حشيش وبنك الأفكار

[حشيش]

الأخوة والأخوات الأعزاء

طفحت على رأسى فكرة لعلها تكون بداية الطريق إلى عالم الشهرة والثراء لنا جميعاً :wub: ... لماذا لا يضع كل واحد منا هنا فكرة من الأفكار للمستقبل عل وعسى أن يشاهدها أحد المسئولين عن براءات الإختراع العالمية بالأمم المتحدة أو اليونسكو أو مؤسسة نوبل ويشترى منا الفكرة بملايين الدولارات :huh: .... يجب أن تكون هذه الفكرة جديدة ولم يسبق لأحد أن يكون قد طرحها عالمياً من قبل :P .... نشرت هذا الموضوع من قبل فى شئون مصرية وهايد بارك ولكن لم يتقدم أى مستثمر لشراء براءة أى إختراع حتى الأن :blink: .... قلت نجرب فى المحاورات عل وعسى :wub: ..... شدوا حيلكم معايا وربنا يستر طريقنا ;)

براية تعمل بالطاقة الشمسية :P

ملابس داخلية مصنوعة من السمبوسة ..... مثبت بالملابس مفرمة .... عند شعور الشخص بالجوع يقوم بفرم جزء من جسمه ويحشى به السمبوسة ليأكل وجبة خفيفة لحين وصوله إلى البيت :ph34r:

جرار زراعى يعمل بالطاقة البولية :blink:

حلمة صناعية مصنوعة من التين الشوكى لتحبيب الطفل فى الرضاعة الطبيعية :wub:

[حشيش]

مصاصة تعمل بالدفع الرباعى :wub:

كومبليزون حريمى مصنوع من العيش المفقع :)

باروكة شعر مصنوعة من الكنافة :D

[se_ Elsyed]

والله يا عم كنت هاقترح عليك يتجرب حظك معانا يمكن حد يعبرك ويشتري منك إستخراع من بتوعك ..

بس نصيحة و أخ ومُشرف .. إبعد يابني عن الآندر وير وإنت تكسب .. وقد أعذر من أنذر .

أفكار سينسينية :-

- تليفون متبرمج لو الست عدت خمس دقايق في المكالمة الواحده يروح ضاربها على صرصور ودانها ويقولها " حرام على أهلك .. جوزك إتخرب بيته في دفع الفواتير "

- شرابات ضد القطع يعني مُصفحة وخصوصاً من ناحية الصُباع الكبير ( أنا بأعاني من المُشكلة دي جامد قوي )

- حلة لعمل البليلة بطريقة آلية .. تحط القمح من الناحية دي .. يطلع بليلة بالقشدة والمكسرات من ناحية التانية .

- عُمله صعبة لا تنضب وتصرف فيها قد ما تصرف ما تخلصش .

- طيارة محندقة تسع شخص واحد وتكون أسرع من الصوت بحيث الواحد يروح الشغل الصبح في الرياض ويرجع بعد الظهر مصر وولا غُربه ولا يحزنون .

- قلوب صناعي ما تعرفش الحقد ولا الكُره ولا التعصب .

- نضارة ما تشوفش بها إلا الحاجات الحلوه والدنيا معاها تبقى بمبي .. بمبي بمبي ..

كفاية كده النهاردة

[Cleo]

غلاية دم تتركب فى الشريان الأورطى لكل مصرى عشان دمنا يغلى و نفوق بأة :wub:

[حشيش]

عدسات لاصقة مصنوعة من قشر البطيخ تضفى على العين اللون الأخضر الساحر :angry:

[yasovinas]

جهاز انذار ضد التهور الانساني يصدر اصوات عاليه في حالة تهور الانسان وقيانه باي عمل لا يتفق مع سنه وظروفه الاجتماعيه

[White heart]

( حتى وصولنا يوما ما الى تقسيم شوارع القاهرة الرئيسية فى وسط البلد الى حارات مختلفة لمختلف المركبات " حارة للدراجات " - " حارة للترام " - " حارة لأتوبيسات النقل العام " - " حارة أو أكثر لباقى السيارات العادية " -)

إختراع بإضافة حارة ملاصقة للرصيف عبارة عن " سجادة حمراء سيارة " ... اسوة بتلك الموجودة بصالات المطارات الكبرى !

