اذهب الي المحتوي
ArabHosters
عادل أبوزيد

حفل إستقبال للأعضاء الجدد

Recommended Posts

إستقبلت محاورات المصريين 460 عضوا جديدا منذ أول ديسمبر حتى اليوم 21 يناير 2006 و أستطيع القول بصدق أن هذا الرقم يمثل قفزة غير عادية عن الإحصائيات قبل ديسمبر.

ما سبق كان إستهلالا لابد منه

فى الجامعات المحترمة و المدارس بل المنشآت الكبرى يوجد تقليد جميل و هو إقامة حفل إستقبال للقادمين الجدد يتم فيه تعريفهم بالمكان الجديد و تقديم القدامى إلى الجدد و تكون فرصة لتقديم صورة جميلة و مبشرة للجامعة مثلا للقادمين الجدد.

و يساهم هذا الإحتفال فى دمج و إستيعاب الجدد فى مجتمع الجامعة و ينطلقوا فى العطاء من أول يوم.

عادة تبذل الإدارة جهدا غير عادى فى وضع برنامح هذا الإحتفال بغرض تحقيق الغرض من هذا الإحتفال بأقل قدر من الملل. و يبذل كل عضو ممن يشاركون فى هذا الإحتفال قصارى جهده فى إنجاح الحقل بنقل قدر كبير من خبراته و تقديم صورة مشوقة عن النشاط الذى يقوم به.

فى هذا الحفل الكريم - هنا فى محاورات المصريين - إسمحوا لى أن أن أتقدم بنبذة صغيرة عن محاورات المصريين أحاول أن تكون مختصرة و أترك المجال لباقى الأفاضل أن يشاركوا فى هذا الحفل الكريم كل بما يريد أن ينقله لكم عن محاورات المصريين.

محاورات المصريين بدأت منذ يونيو سنة 1999 و كانت بدايتها عندما نجحت فى إقناع المرحوم فؤاد سراج الدين فى نشر جريدة الوفد على الإنترنت ووقتها لم تكن سوى جريدة الأهرام و الأخبار اللتان تنشران على الإنترنت.

و كان هدفى الإستفادة من النقلة التكنولوجية فى تفعيل التواصل بين قادة الرأى الممثلين فى كتاب جريدة الوفد و بين جمهور القراء و قدمت لأول مرة إمكانية التواصل بين القراء و الجريدة فى صورة تعليقات على الموضوعات و فى صورة محاورات المصريين.

تذكروا أن ذلك كان فى منتصف عام 1999 فى ذلك الوقت لم تكن ظهرت الكثير من المجلات و الصحف على الساحة و حتى لا أثقل عليكم فى تاريخ محاورات المصريين إنقطعت العلاقة مع جريدة الوفد عقب نشر جريدة الوفد بيان على نصف الصفحة الأولى يتنصلون فيه من محاورات المصريين على ما أذكر عام 2002 ... و إستمرت محاورات المصريين

و لا تتبع أى حزب أو جماعة سياسية و لكننا نحاول أن نبنى رؤيتنا الخاصة من أجل مصر و المصريين

و محاورات المصريين تجمع مجموعة من خيرة مثقفى مصر الذين يتيهون عشقا فى حب مصر و يطلبون كل الخير لمصر و أنصح لكم أن تتجولو فى محاورات المصريين و تتصفحوا موضوعاتها القديمة و الجديدة و تتعرفوا على كتابها و تعدوا نفسكم لتكونوا من نجوم كتابها.

و ستلاحظون أننا نحرص على مستوى راقى للحوار حيث نحترم كلنا الرأى و الرأى الآخر و نحرص جميعا على إستخدام مفردات الحوار الراقى و أثناء كتابتنا نوجه حديثنا لبشر من لحم و دم و ليس لجهاز الكومبيوتر.

و ستجدون النكتة و الدم الخفيف و كذا الموضوعات الحريفة و ستلمسون جميعا مدى الصدق الذى نكتب به حتى عندما نكتب وصفات "طبيخ" و ستجدون موضوعات جادة و جادة جدا و موضوعات خفيفة و خفيفة جدا.

كما أننا بين الحين و الآخر ندعو للقاء شخصى فى القاهرة و حتى الآن كان الحضور فى حدود 30-40 عضو و إذا زاد العدد ربما سنفكر فى التنظيم بطريقة أخرى.

عامة ألتزم دائما بعدم الإطالة و لكنى أستسمحكم فى لمس سريع لبعض ما قد يسبب عدم الرضا عن العضو الجديد و أطلب منكم المشاركة فى إقتراح الحلول.

البرمجيات المستخدمة فى محاورات المصريين تؤدى إختفاء الموضوعات القديمة و ظهور الموضوعات الجديدة و نتغلب على هذا القصور بإستخدام خاصية إظهار المشاركات الجديدة

يشكو البعض من عدم وجود تعليق على موضوعاته و هذا يكون ربما لأن الموضوع تم تغطيته أو أن القراء يتفقون مع الكاتب و هذا عادى

كما أننا هنا نرفض أى مداخلة لا تضيف أو تثرى الموضوع الأصلى بمعنى أن مداخلات مجرد إثبات الحضور يجب أن نتجنبها.

عند إختيار عنوان للموضوع ليتنا نبذل بعض الجهد و نفكر من وجهة نظر القارئ الذى من حقه معرفة محتوى الموضوع قبل قرائته و ألا فإنه سيتجاهله و أطلب مشاركتم فى إقتراح آلية معينة تجعل عنوان الموضوع معبرا عن محتواه.

ربما فى مداخلة أخرى - لى أو لغيرى - سنقوم بلفت النظر لموضوعات مميزة و أعضاء مميزين و قضايا نهتم بها و كذا التعريف بفريق الإشراف و التنسيق و دور الإشراف.

