حد عايز اكل يمني؟؟(عمايل ايديا وحياة عنيا)

[shahd]

السلام عليكم ورحمة الله ......

انا عاملة نفسى عاقلة ..وعمالة اقرأ كلام س.س. وابتسم ابتسامة خفيفة..واذ فجأتن لقيت نفسى عمالة اضحك يصوت عالى ...حلوة قوى الباجيه فى حياتك دى ... :wub: ..

طب والله عنده حق...بس انا كنت عازمة ولادى وجوزى بس ..يعنى ستر وغطى ..واللى نافع بقى ..ان زوجى يموت فى الاسماء الغريبة بتاعة الاكل..والاكلات الغريبة بتاعة الاسماء:wub:.....يعنى اقوله ده هندى يقولى اوكى..اقوله ده يمنى يقولى وماله..ولو اتحرق الاكل منى اقوله ده سودانى ...يصدق برضه.....فالحمدلله لسه لى عيش معاه...

طب ماتيجى نطلق على الوصفات دى اسماء حركية....ايه رأيك ياشهودة.....علشان بس سى السيد يكمل رمضان فى البيت مش عايزين مشاكل ....

امال انا اعمل اييييييييييه ده انا ضحكت ضحك :)

خلاص عشان خاطر سي السيد نغير الأسامي

ولا يهمك ياجدوووو سين سين

حكتبلك دلوقتي وصفة انما ايييييييييييه

اسم لزيز ورقيق وما يوديش في داهيه خاااااااااااالص :wub:

[shahd]

الرواني

المقادير:

5 بيضات

5 ملاعق دقيق

ملعقة بكينج باودر صغيرة

فانيليا

الطريقة:

تضرب بياض البيض لوحده لحد ما يبقى زي الكريمة (تضربة جااااااامد)

تضرب الصفار لوحدة

بعد كده تحط الأثنين ( لصفار والبياض مع بعض بس من غير ما تضربهم)

تحط عليهم معلقة بكينج باوردر ,وشوية فانيليا

وتضرب بالمعلقة او بمضرب يدوي بس مش بخلاط

وبعدين تحطها في الفرن

وخلي بالك من الفرن حاسب تتحرق :wub:

خد بالك الدقيق يتحط بمقدار البيض

يعني حطيت 5 بيضات بيقى 5 معالق دقيق

حطيت 10 بيضات بيقى 10 معالق دقيق وهكذاااا..........

هاااااا ياجدووووووو سين سين اهيه اكله ظريفة واسم رقيققققققققق :wub:

بالهنا والشفا :wub:

[ام البنات]

تيتا شهد

عاوزين وصفة حلو سهله

بلاش التميرة واحده حبيبتى قالت لى عليها لقيتها تاخد وقت كبيير

يعنى باختصار حاجه متاخدش فى التجهيز 10 دقايق

وربنا ميحرمناش منك يا تيتا شهد

[shahd]

تيتا شهد

عاوزين وصفة حلو سهله

بلاش التميرة واحده حبيبتى قالت لى عليها لقيتها تاخد وقت كبيير

يعنى باختصار حاجه متاخدش فى التجهيز 10 دقايق

وربنا ميحرمناش منك يا تيتا شهد

ميييييييين خالتي ام البنات :ninja:

يادشليون الف اهلا وسهلا

عايزة حلو وما يخدش 10 دقايق :blink:

ياحلاوة ياولاد

زي ايه ياتيتا شهد زي اييييييييييه :rolleyes:

حفنكرلك وراجعلك من عنيا التنين -_-

على فكرة الراواني الي مكتوبة فوق سهلة وسريعه جداااا

بس برضه حشوفلك وصفة تانية انت تأمري :ninja:

[shahd]

الهلوة العدنية

المقادير :

# ربع كيلو العربية سميد .. فيه منه ناعم وفيه خشن خد الخشن

السكر زي ماتحب بس مش اقل من كوبايتين

صبغة رز حتلاقيها في المحلاا الهندية

سمن أو زيت

هيل وقرنفل مطحون بس كثر الهيل

زبيب ولوز .. بحسب رغبتك

الطريقة :