[سهيلة]

جهاز تظبيط المزاج

دة جهاز بحجم الموبيل كدة يتصل بمراكز المخ لا سلكيا عشان ما يضايقش حد

التحكم عن بعد

مسول عن تظبيط المووووووووود

عاوز تضحك تدوس على زرار عاوز يكون مزاجك عالى اوى بردو ف ايدك عاوز تعيط شوية يعنى عشان ما تزهقش كلوو موجود

كبسولة شفافة بحجم الانسان يدخل جواهااا ويمشى بيها ف اى مكان وهية مطاطة وخفيفة جداااااااااااااا يعنى سهل الحركة بيها

تحميك من برد الشتا وحر الصيف لان جواها جهاز تكييف اتوماتيك

كبسولات طعام

يعنى لما يكون الواحد جوعان يتناول واحدة يشبع على طول

نظارة يلبسها الزوج اول ما يروح بيتة تترجم اى صو رة ف المخ

لييييييييييييييييييييييية

عشان يشوف مراتو بالصورة اللى نفسو فسها يشوفها هيفا وهبى ولا صوفيا لورين

دى احد ث من النضارة اللى اخترعها سى السيد يا جماعة

جهاز سبع لغات

دى جهاز بحجم طابع البريد تضعو على اللسان يخاليك تتكلم بطلاقة سبع لغات زى اللب لب

[Hammer]

جهاز تظبيط المزاج

يا سهيلة الموضوع ده للإختراعات المستحدثة فقط ... و أجهزة تظبيط المزاج قديمة قدم الإنسان و هناك دول رائدة في تصنيع مثل هذه الأجهزة , فمنها الأفغاني و المغربي و اللبناني .... و لا إيه يا حشيش :blink:

أنا بقي نفسي أخترع جهاز حلاقة بالليزر ... تدخل راسك فيه و في ثواني تكون الحلاقة خلصانة و كل مرة زي التانية .

مش الحلاق بتاعي اللي كل مرة يبدع لي أي حاجة غير اللي أنا طالبها :angry:

و نفسي كمان في جهاز ( البوف بح ) للقضاء علي الزحمة ...و يعمل هذا الجهاز علي إخفاء كل السيارات من الشارع اللي إنت ماشي في القاهرة لغاية ما تعدي بسرعة .

[Cleo]

جهاز تظبيط المزاج

نظارة يلبسها الزوج اول ما يروح بيتة تترجم اى صو رة ف المخ

لييييييييييييييييييييييية

عشان يشوف مراتو بالصورة اللى نفسو فسها يشوفها هيفا وهبى ولا صوفيا لورين

دى احد ث من النضارة اللى اخترعها سى السيد يا جماعة

ممكن الإستعاضة عن هذه النظارة بشريحة ذكية يتم برمجتها حسب صورة أو هيئة أحدث نجمات السينما و الفيديوكليب :angry:

[White heart]

الصينيين دخلوا نبات الصويا فى صناعات كتيرة جدا ..... اشمعنى؟ :angry:

فكرة إختراع يهدف الى "ذكاء صناعى" من نوع جديد جدا ... و هو قائم على خط إنتاج كامل للإستفادة بكل ما يتعلق بالـــ " فول " بداية من حبة " الفول " نفسها و قشرتها، مرورا بالـــ "سوس" ... و إنتهاء بالـــ " قدرة " ! :blink:

[عصام]

تم نقل الموضوع إلى باب دعوة للابتسام ..