أعتذر عن طول المداخلة و أدعو فريق الإشراف و التنسيق لأخذ الميكرفون و أدعو قدامى الأعضاء للمشاركة أيضا و ذلك دون ترتيب

شارك هذه المشاركه


رابط المشاركه
شارك

الأستاذ الموقر عادل أبو زيد

انا من الناس الجديده معاكم وصراحه فكرتك رائعه جدا وكلامك عن المحاوارات اعطاني فكره فعلا كنت مفتقده لأن أي عضو ينضم لأي منتدي دايما بيكون أول سؤال مين الناس دي وعايزين يقولوا ايه فطبعا ردك المختصر الوافي أعطاني فكره وانا فعلا سعيد بوجودي بينكم وان كان لى عتب على نفسي قبل ما يكون عليكم انتم انتوا مش ظاهرين على النت ليه انا من نفس تاريخ نشأتكم على النت تقريبا لكن مش عارف هو الحظ ولا خطا في الإعلان عنكم هو الللى اخر انضمامي ليكم 6 سنوات :lol:

تم تعديل بواسطة لخبطه

شارك هذه المشاركه


رابط المشاركه
شارك

أود أن أضيف نقطة مهمة وهي إن حزب الوفد قد تنصل من منتدى محاورات المصريين بعد أن تبنى العديد من الزملاء الأفاضل بالمنتدى حملة " لا لتوريث الحكم لجمال إبن مبارك " وتكاتفتك الجهود لكي يقولوا : لا لتوريث .. فأحس حزب الوفد بالحرج - بالرغم من إنه حزب معارض ولكنه مُستأنس وأصبح في جيب الحكومة - وبالتالي مثلما نقول ( خلع من الموضوع ) .

- أما بالنسبة لسؤال العزيز لخبطه ... في إننا مش باينين على النت .. فأسمح لي أن أقول لحضرتك إن منتدانا من أكثر المنتديات التي تقتبس منها الصُحف المُستقلة موضوعات وغالباً ما يكون لنا السبق في تناولها ... وحتى أنا شخصياً في كثير من الأحيان أقوم بالبحث عن موضوع مُعين على النت فأجد محاورات المصريين من أوائل المواقع التي تظهر لي .

- ولكن أنا لي عتاب على الزملاء الجدد ( 460 ) خلال شهر واحد .. وهو خوفهم من الإقدام على المشاركة ..وإكتفاءهم بالفُرجة والقراءة فقط ... وأود أن أخبرهم بإن جميعنا مر بتلك المرحلة .. لكن غيرته على بلده ومحاولة فعل شيء ولو حتى قول كلمة حق هو ما يدفعه للكتابة والمشاركة الإيجابية .. حتى لو ترددت مقولة ( مافيش فايدة .. ما الناس ياما إتكلمت )

ولكن أثبتت الأيام إن في فايدة .. ونص كمان .. ولو مافيش فايدة كان زمان جمال دلوقت راكب على الكرسي ومدلدل رجليه .. لكن كل الجهود التي تُبذل سواء في عالم النت أو في الصُحف المُستقلة الشريفة حالت دون الإقدام على ذلك وجعلت مبارك يفكر ألف مره قبل أن يخطو هذه الخطوة ... دي قضية من القضايا على سبيل المثال وليس الحصر ..

أما إذا كنتم ترون بإن المستوى الثقافي للزملاء المشاركين أعلى وبالتالي ترددون ( وأنا هاروح فين وسط دول ) فأقول لكم إننا جميعاً سواء ، وزي ما أنت بتتكلم مع أصدقاءك في الشارع والعمل والجامعة والبيت ... تعالى وقول نفس الكلام سواء سياسي أو إجتماعي أو حتى في الطبيخ وستجد تفاعل من الجميع ...

يعني أقصد إننا نزيل حتة الرهبة دي من النفوس .. فماحدش مننا لقى نفسه عضو فعال بين يوم وليلة ... فلازم الأول تبقى كومبارس صامت وبعدين مُتكلم وبعدين تاخد دور صغير وبعدين سنيد وبعدين تبقى نجم شباك وتشيل الفيلم لواحدك ومن ثم تتحجب وتعتزل وتقعد في البيت :lol:

فارجو من الجميع أن يكونوا إيجابيين ... يعني أنا بأتصور إن عدد 2400 عضو الحاليين ... لو في منهم 1500 نشيطين ويتحدثوا بدون خوف .. كنا عملنا ثورة في مصر وما كنش وضعنا أصبح هكذا .... وأعني طبعاً محاورات المصريين وغيرها من المنتديات المصرية الجادة التي توجد على النت والتي لديها هدف تريد أن تراه على أرض الواقع .. ولكن هذا الهدف لا يأتي من قراءة أو سماع الأخبار والإكتفاء بمصمصة الشفايف .

--------

أريد أن أضيف شيء أخير منعاً للإطالة - يمكن لأول مره بأقول كده - وأقولكم إن حكايتي مع الإيجابية بدأت من الصف الثالث الثانوي .. عندما كان يوجد لدينا في الفصل مُدرس تاريخ لا يستطيع ان يوصل المعلومة لنا وبالتالي ضيعنا جميعاً .. ولكننا إجتمعنا كلنا وقررنا نكتب شكوى لمدير المدرسة وكان المدير ده هو - الأستاذ حسين جاويش مؤلف كتاب المُعاصر للرياضيات وهو شخصية جبارة ولا يتوانى عن البشط بأي شخص مهما كان .. وكانت الوزارة بعتاه مخصوص لنا عشان يظبط المدرسة اللي كانوا بيروا إنها في حالة إنفلات - وبالفعل وصلت الشكوى وجاء المدير بنفسه وأخذ يستمع إلينا في حضور الأستاذ ... والذي بكى عندما سمع شهاداتنا في حقه وذلك لإحساسه بالفشل ... والحمد لله تم تغيير المُدرس بأخر أفضل .

إستحليت الموضوع وبعد أن أنهيت الدراسة الجامعية إلتحق بدورة لدراسة علوم الحاسب الالي لمدة 6 شهور في جامعة عين شمس .. وكان هناك عمالقة يدرسون لنا وكلهم دكاترة في المواد التي يدرسونها .. وكان من ضمنهم إسم دكتور مشهور جداً يقوم بتدريس مادة ( تحليل وتصميم نُظم ) ولكنه كان بيتحدث إلينا وكإننا دكارتة مثله.. فنفس الشيء لم نسكت عن الظلم وقلنا لأ .. وتم تغييره

فهذا نموذج صغير لتغيير الواقع إلى الأفضل والذي يُمكن أن ينسحب إلى تغيير واقع المجتمع ككل أيضاً فلا يوجد مُستحيل .. وكم من أفراد في التاريخ غيروا مسار حياة أمم بأكملها .

