اذهب الي المحتوي
ArabHosters
achnaton

بعد غرق العبارة .. وقطار الصعيد .. مفيش غير الدموع !!!

Recommended Posts

بسم الله الرحمن الرحيم

دمعت عيناى وانا أستمع الى أخبار حادثة السكة الحضيض .. وتذكرت حادثة قطار الحريق .. وطائرة مصر للطيران.. والعبارة .. ودارت فى رأسى عدة أسئلة .. هى إيه العبارة .. ؟؟؟ ليه النحس راكب المحروسة ..وليه الشعب ساكت على هذه العصابة المنجوسة ..لقد كنا ثانى دولة فى العالم إستخدمت السكك الحديد ..ويوم حادثة قطار الحريق .. ظهرت بوضوح جدا الصورة .. ومن يومها واحنا قاعدين نسمع فى تصريحات ..وتجديد لهذا المرفق واصلاحات ..؟؟؟ ولجان ومهندسين واعتمادات ومرتبات !! آخرتها إيه يا حكومة الغم الكبير .. مفيش فلوس ..والخزينة مديونة.. أمال جيش الامن المركزى صرفتم عليه منين .. ؟؟؟ خلاص كده كفايه .. بلغت الحلقوم .. والسما كلها اتملت بغيوم !! يوم حادثة قطار الصعيد عرفنا أن مرتب رئيس مجلس الادارة لهذا المرفق ربع مليون جنيه ؟؟ أرفدوه مالوش لزمه .. الوزير يدير المرفق من مكتبه والمهندسين والعمال موجودين .. هم يتولوا بهذه المرتبات الاصلاح والتجديد ولو شوية شوية .. مفيش ميزانية لضمان الامان للمسافرين .. وبتصرفوا 60 مليون على نقل تمثال رمسيس ؟؟ ومن له الاسبقية ؟؟ اصلاح ما خربته الحكومات المتوالية .. ولا التباهى بنقل تمثال ..

عاوزين كام مليون لتجديد هذا المرفق .. ؟؟ رئيس مجلس إدارة الاهرام السابق وحده كان بيهبر 3 مليون فى الشهر .. استردوا حق مصر منه من المبالغ المنهوبه .!!!

شركة مصر للطيران وحدها بتصرف مرتبات كام فى الشهر للواءات طيارين على المعاش ..!!

شوفوا انا استأذنت المدام فى عشر دقائق أخش على النت ..ومش قادر غير أن استعيد ما كتبته يوما ما من سنوات

وايضا أثر حادثه من الحوادث .. رغم أن أكبر حادثه هى ما تعرضت لها كل مصر بهذه الوزارة ...,

وقد قلت يومها :

مات الضمير ..! ويارتنا كنا عالجنـــاه

قبل ما ياخد ضحايا الطيارة والقطر للعدم وياه

وسابنا نبكى ناس غرقت وناس ولعت

وناس كتير مش لاقية حتى المش يا ولداه

-----------------

مات الضمير ..! وساب الناس كلها فى ازمة

اجدع موظف شريف ..مش قادر يجيب جزمة

ويوم ما يفكر يجيب للولد بدله والمدام فستان

تبقى مصيبة وحطت عليه مالشعر للجزمة

----------------

ما ت الضمير ..! وكنا احنا السبب فى وفاته

لما اصابه المرض وضاعت بعض اعضاءه

وقعدنا نبحث له عن ايد يضرب بيها

أو حتى عين يشوف بيها .. لكن كان الجزام صابه

--------------------

مات الضمير ..! وقبل ما يموت ياما فرفر

فى ايد سراج الدين وعم على قرقر

وكل من صادروا ماله بعد عرق وكفاح

آل إيه قانون اشتراكى والرئيس قرر

--------------------

مات الضمير ..! ويوم ما مات بكينــاه !!

وكل مواطن شريف تمنى يروح ويــاه !!

فبعد موت الضمير نعيش ازاى ؟..

فى جو فســـدت أرضيتــه وسمـــاه ؟؟؟

--------------------

مات الضمير ..! والشرفا قالوا نعمل للفقيد دا ضريح

ونجيب مؤذن ينادى بالثورة والتصحيح

رفض الموظف المرتشى بعظمة وكبرياء

وقال السفيه المنافق ..لأ ..يلزم لكم تصريح ؟!

---------------------

مات الضمير ..! وماتت معاه الفضائـــل ؟

ورفضوا بناء الضريح .. وحطوا ميت حائل

مادام مفيش لحاليح أو شقة تمليك أو سنيورة

يبقى الجرى والسعى من غير واسطة ..بلا طائل

---------------------

مات الضمير..! والحقيقة دا ماماتشى ..دا تم اغتياله

وراح لرب العباد يشكى ليه حالـــه

لقى غلابا كتير من مصر

على باب الكريم بيبكوا قدامـــه

---------------------

مات الضمير ..! ولما شاف الغلابا بتبكى

بكى تمام زيهم .. وقعد كمــان يحكى

على اللى شافه فى ارض مصر المنحوسة

من نفاق وسرقة ونهب وعنطزة تركى

----------------------

مات الضمير ..! وقالولوله فى الجنة ما تبكيش

اللى بيحصل فى مصر النهارده مش حايعيش

وبكره يعود ولاد مصر الفراعنه

يبنوها من اول و جديد ويسعدوا الحرافيش

----------------------

مات الضمير ..! وعمر الفراعنه ما سرقوا رغيف جارهم

وعمر الصعايده ولادهم .. ما اتقفل دارهم

ولا عاش بناتهم منافق ولا نصاب

ولا مرتشى كذاب .. وبيخافوا من عارهم

-----------------------

ويا خسارة يامصر .. اللصوص بيحلبوكى .. كل يوم ..وكل شهر .[/size]

