مبادرة (( الشعب يأمر ))

[tarek hassan 2,816]

تحية لعمرو أديب .... وكل من ساهم في تخفيض الأسعار من المصريين للمصريين

يارب نسد الطريق على يلعبون على وتر الأسعار والغلاء وهي خطة قديمة

لتحريض المصريين وتأليبهم على الدولة

 

 

[أبو محمد 4,296]

معلش يا أستاذ طارق .. أنا مش مرتاح للجو اللى راجع بيه عمرو أديب (غير المشفر)
حتى وهو مشفر كنت باتحاشى الفرجة على برنامجه بقدر المستطاع (ماهو انا مش فى البيت لوحدى)
لأنه كان بيجعر فى وشى أكتر ما كان بيكلمنى
وحكاية الشعب يأمر دى عليها أكتر من علامة استفهام .. تتلخص فى أسئلة الصديق حسام نصار
(مهندس وكيل أول سابق فى وزارة الثقافة)

اقتباس

 

أنا بس عندي شوية أسئلة ملهاش معني كده

1- هما اللي حيرخصوا المنتجات 20%، هما اللي غلّوها قبل كده 50%، ولاّ ناس غيرهم؟

2- لما هما وطنيين قوي كده وعندهم إحساس، غلّوها ليه قبل كده؟

3- ولما هما برضه وطنيين قوي كده وعندهم إحساس، كانوا مستنيين مبادرة من سي عمرو أديب؟

4- ولو رخّصوا الحاجة 20% 3 شهور، حيغلّوها بعد ال 3 شهور 20% ولاّ لأكتر؟

5- السؤال الأهم بقى، هما دلوقتي حيرخصوها 20% بعد التعويم ما اتأجل؟؟

6- السؤال اللي هو بقى، حيدفعوا كام لقناة أون على الإعلانات المجاني دي؟

حسام نصار

 

 

 

[أبو محمد 4,296]

شوف يا أستاذ طارق عينة الناس المستفيدة من الإعلان المجانى (أو المدفوع تحت الترابيزة)
دول المستوردين المتضايقين من قرارات ضبط الاستيراد اللى عليه شبه إجماع بضرورة ترشيده
إنت عارف إننا موقعين على اتفاقية التجارة الحرة .. بمزاياها وعيوبها
(مع أنها تسمح بتقييد استيراد بعض السلع فى الحالات الاستثنائية)
السادة حيتان الاستيراد (وراهم 850 ألف تاجر عنده رخصة استيراد .. تصور ؟!) منزعجين وثائرين
والأكادة إن مين اللى متضامن معاهم .. نقيب المحامين .. الناصرى
(عبد الناصر كان مانع استيراد قشاية لسنوات طويلة)
إيه بقى اللى مزعلهم ؟
اللى مزعلهم قرار بيطالبهم بضرورة تسجيل مصنع "البضاعة"
يعنى ما تقدمش فاتورة من أى مكتب تصدير بره مثلا وتقول دى فاتورة المصدر
وبعدين حضرتك تجيب بضاعة مضروبة .. أو فاسدة .. برخص التراب وتكسب فيها زى مكاسب المخدرات
قوم إيه .. ولأن "يكاد المريب أن يقول خذونى" .. طالبوا بإيه فى بركان غضبهم
قالوا إن تسجيل المصنع هيتكلف 10 آلاف دولار .. واحنا حوالى 850 ألف مستورد
خدوا انتوا الـ 10000 وسيبولنا احنا السوق .. ودى تعمل لها حوالى 10 مريار دى كانت الجزرة
أما العصاية بقى فهى التهديد بالتنازل عن تراخيص الاستيراد .. يعنى الـ 850 هيبطلوا يستوردوا
(ودى كانت العصا .. وانت عارف بقى ان احنا بلد - ماشاء الله - مستورد)
والأعجب خلط النقيب المحامى الناصرى موضوع تسجيل المصانع بموضوع "ضريبة القيمة المضافة"
وعشان تفهم سبب التضامن لازم تعرف إن بركان الغضب ده كان فى أغسطس اللى فات
قوم إيه - ولأن لا العصاية نفعت ولا الجزرة نفعت - يتظاهر النقيب ومعه بعض المحامين من يومين
ضد قانون ضريبة القيمة المضافة !
ويقوم عمرو أديب يجيب منتصر الزيات متحدثا باسم المحامين - وما أدراك من منتصر الزيات - ليتكلم عن هذا التظاهر
ضد خضوع أتعاب المحامين للضريبة
وعندما سأله عمرو أديب السؤال الذى يتبادر إلى ذهن صبى أخضر غرير :
"إيه اللى مزعلكم وكل اللى مطلوب منكم تحصيل الضريبة من موكليكم بإيصال وتوريدها لخزانة الدولة" ؟
يقوم ييجى العذر الأقبح من الذنب .. لتكون الإجابة :
"هذه إهانة للمحامى .. المحامى مش محصل .. اللى عاوز الضريبة هو اللى يحصلها"
إيه رأيك بقى ؟
مرتاح انت لتلميع منتصر الزيات وحسين سالم واحمد عز فى خلال يومين اتنين فى برنامج سى عمرو الجديد ؟
أنا مش مرتاح !
إتفضل يا أستاذ طارق شوف .. بس حاسب من بركان الغضب بتاع السادة المستوردين اللى بيقولوا الشعب يأمر

