اذهب إلى المحتوى
محاورات المصريين

سنيـــة والحنــــفيــــة


shahd

Recommended Posts

ســــنــــيـــــه والحــــنــفيـــــه

المكان :(المطبخ) مفرش ومخده في ارضية المطبخ الحنفيه بتنقط طول الليل , والحوض سادد ودانه من شخير سنيه وخبط نقط الميه على دماغه

الزمان : منتصف الليل

الأشخاص : سنيه , الحنفيه , الحوض

الحوار : شخير وصوت ميه بتنقط

المكان: المطبخ

المنظر: الحنفيه بتتمطع وحاطه اديها في بقها وبتتاوب,

سنيه بتفتح الحنفية على المية الساقعه

الزمان الساعه 7 صباحبا

الأشخاص(1)

الحوار: الحوض , يحححححح

سنيه بترمي الأطباق جو الحوض ولسه سايبة الحنفيه مفتوحه , حطت ميه على البراد وحطت الميه على النار

الأشخاص: (1)

الحوار: الحنفيه: انت حتسيبني مفتوحه كده ياست انت

سنيه: بتبرطمي بتقولي ايه ..

الحنفيه: بقول اقفليني ينوبك ثواب

سنيه ولا تعبر الحنفيه وتسيبها مفتوحه وتطلع من المطبخ

الزمان الساعة السابعة صباحا

المكان اوضة السفرة: سنيه تحط الفطار على السفره اشي زيتون على بيض على جبنه

وتفطر الراجل ومراته وابنهم الصغير .

سنية تشيل السفرة بعد ما راحو شغلهم وتحط الأطباق في المطبخ وتفتح عليهم الميه وبعد ما تغسل ما تقفلهاش وتسيبها تنقط

الأشخاص: سنيه والحنفيه

الحوار: الحنفيه: اقفليني الهي يتقفل عليكي باب البوتجاز ..... قادر ياكريم

سنيه مطنشة ولا كأن حد بيكلمها

المكان الحمام: تروح على الحمام ومعاها ممسحه وليفة وجردل تغسل الهدوم,

و ترش أرضية الحمام بجردلين ميه وعلبتين صابون (والدش مفتوح ) وحنفية حوض الحمام مفتوحة

الأشخاص: سنيه وحنفية الحمام, الممسحه, الليفة, الجردل

الحوار: سنيه: ياحنفيه ياحلوة يا ملعلعه ماترشي الحته المبقعة

الجردل: ياست سنيه يا ملزقة ما تخفي الميه بلا بعزقه

تطلع سنيه بعد ما خلصت تنظيف الحمام ( برضه سايبه الدش مفتوح)وترجع للمطبخ والحنفيه لسه مفتوحه بس من غير ولا نقطة ميه ( شكل الحنفيه مخنوقه ومنكمشه)

الأشخاص: سنيه وحنفية المطبخ

الحوار: سنيه : ايه ده هو انت بظتي تاني يا حنفية الهم

الحنفيه: جبتيلي الجفاف الهي ينشف ريقك

سنيه بتحاول تصلح الحنفيه بمفتاح... وعماله تخبط فيها يمكن تجيب ميه

الأشخاص: سنيه والحنفيه والمفتاح

الحوار: الحنفيه: اييييييييي

المفتاح: استحملي يا اختي ما انا كمان متفعصه في اديها اهو

سنيه: ما تخرس انت وهيا خلونا نشوف شغلنا

طاااااااااااااااااخ بوووووووووووووووم

تششششششششششش

المكان المطبخ:سنيه رابطه الحنفيه بكيس بلاستك بعد ما حاولت تصلحها وفشلت والميه خرت على دماغها وملت ارض المطبخ فتروح قافلاها بالعافيه الي حين ميسرة وترجع على الحمام تلاقيه غرقان ميه

المكان الحمام

الأشخاص: سنيه والحنفيه(حنفية الحمام)

الحوار: سنيه : انت لسه مفتوحه ؟؟ طب خليكي شويه على بال ما اعمل الغدا

حنفية الحمام: تحمر وتتنرفز وبصوت عالي ( الهي يحرموكي مني ويحموكي في مية ناااااار)

