الزوار Guest أشرف محمد بتاريخ: 21 أغسطس 2018 الزوار تقديم بلاغ مشاركة بتاريخ: 21 أغسطس 2018 (( خـلاص )) ــــــــــــــــــــــــــــــــــــــــــــــــــــ ــ اليوم الأوَّل ــ ولأن أبويا لوحده كان الراوى فالعُهدة كُل العُهدة تقع على أبويا قال : ست سنين وعَشرتيام ... بين أخر نقطة دم ف منديل أبيض ... وسط زعاق مخلوط بغناوى بنات بتقول : ( قولو لأبوها إن كان جعان يتعشى ) وبين يوم ماقالت لى : حاسة بدوخة وحاسة بنفسِى غامة عليا وعايزه فسيخ ييييخ ! ست سنين وعَشر تيام م البحر بعبِّى واكب ف بحر ست سنين وعَشر تيام من ذُل وحُزن وكبت وقهر قالوا : مَلُهش ! قالوا : مفُهش ... ولا حتى ينبت حَبِّة قمح ! قالو وكُل كلامهم كان ع الجرح ـــ وأخيراً ـــ هاصالحها أيامى وأحس وأشوف وأدوق الفَرح وبدأت أعِد بجد ومش شايف حَد وحاطت رجلِى ف وش الدنيا وثانية بثانيه عينى ع البطن إللى بيعلَى وبيقب وبدعى يارب يكون لى نصيب ف دفاتر مواليد الدنيا من بين رجليها لإدين الداية طقت أول صرخة فرَح ف حُزن الدنيا ليلتها وبعد ما لمِّت نقطتها قالت لى : أوِّل مَرَّة على إيديا ينزل عَيِّل وملهش ( خلاص )! معقولة ياناس !؟ وتاهت ف بطون الدنيا الداية من قبل ما تعرف سِر ( خلاصى ) وليه ما نزلش معايا يوم ما نزلت ! *** ـــ اليوم التانى ـــ كْـبـْــرت *** ـــ اليوم التالت ـــ ف لحظة حظ قال سيدنا ف درس الوعظ ذنب كبير يا اولاد وحرام لو واحد ياكل مال أيتام ذنب كبير يا اولاد وحرام لو واحد يشهد زور لو حتى هاياخد كام ضميره إزاى هايسامحه إزاى ف الليل هاينام ؟ ذنب كبير يا اولاد وحرام لو واحد عينه لمحت حُرمة جاره و ولعت ناره واتمناها ف نفسه ! ضحكت ف عبِّى وقلت سامحنى ياربى بيقول مولانا كلام وبيعمل عكسه ومن ورا قلبى لقتنى بتف على شمال تلات تفات ومن ورا قلبى قلت : اللهم اخزيك ياشيطان الواحد تقريباً هايشُك ف نفسه *** ـــ اليوم الرابع والعاشر والمليون ـــ من يوميها وللنهارده والحاجات جوَّايا ليها ألف معنى غير إللى شايفه ف الحاجات والكلام الكدب طال حتى السُكات من يومها وللنهارده ومن سُكات أنا والدايات دايرين ندوَّر ع الخلاص دايرين ندوَّر ع الخلاص دايرين ندوَّر ع الخلاص رابط هذا التعليق شارك المزيد من خيارات المشاركة
Recommended Posts
انشئ حساب جديد أو قم بتسجيل دخولك لتتمكن من إضافة تعليق جديد
يجب ان تكون عضوا لدينا لتتمكن من التعليق
انشئ حساب جديد
سجل حسابك الجديد لدينا في الموقع بمنتهي السهوله .
سجل حساب جديدتسجيل دخول
هل تمتلك حساب بالفعل؟ سجل دخولك من هنا.
سجل دخولك الان