اذهب الي المحتوي
nora

قصائد لأحمد فؤاد نجم

Recommended Posts

قصائد لأحمد فؤاد نجم

ahmed.jpg

ولد أحمد فؤاد نجم في مايو سنة 1929، وعمل في معسكرات الجيش الانجليزي متنقلا بين مهن كثيرة كواء..لاعب كرة.. بائع ..عامل انشاءات وبناء.. ترزي. وفي فايد وهي احدى مدن القنال التي كان يحتلها الانجليز التقى بعمال المطابع وكان في ذلك الحين قد علم نفسه القراءة والكتابة. واشترك مع الآلاف في المظاهرات التي اجتاحت مصر سنة 1946 وتشكلت اثناءها اللجنة الوطنية العليا للطلبة و لعمال.

وفي الفترة ما بين 51 الى56 اشتغل شاعرنا عاملا في السكك الحديدية. وبعد هذه الفترة بدأ في نشر دواوينه سجن عدة مرات بتهم مختلفة إلتقى بالشيخ إمام وكونا ثنائيا رائعا نجم بشعره وإمام بألحانه وصوته وكان لهذه الأشعار بصوت الشيخ إمام تأثيرا قويا على الطلبة في الجامعات وعلى فئات متعددة من الشعب ألف عدة دواويين وكتب في مختلف المجالات أشعارا عبرت عن أحداث تاريخية هامة في مصر والعالم العربي وأشعارا غنائية ومازال نجم يسكن حجرة متواضعة في حارة حوش قدم.

قصيدة أحمد فؤاد نجم

مهداه الى جمال مبارك وعروسه خديجة

مبروك يا عريسنا يا أبو شنةورنة

يا واخدنا وراثة أطلب وإتمنى

وأخرج من جنة أدخل على جنة

مش فارقة معانا ولا هارية بدنا

ولا تاعبة قلوبنا ولا فاقعة مرارنا

يا عريس الدولة إفرح وإتهنى

ما احناش كارهينك لكن هارشينك

حاتكمل دينك وتطلع ديننا

:angry2:

تم تعديل بواسطة nora

شارك هذه المشاركه


رابط المشاركه
شارك

:wub: :blush: :lol:

احمد فؤاد نجم ...شاعر عبقري....

في كام سطر جابها من أخرها....

ربنا يمد في عمرة...ومايشوفش المحروس إلا وهو...ولا بلاش...

شارك هذه المشاركه


رابط المشاركه
شارك

مش فارقة معانا ولا هارية بدنا

ولا تاعبة قلوبنا ولا فاقعة مرارنا

قوية جدا يا نورا

يسلم الاختيار

احمد فؤاد نجم قادر على التلخيص ونشانه محكم

:wub:

شارك هذه المشاركه


رابط المشاركه
شارك

الف شكر يامدام نورة. دية قصيدة تانية ، في ناس كتير بتقول إنها بتاعة الفاجومي

طاطي راسك طاطي طــــاطي

بقلم: أحمد فؤاد نجم

طاطي راسك طاطي طــــاطي

انت ف وطن ديمقراطـــــــي

انت بتنـــعــــم بالحــــــــــرية

بس بشرط تكون مطاطــــــي

لما تكون شغــال بذمــــــــــة

خايف على مصــلحة الأمــة

شغلك يطلع من غير لازمــة

علشان مبيعلاش غير واطي

طاطي راسك طاطي طاطـــي

انت ف وطن ديمـــــقراطي

لما حاميها يكون حراميــها

وبلاده ورا ضهره رامـيـها

طالع نازل واكل فيـــــــــها

مسنود بالبدلة الظباطــــي

طاطي راسك طاطي طاطـــي

انت ف وطن ديمـــــقراطي

لما شــقاك يصــبح مش ليك

فقرك سد السكة علــــــــــيك

تتلفّت تلــــقى حـــوالـــــــيك

إما حرامي و إما عقــــاطي

طاطي راسك طاطي طاطــــي

انت ف وطن ديمقراطـــــــي

لماتلاقي بـــــلاد الـدنـيـــــــا

فيها البني آدم حــــاجة تانية

وانت في الطبقات الـــــــدنيا

قرد مسلسل أو وطواطــــي

طاطي راسك طاطي طاطـــي

انت ف وطن ديمقراطــــــي

لما الجهلة يبــــــقوا أمــامــك

أو فوقك ماسكــين ف زمامك

ويسوقك ع الهــلكة إمامك

تشرب م السم السقـــــراطي

يطاطي راسك طاطــــي طاطي

انت ف وطن ديمقـــــــراطي

لمــــا الكلـــمة تكون بتدينـك

لما تخبي ف قلـــــــبك دينــك

لما الذل أشوفه ف عيـــــــنك

هات إحباطك على إحباطــــي

طاطي راسك طاطي طاطـــي

انت ف وطن ديمقراطــــــي

انت ف وطن ديمقراطـــــــي

شارك هذه المشاركه


رابط المشاركه
شارك

روعه ياسيوة والله القصيده دي كمان

,,,,,,,,,,,,,,,,,,,,,,,,,,,,,,,,,,,,,,,,,,

أنا عندي أقتراح نخلي الصفحه دي لإشعار أحمد فؤاد نجم

ايه رأيكم؟؟

شارك هذه المشاركه


رابط المشاركه
شارك

قصيدة أحمد فؤاد نجم

مهداه الى جمال مبارك وعروسه خديجة

مبروك يا عريسنا يا أبو شنةورنة

يا واخدنا وراثة أطلب وإتمنى

وأخرج من جنة أدخل على جنة

مش فارقة معانا ولا هارية بدنا

ولا تاعبة قلوبنا ولا فاقعة مرارنا

يا عريس الدولة إفرح وإتهنى

ما احناش كارهينك لكن هارشينك

حاتكمل دينك وتطلع ديننا

:lol:

الله ينور على اللى كتبها و على اللى نشرها .... يا ريت تتحفينا بالمزيد ..... و ربنا يتمم له على خير

تم تعديل بواسطة drhouba

شارك هذه المشاركه


رابط المشاركه
شارك

علشان طلبتكم حاضر هحط كل قصايد احمد نجم ودي قصيده عجبتني اسلوبو ساخر وبسيط :huh:

سيدي الرئيس

في عيد ميلادك الكام وسبعين

كل سنة وأنت طيب

واحنا مش طيبين

كل سنة وأنت حاكم

واحنا محكومين

واحنا مظلومين

واحنا متهانين

ويا ترى يا حبيب الملايين

فاكرنا ولا احنا خلاص منسيين

فاكر المعتقلين

فاكر الجعانين

فاكر المشردين

فاكر اللي ماتو محروقين

فاكر الغرقانين

الله يكون في عونك - هاتفتكر مين وللا مين

في عيد ميلادك الكام وسبعين

بقول لك كلمتين

الأوله

شيلتنا طين

وهل تعلم أن النيل بقى رشاح

والجو أصبح بيئة والعيشة ولعة

والشرفا قلوبهم عالبلد والعة

وانت عاملهم مذبحة ولا بتاعة القلعة

والاقتصاد سداح

والسرقة بقت كفاح

ومصر متاحة بس للسياح

وعرض البلد بقى مستباح

والتانية

ورتنا الويل

دا الخطوة في عهدك بقت ميل

والضحك بقى نواح وعويل

والكوسة

عارف الكوسة

ممكن أقولك فيها موواويل

والجامعة بقت يا إما كباريه أو دار مسنين

والشباب معظمهم من غير خمرة سكرانين

والعلم عز على المتعلمين

والأساتذة بقم دجالين

والقادة بقم طبالين

واديني في الهايف يا حبيب الملايين

والتالتة

عارف اليابانيين

زمان في سنة اتنين وخمسين

كان عندنا تروماي وكان عندنا علم ومتعلمين

وثقافة ومثقفين

وأدبا وعلما وفنانين

وكانو اليابانيين

بالنووي لسة مضروبين

وللصدقة مستحقين

دلوقتي إحنا فين وهما فين

هما فوق واحنا في أسفل سافلين

والرابعة

أمن البلد بقى تنين

والمحاكم اتملت مظالم

والعدالة بقت كمالة

وكلمة الحق في الزبالة

وأصحابها في الزنازين

والخامسة

القطاع العام…. عام

والفساد…. ساد

وفي جتة بلدنا بيرعى

أفتكر لجنابك إيه وللا إيه

وكل ذكرى ليك بدمعة

آآآآآآآآه آآآآآآآآه

أنا كنت حالف ميت يمين

أكملهم لك تمنية وسبعين

بس هاكفيهم ورق منين

وكل سنة وأنت

واحنا طيبين

:lol:

شارك هذه المشاركه


رابط المشاركه
شارك

السلام عليكم

عمنا الكبير اوي نجم

ياسلام علي دا كلام وشعر

والله معرفش ليه الراجل ده مش واخد نصي حقة بص نصيب وحظوظ..............