ولكم تحياتي ،،،

أحمد

شارك هذه المشاركه


رابط المشاركه
شارك

سعدنى وجودى هنا

واعجبتنى مشاركة الاستاذ عادل والمراقب بعده الذى صراحة لم استطع قراءة الاسم

وتقريبا هو السيد :lol:

المهم من اهم الاسباب التى جعلتنى ااشترك هنا هو حرية الراى

فانت تتكلم دون ان يحجر على رايك شخصا اخر اذا كنت مخالف له فى وجهة نظره او مذهبه الذى هو منضم اليه

فتلك نقطة

النقطة الثانية اسلوب الحوار الراقى الذى تستمتع به قعلا وانت تقرأ المواضيع

ايضا اتمنى فعلا ان نستطيع تغيير باقى الاشياء فى وطننا الغالى

ولن يتأتى ذلك ونحن جالسون فى بيوتنا نشاهد التلفاز

ولكن سيأتى ذلك وسيتغير بكتاباتنا وكلامنا ونشاطنا

فطالما بداخلك رغبة للتغيير وقول لا للمخطىء والظالم ....فأنت ستنجح في هدفك

اخيرا اشكركم مرة اخرى

:wub:

شارك هذه المشاركه


رابط المشاركه
شارك

اولاً اريد ان اشكر الاستاذ عادل ابو زيد و كل من كان له دور فى هذه الفكرة التى يهدف منها كسر الحاجز الجليدى بين الاعضاء القدامى و الجدد.

الفاضل س س: اسمحلى اننى اشاركك رأيك فى موضوع السلبية فى المحاورات على الاخص و فى الحياة عامة.

انا برضه لسة عضو جديد, ايوة قعدت فترة متفرج بس اول ما بقيت عضو فى المنتدى حاولت اشارك بأقصى ما يمكننى و اعذرونى ان مشاركاتى قليلة بس و الله دة بسبب ظروف الكلية و الامتحانات.انا شاركت فعلا بالرغم من علمى ان اللى هايقروا مشاركاتى ناس من خيرة المثقفين و دة عشان اتعلم , بجد انا مؤمن ان الانسان عمره ما هايتعلم و هو واقف فى مكانه لازم يشارك عشان يتعلم و يغلط و يتعلم و بعدين يبدع و بكدة بقى ليه فعلا دور ايجابى غير هين.

انا بضم صوتى لصوتك و بدعوا كل الاعضاء الجدد زيى انهم يشاركوا ,يقولوا وجهة نظرهم ,ابعدوا عن السلبية.....

احنا بقالنا عصور سلبيين عايزين نتقدم بقى.

شارك هذه المشاركه


رابط المشاركه
شارك

الأخوات و الأخوة الأعزاء,

بصفتى أقدم عضو عامل بالمنتدى بعد مؤسسه الأستاذ عادل أبو زيد,

و بصفتى أكبر الأعضاء سنا ,( على ما أعتقد, إلا إذا كان بين الأعضاء من زاد عمره عن 72 عاما)

رأيت أن أنضم إلى صفوف المرحبين بأحدث دفعة من الأعضاء الجدد, الذين شرفوا المحاورات باختيار المشاركة فيها.

و أهم الأسباب التى جعلت "المحاورات" من أرقى المنتديات الثقافية, هى أنها تضم نخبة من شباب و شابات مصر, إنضموا, لكى يعبروا عن أفكارهم, و معتقداتهم, بدون حجر على هذه الأفكار و المعتقدات, فى مناخ تعبق فيه رائحة الأخوة, و الإحترام المتبادل, و الجدية عند تناول الموضوعات الجادة, و المزاح النظيف, عندما نسترخى, و ننال قسط من الفرفشة النزيهة.

إن الإحتفال بإنضمام دفعة من الأعضاء الجدد, هو تقليد يستحق أن تحذو حذوه المنتيات الأخرى, فإن كل مجتمع, سواء كان كبيرا, أو صغيرا, يحتاج لدرجة من الألفة بين أعضائه, و هذه المناسبة تتيح هذه الفرصة. حيث يرحب الأعضاء السابقون, بأقرانهم الوافدين.

و عندما اعترض بعض الأخوة الجدد فى الماضى القريب على ما اعتقدوا أنه ديكتاتورية من الإدارة, تلمست لهم العذر, فهم , مثل كل المصريين, تعرضوا للقهر, و الظلم, و حين انضموا إلى المحاورات, كان أملهم أن تكون واحة الحرية, و معقل الأمان.

و لكن ما لم يدركه البعض, و أنا كنت مثلهم فى صدر حياتى, أن لكل مكان, و لكل زمان, مقام, و نظام.

ما يعتقده البعض حرية, قد يكون فى الواقع تجاوزا لحق شخص آخر, و لكن التعايش الإجتماعى يعتمد على التوصل إلى معادلة بمقتضاها يتم بعض التنازل من جميع الأطراف, بحيث يكون هناك قدر كاف من الفهم بدون لفظ كلمة واحدة.

عندما وصلت إلى إنجلترا منذ 37 سنة, قمت بأعمال لا تتفق مع ثقافتى و قتها ( أو هكذا ظننت ) , و لكنى لم أتذمر, لأنى كنت ضيفا جديدا, يتعلم ممن كانوا هناك قبلا منه كيف يتصرف .

فى خلال عام واحد, تعلمت أسرار الحياة, و أصبحت الحياة وردية, و شكرت كل من نبهونى, و لفتوا نظرى لأخطاء إرتكبتها نتيجة جهلى بأسلوب التعامل فى مجتمع جديد.

و عند إنضمامى للجامعات الإنجليزية, كان هناك تقليد بالإحتفال بالطلبة الجدد, و كذلك المدرسين الجدد.

و قد أصبت بدهشة عندما وجدت أنى , و بعض الزملاء الجدد, فى صفوف الطلبة الجدد, المحتفى بهم.

و خلال الإحتفال, كان قدامى الأساتذة, و قدامى الطلبة, يرحبون بكلا الطائفتين, ثم بدأت الخطب, حيث رحب الأساتذة بالطلبة, و رحب الطلبة و الطالبات بالمدرسين الجدد.

و فى حفل العشاء, كان الأساتذة يخدّمون على الطلبة الجدد, و كان الطلبة القدامى يخدّمون على

المدرسين الجدد.