تم تعديل بواسطة achnaton

شارك هذه المشاركه


رابط المشاركه
شارك

ده أنتقام ربنا منا .... أحنا شعب من اكبرنا الى اصغرنا حرامى .... مفيش شريف .... وبكره تعرف حجم الكوارث اللى ربنا راح يبتلينا بيها .... ( لنذقهم من بأسنا ) حتى نتضرع اليه ..... أسلامنا وصلاتنا لافائدة منها ونحن نعبد غير الله .... ونخاف من غير الله ..... لا نتقيد بشرع ولا قانون ... نعبد الدنيا ونخاف عليها وكأننا لن نموت ولن نحاسب ..... الرحمة لا نعرفها ... كل شيئ فى حياتنا بكم الكيلو .... الشرف .. كلمة قديمة من التراث ... المسلمين تهتك أعراضهم وأطفالهم يذبحون وأئمة مساجدنا ( ربنا ينتقم منهم ) فى خطب الجمعة يقارنوا من الاجمل محمد ولا يوسف ... أو ما هى المدة التى يجب بعدها أن نحلق شعر العانة .... دا أحنا ربنا هينتقم منا أنتقام لن نرى مثله فيمن سبقونا

شارك هذه المشاركه


رابط المشاركه
شارك

ايوه ياعمنا اخناتون كلامك سليم

كل بلد وكل قريه وكل نجع هتدفن مواتاها النهارده او بكره والسواد هيتشح بيه قري مصري ومدنها ليس من عزاء فأغلب الناس طيبين وبعضهم لن يعرف حتى من المسئول عن موت أخيه أو قريبه حبيب له هكذا تريدنا الدولة تريد أن يكون 60 % من الشعب لا يعرفون يعني أيه حق ويعني مسئولية ويعني دولة ولا عزاء للمثثقفين

حسبنا الله ونعم الوكيل

أللهم اكتبهم في الشهداء وتقبلهم في الصالحين

شارك هذه المشاركه


رابط المشاركه
شارك

استاذنا العزيز اخناتون

نعتصر الما لما يصيب اهلنا في مصرنا الحبيبه كل يوم و كل دقيقه

اصبحنا ننتظر كل لحظه و لك دقيقه مصيبه جديده و للاسف قد تكون الضحيه فينا من وسطينا

لكن فيه سؤال محيرني مين السبب؟؟؟؟؟؟

احناو لا هما و لا مين

هما بفجرهم و جشعهم و جبروتهم ولا احنا بخوفنا و رعبنا علي عمرنا

و اللي بينطق مننا بينول ايه غير الذل و المهانه...... و الساقيه دايره دايره........ ما حدش قادر يوقفها

لحد امتي هنقول بكره هيجي اكيد سعيد ........ لحد امتي هنحلم بفجر في ليله ما تنتهيش

انا عن نفسي بقول ما فيش...ما فيش بكره ....ما فيش حلم .... و كفايه بقه وهم وخيال

كفايه ده الهم فينا يهد جبال و ما فيش غير الحل الاخير...الحل اللي بس في ايد رب العباد

شارك هذه المشاركه


رابط المشاركه
شارك

عند زيارتى للأستاذ إخناتون مساء اليوم سلمنى المداخلة التاليه لأسجلها فى هذا الموضوع ..مع تحياته للجميع وخاصة الاستاذ ابوعمر .. وائل

-------------------------------------------------------------------------------------------------------

قالت الاذاعة هذا المساء ان رئيس الجمهورية امر بفصل رئيس هيئة السكة الحضيض وايقاف نائبةعن العمل .. ومعاه حق .. وده الذى طالبنا به ..وعقبال ما يفصل رئيس الوزراء الالكترونى .. عشان يخلصنا من اللى معاه ..من وزراء

تصوروا أكثر من جهة واكثر من عالم من علماء مصر عارضوا نقل تمثال رمسيس ..ولكن الوزير " المتمكن " مش عاوز يسمع لأحد .. وكأنه حيدفع ال 60 مليون مصاريف النقل من جيب حضرته الخاص .. ألم يكن هذا المبلغ يكفى لتجديد أجهزة التحكم وتجديد نظام الإشارات الضوئية لخطوط السكة الحديد فى كل مصر .. ولا لازم اللعب بالمليارات ..,وننتظر حتى يتم تمويل مشروع تجديد كل شئ بالكامل آى تجديد كل حاجه حتى القطارات .. وحتى تتمكن الوزارةمن تدبير المليارات .. يموت الناس كالعصافير فى يوم نحس مطير .. لقد كنا زمان بنصنع العربات ومن ما يهل علينا المماليك واحنا الوقت خلاص بنستوردها أسهل ..