1 تذوب والسكر وصباغ الرز والهيل والقرنفل مع بعض لحد ما السكر يذوب

2- حط زيت في حلة ولما يسخن حط السميد وقلب السميد لحد مالونه يتغير ويبقى مايل للأبيض شوية واستمر في التقليب لحد ما يحرق في قعر الحلة بس لازم يكون متساوي مع كمية الزيت المهم انك تقلب باستمرار

3- تقلب خلطة السكر وصبغة الرز عشان السكر ما يفضلش في قعر الحلة وتصبه مرة على السميد والسمن

تضيف الزبيب بعد ما تنقعه في ميه دافيه الدافئ واللوز المقشر وتفضل تقلب الهولة لحد ما الميه تنشف شويه هدي النار ساعتها تحتيه وافضل قلب لحد ماالميه تنشف خالص وتكون كتلة واحدة واقلبها بعد كده على الطبق الي حتقدم فيه

فيه بعد ما تحط شوية زيت (تمسح الطبق بشوية زيت)

وبالهنا والشفا

ممكن كمان تحطها في الثلاجة لمدة اسبوع وتسخنها على نار هاديه

تم تعديل 11 أكتوبر 2006 بواسطة شهد

[shahd]

بطاطس بالحومر

المكونات

بطاطس

فلفل احمر (قرون ناشفة )

ثوم

حومر

ملح

فلفل اسود

1 فلفل اخضر

الطريقه:

تخلط الفلفل الأحمر مع الثوم والفلفل الأخضر في الخلاط

تبل الحومر في ميه في طبق لوحده

تجيب البطاطس تقطعها مربعات او زي ما تحب

تحط الي انت خلطته في حلة وتحط عليه الحومر وتحط البطاطس وترش ملح وفلفل

وتحط ميه اكثر من كمية البطاطس وتخليه يغلي

والف هنا وشفا

اديني جبت اسم سهل اهو عشان جدو سين سين :unsure:

عقلي الباطن يارب ماحد يسألني يعني ايه حومر مااعرفلوش اسم تاني :rolleyes:

[بنت الشاطئ1]

السلام عليكم

شكرا تيتا شهد على ما تقدمينه من اكلات جميلة

انا قمت بتنفيذ الزربيان مرتان خلال شهر رمضان واللى حصل معايا كالتالى

اول مرة كان رائع وقمت بتنفيذ الخطوات بالحرف لكن الرز كان غير مفلفل ربما لأنى لم اصفيه وانما اكتفيت بسلقه مع تقليل كمية الشوربة ولكن هل التصفية ستفيد لأنى اجد انه شرب كل الشوربة فقلت اذن لاداعى للتصفية

المرة الثانية لم اسلقه ولكن وضعت الشوربه على الارز وعندما شرب السائل هديت النار والنتيجة ليست كالاولى

المهم سؤالى الان للروانى هل ادهن الصينية ام لا وهل عندك صورة للروانى وهل فى الشكل يكون مثل الكيك

شكرا لك

نسيت شئ اخر وهو انى قرأت فى احد المنتديات ان الروانى نسقيها شيرة فهل الشيرة تكون ثقيلة ام خفيفة وهل نكثر منها وهل الروانى تكون ناشفة احيانا ارجو التنبيه على كيفية الحصول على روانى ناجح وانا من اشد المعجبات بالأكل اليمنى

[نانو]

تيتا شهد تسلم ايديكي علي ماكولاتك الجميله

انا متابعه جيده للاكل اليمني

و كان نفسي اسالك عن الرواني نفس اسئله بنت الشاطئ

يعني هو شكله بيبقي ايه في الاخر

ناشف.... طري.... بيمضغ.... ابيض..... ولا محمر ...يعني ايه وضعه بالضبط

و بعدين عايزه احيي بشده عقلك الباطن

تفتكري مين يعني ممكن يعرف ايه الحومر ده :rolleyes:

ده انسان و لا حيوان ولا نبات و لا...ايه بالضبط :unsure:

يعني بس ادينا فكره عامه عنه ..و احنا بقه كل واحد وفهمه و ربنا يستر

[بنت الشاطئ1]

السلام عليكم

بعد ما كتبت استفسارى عن الروانى قلت فى نفسى هى مش معضلة يعنى فعلا قمت بالخطوات المذكورة وقبل ان ابدأ كتبت كلمة الروانى فى موقع البحث جوجل قلت ربما اجد معلومات زيادة عن هذه الحلوى

