شاعر العامية ؛؛ على سلامة ،،

[se_ Elsyed]

خربوها ….

ومين دول يا بابا ..

وحضرتك كنت فين لما خربوها

أنا عن نفسي كنت في الحمام

إنت كنت فين يا ثامح ؟

[فولان بن علان]

يا نهار أبيض يا س س

هو الراجل علي سلامة ده

كتب كل حاجة

ما سابش حاجة

للشعرا ولا للعاملين فيها شعرا

سمعته مرة مع من الشاذلي

وسمعت منه النقط

لكنه طلع نقط فوق الحروف

وحروف زي اللي بنتكلم بيها

لكن طعمها ولونها غير

روح يا شيخ

ربنا ما يحرمنا منك

[se_ Elsyed]

الشاعر الغضنفر فولان بن أبا علان ... نورت المطرح

شوفت الحته دي ... ان خيشت في دماغي قوي قوي

ولسه هاتشوف وتتفرج..

يا ابن آدم..

طول ما انت عايش..

مش عارف عندي إحساس..

إن مصر حد شّمْمها حاجة ف المولد..

وسرق منها الغوايش..

واداها صرة مربوطة..

لما فاقت وفتحتها..

لاقتنا..

بجد بجد..

يا حلاوتنا..

نُصنا بيدّور

علي علاج للحموضة..

والنُص التاني..

شوية حاجات..

مش موجودة..

عموما أنا عملت محضر ف القسم..

تاخد رقمه..

[م.سامح المصرى]

خربوها ….

ومين دول يا بابا ..

وحضرتك كنت فين لما خربوها

أنا عن نفسي كنت في الحمام

إنت كنت فين يا ثامح ؟

انا ساعتها كنت مشغول جدا

كنت بجيب عيش ....

[ابو محمود]

شكر وامتنان واجب

الأخ الفاضل سين سين

على مجهوداتة الرائعة بأن اتحفنا ببعض قصائد وأزجال شاعر العامية على سلامة

شكرآ يامن تعبت وجمعت وريحتنا واتحفتنا حلوة اتحفتنا دى يا ريس

[كوابرية]

السلام عليكم

انا شوفت الشاعر على سلامة فى برنامج شبابيك وعاجبنى شعره اوى وحاولت ادور على اشعاره دى

وفرحت جدا لما لقيتها هنا تسلموا جميعا ..

شعر العامية حلو اوى من السهل الواحد يفهمه مش محتاج بقى الواحد يكون ضليع فى اللغة العربية والحمد لله ....شكرا على اشعار على سلامة

[se_ Elsyed]

خالى اللى فى البلد

كتب على سلامة ١٥/ ١١/ ٢٠٠٨

فيه حد

تقضى الليل وشك ف وشه

ويطلع النهار تنساه

وفيه حد

تقضى العمر كله تستناه

وحد تجرى منه

وحد تجرى وراه

وحد يكرّهك ف حياتك

وحد يرجّعك من تانى

تحب الحياة

وفيه حد بقى

زى خالى اللى ف البلد

لا أنت ضده

ولا أنت معاه

وحد زى الحزب الوطنى

لا عندى سبب أبص ف وشه

ولا حتى ف قفاه