بالضبط كما نفعل فى السكر والدقيق وغيره ..نرصد المليارات لإستيراد الجاهز.. ولا نرصد ربع المبالغ لأنشاء مصانع .. او تشجيع المزارعين للتوسع فى الانتاج .. من يوم ما قامت الثورة مفيش مصنع جديد للسكر من القصب اللى ازال الامن الوطنى مئات الافدنه منه فى الصعيد !!!!.. حتى مصانع الحديد .. باعوها ..وضحوا بالمليارات من الارباح .. وقال إيه .. المصانع بتحقق خسائر ؟؟؟؟

فيه حد يتصور ..أنى أصرف عشرات المليارات فى إستيراد السلع الضرورية .. وامتى عندما تطل الازمات برأسها ..ونحتاج .. يقوم الوزير من دول يخرج بالتصريحات .. إطمئنوا حنستورد كل الحاجات ..والشعب حياكل فى رمضان .. طب ما احنا عايشين الازمة من زمان؟؟

ياريت رئيس الورراء يشرح لنا ويفسر .. وزير الثقافة جاب المبلغ دىمنين .. تبرعات ؟؟ ..ولا من جيوب زملائه البهوات .. فى مجلس الوراء .. !!من المرتبات والمكافأت ؟؟ والغريب فى الموضوع .. انه عامل زى واحد مدينا الطرشة .. ومبسوط من طريقة خلف خلاف .. دا حتى جريدتهم القومية كتبت فى بريد الاهرام النهارده تقول ..

فى بريد الاهرام كتب احد القراء :

تقرر إن كان لابد من نقل تمثال رمسيس برغم الاعتراضات الكبيرة فليكن ذلك بواسطة طائرة هليكوبتر بعد أن يتم وضع غطاء متماسك وملتف حول التمثال فيكون النقل أمانا وسلاما علي جدنا رمسيس الذي أتعبناه معنا من ميت رهينة إلي ميدان رمسيس إلي ميدان الرماية إلي الله أعلم‏.‏

أحمد سيف اليزل ـ مدينة‏6‏ اكتوبر

{{‏ محرر بريد الأهرام‏

‏ لاتتعب نفسك‏,‏ فوزارة الثقافة قد صمت آذانها عن سماع أي أصوات معارضة بعد أن أصدرت فرمانها بنقل التمثال‏...‏ ولاترد علي أحد ولو من باب شرح مزايا النقل المزعومة‏...‏ ولم تسمع احدا من المجلس الموقر قد تحمس لطرح الموضوع في مجلس الشعب قبل فوات الأوان‏!‏

تم تعديل بواسطة achnaton

شارك هذه المشاركه


رابط المشاركه
شارك

بسم الله الرحمن الرحيم

202 قتيل وجريح في حادث تصادم قطاري قليوب

مبارك يأمر بتقديم الرعاية الكاملة للمصابين وصرف التعويضات فوراً

نظيف زار المصابين في المستشفيات.. ونتائج التحقيق خلال 48 ساعة

أمر الرئيس حسني مبارك بتقديم الرعاية الكاملة للمصابين في حادث قطاري قليوب وعلاجهم علي نفقة الدولة وصرف التعويضات فوراً وتقديم التسهيلات لأسر الضحايا وقدم الرئيس تعازيه لهم.. أسفر الحادث عن مصرع 58 شخصا وإصابة 144 ونجاة 2400 راكب.. وتحطم معظم عربات القطارين.

وتفقد د.أحمد نظيف رئيس الوزراء موقع الحادث واستمع لشرح من المستشار عدلي حسين محافظ القليوبية حول ملابساته. كما استمع لشرح من الدكتور حاتم الجبلي وزير الصحة حول جهود نقل المصابين وعلاجهم.. وزار د. نظيف المصابين في المستشفيات وأكد علي ضرورة تقديم أقصي الرعاية الصحية للمصابين وصرف التعويضات.

قال إن نتيجة التحقيق ستعلن خلال 48 ساعة. مشدداً علي أنه ستتم محاسبة المقصرين بجدية وصرامة متي ثبت ذلك.. وتقرر صرف تعويضات بواقع 20 ألف جنيه من مجمعة التأمين لأسرة المتوفي وقرر د.علي المصيلحي وزير التضامن الاجتماعي صرف 5 آلاف جنيه لأسرة كل متوفي. وألف جنيه للمصاب.

تم رفع آثار الحادث وانتظمت حركة القطارات بين القاهرة والإسكندرية في الساعة الرابعة عصراً.

وبدأت النيابة العامة تحقيقاتها في الحادث واستمعت لأقوال المصابين وقررت تشكيل لجنة لتحديد الأسباب وتحديد المسئول عنه.

http://www.algomhuria.net.eg/algomhuria/to...ge/detail00.asp

إقالة رئيس هيئة السكة الحديد

قرر المهندس محمد منصور وزير النقل استبعاد المهندس حنفي عبدالقوي رئيس هيئة السكة الحديد من منصبه وإيقاف المهندس عيد مهران نائب رئيس الهيئة للسكة والإشارات لحين لانتهاء من التحقيق في أسباب حادث تصادم القطارين كما أمر الوزير بتشكيل لجنة فنية من خارج الهيئة من أساتذة كليات الهندسة والخبراء لدراسة وفحص أسباب الحادث للوقوف علي ملابساته وتلافي حدوثه في المستقبل يصدر خلال ساعات قراراً بتعيين رئيس جديد للهيئة.. وعلمت "الجمهورية" أن الرئيس الجديد سيكون من داخل الهيئة.. ومن أقوي المرشحين م. أشرف سلامة نائب رئيس الهيئة.

الكلام ده جاء اليوم بجريدة الجمهورية ...