وعموما دي قصيدة ممكن نعلمها لولادنا

اهداء مني لكل المحاوراتية

يا ليل يا عين ما اعرفش اكدب

طب و اكدب ليه

عدم المؤاخذة

لنا باكتب

و لا أبصر إيه

لا انا احترافي اشتراكية

و لا عندي نزعة رجعيّة

لكني شايف بعنيّه

يا فلاحين يا صنايعية

بر الأمان بان

و المركب

راح ترسي عليه

و انا حاكدب ليه

شارك هذه المشاركه


رابط المشاركه
شارك

الأولة بلدي

الأولة بلدي

و الثانية بلدي

و الثالثة بلدي

الأولة بلدي باسلطن جو موالي و دا الموصوف

و الثانية بلدي باقول الكلمة بالعالي و ع المكشوف

و الثالثة بلدي ياكنزي و عزوتي و مالي و ملو الشوف

الأولة بلدي باسلطن جو موالي و دا الموصوف

دوا العيــــــــــــــــــــان

و الثانية بلدي باقول الكلمة بالعالي و ع المكشوف

و ف المليـــــــــــــــان

و الثالثة بلدي ياكنزي و عزوتي و مالي و ملو الشوف

آوانـــــــــــــــــــــك آن

تحدي الحد يا بلدي

ما بين الحق و البهتان

و رايتك تعلا يا بلدي

دليل عن صحة البنيان

و دا الموصوف

و الاولة بلدي

و الثانية بلدي

و الثالثة بلدي

تم تعديل بواسطة nora

شارك هذه المشاركه


رابط المشاركه
شارك

انا قريت القصيده دي لاحمد فؤاد نجم وعجبتني اوي

يعيش أهل بلــــــــــــــــــــدي

يعيش أهل بلــــــــــــــــــــدي

و بينهم مافيــــــــــــــــــــــش

تعارف يخلي التحالف يعيــش

تعيش كل طايفـــــــــــــــــــة

من الثانية خايفــــــــــــــــــــة

و تنزل ستاير بداير و شيـــش

لكن ف الموالــــــــــــــــــــــد

ياشعبي يا خالـــــــــــــــــــــد

بنتلم صحبـــــــــــــــــــــــــة

و نهتف يعيــــــــــــــــــــــش

يعيش أهل بلــــــــــــــــــــدي

يعيش المثقف على مقهى ريش

يعيش يعيــــــــــــــــــــــــــش

محفلط مزفلط كثير الكـــــلام

عديم الممارســــــــــــــــــــة

عدو الزحـــــــــــــــــــــــــام

بكام كلمة فاضيـــــــــــــــــة

و كام اصطـــــــــــــــــلاح

يفبرك حلول المشاكل قـــوام

يعيش المثقف يعيش يعيش يعيش

يعيش التنابلة ف حي الزمالك

و حي الزمالـــــــــــــــــــــــك

مسالك مسالــــــــــــــــــــــــك

تحاول تفكــــــــــــــــــــــــــر

تهوب هنالــــــــــــــــــــــــــك

تودر حياتــــــــــــــــــــــــــك

بلاش المهالـــــــــــــــــــــــك

لذلك إذا عزت توصف حياتهم

تقول الحياة عندنا مش كذلك

مش ممكن تشوفهـــــــــــــــم

ف وسط المدينــــــــــــــــــة

اذا مر جنبك اوتومبيل سفينة

قفاهم عجينــــــــــــــــــــــــة

كروشهم سمينـــــــــــــــــــــة

جلودهم بتضــــــــــــــــــوي

دماغهم تخينــــــــــــــــــــــة

سنانهم مبــــــــــــــــــــــــارد

تفوت ف الجليــــــــــــــــــــد

مفيش سخن بـــــــــــــــــــارد

بياكلوا الحديـــــــــــــــــــــــد

مدام نهر وارد

و جي م الصعيد

تزيد الموارد

كروشهم تزيد

و تسمع و تسلم

بان التنابلة أو الأكالين

حيسمح كبيرهم

و يعمل مقابلة مع الفلاحين

و يحصل تحالف مابين الجميع

و نملا المصارف

بدم القطيع

أطيع الخليفة

