Jump to content
ArabHosters
Sign in to follow this  
عادل أبوزيد

ريفيو لكحك العيد ٢٠١ منقول

Recommended Posts

انا عجبني جدا الreview الي هي عاملاه لمحلات الكحك
ده غير انها مش بتاخد عينات مجانية فبتجامل اصحاب المحلات 
بتشتري بنفسها و تدوق

#عيد٢٠١٩
#كحك٢٠١٩

ثالث تقييم لكحك العيد أنزله ومختلف خالص عن السنين اللي فاتت. أول تغيير إن المرة دي أنا مش بقيم لوحدي، عملنا لجنة تقييم فيها شيف سارة عبد السلام، أختي، وشيف حنان فتحي وشيف زهيرة فتحي، أحلى صحاب اللي مش عارفة أشكرهم إزاي على إهتمامهم ووقتهم ومجهودهم ❤️

تاني تغيير هو إننا كترنا عدد الأماكن اللي داخلة في التقييم جداً وقسمنا الأماكن ٣ مجموعات حسب مستوى السعر، وعملنا تصويت على أحسن نوع في كل مجموعة، وكده هيكون في recommendation مناسب لأي ميزانية..

ندخل في الموضوع بقى!
————————————————
المجموعة الأولى: دي فيها ٣ أماكن، ال٣ غاليين، منهم واحد غالي جداً الصراحة، فا دي مجموعة الكحك الfancy

Le Carnaval
بيبيع علب ٣٠٠ جرام ب١٤٠، غالي جداً الصراحة بس هو معروف إنه بيستخدم أحسن مواد خام في مصر، كلنا أجمعنا إن سمنته خطيرة، ملمسه مظبوط، مش خشن ومش مفرول، مش بيسيب أي aftertaste ودا غالباً بسبب نظافة السمنة، ناقص سمسم وريحة كحك، في المجمل عجبنا بس بخلاف السمنة اللي مستخدمها مش حاسيين إن ثمنه منطقي نهائي.

Choco Chocola 
بيبيع الكيلو السادة ب٢٩٥، مستخدم سمنة خطيرة، ملمسه كان محتاج يكون أظبط سنة لأنه بيفرول بزيادة، تحويجته رائعة بس زيادة سنة، كان في نكهة قرنفل وقرفة زيادة أوي مثلاً، بس في المجمل هو فعلاً محافظ على مستواه أوي من سنة لسنة، تشتريه من غير ما تسأل عليه وإنت متطمن.

Cookiemanegypt
أول سنة أجربه الصراحة وكل سنة كان في ناس كتير بترشحه. عامل الكيلو السادة ب٢٩٥، كحك فلاحي أصيل ودا بقى شبه منعدم وبيميزه جداً، ملمسه خشن سنة وبيفرول زيادة، في سمسم زيادة، كل واحدة مقاسها غير التاني فا تحس تسوية الكحك مش زي بعضه.

🏆ترشيحنا في المجموعة دي كان تعادل بين ٢، اللي بيحب توابل الكحك قوية نرشحله شوكو شوكولا، اللي بيحب توابل الكحك خفيفة نرشحله لو كرنڤال ومش هيكون مناسب لحد بيجيب كميات كبيرة لأنه فعلاً غالي أوي.
————————————————
المجموعة التانية: دي مجموعة الأسعار المتوسطة لغالية شوية، فيها ١١ مكان أسعارها أقل من ٢٠٠ لحد ١٣٠

The Bakery Shop (TBS)
كيلو الكحك السادة ب١٦٠، معجبناش كلنا الصراحة، الكحك ريحته مش حلوة غالباً بسبب المادة الدهنية المستخدمة، وطعمه زي مايكون قديم يا مشكلة تخزين يا مواد خام قديمة، فعلاً تجربة محبطة.

La Poire Egypt
كيلو الكحك السادة ب١٦٠، مستخدم سمنة ودقيق وحشين جداً، الصراحة إحنا مش قادرين نفسر هو عامل إيه بالظبط عشان العلبة تبقى مليانة بقع دهنية غريبة، هحط صورة للمنظر في التعليقات ولكم الحكم، والكحك حرفياً كان في حاجة كارفة عليه، تجربة تانية محبطة.

NOLA Cupcakes
بيبيع علبة كيلو فيها كحك مشكل وبيتي فور وبسكوت ب١٦٠، هو عامل كحك مودرن أوي، شبه الكوكيز أكتر، ناقص تسوية شوية.

