أنا ونظيف و سيادة الريس وطبق الفول

[mesryforever]

بصوا بقه ياجماعه أنا هأحكي ليكوا على عن الحلم إللي أنا حلمته اليوم بس بعد ما أقولكم على موقف حصل وأعتقد إن هو ده سبب الحلم والله أعلم

أنا بأدور على وظيفه في الوقت الحالي بعدما سيبت وظيفتي الأولنيه

المهم

اليوم الصبح روحت على شركة من الشركات الكبيرة - علشان أقابل الرئيس التنفيذي للشركة المهم طلع عنده إجتماع قولت أقعد أستناه قعدت أستناه لأكثر من ساعتين وبعدما خلص الإجتماع كلمت السكرتيره علشان أدخل له لأنها عرافني كويس وتعرف أنا كنت بأشتغل فين ومع مين بالضبط - المهم طلعت في الدور الثاني لقيت فيه مجلس فخم جداً وإنتظرته فيه لحد ما حضر وسلم عليه بكل تناكه -

المهم قولت له أنا صفتي كذا وكذا وكذا " طبعاً أنا عارف إنه يعرف مديري السابق لأن مديري السابق كان مسئول كبير في البلد دي وكان بيعتبرني أخ ليه " رحت أنا كمان إتكلمت معاه بتناكه وقولتله دي " السي في " بتاعتي لو عاوزين تستفادوا من خبراتي أوكي "أنا عارف إن ده مش أسلوب أطلب بيه شغل " بس ده إللي حصل لأني عارف أنا كان وضعي إيه قبل ما أخلص من وظيفتي الأولانيه

وبعد كده سبيته ومشيت وأنا متضايق وقعدت أفكر في الموضوع ده كتير إزاي الراجل ده يقابلني كده وأنا كنت لسه من فترة صغيره ناس في وضع أحسن منه مائة مرة وكانوا يتمنوا لي الرضا علشان أرضا

مأكدبش عليكوا أنا كمان زعلت من نفسي لأني كلمته بالأسلوب ده لأنه ده من حقه لأنه مسئول كبير الشركة ولازم يكون أسلوبه شويه مع الموظفين .

روحت البيت وبعد متعشيت كويس رحت نمت وحلمت بالحلم الجاي ده

شفت خير اللهم أجعله خير

كنت أنا وسيادة الريس وسيادة نظيف باشا بنتكلم عن والوضع في البلد وإن الشعب مش فاهم سياسة الحكومه ماشيه إزاي في البلد والكلام الفاضي ده طبعاً كنت بأسايرهم أمال هأعمل إيه وبعد كده عزمت سعادتهم هما الأثنين على طبق أو طبقين فول وطعميه وكانوا مبسوطين قوي من الفول وبعد كده أخذت من كل واحد منهم بزنس كارت وتوقيعهم المبجل عليه علشان لو حصلتلي أي مشكلة أبقي أوري لأي مسؤل البزنس كارت بتاع سيادتهم " يعني علشان الناس تعرف أني أعرف سعادتهم شخصياً " وسيادة الريس أعطاني ورقة مكتوب فيها زي مكافأة على حسن الضيافه .

مش عارف يا جماعه هل الحلم ده من الموضوع إللي أنا حكيته ليكم ولا إنه أطغاث أحلام ولا أنا كنت مكشوف ولا بأخترف ولا إيه بالضبط

بس محتاج حد يفسر لي الحلم

معلش طولت عليكوا

[شينكاوي]

نعم نعم نعم يا عم الحاج مين دول اللي بياكلوا فول وفلافل بس الله يخليك لحد يصدق .

ودا اكيد حضرتك مكشوف علي الاخر وبزنس كارد ايه ومين اللي اداك مكافاة اه يبقي اكيد صرفلك عشر سنين سجن علي راي اللمبي .

سوري انا فهمت انت قصدك الريس متقال الله يرحمه كده يبقي صح .

