اذهب إلى المحتوى
محاورات المصريين

بجنيه ونص ... وتعالى وبُص


se_ Elsyed

Recommended Posts

قرب يا بيه .. قرب يا مُحترم

فستان لرشا بإتنين جنيه

بدلة حماده بتلاته جنيه

طب متر الأرض في طابا بجنيه ونص

حد قال شاري

طب أخونا الحاخام اللي في أخر الصف ده قال شاري ؟

الحاخام : شالوم يا خبيبي .... إعملتو معروف أنا عايز 650 ألف متر .. وأدي 950 ألف جنيه اهم عالترابيزة يا خبيبي

.

بتقول كام يا عم

جيني ونص للمتر ؟

وفين ...................... في طابا اللي مساحتها لا تتعدى 2 مليوت متر مربع ؟

يعني الخواجه هايشتري أكتر من ربع طابا ؟

بجنيه ونص ..... يا بلاش

أما اليهود دول طلعوا أغبية بشكل

حروب ودمار ونار وأسرى وقلة أدب لأكثر من 50 عاماً .. وفي الأخير طلع الموضوع زي شكة الدبوس

وليه تدفع أكتر لما ممكن تدفع أقل

يعني بدل ده كله ما كانوا دفعوا لمبارك الجنيه ونص في المتر على ***** القديمة واخدوا طابا من بابها تشطيب لوكس وعالمفتاح ؟

ممكن ناس تقول إني بأهطرش أو بأخرف ..

لكن هو ده اللي حصل وبيحصل في عهد الرئيس مبارك ... وما خفي كان أعظم .. يعني الموضوع داخل في عشرين سنة ورحته ما فاحتش للرأي العام الا لما أتهبدنا حكم وبقينا سوابق

وهي دي البهدلة اللي بتحصل في مصر دلوقت

وهو ده الحكم المبدئي اللي صدر للخواجه / وجيه سيجال الإيطالي الجنسية اللي من أب مصري اللي أشترى 650 ألف متر مربع في طابا سنة 89 على 150 قرشاً عداً ونقداً للمتر .. يعني دفع للدولة 950 ألف ملطوش .. ملطوش ينطح ملطوش عشان يعمل قرية سياحية هناك وبعد ما العملية نامت راح سنة 94 عمل عقد شراكة مع شركة يهودية لتمويل المشروع هنا تدخلت الدولة وقالت له حاسب عندك وسحبت منه الأرض بعض ما صرف على حد كلامه أكثر من 53 مليون جنيه ورفع قضايا أمام المحاكم المصرية وحكمو له بتعويض والدولة بلطجت وما دفعتش راح شككنا قضية ا في امريكا وأتحكم له مبدئاً بـ 50 مليون دولار تعويض

شراكة برضوا يابن اللئيمة ولا أنت كنت مجرد عروسة ماريونيت بيحركوك الصهاينة من وراء الستار ... ولا ليه أشتمك إنت مالكش ذنب .. ما هو اللي بيبيع أرضه ويفرط في عِرضه يستاهل اللي يجرا له .. ومالوش حق يرجع يعيط ويقول مش لاعب أنا طلعت عيل وعايز أرضي تاني ...

ياريت هاتقف على كده العملية

ده هايحصل زي ما بنشوف في الأفلام المصرية الحمضانه .. هاياخد الحكم ده ويبهدلنا بقضايا تعويضات مادية ومعنوية تاني لإننا جرحنا إحساسه

جيني ونص يا مبارك ... يا بلاش ده تمن ساندوتش فول من غير حاجه ساقعه تبلعه ؟

جنيه ونص في أرض مرويه بدماء ألاف المصريين .مسلمين ومسيحيين ؟

جنيه ونص في أرض ما كانتش كملت سنة راجعه لنا بعد حروب ومفاوضات ومحاكم إنتهت بحكم تاريخي لرجوع طابا لمصر سنة 88 ... تقوم إنت تبيعها بتراب الفلوس بعدها بسنة ؟

950 ألف جنيه ثمن لـ 650 ألف متر مربع ؟!!!! يا نهار إسود ومطين بطين يعني لو تاجر مواشي نازل السوق ومعه عربية محملة لا مؤخذه بهايم .. فالراجل بيبيع ويشتري اكتر من المبلغ ده

950 ألف جنيه .. والدولة تهز طولها واجتماعات وعقود ووزراء وخلافه يقعدوا مع المستثمر ويبيعوا له ربع مدينة بحالها بأقل من مليون جنيه !!!!!!!!!!!

والعجيب ان الجميع يتبرأ الان من تلك الصفقة المشبوهة سواء أستاذ البيع عاطف عبيد .. ومديره مبارك او اللي وقع على عقود البيع وهو وزير السياحة فؤاد سُلطان اللي طلع في العاشرة مساءً يومين وكان بيردح زي الحريم ويتبرأ من الصفقة هو أيضاً ويقول لو ما كناش عملنا كده ما كانتش طابا او سينا اتعمرت .. وقالت له طب إيه سبب الرجوع في الصفقة .. يقولها عندك الريس وعاطف عبيد إسأليهم !!!!!!!!!!!!!!