المكان المطبخ

الزمان الساعة 2 بعد الظهر

سنيه بتفتح التلاجة وبتطلع البامية , حطت الباميه في الحوض بعد ما فتحت الحنفيه وعماله تغسل الباميه وتقمعها (وتحطها على النار)

الأشخاص: سنية والحوض والحنفيه والباميه

الحوار:الباميه: نااااااار يا حبيبي نااااااااااار

الحنفيه: يا اختي عليكي يا مدلعه

الحوض: .ماكانش يومك يا مقمعه

سنيه موصلة الميه من حنفية الحمام بخرطوم للصالة و بترش الميه على الحيطة والأرض زي الي بيسقي الجنينه (بعد ما فضت الصالة من العفش وكومته في المخزن فوق بعضه )

الأشخاص: الخرطوم/ سنيه

الحوار:الخرطوم يا وليه كفاية شد حيجيلي تمزق خرطومي

سنيه: شششششش رش وانت ساكت

يرن جرس الباب وتسيب سنيه الخرطوم مفتوح وتروح تفتح الباب تلاقي ست جارتهم داخله بزعاببيها وبتزعق

الأشخاص: سنيه , والجارة

الحوار: الجارة : وبصوت عالي ومنفعل انت ياست سنيه ما تقفلي الميه غرقتيلي الشقه

سنيه: ميتي وانا حرة فيها الله

يمسكوا في خناق بعض وسنيه تاخد الجارة هيلا بيلة على برة الشقة وتقفل الباب وتكمل تنظيف

سنيه ماسكة الخرطوم ولسه بترش الميه ودلوقتي دخلت على المطبخ

وابتدت تغسل الأطباق وبرضة الخرطوم مفتوح كالعادة

الأشخاص: الحنفية , سنية ,

الحوار: الحنفيه: يامفتريه شيلي الي انت حاطه على مناخيري ده حتخنق

سنيه: متنرفزة من خناقة جارتهم ( ماتتخنقي بلا دلع حنفيات مرق..

المكان الجنينه:سنيه بعد ما خلصت تنظيف البيت وعملت الغدا راحت واخدة الخرطوم وعلى الجنينه بتسقي الزرع عشان الجنايني مش موجود

تفتح الميه على الأخر وهاتك يارش على الشجر والورد بكميات كبييييييييرة

الأشخاص: سنيه والخرطوم والشجر

الحوار: سنيه : ياميه رشي رشي على الشجرة الحلوة رشي

الشجرة من كتر الميه ورقها وقع ومن غيظها بتقول لسنيه

الشجرة: وبتغني كمان يا برووووووووودك ..يا شماتتة شجرة الجيران فيااااااااااا

ترجع سنيه للشقة بعد ما غرقت الجنينه ورمت الخرطوم والميه مفتوحه فوق الشجر وتخش البيت ويرن جرس التليفون( اصحاب البيت بيتصلوا)

الأشخاص: سنيه والهانم

الحوار: سنيه : الوووووووووو ايوه ياست هانم .... حتتعشوا برة انت والبيه ماااااااشي

سنيه تقفل السماعه وتتصل بالجيران تعزم الشغالة بتاعتهم على العشا ماهي فرصة..

والشغالة تعزم التانية ويلموا بعض ويروحوا لسنيه

الباب بيخبط ....

الأشخاص:سنيه, في الشقة, بهية والي معاها داخلين عندها

الحوار: بهيه افتحي يا سنيه جايبالك معايا سعديه وحسنيه وفتحيه وعطيات وام الخير ووووووووو..........

سنيه: يوه جتك ايه يا بهيه جايبالي شغالات العمارة كلها في ديلك....