الناس دى بستهبل .. أم المحروسة خلاص تعودت على نظام اليتامى .. ؟؟ وتوجيهات الندامة .. أيام وزير النقل المهندس الدميرى .. خرج برضه بعد حادثة قطار الحريق .. وبقى الحال على ما هو عليه رغم تغيير الوزير .. يبقى فيه حاجة مشتركة بين الوزيرين .. تسبب هذا النزيف المستمر للدماء ..

والعجيب أن هذا الوزير الحالى و رئيس هيئة السكك الحضيض .. صرحوا منذ أيام عندما رفعوا أسعار تذاكر النقل بالقطارات .. أن الهيئة فى حاجة الى اكثر من ثمانية مليار جنيه للتجديد الكامل .. وبيقولوا الكلام ده بعد ثرث سنوات من حرق البنى آدمين فى قطار الصعيد .. ولا آدرى كيف وصل هذا المهندس الى كرسى الوزارة .. إنه يفتقد تماما الى أبسط أصول الادارة !! فهو بحكم مجالسته للساده زملائه برئاسة " العمدة الآلى " رئيس الوزراء الالكترونى .. يعلم تماما أن الخزينه فاضية .. والبنوك زهقت من رصيد ديون الدولة .. يقوم يركن كل الملفات على الرف لحين ميسرة ..

ففى العاده القمة فى آى مؤسسة بتطلب من رؤسات الاقسام أو الادارات وهؤلاء المفترض فيهم إنهم أعلم بصغائر وكبائر الامور فى اقسامهم .. تطلب منهم تحديد مواقع الضعف والاحتياجات .. ويدرسها هو فى إطار معلوماته عن أحوال الدوله وامكانياتها .. ويرتب الاسبقيات فى الاصلاحات ..وحسب ما فى المتناول فى الميزانية يأمر بتنفيذ الاهم ثم المهم ..

وبالقطع رفع اليه رئيس الهيئة ملف سوء حالة نظم الاشارات والتحكم ..ومعه ملفات أخرى كثيرة .. سوء حالة الجرارات .. وتهالك العربات .. و...و... المفروض هنا أن الوزير بيشغل مخه ويأمر بإستغلال ما فى ميزانية وزارته لاصلاح الملفات الاخطر على سلامة الركاب .. أما أنه ينتظر حتى توفر له الدولة كام مليار ..عشان يبدأ مشروع إحلال كامل فهذا ما ترفضه كل قواعد الادارة..

فى تصورى .. أن هذا الوزير هو المسئول الاول والاخير .. إذا كان رئيس الهيئة قد رفع اليه ما جمعه من ملفات مختلفة من مختلف فروع الهيئة ومتطلباتها ..ولم يقيمها هو ويسارع بعلاج مشاكل الملفات التى تعرض حياة الركاب للخطر ..هى دى اهم مهمه للوزير ..

وعضو الوزارة الذى يحتاج الى ميزانية لدرء الخطر عن المواطنين ..ولا يلح فى طلبها ويجبر رئيسه " الألكترونى " على مراعاة أمان الموطن .. فمش معقول .. يبقى فيه 60 مليون جنيه فى الميزنية تخصصها الوزارة النحس دى عشان تنقل تمثال رمسيس ..وتسيب اكثر من 50 مواطن ينقلون مجانا الى الدار الآخرة ..

إن هذا القصور فى هذه الهيئة معروف منذ سنوات بعيدة .. فكيف لا تتمكن الوزارات المتعاقبة من توفير الميزانية اللآزمه..وإذا كانت الوزارة لا تملك التصرف ..فأشرف لها واكرم للدوله أن تقدم إستقالها وترحل ..مش عيب .. ولا حرام ..

العيب والحرام بقى ..هو حكاية تعويض أهل الشهيد ب 5000 جنيه .. على آى أساس ..وباى حساب ..ومرتب رئيس الهيئة 250 الف جنيه ...وقد يقول قائل ان الميزانية لا تسمح والدولة مديونه داخليا وخارجيا .. نقوم نسألة يعنى وزارة النحس دى .. عندها ميزانية للمكافآت السنوية ..للموظفين إياهم .. بتوصل 180000 مثلا لرئيس كل شركة فى وزارة الطيران؟؟؟!!! دى غير المرتبات الخرافية ..

تصوروا المواطن يدفع – مثلا – 50 ألف خلو شقة عشان الساكن يخرج ويسكن هو مكانه .. والحكومة النحس تدفع 5000 جنيه خلو ليرحل المواطن الى الدار الآخرة .. صحيح اللى إختشوا ماتوا .. إنت فين يا صفية .. تغطى المحروسة المنحوسة وتصوتى ..

تم تعديل بواسطة achnaton

شارك هذه المشاركه


رابط المشاركه
شارك

5000 جنيه تعويض روح بنى ادم

هو المواطن المصرى بقى رخيص اوى كده

يعنى مش كفاية الاهمال

وغياب الاهتمام بالسكك الحديد

موضوع العبارة ملحقش يزول ألمه

واهى كملت بالقطرين

ربنا يرحم الموتى

ويصبر أهاليهم

ويشفى الجرحى

ونقول حسبنا الله ونعم الوكيل

شارك هذه المشاركه


رابط المشاركه
شارك

فعلن مات الضمير والعزاء في عمر مكرم

ياعيني على المصري الي تمنة رخيص حتي في بلدة

ياعيني علي المصري الي اداميتة معدومة حتي في بلدة

ياعيني على المصري الي كرمتة مداسة بجذم حكام بلدة

ويفضل السؤال؟؟؟؟؟؟؟؟؟

العيب منا ..!! ولا منهم...!!؟

حريتنا من الماماليك مش ببلاش ...... بس في حد فينا عاوز يضحي بأي حاجة!!؟

ولا كالعادة وانا مالي خليني ماشي جمب الحيط احسن ......