!!!!!!!!!!!!!!!!!!!! 100 علامة إستفهام وعلامة تعجب

ليه يا روح الروح .. هي طابا دي كانت خرابه وإنت اللي عمرتها ؟

ولا إحنا مستلمنها متعمرة و100 فل من الصهاينة وبها فنادق ومنتجعات سياحية وكان من شروط تسليم طابا السماح للصهاينة بدخولها غصبِ عن اللي جاوبنا بجواز السفر فقط أو البطاقة كمان لمدة 14 يوم من غير تاشيرة ؟

150 قرش يا ظلمه ؟

حسبنا الله ونعم الوكيل على من فعلوا بنا ما لم يفعله التتار او الصهاينة

أترككم الان مع مقال مهم للمُبدع فاروق جويده في العدد الأخير من الاهرام يتحدث عن نفس الموضوع اللي صوتنا إنبح فيه عن بيع البلد والجمل بما حمل بأبخس الأثمان

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

بجنيه ونص

جنيه ونص

كرامه بجنيه ونص

شرف بجنيه ونص

اخلاق وادب بجنيه ونص

مبادئ بجنيه ونص

قيم بجنيه ونص

الشهيد بجنيه ونص

علم مصر بجنيه ونص

حضارة بجنيه ونص

يا بلاش

حسبنا الله ونعم الوكيل

الراجل هياخد ارضه وتبقى مستعمرة

ومحدش يقدر يكلمه

متر العرض بجنيه ونص

متر الشرف بجنيه ونص

دم شهيد بجنيه ونص

حسوا يا ولاد ال ...................................................................................................................................

حسوا واعرفوا كم ام بكت دم لما ابنها راح دمه فى الارض اللى مترها بجنيه ونص

كم اب ضيع عمرة على ابنه فى متر الارض بجنيه ونص

كم عائله وكم شهيد وكم صبى وكم فتاة راحوا فى الارض اللى بجنيه ونص

رفعنا علمنا عليها بدمنا

وهننزل علمنا بجنيه ونص

عواد باع ارضه يا ولاد

شوفوا طولو وعرضو يا ولاد

بجنيه ونص

جنيه ونص

مبقتش بلدنا

بقت بلدهم بجنيه ونص

الله الله يا بلد

متر ارضك وعرضك وشرفك

عرض خاص

عرض على ارض على شرف على كرامه

بجنيه ونص

اشهد ان لا اله الا الله

وان محمد رسول الله

a5b1a75a2d.gif

التوقيع و الصورة الرمزية هدية من الاخت مصرية يعني مصرية

أشكرك

رابط هذا التعليق
شارك

بالمناسبة

الحرامية لما بيقعوا في بعض بتنكشف البلاوي المستخبية

ولإن ممدوح إسماعيل حرامي وله شركاء في الحكم حراميه برضوا بيقاسموا معاه

فهو كمان طلع له بسبوبة أرض في ميناء سفاجا ... بلوشي برضوا

9000 متر مكاتب وشركات في المينا

والمتر بعشرة جيني في السنة

يا بلاش والله

يعني لا مؤخذه لو مأجرين خرابه لناس يعملوها مقلب زبالة هاتتكسف تبيع بثمن زي ده

واحد يدخل جيبة مليارات معفاه من الضرايب كل عام من شركان نقل بحري وشحن وخلافه وفي الأخر يرمي للدولة 90 ألف ملطوش كل سنة قمرية

ولسه ولسه

مش بعيد يكون الكبير راهن أو باع هدومنا كلنا كشعب بالصلاتو عالنبي في قعدة مزاج ..

ومش بعيد بعد كام سنة ولا كام شهر نلاقي شوية صهاينة داخلين علينا بالشوم ويقولوا لنا : إقلع هدومك يالا أنت وهو .. وأنت ياد يا سين سين ... أخلع يالا الجلابية الجباردين اللي إنت لابسها ... ليه يا عم الصهيوني .. طب كده أنا استهوى وأخد برد ؟

الصهيوني : إنت مش عارف إن رئيسكو بعد ما باع أرضكو .. راح إتعذر في قرشين ساعة جواز إبنه وراح راهن هدومكو عند الخواجه صروف .. واهو خلع وما سددش يا حلو .. يبقى هدومكو بقت حلالنا

يا فضيحتك يا سين سين وإنت بالشابونيز

أنا مش راجع مصر يا خواننا وخليني هائم على وجهي في بلاد الله لخلق الله ز لابس بدلة وكرافتة وقاعد بإحترمي .. ولا حد يقولي هات اللي عليك .. ولا أفتح دولابك وهات الهدوم تسديداً للي عالبلد .. ويسيبني متغطي بملاية السرير ....

