هل دفعت مستحقات صيانة العمارة ؟

[عادل أبوزيد]

الأرجح إنك لو مغترب و قافل شقتك في مصر ستقول و أنا أدفع ليه أنا قافل الشقة و مش قاعد في مصر

ما سبق كان إستهلالا لابد منه

السؤال مشروع و منطقي و لكن الجواب المنطقي من يقوم بتغطية مصاريف الصيانة و النظافة للعمارة هو من يقيم في العمارة أو يتملك شقة في العمارة

نظريا كلام مضبوط ليس عليه غبار

لكن

عندما يتدهور مستوى العمارة و تسكنها الحشرات و تتراكم فيها القمامة و تتوقف المصاعد و و و و تتدنى القيمة السوقية للعمارة و شققها

هل ستكون سعيدا

إذهب إلى عمارة الأطباء في باب اللوق و أتحداك أن تتصور أن من بين سكانها حد مستواه أكثر حثالة القوم و آسف لهذا التعبير

ليتكم تذكروا لنا تجاربكم في مواجهة التقاعس عن المشاركة في مصاريف العمارة

[باهى الطائر الحزين]

لجأ مجلس الأداره ورئيسه الأخواني

بفكر ابلغ عليه

الي تشفير المصاعد بكروت ذكيه تعاد برمجتها بصوره سنويه

المشكله في الخليجيون الذين لا يأتون إلا بالأجازات الصيفيه

يدفعون رشوه لعمال المصاعد وحال وجودهم بالأعلي يخابروهم

فيسجلون لهم المصعد ويرسلوه لهم وثم يعيدون طلبه من اسفل

حتي تعلم منهم المصريين واصبح عمال المصعد متخمون !

بفكر بجديه اشتغل معاهم ...

[Grandma]

أنا بدخل عمارات في أماكن المفروض انها راقية و سكانها مستواهم كويس

لكن للاسف العمارات بتكون مزبلة و شكل الدخلة و السلالم و المصاعد تكسف

تقول في نفسك أكيد السكان دول أوباش

و للاسف بيعرضوا شققهم ايجار مفروش للخليجيين و الاجانب باسعار خيالية

عاوزين ياخدوا و ما يدوش ولا يصرفوا على الصيانة و النضافة

دا نوع تاني من الطمع

[التونسى]

ليتكم تذكروا لنا تجاربكم في مواجهة التقاعس عن المشاركة في مصاريف العمارة

انا ليا تجربتين احداهما 8 سنوات والاخرى سنتين .. فى التجربه الاولى كان لدى بمصر شقه ((محندقه)) فى بيوت اهالى ((كنت غريبا وسط سكان اغلبهم اقارب ومعارف)) .. لم استخدمها خلال 8 سنوات متواصله الا اكثر من سنتين بشكل متفرق .. بحكم اقامتى بالخارج .. ومع ذلك كنت ملتزم بدفع فاتورة المياه المشتركه.. وملتزم بدفع اى مبالغ لترميمات خاصه بالعماره ككل عندما اعود ... انا من النوع الذى يحب شراء وخطب ود الجار من منطلق دينى ومنطلق برجماتى ايضا .. وبفضل الله كان هذا له اثر بالغ عندما انتقلت من تلك الشقه لشقه اخرى .. حيث ودعنى جيرانى بدفء وحراره متمنيين ان يكون الساكن الجديد على نفس شاكلتى ..وحاليا فى شقتى الجديده التى اشتريتها من سنتين باحد المشاريع التعاونيه ولم استخدمها الا اربع اشهر فقط .. اواظب على دفع كهرباء وصيانة المصعد الى جانب المساهمه فى دفع مرتب البواب شهريا .. وذلك عبر قريب لى بمصر .... الى جانب الاتصال الشهرى بمأمور العماره اذا كان يحتاج منى مساهمة فى اى شئ .. وهو يقدر ذلك تقديرا كبيرا .. ويقوم بتسديد بعض الفواتير بالنيابة عنى كالغاز والكهرباء .. وحفظ تلك الفواتير لى حتى اعود .. وازعم اننى استفيد استفاده كبيره من سلوكى ذلك .. حيث يجعلنى اكثر اطمئنانا على شقتى انها تلقى الرعايه الكامله من خلال الاعتناء بالعماره ككل ... الى تدعيم الجانب الخاص بالعلاقات الانسانيه الطيبه بينى وبين جيرانى