عندئذ فهمت الغرض من هذه التقاليد, و خلاصتها, أن الجميع سواسية, و لكن الأكثر معرفة, مطلوب منه إمدادها لمن تنقصه, بغض النظر عن الموقع الإجتماعى لكل منهما.

ذكرتى هذه المناسبة بأحد رؤسائى فى هيئة مصرية عملت بها كمحام بها قبيل تركى لمصر, و كنت أيضا سكرتيرا شرفيا لناديها الإجتماعى( شرفيا تعنى بدون مرتب).

كنت أجلس مع رئيس السفرجية أثناء فترة راحته,( و بعد مواعيد العمل بالهيئة), فى حديقة النادى, نتكلم فى السياسة و أمور إجتماعية أخرى, عندما أشار إلىّ رئيسى المكتبى, الذى كان يجلس فى مائدة بعيدة, بيده يدعونى للذهاب إليه.

أعتذرت لرئيس السفرجية, (الذى كان على وشك دخول إمتحان فى ليسانس إجتماع بكلية آداب القاهرة, و الذى كان الجميع يحترمونه لإتساع أفقه) , و ذهبت لأرى ماذا يريد هذا الفرعون الصغير.

و كان ما قاله لى هو أخطر ما سمعته فى حياتى, و لم تكن المرة الأخيرة التى سمعت فيها مثل هذا القول, فقد إنتحر منذ شهور قليلة شاب مصرى, لم يتمكن من الإلتحاق بوظيفة معينة, لأن مركز أسرته الإجتماعى لم يكن مناسبا, فى رأى الناس الأكابر, رغم تفوق مؤهلاته على جميع من تقدموا لمسابقة هذه الوظيفة.

هذا بالنص ما قاله لى السيد الفرعون الصغير:

" أيه ده يا أستاذ محمود؟ إزاى تقعد تدردش مع الراجل ده؟ ده سفرجى, و أنت محامى, و كمان سكرتير النادى, و مركزك الإجتماعى لا يسمح لك بأن تجلس معه هكذا و كأنكم قاعدين فى قهوة."

(المضحك أن النادى الإجتماعى لم يكن سوى قهوة بكل المعايير)

و أنا أشكر الآن هذا الفرعون الصغير على ما قاله, فأنا مدين له بتركى وظيقتى, و هجرتى إلى إنجلترا, و لكنى لم أستقيل إلا بعد أن أبديت له رأيى بصراحة فى شخصه, ثم إلقاء الإستقالة فى وجهه, مضحيا بالوظيفة, و مكافأة نهاية الخدمة.

فوصيتى لجميع أبنائى و بناتى الأعضاء الجدد,

إعتبروا أنفسكم أعضاء فى أسرة واحدة, و ستصبحوا مضيفين لأفواج أخرى فى القريب العاجل, آخذين بأيديهم, محيطينهم بعطفكم و كرمكم, و مرشدينهم خلال خطواتهم الأولى.

أطلت عليكم, و لكن عندما يعلم المرء أن لحظات عطائه قد قاربت على الإنتهاء, فإنه يود الإكثار منها, لتعويض لحظات الحرمان.

مرحبا بكم, و نحن فخورون بكم.

شارك هذه المشاركه


رابط المشاركه
شارك

لا أملك إلا أن أوجه الشكر لإخواتنا الكبار - في السن والمقام أيضاً - أ/ عادل و أ/ محمود على تلك الكلمات المُشجعة للجميع ( قدامى وجدد على حدٍ سواء )

وهاختم كلامي بـ ( ربنا يخليكوا لينا )

شارك هذه المشاركه


رابط المشاركه
شارك

ايوووووووووة

هي دي فعلا تاني مشاركة لي في هذا المنتدي الرائع

يعني لسه بقول يا هادي بعد ماكنت كومبارس صامت(على راي الاخ الفاضل س س)لاني متابعة للمنتدي من فترة طويلة وسعيدة جدا ان الواحد في الاخر برضه قدر يلاقي حاجة مصرية يستطيع ان يفخر بها في الزمن دا

جزيل الشكر للاستاذ عادل ابو زيد على هذه اللفتة الكريمة للترحيب بنا

وكل الشكر للاخ الفاضل سي السيد اللي مهون علينا غربتنا بروحه المصرية الجميلة

وللاستاذ الفاضل الافوكاتو كل التقدير والاحترام ويشرفني ان اكون عضوة في منتدي حضرتك فيه

وان شاء الله نحاول نتغلب على السلبية ونبدا معكم مشاركات ايجابية

تم تعديل بواسطة مسلمة لله

شارك هذه المشاركه


رابط المشاركه
شارك

بسم الله الرحمن الرحيم

الأستاذ /عادل أبو زيد صاحب الدار تحية إجلال وتقدير

الأستاذ الدكتور /محمود الأفوكاتو تحية تقدير واحترام

الأستاذ/ أحمد سي السيد الحبوب المحبوب تحية حب وإعجاب

السادة الأعضاء جميعاً

بصفتي عضو جديد وبدعوة خاصة من الأستاذ عادل في زيارة خاصة للإخبار بحذف موضوع لي لم يكن له محل من الإعراب أشكره على الحذف وأشكره على الزيارة وأشكره على الدعوة...وأعتذر عن دخولي إلى المحاورات بشكل تصادمي ..لكن ده كان لزوم التعارف..لي رجاء من المحاربين القدماء في المحاورات ..الرفق بالمستجدين حتى لو كانوا مخطئين...ولي رجاء من السادة الأعضاء جميعاً ..عندما ينشب الخلاف بينهم..

وطبيعي أن ينشب..ألا يستخدموا الذخيرة الحية في التراشق..تكفي الأعيرة المطاطية..

أو حتى الفشنك ...حتى لا تحدث جروح غائرة.. تحتاج إلى وقت أطول للإلتئام..