اقتباس

 

بركان غضب بين المستوردين بسبب قرارات ضبط الاستيراد..
مقترح لتوفير 10 مليارات دولارمقابل إلغاء تعديلات سجل المستوردين و"قرار 43"..
وتجار يهددون بالتنازل عن البطاقات الاستيرادية

الإثنين، 29 أغسطس 2016 09:11 م

أحمد شيحة رئيس شعبة المستوردين

كتب إسلام سعيد

عقدت غرفة القاهرة التجارية، جمعية عمومية طارئة، واكتمل نصابها القانونى فى الثانية من ظهر اليوم، وذلك لمناقشة تداعيات القرارات الأخيرة التى تتعلق بالمجتمع التجارى بأكمله، من بينها ما يخص الاستيراد والسياسات النقدية ومدى تأثيرها على أسعار السلع فى مختلف الأنشطة صرح بذلك على شكرى نائب رئيس الغرفة.

 وشارك فى الجمعية، أحمد الوكيل، رئيس الاتحاد العام للغرف التجارية، وسامح عاشور نقيب المحامين، على شكرى نائب رئيس غرقة القاهرة التجارية، أحمد شيحة رئيس شعبة المستوردين، أشرف هلال رئيس شعبة الأدوات المنزلية، وأعضاء الشعب المختلفة.

وجاءت الجمعية العمومية الطارئة لمناقشة التأثير السلبى لكثير من القرارات خاصة "991 و992 و43" الصادرة من وزارة الصناعة والتجارة الخارجية الخاصة بشأن ضوابط الاستيراد.

"المستوردين" تقدم مقترحا لتوفير 10 مليارات دولار عند تجديد السجل التجارى (دى بقى الجزرة)

أعلنت شعبة المستوردين فى غرفة القاهرة التجارية، عن مقترح لتوفير 10 مليارات دولار فى مقابل إلغاء تعديلات قانون سجل المستوردين، وكذلك القرارات التى تحد من الاستيراد.

وقال أحمد شيحة رئيس شعبة المستوردين، إن تسجيل المصانع التى تورد للمستوردين تكلفنا 10 آلاف دولار ورغم هذه التكاليف فإن قرار التسجيل يتوقف على تأشيرة من وزير التجارة، لافتا إلى أن المستوردين لديهم استعداد لدفع الـ10 آلاف دولار للدولة كسندات دولارية عند تجديد السجل التجارى، موضحا أن عدد المستوردين 850 ألف مستورد وهو ما يعنى أن تجمع الدولة 10 مليارات دولار.