معلش انا ذكرت تجارب ايجابيه .. ساعود لاحقا لسرد تجارب سيئه خاصه ببيتنا القديم وبيت بعض اقاربى

تم تعديل 12 أبريل 2015 بواسطة التونسى

[أبو محمد]

ليه كده يا أستاذ عادل ؟

:)

ليه تفتح الموضوع اللى بيجيب لى اكتئاب ده ؟

فى آخر اجتماع لاتحاد ملاك العمارة التى أسكن فيها

وبعد Circulars عديدة أعلنهم فيها أننى قد تخليت عن منصبى :)

وأعهد إلى من سيختارونه لإدارة شؤون العمارة

وبعدما وضعت لهم كل شئ عن الإيراد والمصروف

ويا جارية اطبخى يا سيدى كلف

وبعدما دوروا على حد يدير شؤون البلاد .. قصدى العمارة

وبعدما كل اللى خطبوها اتعززت .. انبرى قبطان همام

واشترط للقيام بالمهمة إن كل مالك يدفع ألف جنيه استفتاح للصندوق

بتوع إيه دول يا قبطان ؟ .. قال لهم دول عبارة عن "إدى زوبة زقة" وبعدين نتكلم

وحدد ميعاد للاجتماع

حضر 7 من 18 .. فى الحقيقة فيه 6 مسافرين .. يعنى حضر 7 من 12

وهات يا مناقشات .. وأصروا على معرفة أسماء "البلطجية" الذين لا يدفعون

والفهلوية اللى بيدفعوا جزئيا بدعوى انهم مسافرين

أصلى كنت فى مكاتباتى لا أذكر أسماء .. واقول يمكن يحسوا على دمهم

المهم

انتهى الاجتماع على موافقة الحاضرين على زيادة مساهمة الملاك فى الصيانة والحراسة

وفيه واحد من اللى ما حضروش وافق على إنه يدى زوبة زقة ويرفع مساهمته كما اتفقنا

والباقى لسه بيشاور عقله .. أو يمكن بيشاور الجماعة

دى التجربة الشخصية .. وبعدين نبقى نتكلم فى العموميات بإذن الله

[محاور]

انا عندى 4 شقق... اتنين فى القاهرة و واحدة فى حدائق اكتوبر - مشروع دجلة جاردنز بتاع معمار المرشدى - و واحدة فى بيانكى فى اسكندرية

و مفيش غير شقة واحدة بس اللى موضبها منهم توضيب أقل من العادى, و الباقى سايبه زى ما هو عالمحارة, لإنى لو بحقق - على سبيل المثال - صافى مالى 40 او 50 الف جنيه فى السنة بعد تسديد التزاماتى الشخصية, فأنا بفضل انى أروح ارمى المبلغ ده فى مقدم شقة اشتريها بالقسط, أفضل عندى من انى ادفعه فى توضيب شقة من الشقق, خصوصا انى مش محتاجهم ولا بستخدمهم... انا شاريهم بس استثمار مش اكتر... ده غير العقدة الابدية بتاعت اى حد من القاهرة - من ابناء القاهرة فعلا و ليس من جذور ريفية - انه لازم يكون عنده شقة فى المعادى او مدينة نصر, و شقة تانية فى اسكندرية... و اللى ربنا بيكرمه قوى بيروح يشترى شقة فى الزمالك او مصر الجديدة عشان يفك العقدة.... مش عارف ليه بس اهو ده اللى طلعنا لقيناه....والله كلها عقد و كلاكيع ولا ليها اى لازمة...