Breadfast
كيلو الكحك السادة ب١٦٠، الكحك كان ناعم بزيادة وبيلزق في البق، كمية السمسم مظبوطة، عامل packaging حلو جداً في علبة صفيح وبصفة عامة فكرة الapp والservice حلوين.

Salé Sucré Pâtisserie
علبة كحك سادة الصافي بتاعها ٨٠٠ جرام ب١٣٠، بدون تزويق كلام، أسوء مرة أدوق كحك من عنده، مستخدم سمنة وحشة، سمسم قديم وعامل طعم سئ، بيسيب aftertaste وحش، لا تعليق!

Thomas Pâtisserie
الكيلو السادة ب١٤٠، في حاجة في طعمه مش مظبوطة، غالباً المادة الدهنية المستخدمة، ملمسه مورق ودا مش صح خالص في الكحك، مش عاجبنا السنة دي.

Coppermelt
الكيلو السادة ب١٤٠، مستخدم سمنة كويسة أوي، ملمسه ناعم شوية بس كويس بردو، ريحة الكحك وكمية السمسم مظبوطين أوي، عجبنا كلنا الصراحة، عاش!

Dukes
بيبيع علبة ١٢٠٠ جرام ب١٤٠، توابله كويسة بس ملمسه خشن أوي ومليان سمسم بزيادة، كل واحدة في العلبة حجمها غير التانية وبالتالي تسوية الكحك مش مظبوطة، عمل زي القراقيش، مش عاجبنا.

Simonds bakery and cafe
الكيلو السادة ب١٣٥، أول مشكلة بالنسبة ليا إن العلبة كان وشها كحك مكسر ودا مش المفروض يحصل، هحط صورة في التعليقات، الكحك معجبناش، السمنة ريحتها قوية شوية (في ناس بتحب كده)، كل واحدة حجم، الكحك شايط، سمسم كتير أوي، تجربة وحشة.

Sedra
الكيلو السادة ب١٣٥، كحكهم consistent بشكل رهيب، ثالث سنة بدون أي تغيير في المستوى، بيعملوه خشن وسمسمه كتير شوية، اللي بيحبه كده هيعجبه أوي بجد.

Tortina
عامل علبة نص كيلو مشكلة كحك وبيتي فور وبسكوت ب٩٥ مش متأكدة من سعر الكيلو السادة بس هجيب المعلومة وأضيفها (كيلو السادة ب١٦٠)، الكحك بتاعهم ملمسه حلو أوي، السمسم قليل جداً، مش بيسيب أي aftertaste، كحك متوازن جداً وعحبنا كلنا بس كان محتاج سمسم أكتر.

🏆ترشيحنا في المجموعة التانية بردو تعادل بين ٢، لو بتحب الكحك الخشن يبقى سدرة أحسن حاجة ليك، لو بتحبه ناعم يبقى Coppermelt أحسن حاجة ليك، الاثنين رائعين فا نقوا على تفضيلكم في الملمس.
————————————————
المجموعة الثالثة ودي فيها ١٣ مكان أسعارهم بتتراوح ما بين ١٢٥ ل١٠٠..

Sweet Center
كيلو السادة ب١٢٥، تحويجة الكحك وكمية السمسم حلوين، ملمسه خشن، سمنته بتسيب طعم غريب كده، مش عاجبنا.

Tseppas
كيلو السادة ب١٢٤، سمنته كويسة بس زيادة شوية فا الكحك تقيل، في نكهة قرنفل قوية أوي.

الخباز - The Baker
كيلو السادة ب١٢٠، سمنته ريحتها حلوة بس بتسيب طعم وحش، ريحتها خدعتنا، ملمسه خشن شوية.

Turkish Delight eg
السادة كان مش متاح لما روحت، بيبيع كيلو كحك الفستق ب١٢٠، بيعمل كحك تركي مختلف عن المصري شوية، طعمه كويس بس الفستق قليل أوي.

Tiramisu patisserie
كيلو السادة ب١٢٠، مستخدمين سمنة حلوة أوي، ريحة الكحك المستخدمة حلوة بس عايزة تتظبط شوية، اختلفنا في الرأي عليه شوية، في ناس حبته أكتر من ناس، فا هيعجب ناس كتير.

Mandarine Koueider
كيلو السادة ب١٢٠، الصراحة هما مش بيغيروا فيه أي حاجة كل سنة زي اللي قبلها ودي حاجة وحشة لأنهم مش راضيين يقتنعوا إن دا مش كحك، بسكوت جوز هند من حيث الريحة والطعم.

