اذهب إلى المحتوى
محاورات المصريين

كيف أستثمر مبلغ 200.000 جنيه في السوق المصري


Recommended Posts

السلام عليكم ورحمة الله وبركاته

تحية من القلب للجميع

أرجو منكم ألا تبخلوا بمقترحاتكم في كيفية إستثمار مبلغ 200.000 جنيه بالسوق المصري

وما هي المشروعات التي تدر أعلى ربح خلال فترة وجيزة

وما هو المشروع الذي يسترد رأسماله خلال عام أو عامين على الأكثر

وجزاكم الله خيراً

رابط هذا التعليق
شارك

  • الردود 68
  • البداية
  • اخر رد

أكثر المشاركين في هذا الموضوع

أكثر المشاركين في هذا الموضوع

وما هو المشروع الذي يسترد رأسماله خلال عام أو عامين على الأكثر

تجارة المخدرات وخصوصاً الهيروين

أنا باتكلم جد .. ودي الإجابة الوحيدة على سؤالك اللي ناقصة معلومات كثير

----

يا عم أسامه قبل ما تدور على مشروع تستثمر فيه فلوسك لازم تقول لنا إنت مؤهلاتك إيه .. أو إيه المجال اللي إنت متخصص فيه .. وهل إنت معاك فلوس بس ما لكش في التجارة مثلاً وعايز تستثمر ... وهل لك مصادر دخل أخرى ولا كل اللي حيلتك هو الملبغ ده .. وهل المشروع ده هايبقى كل حياتك ولا هايبقى بجانب عملك الأساسي ...

وبعدين في المشاريع التجارية مافيش حاجة إسمها تدر ربح في فترة وجيزة أو أسترد راسمالي خلال سنة أو سنتين بالكثير .. لإن من أبسط مباديء السوق إنه متقلب ولا يرسى على حال كما إنه يتعرض لظروف عديده منها الطاريء كالحروب والركود مثلاً ومنها ما هو مستمر ..

فجاوب على الأسئلة دي وإحنا في الخدمة ....

ولو ما جاوبتش هاقولك هات القرشين دول أدورهملك في لاسوق والربح يبقى فيفتي فيفتي

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

....

انا ايضا ابحث عن مشروع استثمر فيه اموالى لكن مش عارفه ما المشروع المناسب

هل يمكن ان تفيدنى يا سى السيد

وأنا هذه أجندتى فى التعامل

أولا لا اريد شريك

ثانيا أعيش خارج مصر

اريد ربح مضمون ولكن حلال طبعا

معى مائة الف جنيه فقط -تحويشة العمر-

اريد الاستثمار فى مصر لأنى سأرجع للأستقرار فى مصر خلال عام ولكن لن أستطيع مباشرة المشروع بنفسى لظروف خاصة

انا اسفه يا استاذ اسامه اننى تدخلت بهذه الطريقه ولكن لا تجيب على يا سى السيد الا بعد ان يجيب الأخ اسامه على اسئلتك

شكرا

رابط هذا التعليق
شارك

الاخ اسامه

اولا اذا كنت ستظل خارج مصر فنصيحه لا تستثمر اموالك وانت بعيد

ويكون الافضل استثمارها تحت البلاطه :P

بكلمك جد فعلا

اما اذا كنت بتفكر فى الرجوع الى مصر يبقى تشوف انت اختصاصك فى ايه او ايه المجال اللى ممكن يمشى حاله معاك وكمان لا انحصك بان تدخل شريك مع اى حد اسال مجرب mfb:

حتى لو هتبتدى مشروعك صغير وكمان هل هتستقر فى بلدك يعنى مثلا القاهرة او اسكندرية او اى محافظة اللى انت منها اذا كدا يبقى برده تشوف ايه المجالات اللى ممكن تنفع فى البلد وماشى حالها لان ذى ماقولت لك عشان تكون مرتاح وعارف شغلك ماشى ازاى وفلوسك فين لازم تكون موجود

سيبك من اللى يقولك ملكش دعوة وانا هعملك وهكسبك واشغلك فلوسك والكلام ده اوعى اوعى

وكلامى ده عن تجربه شخصية ( وادينى دلوقت بنفخ فى الزبادى :P )

وعلى فكره اذا قدرت تجاوب على اسئله الاخ الفاضل سى السيد

ممكن نقدر نساعدك ونتشاور معاك فى الموضوع بشكل اوسع

تحياتى

وبحبك وحشتينى ... بحبك وأنتى نور عينى

ولو أنتى مطلعه ... عينى بحبك موووت

مــــــــــصــــــــــــــر

رابط هذا التعليق
شارك

الاخ اسامه

لقد قراءت لك فى موضوع تانى عن فكره لمشروع فى مجال تدوير المخلفات وعمل اعلاف من مخلفات القطن والذره

فكرة رائعه وايضا فكره الخميرة برده جيدة

طب ياعم ما انت عندك مشروعات ممتازة اومال ايه بقى :P

وفيه ايضا مشروع يشبه مشروع تدوير المخلفات ولكن هذه المره ليس لعمل اعلاف ولكن لعمل ( الكرتون )