تدخل بهيه ومعاها شغالات العمارة عند سنيه وكل واحدة شايلة ابنها على دراعها وسنيه تحضرلهم العشا ويقعدوا قدام التلفزيون وهاتك يارغي وقزقزة لب وسوداني على بال العشا ما يجهز

الأشخاص: سنيه في المطبخ هيا وبهيه يحضروا العشا ( تطلع جوز فراخ ورز واللوزازم الباقية )

الحوار: بهيه: هيا الحنفيه مفتوجه كده ليه يا سنيه مش حرام كده يا اختي

سنيه: حرام ليه يعني هو مال ابويا

بهيه: على رأيك

سنيه تبتدي تنظف الفراخ وبهيه تغسل الرز

الأشخاص: بهيه وسنيه

الحوار: بهيه: ما تفتحي الميه السخنة ياسنيه

الميه السخنة نازلة على الحوض والفرخة جوا الحوض ويا الزر

وكله بيتغسل مع بعضه والميه مفتوحه سخن وساقع على الأخر

الأشخاص: الحنفيه والرز والفراخ

الحوار: الرز: مليون مرة اقلك ما تاخديش الشامبوا بتاعي

الفرخه: شامبوا ايه يا ام شامبوا ... الله يرحم ...

الحنفيه: ما تتلهي منك ليها ...واستحموا وانتوا ساكتين

الفرخة والرز ابتدو يتعبوا من كتر الميه النازلة عليهم

وسنيه نازلة دعك في الفرخة وسايبة الحنفيه مفتوحه على الرز

الأشخاص: الفرخة والر ز والحنفيه وسنيه

الحوار: الفرخة: ما تقفلي بقك يا حنفيه وانت عمالة تريلي كده

الحنفيه : ومين سمعك يا ام ريش مقلوع ... اجري البسي هدومك وبعدين كلميني

سنيه: انتوا مش حتجيبوها البر ... طيب حقفل الميه السخنة واستحملوا الساقع

سنيه تقفل الميه السخنة وتفتح على الساقع وتسيب الميه ترش الفرخة

وتروح تطبخ الرز بعد ما تدلق الميه ( الي نقعت فيها الرز في الحوض فوق الفرخة

ويتسد الحوض والرز يتكسر

الأشخاص: الفرخة والرز والحوض

الحوار: الفرخة: الهي يخرب بيتك كده بوظتيلي الميك اب

الرز: اشوف فيكي يوم ياسنيه يابنت ام سنيه كده كسرتي ظوافري

الحوض : روحي منك لله عنيااااااااا ....اااااااااااااه يا عنيااااااااااااااا

سنيه وبهيه بعد ما خلصوا طبخ بيحطوا العشا والشغالات الباقين قاعدين قدام التلفزيون ولا الأمرا وعمالين يقزقزوا في اللب والسوداني والبيت رجع اتوسخ تاني ولا كأن سنيه نظفت ولا عملت أي حاجة

الأشخاص: سنيه وبهيه , ماسكين الصواني وبيحطوها على السفرة

الحوار: سنيه:شيلي العيل ده يا ام الخير عايزة احط الأكل

ام الخير: ايه ده لحمة احمدك يااااااااااارب

هنيه: يا وليه يا مفجوعه دي حتتة فرخة يتميه يا ولدااااه

الكل يهجم على الأكل وهاتك يا هبر والعيال تخش تلغوص بأديها في الحلل

وبعد ما يخلصوا اكل ( تطلب سنيه من ام الخير و سعديه يشيلوا السفرة وينظفوا اوضة الصالون الي اكلوا فيها

الأشخاص: ام الخير وسعديه

الحوار: هما حيشغلونا بلقمتنا ولا ايه يا ام الخير يا اختي

ام الخير: انا عارفة يا سعديه .... كان زماني كلت مع عيالي والراجل جوزي هو الي بينظف كل حاجة

بهيه: نعم يا ست هانم جوزك ده الي بيصبحك بعلقة ويمسيكي بعلقة

سنيه: هو اكل وبحلقة قومي فزي شيلي السفرة .....