تغلق خلالها دكاكين الكتابة والمشاركة لتغير الديكور او النشاط

المحاورات بحق تجربة ثرية جداً وتواصل إنساني حميم ورقي غير معتاد على النت

وملتقى للهائمين بحب وطنهم الذي يستحق أكثر مما هو كائن

أرى أن المحاورات برقيها تجذب أعضاء جدد على مستوى متميز جداً مثل الشاعر المتميز

وأستاذ الآداب أبو أحمدين تحية خاصة وترحيب ..ننتظر أن نتعلم منه المزيد

أتمنى أن تقبلوني عضواً بينكم بالنيو لوك الجديد وشكراً

شارك هذه المشاركه


رابط المشاركه
شارك

السلام عليكم

شكرا لك ايها الاستاذ الفاضل على دعوة صغيرة لتوليف اعضاء جدد با المحاورين القدماء فلى عظيم الشرف ان اكون بين صفوف هذا القدر من المثقفين و اصحاب الخبرات الكبيره منهم و بااخص التقدير الاستاذ الافوكاتو لحسن الاسلوب

السيد سى السيد و الاستاذ عادل ابو زيد

ارجوا خلال مشاركتى ان لا اكون اساءت الى الاخوة الاعضاء او قد يوجد احد منكم قد اساء فهم وجهة نظرى

اقول ذلك رغم حذف الكثير من مشاركتى لانى اقول دائما قد يكونون اصحاب راى صحيح فيما ادخلت و لذلك لا اجادل و اسال لماذا وذلك لما اراه من تثقيف عالى فى المنتدى بمعنى اخر المهم انا كتابت و اخرجت راى و اصحاب الثقافه هم فى ايديهم الحكم .

من الاعضاء من غضب بسبب ردى على مدخلاتهم فى موضوعى فقرر الهجر الكامل لى وكاننى هامشى

من الاعضاء من اتهمنى باننى ذو تعصب دينى او عنصرى

من الاعضاء من قام برد فيه نوع من السخريه

من الاعضاء من اهتم واعطنى من ثقافته و تعليمه

من الاعضاء من قام بالنصيحه و كانه اخ

فارجوا من الجميع ان يقبل اعتذارى عن ما اسلف منى و ان يبقوا دائما بجوارى لكى اتعلم منهم

ملحوظه صغيرة

يوجد من الاعضاء من يستخدم اسلوب ساخر بعض الشى ولما اقوم بالرد بنفس الاسلوب يغضب اشد الغضب فى حين هو البادى فالماذا :angry2: عموما انا وجدت احسن طريق ان كتبت موضوع قابل للنقاش فمن الاحسن ان اكتب و انتظر الردود فقط حتى لو من بعض الردود سخريه فالاحسن ان تصمت و تطوى صفحه هذا الموضوع و لا تشارك مره اخرى لان من المحتمل انى سوف ارد بنفس الاسلوب وذلك تجنبا ان يقال عنك فظ اللسان و بكده تكون مش سالبى كما طلب الاستاذ افوكاتو

شارك هذه المشاركه


رابط المشاركه
شارك

أرحب كعضو قبل أن أكون من فريق الإشراف بالزائرين الجدد ، وأتمنى أن يجدوا في ربوع المحاورات ما يسرهم ..

لن أضيف الكثير بعد ما قاله زملائي الأعزاء في فريق التنسيق ، وما قاله الأفوكاتو وهو من عمداء المحاورات ومن أقدم أعضائها..

فقط أقول أن المحاورات مساحة للفضفضة ، والاستفهام ، والتفكير ..

هناك أشياء كثيرة تخطر على بالنا ، وأمور كثيرة نود عرضها على عقولنا ، ومناقشتها مع غيرنا ، وهذا الموقع هو أحد المساحات الموجودة على السايبر سبيس لكي نناقش بها كل تلك الأمور ، في شئون بلادنا ، وفي الأمور الحياتية ، وفي المشهد الثقافي والفكري والفني والإعلامي..

هنا ستجدون مجموعة من المصريين كما أفرد الأفاضل سابقاً ، لا يجمعهم انتماء سياسي معين ،ولكن يجمعهم الاحترام المتبادل ، والحب والإخلاص لهذا البلد الطيب، يتحاورون ويتناقشون في كل تلك الأمور..تنوع الآراء يثري النقاش ، بعيداً عن أحادية الرؤية والصوت الواحد..

وإن كان هنا من ضوابط ، فهذه الضوابط تقع في المقام الأول لحماية هذا المكان ، ولحماية المكانة التي وصل إليها هذا المكان ، وعدا خرق تلك الضوابط فالاختلاف في الرأي لا يفسد دائماً وأبداً للود والاحترام أي قضية ..

أهلاً بكم جميعاً في المحاورات .. وأتمنى لكم بالأصالة عن نفسي إقامة مفيدة وممتعة ..

وهذه لازمتي علشان محدش يفهمني غلط : :D

خلص الكلام

شارك هذه المشاركه


رابط المشاركه
شارك

إخواني الأعزاء .. من مشرفين وأعضاء ..

يشرفني أن أنتمي لهذا المنتدى الرائع وأرجو أن تكون مشاركاتي مثمرة وأن تساهم في إثراء المحاورات في المنتدى بكل ما هو نافع ومفيد ..

وعلى فكرة .. في كل حفل يكون هناك جاتوهات وحاجة ساقعة و .... ولا إيه النظام عندكم ... ؟؟ على العموم يكفينا كلمات الترحيب من الأستاذ عادل والأفوكاتو وس س

بعض البيانات الشخصية اللازمة لكي يكتمل التعارف .. أنا مصري " كما هو واضح من الاسم :D " مقيم بالسعودية وأعمل مدرس كمبيوتر متزوج ولي ثلاثة أولاد ما شاء الله زي العسل .. أظن يكفي كده

أود أن أهديكم جميعاً باقة من الورد والأزهار لكني مش لاقي الرابط حالياً :sad:

تم تعديل بواسطة مصري المصري

شارك هذه المشاركه


رابط المشاركه
شارك

مرحبا بعودة الأخ هوايت هارت( بعد غياب للقيام يمهمة أرشفة موضوعات المنتدى), و خاصة و أنه قد أحضر معه التورتة لزوم الترحيب.

بالهناء و الشفاء للجميع.

و مرحبا بكم مرة أخرى.

شارك هذه المشاركه


رابط المشاركه
شارك

حركة غريبة تجتاح قهوة المحاورات اليوم ... و لا تخطأ العين في انه ليس يومآ كباقي الأيام ... انوار و زهور و أيقونات صيدناوي تستطيع ان تلمحها موزعة بهارمونية جميلة في كل الحارة بينما تضع بنت مصرية بعض باقات الزهور فوق الموائد... من ركن يرتفع صوت كمان جميل و تستطيع ان تلمح فايولين كينج و هو يحاول و يحاول في مقطوعة جديدة ... الأستاذ عادل علي كرسيه و نظارته مثبتة بأحكام يقرآ ورقة في يديه ...