وتوزعها على المصانع طبعا باتفاقيات وتعاملات

اكيد كل المصانع اعتقد بتحتاج لتخزين وتغليف بضائعها على سبيل المثال

مصانع الاجهزة _ المعلبات كدا يعنى

كله بيحتاج الى الكرتون

وعلى فكره اعرف شخص فكر فى هذه الفكرة ولكنه لم يستطيع تنفيذها لظروفه

بس طبعا الواحد قبل ماينفذ اى مشروع اعمل له دراسة وشوف تكاليفه وشوف مدى فكرة نجاحه بالاسواق

والله الموفق باذن الله

وبحبك وحشتينى ... بحبك وأنتى نور عينى

ولو أنتى مطلعه ... عينى بحبك موووت

مــــــــــصــــــــــــــر

رابط هذا التعليق
شارك

حول نص فلوسك استرلينى و اشترى بيهم اسهم فى بريتش بتروليم و النص التانى

بالمصرى و حطه فى البنك الاهلى المصرى العائد المتوقع من الاتنين حوالى 9 فى الميه و هتكون مهدج الفلوس على الاسترلينى و الجنيه ماسك الدولار ففيها تقليل للخطر و انت راجل محاسب يعنى مش هتغلب فى لعب السوق

و بكينا.. يوم غنّى الآخرون

و لجأنا للسماء

يوم أزرى بالسماء الآخرون

و لأنّا ضعفاء

و لأنّا غرباء

نحن نبكي و نصلي

يوم يلهو و يغنّي الآخرون

رابط هذا التعليق
شارك

أولاًَ أنا أتفق تماماً مع رأي أختنا بنت النيل بإنه من الأفضل إن الواحد يكون جنب مشروعه وبيديره بنفسه أو على الأقل متواجد في قلب الأحداث حتى لو كان هناك من يدير له هذا المشروع .. لإن ده آأمن وبيخلي الواحد بيتصرف بشكل أسرع

إنما لو واحد معاه قرشين وعايز يستثمرهم فأنصحه بالنصيحة البديهية اللي إتعلمناها زمان وإحنا صغيرين وهي " لا تضع البيض كله في سلة واحدة " عشان ما ترجعش تندم لما البيض كله يتكسر وما تلاقيش حتى تعمل قرص أومليت :P

طيب إنت لسه راكب دماغك وعايز تستثمر .. يبقى ما تحطش في دماغك حكاية جني الربح السريع أو إسترداد رأس المال في وقت قصر .. لإن ده بيعيشك في أوهام وبيخلي نفسك قصير وممكن مع أول هزة - وده وارد في التجارة - تتعقد والدنيا تسود في عينك وممكن تصفي المشروع بخسارة قوام قوام

التجارة عايزة نفس طويل وحب مغامرة وأعصاب حديد .. وفوق ده كله طبعاً وقبل كل شيء المشروع لازم يكون مدروس عشان ما تبقاش بترمي فلوسك في التهلُكة ..

دلوقت ممكن أجاوب على سؤال الأخ أسامة وأختنا عائشة عبد الرحمن أو بنت الشاطيء mfb: .. أما بنت النيل فشكلها تاجرة قديمة وممكن إحنا اللي نتعلم منها

- إنت دلوقت يا أسامة معاك مبلغ 200 ألف جنيه .. وده في حد ذاته كويس ... وفي نفس الوقت عايز تمسك العصايه من النص .. يعني عايز تبقى شغال في الغربة ولك داخل ثابت .. إلى جانب المشروع الذي ترغب في إنشاءه في مصر واللي بالتأكيد لازم يدر عليك دخل .. أومال إنت فاتحه لله والوطن ..

يبقى لازم تفكر في حاجة مخاطرها قليلة وفي نفس الوقت لا قدر الله لو حصلت خسارة يبقى ما تجيش على رأس المال

يبقى عليك وعلى

مشروع الشقق المفروشة

ما تستغربش

اللي نزل مصر في السنوات الأخيرة هايعرف قد إيه بقت مُعاناة إن الواحد يلاقي شقة مفروشة كويسة وسعرها معقول وفي منطقة كويسة .. ده إحنا المصريين .. يبقى ما بالك بالسياح الأجانب وخصوصاً العرب اللي تزايدوا عندنا بشكل كبير في السنوات الأخيرة وخصوصاً أيضاً مع التوترات الحاصلة في المنطقة وبعد ما بقى العرب للأسف مشبوهين في الغرب .. فالكثير والكثير جداً بقوا يفضلوا مصر .. لإنخفاض أسعار الخدمات بها .. وكمان هو لو معاه 5 آلاف دولار .. يقدر يعيش إسبوعين ولا 10 أيام بتوع الإجازة ملك زمانه .. ولإن العرب بشكل عام وأنا منهم بيفضلوا الشقق المفروشة عن الفنادق لإنها أفضل من حيث الوسع والإمكانيات اللي بتتوفر وكمان عشان السعر

إذن فهي مشروع ممتاز جداً لو توافرت فيه شروط معينة :

1- موقع كويس ( ما أروحش أخد شقة في الدرب الأحمر لا مؤخذه وأوضبها وأقول عايز أأجرها مفروش للسياح ) إذا الموقع لازم يبقى في المناطق المُحبذة للسياح بالقاهرة زي منطقة التحرير والأماكن المحيطة بها زي الزمالك والعجوزة وجاردن سيتي .. ويا سلام لو مدينة نصر أو مصر الجديدة .