ومدام ******* بعيد يبقا انا في امان ويموت الي يموت ..

ويتهرس الي يتهرس ..الحمد لله ان مكنتش معاهم:)

واللهي احنا نستاهل

ومفيش سلام عليكوا

تم تعديل بواسطة Eldisel

شارك هذه المشاركه


رابط المشاركه
شارك

احكلم قصة سمعتها لمى وعيت على الدنيا

انا كنت ساكن في حي من الاحياء الشعبية الي يتواجد فيها مزلقان قطار (ابو وافية - شبرا مصر) المزلقان دة ياما حصلت علية حوادث موت ... اندمج فيها لحم المارة البنأدمين ( بشر) مع حديد السكة الحضيض(الحديد) وحوادث تصام سيارات كتيرة وقليلة وشكاوي يمين وصحافة شمال .. المهم

ربنا بعت الحل من عندة وفي يوم من الايام بتعدي سيارة تابعة لوزارة الداخلية كانت تحمل عدد من الكلاب (الكلاب) :oاصدي الكلاب البوليسية المدربة تدريب عالي ومكلفة الدولة الشيء الفلاني وعملت حدثة وماتت ياحرام الكلاب ... وصدر قرار بقفل المزلقان وبناء كبري فوقة اسمة كبري ابو وفية

واللهي اسيدنا المسؤلين اقلبهم طيب ... بس احني مبنئدرش

وبندعي المولى عز وجل ان شوية كلاب تركب اي قطر هتحصل فية حدثة عشان المسؤلين يتحركوا

ومفيش السلام عليكوا

شارك هذه المشاركه


رابط المشاركه
شارك

ابدأ منين ؟؟

منين والا منين والا منين ؟؟

امبارح قلت ( بعد ماعرفت الخبر المشئوم من التلفزيون هنا ) ...لما اشوف الفضائية المصرية اكيد حاتقول تفاصيل اكتر ...

و......اتقال الخبر بتفصيل اقل ...لكن ؟؟ ( افاضوا ب....تلقى سيادة الرئيس برقيات العزاء !!!) ....و...واسى سيادته ( بنفسه ) اهل الضحايا ...(( لقيت نفسى بقرب من التلفزيون وبقول للمذيع ب..غل وغيظ ..ياكذابببببببببببب..بطلوا بقى ))

يعنى هو كان لحق يقول لهم شخصيا..و ازاى ؟؟ ...

يعنى هم المصريين دول ما يستاهلوش انه سيادته يروح لحد هناك ( يشد من ازر اهل الضحايا ؟؟ ) ...

نيجى بقى للى حصل فى التلفزيون المصرى ........

طبعا مش بس مسئولين التلفزيون لكن ؟؟ كل مسئولى الدولة .....

اللى اختشوا ماتوا وشبعوا موت ......عالم ما باتحسش ...عالم بيجرى فى عروقها كوكاكولا ....مش دم....

مسئولين مفروض تتعمل لستة طويلة باساميهم ...........رول ......الف متر ...علشان يكفى اسامى كل العصابات ..

ويتعلقوا فى مشانق ....

مشانق على الطريق الزراعى من القاهرة للاسكندرية ......

تلفزيون الدولة لم يعلن الحداد.....

تلفزيون الدولة زهق......( كل شوية حد يموت ...كل شوية حادثة ...ايشى عبارة وايشى طيارة وايشى قطار ..زهقنا بقى )

الفضائية المصرية ...........فيها فيلم الشموع السوداء ...(( عقبال ما تبقى كل الايام اللى باقية من حياتهم سوداء زى اعمالهم ..........اللى بيحصل ده كفر ....كفر.....والله العظيم كفر )) .

قلت يمكن نسيوا .....

انهاردة كله .............عادى...وتمثيليات واعلانات ....

والرئيس مازال يستقبل ....ومازال يضحك ...................................ومازلنا نعانى ..

ويااخى الفاضل اخناتون ....

سبق لنا ان بكينا معك موت الضمير ...

وكنا نأمل فى صحوة .......كنا نأمل فى معجزة ......ولكن ؟؟

أرأيت من يعد بعد موته ؟؟؟

اما ثالثة الأثافى .....

ال 5000 جنيه تعويض (( لأهل القتيل )) ......لأن دول ماتوا مقتولين .......والقتلة (( احرار )..

اقل من الف دولار ....

اقل من الف دولار ............ثمن القتيل .

اقل من ثمن .....................ليلة من ليالى اوتيل خمس نجوم فى اوروبا ....بيروحه كل وزير( او ....زير ) ..

هو وزوجته واولاده للتسوق على حساب ( الشعب ) ومش حقول الدولة ...ويظل لمدة اسبوع على الأقل ...

الصراحة الصراحة ..........

لابد من التعامل معهم كما تتعامل مع الحشرات الضارة ..

مواد حارقة ....واحرقهم كلهم .

تمحى حتى ذريتهم من الوجود ...