عصام : حسابك اهه مقدما يا اسطي فهيم ... الميعاد قدام المتحف كمان ساعة ... انتوا كام اوتوبيس

السواق : 7 اوتوبيسات يا استاذ

استاذ عادل ابو زيد : 7 ايه .. 7 ايه .. دول حوالي 500 .. يعني مش اقل من 10 اوتوبيسات

عصام : حتعرف تتصرف في 3 كمان و الا ايه ؟

السواق : رقبتي يا استاذ عصام .. انا عمري ما كسفتك قبل كده

عصام : جدع يا اسطي فهيم ... و آدي اليفط اللي حتحطها علي البرابريز

السواق : م حوا رات ال مصر يين

عصام : ما انت بتعرف تقرا اهه ... ياللا سكة السلامة ..

و تعود القهوة الي حركتها المتلاحقة ... مجموعة عمل يحسدها النمل نفسه علي تنظيمها

يدخل سكوب القهوة و ايده في جيبه ..

سكوب : القهوة يا متولي يا ابني ... حدش شاف احمد النهارده ...( ثم لاحظ الحركة الغير عادية) ايه ده .. ورد و شجر .. بلالين و ميكروفونات .. مش ناقص غير ان الشارع يتسفلت و اقول ان الريس جاي بجد النهارده

سي السيد : يا نهارك اسود .. اوعي تكون نسيت النهارده ايه

سكوب : خليك في راس احمد يا سعادة الكوافير .. و من غير مألسة حد يفهمني

ينظر الجميع الي سكوب بغضب .. حتي فايولين يتوقف عن العزف .. و عندما تلمح بنت مصرية سي السيد يتجه بالمقص جهة سكوب .. تقف بكل لطف بينهما ساحبة سكوب من دراعه

بنت مصرية : مش حتبطل هزار يا سكوب ... انت نسيت بجد النهارده ايه :؟

سكوب : الأربع

بنت مصرية : لأ يا سيدي انا .. النهارده الحف..

سكوب : الحف ..

بنت مصرية : الحفل ..

سكوب : الحفل ..

سي السيد : حتشلني يا عم البغبغان ...

بنت مصرية : الحفلة يا سكوب .. مالك ؟

سكوب : حفلة ايه ؟

تخطف بنت مصرية المقص من يد سي السيد و تتجه الي سكوب ... و في تلك اللحظة يقوم احمد من علي كرسيه و نص راسه مازالت غير محلوقة و يبتعد بسكوب :

أحمد : ولاه يا سكوب ... النهارده حفلة الأستقبال بتاعت الأعضاء الجدد اللي عمالين نحضرها بقالنا ميت سنة ... افتكرت و الا لسه؟

يبهت سكوب : ايه ده .. هي النهارده ؟

احمد : اوعي تقوللي انك نسيت تجيب يافطة القواعد .. لحسيبهم عليك بجد

سكوب : انا في عرضك يا احمد .. امبارح كنت معزوم علي اكلة حواوشي و نسيت اعدي علي بتاع اليفط...

عصام : حواوشي .. حواوشي يا سكوب و ما تاخدنيش معاك

سي السيد : نهاركم اسود انتوا الجوز .. حواوشي ايه يا فجعان افندي .. هو انت ما وراكش غير بطنك ... طب حنعمل ايه دلوقتي

استاذ عادل : تعال يا سكوب ...( يقترب سكوب حاميآ وجهه بكفيه) ما تخافش يا جدع .. ما فيش مشاكل يا جماعة ... القواعد تتطبع و يبقي يقراها عليهم لما ييجوا ..

ابتعد الجميع عن سكوب بينما هرع سكوب الي اقرب كومبيوتر لطبع القواعد

ابتدأت الأوتوبيسات تتوافد .. و فجأة تحولت الحارة الي لوحة سيريالية من اشخاص تتشابه و تختلف ... الأبتسامات علي الوجوه .. و فريق المنسقين يقومون بدورهم في الترحيب ... و الشباب كعادته سريع الحركة لا يهدأ في مكان .. و كل واحد منهم يريد ان يفوز بكرسي مميز ...او ابتدأت المجموعة تأخذ شكلآ ... و بينما فايولين يحاول جاهدا ان يعزف قطعته .. و لكن هيهات

ز تسمع الصيحات الشقية تتصاعد ... زهيري انت فين ؟ داس ايست نيشت كينوك .. ايه يا عم Koenig der Loewen

انت فاكره معهد جوتة ... ماشية معاك يا دسوقي ... فين ناش ؟ ... سا الفل يا دوكتور ... تعال هنا يا ميدو .. مئات الأصوات و الأسماء التي تتداخل مكونة منظر مفرح ...

يقترب داروين من مجموعة تجلس علي مائدة معينة : معلش يا جماعة بعد اذنكم الترابيزة ديه هي الوحيدة المحجوزة في المكان كله

الأسكندرني : اشمعني يعني .. محجوزة لمين

داروين : لمدام سلوي .. أخناتون .. الأفوكاتو و مصر عشقي

الأسكندرني : و هما فين

داروين : اعتقد ان الأفوكاتو بس الل موجود حاليآ .. بس ده مالوش اي علاقة ... المجموعة دي هي بقي "الكبار" عارف المثل ؟

الأسكندرني : فاهم يا باشا .. اللي مالوش كبير يشتريه .. يبقوا فعلآ كده لما يكون حضرتك اللي بتشهدلهم

داروين : انا بس .... اسأل اي واحد هنا و هما يقولولك دول مين

و تقوم المجموعة باسمة بينما تسمع صوت قي الميكروفون

انه صوت سكوربيون ...

الو .. الو .. واحد اتنين ... واحد اتنين تاللاتة .. احممممممم اخخخختففففف..

سي السيد : الله يقرفك يا بعيد

سكوربيون يخرج ورقة من جيبه و يبدأ في الحديث

شارك هذه المشاركه


رابط المشاركه
شارك

وبعد أن أنهى سكوب وصلة القرف وهدأ وأرتدع بدأ في القراءة :

سكوب : أيها المتحاورين والمتحاورات .... والمحترمين والمتحاورات .. ميه مسا على عيونكم ... يُسعدني بالأصالة - الله أنا بأحب صوت أصالة قوي - عن نفسي وبالنيابة - إكفيني الشر يارب - عن كل فريق التنسيق أن أرحب بكم معنا في مجتمعنا الصغير الكبير بكم .