2- توضيب وديكورات كويسه - ودي غلطة بيقع فيها أصحاب شقق كثير جداً وهو إن الشقة بيبقى موقعها كويس لكن للأسف بيروح جايب فيها أثاث تجاري وسريرين تعبانين على دولاب مخلع وحلتين في المطبخ وشوية ملايات تحس إن في ناس ميتين ناموا عليهم قبل كده .. ويقولك عليها شقة مفروشة ... وعلى فكرة الديكور والعفش النضيف ما بيتكلفش كثير لو إتعمل بشكل صح وغير مبالغ فيه .... في نقطة كمان في مسألة التوضيب وماحدش بياخد باله منها كثير ... وهي إن ذروة الموسم السياحي في مصر هو شهور الصيف 6 ، 7 ، 8 ونقول 9 ... والدنيا بتبقى حر ورطوبة موت .. ومع ذلك تلاقي شقق كثير ما يعرفوش حاجة إسمها تكييف .. يبقى اللي جاي يأجر منك شقة كإنه هايدخل سونا يتحمص فيها .. ومع إن أسعار المكيفات في مصر بقت في الأرض نظراً للتنافس الشديد بين الشركات الموزعة ... يبقى اللي خلى عندك شقة في منطقة كويسة وموضبها إلى حد ما كويس .. طب يا أخي إصرف لك 10 آلاف جنيه كمان وهات 3 تكييفات محترمين ونطورهم في الشقة يعملوا منظر وكله على قفا الزبون .

3- إدارة كويسة .... يعني يا سلام لو عندك واحد محامي صاحبك يتابع لك الموضوع عشان المشاكل اللي ممكن تيجي من ورا الشقة المفروشة اللي غالباً لازم تسجلها في أقرب قسم شرطة على إنها بتتأجر مفروش .. أو حد قريبك ثقة يدير لك الموضوع بنسبة معينة أو مرتب .. وكفاية توصي كام سمسار في المنطقة اللي فيها الشقة وهما يجيبوا لك زباين للصبح ....

يُتبع

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

يبقى لازم تفكر في حاجة مخاطرها قليلة وفي نفس الوقت لا قدر الله لو حصلت خسارة يبقى ما تجيش على رأس المال

كلام سليم وواقعى فى حالتنا هذه وبعد إذنك ننبه ان هناك أيضا مخاطر موجودة فى هذه الحالة وإن كانت نتائجها أقل قد تؤثر على العائد منها

مثلا :

- لن يمكنك تأجيرها خارج الموسم إلا إذا كانت فى أماكن معينة وأعتقد أن سعر تللك الشقق تتخطى المبلغ المذكور أعلاه بكثير

- لوفرشتها فرش ممتاز واتت عائلة بها أطفال ممكن جدا يحدث تلفيات للمكان وفى هذه الحالة لابد من دفع رهن قد يكون مبلغ كبير قد يرفض البعض دفعه

- لابد من توقع مشاكل أمنية وخلافه فلا بد من إختيار الزبون وهذا لايمكن التحكم فيه

من وجهة نظرى الشخصية انه قبل راس المال والدراسة الإقتصادية وإختار المشروع الصحيح فلا بد من وجوود

الحظ

اى لابد ان تكون مسعد فى التجارة وفى الأول والأخر توفيق من الله

كنت دائماً ما أقول ياأهل مدينتنا : أنفجروا أوموتوا

أما وقد إنفجرتم و ثورتم : فأنتم أجمل وأنبل وأشجع شباب أنجبته هذه الأمة!!! م الغزالى

رابط هذا التعليق
شارك

اذا كان لي الكلام بعد الساده المحترمييين

...............................

..............................

الاستثمار في مصر يخضع لمشاكل ومعوقات بالجمله

ولكن الاسهل في مصر العقارات واراضي البناء والعمارات السكنيه

وهناك كما قال السيد المحترم سي السيد الشقق المفروشه

وياحبذا لو مكان به جامعه ودراسه للطلبه

فهذا افيد واريح واسهل انواع المفروش

اراضي البناء تحتاج الي تقصي وحذر في الشراء

..................................

..................................

واي مشاريع اخري تحتاج الي وجودك والي الخبره

وتتدخل فيها الحكومه بكل انواع الضرايب والمعوقات

........................

........................

