن ضريبة المبيعات والتى تقع عليها الزيادة الرهيبة فى اسعار المستورد لانها تفرض على السعر الكلى بعد اضافة الجمارك

والسؤال المهم ، هل يمكن تطبيق هذه النسبة على كل السلع؟

أشك انها تصلح حتى على المواد الغذائية الرخيصة كالفول والطعمية مثلا.

[somayasaleh]

في الوقت ده انا كنت صغيرة

بس افتكر لما والدي اشتري ارض مدينة نصر وكانت صحراء جرداء والعائلة كلها ضحكت علينا

الارض الناصية اللي بعد رابعة العدويه يعني في مكان رائع وعلي ناصيتين :closedeyes:

كانت 500 متر ودفع فيها 1500 حنيه كاش؟

وبعها سنة 1988 بمائه وتلاتين الف 130000L.E

احسبوا انتوا بقه؟؟؟؟؟ :roseop: wst::

[أسد]

في عام 1972 تقريباً .. سمعت والدي وصديقه يتحدثان أثناء زيارتنا لصديق والدي والذي بنى عمارة حديثً عبارة عن خمسة طوابق وبها عشرون شقة .. وكان يحكي لوالدي أن تلك العمارة كلفته 10000 جنيه .. عشرة آلاف جنيه .. مش عارف ده بما فيه سعر الأرض أم المباني فقط ..

ولكن على أية حال ..

يعني 900 جنيه يبنوا لك شقتين مساحة 100 متر على الأقل .. للشقة الواحدة .. في هذا الوقت ..

يعني قول بأسعار اليومين دول .. 400.000 جنيه ..

صباح الفل

[طه بدر]

شوف يا سيدى

سنة 70 وحتى 73 كان الجنيه المصرى بيجيب 5 ريال سعودى يعنى 900 جنيه كانوا يجيبوا 4500 ريال

الان الريال بحوالى جنيه ونصف _ تقريبا علشان نسهل الحساب_ يعنى 4500 فى 1.5 يعملوا 6750

واحسبها سعادتك بقى

فى مسرحية السكرتير الفنى لفواد المهندس قاله له نظيم شعرواى ان مرتبه سيكون 30 جنيه مصرى

فرد فواد المعندس بكل لهفة

انشاء الله سعودى ؟؟؟؟؟؟؟؟؟؟؟؟؟؟؟؟؟؟؟؟؟؟

دول ثلاثين جنيه

تحياتى

[ahmedarab]

موضوع جميل استاذ سكوربيون ..ولو انة على راى اخويا الدكتور حسام هايرفع الضغط برضة ...

من الواضح ان المشكلة مش في المقارنات .... المشكلة فى إختيار المقارنة السليمة ... لان بالشكل دة حضرتك هتلاقى زيادة فى القيمة تترواح من حوالى 7 أضعاف (بمقارنة سعر صرف الريال) ... وحتى 300 ضعف ؟؟؟؟

انا فى رايى المتواضع أعتقد ان افضل طريقة للمقارنة هى الخاصة بأسعار الدهب ...يعنى فى حدود 140 - 150 ضعف

عموما لو فية حد عندة طريقة اكيدة .... وأضمن من الدهب للمقارنة يا ريت يفيدنا بيها

تحياتى

تم تعديل 14 يوليو 2008 بواسطة ahmedarab

[MZohairy]

الدهب اكثر الوسائل منطقيه

واعتقد اللحمه كمان ممكن تدي معيار

كانت بحوالي 40 قرش او اقل

دلوقتي ب 40 جنيه او اكثر

[مهيب]

ملاحظة بسيطة ..

سكورب العزيز حدد المبلغ بـ900 جنيه .. بالرغم من ان السؤال المنطقى الجنيه فى السبعينات بكام جنيه دلوقتى .. ايه يا سكوب؟؟ هو كان فى حد سالف منك المبلغ ده بالتحديد فى السبعينات .. و ضارب عليه لحد دلوقتى :D ؟؟ على العموم احتمال برضه .. بالرغم انه واضح من كلام الأفاضل و حساباتهم ان لو كان معاك المبلغ ده فى السبعينات .. كان زمانك دلوقتى ملك الحديد مثلا و تبقى سكوربيون عز .. و لا كان زمان سكوربيون ساويرس .. حاجة كده يعنى :pasha: .

مهيب

[محمد عبدالعزيز]

أتفق مع الرأى القائل بأن الذهب أكثر الوسائل دقة للمقارنة.

المبانى والأراضى والسيارات والغذاء تصعب المقارنة بها نظراً لوجود عوامل كثيرة تحدد السعر غير القيمة الحقيقية للسلع.

على سبيل المثال, أسعار الأراضى الآن مبالغ فيها جداً, وكذلك المبانى, وأسباب ذلك كثيرة ومنها زيادة الطلب بشكل مبالغ فيه وزيادة الاتجاة للاستثمار فى العقارات وبالتأكيد السعر الحالى لا يمثل القيمة الحقيقية للأرض أو المبانى.

سبب آخر يدعم اتخاذ الذهب كمعيار وهو تحديد نصاب زكاة المال فى الإسلام بمقدار ثابت من الذهب وهو فى حدود 85 جرام من الذهب الخالص, والسبب فى ذلك هو أن الذهب الأقرب إلى الثبات من غيره.