وأضاف شيحة، أن الأموال التى يتم صرفها على تسجيل المصانع وتذهب للخارج يمكن توفيرها لأنه فى النهاية، البعض يقوم بعمل شهادات مزورة، لافتا إلى أن الفحص لا يكون دقيق وتقوم الجهات المختصة فى مصر بالفحص مجددا إذا فلماذا الفحص الخارجى.

بدوره قال على شكرى نائب رئيس غرفة القاهرة التجارية، إن اتحاد الغرف التجارية نظم اجتماعات على أعلى مستوى ومسئولين فى وزارة التجارة والصناعة لمناقشة تداعيات القرارات 43 و991 و992 التى وصفها بالقرارات المانعة للاستيراد.

تجار يهددون بالتنازل عن البطاقة الاستيرادية (هذه هى العصا .. لمن عصى)

فيما وقعت مشادات كلامية بين الحاضرين بسبب ما وصفه التجار بعجز اتحاد الغرف التجارية وغرفة القاهرة للرد على القرارات السابقة خاصة قرار تسجيل المصانع، وهدد التجار بالتنازل عن البطاقات الاستيرادية وسجلهم التجارى اعتراضا على القرارات التى تمنع دخول البضائع المستوردة إلا بعد تسجيل المصانع الموردة.

وقال أحمد الوكيل رئيس الاتحاد العام للغرف التجارية، إن السياسات الاقتصادية الخاصة بتحجيم الطلب لن تنفع مصر، لافتا إلى أن دور الغرف التجارية قاصر على تقديم البيانات والمعلومات المتعلقة أى سياسات تضر السوق وهذا ما قام به اتحاد الغرف بشأن القرارات الخاصة بضوابط الاستيراد.

وأضاف الوكيل، أن قرارات تحجيم الاستيراد هى سبب ارتفاع الأسعار وقبل قرارات وزارة الصناعة بشأن ضوابط الاستيراد كان المؤشرات الاقتصادية أفضل بكثير، مشيرا إلى أنه سيتم رفع دعوى قضائية بالاستعانة بنقيب المحامين سامح عاشور ضد قرارات تحجيم الاستيراد.

نقيب المحامين يتبنى قضية المستوردين (ده بقى بيجرب الركوب مستفيدا من تجربة من سبقوه فى الركوب)

فى سياق متصل، قال سامح عاشور نقيب المحامين، إن هناك طابورا خامسا فى الدولة يصنع الخصومة بحرفية شديدة، لافتا إلى أن الطبقة المتوسطة فى مصر تتعرض للضرب والإضعاف من خلال ضريبة القيمة المضافة.

وأضاف نقيب المحامين خلال الجمعية العمومية الطارئة لغرفة القاهرة التجارية، لمناقشة تداعيات قرارات وزارة الصناعة بشأن ضوابط الاستيراد، أن إدارة ملف أزمة الدولار كان ضعيفا، والمسئول الذى سبب الأزمة لابد أن يرحل.

وأعلن عاشور دعم وتأييد المستوردين فى معركة إسقاط القرارات المقيدة للاستيراد، لأنه لا يمكن منح الوزير جميع صلاحيات تسجيل المصانع الموردة.

 

 

[suma 584]

تحياتي:

أنا لن أعقب على حكاية الإستيراد دي لأنها أصبحت ظاهرة للعيان  مجرد ما تستمع إليهم وهم ضيوفا مع أي مقدم برامج وفي حوارتهم  تعرف من هم وما همهم وللأسف كانوا ضيوفا غبر مرحب بهم كثيرا .

  انا عن عمرو اديب ذاك الرجل الذي أوشك أن يخلع حتى ورقة التوت التي تخبء خلفها انتمائه الذي اكيد ليس مصر ولا شعبها.