ولم اجد الكثير عما قالته تيتا شهد سوى الشيرة والتى هى عبارة عن سكر وماء وليمون ويبدو ان تيتا نسيت تقولنا عليها الله يعينها اصل الطلبات كترت عليها المهم عزيزتى نانو جربيه لأنه جميل وهو فى الشكل مثل الكيك الاسفنجى تماما الا ان الوجه فاتح قليلا انا صورت الطبق ولو استطعت ان ارسله سأفعل ولو احد يعرف كيفية ارسال الصورة ارجو الا يبخل علينا ونسيت ان اقول انى رشيت جوز هند على الوجه وشكرا تيتا مرة اخرى

[بنت الشاطئ1]

هذه محاولة تنزيل لصورة الروانى

اتمنى ان تكون ناجحة

url=www.moq3.com]

[shahd]

:rolleyes:

السلام عليكم

بعد ما كتبت استفسارى عن الروانى قلت فى نفسى هى مش معضلة يعنى فعلا قمت بالخطوات المذكورة وقبل ان ابدأ كتبت كلمة الروانى فى موقع البحث جوجل قلت ربما اجد معلومات زيادة عن هذه الحلوى

ولم اجد الكثير عما قالته تيتا شهد سوى الشيرة والتى هى عبارة عن سكر وماء وليمون ويبدو ان تيتا نسيت تقولنا عليها الله يعينها اصل الطلبات كترت عليها المهم عزيزتى نانو جربيه لأنه جميل وهو فى الشكل مثل الكيك الاسفنجى تماما الا ان الوجه فاتح قليلا انا صورت الطبق ولو استطعت ان ارسله سأفعل ولو احد يعرف كيفية ارسال الصورة ارجو الا يبخل علينا ونسيت ان اقول انى رشيت جوز هند على الوجه وشكرا تيتا مرة اخرى

طب تصدقي بالله انك سكررررررر

انا فعلا نسيت الشيرة مع اني لسه من يومين واكله رواني انما ايييييييييه

بس نعمل ايه للزهايمر :unsure:

بجد نسيته خااااااااالص :angry:

:ph34r:

السلام عليكم

شكرا تيتا شهد على ما تقدمينه من اكلات جميلة

انا قمت بتنفيذ الزربيان مرتان خلال شهر رمضان واللى حصل معايا كالتالى

اول مرة كان رائع وقمت بتنفيذ الخطوات بالحرف لكن الرز كان غير مفلفل ربما لأنى لم اصفيه وانما اكتفيت بسلقه مع تقليل كمية الشوربة ولكن هل التصفية ستفيد لأنى اجد انه شرب كل الشوربة فقلت اذن لاداعى للتصفية

المرة الثانية لم اسلقه ولكن وضعت الشوربه على الارز وعندما شرب السائل هديت النار والنتيجة ليست كالاولى

بصي يا ستي .. اهم حاجة في الزربيان انك تسلقي الرز نص سلقة اوربع والأهم نوع الرز يعني لازم بسمتي درجة ا ولى

ولا زم يتصفي حتى لو شرب كل الشربه .. هوالمفروض مايشربهاش كلها

بس مش مشكلة المهم انه ما يستويش على الأخر

حاولي تمسكي حباية الرز بأديكي وحتعرفي انها نص سلقة و لا ربع

لو الرز الي بتستخدميه بيسوي بسرعه خليها ربع ولو بطيئ خليها نص

المهم سلق الرز مهم عشان انت بعد كده حتسويه فوق الخلطة بتاعةالزبادي

ومش حتضيفي اي ميه ولا حتقلبي خالص يعني الرز فوق والخلطة تحت

ولو عندك اي استفسار تاني نحن في الخدمة

وبشكرك علىمشاركتك ونورتيني وشرفتي المطبخ اليمني

هذه محاولة تنزيل لصورة الروانى

اتمنى ان تكون ناجحة

url=www.moq3.com]

هيا دي الرواني فعلا الله ينور عليكي يا بنت الشاطئ :blink:

[shahd]

تيتا شهد تسلم ايديكي علي ماكولاتك الجميله

انا متابعه جيده للاكل اليمني

و كان نفسي اسالك عن الرواني نفس اسئله بنت الشاطئ

يعني هو شكله بيبقي ايه في الاخر

ناشف.... طري.... بيمضغ.... ابيض..... ولا محمر ...يعني ايه وضعه بالضبط

و بعدين عايزه احيي بشده عقلك الباطن

تفتكري مين يعني ممكن يعرف ايه الحومر ده :rolleyes:

ده انسان و لا حيوان ولا نبات و لا...ايه بالضبط :unsure:

يعني بس ادينا فكره عامه عنه ..و احنا بقه كل واحد وفهمه و ربنا يستر

منوراني يا نانو

بصي ياستي سؤالك عن الرواني بنت الشاطئ جاوبت عليه وقالت الي انا نسيته فعلا والف شكر ليها :blink:

اما الحومر فبعد البحث واللف والدوران والدق علىالبيبان .. وبعد ان سألنا صديق , وحذفنا اجابتين واتصلنا بالجمهور

ومن يربح المليون من يربح المليون يا يضرب بالشوم .. يايحرموه من النووووووم

وايييييييييييييييييييييه :angry:

طلع يا ستي التمر الهندي الحامض بس عندنا بيسموه حومر

:ph34r:

تم تعديل 15 أكتوبر 2006 بواسطة شهد

[shahd]

الهريــــــــــس

المقاديــــــر :-

3 ك لحم بالعضم

2 ك قمح بدون قشر

سمن بلدي أو سمن عادي

ميه تغرق اللحمة وتزيد عليه

ملح / فلفل اسود

الطريقــــــــــة :-

تغسل اللحم كويس وتحطه في حله على نار عاليه

وتشيل منه الزفر من وقت للتاني لحد ما اللحمة

تستوي وتسلق القمح الي هو (البر بضم الباء)

لوحده وتسيبه على النار لحد ما يستوي وحبيباتــه تتفتح .

تصفي اللحم من المرقه وتشيل العضم وتحط اللحم مع القمح وتخليه يغلي وتفضل تقلب بمعلقة خشب

لحد مايقرب يستوي تضيف مرقة اللحمة شوية شوية للقمح واللحم، وبعد كده ترش ملح وفلفل أسود وتقلب الهريس

بمعلقة خشب لحد ما اللحم والقمح يتخلطو ببعض كويس

يعني اللحمة تخش في القمح والقمح يخش في اللحمة

ما تعرفش اللحمة من القمح

حد فاهم حاجة :closedeyes:

لو كان الهريس ناشف تضيف عليه ميه مغليه ويتقلب على نار هاديه جدآ ولو كانت الميه زيادة تصفيها منه

الهريس بيتاكل بالطريقه دي:

تحطه في طبق وتعمل حفرة في النص وتحط في الحفرة سمن بلدي سايح ويتاكل سخن وتحط جمبة سكر

انا عن نفسي باكله بالملح والفلفل الأخضر

بس هو اساسا بيتاكل بالسكر

والف هنا وشفا

:rolleyes:

[shahd]

المقصص

المقاديــــر : -_بيضتين

معلقة خميرة بيره

كبايه سكر

حبة البركة

ثلاثة كبايات دقيق

شوية زيت 4/2 كوبايه مثلا

شوية ميه عشان تلين العجينه 4/1 ,

زيت تقلي فيه

الطريقـــــة :- تنخل الدقيق و تحطه في الحلة الي حتعجن فيها

تسخن الزيت وتحطه على الدقيق وتخلطه بمعلقة

وبعد كده تضيف بقية الحاحات وتعجنها كويس لحد مالعجينه تبقى طريه (لينة)

تحطها في مكان دافي لمدة 15 دقيقة وبعدين تحطها على طاولة المطبخ وترش الطاولة او المكان الي حتفرد فيه شوية دقيق و تفردها لحد سمك 2 سم

وتقطعها بالشكل الي تحبه و تخسن الزيت لحد ما بيقى سخن خالص وتحط المقصقص فيه وتقلب على الوشين

لحد ما يحمر أو يكون مايل للأحمر

طلعه وحطه على ورق ( عشان تصفي الزيت بتاع القلي).

تم تعديل 16 أكتوبر 2006 بواسطة شهد

[Folana]

السلام عليكم ورحمة الله ......

تيتا شهد .ايه الجمال ده بس ...انا حاعمل الهريس والمقصص ده ...وكنت لسه حاسالك عن الحومر بس لحقيتى نفسك.....سبحان الله حومر يعنى تمر هندى؟...

