اذهب الي المحتوي

Recommended Posts

((1))اللى جوايا......

فى يوم فى الصيف...فى عز الحر..وناس ملاين مايتعدوا

وشمسيات..وحضن البحر...بالف دراع بيتمدوا

وناس ماشين .. وناس نايمين..وناس قاعدين بيتغدوا

وطفل برىء..عنيه احلام ..بتبنى امال مايتهدوا

وشمس الصيف ..قالتلو كلام .. وسابت بوسه على خده

وطيارته ...دى شغل ايديه ..لا شغل اخوه ولا والده

تقع مره ..وكمان مره ..يطيرها كمان برضه

ولا بيمل ..ولا بيكل ..ولو كان الهوا ضده

يقوم تانى..ويتحداه ..يعاند فى الهوا عنده

ولما تطير ..البه يطير .. من الفرحه ومين قده

دى طيارته ..دى حلم كبير ..بتقوى عليه وبتشده

ومهما تروح .. لفين هتروح ..يشد الخيط تعود عنده

يا طفل برىء..عايش فيّه ..مهما سنينى بيعدوا

وفى ليّه ..سنين جيّه...سؤال معرفش ايه رده

يا الب نضيف..وحلم وطيف..ويوم ميهمنيش بعده

يا الب ربيع ..معدش رضيع ..وفتّح فى الحياه ورده

هتبقى صغير ..وانا بكبر ...بتمسح فى الشتا برده

انا عمرى ..حاجه وعشرين ..وعمرك تسعه ماتعدوا...............

سيظل يسكننى هذا الطفل البرىء الى ان اموت ...............!!

شارك هذه المشاركه


رابط المشاركه
شارك

((2)) يا اديب

الارض ارضك يا اديب ازرعها بحروفك

وارويها صبرك لو تجيب الصبر من جوفك

وبلاش تعاند لو طلع الزرع فيها هزيل

خليك شجاع وامين واقلعها بكفوفك

ازرعها قمح وتين ازرعها بالتفاح

ازرعها ورد جميل عطره اصيل فياح

لجل اما يكلو الناس منها ويدعولك

ويكون دعاهم بجد لجنتك مفتاح

شارك هذه المشاركه


رابط المشاركه
شارك

((3)) أنا واقف

انا واقف بقالى كتير ومستنى

تقولى يا ابنى تعالالى دافع عنى

اروح واعود بايدى النصر

يا امّا اخويا شايلنى

اللى معايا ده يا امى لا مش ناى

ده سلاحى اللى حامينى مستنى العدو الجاى

وانا سهران على حدودك منيش نايم

والراجل يورينى هيجى ازاى

عنيا صاحيه وايدى ثابته عالزناد

وحبك ده مقوينى وليه الزاد

ومش خايف على نفسى وانتى امى

واخويا وابويا والاجداد................

شارك هذه المشاركه


رابط المشاركه
شارك

((4))

انا بشر مش طير ولا ليه اى جناح

وحلم قلبى كبير يخرج لنور الصباح

محبوس فى ضلمه وليل وجوه زنزانه

قفلوها بالاقفال وضيعو المفتاح

((5)) رباعيات

صرصار صغير دخل من تحت عقب الباب

انا قلت اقوم اضربه على راسه بالقبقاب

وطيت اجيب فردته من جوه تحت السرير

ورجعت لجل اقتله كان فص ملح وداب........!

ماشى ولا بلتفت باصص لقدامى

غرقان فى بحر الحياه تايه فى احلامى

وانتا مصيرك كده دونن عن الصراصير

مكتوب عليك تتفعص وتموت باقدامى.......!

متقلش اروح اختفى واقفل عليه الشيش

مكتوب تموت هتموت مكتوب تعيش هتعيش

قدر عليه وعليك ولفين نروح منه

وهوه فوق الجبين مكتوب بخط افيش......!

سعات بتنزل دموعىلو شىء يحزّن حصل

وسعات بتنزل دموعى لفرح جانى ووصل

وسعات ما تنزل دموعى لفرح او احزان

لكن بتنزل دموعى لما بخرّط بصل........!

قاعد لوحدى حلمت انى بقيت عصفور

فقلت اطير للشمس واوصل لنبع النور

وطرت قد ما طرت معرفش كام ساعه

واخرت ما طرت وقعت قمت بجناح مكسور......!

نصحنى صاحبى وقاللى خد منى حكمه يا اتش

علشان تعيش مرتاح لازم تكون من كاوتش

انا قلت اجرب رجعت قلبت حتى المرايا

بصيت لصورتى لقيتها برضه متقلبتش........!

