كابوس

[mizo1957]

جالي كابوس فظيع امس.

حلمت اني سافرت مصر وفي المطار اخذ ضابط الجوزات يبحلق في الباسبور ويقلب فيه ثم ابتسم ابتسامه صفراء وقال لي ميزو 1957 مش كده ونادي علي اتنين تيران قالهم خدوه للباشا جوه،

راح واجد منهم ساحبني من قفايا علي

جوه وصوت الاولاد يتلاشي تدريجيا بابا بابا

وام العيال بتولول وبتقول الله يخرب بيت

الانترنت علي اللي اخترعها انا ياما قلتله

القاعده علي الكمبيوتر حا تجيبلك الكافيه

يالله حصل خير بس ياريت ترجعوه حته واحده.

وسحبت العيال و مشيت.

ثم دخلوني علي مكتب قاعد عليه شخص شكله غريب قوي ودانه طويله زي ودان الحمارقال

لي متخافش اقعد حاناخد منك كلمتين و تروح

علي طول.

س ـ انت ميزو 1957

ج ـ لا

س ـ انضميت لمنتدي محاورات المصريين امتي

ج ـ معرفهمش

س ـ بتدفع اشتراك كام

ج ـ مبدفعش حاجه

س ـ ما علاقتك بالشخاص اللي اسمهم في الورقه

دي و اداني ورقه فيها اغلب اسماء اعضاء المنتدي

ج ـ معرفهمش.

ياحبيبي متوجعش قلبي خليك صريح معايا عشان

تروح لاولادك . وفي هذه اللحظه تزكرت اني احمل

الجنسيه الامريكيه فاسترجعت شجاعتي و قلتله

حاروح غصب عنك انا امريكي يااستاذ.

وفجاه انقلب هذا الشخص المبتسم الي ثور هائج

و قال لي نعم ياروح .... امريكي ايه ياوله

امريكاغسلت ايدها منكم من زمان ومش ح تسال

عنك حتي لو دفناك هنا.

بقي مش عايز تتكلم خدوه للاستاذ سمير رجب

هو اللي حا يعرف يتفاهم معاه واهو هو اللي طلبه من الاول.

ومن جديد اتعفقت من قفايا علي غرفه اخري

اضاءتها خفيفه وعلي الجدران ورق حائط عليه

صوره شخص واحد مكرره بصوره تجعلك اشعر بالدوران.و دفعني البغل اللي ماسكني

قال المطلوب اهو ياستاذ سمير لاجد شخص

سمين قصير يجلس في نهايه الغرفه يرتدي تي شيرت

عليها نفس صوره الشخص اللي علي ورق الحيطه

واستقبلني قائلا اهلا يارجل انت فين من زمان انا مستنيك علي نار مش ميزو 1957 ،

قلت له انتو اكيد غلطانين قال لي متخافش مش انت

اللي كتبت تقلدني في منتدي محاورات المصريين انامش زعلان منك انا مبسوط منك قوي والراجل الكبير مبسوط منك قوي وعايزك تبقي واحد من رجالته.

قلت له يعني ايه مش فاهم؟

قام قال لي انا بصراحه الافكار ناشفه معايا

اليومين دول و عايزينك تكتب لنا كام مقاله

حلوه كده بتوقيع مواطن مصري في المهجر تظهر

لنا فيهم مواهبك.

وقلت له لومكتبتش قال لي بسيطه حانسيبك في

الغرفه دي كام يوم وسط الصور دي تونسك و لعلمك اجدع واحد قبلك ماستحملش يقعد فيها

كام ساعه و خرج علي مستشفي المجانين .

ووجدت نفسي اصرخ بلاش ارجوك حاكتب حاكتب

لتنهال علي يد اشد من الاولي وهي يد زوجتي

بتصرخ فيا في ايه تكتب متكتبش انشاله عنك

ما كتبت بس سيبني انام.

اكيد كابوس مش كده؟

[White heart]

قال لي متخافش مش انت

اللي كتبت تقلدني في منتدي  محاورات  المصريين

اكيد كابوس مش كده؟

مأفتكرش انة كابوس!!!

انا ممكن اسمية حلم مزعج....