هم الوباء الذى سيقضى على الشعب المصرى ...

علموا الشعب كل الموبقات .....حتى علموا الناس .............اللامبالاة وعدم الاحساس ....الناس بقت متبلدة ..

مفيش فايدة ....مفيش فايدة ....مفيش فايدة ...

رحم الله الضحايا .....رحم الله ضحايا مصر .....رحم الله ضحايا الصمت .....

اللهم ارحمنا واياكم ...

شارك هذه المشاركه


رابط المشاركه
شارك

والله يا جماعة بقيت اتمنى تعدى سنة واحدة على مصر بدون وقوع ضحايا للاهمال والتقصير والفساد...

احنا يا ناس بندفن كل سنة المئات ان لم يكن الالوف من الضحايا نتيجة مباشرة للفساد والتسيب اللى فى البلد...

حوادث قطارات وحوادث طريق وعبارات وعمارات بتنهار ... الخ

حرام والله ... لابد يكون فيه حل...

شارك هذه المشاركه


رابط المشاركه
شارك

السلام عليكم ورحمة الله......

مش عارفة ليه افتكرت حادثة الطائرة اللى راحت سوزان مبارك ورمت وردة فى البحر على روح الضحايا - اظن كانوا فرنسيين ؟- مش قادرة اتذكر دلوقت الحقيقة ....

علشان بس نظهر اننا قد كده شعب متحضر ...ومش عارفة ليه برضه حضرنى مثل شعبى بيقول " من بره هلا هلا ..ومن جوه يعلم الله "....يعنى المهم شكلنا قدام العالم - مش احنا تحديدا ..لكن المسئولين (عننا)- اما لو راح مليون من الضحايا جوه البلد ...بدل مايتحدف عليهم ورد وتقاد لهم الشموع ...لا ...يتحدف عليهم تصاريح وتعويضات لا تسمن ولا تغنى من جوع ...ده ان اخدوها فعلا .....

وبمناسبة ال 60 مليون بتوع الحاج رمسيس ...كنت راجعة من بيتى فى مصر الجديدة ورايحة على بيتى برضه فى زايد ..وقلت بلاش الكوبرى خلينى اجرب الشارع ...ومريت جنب تمثال رمسيس وهم ياعينى مكتفينه وناس طالعة عند وشه مش عارفة بتعمل ايه ...الحقيقة انا انتابنى الضحك الهيسترى ..وقلت لنفسى هم مالهم واخدين الموضوع جد كده ليه ..وتعبين نفسهم كده ليه ...هو حد كان اشتكى؟.....وبدأت اتخيل الملايين دى حتروح على ايه ...وبعد شوية تفكير عرفت او توصلت الى انهم حيحولوا رمسيس الى رمسيس الآلى على غرار العمدة الآلى كده ...وهو بقى بعد مايبدأ يمشى على اساس انه روبوت ..حيروح الحتة اللى يحبها ومش بعيد ابدا يروح شرم الشيخ يعيش له يومين .....

ومن هنا نقدر نستنتج ان الملايين دى مارحتش هباءأ.....

اللهم ارفع مقتك وغضبك عنا...........

شارك هذه المشاركه


رابط المشاركه
شارك

هوإيه اللى بيحصل ده ..؟؟ لا والنبى دى عين وصابت المحروسة ..ووزارات المحروسة..ومثقفى المحروسة.. !! انا من ساعة الحادث ده .. لم أنام على سريرى ..وكل البيت زهق منى ..بانام امام التلفزيون وانام وانا اقرأ الجرائد على شاشةالكمبيوتر ..واتفرج على القنوات التلفزيونية المتاحه..وفى جريدة حزب الوفد " الاباظى " حوار مع رئيس هيئةالسكك الحضيض الجديد ..الذى أكد أن مرتب سابقه 230000 جنيه فى الشهر .. وقرر الله يكرمه أن الفساد فى الهيئة دى زى الدبان .. المنتشر فى مصر فى كل مكان .. الخيبة التقيلة بقى ..والمصيبة الاعظم .. اعادة عرض مسرحية قطار الحريق .. اللى كان الفصل الاخير فيها .. إقالة رئيس الهيئة ..وتعيين نائبه رئيسا .. وده اللى عمله معالى الوزير ..هذه المرة .. شال القديم وجاب المساعد بتاعه .. وده اللى مطير برج من دماغى .. يعنى أشيل فاسد .. مساعده بيقول عليه أنه كان بيشترى كل شهر ب 15 مليون قطع غيار بالامر المباشر وبياخد عموله ..أقوم أستعين به .. واحد دارس وفاهم نظريات الفساد ..وعاشها لايف سنوات .. هواللى حيصلح الحال .. طب كان فين لما كان رئيسة بينهب ؟؟ وليه تقوقع ولم يخطر الوزير .. أو المسئولين ؟؟ ؟؟ ومين يضمن انه لن يطبق نظريات الفساد اللى اتعلمها من رئيسة..ما هو راخر كان مسئول .. دول فى الهيئة دى .. عاملين زى شجرة اللبلاب .. تقطع فرع يطلع بداله أثنين ..وإيه بافكار زى الهباب ..وانا اكرر ما قلته ايام حادثة قطار حريق البشر ..المسئول الاول والاخير هوالوزير .. وكل مجموعة الادارة فى الهيئة..ما ينفعش إطلاقا الاستعانه بفاقدى الضمير ..نائب رئيس الهيئة للمشروعات ..يعنى أبواب معالى الوزير أمامه مفتوحه .. وحتى رئيس الوزارة ..وكل أجهزة الدولة المسئوله ..لن يصعب عليه زيارتها ..وشايف وعايش الدود بيأكل فى عضم البلد .. بعد أن أكل جرذان المركب اللصوص لحمها .. أأمن له واسلمه مفتاح الكرار واعينه رئيس للهيئة ؟؟؟ إذا كان وهونائب ..نام على ما شافه ولاحظه من فساد - حسب تصريحاته هو فيه فساد - ننتظر منه إيه ..غير تكرار الموال ..واستمرار سوء الحال .. معندوش حاجه يعطيها ..؟؟ لكن برضه مش هو المسئول .. معالى الوزير .. هواللى لازم يطير ..ولوعنده إحساس ..يستقيل ..!!