أطيع والديك

أطيع التنابلة

دا مفروض عليك

و تزرع و تبعت لحي الزمالك

و حي الزمالك

مسالك مسالك

تحاول تفكر تهوب هنالك

تودر حياتك

بلاش المهالك

لذلك اذا حد جاب لك سيرتهم

تبسمل تكبر

و تهتف كذلك

يعيش التنابلة

يعش يعيش يعش

يعيش أهل بلدي

يعيش الغلابة في طي النجوع

نهارهم سحابة

و ليلهم دموع

سواعد هزيلة

لكن فيها حيلة

تبدر تخدر جفاف الربوع

مكن شغل كايرو

ما يتبعش دايروه

لا ياكل و لا حتى يقدر يجوع

يا غلبان بلدنا

يا فلاح يا صاتع

يا شحم السواقي يا فحم المصانع

يا منتج يامبهج يا آخر حلاوة

يا هادي يا راخي ياعاقل ياقانع

ما تتعبش نفسك

ف شغل السياسة

و شوف انتشغلك

بهمة و حماسة

و عود عيالك فضيلة الرضا

لأن احنا طبعا عبيد القضا

و رزقك ورزقي و رزق الكلاب

دا موضوع مؤجل ليوم الحساب

كمان الصحافة حتكتب ف حالتك

و تنشر مناظر لخالك و خالتك

و تطلع يا مسعد عليك الغناوي

و تسمع باسمك ف قلب القهاوي

تحبك مشيرة و بنات الجزيرة

و قصة غرامك تشيع ف الرداوي

يعيش عم مسعد

يعيش يعيش يعيش

يعيش أهل بلدي

شارك هذه المشاركه


رابط المشاركه
شارك

اسمحيلي يا مدام نورا اني اشارك في موضوع حضرتك بالقصيدة الجميلة دية.

اعتقد إنها كانت قبل حرب اكتوبر. بس مش عارفة بلظبط امتى

بس بصراحة كتير من اللي فيها بينطبق على الوقت الحاضر كمان..

اصحي يا مصر

اصحى يا مصر

اصحى يا مصر

هزى هلالك

هاتى النصر

كونى يا مصر وعيشي يا مصر

مدي اديكى

وطولى العصر

اصحي وكوني وعيشي يا مصر

اصحى يا عامل مصر يا مجدع

وافهم دورك

ف الوردية

مهما بتتعب

مهما بتصنع

تعبك رايح

للحراميه

جهدك عملك

رزق عبالك

عرقك مرقك

ولا يهنا لك

اصحى يا عا مل

غير حالك

صون المصنع

واصنع مصر

اصحى وكونى وعيشي يا مصر

اصحى يا زارع مصر الخضره

قدره وخضره

ونور وجمال

ابدر غيطك

واحمى البدره

ضد الافه

والاستغلال

ارضك عرضك

باب الدار

صبحوا مداسه

للسمسار

نعطش

ولانشربش عكار

وصفه قالوها الحكما يامصر

اصحى وكونى وعيشي يا مصر

واصحى يا جندى

يا تار الشهدا

عمى وخالك

اختى واخوك

لجل ما تهدا وتارك يهدا

فرغ نارك ف اللى خانوك

يابن الشعب يا حامي الشعب

انت املنا فى يوم الصعب

اصحى يا جندى ودق الكعب

حرر مصر وطهر مصر

اصحى وكوني وعيشي يا مصر

تم تعديل بواسطة Siwa

شارك هذه المشاركه


رابط المشاركه
شارك

الله عليكم

اختيارات رائعة لشاعر تميز بقلبه الصادق وقلنه الساحر الساخر اتمنى ان نجمع المزيد من اعماله القديمة والحديثة لتزين صدر مجموعات الاعمال الكاملة بالمحاورات

جهد طيب جدا يا نورا وجميع المشاركين

دمتم بكل الحب

شارك هذه المشاركه


رابط المشاركه
شارك

شكرا يا بنت مصريه واتمنى ان الكل يشارك فعلا هو فعلا شاعر يستاهل وادينا يادرهوب بنجمع

شكرا يا حمد وايناس يلا هاتو كمان مستنيه مشاركات كتير:)

سيوة ياخبر انتى تنوري موضوعي ده انا اسيبلك الموضوع :) ( هما مش بيقولو اقوملك خالص ) نورتيني ونورتوني كلكم

شارك هذه المشاركه


رابط المشاركه
شارك

السلام عليكم

بعتذر عن التأخير ونظرا لضيق الوقت اليكم رائعة عمنا الكبير نجم

هما مين و إحنا مين ...

