ضرايبك وحدها .. مش كفاية..اتبرع للوطني ولو بصوت علشان تاخد خدمات!

[Sherief AbdelWahab]

ربما تكلمنا وتكلم غيرنا كثيراً عن أزمة المياه والمظاهرات الغاضبة التي صاحبت انقطاع المياه في أكثر من مكان بالمحروسة المسكينة .. ولكننا لم نمعن النظر- بعد- في السبب الرئيسي لذلك..

أرى أن السبب الرئيسي الحقيقي هو عملية ربط الخدمات بالعملية الحزبية..

الموضوع عامل ببساطة زي ما تكون رايح مطعم تيك أواي من اللي بياخدوا فلوس مقدم .. دفعت الفلوس وقاعد زي الباشا مستني الأكل ييجي ربع ساعة ، ساعة ، تلات ساعات .. مايجيش .. تسأل هناك يقولولك أصل احنا عايزين 10% ضريبة مبيعات ومش حنديك حاجتك من غيرها!

الأكل هو الخدمات ، الفلوس هي الضرائب ، ضريبة المبيعات هو صوتك للوطني طبعاً ، وصاحب المحل هو الحكومة أو الحزب .. مبقتش تفرق سينا من سونيا..

من زمان وتوزيع الخدمات مقترن بالسبوبة الحزبية ، أيام الشاذلي كانت الحكومة بتدي أفضلية في الخدمات لنواب الوطني ، وهمة اللي طلعوا إشاعة إن كل عضو وطني له اتنين يعينهم وربما كام تأشيرة حج.. الله أعلم..

ولما ظهر "الفقر الجديد" في بر مصر اتضح إنك مش حتقدر تجيب خدمات للي انتخبوك إلا لو كنت واصل جوة الحزب .. دة يوضح أد إيه إن فيه نواب في الحزب كأنهم مش في الحزب ..

والمفارقة إن أنصار الفقر الجديد همة اللي عاملين حملة الضرائب في التليفزيون .. آل يعني الضرائب وحدها كفاية علشان تاخد بيها خدمات..

هل يمكن تخليص الخدمات من السبوبة الحزبية على أساس أنها خدمة يدفع ثمنها المؤيد والمعارض للنظام؟ أم أنه يبقى الحال على ما هو عليه وعلى المتضرر أن يخبط رأسه في الحيط؟

خلص الكلام

[kokomen]

هو ده الفساد السياسي بعينه .. لأن دافع الضرائب وهو المواطن المصري

يحق له الإستفادة بجميع الخدمات التي توفرها الدولة من خلال الضرائب

يعني لازم أكون من الحزب الوطني علشان أستفيد من أي خدمة ولماذا ؟؟؟

كلنا مواطنون متساوون أمام القانون ...؟؟؟؟؟ ولا أيه ؟؟؟؟؟

:)