النهارده .. برضه فى الاخبار ..حادث جديد مع قطار السياحة حصل فى الصعيد ..ضرب جرار ..وبرضه فيه خسائر .. المزلاقان مفتوح .. الوزير كما قلت فى المداخلةالسابقة .. وزير منظر .. او لا يجيد فن الادارة.. يمكن يكون مهندس عالم ..ولكن العلم شئ ..والادارة شيئا آخر .. واضم صوتى للمنادين بإقالة الوزارة ..

تم تعديل بواسطة achnaton

شارك هذه المشاركه


رابط المشاركه
شارك

================================================================================

نقل تمثال رمسيس يمكن ان نطلق عليه "سبوبة العمر" بالنسبه لوزارة الثقافه..

فالمتحف الجديد الذي سيقام في ميدان الرماية تمويله خارجي ومن اليابان تحديدا

وبالتالي إلتزام الحكومه بمصالحها الشخصيه التربحيه والإستثماريه الخارجية والداخليه اهم بمراحل

من التزامها امام شعبها وتوفير كل الجهود لحل مشاكله المتراكبه

التي اشتكت أدراجهم من وجودها واشتكت ارض مصر من شهداء الإهمال والفساد..

فالدموع لن تسكت صراخ من ذهبت ارواحهم هدرا وبلا ثمن...

فمن يموت هنا في حادث اهمال او ماشابه يعلم انه قد سجل اسمه في قائمة " المذكرو راح بلاش" و "كبيره" ان يغطى بالجرائد قبل ان يأتي حانوتية الشرطة ليكملوا تحقيقاتهم ويدفن وهو متأكد ان مبلغ التعويض سواء من الدوله او الجهه التي تسببت بالضرر لا يمثل سوى بوكيه من الورد تقرره الدوله

كإعتذار يوضع على نعشه...

اما على مستوى المسؤلين في الدولة فهو وسيلة جيده " للتهريب والإحلال "

تهريب من استفاد وتربح من موقعه طوال فترة وزارته دون حساب او محاكمه على حساب تهدئة الرأي العام...

واحلال وجه جديد من نفس البيئه العطنه ليكمل مشوار من سبقوه ويستمر المسلسل إلى ان تحدث كارثه جديده...

يا رب ارحم ضعفنا ....

وارفع غضبك ومقتك عنا يا رحمن يا رحيم..

وحسبي الله ونعم الوكيل

:

:

شارك هذه المشاركه


رابط المشاركه
شارك

محمد القدوسى : بتاريخ 22 - 8 - 2006

ضحايا مجزرة "قليوب" أكثر من ضحايا مجزرة "قانا"، وضحايا مجزرة "سفاجا" من ركاب العبارة التى غرقت فى ساعة أكثر من ضحايا العدوان الصهيوني على لبنان فى 33 يوماً، أما المسئولون عن هذه المجازر وهم: أولمرت، عامير بيرتس، حالوتس، محمد منصور، ممدوح إسماعيل، فيشتركون جميعاً فى صلة الصداقة الوطيدة التى تربطهم بالرئيس مبارك ونجله جمال! .. ونأتى إلى نقاط الخلاف، وأهمها أن شهداء "قانا وأخواتها" كانوا يعرفون لماذا يموتون، ويرحبون بالموت فداء للدين والوطن، أما ضحايا مجزرة قليوب وسفاجا، ومحرقة قطار الصعيد ومسرح بنى سويف فماتوا قبل أن يدركوا أنهم فى معركة، لم يعرفوا أنهم أمام عدو غادر يحصد أرواحهم ويمثل بجثثهم، والمؤكد أنهم لم يرحبوا بالموت فداء للكراسى وحفاظاً على المناصب. أيضاً فإن المقاومة اللبنانية كانت تكبد العدو الصهيونى خسائر فادحة مقابل ما ارتكب من مجازر، أما النظام المسئول عن مجزرة قليوب فلم يدفع أى ثمن مقابل ما جنت يداه الآثمتان، ولهذا تشجع وكرر المجزرة بتفاصيلها فى "الفشن" وبعد أقل من 24 ساعة، ولولا لطف الله فى القضاء لحقق العدو أغراضه، وأسقط فى "الفشن" ضحايا بعدد من أسقطتهم غارته الإجرامية فى "قليوب"!