عارف حلمك بالريس ونظيف مع بعض يبفي مصيبة كبيرة يا معلم في الطريق يعني طول عمرك ما راح تشتغل دا فال اسود والله يا عم الحاج.

طبعا انا بهزر ان شاء الله مقبول في الوظيفة الجديدة ولما انزل مصر اقدم معاك في الوظيفة بس علس شرط ما اشوفش حد في المنام يا عم الحاج .

[tahereyad]

يا نهار أبيض,,,بتقول حلمت بالريّس و نظيف في نفس الليله,, تبقه ليله مش طالعالها شمس يا ريّس,,,

و عاوز أعرف حاجه,, في آخر الحلم ماقومتش مفزوع و قعدت تصوّت و حد جالك لحقك بكوبّاية ميه و قرألك قرآن...

متهيألي ده يبقي فال وحش لو مرتبط بموضوع الوظيفه دي,, من رأيي تعمل حسابك من دلوقتي و تشوف وظيفه تانيه,,,

و تاني مره قبل ماتنام ابقه أقرا قرآن و قول الأدعيه عشان مايجيلكش كوابيس

[rar]

أنا أقولك يا مصري يا حبيبي... حاكم أنا الوالدة كانت معلماني قراية الكف و الفنجان و قالت لي ان سري باتع و مكشوف عني الحساب...

انت في فترة ضغط عصبي بسبب البحث عن وظيفة... و خطواتك للبحث عن وظيفة محسساك انك عزيز قوم ذل...

رحت لواحد كان يتمني لك الرضا ترضي و انت في مكانك... و ما قدرتش تيجي علي نفسك و لسانك ينطق باحتياجك للوظيفة قدامه...

فرجعت البيت و نمت... و عقلك الباطن ربط بطريقة فوق-ميتافيزيقية بين وضعك و وضع العزيز أحمد نظيف... عشان هو كمان في اشاعات انه هيتعامل زيك كدة عن قريب و يدور يوزع السي في بتاعه...

فمن أخلاقك و حسن تربيتك... صعب عليك و قلت تعزمه علي طبق فول (حسب امكانياتك بقي)... و بما ان ما فيش حد في الحكومة يجرؤ ياكل مال الشعب من غير الباشا ما ياخد نصيبه... اضطريت تعزم الباشا غصب عنك!!!

أما موضوع الكارت ده... فمعناه ان وظيفتك الجاية هتكون في شرم الشيخ... ابشر يا عم...

اما العزيز نظيف... فشراب هيتقلع و شراب غيره هيتلبس... بس طول ما الرجل منتنة... أي شراب هيجي بداله لازم ينتن برضه!!!

مؤسسة راركو لتفسير الأحلام

خمسة شارع شهاب بالمهندسين

[badroora]

بتحلم بكبرياء وتعالى كمان !!! :wub:

دول يا بني ياجوج وماجوج الله يكون فى عونك تحملتهم ازاى

بص هاقولك حاجة انا اسمع ان اللى يحلم بحد زو منصب او مكانه معناها خير والله اعلم

وبردة الاخ رار ممكن يفدنا فى النقطة دى بما انه مطلع .

ان شاء الله خير

[mesryforever]

والأخوه الأعضاء في المنتدى

لما قريت تعليقاتكم لم أتمالك نفسي من الضحك ، بصراحه أسلوبكم في منتهى الجمال ، بس حبيت أوضح نقطه

أنا خارج مصر والوظيفة مش في مصر

وإلى : الأخ العزيز رار

كنت عاوز أعرف إيه علاقة البزنس كارد بشرم الشيخ

وإيه حكاية المكافأة هل هي ممكن تكون خير أو لا قدر الله شر

أما بالنسبة لرؤية " نظيف ومبارك" هل ده ممكن يكون خير بصرف النظر عن كونهم ؟؟؟؟؟؟؟؟؟ زي ما إحنا عارفين