الإدارة

أنا برضه قلت إيه اللى خلى حشيش يحط موضوع فى باب الثقافة والعلم !! مش عادته يعنى

[White heart]

حوادث الطرق فى العالم أجمع بصفة عامة من أهم أسباب الوفيات .... و مساهمة للحد من " نزيف الأسفلت " ....

فكره إختراع بتحويل جسم السيارات من الصاج .. وجعلها بالكامل من مادة الكاوتش ... بتاع " بــــاتــــــا " :angry:

[حشيش]

تم نقل الموضوع إلى باب دعوة للابتسام ..

الإدارة

أنا برضه قلت إيه اللى خلى حشيش يحط موضوع فى باب الثقافة والعلم !! مش عادته يعنى

لحد إمتى ياعصام حتفضل على عدائك ده للعلم والعلماء ؟! :angry: ..... حتى لو نقلت أفكار ومبتكرات الأعضاء الأحرار إلى جوانتانمو فلن نزداد إلا إصراراً :D

إستنساخ كتكوت من قشر البصل :D

جهاز تظبيط المزاج

أنا بقي نفسي أخترع جهاز حلاقة بالليزر ... تدخل راسك فيه و في ثواني تكون الحلاقة خلصانة و كل مرة زي التانية .

مش الحلاق بتاعي اللي كل مرة يبدع لي أي حاجة غير اللي أنا طالبها :blink:

طلبك موجود عندى :D ..... أنا ممكن أبيع لك براءة الإختراع بتاعى وهو نوع من الحلاوة الرجالى يستخدم فى نتف شعر الرأس بدلاً من الذهاب للحلاق :D ..... لو حبيت نتفاوض على السعر :D

[se_ Elsyed]

نظارة يلبسها الزوج اول ما يروح بيتة تترجم اى صو رة ف المخ

لييييييييييييييييييييييية

عشان يشوف مراتو بالصورة اللى نفسو فسها يشوفها هيفا وهبى ولا صوفيا لورين

دى احد ث من النضارة اللى اخترعها سى السيد يا جماعة

يا خوفي يا بدران

الشركات المنافسة تطلع نظارة تانية تلبسها الست من دول وتشوف الأفندي ملحم زين وملحم بركات وكل الإخوة اللحامين ( والكلام ليكي يا جارة )

بس أُحيي فيكي روحك الرياضية يا سُهيلة ...

يعني الواحد بالنظاره دي هايبقى عنده كل الأخوات الممثلات والراقصات في البيت .. ومش هايحتاج يلعب بديلة أو يتفرج على الـ إل بي سي أو أي قنوات للإخوة اللبنانيين..

طب إفرضي الواحد لبس النظارة دي وحصل السيناريو التالي :

- سيد أفندي : مساء الخير حبيبتي ( حبيبته دي إسمها نوسه مثلاً ... لا مؤخذه يا معلم حشيش )

- نوسه : أهلاً أبو السيد يا حبيبي .. عامل إيه ؟ وأخبار الشُغل إيه ؟ مديرك طرقعلك زي كل يوم ... ولا النهاردة كانت شتيمة بس ؟

- سيد : إسكُتي يا نوسه ماتفكرنيش ببوز الأخص ده ..أما يا نسناسه حصل حتة حوكاية النهاردة في المصلحة ..إحنا قاعدين في أمان الله يا ستي اللي بيحل كلمات متقاطعة واللي بتقور كوسة واللي بيضرب شاندوشتات فول .. وتدخل علينا واحده واحده مندوبة مبيعات إسمها سُهيلة تقوليش ملاك ونزل علينا من السقف وبالتحديد من جنب المروحة ... وكان معاها شربات وفالنات وملابس داخلية وحاجات من دي وكمان إكشسوارات حريمي على رجالي .. وعجبتني نضارة معاها كانت بتبيعها على جوز جنيهات .. قلت أشتريها بدل اللي إتكسرت عندي وكنت مركب لها أستك منطلون بدل الدراع اللي راح ...