عندما رأى أن هناك مبادرة من الشرفاء المصريين بالعودة الى المنتج المصري وظهرت بوادرها وأصبحنا على الفيس نعلن عن الأصناف وتواجدها ورجعنا نشتري قها وادفينا حتى ان البعض ذهب لباتا ..كل هذا يفعلونه بحب حتى أن الجروب كله استعاض بالشيكولاته المصرية بديلا عن الاخرى.

فكان لزاما أن يخاف المستورد بعض الشيء طيب لنفرض اننا تكالبنا على المصري وشغلنا مصانعه..حيروحوا فين؟؟!

ويمكن بعدما تجاوز عمرو في أولى حلقاته وتكلم عن الانتخابات ودعى صاحب حزب مصر القوية للترشح..وحاجات كتير اخري ابعدته عن الناس اكثر ما هو بعيد .

ياعمرو انت نضبت مخيلتك ولم يعد لديك الجديد ابتعد شوية وفكر يمكن..يحيي العظام وهي رميم.

  وبعدين انا لسه كاتبه بوست في الفيس فحواه: يبدو ان مقدمي البرامج واصحاب الفضائيات يجتمون من حين لحين مع :مسترx ليأخذوا منه الخطة لتخريب واحداث بلبلة بين ربوع الشعب.ونظره واحدة إلى ملاك تلك الفضائيات نتيقن من هذا.

 

 

                 سومه

تم تعديل October 5, 2016 بواسطة suma

[tarek hassan 2,816]

في 10/5/2016 at 01:26, أبو محمد said:

معلش يا أستاذ طارق .. أنا مش مرتاح للجو اللى راجع بيه عمرو أديب (غير المشفر)
حتى وهو مشفر كنت باتحاشى الفرجة على برنامجه بقدر المستطاع (ماهو انا مش فى البيت لوحدى)
لأنه كان بيجعر فى وشى أكتر ما كان بيكلمنى
وحكاية الشعب يأمر دى عليها أكتر من علامة استفهام .. تتلخص فى أسئلة الصديق حسام نصار
(مهندس وكيل أول سابق فى وزارة الثقافة)

 

 

عندك حق يا أبو محمد 

أنا مع الفكرة إن قصد بها الخير للناس والتصدي للدعوات لمظاهرات وثورات الشهر القادم 

أما المصالح الشخصية والإعلامية إن كانت من وراء القصد فهي دأب هؤلاء الإعلاميين على حساب الشعب

ما حاك في نفسي من أول الأمر وأنا أكتب الموضوع تلك التسمية التي لا علاقة لها بالفكرة 

كنت أتحفظ وأشك .... في (الشعب يأمر ) على شاكلة (الشعب يريد ) الله لا يرجعها ويكون المراد تأصيل لفكرة معينة تكون نواة لمطالبات غير شرعية باسم الشعب يأمر والشعب يريد 

أي أنه لا يعجبني تحدث البعض باسم الشعب

ولا نريد أن نرجع لذلك فكان له أن يقول مبادرة تخفيض الأسعار ومواجهة الغلاء 

لكن ما جعلني استحسن الأمر رغم كل ذلك أنه تظاهر بأنه أعذر الدولة والرئيس ووجه كلامه لغيرهما وياريت يحلوا عنهم شوية ويسيبوهم يشتغلوا 

[herohero 668]

موضوع الشعب يأمر انا شايف ان مهما كان فيه اهداف مش نبيلة  مش ظاهرة بس  ظاهريا احسن من مفيش

وموضوع الاستيراد بصراحه لازم يتوقف

يا جماعة والله العظيم اكل ومستلزمات القطط والكلاب في مصر مش موجودة ف هايبرات الرياض ، لازم يتوقف السفه ده بجد حرام انا اتعقدت من كم السلع المستوردة ، ياساده احنا بنستورد مشروب من تايلند فيه بذور ريحان حته الازازة ب10 جنيه ده ارخص من سعرها ف السعودية !!! وغيره كثير من الهيافات 

