كرة القدم .. أنهت فترة ست سنوات من الإكتئاب الجماعي

[عادل أبوزيد 1,174]

فعلا إستطاعت كرة القدم  أن تدفع بالبهجة في قلوب المصريين ، فعلا كنا كما لو كنا سقطنا كلنا في حالة من الإكتئاب القومي ، مرات معدودة التي خرجت فيها مع زوجتي ل وسط البلد     .... و لست وحدي  سألت العديد من أقاربي و معارفي  البهجة كانت تشع من عيونهم.

و ثبت أننا قادرين على البهجة الجماعية  و ثبت أيضا ضرورة إستئناف كل الأنشطة الرياضية على مستوى الوطن.

و للعلم لست كرويا و لا أفهم في الكورة

[Grandma 692]

بجد الشعب المصري كله يوم نهائي كأس افريقيا كان كأنه معزوم في فرح و رغم ان الفرح كان في أماكن متفرقة وعدة محافظات ومدن الا ان الشعور وكأننا كلنا رايحين مناسبة واحدة ومكان واحد وكلنا هنفرح مع بعض ونبارك ونهني بعض . 

انا يومها  روحت انا وعيلتي اتفرج على الماتش في كافييه مالقيتش ولا مكان  .. كله محجوز .. فبسرعة افتكرنا اننا جنب اوتيل فدخلنا وكانت الاجواء رائعة حتى الاجانب اللي حوالينا كانوا بيشجعوا مصر .. وفيه واحد اجنبي ضحكني كان رايح التواليت في الوقت دا دخل جون في مصر واما رجع قعد يشتم بصوت عالي و يقول كنت حاسس اني لما هروح التواليت هتحصل مصيبة . 

[أبو محمد 4,296]

2 ساعات مضت, عادل أبوزيد said:

و للعلم لست كرويا و لا أفهم في الكورة

مش ضرورى تكون "كرويا" يا أستاذ عادل
المهم هو مقدار الطاقة الإيجابية التى تسللت إليك برغم نشاط تجار الطاقة السلبية (أم دجدج واولادها)
الغريب إننا درسنا فى الفيزياء إن وحدات قياس الشغل هى وحدات قياس الطاقة بما فيها السلبية
التى لها جنود مجندة منتشرة فى "جبلاية القرود" وباقى أرجاء العالم الافتراضى
لترويجها وإعاقة أى "شغل"
وحدة القياس هى الجول بتعطيش الجيم Joule  نسبة إلى جيمس جول
مكتشف العلاقة بين الشغل و الطاقة

مش الجول الكروى

[eslam kareem 4]

ربما تشتت الاولويات الوطنيه والانشغال بمتطلبات الحياه الشخصيه كان سبب فى المفارقات الثقافيه للمصريين مما ادى الى التفاف الشعب وراء بطوله كره قدم ونسى هو فى الصحه رقم كام فى التعليم رقم كام فى الدين .....الخ

لو سخرنا توحدنا فى ماتش كوره على فكره لاصلاح ركن من اركان الدول المتقدمه زى التعليم والصحه هنبقى الاول حتى فى الرياضه , اللى بيتابع منتخبات المانيا وفرنسا ....الخ هيلاحظ ان حتى الكوره اصبحت تقنيات بدنيه ونفسيه ومهاريه بيتم اكتسابها من خلال مدربيين واطباء واعداد بشكل منتظم

[tarek hassan 2,816]

7 ساعات مضت, Grandma said:

بجد الشعب المصري كله يوم نهائي كأس افريقيا كان كأنه معزوم في فرح و رغم ان الفرح كان في أماكن متفرقة وعدة محافظات ومدن الا ان الشعور وكأننا كلنا رايحين مناسبة واحدة ومكان واحد وكلنا هنفرح مع بعض ونبارك ونهني بعض . 

انا يومها  روحت انا وعيلتي اتفرج على الماتش في كافييه مالقيتش ولا مكان  .. كله محجوز .. فبسرعة افتكرنا اننا جنب اوتيل فدخلنا وكانت الاجواء رائعة حتى الاجانب اللي حوالينا كانوا بيشجعوا مصر .. وفيه واحد اجنبي ضحكني كان رايح التواليت في الوقت دا دخل جون في مصر واما رجع قعد يشتم بصوت عالي و يقول كنت حاسس اني لما هروح التواليت هتحصل مصيبة . 

ههههه ... هو دا سبب الهزيمة .... 

فكرني بصلاح منصور في فيلم الزوجة الثانية 

عموما تجميعة الشعب من تاني على الحب والانتماء أعظم مكسب