س س : اللي يحب النبي يسقف ..... سقفوا يا جدعان وما تكسروش بخاطر الراجل .... ده شكله هايقول كلام جامد قوي

سكوب : إنت يا جدع يا مشرف يابو قميص فوشية بيفكرني بستارة أوضة الجلوس إنت - مشيراً إلى سين سين - أقعد مكانك وما تتكلمش إلا أما أقولك .

س س : والله عال ... سكوب من ساعة ما مسك الكوز المخروم وهو عايش فى دور عبناصر في خطاب التأميم ... طب والله العظيم لما تخلص لأوريك .. ماشي يا سكوب .

سكوب : أيها الجمع الغفير .... لا يسعني في هاذوها الحفلة إلا أن أرحب بكم وأتمنى لكم طيب الإقامة ... كما أتمنى منكم مشاركةً فعالة وإيجابية .. من أجل رفعت بلادنا - مين رفعت ده ؟ - ... ونحنو نعلمو جميعن بإن التحاور لابد أن يكون فيه إختلاف .. ولكن دعونا نتذكر جميعاً المقولة الخالدة التي تقول " إن الخلاف في الرأي لا يُفسد للوداد قضية - أيوه وداد دي أنا عارفها كويس :) - . والآن دعوني أُقدم لكم فريق التنسيق نفر نفر : وهابدأ بالأصغر سناً عشان نقلبهم بسرعه وندخل على التقال :

1- فيولين كينج ..... صحي فايولين يا سين سين وأقوله طُس وشك بشوية ميه وتعالى هنا على المنصة بسرعة .

س س : حاضؤ يا أبية يابو كوز .... من حقك تدي أوامر لحد ما أتلايم على الكوز وبعينك لو شفته بعد كده .... فايولين .. يا فايولين .. وهنا يناوله سين سين زُغداً قوياً ..

فايولين : إيه .. في إيه جري إيه ... الفطار جاهز يا أبيه ؟

س س : فطار ؟ قوم يا ننوس إطلع على المنصة وكلم عمو سكوب عايزك هناك ( ده أنت هاتاكل ضرب .. ما هو مافيش حد طلع المنصة ورجع سليم ... كله بيروح ون واي )

فايولين : أيوه يا عمو سكوب .

سكوب : خد أمسك البتاع ده يا فايولين ووجه كلمه للجماهير .

فايولين : .. مين ؟ أنا ؟ ... لأ .. لأ أنا بأتكسف يا أبيه .... إنت عارف أنا فنان ومرهف الأحاشيش ... وإتعودت إني أترجم كلماتي بالعزف على الربابة .. قصدي الكمانجة .

سكوب : وهو أنا بأقولك إتحزم وأرقص ... يا جدع قول للناس أي حاجة شكلنا بقى وحش قدامهم ... إن شالله تمسي عليهم وتدنك نازل .

فايولين: حاضر .. حاضر .. بس خليك واقف جنبي وإسندني ...- وهنا يبدأ فايولين في الكلام ... بسم الله الرحمن الرحيم ... أيتها الجماهير الكبيرة ..... سعيده عليكم ... أنا إسمي فايولين وبيدلعوني بيقولوا لي يا وليد .. والسنة دي أنا في تالتة أول ... وأنا فرحان خالص خالص إنكو جيتوا بيتنا تزورونا وكده ... وأوريفوار

س س : جم بيتكم ؟ طب إقفل أوضة الجلوس وإنزل يا كاسفنا ....

سكوب وهو يجز على أسنانة ونفسه من جوه يشوط فايولين ويكعوره من على المنصة : شكراً لفايولين ... يا سلام كلمات مقتضبة لكنها مُعبره ... روح يا سين سين هات لي شريف من التلاجة .

س س : بأقولك إيه .. أنا مش شغال عندك ... إبعت فايولين يندهو من على قهوة ماسبيرو أنا بأنفخ البلالين بتاعت الناس الجديدة عشان ندي كل واحد بلونه وهو خارج .

شارك هذه المشاركه


رابط المشاركه
شارك

فايولين : يا أثتاذ شريف ... يا أُثتاذذذذذذذذذذذذذذذ شريف .

شريف : إيه يابني إنت في إيه ؟ إنت بتنادي على واحد ميت ... الله يسامحك قطعت حبل أفكاري أثناء ما كنت بأكتب مقال هايكسر الدنيا عن علاقة الإعلام الفاسد بالحراك السياسي في زمن المجهول .

فايولين : أنا أثف ... لكن عمو سكوب عايزك ضروري وبيقولك سيب اللي في إيدك وتعالى على المنثة اللي عند قهوة المحاورات على يمينك عدل .

شريف في نفسه : سكوب ؟ !!!! وده إيه اللي رجعه ده ؟.. ماحنا كنا مرتاحين ... طب روح قوله أنا هاخلص المقالة وأبعتها على التكر لكل الصحف العالمية - اللي ما نشرتلوش ولا عامود من سطرين لحد دلوقت - وهاجي على طول .

فايولين : لا يا عم يزعق لي .. ده متبت ومأكد عليه إني لازم أجيبك في إيدي .

شريف : حاضر أمري لله .. طب بس كده الهيرالدتريبيون واللموند ومجلة البعكوكة مش هايصدروا في ميعادهم لإنهم بيستنوا مقالاتي من الشهر للشهر ... يالله زي بعضه كله عشان المحاورات يهون .

سكوب : والآن أقدم لكم قلم المحاورات الحر ... وصوت المنتدى الجهوري .... الصحفي اللامع ورئيس تحرير مجلة " غطيني وصوتي ياما " الأستاذ مدير التحرير / شريف عبوهاب ...... سقف يابني إنت وهو أحسن يهفكو مقال يجبكوا الأرض .... فليتفضل إلى المنصة الأستاذ الصحفي اللامع .