بجد لازم يتوقف الاستيراد السفهي ده

وانا شايف ان منتجات حملة الشعب يأمر معظمها مصرية محلية الصنع فمفيش ضرر من الدعايا لها وياريت فعلا نشجعها ، وبصراحه انا شايف منتجات مصرية كثير حلوة وممتازة وبصراحه مالوش لازمة استيراد سلع غذائية اجنبية كبداية

[tarek hassan 2,816]

35 دقائق مضت, herohero said:

موضوع الشعب يأمر انا شايف ان مهما كان فيه اهداف مش نبيلة  مش ظاهرة بس  ظاهريا احسن من مفيش

وموضوع الاستيراد بصراحه لازم يتوقف

يا جماعة والله العظيم اكل ومستلزمات القطط والكلاب في مصر مش موجودة ف هايبرات الرياض ، لازم يتوقف السفه ده بجد حرام انا اتعقدت من كم السلع المستوردة ، ياساده احنا بنستورد مشروب من تايلند فيه بذور ريحان حته الازازة ب10 جنيه ده ارخص من سعرها ف السعودية !!! وغيره كثير من الهيافات 

بجد لازم يتوقف الاستيراد السفهي ده

وانا شايف ان منتجات حملة الشعب يأمر معظمها مصرية محلية الصنع فمفيش ضرر من الدعايا لها وياريت فعلا نشجعها ، وبصراحه انا شايف منتجات مصرية كثير حلوة وممتازة وبصراحه مالوش لازمة استيراد سلع غذائية اجنبية كبداية

المنتج المصري ساعات لا يكون على المستوى ولازم يحسن نفسه حتى لا يحجم الناس عن شرائه

معك تماما في كل ما تقول وما يحدث جريمة في حق الوطن واقتصاده

لابد من تدخل حكومي جدي للتحكم في عملية الاستيراد فيكون للضرورة

[herohero 668]

On 10/6/2016 at 11:52 AM, tarek hassan said:

المنتج المصري ساعات لا يكون على المستوى ولازم يحسن نفسه حتى لا يحجم الناس عن شرائه

معك تماما في كل ما تقول وما يحدث جريمة في حق الوطن واقتصاده

لابد من تدخل حكومي جدي للتحكم في عملية الاستيراد فيكون للضرورة

استاذ طارق الكلام ده مش صحيح 

المنتج المصري في حالات كثيرة ممتاز ،انا بتكلم كمان ع مستوى اجهزة منزلية بوتوجازات ، غسالات ،ثلاجات ، فلاتر مياه ، تليفزيونات 

وبصراحه ع مستوى الاغذية منتجاتنا المصرية ممتازة

لكن للاسف ينقصنا الرؤية والارادة السياسية لمحاربة اشباه رجال اعمال فضلوا تجارة الشنطة ع الصناعة والانتاج بجد

ياعزيزي هل مصر ف حاجه لاستيراد الفواكه من قبل الشربتلي ؟؟ فين الخوخ المصري الجميل والبرقوق !!!!!

ياعزيزي ماالداعي لاستيراد مشروب فيمتو اللي بيباع ب 18 جنيه في حين ان سعره ف السعودية 8 ريال = 24 جنيه !!! هناك سفه وغباء يصل الى درجه الاجرام ما الداعي لاستيراد مشروبات من تايلاند ببذور الريحان ، مالداعي لاستيراد جبنة دينبول  الزرقاء ويكون سعر الكيلو 100 جنيه في حين سعره ف السعودية 100 ريال 

استاذ طارق رغم سعادتي بالمنتجات المصرية رغم حزني الشديد ع اننا عايشين ف ازمة بسبب جشع واجرام تجار الاستيراد

لا ياستاذ طارق مصر مش محتاجه لا هي ولا شعبها انها تتوسل للتجار عشان يخفضوا 

مصر وشعبها محتاج ارادة سياسية قوية لمنع هذه الجريمة في حقنا جميعا 

محتاجين نشتغل صح ونصدر بجد ندرس الاسواق وكبداية نوقف الاستيراد التافه 

مصر بتستورد بطيخ بدون بذر

 

حرااااااااااااااااام