الناس الحلوة

[عادل أبوزيد]

    *(الناس الحلوة)*

●  *الناس الحلوة* مش هي الناس المرشوشة سكّر .. لا دي ناس كده بتحلّي الأيام والظروف وبتفتّح الغامق ، وتجيب طراوة في الأيام الزِمتة الحر اللّي مافيهاش هوا  .

●  *الناس الحلوة
 دي بتبتسملك وهي من جوه مايعلم بيها إلا ربنا ،  بس هي بتخاف تتعبك بألمها وحاسة إن اللي فيك مكفيك .

●  *الناس الحلوة
 اللي أول ماتشوفك داخل عليها مكان توسعلك جنبها كده ووشها ينور حتي لو كانت تحب إنها تبقي قاعدة لوحدها علشان بتفكر في حالها .. تحسّهُم بيفرشولك إبتسامتهم تقعد في رحابها .

●  *الناس الحلوة
 اللي دايما فرحانالك بغض النظر عن وضعها ، وتلاقيها تطبطب عليك وتطمنك ولو لقيت فرصة حلوة ليك تقولك وتساعدك توصلّها .

●  *الناس الحلوة
اللي تفتكر إنك بتحب الأكلة اللي هي طبخاها ، فتحلف لتدوّقك منها قبل ماتاكلها هي .

●  *الناس الحلوة
 اللي زغروتتها ترن في فرحك ، وإيديها تتهري تصقيف .. وتمسك دموعها في حزنك .. علشان إيديها مش هاتفضي تمسح الدموع دي .. علشان هي حضناك بيهم وبتطبطب عليك .

●  *الناس الحلوة
اللي تقّدر إنك مشغول وتبعت تسأل عليك عشان تطمّن - مش عشان تعاتب - تحب تعرف إنك بخير وده بس كفاية بالنسبالهم .

●  *الناس الحلوة
لمّا تفارق لأي سبب ماتغلطش ولا تطلع الأسرار دي بتتكلم عن اللي فارقوهم أحسن ماتكلموا عنهم وهم معاهم .

●  *الناس الحلوة
لو عجبها هدومك تقولك ولو عجبها أكلك تقولك . 

●  *الناس الحلوة فاكراك في دعاها وماتستخسرش فيك إخلاص دعاها وتتمني ربنا يستجيب .

● *الناس الحلوة
نعمة ورزق يستحقوا الشكر... يارب إجعلنا ناس حلوة .. وارزقنا بناس حلوة .. وارزق الناس الحلوة بناس أحلي منها بحق ماكانوا حلوين معانا  .
*(آمين يارب العالمين)*

[مجرد مواطن]

ربنا يحلي أيامك أستاذ عادل

حلو الكلام والروح

[tarek hassan]

اللي شايف الناس حلوة ... 

هو حسن الظن  ..... او هو قدر يخرج احسن ما في الناس .....  أو هو محب والحب يعمي ويصم اي يعمي العين عن العيوب ويصم الاذن عن سماع العيب فيهم .... أو فمه حلو يتذوق دائما الحلاوة وهي منه ... هو محبوب يوده الناس ولا يجافوه .... 

انت حلو يا استاذ عادل وربنا يديم لك صحبة الناس الحلوة