هلوسة فى بار ابو لمبو

[ezzat afifi kotb]

شاعر وكاتب طريد حكومته .... منجم مواهب نطقة وصمته

وع المصاطب حدد اقامته ..... ولا حد سائل م المسؤلين

فى بار صفيح كلوبه يوش .... امطار وريح تديله دش

ملابسة تطيح وم البلل تكش ...يعصر ويمسح ع الجبين

بار فيه الجبان وفيه الحثالة ... ورضيع الاتان ومفطوم الزبالة

بار للألعبان ودرويش الريالة .... والكل فى الهم مبسوطين

وهناك كراسى برجل ناقصة ... لو فى الحكومة تعمل مناقصة

الزق وغرى واقبض ف هبصة .... وافرض ضريبة ع المطحونين

وصاحبنا جنبه واحد مكارى .... عمال يفتش عن اللى جارى

ويقوله احلف على البخارى .... اياك تخبى ع السكرانين

الكاس يا سيدى من السفنجة .... كوكتيل ومزة ترمس ورنجه

وان عوزت جرعة من السرنجة ... قدم وريدك اليمين

بس قوللى على الحقيقة .... مين اللى جرك للطريقة

اخرتها تاكل من العليقة .... من بعد عيشة المنعمين

ما تقول يا خينا ليه الحكومة ... ضربة راس الكريم بشومة

ولما تضرب فيك البارومة .... معجون يخبى المشردين

كتبت اقول ان القيادة ... فكت رباط البيادة

ومعاها فكت السيادة ... وصبحوا امرا مكلبظين

تحقيق وشاى وقهوة سادة.... وابصم يا صاحب السعادة

وصورتى تنزل فى الشهادة ...نزيل مصحة مجانين

ساق الهبالة ابن اللئيمة .... وقال سيادة طبعا شتيمة

وعيب تقبح فى الزعيمة ... والزعما فوقنا مأبدين

مأبدين ؟ ... يا عم فوق .... داخوفنا ماسك ف اللىفوق

تغيير زمان كان بالخازوق ... شعوبنا بس متخوزقين

سفنجة ثانية خلينا نفهم ... كلام كبير وعلينا مبهم

والطلاسم عايزة معجم .... فى كلام الملسنين

وكالة فضاهم تبقى ناسا ... وفضانا كله حول الرئاسة

مسبار بيكشف ع الوراثة .... حكام وامرا متوجين

اسكت يا اخينا فيه بوليس .... او ندل سامع اوخسيس

يكتب على كمام القميص .... بعديها نرجع مسجونين

يا ابو لمبو لمع مسدساتك ... جنان اخينا ثمنة حياتك

رصاصة طايشة ف حشاتك ... ويبقى شغل المشاغبين

قول المسائل كلها بهلى .... وسبنى افهمها على مهلى

دا الجهل مقياسة بيندهلى ... خاللى الرموز للمثقفين

الخوف صديد انتشر بوضوح ... والدوا المر يطلبه المجروح

نعارض سوا واهى كلها روح ... ولو نوصل للامام راكبين

يا ابو لمبو منقوعك خطر .... خليط زهق على جنون بشر

هات الاستياء يقيسة المختبر .... ما هو  كلنا مستائين

منقوع وضارب فى النفوخ ... ماركة الحاخام باروخ

من رشفة تتكوم تدوخ ....فين الشمال فين اليمين

والباراتى عمال يغش .... مية بسبيرتو وسندوتش

تنزل ف جوفك نار تطش .... لهيبها يخرج م العنين

البار مصهلل وشاعرنا اكتفا ... م الشرب ع الارض انكفا

محموم فى برده لحاس القفا .... هو الدفا للعريانين ؟

والمسطولين بيسندوه ويشيلوه ... وف بركة اتدهولو ودهولوه

زرعوه بصل وقال بيعدلوه .... قام غرق فى شبر طين

وقبل تترات النهاية .... غطوا كاتبنا بعباية

وصورته اللى كانت معايا ... طارت فى ريح الخامسين