بالنسبة لشقة دجلة جاردنز و بحكم انى مسلتمها حديثا, فدى انا دفعت لها دفعة صيانة بمبلغ و قدره 8507 جنيه بالتمام و الكمال بالاضافة ل750 جنيه تأمين هسترده بعد التوضيب, و المفروض انى مش هدفع حاجة تانى... الله اعلم بقى ايه اللى هيحصل

بالنسبة لشقة المعادى - بعد كارفور عالدائرى - فدى انا بدفع لها 75 جنيه شهريا لإنى مش ساكن فيها, لكن اللى ساكن فعليا بيدفع اكتر من كده... لكن مش عارف المبلغ كام بالظبط بس غالبا 150 او 200 جنيه...

بالنسبة لشقة اسكندرية, معرفش والله ظروفها ايه... هههههههههه بجد يعنى... لإنها شقة صغيرة جدا 50 متر تقريبا و حتى انا مارحتش هناك مرتين على بعض, خصوصا انى بتعامل مع مكتب تسويق عقارى هنا فى القاهرة اللى اشتريت الشقة عن طريقه, و بسدد الاقساط عن طريقه... و مفيش اى كلام عن موضوع الصيانة ده.

بالنسبة لشقة المعادى, بما انها هى دى اللى فيها اتحاد ملاك اتعاملت معاه بشكل مباشر, فكان فيه مشكلة ان العمارة 11 دور و كل دور فيه 4 شقق... و اغلب اللى شاريين قاعدين فى الخليج او شاريينها لأولادهم, فياعينى الناس اللى ساكنين فعليا قليلين جدا مقارنة بإجمالى عدد الشقق, و ده كان مسبب ضغط كبير جدا عليهم...

يعنى انا مثلا مبدأتش اهتم بالشقة دى اصلا ولا اروحها إلا بعد سنتين من استلامها تقريبا, و بتوع اتحاد الملاك صعبوا عليا انهم شايلين كل حاجة و كل الصيانة على دماغهم, فقررت انى اساهم معاهم ب50 جنيه زادت بعد كده ل75 جنيه... و يا عالم هتزيد تانى امتى..

بس بغض النظر عن موضوع الصيانة و اتحاد الملاك و كل الكلام ده... موضوع الشقق ده طلع موضوع فاشل و اللى يقدر يشترى أرض, يكون احسن له مليون مرة... يعنى حتة ارض معفنة فى جنوب حلوان احسن عندى من شقة فى الزمالك, و هقول ليه...

انا اتولدت و عشت سنين طويلة فى بيت خاص ملك مقفول بابه بالجنزير و القفل... من غير جيران داخل نفس البيت... مفيش حد يزعجك ولا حد يخبط عليك و لا تسمع دب حد... ولا تسمع صويت و صراخ حد و كمان محدش يسمع صويتك و صراخك هههههههه

مجرد انك تعيش فى بيت مكون من طابقين و سطح... و تطلع و تنزل براحتك... و تلعب فى السطح براحتك... و تجيب كلاب تربيها براحتك... و تتصرف بحرية جوة بيتك, ده احساس و نعمة كبيرة جدا لا تقدر بثمن والله العظيم و محستش بالنعمة دى إلا لما بدأت اعيش بشكل منفصل فى شقق داخل عمارات, و اسمع دب عيال صغيرة برجليهم طول الليل و صويت و صراخ و رزع ابواب و خبط و عدم مراعاة للجيرة و جنان رسمى نظمى فهمى....

عشان كده انا قررت انى اوقف اى شراء لأى شقق تانى خلاص, خصوصا انى كنت بشترى الشقق دى لهدف معين و الهدف ده اتحقق و لله الحمد...

و ان شاء الله ربنا يوسع علينا و عليكم بمجرد ما اظبط مليون جنيه كاش, هقرر إذا كنت هشترى أرض فى مصر - و لو ان مليون جنيه مبلغ تافه دلوقتى - او انى ارجع لمونتريال و اشترى شقة هناك و استقر هناك... و طبعا هناك مفيش التهريج اللى بيحصل هنا.

عشان كده نصيحتى ان الواحد يشترى أرض و يبنى بيت ملك مقفول بابه بجنزير... زى بيتنا اللى انا اتولدت و اتربيت فيه بعيدا. :)