وتقوم ام الخير وسعديه من سكات

تخش ام الخير وسعديه على المطبخ ويحطو بواقي الأكل في الزباله

ويحطوا الأطباق والحلل في الحوض وفي نفس الوقت تكون بنت ام الخير وابن سعديه نازلين ضرب في بعض وتكسير في التحف الي في الصالون

فتروح سنيه شاخطه فيهم وضاربة ابن سعديه فتقوم بنت ام الخير قال ايه بتدافع عنه وتعض سنيه

الأشخاص: العيال الصغيرة وسنيه

الحوار: سنيه: اوعا ياواد طاااااااخ

ابن سعديه: ايييييييييي واااااااااااااااااع

بنت ام الخير: عننننننننننننننننن تعض سنيه

تطلع سعديه وام الخير من المطبخ واحدة ماسكة حلة والتانيه ماسكه سكينه

الأشخاص: ام الخير وسعديه, وعيالهم و سنيه

الحوار: ام الخير : في ايه يا ضنايا مالك ياروح ماما

بنت ام الخير: الست دي عضتني اييييييي

سنيه: انا يا مقصوفة الرقبة

ابن سنيه: اااااه يا امة وضربتني بالكرسي في بقي ااااااااااااااااي

ام الخير وسعديه يمسكوا سنيه وهاتك يا ضرب وحدف بالأطباق ورزع بالمعالق والشوك وبهيه تحاول تحوش عن سنيه بس لما تشوف مافيش فايدة تاخد ديلها في سنانها ويا فكيك وبعد ما يدوها العلقة التمام يروحوا الشغالات لبيوتهم وتقوم سنيه وهيا متغاظة ومتعورة عشان تصلح الي بوظوه قبل اصحاب البيت ما يرجعوا ... تدخل المطبخ وهيا عماله تكلم نفسها

الأشخاص: سنيه والحنفيه

الحوار: سنيه: ان ما وريتكوا ان ما طلعت البلا على جتتك انت وهيااا.....اااااه يا دماااااااغي

الحنفيه: انت اتهبلتي يا وليه بتكلمي نفسك .

سنيه: اخرسي انت كمان لااقطع خبرك اييييييييييي

سنيه بتفتح الميه عشان تغسل الأطباق مافيش ولا نقطة ميه

تحاول تفتح تاني برضه مافيش فايدة الميه خلاص خلصت تخبط الحنفيه بمفتاح البوتجاز برضه مافيش أي فايدة

تروح على الحمام برضه ولا نقطة ميه تنزل الجنينه تفتح الخرطوم مافيش ميه

ترجع البيت تخش المطبخ وتقف قدام الحنفيه وهيا حاطة اديها على خدها

وبتفكر حتعمل ايه في المصيبة دي الميه خلصت والبيت اتوسخ و المطبخ مليا ن اطباق وحلل وسخة واصحاب البيت جايين كمان شويه

تخبط على الجيران يسلفوها شوية ميه برضة هما الميه مقطوعه عندهم

الأشخاص: سنيه

الحوار:سنية حاطة ايديها على خدها وبتكلم نفسها

سنيه: ياترى حتعملي ايه يا سنيييييييييه

فوج حنفيات وخراطيم ميه نازل من العمارة والعمارات الي حواليها ومنظر عجب الحنفيات عاملة اضراب ومتجمعين في كل الشوارع وشايلين يافته كبيييييييييييرة كاتبين فيها مطالبهم في

المكان : ميدان التحرير في القاهرة

الزمان : الساعه 2 الظهر

الأشخاص: مسؤل اول حنفيات شرق غرب شمال جنوب عموم القاهرة الكبرى و زعيمة الحنفيات

الحورا: مسؤل اول حنفيات شرق غرب شمال جنوب عموم القاهرة الكبرى: ايه ياست حنفية هانم الهوليلة الي انت وصحباتك عاملينها دي