- نوسه : ما تلبسها كده عشان أشوفها لايقه على البيجاما ولا لأ ؟

سيد : حاضر ... الله الله ... اشتاتاً أشتوت ... حابس كابس كابس تصوري أنا شايفك هيفا قدامي ؟

- نوسه : هيفا ؟ !!! هيفا يا راجل يا ناقص .. أنا هيفا ؟

- سيد : لا مش قصدي يا نوسنوس ... أنا شايفك هيفا وهبي دلوقت بشحمها بلحمها وخصوصاً لحمها ...

- نوسه : صحيح يا سيد ؟ والنبي قولها تاني ؟ يعني أنا كرفت على هيفا دلوقت ؟

- سيد : صحيح يا نوسه .

- نوسه : اللهي يخليكي يا ست الدكتورة سُهيلة ويطعمك ما يحرمك ولا يرقدلك جته .. ولا يكسرلك دكه .. ولا يقفلك سِكه .. والنبي يا سيد تقولها ما فيش عندها نظارات حريمي ؟.. اصل بيني وبينك أنا أتخنقت من خلقتك وعايزه أغير أنا كمان .

وهنا يخلع سيد النظارة ويرميها على شماله .. ثم يتناول رجل الطبلية اللي في ترابيز السُفرة وينزل بها على الأم الحنون بتاعت نوسه ويعملها تربنه في المخ .. ثم تتحامل نوسه على نفسها وتتناول قلة الميه اللي في بلكونة الجيران اللي قدامهم وتهوي بها على مخيخ سيد ويسقط الإثنين صرعى .. وقبل أن يلفظا أنفاسهما الأخيرة يقولان في نفس واحد " روحي يا سُهيلة ... منك للي كلت دراع جوزها " وينتقلا إلى الرفيق الأعلي بعد أن كتبا بدمهما الطاهر على جردان الشقة الفاخرة ( سُهيله هي اللي نفختنا )

وهكذا أيها السادة تلعب الإستخراعات الحديثة دوراً حيوياً في حياة البني آدميين .

هنا القاهرة

[se_ Elsyed]

تم نقل الموضوع إلى باب دعوة للابتسام ..

الإدارة

أنا برضه قلت إيه اللى خلى حشيش يحط موضوع فى باب الثقافة والعلم !! مش عادته يعنى

لحد إمتى ياعصام حتفضل على عدائك ده للعلم والعلماء ؟! :angry2: ..... حتى لو نقلت أفكار ومبتكرات الأعضاء الأحرار إلى جوانتانمو فلن نزداد إلا إصراراً :blink:

إستنساخ كتكوت من قشر البصل :wub:

جهاز تظبيط المزاج

أنا بقي نفسي أخترع جهاز حلاقة بالليزر ... تدخل راسك فيه و في ثواني تكون الحلاقة خلصانة و كل مرة زي التانية .

مش الحلاق بتاعي اللي كل مرة يبدع لي أي حاجة غير اللي أنا طالبها :angry2:

طلبك موجود عندى mfb: ..... أنا ممكن أبيع لك براءة الإختراع بتاعى وهو نوع من الحلاوة الرجالى يستخدم فى نتف شعر الرأس بدلاً من الذهاب للحلاق :wub: ..... لو حبيت نتفاوض على السعر :blink:

إخص عليك يا حشيش

أخر حاجة كنت اتوقعها منك إنك تحاربني في أكل عيشي ..