[Diab]

أبقي أتغطي كويس

:blink:

[mesryforever]

يا أخ دياب

من فضلك لو سمحت لو عندك كلمة كويسه تقولها أهلاً وسهلا بيك

لو معندكش بعد إذنك كنت تقرأ الموضوع ومتردش عليه

جميع الأعضاء اللي ردوا على الموضوع ردوا بكل إحترام وذوق وإذا كان فيه شويه تفاريح مفيش مشكله

وشكرا على إي حال يا أخ دياب

[الطيار المصرى]

يا سلاااااااااام.......هي دي الاحلام ولا بلاش....

ممكن بقي تحلم لأخوك حلم تشوفلي فيه وزير التعليم بيتحرق و وزير التعليم العالي بيتشنق في ميدان التحرير...

خدمة مش هنسهالك....و لو شفت مبارك تاني قله احنا بنحبك اوي يا ريس...يمكن تصحي تلاقي نفسك متعين...

تحياتي

الطيار المصري

[mffaswan]

الأخ مصري ...

الأخ دياب قالك اتغطى .. و هذا من رأيي نصح في محله !! (بدون زعل) ..

كما ان طيارنا المصري طلب منك تحلمله بوزيري التعليم العالي و الـ (واطي) .. و هما بيتحرقوا ف ميدان التحرير بجاز بوابير !!

والله لو سمحت تحلملي أناكمان بكامل أعضاء حكومتنا الرشيدة على النحو التالي .. يبقى بارك الله فيك ..

سيادة الرئيس .. و هو واقف في طابور العيش في فرن السيد بالسكاكيني

أحمد نظيف .. و هو كمان واقف في نفس طابور العيش ..

عائشة عبد الهادي .. و هي بتمضي عقد عمل مع البنات اللي عاوزة تسفرهم يشتغلو خدامات ف السعوودية

أحمد رشيد .. و هو واقف في طابور جمعية الأهرام في شارع السوق في جرجا مستنيله ازازتين زيت عباد شمس

مصيلحي .. و هو واقف مستني في طابور المعاشات على باب بنك القاهرة في أسوان !

يسري الجمل .. و هو بيقدم في مكتب التنسيق (مش الألكتروني) !! أو .. و هو واقف في طابور صرف الحافز التشجيعي للمدرسين (23.25 ج.م.) في مديرية سمالوط التعليمية !

منصور .. و هو راكب عربية (ميكروباظ) .. رايح على الخصوص في العربيات الغير آدمية .. أو رايح نجع المحطة أو غرب سهيل ف أسوان .. أو الفتح في أسيوط .. أو أي ضاحية ف أي بلد .. أو حتى راكب الدرجة التانية في قطار الخط القبلي!!

والله نفسي (حتى ف الحلم) أشوف الناس دي بتعاني زي كل الناس ما بتعاني .. :sad:

أنا بصراحة باقولك يا بختك أنت حلمت إن الريس و نظيف بياكلو فول .. أنا نفسي أتخيلهم حتى من غير بدلة و كرافته !! .. نفسي أشوف و لو ف الحلم الناس دي و هي بتعاني معاناة القطاع الأعظم من الناس ..

[mesryforever]

الأخ mffaswan

مع إحترامي ليك وإحترامي للأخ دياب

أنا مش زعلان بس الحكاية إنه عاوز اللي يقرأ الموضوع ويعلق عليه بذوق أهلا وسهلا بس مش كل واحد يقرأ الموضوع يفتكر نفسه إن راجل خبير يعني ويتريقأ على خلق ا لله " مش كده ولا إيه "

طب أنا مزعلتش منك ليه ؟ لأنك غلفت موضعك بتعليق على الوضع السيئ الموجود حالياً في البلد مع إنه مش تفسير للحلم