لأن جريمتك ليست على المستوى على ما أعتقد!!! :shock:

يا راجل دا أنت حيالله "قلدت" سمير رجب....أمال اللى صبح و ليل عمال ينحل فى وبر الحكومة و بعض "كبارها" تحديدا... هايعملوا معاة اية!؟! :)

بصراحة و بينى بينك، الوضعين دول وما على شاكلتهم فى حد ذاتهم لو حدثوا فعلا يبقى دة معناة اننا لم "ننضج" بعد!! و هذا هو الذى لا يطاق فعلا، غرفه اخري

اضاءتها خفيفه وعلي الجدران ورق حائط عليه

صوره شخص واحد مكرره بصوره تجعلك اشعر بالدوران

على العموم خير...خير !! عجبنى جدا اسلوبك "المصرى" خالص فى سرد أحداث "كابوسك" و ربنا يخليك للمدام و للأولاد...و و لا يهمك، فى التحقيق هأعترف أنك رئيس "التنظ..." عفوا أقصد مسئول "تجنيد" أعضاء جدد "للمنتدى" .... :shock: :? :)

[mohamedfox1981]

ميزو حبيبي إوعي تكون قلت علي اسمي :) :) :) :o

انا عندي عيال عايز اربيهم ابوس رجلك :shock: :? :shock:

بعد كده قبل ما تنام ابقي خاللي معاك بطاقتك الشخصيه في جيبك

لاحسن يمسكوك تاني و لا حاجه تبقي مصيبه :roll: :roll: :roll:

[ابو يوسف]

وعلي الجدران ورق حائط عليه

صوره شخص واحد مكرره بصوره تجعلك اشعر بالدوران.

ما قلتش يعنى ...... صورة مين ؟؟؟ :? :? :?

[DARWEEN]

مين ضحك عليك وقالك أن ده كابوس

دا اللي حيحصل ياباشا .. دا اللي شفته دا هزار طيب يارب ترسي على سمير رجب ... :) :lol: :) :D :D :D

[Mohammad Abouzied]

بقى معقول يا محمد انت عمرك ما دخلت معتقلات

يعني مش عارف ها يحصلك ايه يا راجل

على فكرة اغلب الى في المنتدى هنا عندهم عضوية عاملة في المعتقلات وكل سنه في الصيف بيقضو الاجازة هناك خمسة واربعين يوم هنا تطلع بعدها صحتك زي الحديد وناسي اسمك تماما وطبعا الباس ورد بتاعة المنتدى لغاية ما يتقابل صدفه مع اي عضو قديم يفكرة بنفسه وترجع ريما لعادتها القديمة

طيب هاتقولي ليه ما تعلموش من اول معتقل لهم

اقولك هما بينسو اسمهم عاوزهم يتعلموا

وحتى الي يساري بيبقى اخونجي والاخونجي بيقى ليبرالي واللبيرالي بيقبى قومي والقومي بيبقى ثورجي وهلما جرا

انت مين ؟؟؟؟؟؟؟؟؟؟

يا راجل انت صدقت

[mizo1957]

انتو بتتكلمو جد ولا ايه ؟

عموماانا قررت لو سافرت مصر ادخل علي

جمل عن طريق الحدود مع ليبيا.

نسيت اقول لكم اول اسم كان في القائمه هو

حمزاوي

مش عارف حسيت انهم قارشين ملحته شويه

حدعارف السبب ايه :?:

اجمد ياعم حمزاوي ده كابوس مش رؤيه :oops:

[Mohammad Abouzied]

انتو بتتكلمو جد ولا ايه ؟

عموماانا قررت لو سافرت مصر ادخل علي

جمل عن طريق الحدود مع ليبيا.

دا كدا ورطت نفسك اكثر

يبقى انت عاوز تقلبها جماهيريه شعبية عظمى

وفي الحالة دي مش المخابرات المصرية بس هي الي ها تدور عليك

خد ياسيدي المخابرات الامريكية علشان الارهاب عند القذافي

ومخابرات جميع الدول الافريقية لان القذافي عاوز يعمم فكرة المهلبية هناك

وجميع المخبارات في الدول العربية للمشاكل الي كل شوية يعملها القذافي مع القادة العرب في المؤتمرات

غير ما خفي كان اعظم

شوف غيرها