اذهب إلى المحتوى
محاورات المصريين

مليار ونص يا مسلمين


ezzat afifi kotb

Recommended Posts

مليار ونص يا مسلمين     اصفار شمال ومهمشين

معلومة طلعت فى الكومبيوتر    وجاتله ذبحة فى الاذين

وقلت اصلح طلعت لى شاشة    فيها الخلاعة فيها الهشاشة

صبيان فى صلابة البوغاشة     وبنات فى الرقص متمكنين

مليار ونص يا مسلمين    اصفار شمال ومهمشين

فاتحين على كل القنوات     والدش بيضم ويجمع

واحد يقول التعلب فات     والثانى بيقول راح يرجع

ومن الحوار للمتشات     هدوم ودادنا بتتقطع

ويبقى فيه فى النفس افات    وقت الصيام نصبح فاطرين

مليار ونص يا مسلمين    اصفار شمال ومهمشين

ادى الطيور لما تهاجر    بتبقى فى صحبة ولمة

ما فيش ما بينها مكان شاغر    والكل طاير بالهمة

حتى السمك لما يسافر    افواج كدة زى الامة

وشعوبنا بس بتتنافر     وخلافنا م القاع للقمة

كل الشعوب تكتب حاضر     واحنا فى حاضرنا منسيين

مليار ونص يا مسلمين     اصفار شمال ومهمشين

خاللى السياسى فى فلسفته    رجليه تمد وتتأخر

يفتح كتابة وكراسته     ويجتهد قد ما يقدر

بس احنا نعمل بروتستو     على السلع غربى المصدر

ونقاطع الغرب وساسته     ونقول طلاق للهامبورجر  

حيراجع الغرب سياسته    لو بالمثل حنكون عاملين  

مليار ونص يا مسلمين    اصفار شمال ومهمشين

فينا اللى يبنى له فى جامع     علشان يصلى مع الصفوة

ويضيع عليه نبض الشارع     اكمنه بقى صاحب حظوة

يبدأ بكش ويروح طالع    واسمة من اهل الخطوة

ملاليم اخينا تبقى مزارع     ودهبنا مرمى ف الطين

مليار ونص يا مسلمين     اصفار شمال ومهمشين

علمائنا بيخبوا علومهم    جوة الجيوب السحرية

خايفين من السلطة تلومهم     لو عبروا بالحرية

والساحة اهى خليت منهم    سداح مداح للأجرية

عندك كده شخرم زينهم     حفظ بيتين فى الالفية

فتوهم انه صحابى    وتخيل نفسة داعية

وفتاوى كتل رغاوى      وعايزنا نقوله امين

مليار ونص يا مسلمين    اصفار شمال ومهمشين

وقلت اقلب كل البرامج      يمكن الاقى علاج لحيرتى

لقيتنى تايه وسط المناهج     اصل الخواجة ضلل بصيرتى

ادانى بس ديسك المباهج    فغرقت فى الاثام لشوشتى

وبحثت داخل وبحثت خارج    ورجعت برضة بخفى حنين

مليار ونص يا مسلمين     اصفار شمال ومهمشين

رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة
×
×
  • أضف...