وفقك الله ووفقنا جميعا

يامصر... يامصر...يامصر

ياااااااااااااااااااااااااااااامصر

رابط هذا التعليق
شارك

اولا : هل تعتقد ان 200 الف جنيه يحققوا لك مشروع متواضع حتى ولو كان شقه للايجار المفروش للسياح

ثانيا : ما هى المشاريع التى تحقق عائد سريع لرأس المال غير مشروعات التغذيه وبالتالى عليك البحث فى هذا المجال

ثالثا : لا انصح بتركك عملك فى السعوديه اثناء اقامتك لمشروعك حتى ولو سرقك القائم على الاشراف على مشروعك ... لان عملك فى السعوديع يعتبر غطاء مالى لمشروعك اذا حدث شىء غير متوقع

رابعا : بهذا المبلغ لا اجد لك نصيحه غير عمل محل لبيع الساندويتشات الروشه .... اى ان يقوم الزبون بتصنيع الساندويتش بنفسه بالاختيار من عدة اطباق معروضه بفن وهندسه فى ثلاجه معروضات نظيفه وسط ديكور بسيط ونظيف ( سيراميك ملون مثلا)

عدة اطباق من الدجاج المشوى و المقلى والمطبوخ بالكارى والمطبوخ بعدة نكهات غريبه

طبق تونه بالمايونيز والذرة المسلوقه

أطباق اجبان متعددة

أطباق لحوم باردة متعددة

سلطات متنوعه وغريبه

لحوم مشويه او بالكارى او الماشروم او اى نكهه غريبه

اطباق أرز ( كارى وبريانى وبالماشروم والبيض وبالخضروات الخ)

جاتوة

مناقيش

دانش باسترى

كام بنت حلوة بزى موحد ملون بالالوان الفاقعه تخدم على الزبائن ( عادة سيكونون من الشباب)

دهان المحل اما باللون الاحمر او باللون البرتقالى لانهم احسن الوان المطاعم التى تهيج عقل الزبون للمأكولات السريعه

تعزم اولادى مجانا لمدة سنه

ومن المستحسن تأجير المحل لمدة سنتين مع افتتاح اكثر من فرع لو مشى معاك الحال وبرضو عن طريق التأجير فأفتتاح عدة فروع فى اماكن متفرقه احسن كثيرا من شراء محل واحد مهما كان ايجار تلك المحلات

لو فشل هذا المشروع عبىء مياة الحنفيه فى قزايز وبعها هو يعنى انت اقل من بركه ولا هى احسن منك

رابط هذا التعليق
شارك

جزا الله خيراً كل من تكرم بالنصح والإرشاد وجعله الله في ميزان حسناتكم

أما أنا فأود إن شاء الله النزول النهائي لمصر في صيف 2007 والله اعلم فقد استمر في عملي إن لم أجد بديل

وعلى ذلك فسوف أقوم بمشيئة الله بعمل مشروع خاص أديره بنففسي ويكون نواة لمشاريع أكبر

فى العام الماضي ولله الحمد قمت بمشاركة أخي في تجارته بنسبة 50% والتجارة في مجال الأعلاف والأسمدة

وأنا أرغب في التوجه للتصنيع وفكرة في تصنيع الخميرة الطازجة وقد طرحت هذا الموضوع للنقاس المستقل واعتقد انه ذو ربحية ممتازة والمنافسة فيه تنعدم تماما وما اريده في هذا المجال هو مهندس كيميائي يدير المشروع معي براتب 1000 جنيه بشرط العمل في نفس المجال لمدة خمس سنوات على الأقل

وللحديث بقية .............. تابعونا ...............ز وابقوا معنا

رابط هذا التعليق
شارك

الاخ الفاضل / سى سيد

بتقول عليا تاجرة شاطرة ده اكيد اصلى بورسعيدية وانت عارف بورسعيد كلها ملهاش غير التجارة والبيع والشراء

ونفعنى انفعك :P :P

وعلى فكره فكرة الشقق المفروشة انا عملاها فى القاهرة اخذت شقة نظام دف تقسيط واجرتها مفروش وباخد ايجارها وادفع قسطها كل 6 شهور صحيح مفيش منها عائد دلوقت بس مش مشكلة فى الاخر انامستفيده خدت شقة ببلاش اسمها شقتى والمستاجر بيدفع تمنها وبعد سداد حقها اصبحت ملكى شغل على كبير اومال ايه احنا بنلعب :D mfb:

وعلى فكره برده فى بورسعيد بنعمل كدا مع شقق نظام البنوك استلم الشقه من البنك واقوم بتاجيرها وهكذا

بس كل اللى عليا ادفع مقدم العقد فقط

بصراحة هى فكره ممتازة فى الوقت الحاضر وكمان مش مخسرة لاى شىء بالعكس

وعلى فكره كمان حكايه المطعم دى برده كويسة من المشروعات اللى مش بتخسر لان الناس مش بتبطل اكل وخصوصا انها اصبحت موضه لشباب اليومين دول