حسبي الله ونعم الوكيل

بقى لما تخليهم يخترعوا إستخراع زي ده .. وتمولهم وتشجعهم كمان .... اعمل أنا إيه ؟

أسرح بنداغه يا حشيش ولا أقلب الصالونين اللي عندي كبده ومُخ ؟

ما كنش العشم يا مُستخرع يا كبير ياللي كنت في يوم حبيبي وإبن حبيبي

وحتى إذا كان في خلاف بينك وبين عصام .. وهو في كل رسايلة الخاصة للاعضاء بيشنع عليك وبيقول عليك كلام مش كويس وحاولنا كلنا معاه نُثنيه عن فعلته الشنعاء وإنه ينقل الموضوع من باب " إنجازات المصريين " لباب الإبتسام .. وهو راسة وألف صرمه إلا ينفذ اللي في دماغه .. ويزعق ويقول : أنا عتريس ... أنا ما بيهمنيش ...خلي حشيش بس يتكلم وشوفوا أنا هاعمل إيه .. إن ما دخلته في الجهاز بتاع الحلاقة ده وطلعته من الناحية التانية زي الكتكوت المنتوف .. روحت قايله : ماهي مش هاتبقى جديدة على حشيش ما هو ياما أتنتف في الجيش ... راح قايل لي : طب أنا هاخترع له إختراع عبارةعن كيبورد متوصل بسلك ضغط عالي 1500 ميجا وات ... وأبعتهوله هدية على ممكلة البحرين ، حشيش هايفتكر بسذاجة إني بأصلحه ... هايروح موصلة على اللاب توب الآيسر اللي بيجيب جاز عنده تروح الكهربا ماسكه فيه وتخلي صوابعه مخليه وعامله زي عُقب السيجارة الكليوباترا... روحت قايلله : إنتو أصحاب واللي داخل بناتكم خارج وإعمل اللي تشوفه صح ...

يبقى أنا مالي ؟ وحتى لو كان هو مُشرف .. فكل واحد متعلق من عرقوبه .. ومش عشان ما قدرتش على ........ عصام ...تروح .. مخبط في .... سين سين ...

إمضاء : قرفص

[عصام]

.. ومش عشان ما قدرتش على ........ عصام ...تروح .. مخبط في .... سين سين ...

إمضاء : قرفص

يابن الإييييييييييييييييه :angry2:

أهو دا سب علنى يستوجب الإنذار الفورى ...

وعندك واحد إنذار سخن لابو السيد علشان ....

قال على حشيش بردعة :blink:

مقص كبير جدا للسيارات :blink:

يثبت فى المقدمة على الكبود

علشان اللى يطلع إيده على إنه داخل يمين أو شمال بدل الإشارة أقطعهاله :angry2:

[سهيلة]

اقتباس(سهيلة @ Apr 11 2006, 02:15 PM)

جهاز تظبيط المزاج

يا سهيلة الموضوع ده للإختراعات المستحدثة فقط ... و أجهزة تظبيط المزاج قديمة قدم الإنسان و هناك دول رائدة في تصنيع مثل هذه الأجهزة , فمنها الأفغاني و المغربي و اللبناني .... و لا إيه يا حشيش

Hammer مشاركة بتاريخ اليوم, 03:57

يا Hammer

مش قصدى ع الحاجات القديمة اللى ف دماغك اللى ليها اثار جانبية على المخ وادمان للحاجات دى وغيرة وغيرة انا عايزة اختراع يظبط المزاج من غير ما يبوظ حاجة تانية

طب إفرضي الواحد لبس النظارة دي وحصل السيناريو التالي :

- سيد أفندي : مساء الخير حبيبتي ( حبيبته دي إسمها نوسه مثلاً ... لا مؤخذه يا معلم حشيش )

- نوسه : أهلاً أبو السيد يا حبيبي .. عامل إيه ؟ وأخبار الشُغل إيه ؟ مديرك طرقعلك زي كل يوم ... ولا النهاردة كانت شتيمة بس ؟

- سيد : إسكُتي يا نوسه ماتفكرنيش ببوز الأخص ده ..أما يا نسناسه حصل حتة حوكاية النهاردة في المصلحة ..إحنا قاعدين في أمان الله يا ستي اللي بيحل كلمات متقاطعة واللي بتقور كوسة واللي بيضرب شاندوشتات فول .. وتدخل علينا واحده واحده مندوبة مبيعات إسمها سُهيلة تقوليش ملاك ونزل علينا من السقف وبالتحديد من جنب المروحة ... وكان معاها شربات وفالنات وملابس داخلية وحاجات من دي وكمان إكشسوارات حريمي على رجالي .. وعجبتني نضارة معاها كانت بتبيعها على جوز جنيهات .. قلت أشتريها بدل اللي إتكسرت عندي وكنت مركب لها أستك منطلون بدل الدراع اللي راح ...