هما مين و إ حنا مين .. ؟

هما الأمرا و السلاطين ..

هما المال و الحكم معاهم ..

و إحنا الفقرا المحرومين

حزر فزر شغّـل مخك

شوف مين فينا بيحكم مين ؟!!

إحنا مين و هما مين ..

إحنا الفعلا البنايين

إحنا السنة و إحنا الفرض

إحنا الناس بالطول و العرض

من عافيتنا تقوم الارض ..

و عرقنا يخضر بساتين

حزر فزر شغل مخك

شوف مين فينا بيخدم مين ..؟؟!!

هما مين و إحنا مين ؟؟

هما الامرا و السلاطين

هما الفيلا و العربية

و النساوين المتنقية

حيوانات استهلاكية

شغلتهم حشو المصارين

حزر فزر شغل مخك

شوف مين فينا بياكل مين ..؟؟!!!

إحنا مين و هما مين

إحنا قرنفل على ياسمين

إحنا الحرب : حطبها و نارها

و إحنا الجيش اللي يحررها

و إحنا الشهدا بكل مدارها

منكسرين أو منتصرين

حزر فزر شغل مخك

شوف مين فينا بيقتل مين ..؟؟!!!

هما مين و إحنا مين

هما الامرا و السلاطين

هما مناظر بالمزيكا

و الزفة و شغل البوليتيكا

و دماغهم طبعاً استيكا

بس البركة بالميازين

حزر .. فزر شغل مخك

شوف مين فينا بيخدع مين ..؟؟؟!!!

هما مين و إحنا مين

هما الامرا و السلاطين

هما بيلبسوا أخر موضة

و إحنا بنسكن سبعة في أوضة

هما بياكلوا حمام و فراخ

و إحنا الفول دوخنا و داخ

هما بيمشوا بطيارات

و إحنا نموت بالاوتوبيسات

هما حياتهم بامب جميلة

هما فصيلة و إحنا فصيلة

حادي يا بادي يا عبد الهادي

يا اللي عليك قصد الغنوادي

لما الشعب يقوم و ينادي

يا إحنا يا هما في الدنيا دي

حزر فزر .. شغل مخك

شوف مين فينا حيغلب مين

شارك هذه المشاركه


رابط المشاركه
شارك

الف شكر يا مدام نورة على ذوقك. ربنا يخليكي ديما ويكتبلك كل الخير. وادي قصيدة شرم برم

شرم برم

أنا الأديب الأدباتي

غايظني حال بلدياتي

و غلبت أوحوح و أهاتي

لكن بلدنا

سمعها ثقيل

الله الله يا بدوي

هات الشخاليل

شرم برم

و الناس غافلة

و الغفلة

ع الأفهام قافلة

و الكذب لعلع ف الحفلة

و أغلب السامر مساطيل

الله الله يا بدوي

دق الشخاليل

حالتنا ما تسرش انسان

و حالنا

يصعب ع الغلبان

لكن يا خلق علينا لسان

لو جريناه ع الصلب

يسيل

الله الله يا بدوي

يا أم الشماليل

السوس نخب سقف العشة

و عضمة الغنمات

هشة

عايزين صابونة و مقشة

و هات ياكنس

و هات يا غسيل

الله الله يا بلدي

مشوارنا طويل

آدي العبارة يا متولي

و آدي الصراحة اللي تخلي

عرق الغضب

فينا تمللي

بالجهل نافر

و التضليل

الله الله يا بدوي

لم الشخاليل

تم تعديل بواسطة Siwa

شارك هذه المشاركه


رابط المشاركه
شارك

شقع بقع

أنا الاديب ولا تعرفنيش

تقرا لي لكن ماتشوفنيش

كلامي لاهو مدهون ورنيش

ولا المعاني عليها غبار

شقع بقع يادليل الفار

ياشعب مصر ياخم اللنوم

ماتفوق بقى وتشوفلك يوم

والثورة قامت في الخرطوم

وانت اللى نايم بالأسرار

شقع بقع ياديل الفار

ياشعب ثور داهيه تسمك

وشيل أصول أسباب همك

عصابة بتمص في دمك

والاسم قال ضباط احرار

شقع بقع ياديل الفار

خدوا اليهود غزه وسينا

وبكرة يبقوا وسطينا

والراديوهات بتغدينا

خطب ونتعشى أشعار

شقع بقع ياديل الفار

الشيخ امام قال كلمة حق

الست ثومة قالت لك لا

وأبو النجوم على ودنه انزق

في المعتقل والدنيا نهار

شقع بقع ياديل الفار

دي قصيده من ايام الثورة والحرب بس عجبتني

شارك هذه المشاركه


رابط المشاركه
شارك
زوار
هذا الموضوع مغلق.