الروانى دى اصلا كيكة اسفنجية واسعة المسام..ويفضل خبزها فى صينية اللى لها حاجة فى النص كده تقوم الكيكة تطلع مخرومة....واساسها الشربات ..اللى الاخوة بيقولوا عليه ده الشيرة...

وطبعا بتبقى طرية علشان العسل ..ومش حاكتبها تانى بقى البركة فى تيتا وفى بنت الشاطىء1......هو فيه شاطىء2؟

[نانو]

تسلم ايديكي يا شهوده

و انا اتحمست اوي للحومر ده :sad: و هابقي اجربه ان شاء الله

اصلي بحب الحاجات اللي طعمها مز و ده اكيد هيبقي كده طالما التمر الهندي في الموضوع

[shahd]

السلام عليكم ورحمة الله ......

تيتا شهد .ايه الجمال ده بس ...انا حاعمل الهريس والمقصص ده ...وكنت لسه حاسالك عن الحومر بس لحقيتى نفسك.....سبحان الله حومر يعنى تمر هندى؟...

الروانى دى اصلا كيكة اسفنجية واسعة المسام..ويفضل خبزها فى صينية اللى لها حاجة فى النص كده تقوم الكيكة تطلع مخرومة....واساسها الشربات ..اللى الاخوة بيقولوا عليه ده الشيرة...

وطبعا بتبقى طرية علشان العسل ..ومش حاكتبها تانى بقى البركة فى تيتا وفى بنت الشاطىء1......هو فيه شاطىء2؟

تلميذتك يا ست الكل :wub:

شفتي الحومر طلع ثمر هندي عجبتوا لك يازمن :blink:

تعرفي ان رواني عندنا غير انها اكلة بتعتبر كلمة مستخدمة بمعنى

وريني

يعني ممكن يقلك رويني الحاجة الفلانيه مثلا

او يقلك فلان رواني البتاعه العلانيه وهكذااااااا

او مثلا لو حد متحلفلك يقلك شارويك ( يعني ان ما وريتك)

او ممكن يقلك اي حين عترويني....( يعني حتوريني الـ... امتى ) :)

تم تعديل 16 أكتوبر 2006 بواسطة شهد

[shahd]

تسلم ايديكي يا شهوده

و انا اتحمست اوي للحومر ده :blink: و هابقي اجربه ان شاء الله

اصلي بحب الحاجات اللي طعمها مز و ده اكيد هيبقي كده طالما التمر الهندي في الموضوع

ربنا يخليكي يانانو ياسكر

جربيه ان شاء الله حيعجبك :wub:

[بنت الشاطئ1]

السلام عليكم تيتا شهد

انا قرأت عن كعك يمنى اسمه كعك الزمور وطريقة العمل انا مش متخيلاها وخصوصا انه فى النهايه يضفر

يا ريت من فضلك لو تقوليلى على الطريقة بالضبط

اما عزيزتى فلانة فبالنسبة لبنت الشاطئ1 ده مجرد رمز ومفيش شاطئ 2 :blink:

والى اللقاء فى اكلة يمنية جديدة

ولتكن الشفوت

ها ايه رأيك يا تيتا

[shahd]

السلام عليكم تيتا شهد

انا قرأت عن كعك يمنى اسمه كعك الزمور وطريقة العمل انا مش متخيلاها وخصوصا انه فى النهايه يضفر

يا ريت من فضلك لو تقوليلى على الطريقة بالضبط

اما عزيزتى فلانة فبالنسبة لبنت الشاطئ1 ده مجرد رمز ومفيش شاطئ 2 :wub:

والى اللقاء فى اكلة يمنية جديدة

ولتكن الشفوت

ها ايه رأيك يا تيتا

وعليكم السلام ورحمة الملك العلام على من افشى السلام واطعم الطعام وصلى باليل والناس نيام :)

زمور مين ده :blink: بيزمر يعني :o

اعتقد انك تقصدي الذمول وهو كعك صنعاني ولزيز جدا :o

انا عن نفسي ما عرفش الوصفة بس حسألك عنها ان شاء الله

اما الشفوت ياستي فموجوده كتبتها قبل كده ارجعي بس بالصفحات لورا حتلاقيها :o

ولا اقلك اللينك اهو عشان ماتتعبيش

الشفوت