بس مش عارفه حسه ان المشاريع دى مش هتمشى مع اخونا اسامه من الواضح من كلامه انه ريفى طبعا مع احترامى الشديد له ولا اقصد اى شىء ولكن لانى متاكده من انه شخص صاحب عقلانيه كبيرة سيستوعب قصدى من ذلك ومن قولى انه ريفى لان اللى فهمته انه فى مجال الزراعه والاعلاف وما شبه ذلك على درايه كبيرة لذلك هو دائمايفكر فى مثل هذه المشاريع وفكرته لمشروع الخميرة دى برده كويسه بس برده نرجع ونقول عمل الدراسة قبل اى تنفيذ وعدم الاستعجال على الربح

وبحبك وحشتينى ... بحبك وأنتى نور عينى

ولو أنتى مطلعه ... عينى بحبك موووت

مــــــــــصــــــــــــــر

رابط هذا التعليق
شارك

الاخ الفاضل اسامة

اولا ماشاء الله لم يبخل الاصدقاء عليك بصادق النصح انا صديقى اعتقد ان من يبدأ استثمارا يجب ان يجلس لمشاهدة ما يدور فى السوق المصرى ويراقب عن كثب فلا يوم هنا يشبه الاخر ولعملى فى مجال يمس السوق ورواج منتجاته بشكل مباشر اجد ان الاقتصاد المصرى بشكل عام فى حالة ازمة وانك يجب اولا ان تتأنى وثانيا ان يكون هذا المبلغ فائضا عن حاجاتك الاساسية فالحصاد فى مصر ليس قصير الاجل وفكرة تدوير رأس المال ليست ناجحة هنا كما تتخيل حتى الطباعة والدعاية تسدد بلآجل فى الوقت الحالى لا اقصد احباطك صدقنى

تمسك بعملك لتوفر رأسمال كاف لاستثمار قوى ووفر حاجاتك الاساسية والتى تتملف مبالغ اصبحت طائلة الآن وانظر بترو للسوق والبنوك فالفوائد البنكية تنخفض بشكل مرعب واعلاها لايتجاوز 9.65 بالمائة او 10% بالنسبة للجنيه المصرى وسعر العملات شبه ثابت والوضع مقلق ومحير بلا مخرج للاقتصاد سوى رؤوس الاموال الحرة واشياء اخرى كثيرة لن اتفلسف فأنا مجرد مشاهدة لكنى اوجه خالص النصح وكما ذكر اصدقاؤنا مشاريعك التى اقترحتها فبلا ربما تحقق نجاحا رائعا فقط ان اشرفت عليها بنفسك ودرست سوقنا وخطط التوزيع والتسويق بشكل جيد

اتمنى لك كل الخير

عندما تشرق عيناك بإبتسامة سعادة

يسكننى الفرح

فمنك صباحاتى

يا ارق اطلالة لفجرى الجديد

MADAMAMA

يكفينى من حبك انه......يملأ دنياى ....ويكفينى

يا لحظا من عمرى الآنى.....والآت بعمرك يطوينى

يكفينى .....انك........................تكفينى

رابط هذا التعليق
شارك

أنا هاكمل كلامي علشان تبقى دراسة وافية وكاملة للمشروع ده .. ودي أقدمها لوجه الله للزملاء الأفاضل وخصوصاً أسامه :

- في أجازتي الأخيرة لم أكن أقضيها فقط في الفُسح والتنزه والترفيه .. ولكن برضوا كنت أستكشف السوق وأشوف الدنيا فيها إيه .. على الأقل الواحد ما يبقاش منعزل عن الواقع اللي مصيره يرجع له ... ولإن فكرة إمتلاك شقق وتأجيرها مفروش تُلح عليه من فترة .. فلقد شاء القدر إني كنت اتحدث مع أحد أصدقائي وهو محامي شاب وقالي إن فيه عدة شقق معروضة للبيع في منطقة مصر الجديدة وبالتحديد في ميدان " تريومف " فقلت له تعالى نروح نشوفها

- وبالفعل شفنا 3 شقق في عمارة جميلة وموقعها كويس واحده منهم تقسيمها كان سيء جداً والإثنين التانيين ممتازين ...

- شقة منهما في الدور العاشر ومساحتها 130 متر وسعرها 175 ألف جنيه كاش .. والأخرى في الدور الـ 14 ونفس المساحة لكن صاحبها طالب فيها 150 ألف كاش

- بتاعت الدور العاشر راحت لصاحب نصيبها وهو قريبي وخلص فيها في ثواني معدوده لأنها لقطة .. والأخرى مازلت معروضة للبيع

- طيب إنت لو بقى عندك شقة زي دي بـ 150 ألف ووضبتها وفرشتها بخمسين كمان .. يبقى بقى عندك بداية لإنطلاق هذا المشروع السهل والبسيط والذي يُدر دخلاً معقول جداً جداً ممكن يغطي تكاليفه في وقت ليس بالطويل ..

طب تعالوا نتكلم في طُرق الإيجار المفروش من وجهة نظري ، وهي 3 طُرق :

1- تأجير الشقة بطريقة " قامية نايمة " أعذروني بقى في مصطلحات السوق الدارجة ... يعني ببساطة واحد بييجي يأجرها منك لمدة سنة أو أكثر .. وده له عيوبة وله مميزاته ..