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

بهذة المناسبه الجميله

جالى واحد فى يوم وقالى ادينى صورة جواز سفرك

وتعالى هاخليك صاحب ملك فى مصر

اديته الصورة

وراح مطلعلى خريطه مكتوب لجمهوريه مصر العربيه وقالى احنا هنؤسس جمعيه للمستثمرين المغتربين

ونشترى ارض على طريق الصعيد الصحراوى وكل واحد نصيبه 1000 فدان

والفدان بالف جنيه (( مش المتر بجنيه ونص))

ونجيب ناس ونستصلحها ونزرعها ونبدا ندفع للدوله كل زرعه شهر 1000 جنيه منذ بدء المحصول

اتبسطت وبينى وبينك مصدقتش

راحو وجريوا وقوموا محاميين ومستشارين ومجلس شعب وشورى وحركات وبركات

وفى الاخر قالولى الارض مش للبيع

استثمرها والدوله تشاركك ولما تنتج يبقا يحلها الف حلال

ولازم تدفع مقدم للدوله مبلغ 500 الف مقدم تتورد للدوله الاول

والموضوع التعقد وخلصت الحدوته

يقوموا يروحوا يبيعوا على البحر ب جنيه ونص

وانا عاوز اخضرها واخليها زراع مرضوش يبعونى

شفت يا عم

بجنيه ونص

وتعالى بص

a5b1a75a2d.gif

التوقيع و الصورة الرمزية هدية من الاخت مصرية يعني مصرية

أشكرك

رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة
  • الموضوعات المشابهه

    • 2
      العمل الخيري والتطوعي مطلوب جدا ومقياس لتحضر أي دولة ،لكن ما نراه جميعا اننا اصبحنا نعتبر جمع التبرعات لمستشفيات السرطان نمط حياة  منذ سنوات والتبرعات تجمع ونسب الاصابة بالسرطان مازالت كماهي ،ومازلنا نركز على ان نقوم بزيادة القدرة الاستيعابية للمستشفى ، يمكن اللي بيريح الواحد شوية ان في كما يقال في الاعلان صرف ع بحث علمي يختص بالسرطان ،لكن ياسادة الا يمكن ان نتعامل بفكرة درهم وقاية خير من قنطار علاج  ما نحاول اننا نشوف مسببات السرطان ونمنعها ،بل ان انا شايف ان رغم اعتراض الكثيرين ع اعل
    • 155
      نسجل التفاعل مع دعوة السيسي ونذكر بها دائما  البداية مبشرة 
    • 0
      هل تعلم ان الله سبحانه وتعالى لم يخلق اشكال الخضار والفواكه عبثا . الجزر :يشبـه عدسة العين ..فعلاً أثبتت الأبحاث أن الجزر مفيد جداً للنظر. . 2. الطماطم :لها أربع حجرات والقلب لونه أحمر وبه أربع حجرات:البطينين والأذينين..وكل الأبحاث الحديثة تؤكد أن الطماطم طعام القلب والــــدم. ....... 3. العنب :يشبه الشكل الخارجي للقلب..وكل حبة عنب تشبه خلية دموية...!! ولقد أظهرت الأبحاث الآن أن العنب مفيد للقلب والدم أيضاً. . 4. الجوز :يشبه جدا شكل الدماغ (المخ) بفصيه الأيمن والأيسر..حتى التلافيف
    • 3
      وجاءهم الموج من كل مكان نرى في هذه الصورة موجة ترتفع عدة أمتار، وقد وجد الباحثون لدى دراسة هذه الموجة أنها تحيط الإنسان من كل مكان. أي أنه لدى وجود سفينة في عرض البحر فإن الأمواج التي تغرقها تحيط بها من الجهات الأربعة، وكل موجة تغلف ما بداخلها تغليفاً. هذا الوصف الدقيق الذي نراه اليوم بالصور جاء به القرآن قبل 14 قرناً من الزمان وعلى لسان نبي لم يركب البحر في حياته أبداً ولم يرَ هذه الأمواج وهي تحيط بالسفن، يقول تعالى: (هُوَ الَّذِي يُسَيِّرُكُمْ فِي الْبَرِّ وَالْبَحْرِ حَتَّى إِذَا كُنْتُمْ
    • 3
      اخواني الافاضل في أسرة المنتدى الموضوع يعتمل في ذهني وضميري منذ فترة .. وقررت أن أفتحه وأناقشه معكم لعلي أجيد عرض وجهة نظري .. و بالتأكيد استمع الى وجهات نظركم .. حتى اخرج بتصور كامل عن هذا الأمر الذي أراه جدا خطير و يجب أن يشغل مساحة من تفكيرنا .. الله سبحانه وتعالى كلمة تقشعر لها الابدان عند سماعها الله رب الاكوان .. و خالق الانسان .. ورازقه و مميته ثم محييه رب الجنة والنار .. سجد له الملائكة المقربون .. ودعى لتوحيده قافلة الانبياء من لدن آدم عليه السلام وحتى سيدنا محمد صلى الله علي
×
×
  • أضف...