- نوسه : ما تلبسها كده عشان أشوفها لايقه على البيجاما ولا لأ ؟

سيد : حاضر ... الله الله ... اشتاتاً أشتوت ... حابس كابس كابس تصوري أنا شايفك هيفا قدامي ؟

- نوسه : هيفا ؟ !!! هيفا يا راجل يا ناقص .. أنا هيفا ؟

- سيد : لا مش قصدي يا نوسنوس ... أنا شايفك هيفا وهبي دلوقت بشحمها بلحمها وخصوصاً لحمها ...

- نوسه : صحيح يا سيد ؟ والنبي قولها تاني ؟ يعني أنا كرفت على هيفا دلوقت ؟

- سيد : صحيح يا نوسه .

- نوسه : اللهي يخليكي يا ست الدكتورة سُهيلة ويطعمك ما يحرمك ولا يرقدلك جته .. ولا يكسرلك دكه .. ولا يقفلك سِكه .. والنبي يا سيد تقولها ما فيش عندها نظارات حريمي ؟.. اصل بيني وبينك أنا أتخنقت من خلقتك وعايزه أغير أنا كمان .

وهنا يخلع سيد النظارة ويرميها على شماله .. ثم يتناول رجل الطبلية اللي في ترابيز السُفرة وينزل بها على الأم الحنون بتاعت نوسه ويعملها تربنه في المخ

se_ Elsyed مشاركة بتاريخ اليوم, 06:11 PM

اللة يكرمك يا سى السيد

مندوبة مبيعات اخرتهااااااااااا

ما علينا المهم انت نسيت تقرا الارشادات الهامة الللى مع الاختراع الجديد

وهية انك ممنوع تقلع النظارة دى من اول ما تدخل بيتك الا تانى يوم الصبح وانت خارج

او

لما تطفى النوووووور اللى ف البيت كلو يا اما انا موش مسولة عن اللى هيحصل

واطمن مدام سى السيد الست نوسة

ان النظارة بتاعت الستات نازلة السوق قريب اوى

هتشوفى بيها خلقة جوزك بشكل توم كروز وحاجات من المستوردة دىىىىىىىىىىى

بس العدد قليل يا جماعة الاسبقية بالحجزز

وشكراااا

مع تحيات مندوبة المبيعات سهيلة

[Hammer]

طلبك موجود عندى :wub: ..... أنا ممكن أبيع لك براءة الإختراع بتاعى وهو نوع من الحلاوة الرجالى يستخدم فى نتف شعر الرأس بدلاً من الذهاب للحلاق :blink: ..... لو حبيت نتفاوض على السعر :angry2:

يااااااااا حلاوة ...

إيه إختراعات عزبة الهجانة دي ..

يا راجل أقولك ليزر بدون ألم ... تقولي حلاوة مع الألم مع الأسف :blink:

و بعدين يا سيادة المخترع لابد من توافر جدوي إقتصادية لأي مشروع ...

و بحسبة بسيطه لسعر كيلو السكر اليومين دول , يتضح أن مشروع سيادتك غير صالح للتطبيق .

غيره ... :angry2:

[مصريه بالكويت]

ولو ممكن يخترعوا كام زراع ايوا بالعاميه دراع يتركب للواحده فينا اهو برضه يساعدوها تبقا ايد بتغسل المواعين وايد تانيه بتوطى ع الاكل وايد بتكوى دا غير الايد اللى شايله الواد وبتهزه علشان يبطل زن

ولو فيها رزاله ممكن كمان فى كل بيت شفاط بالكهربا بس دا لشفط كرش الراجل بعد الزواج