هاتكلم الأول عن مميزاته : أهم ميزة في الموضوع ده إنك بتضمن دخل ثابت لمدة معينة وبتبقى عارف راسك من رجليك .. يعني مثلاً شقة في الموقع ده لن يقل إيجارها عن ( 3000 إلى 4000 جنية شهرياً ) فخلاص كده بترتب أمورك وحياتك .

عيوبه : إن الطريقة دي ممكن تضيع عليك فرصة عمل مكسب كبير في ذروة الموسم السياحي في الصيف ..

2- تأجيرها حسب ما يأتي به السمسار من زبائن ... ودي طريقة لها عيوبها ولها مميزاتها

- مميزاتها : إنك بتضمن من 3 إلى 4 شهور في الصيف إيجار الشقة فيهم مش هايقل عن ( 300 إلى 700 ج في اليوم )

- عيوبها : ممكن في بقية السنة تتأجر ما بين 200 إلى 300 جنيه يومياً لكن هايبقى في أيام ما فيش فيها زباين وبالتالي ما فيش دخل .

3- تأجيرهاً للطلبة وخصوصاً العرب اللي بيدرسوا في مصر .. ودي لها عيوب ولها مزايا أيضاً :

- مزاياها إن الطلبة ممكن يرضوا بأي نوعية أثاث موجودة في الشقة .. كما انهم في فصل الصيف لازم يدفعوا إيجار الشقة حتى لو مش قاعدين فيها وإلا مش هايضمنوا إنها تبقى لهم .. وكمان لها دخل ثابت كأول طريقة .. وبرضوا مش هاتقل عن المليغ الذي ذكرته .

- عيوبها : ممكن الشباب يعملوا مشاكل مع باقي سكان العمارة خصوصاً لو العمارة فيها بنات في سن الشباب وهايبقى فيه صُداع لمالك الشقة ولو كانوا عيال تلفانه ممكن يحولوها إلى مكان مشبوه .

------

شاهدت شقة أخرى في شارع عباس العقاد وتحديداً بجوار بنك فيصل مباشرة ... ومساحتها حوالي 220 م وفي عمارة لسه جديدة ما سكنتش وتقسيمها وموقعها أكثر من رائع ولا يحتاج إلى أي كلام .. وبشوية ديكور ستتحول الشقة إلى تُحفة يتهافت عليها المستأجرين ..

لكن عيبها في سعرها العالي حبتين واللي كان نص مليون جنية ... بس منهم 250 ألف كاش لصاحب العمارة .. والـ 250 ألف الباقيين هو عامل إتفاقية مع بنك فيصل لتقسيط المبلغ بفائدة سنوية في حدود 8 % يعني مع نفس إنت في المبلغ وفوايده وبينك وبين البنك بس التسليم فوري وبمجرد ما البنك يوافق

يعني لو قلنا واحد معاه المبلغ الأول وقسط الباقي على 3 سنوات يبقى هايدفع قسط شهري للبنك في حدود 8 آلاف جنيه .. في حين إن لو كان معاه فلوس باقية ووضب بها الشقة وأجرها .. فأنا متأكد إن الشقة هاتسدد اللي عليها وزيادة .. فشقة في هذا الموقع لن يقل إيجارها اليومي عن 700 وممكن توصل 1000 في اليوم الواحد ... وبرضوا لو أجرتها بنظام سنوي فلن يقل إيجارها عن 8000 ج شهرياً ...

هييييه الفلوس كتير لكن فين النفس اللي تصرف

تحذير هام :

يُمنع على موظفي الحكومة وأصحاب العيال وضعاف القلوب قراءة هذا الموضوع

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

بسم الله الرحمن الرحيم

فقط أردت أن أوفيكم حقكم ... فجزاكم الله خيراً ... وكل من شاركني الرأى وأدلى إلي بنصيحة وأخص منهم حتى الآن :

se elsyed

bentmasria

ahm ali baba

otaka

khedr

بنت الشاطي1

بنت النيل

مـ الغزالي

رابط هذا التعليق
شارك

مسألة مهمة لم يغطيها الحوار حتى الآن هذه المسألة هى "سر المهنة" و يبدو أن السائد أن "الفلوس" هى العامل الأساسى فى الإستثمار و هذه فكرة خاطئة تماما.

ما سبق كان إستهلالا لابد منه

"سر المهنة" أيها الأفاضل ليس مجرد معادلة التصنيع كما يبدو من الوهلة الأولى و لكنها كل المعلومات و الخبرات التى تمكن من القيام بنشاط ما ...... حتى و لو كان "صناعة قباقيب" أو بيع "علب كلينكس" فى إشارات المرور ...

كل الأنشطة تحتاج ل "سر المهنة" قد يتصور البعض أن بيع "علب كلنكس" فى إشارات المرور أمر بسيط و سهل و يستطيع أى شخص القيام به و هذا غير صحيح فهناك تنظيم ما يجب أن تأخذ موافقته على البيع فى مكان ما و عليك أن تعرف أصول التعامل مع أفراد هذا التنظيم و أيا كانت هذه الأصول فهى تمثل "سر المهنة".