إن دماء الضحايا معلقة فى رقبة النظام بكامله، أما تمثيلية التحقيقات، واستعراض العضلات بفصل رئيس هيئة السكك الحديدية وإبقاف نائبه، فهزل يشبه "ترقيص القرود" أو هو أقل درجة، فحسب قواعد "نوم العازب وعجين الفلاحة" كان يجب ـ على الأقل ـ أن تمتد يد الحساب إلى وزير النقل "محمد منصور"، لكنه صديق "جمال مبارك" من ناحية، وبطل صفقات حكومية بالمليارات من "دم الشعب" من ناحية أخرى، فلماذا لا يكمل على "لحم الشعب" بالمرة، حتى يكون "لحمنا فى دمنا" على طريقة "زيتنا فى دقيقنا"؟!

"دماء الشعب فى رقبة النظام" المفروض أن هذه بديهية، لكن ـ ولأننا فى سنين سوداء ـ أصبحنا نحتاج إلى "شجاعة ثورية" حتى نصرح بالبديهيات، و"عايزينى أكسبها" على رأى "محمود المليجى" فى فيلم "حدوتة مصرية"؟ دماء الشعب فى رقبة النظام، وفى رقبته هو نفسه (أى رقبة الشعب)، فعلى بن أبى طالب كرم الله وجهه ورضى عنه وأرضاه يقول "إن فى ضعف المظلوم عذراً للظالم"، مثلنا الشعبى يقول "قتيل إيديه ما ينبكيش عليه"، لكننى أبكى ـ بحرقه ـ على هؤلاء الذين تناثرت أشلاؤهم بلا ذنب ولا ثمن، أبكى عليهم ومعهم ولهم، وأجلس على رصيف المحطة فى انتظار القادمين، لهلهم يصلون سالمين فى القطار القادم، ولعلهم يعرفون كيف يدافعون عن أنفسهم.

شارك هذه المشاركه


رابط المشاركه
شارك

قلناها ألف مرة لحد ما صوتنا اتنبح..

الإهمال بيبتدي من تحت ومحدش بياخد باله..

وكل ما حتسأل عن مهمل ياإما يقولولك دة غلبان ، يا إما يقولولك فين الفلوس مافيش إمكانيات..

من المقرف إن الوزير يطالب بتمانية مليار في الوقت اللي الفلوس الموجودة دلوقت مبتستغلش بكفاءة!

زائد إن التدليس الإعلامي ابتدى..

أول هام قصة الدورة التدريبية اللي اتعملت للبيه السواق .. نفس الفيلم المحروق في العبارة ، العنصر البشري على أعلى مستوى ، العنصر الآلي على أعلى مستوى ، ومفيش حاجة إسمها إهمال ، ومصر مستهدفة ومصر مش عارف إيه..

فساد إعلامي بيغطي على إهمال .. وطناش برلماني واستعباط ..

مش طالبين إن عشرين وزير يستقيلوا .. كل غرضي أشوف مهمل واحد في قطاع السكة الحديد يتعاقب قبل ما أموت..

خلص الكلام

شارك هذه المشاركه


رابط المشاركه
شارك

الاهمال مش من تحت الاهمال من من فوق ( الادارة )

لو كان رئيس المصلحة فاسد لازم يكون الي تحتية فاسدين لانة بيجبرهم علي دة اذ كان الاجبار دة مادي او معنوي

لو كان رئيس المصلحة صالح فبيلزم الي حولية علي الشغل الصح وعدم الاهمال في العمل

لكن في كل مؤسسة دلوقت بتلاقي الحبيشة ومصاصين الدماء وبيقسموها مع بعض ولو طلع حد يقول لاْ بينفوة ويلبسولة قضية وينفوة

الغلط الي فينا اني احنا ساكتين عن الحق و(الساكت عن الحق شيطان اخرص)

وعلى رقي المقولة (( يافرعون اية فرعنك قال ملقتش حد يصدني ))

و مفيش سلام عليكوا

شارك هذه المشاركه


رابط المشاركه
شارك

وعلى رقي المقولة (( يافرعون اية فرعنك قال ملقتش حد يصدني ))

و مفيش سلام عليكوا

السلام عليكم ورحمة الله .....

كان فى زمن الفراعنة...لما ملك جديد يتولى الحكم ..كان بيقوم بتخريب وطمس انتصارات الملوك اللى سبقوه وتشويه جدارن المعابد..اللى بيسجلوا عليها انتصاراتهم ...وينسب الانتصارات لنفسه

دلوقت بينقلوا تمثال الفرعون من مكانه وكما قرأت هنا فى المنتدى حيغيروا اسم الميدان الى ميدان مبارك ...ياترى ده اسلوب فرعونى برضه ؟!!

المقولة اتغيرت دلوقت ياديزل ..واصبحت " يافرعون ايه كتفك قال مالقتش حد يفكنى "........

وتتوالى الكوارث على الشعب المصرى ...ويتكتب اسم فرعون الجديد على كل جدران المحروسة ..بس للاسف بلا انتصارات .....(وكأننا عاد بنا الزمن لعصر الفتوات )

وكان الله فى عون صغار الموظفين والسائق اللى لبس تهمة الاهمال الجسيم وهو فى رحمة ربنا ....

وفيه عليكم السلام يااخ ديزل ...هى مش ناقصة ينزع السلام مننا كمان .....

شارك هذه المشاركه


رابط المشاركه
شارك

Join the conversation

You are posting as a guest. If you have an account, sign in now to post with your account.
Note: Your post will require moderator approval before it will be visible.

زوار
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


×
×
  • اضف...