شريف : في الحكيكة مش عارف أقول إيه بعد كل الإطراء الطري ده كله .. لكن كل اللي عايز أقوله هاكتبه في مقال وأنا متأكد إن كل الصحف العالمية والمجلات المتخصصة مثل بلاي بوي ... و بيبول .. هاتتهافت عليه وهاسمي المقال ده ( المحاورات في زمن اللامعقول ) إبقوا إقروها وقابلوني لو فهمتوا حاجة ... خلص اكلام .

سكوب ( والله حرام ... وكثير قوي اللي بيحصل لي وأنا غلطان إني تطوعت وشيلت الليلة دي ) : يا سلام يا استاذ .. كلمات صحفية وعبارات رنانه تستحق الإشادة.... روح يا شيخ ... وما تجيش تاني . .... يا نافتلين ... قصدي يا فايولين .. روح إزعق للأسطى عصام من الورشة وخليه ييجي يمكن يظبط المسائل ... الناس قربت تنام مننا يابني .

فايولين : فوريره يا عمو .

سكوب : إيه يا حج سين سين .. هي الناس دي قاعدة في بنزينه ولا إيه ؟ مافيش دور شاي ... سجاير تترش على الناس ... شاندوتشات كبدة بالسجق ؟ ده أنا شايف وشوهم بقت زي الكركم من طول اللطعه اللي لطعينها لهم وكل واحد قاعد يمني نفسه بلقمة ياكلها .

س س : والرشة الجريئة دي هاتبقى على حساب مين إن شاء الله ؟

سكوب : ياباي عليك .. ده أنت قيحه ... يا أخي عيب عليك كده .. على حساب أ / عادل أبو زيد طبعاً :wub: :blush:

وهنا يرمقه عادل أبو زيد بنظرات نارية . :) . تتبعها تنهيدة طويلة على تلك التدبيسة .

س س : إذا كان كده يبقى بأقترح ننزل لكل واحد شاندوتش كبدة وواحد سجق ... وقزازة سباتيس ... وبرتقانيه ... واللي بيعفر نباصيله واحده سوبر من اللي شبه الزومارة ومهما تشرب فيها ما تخلصش .

وهنا ينفجر عادل أبو زيد غاضباً : إيه يابني إنت ... هو مال يهود ؟ عمال تفنجر وتبعتبر من جيب غيرك .... هو ساندوتش واحد لك عضو وقزازة الحاجة الساقعة تبقى بشفاطتين وكل إتنين يتشاركوا فيها دعماً للتضامن والأخوة ... وممنوع السجاير ... اللي عايز يدخن يبقى يدخن من جيبه ... حرام عليكوا أنا عندي عيال .

سكوب : إسمع كلامآأبيه عادل وروح جري على عربية الكبدة اللي في الشارع اللي ورانا وما تنساش صناديق البيرة .. قصدي الحاجة الساقعة والشفاطات ..... دي هاتبقى ليلة لها العجب .

شارك هذه المشاركه


رابط المشاركه
شارك

اتصنت على الحوار الدار بين الاستاذ عادل ( الراعى الرسمى) و بين سكوب و سين سين (المنظمين) و اقود مظاهرة خسيخه غير مرئيه

احقوا يا جماعه ده سندودش واحد و كل انتين فى ازازة حاجه ساقعه

شارك هذه المشاركه


رابط المشاركه
شارك

ولم يكذب سين سين الخبر وخلال 5 دقائق كان يدور بصاج الشاندوتشات وصندوق البيبس بين الحضور :

س س : أيوه حاجة ساقعه بيبس ... سميط وبيض وجبنه .. إروي عطشك يا صايم ... الكبده الطازة ... معانا السجق اللي بيلعب ... أيوه الهوت دوج الفريش ..

إسكندراني : لو سمحت يا بلادينا .

س س : أيوه يا كابتن ؟ وبعدين إيه بلادينا دي ؟ شايفني لابس عِمه وشايل بلاص فوق دماغي ؟

إسكندراني : مش قصدي والله .. لكن أنا عايز أسألك بس معاك ساندوتشات كبده إسكندراني وتكون في عيش كيزر ؟

س س : طبك موجود .. والساندوتش بإتنين جني بس عشان خاطرك ومعاه درنك مجاناً .

إسكندراني : إيه ده ؟ بس أستاذ عادل قال إنه الحاجات دي ببلاش .. حتة بالأمارة مسكتوا في بعض لما سعادتك إتقرحت واحد سجق جنب الكبده .. وراح أستاذ عادل كان هايضرب بالقلم عشان البادجت كده هاتخرم منكم .. صح ولا انا غلطان ؟

س س : لأ غلطان .. وما ترطش كتير في الكلام ومالكش دعوة بشئون الحكم ... معاك غتنين جني هاتاكل ... ما معكش هاتتفرج على زمايلك وهما بياكولا ويحنسوك .

إسكندراني : لأ هادفع وأمري لله ... حار ونار ...

س س : نعم .. قولت حاجة ؟

إسنكدراني : لأ .. أنا بأقول إنه عايز الساندوتش حار ونار .. يعني سخن ومشطشط ... وربنا على الظالم .

حلاوه العنتابلي : إنت يا بتاع الساندوتشات .... إيه خلص اللي قاعد قدامك ده هوا .. رايح جاي من قدامي وخيلتني وما كلفتش خاطرك تعزم بعقب سجارة حتى ؟

س س : لو سمحت مالكش كلام معايا ... إنت أصبحت رديف دلوقت .. يعني مش على قوة المحاورات بعد ما قدمت إستقالتك ....

حلاوه : طب إعتبرني ضيف وباصي لي ساندوتش سجق ده أنا على لحم بطني من أمبارح ...

س س : طب عشان خاطرك الساندوتش مع الطرشي بأربعة جنية وخمسة وثلاثين ساغ .

حلاوه : ليه إن شاء الله ؟ مانت لسه بايع نفس أم الساندوتش للزميل إسكندراني بجوز لحاليح .

س س : يا معلم الأخ إسكندراني .. عضو عامل .... أما ساعدتك فعضو عامل عامله .

حلاوه : ولا تحسبن الذين قتلوا في سبيل الله أمواتا ... حسبي الله ونعم الوكيل ... ماشي يا سيدي .... ربنا على الميفتيري .

شارك هذه المشاركه


رابط المشاركه
شارك

Join the conversation

You are posting as a guest. If you have an account, sign in now to post with your account.
Note: Your post will require moderator approval before it will be visible.

زوار
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


×
×
  • اضف...