الوضع الأمثل أن تشارك شخص ما من قلب المهنة أو النشاط الذى تريد أن تستثمر فيه أو تختار نوع من النشاط يكون لأسرتك خبرة أو تاريخ فيه أو تدخل فى علاقة أسرية "نسب مثلا" مع أسرة لها تاريخ فى هذا النشاط .

للأسف لا توجد - فى مصر - كتب تعلمك سر أى مهنة و لكنك بالتأكيد سوف تجد مصدرا لمعرفة معادلة أى صناعة أو نشاط مثل صناعة الخميرة التى تكلم عنها أحد الأفاضل هنا فى محاورات المصريين و لكن سر المهنة يتمثل فى التفاصيل الدقيقة لتنفيذ المعادلة الصناعية و معرفة كيفية تصريف الإنتاج و هل توجد إمكانية تصريف الإنتاج و من هم المنتجين الحاليين لتلك السلعة (الخميرة) و هل يتم البيع نقدا أو بالأجل .... و مئات من الأسئلة الغير مكتوبة ÷ل تصورك للتجهيزات الفنية مضبوط هل توجد تصورات أخرى للأجهزة و الآلات تستعمل فى مصر مثلا يمكن أن يكون السائد إستخدام تجهيزات بدائية و تكون كافية لتغطية السوق و تكون تجهيزاتك عالية التكلفة !! تماما مثل الفرق بين الأدوات التى يستخدمها "الأسطى بلية" الميكانيكى مقارنة بأجهزة توكيلات خدمة السيارت الحديثة .

أعرف أن مداخلتى حتى الآن ربما تكون ذات مردود سلبى بالنسبة لك و لكنك أكيد تعرف أن أسهل إجراءات الإستثمار هى الشراء و الإنفاق.

أستطيع أن أضع سؤالك فى صيغة ما هو الإستثمار الملائم لموظف يعمل فى الخليج و ليس له خبرة فى السوق المصرية.

نفس السؤال يمكن أن ينطبق على ألوف الموظفين المصريين و الذين تذهب مدخراتهم إلى الإنفاق السفيه.

ببساطة شديدة و من قديم الأزل الإستثمار فى العقارات هو الحل الذى يختاره الجميع لأنه و ببساطة شديدة أن العقارات عبارة مستودع جيد للقيمة و قيمتها تتزايد بإستمرار.

موضوع الشقق المفروشة يحتاج أيضا إلى سر المهنة لأن المسألة ليس بالبساطة التى تبدو بها.

بعض من أعرفهم بالخليج يقومون بشراء الشقق و "تسقيعها" أو الإنفاق عليه فى بعض التشطيبات و إعادة بيعها و هذا النشاط أعرف أنه كان موجودا دائما شراء أو بناء عمارة ثم بيعها.

و بعض من أعرف يشترى دكاكين و هذه تكون أسعارها عامة قليلة و لكنها تباع بعد فترة قصيرة بربحية مرتفعة.

أتعشم أن أكون قد ساهمت فى إثراء الموضوع

مواطنين لا متفرجين


رابط هذا التعليق
شارك

عندما تحدث الزميل العزيز عن تصنيع الخميرة فى الحقيقه خطر على بالى شيئين

اولهما كيف يمكن لمستثمر الاستثمار فى صناعه لا يعلم شيئا عنها اللهم إلا ان والدته ارسلته ذات مرة للبحث عن منتج هذة الصناعه ... والشىء الثانى هو اننى اقنغت نفسى ان الزميل العزيز وهو خريج تجارة ... لابد وانه يعى جيدا ما يقوله وانه قام بدراسه جدوى مشروعه وعرف بكل خبايا المشروع

عموما لقد ذكرنى كلام الاخ عادل بشىء غاب عن ذهنى وهو مشاريع الصندوق الاجتماعى

حيث يملك الصندوق الاجتماعى مشاريع كامله ومدروسه من الاف الى الياء فى كافه المجالات ... والصندوق يساعد الشباب الجاد فعلا فى الاستثمار خاصه لو كان المشروع يشغل عدد من العمال او المساهميين

مكاتب الصندوق الاجتماعى موجودة على ناصيه تقاطع شارع مجلس الوزراء والقصر العينى

رابط هذا التعليق
شارك

لا افضل موضوع الشقق المفروشه خاصه للعذاب ... لاسباب دينيه ... اهمها انك ستساعد على الرزيله لذلك تجنب الشبهات افضل عندى

يا أستاذ أحمد سيادتك كده زي اللي بيقول إننا يجب منع تجارة السكاكين وأدوات التقطيع خوفاً من إستخدامها في القتل

إيه اللي دخل الدين في تأجير الشقق المفروشة للعُزاب أو غيرهم .. وهل الواحد لما يبقى عنده مشروع زي كده بيقوم كاتب على الباب " شقق مفروشة للعُزاب المنحرفين " ؟

يا سيدي الفاضل .. الأصل في الأشياء حُسن النية .. يعني مش عشان ده عازب يبقى لازم أضعه في قفص الإتهام إلى أن يُثبت براءته ..