شارك هذه المشاركه


رابط المشاركه
شارك

((6))رباعيات هشام جنيدى

اكيد انتى امى وامه بجد

وحبك لابنك يفوق كل حد

ورغم اللى عمله خلقتيلو عذر

عشان فيكى ابدا ميشمتش حد

ياااااااه عالحنان طيبتك غريبه

صدق من فى يوم سماكى طيبه

ابنك يخونك يحاول يضرك

يموت جوه حضنك تضميه بطيبه

حاسس يا امى ان انتى شايفه

طريقك وماشياه ولا حتى خايفه

اكيد انتى صح اكيد الف صح

رسمتى طريقك نهايته انتى عارفه

شارك هذه المشاركه


رابط المشاركه
شارك

((7)) طار الحمام

انا نفسى اقولك كلمه بس واجعانى

ومطيره منى المنام ومشقلبه كيانى

مش انتى برده امنا اللى بتحضنّا

طب اسمعينى واتحملينى بس لثوانى

اخواتى يامّه مطحونين والدنيا دايساهم

بينامو يامّه مجروحين ويقومو فى اساهم

غضبانه يامّه عليهم ولا ايه قولى

دى اللى يشوفهم ويشفوكى يقولو نسياهم

طب عملو ايه يا امنّا علشان تجافيهم

ياللى انتى حضنك لمنّا طب ليه بعدتيهم

ده بدل يامى ماتشوفيهم هما فين

وتمسحى دموع قلبهم وتطبطبى عليهم؟

يمكن اكون غلطان او حتى مش عارف

يمكن يكون نظرى ضعيف او اعمى مش شايف

لكنى يامّه مش جليد بارد مبيحسش

انا خوفى ده مش مالطليق انا مالسجين خايف

خايف لفجأه يثور ويكسر الزنازين

خايف يكون مظلوم والظلم ده سكاكين

بيديندبح بيها الامل والحب لو عارفه

ويخلى نار الغضب والكره كالبراكين

اخواتى يامّه شغالين فى السمش كالنحله

اخواتى يامّه بيحلمو ان اللى جاى احلى

بلاش يا أمى وامهم تدوسى على الاحلام

وتكسريها وتدفنى اشلائها فى الوحله

******************************

امتى يا ام البشر الشمس راح تسطع

امتى والليل الحزين نجومه لم تطلع

والقمر رافض يضوى والغيوم كترت

وانا اللى قلبى جوه منى عمال بيتقطع

راح اللى راح يا امّه والدمع مش بيفيد

والصبر تاه منى والشمع مش بيقيد

ازاى انور دنيتك وانا عشت فى الظلمات

معرفش معنى النور ماشى بحس الايد

**************************

والله يا امّه داعيتلك قبل ماتقولى

وغزلت عمرى بمغزلى ونسجته على نولى

لجل اما امسح دمعتك اللى فى عنيكى

واموت فداهم لو يشاورو ولا ينادولى

شمسك يام الرجال انا اللى هرويها

وانا اللى هسهر لها وانا اللى هراعيها

يكبر قصادى ضيها ويطلع نهار ليلك

ويعود لارضك طرحها متشال على أديها

قلبك يا ام الرجال عمره ما يوم هيموت

هتكونى دايما شباب مهما الزمان هيفوت

وعجز على ارضك انا وينحنى ضهرى

وافضل ادافع عن ترابك حتى بالنبوت

**********************

امى واخويا وناسى انا خايف

الطريق قدام عنيا لكنى مش شايف

انا اتعميت ولا الدنيا فيها ضباب

حد يجاوبنى يا ناس اصلى مش عارف

ايه اللى جد عشان يصبنى هذا العمى

ايه اللى خلا الحمام يخاف يطير فى السما

ايه اللى خلا اخويا ينفجر ويموت

وايه خلاه يقول العيشه متحرمه

ازاى تجيلو الشجاعه يفجر القنبله

ويقتل الابريا ويقول مهيش مشكله

يضحى ليه بالحياه وهوه مستسلم

وبعينىاشوف جثته عالارض متهلهله

انا قلت يوم القيامه قام وانا نايم

ولا البشر زهقو خلاص ولا عادش شىء هامم

قوليلى ايه الحكايه قبل ماتجنن

والطم وشق الهدوم واموت وانا هايم

******************************

خلاص يا ام الرجال انا عمرىيوم ما حتوه

ولا حهيم فى الشوارع بين البشر معتوه

واللى يخون عهد امى خلاص مهوش اخويا

ولا انتى امه يا امى ولا النيل يبقى ابوه

يكون كلب خاين يكون اى شىء

وعايز يشدك لبحره الغريق

يكون ابن غيرك لكنه مش ابنك

ولا ضمه حضنك وطبعه البريء

اخويا اللى يبنى عشانك حصون

اخويا يصونك ولا يوم يخون

ويدفع فداكى حياته برضى

ولا عمره تلعب براسه الظنون

انا جنب اخويا وايدى فى اديه

نصون مجد ارضك بكل اللى فيه

ننضف طريقك من اى شوك

وندمى ولا انتى تدوسى عليه

شارك هذه المشاركه


رابط المشاركه
شارك

((8)) عايزنى اعيش لكن ....

عايزّنى اموت ........

عايزنّى اروح فى اى داهيه والسلام

عايزين يقومو الصبح يلقو كل شىء تمام

عايزين يشوفو جثتى متعلقه........

واديا رابطينها ورايا بالحديد ومفيش كلام

عايزنّنى اموت .......

