جايلي عقد و عايز رايكم؟

[eng.mali]

السلام عليكم

اخوانى انا مهندس ميكانيكا 2013 جايلى عرض عمل من شركة سراكو اعمل صيانه بمستشفى على 4500 ريال و مش محددين المكان بس بيقولى غالبا تبوك و مفيش بدل سكن للاستقدام و العقد اعزب السكن و التنقلات عليهم و الاجازة بعد سنتين و العمل 6 ايام 8 ساعات ده كده كويس و لا ايه. مع العلم ان المرتبات دلوقتى رايحه ف داهيه خالص 

[AbuZeyad]

راتب قليل بالنسبة لمهندس 5 سنين خبرة

السكن في الغالب هايكون مشترك مع زملاء اخرين في االشغل ودا غير مريح

عمل 6 ايام دا غير قانوني ودا معناه انها شركة قد تكون غير محترمة بالاضافة الى انه مع راتب قليل في الاساس

عقد ظروفه صعبة لو متزوج... انما لو أعزب وممكن تستحمل شوية بهدلة ودي الفرصة الوحيدة قدامك ممكن تحاول بس بلاش تطول في الشغلانة دي

خليها مرحلة لحد ما تلاقي حاجة أحسن

[eng.mali]

مشكووووور جدا

انا متزوج فعلا .... و رفعو الراتب ل 4750 بس هيتخصم منهم حوالى 120 ريال شهريا عموله المكتب و ال 2% و السكن فعلا مشترك بس مش عارف نظامه عملت التحاليل و الكشف و رايح للبصمه الاتنين بس لسه العقد موصلش و المفروض اها شركة كبيره ف الصيانه ف السعوديه

[AbuZeyad]

انا مش عاوز احبطك

بس بغض النظر عن كون الشركة كبيرة ولا صغيرة الراتب لسة قليل حتى بعد الزيادة وبالنظر الى ان العمل 6 ايام في الاسبوع

وبعدين عمولة المكتب دي هاتتخصم بشكل مستمر ولا لفترة معينة؟ 

السكن في الغالب هتلاقي نفسك مع عدد من زملاء العمل ومخصص لك غرفة لوحدك او مع اخرين

طبعا كل ما العدد في السكن بيزيد دا بيشكل بيئة خصبة للمشاكل اكتر

 انا شايف انك ماشي في الاجراءات ودا طبعا قرارك، بس حاول على الاقل انك يكون لك غرفة مستقلة في السكن علشان تضمن حد أدنى من الخصوصية والراحة

غير كدا حاول تقرا نظام العمل السعودي من على النت علشان تعرف حقوقك بصورة احسن

وبالتوفيق

[ALMOSAFER]

On 8/6/2018 at 4:35 PM, eng.mali said:

السلام عليكم

اخوانى انا مهندس ميكانيكا 2013 جايلى عرض عمل من شركة سراكو اعمل صيانه بمستشفى على 4500 ريال و مش محددين المكان بس بيقولى غالبا تبوك و مفيش بدل سكن للاستقدام و العقد اعزب السكن و التنقلات عليهم و الاجازة بعد سنتين و العمل 6 ايام 8 ساعات ده كده كويس و لا ايه. مع العلم ان المرتبات دلوقتى رايحه ف داهيه خالص 

شوف يا باشمهندس

الراتب ده فى الظروف اللى فيها المملكة دلوقتى دى حلو مش وحش بس لك أنت فقط يعنى مش هتعرف تعيش انت وزوجتك براتب زى ده

ثانياً: حاول تخللى الاجازة كل سنة 21 يوم لانه ده النظام حسب قانون العمل السعودى ، اجازة 21 يوم مدفوعة الراتب

ثالثاً: انت لو هتوفر 3000 ريال شهرياً وهتصرف 1500 ريال على نفسك كده يبقى كويس طبعاً لان مش هتلاقى فى مصر راتب 14000 جنيه لدفعتك

فباقولك سافر وتوكل على الله بس باقولك تانى مش هينفع تعمل استقدام للزوجة بالراتب ده

وربنا يوفقك