[حسام يوسف]

الف شكر يا عم زهيرى على معلومة اللحمة

التى اراها المقياس الاقرب لمدى تناسب الاجور والاسعار

تم تعديل 14 يوليو 2008 بواسطة حسام يوسف

[Scorpion]

أشكر الجميع بالفعل علي ردودهم ... و تعديل واجب بعد أن صحح لي الوالد المعلومة .. المبلغ كان 600 جنيه فقط و ليس 900 ....

حسنآ .. حتي لا ندخل في متاهات و يطول الموضوع دون أن أبدي سببه الرئيسي ... فمن الواضح انه من الصعوبة تحديد نسبة دقيقة .. و لكن لأن الرد علي سؤالي هو اساس هذا الموضوع .. فسوف الجأ الي متوسط الأسعار التي تم طرحها حتي الآن ...

متوسط المجموعة الأولي ( لحزمة معينة من الأسعار تضم السلع المعمرة ) : 255 ضعف

متوسط المجموعة الثانية ( لحزمة أخري و تضم الذهب ) : 145 ضعف

و بأخذ متوسطهم يكون المتوسط النهائي حوالي 200 ضعف ( و هي نسبة ليست دقيقة 100 % ) و لكنها نوعآ ما هي الأقرب الي الواقع ..

الموضوع المطروح للنقاش سادتي الأفاضل يدور حول ايجارات الشقق القديمة ...

فلطالما قرأت (متعاطفآ) مع أصحاب عقارات .... أصحاب ملك .... يشتكون من تواضع العوائد في زمن تضاعفت فيه الأسعار 200 مرة مثلما توصلنا .... اضع نفسي مكان صاحب بيت به 10 شقق مثلآ و في نهاية الشهر يكون متوسط ما دخل جيبه 50 / 60 جنيه ...

و أشعر بالظلم ...

و في نفس الوقت اضع نفسي مكان مؤجر الشقة ....و سأجعل من أبي العزيز مثال حتي لا يكون الكلام بدون امثلة محددة ...

الوضع هكذا :

اوائل السبعينات

شقة واسعة ... (بِرحة) في حي شبرا

ايجار 7 جنيه

لُقطة يا ابو سكوب بدل الجحر اللي احنا عايشين فيه .. و العيال بتكبر ...

لكن ده طالب 600 جنيه خلو رجل

نبيع السيغة .. علي كام جمعية ... و شوية سلفيات ..و بابا حيساعدنا ... حندبرهم

و هذا ما حدث .... و مازال ابو سكوب بعد حوالي 35 سنة يدفع نفس السبع جنيهات اليتيمة كايجار ....

و لكن مع وضاعة هذا المبلغ يجب أن نقوم بحسبة صغيرة ..حتي نستطيع ان نصل الي ما كلفته فعلآ تلك الشقة :

600 جنيه خلو X ضعف 200 = 120.000 جنيه

84 جنيه ايجار سنوي منذ السبعينات و حتي الآن سيكون من الصعب بمكان تحديد قيمتهم التصاعدية و لكنها ستكون مبلغ كبير بالفعل في وقتنا هذا لن يقل بأي حال عن 60 / 70 الف جنيه

علي هذا الأساس لا أعتبر ان صاحب الشقة قد تعرض لظلم شديد في هذا الأمر .. فما وصله حتي الان يزيد عن سعر الشقة ذاتها لو كان قد قرر أن يبيعها تمليك ...

أعلم أن هناك أيضآ أصحاب الضمير .. و هم قلة ... من لم يأخذوا خلو الرجل هذا في البدء .. و هم المظلومين في رايي ... و لكن المثال الذي طرحته هو الغالبية و هو الذي يدور حوله مناقشة هذا الأمر ....

بالطبع طرحي السابق و لأنه غير دقيق في حساباته قد يكون خاطيء الي حد كبير .. لذا طرحته للنقاش لتبادل الأراء ..

اشكركم لسعة صدركم .. و أستأذنكم في تغيير عنوان الموضوع ليعبر عن فكرته الحالية ....

[أبو محمد]

إتوكل على الله يا سكوب وقارن بأسعار الدهب .. فهو مادة بسيطة .. درجة التصنيع والتطوير فيها تكاد تكون منعدمة .. حتى موضوع دخول أنف الرزاز فى تحديد سعره له علاقة قوية بحالة الاقتصاد وهى المؤثر الأكبر فى تحديد القيمة ...

الأرض سعرها صحيح مرتبط بحالة الاقتصاد وقيمة العملة ولكنه مرتبط ايضا بعمليات التطوير فى موقع الأرض وتسقيعها .. بمعنى أنه لو تم شق طريق رئيسى إلى جوارها فده بيرفع سعرها بشكل كبير .. ولو اتبنت جنبها مرافق وخدمات سعرها برضه بيرتفع .. حتى لو اتبنى جنبها سوبر ماركت سعرها بيتأثر

السيارات برضه بيدخل فى تحديد سعرها أشياء كثيرة أخرى غير قيمة العملة زى تطور التصاميم وإضافات الرفاهية من تكييف ووسائل أمان وأشياء أوتوماتيكية لم تكن معروفة من 40 سنة

وبدون تريقة .. اللحمة والفراخ هى تانى أفضل معيار وبالهنا والشفا .. ومتنساش قهوتنا :pasha:

[حسام يوسف]

لو لحمة يا (ابو محمد)يبقى هنغرم سكوب ياما

تم تعديل 14 يوليو 2008 بواسطة حسام يوسف