شارك هذه المشاركه


رابط المشاركه
شارك

((9)) رباعيات هشام جنيدى...

الجزء الثانى

العلم زى الشمس بتضوى فى الافلاك

والدنيا من غير شمس تبقى ظلام وهلاك

اسمع كلام العقل بلاش تكون جاهل

وقوم وبطل عبط روح افتح الشباك

فى من يشوف الخدوم علبه وعصير فيها

وشاليموه على جنبها وبيتشرب بيها

يفضل ماسكها فى اديه وهيه مليانه

ولما يخلص عصيرها عالارض يرميها

حكمه وقالها اسمه ايه وقولو كان على حق

مقبلش اعيش مسمار وفوق دماغى اندق

لو حد عنده البجاحه يستولى على حقى

انا برده عندى البجاحه انى اقول ميت لأ

فى من يعيش الحياه حاسس كده بنفسه

زى اللى وسط الضباب ميشفش غير نفسه

ماشى على القضبان وهوه مش دارى

وفجأه يظهر وراه قطر ويكون دايسه

ومن يعيش الحياه شايل هموم الناس

مع ان همه كافيه شايل عليه اكداس

تشوفه زى الازاز من بره مش باين

لكن لو توزنه تلاقيه فى تقل الماس

صدق بجد اسمه ايه فى اللى كان قاله

وهوه ماسك ربابه وبيغنى مواله

قال فى الحياه من البشر يجى الف صنف ولون

واللى يشوف حمل غيره بتخف احماله

شارك هذه المشاركه


رابط المشاركه
شارك

((10)) رباعيات هشام جنيدى

يا شمس ياللى بتطلعيلنا كل يوم تتمطعى

وزرعنا يكبر فضيك وفسمانا تسطعى

لو كنت لوحدى البشر وكان بايدك ....

كنتى برضه هتطلعى...........؟!

يا شيطان يا شوشو ابكى رمضان خلاص آتى

وحالنا راح ينصلح مهما انتا هتهاتى

ضحك الشيطان ضحكته وقاللى مش باين...

فى ناس انا بزقها وتمشى بقصور ذاتى...!!

عشان احارب شيطانى عملت ميت غارة

وفضلت اقاوم لوحدى بقوه جبارة

ولما غار الشيطان واتحررت نفسى...

لقتها زى الشيطان بالفسق امّارة..!!

سهران افكر تعبت وفكرى اضنانى

ولعبت فراسى الوساوس والظنون تانى

سألت نفسى سؤال لكن مجوبتهوش.....

هيّه الخطيئه فمكانى ولا فى كيانى؟؟!!

يارب ياللى خلقت لكل شىء غاية

وانا غايتى انى اعبدك والنية جوايا

نور بنورك ضلمتى لانى مش شايف ...

وخايف اخسر اخرتى من اجل دنيايا..!!

نفسى اعيش يا رب وتكون حياتى خضار

ولما اموت يا رب الاقى قبرى عمار

نفسى اموت يا رب لو كان ده احسن لى..

ونفسى يوم الحساب متودنيش النار.........................................

اتمنى ان ندخل كلنا الجنه برحمة الله وان نهتدى ولا نضل ابدا...................قولو آمين

شارك هذه المشاركه


رابط المشاركه
شارك

((11)) رباعيات هشام جنيدى ((الجزء الخامس))

عيّل صغير قابلنى بص لى بانبهار

وقاللى نفسى اكون يا عمو زى الكبار

قلت فى نفسى اتلهى انا كنت يوم زيك...

وندمت لما هدرت طفولتى فى الانتظار..!!

نصحنى والدى وقال يوم ما فحياتى وعيت

اعمل لمستقبلك واياك تقول ملّيت

كسّل هتخسر وتندم والحياه فرصه...

مصباح علاء الدين مكانه فى الحواديت..!!

فى لسه فاضل شلن مالأجره يا اخينا

مفيش خلاص تنزل وقفاك تورينا

والله وصدقتى يا حاجه وجبتى مالآخر...

بكره هيجى الزمن نآكل فى بعضينا..!!!

طبيب سنان يا بشر والطب كله دروس

ياما ضروس شلتها وياما علجت ضروس

معجبش يوم من مريض سنانه متسوسه...

واعجب لناس قبلها اكل عقولها السوس..!!!

سبحانه اللى خلقنا وحطّنا فى اختبار

ننجح نروح جنته نسقط نروح النار

يا نفس ليه تيأسى قبل الفوات فوقى...

وجاوبى صح ولسه عندك الاختيار..!!!

كتبت بيك يا قلم لمّا اتملى الكشكول

وجبت غيره وكتبت كلام كسيف مسلول

سكت ليه يا قلم ولا خلص حبرك...

قال لسه حبر لكنه ملوش لزوم القول ..!!!

اتمنى ان تحوز اعجاب الجميع ............

وشكرااااااااااااااااااا

شارك هذه المشاركه


رابط المشاركه
شارك
زوار
هذا الموضوع مغلق.

×
×
  • اضف...