زعيمة الحنفيات: يا افندم احنا لينا مطالب ولازم تتحقق ولا اكمننا حنفيات غلابة ؟؟

مسؤل اول حنفيات شرق غرب شمال جنوب عموم القاهرة الكبرى: غلابة ايه وكلام فاضي ايه

يعني حضراتكو مش عارفين ان ان الشرق الأوسط في ازمة؟؟؟؟؟؟؟

ولا يعني مش عارفين ان نادي الزمالك في ازمه؟؟؟؟

المكان : ميدان التحرير

الزمان: 5 العصر

تستمر المظاهرة وتوصل الصحافة لتغطية الحدث

صحفي: انتوا ايه علاقتكو بتنظيم القاعدة؟؟؟

الحنفيه : القاعده دي ليها علاقة بالكبانيه والبانيو .. انما الحنفيه دي شخص تاني ليه حقوقه ولازم المسئولين يلبو حقوقو وحقوق كل حنفيات الميه

وفي وسط الهليلة دي يقوم واحد من المتفرجين طالع وبعلو صوته يقول:

والله عندها حق .. هو مش البنزين غلي والبنزين بينزل من حنفيه برضه .. ليه الحنفيات دايما مظلومه؟؟

مسؤل اول حنفيات شرق غرب شمال جنوب عموم القاهرة الكبرى: عاجبك كده جبتيلنا الكلام خلصي طلباتك ايه خلينا نخلص

زعيمة الحنفيات ترفع اليافته الي مكتوب فيها الطلبات

نتفتح بشويش من غير بعزقة

الي عايز يغسل عربيته يمسك جردل ميه وبتاعه يمسح بيها مش يرش بخرطوم

الي بتغسل الأطباق تقفل الحنفية لما تحط صابون على الطبق التاني

الي بتظف ارضية الشقة في اختراع اسمه جردل وممسحه والي بتستعمل الجردل ما

فيش داعي 10 جرادل ميه لآرضيه نص متر

الي بيسقي الجنينه يدي الشجر والورد حقه بلا ش يغرق الدنيا

لوالحنفيه فينا بايظة وبتنقط يا تصلحوها ولو مش قادرين يبقى تحطو تحتها .أي بتاع المهم الميه ما تروحش هدر

وكل ده كوووووووووم والي بيسبونا مفتوحين عمال على بطال دول كووووووووووم

دول عليهم غرامة 50 جنيه على كل جردل ميه يدلق من غير أي فايدة

هاااااااا قلتو ايييييييييه حتفتحونا بالأدب؟؟؟؟؟؟؟

ولا وعهد الله ننشف ريقكوووووووووووووو

تيتا شــــــــــــــهد الثلاثاء 6 يونيو 2006

تم تعديل بواسطة شهد
رابط هذا التعليق
شارك

جميلة جداً ياشهد

بصراحة سنية خلت قلبى وجعنى على الحنفية

ومش عارفة لية بيتردد فى ذاكرتى وأنا اتابع موقف الحنفية من سنية

يتردد معى فاكرة الأعلان بتاع ست سنية سيبة المية ترخ ترخ من الحنفية

دا حرام يا ست سنية :) B)

بصى خلاص انا بعد موضوعك ياشهد بقفل المية ومش ضرورى نغسل الاطباق من الاصل B)

wh_445995754.jpg

رابط هذا التعليق
شارك

جميلة جداً ياشهد

بصراحة سنية خلت قلبى وجعنى على الحنفية

ومش عارفة لية بيتردد فى ذاكرتى وأنا اتابع موقف الحنفية من سنية

يتردد معى فاكرة الأعلان بتاع ست سنية سيبة المية ترخ ترخ من الحنفية

دا حرام يا ست سنية :P :P

بصى خلاص انا بعد موضوعك ياشهد بقفل المية ومش ضرورى نغسل الاطباق من الاصل :P

سماسيمو منوراني ياعسولة :D

الحنفية صعبانة عليكي معلش معلش ما يصعبش عليكي غالي :P

حتقفلي الحنفية خالص ياسما طب والله فكره بلا بعزقة :P

ميرسي ياقمر لمرورك الجميل

احترماتي تيتا شــــــــهد

ياسلام علي الشهد

لما يكون من شهد

يبقي زي الشهد

مع التنفيذ

اخي الفاضل خضر دشليووووووون شكرا على كلامك الرقيق يارب يخليك :)

احترماتي تيتا شـــــــــهد

رابط هذا التعليق
شارك

جميله شهد ......... مش انتى :) :P :P القصه والفكره يعني

حلوه فكره وضع توجيه أو أرشاد يومي معين في شكل قصه دا بينفع أوي

لأنه الناس مش بتحب تقولى لهم الارشاد أو التوجيه بشكل مباشر لكن لما بتكون في شكل صوره قصييه دا بيعطي لها أيقاع احسن وكمان قبول عند المتلقين ........