إنما بالتأكيد إنت كنت تقصد إن يجب أن تكون هناك ضوابط .. وده شرط من الشروط اللي ذكرتها وقلت إن الشقة يجب تسجيلها على إنها تؤجر مفروش في قسم الشرطة التابعه له .

أعرف أن مداخلتى حتى الآن ربما تكون ذات مردود سلبى بالنسبة لك و لكنك أكيد تعرف أن أسهل إجراءات الإستثمار هى الشراء و الإنفاق.

بالعكس يا أستاذ عادل فأنت تقصد من مداخلتك إن الموضوع لازم يُدرس بشكل جيد قبل البدء فيه .. وده شيء بديهي وإلا الواحد بيبقى بيرمي فلوسه في الأرض

ولكن إسمح لي أختلف معك في موضوع سر المهنة ..

فأسرار أي مهنة ليست بالبساطة التي تجعل الواحد يشربها بمجرد علاقة نسب أو حتى شراكة .. ولكنها تتوقف على التجربة والخبرة .. يعني ممكن أعمل دراسة جدوى لمشروع ما ومع مرور الوقت بالتأكيد سيكتسب صاحب المشروع الخبرة أو التي نسميها " سر المهنة "

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

الحمد لله والصلاة والسلام على رسول الله أما بعد ,,,

فقد عملت في مجال دراسات الجدوى كثيراً وبشكل دقيق وأنا لم أفتح الحوار هنا فقط من أجل منفعتي الخاصة بل ليستفيد الجميع من خبرات من لديهم خبرات ولا يتكلمون إعتباطاً لمجرد الكلام فحسب .

والكل يعلم أن من يود عمل مشروع يجب أن يدرسه جيداً ولكن ما نفعله الآن لمن له علم هو إستقصاء للآراء فنهيب بالجميع أن تكون مشاركاتهم بناءة وجدية وهذا من ضمن أساليب دراسة الجدوى .

وأود التنويه أننا بمشيئة الله بصدد إنشاء مجموعة إستثمارية برأس مال مليون جنيه كبداية مقسمة على عدة مشروعات في مجمع صناعي حديث .

وبخصوص المشاريع التي سيتم تنفيذها بمشيئة الله فهناك مشاريع تجارية حالياً تعمل منذ أربع سنوات وسوف نستفاد من هذه المشاريع في مجال التسويق لما إستحوذت عليه من سوق وعملاء دائمين في إنتاج بعض المنتجات كبداية والتي يقبل عليها هؤلاء العملاء كخطوة نحو التصنيع .

وندرس حالياً بعض الصناعات الأخرى وكما قلت لكم سالفاً صناعة الخميرة الطازجة والذي أتعجب منه هو حكم البعض السريع على هذا المشروع فلله الحمد المشروع تمت دراسته بشكل جيد وبعائد دخل إن شاء الله لا يحلم به أي مستثمر فسوق الخميرة واسع المدى ويشمل العالم كله وبالطبع الخميرة لا تحتاجها ربة المنزل فقط بل تحتاجها المخابز والفنادق بل وتعدى إستخدام الخميرة حالياً في أشياء أخرى ومن يتابع هذا المجال يعرف الكثير عن هذا الموضوع .

وأنا لم أفتح الحوار هنا إلا للإستفادة من خبراتكم وآراؤكم البناءة وليس لتثبيط الهمم .

وبخصوص الشقق المفروشة والمطاعم وتغيير العملة والمشاريع الأخرى والتي تحمل الصفة الشخصية في الغالب فليس لدينا نية لمثل هذه المشروعات في الوقت الحالي .

وهناك مشاريع قائمة حالياً وهي :

1- تجارة الأعلاف والأسمدة الخاصة بأكبر الشركات في مصر ومنها شركة أبوقير للأسمدة ونحن بصدد الحصول على توكيل عام منها إن شاء الله .

2- تجارة أجهزة الكمبيوتر والجوالات الجديد والمستخدم وتم بحمد الله إفتتاح المركز الرئيسي .

3- تم إنشاء وتشغيل شبكة إنترنت مركزية بالمنطقة المتواجدين بها كبداية لتوسعها على مستوى أكبر وهذا المشروع نبي عليه أمال كبيرة لتعميمه على مستوى الجمهورية بمشيئة الله .

ويوجد مشاريع أخرى جارى دراستها محاسبياً وإقتصادياً وتسويقاً وبالطبع فنحن لم ولن نقتحم أي مجال إعتباطاً بدون دراسة وبدون وجود الخبرات والكفاءات التنفيذية لإدارة المشاريع المزمع تنفيذها وجاري حالياً دراسات الجدوى على عدة مشاريع وفي عدة توجهات , والله الموفق .

شكراً للجميع ..... ولكم تحياتي .....

رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة

×
×
  • أضف...