أما بخصوص أحلامك على عيني يا سيدي هأحلملك حلم يجيب أجلهم ولا يكون عندك فكر

تحياتي للجميع

[masrymasry]

بصوا بقه ياجماعه أنا هأحكي ليكوا على عن الحلم إللي أنا حلمته اليوم بس بعد ما أقولكم على موقف حصل وأعتقد إن هو ده سبب الحلم والله أعلم

أنا بأدور على وظيفه في الوقت الحالي بعدما سيبت وظيفتي الأولنيه

المهم

اليوم الصبح روحت على شركة من الشركات الكبيرة - علشان أقابل الرئيس التنفيذي للشركة المهم طلع عنده إجتماع قولت أقعد أستناه قعدت أستناه لأكثر من ساعتين وبعدما خلص الإجتماع كلمت السكرتيره علشان أدخل له لأنها عرافني كويس وتعرف أنا كنت بأشتغل فين ومع مين بالضبط - المهم طلعت في الدور الثاني لقيت فيه مجلس فخم جداً وإنتظرته فيه لحد ما حضر وسلم عليه بكل تناكه -

المهم قولت له أنا صفتي كذا وكذا وكذا " طبعاً أنا عارف إنه يعرف مديري السابق لأن مديري السابق كان مسئول كبير في البلد دي وكان بيعتبرني أخ ليه " رحت أنا كمان إتكلمت معاه بتناكه وقولتله دي " السي في " بتاعتي لو عاوزين تستفادوا من خبراتي أوكي "أنا عارف إن ده مش أسلوب أطلب بيه شغل " بس ده إللي حصل لأني عارف أنا كان وضعي إيه قبل ما أخلص من وظيفتي الأولانيه

وبعد كده سبيته ومشيت وأنا متضايق وقعدت أفكر في الموضوع ده كتير إزاي الراجل ده يقابلني كده وأنا كنت لسه من فترة صغيره ناس في وضع أحسن منه مائة مرة وكانوا يتمنوا لي الرضا علشان أرضا

مأكدبش عليكوا أنا كمان زعلت من نفسي لأني كلمته بالأسلوب ده لأنه ده من حقه لأنه مسئول كبير الشركة ولازم يكون أسلوبه شويه مع الموظفين .

روحت البيت وبعد متعشيت كويس رحت نمت وحلمت بالحلم الجاي ده

شفت خير اللهم أجعله خير

كنت أنا وسيادة الريس وسيادة نظيف باشا بنتكلم عن والوضع في البلد وإن الشعب مش فاهم سياسة الحكومه ماشيه إزاي في البلد والكلام الفاضي ده طبعاً كنت بأسايرهم أمال هأعمل إيه وبعد كده عزمت سعادتهم هما الأثنين على طبق أو طبقين فول وطعميه وكانوا مبسوطين قوي من الفول وبعد كده أخذت من كل واحد منهم بزنس كارت وتوقيعهم المبجل عليه علشان لو حصلتلي أي مشكلة أبقي أوري لأي مسؤل البزنس كارت بتاع سيادتهم " يعني علشان الناس تعرف أني أعرف سعادتهم شخصياً " وسيادة الريس أعطاني ورقة مكتوب فيها زي مكافأة على حسن الضيافه .

مش عارف يا جماعه هل الحلم ده من الموضوع إللي أنا حكيته ليكم ولا إنه أطغاث أحلام ولا أنا كنت مكشوف ولا بأخترف ولا إيه بالضبط

بس محتاج حد يفسر لي الحلم

معلش طولت عليكوا

يا سلام حلم حضرتك أهو أتحقق بس متأخر شويه- معلش ملحوقه

ياريت تحلم لنا كمان بالأخوان

بس حلم يكون وصاية علشان خاطري وخاطر المصريين عشان إللي عملوه في المصريين في 6 شهور بس - معملهوش مبارك في 30 سنه

هنفول إيه ربنا هو المنتقم الجبار