فكرة الخيال كمان حلوه يعني دمج شخوص عاديين مع ادوات حولينا بتتكلم وتقول معاناتها دا جميل

تعرفي إن الاسلوب دا كمان لو أتبع في كتب تعليم الاطفال وتوجيههم سلوكياً ممكن يبقا حلو اوي بدل برامج التلفزيون اللى بتزرع الغباء في عقول أولادنا

المفروض يسيبوا العيش لخبازينه :P :P :P

تسلم ايدك شهد

أنا لا أكتب الأشـــعار فالأشعـــــــــار تكتبني

أريد الصمت كي أحيا ولكن الذي ألقاه ُينطقني

رابط هذا التعليق
شارك

'لخبطه' جميله شهد ......... مش انتى :P :P :P القصه والفكره يعني

ههههههههههههههههه ملعوووووبة :P

'لخبطه'

حلوه فكره وضع توجيه أو أرشاد يومي معين في شكل قصه دا بينفع أوي

لأنه الناس مش بتحب تقولى لهم الارشاد أو التوجيه بشكل مباشر لكن لما بتكون في شكل صوره قصييه دا بيعطي لها أيقاع احسن وكمان قبول عند المتلقين ........

فكرة الخيال كمان حلوه يعني دمج شخوص عاديين مع ادوات حولينا بتتكلم وتقول معاناتها دا جميل

هو من ناحية ان الناس ما بتحبش التوجيه المباشر فعلا عندك حق وانا اولهم :P

لما كنت في لسه في عز شبابي :) اول ما حد يبتدي يقول اعملوا وما تعملوش اروح سايبة المكان وماشية

'لخبطه'

تعرفي إن الاسلوب دا كمان لو أتبع في كتب تعليم الاطفال وتوجيههم سلوكياً ممكن يبقا حلو اوي بدل برامج التلفزيون اللى بتزرع الغباء في عقول أولادنا

المفروض يسيبوا العيش لخبازينه :D

تسلم ايدك شهد

انا اعتقد ان تعليم الأطفال ده شيء مش سهل ابداااااا والمشكلة ان برامج التلفزيون بتستهون بعقلية الطفل

رغم انها يجب ان تحترم

اخي الفاضل لخبطة الف شكر اولا على ردك القيم والمفيد الذي اثرى الموضوع

وثانيا الف الف الف شكر على سعة صدرك في اسداء النصائح والأرشادات القيمة التي افادتني بحق

فلك مني كل احترام وتقدير

تيتا شــــــــــــهد

تم تعديل بواسطة شهد
رابط هذا التعليق
شارك

يا بنتى بالراحة شوية علينا... حبّة حبّة.. mfb:

مش بالحق اعجب بموضوع انتى كاتباه .. الاقيكى كاتبة واحد تانى احلى من اللى قبله.. :angry:

ما شاء الله عليكى يا شهّودة ... ربنا يحميكى :ph34r:

حبيبتي ان يسالوك عني يوما

فلا تفكري كثيرا

قولي لهم بكل كبرياء

يحبني..يحبني كثيرا

حبيبتي

ان عاتبوك يوما

كيف قصصتي شعرك الحرير

وكيف حطمت إناء طيب

من بعد ماربيته شهورا

وكان مثل الصيف في بلادي

يوزع الظلال والعبير

قولي لهم

انا قصصت شعري

لان من احبه ..يحبه قصيرا

حبيبتي ان اخبروك اني لا املك المال والقصور

وليس عندي في يدي بضع جنيهات تكف عنك تقلب الدهور

قولي لهم بكل كبرياء بانك حبي الاول والاخير

كفاني بانه يحبني كثيرا

وسامحيني لانني احبك كثيرا

رابط هذا التعليق
شارك

يا بنتى بالراحة شوية علينا... حبّة حبّة.. -_-

مش بالحق اعجب بموضوع انتى كاتباه .. الاقيكى كاتبة واحد تانى احلى من اللى قبله.. :angry:

ما شاء الله عليكى يا شهّودة ... ربنا يحميكى :ph34r:

نورية ياسكرة يارب يخليكي احرجتيني mfb:

انت الي كلك زوق الف شكر

احترماتي تيتا شـــــــــهد

رابط هذا التعليق
شارك

يا سلام سلم شهد خلت الحنفية تتكلم

الله عليك

هو ده فعلا اللي احنا محتاجينه تشغيل دماغ واحاسيس

احساس الانسان بالاشياء اللي حواليه شيئ رائع فعلا

ان يكون بينك وبين جماد علاقة تفاهم واحترام شيئ عبقري

والله انا مش بهزر او مجنون بجد فعلا

مش سيدنا محمد قال ( فيما معناه ) ما من شيئ الا ويسبح بحمد الله

يعني ما دام بيسبح يعني بيحس وما دام بيحس يعني لازم نشعر بيه

ويا سلام بقى لو نحس بالبشر اللي هما كمان بيحسوا زينا ونحاول نفهمهم

شهد

اشكرك لمحاولتك ايقاظ الاحساس لدينا

فعلا الاحساس نعمة لا يعرفها كثير من الناس

البحر موعدنا ...........وشاطئنا العواصف جازف فقد بعد القريب ومات من ترجوه واشتد المخالف لن يرحم الموج الجبان ولن ينال الأمن خائف القلب تسكنه المواويل الحزينة ......... والمدائن للصيارف خلت الاماكن للقطيعة من تعادي أو تخالف جازف ولا تأمن لهذا الليل أن يمضي ولا أن يصلح الاشياء تالف هذا طريق البحر ................لا يفضي لغير البحر والمجهول قد يخفى لعارف جازف فان سدت جميع طرائق الدنيا امامك فاقتحمها ولا تقف كي لا تموت وانت واقف

محمد ابراهيم ابو سنة

رابط هذا التعليق
شارك

يا سلام سلم شهد خلت الحنفية تتكلم

الله عليك

هو ده فعلا اللي احنا محتاجينه تشغيل دماغ واحاسيس

احساس الانسان بالاشياء اللي حواليه شيئ رائع فعلا

ان يكون بينك وبين جماد علاقة تفاهم واحترام شيئ عبقري

والله انا مش بهزر او مجنون بجد فعلا

مش سيدنا محمد قال ( فيما معناه ) ما من شيئ الا ويسبح بحمد الله

يعني ما دام بيسبح يعني بيحس وما دام بيحس يعني لازم نشعر بيه

ويا سلام بقى لو نحس بالبشر اللي هما كمان بيحسوا زينا ونحاول نفهمهم

شهد

اشكرك لمحاولتك ايقاظ الاحساس لدينا

فعلا الاحساس نعمة لا يعرفها كثير من الناس

استاذ محمود اولا اشكرك لمرورك الكريم وردك القيم

ثانيا:انا لما قلت الكلام ده قالو البنيه فيوزاتها ضربت خلاص -_-

طب ياعالم انا في بيني وبين الجماد الفة ومودة

بجد والله ما عرفش ازاي بس هو كده :ninja:

يعني مثلا شبشب يكلم جزمة,طبق يهزر مع حلة وهكذا

الف حمد وشكر ليك ياااااااارب ان في حد حاسس بالحكايه دي :angry:

احترماتي تيتا شـــــــــهد

تم تعديل بواسطة شهد
رابط هذا التعليق
شارك

  • بعد 11 سنة...

ترى هل سمعتي وقتها  بمشكلة سد النهضة و قلة الوارد من المية ؟

  • أعجبني 1

مواطنين لا متفرجين


رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة
×
×
  • أضف...