Les Dames
كيلو السادة ب١٢٠، ملمسه كويس بس خشن شوية، مستخدم سمنة وحشة فا بتسيب aftertaste وحش.

Exception Pastry & Bakery
كيلو السادة ب١١٦، كحك خشن فيه سمسم كتير جداً، ماحسناش بطعم ريحة الكحك المصري، يعجب الناس اللي مش بتحب الكحك الفلاحي وبتحب السمسم كتير.

Panino Pastries
كيلو السادة ب١١٥،الكحك ناشف بزيادة، ناقص سمنة فا خفيف، مافيش فيه سمسم.

كحك مرجعيون (من Oscar Grand Stores)
كيلو السادة ب١١٥، مستخدم سمنة وحشة، بيسيب طعم وحش، ملمسه مزعج جداً وكان في حاجة كارفة عليه، ممكن تكون مشكلة تخزين مواد خام. مش عاجبنا خالص.

حلواني العبد - El Abd Patisserie
كيلو السادة ب١١٠، بصراحة هو كان أقرب حاجة للكحك المصري الأصيل في اللي جربناه، ملمسه خشن سنة صغيرة فا يعجب اللي بيحبه خشن أو ناعم، كان مستوي سنة زيادة، بصفة عامة طعمه عجبنا كلنا جداً.

Etoile - حلواني ايتوال
كيلو السادة ب١٠٠،
طعمه كان أقرب للمعمول من الكحك ومستوي بزيادة أوي. اللي بيحب المعمول أكتر من الكحك ممكن يعجبه.

El-Amin
كيلو السادة ب١٠٠، مستخدم سمنة خطيرة بس تسوية الكحك زيادة أوي لدرجة إنه متحمص، وطعم التحميص مغطي على طعم السمسم وريحة الكحك.

🏆ترشيحنا في المجموعة الثالثة للعبد بالاجماع.
————————————————
📌معلومة مهمة: Diet to Door عاملين كحك صحي مناسب لمرضى السكر، الواحدة ٢٠ جرام فيها ٩٨ كالوري، ١.٨٥ جرام بروتين، ٥.٤٩ جرام دهون، ٢.٦٦ جرام دهون مشبعة، ٠.٧٦٦ جرام ألياف، ١٠.٦ جرام كاربوهيدريتس، ٤٩ مليجرام بوتاسيوم. 
————————————————
البوست دا كله #مش_إعلان، بشكر صحابي حنان فتحي وزهيرة فتحي اللي شاركوا بمجهود مادي ومعنوي وبوقتهم كمان، وبشكر Tiramisu و Breadfast اللي بعتولنا عينات نستخدمها في التقييم..
Hanan Fathy
Zohaira Fathi: https://www.facebook.com/zohaira.fathi

وبشكر Sara Abdel Salam سارة عبد السلام على الصور زي كل سنة..
Sara A. Salam Foodography Studio

يا ريت اللي جرب مكان حلو ومش في الريفيو بتاعنا يرشحه للناس في التعليقات. كل سنة وإنتم طيبين!

*للناس اللي بتسأل على البيتي فور، أنا مش بجيب الصراحة بس كان في كام مكان بيبيعوا علب مشكلة بس وناس بعتتلي عينات، عجبني فيهم تيراميسو ونولا جدا ، وبيتي فور تورتينا الصراحة ماعجبنيش خالص. والناس اللي بتسأل على الغريبة شيف حنان جربت بتاعة العبد وعجبتها جداً.

**الناس الجميلة اللي عايزين يبعتوا عينات دلوقتي والله بشكركم جداً من قلبي بس أنا مش بحب دا يحصل بعد ما الريفيو ينزل عشان بيكون عندي كميات كبيرة خلاص ومش هقدر أدخل حاجة تانية في المقارنة، السنة الجاية إن شاء الله نجربه.

تعديل مهم: الكحك اللي جبناه من أوسكار طلع مش بتاع أوسكار نفسه، بتاع مكان بيبيع جوة أوسكار إسمه مرجعيون، هما تواصلوا معايا وصححوا المعلومة وبشكرهم وبعتذرلهم.

#HagarSays #EidMubarak
#EidReview2019

ربما تحتوي الصورة على: ‏‏طعام‏‏
 

 

 

Share this post


Link to post
Share on other sites

Join the conversation

You are posting as a guest. If you have an account, sign in now to post with your account.
Note: Your post will require moderator approval before it will be visible.

Guest
Reply to this topic...

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.

Sign in to follow this  

×
×
  • Create New...