  • محاورات مشابهه

    • قصائد الهايكو

      تحيات وتمنيات  بكل ماهو طيب لكم جميعا.. اسمحوا لى ان اتحدث معكم اليوم عن - نوع من الاشعار - غير معروف وبمعني  ادق....غير منتشر وهي اشعار أو قصائد الهايكو . تروق لي كثيراااا..اكثر مم تتخيلون ...وسمحت لنفسي اليوم  ان تشاركوني متعة التفكر والتأمل فيها.. اكتب لكم كبداية...نبذة عنها.-https://ar.wikipedia.org/wiki/هايكو------------------------------ هايكو أو هائيكو (باليابانية: 俳句) هو نوع من الشعر الياباني، يحاول شاعر الهايكو، من خلال ألفاظ بسيطة التعبير عن مشاعر جياشة أوأحاسيس عميقة. تتألف

      في أدب و شعر و قراءات

    • رائعة هشام الجخ ..مكملين و قصائد أخرى

      http://www.youtube.com/watch?v=YSzMWm-Owuc

      في أدب و شعر و قراءات

    • قصائد مغضوب عليها ...

      و قديماً كتبوا و ثاروا… هذه هي حال بلادنا العربية، من مشرقها إلى مغربها، ببترولها و نفطها، بجميلها و مرها… حال أبت إلا أن تعلن عن مأساة شعوب بأكملها، حال أبت إلا أن تعلن عن سلاطين استعبدت أمماً برمتها، حال أبت إلا أن تعلن عن ثوار ينادون للحرية من أوسع أبوابها… و كي لا نخطئ الظن بأدبائنا، و كي لا نسيء لمجد شعرائنا، وجب التعريف بشاعر من أبلغ ثوارنا… هو ابن مدينة دمشق، و ابن سورية، نزار قباني… عرفه التاريخ و صوره النظام على أنه شاعر المرأة، بسبب أشعاره الغزلية و قصائده

      في أدب و شعر و قراءات

    • <>0<>....قصائد ألهمتني....<>0<>

      اضاءة تشبه الربيع ... للشعر مكانة خاصة في قراءاتي وخاصة ماجاء نابضا بشعور تذوقته في مرحلة ما من عمري يملك الشعراء طاقة تعبيرية مذهلة تجعلنا نبتسم او نبكي او نحدق في الفراغ من الدهشة حين كان الشعر فقط موهبة كان للشاعر مكانة تجعل القبيلة تحتفي بنبوغ احد افرادها لانه سيكون اعلامها ودرع دفاعها ضد خصومها ....اما في عصر النسخ واللصق فقد اصبح الكل من خلف الشاشات شعراء هنا ساجمع القصائد التي الهمتني او آلمتني لانها عزفت بحروفها على جرح نازف في قلبي وهي محاولة مني لاصنع ارشيفا للذاكرة الشعرية ا

      في أدب و شعر و قراءات

    • مش مهم الاسم - قصائد لشعراء مجهولين..لكنها رائعة

      في هذه الزاوية تعالوا نبحث عن أجمل أشعار كتبها هواة أو شعراء مغمورون ليسوا معروفين لا للقارئ العادي و لا حتى المتخصص.. و سأبدأ بقصيدة رائعة لشاعر أول مرة أسمع عنه هو هشام إمام.. http://www.omeldonia.com/story....y_id=56 الإرهابى الغربُ يبكي خيفـةً إذا صَنعتُ لُعبـةً مِـن عُلبـةِ الثُقابِ . وَهْـوَ الّذي يصنـعُ لي مِـن جَسَـدي مِشنَقَـةً حِبالُها أعصابـي ! والغَـربُ يرتاعُ إذا إذعتُ ، يومـاً ، أَنّـهُ مَـزّقَ لي جلبابـي . وهـوَ الّذي يهيبُ بي أنْ أستَحي مِنْ أدبـي وأنْ

      في أدب و شعر و قراءات

×
×
  • اضف...