كلاسيكو السياسة المصرية

[Yasser_71]

سيداتي سادتي آنساتي أهلي وعشيرتي

مساء الأنوار

أهلا وسهلا بيكم في أقوي مليونيات الموسم

كلاسيكو السياسة المصرية

بين فريقي النادي الليبرالي ونادي طلائع الإخوان

المباراة في ستاد قصر الإتحادية

المباراة منقولة حصريا علي الجزيرة مباشر خناقات ومصر25 أما قنوات دريم والحياة مظاهرات والنهار اسود فغير مذاعة بسبب عدم دفع حقوق البث علشان كده تم تسويدها

لو انت قاعد في الشارع قدام قصر الإتحادية هتلاقي طلائع الإخوان علي يمينك ولابسين أبيض في أبيض ورافعين أعلام خضراء وسودة وفريق الليبرالي بزيه المعروف المشجر وأعلام ملونة علي يسارك

يدرب فريق الإخواني شاطروف ويساعده كتاتيني ويدرب فريق الليبرالي برادعولا ويساعده صباحوف

كل المباريات السابقة انتهت بالتعادل السلبي وان كان الاستحواذ أكتر لطلائع الإخوان

لكن النهارده لازم يكون فيه دابح ومدبوح...أسف فائز ومهزوم

لو الوقت الأصلي انتهي بالتعادل هنلعب وقت إضافي علي مليونيتين ولو انتهم بالتعادل في الضحايا هنلعب كدمات الجزاء

الطلائع بيلعب بخطة دفاع المنطقة حول باب القصر والليبرالي بيهاجم من الأجناب مع الإعتماد علي القذائف البعيدة

النهاردة منظر الأمن حاجة تفرح ماليين جنبات الإستاد ومع أول قلم بيكون فيه انتشار ممتاز علي طريقة "فص ملح وداب"

يحكم المباراة الحكم الدولي مرسيكو وكان فيه اعتراض قبل المباراة من فريق الليبرالي لان الحكم ده ماحكملهمش أي ماتش وفازوا فيه قبل كده

قبل المباراة عرض زند الدين رئيس النادي الفلولي انه يستضيف الليبرالي علي ملعبه في التدريبات والإقامة لكن الليبرالي رفض وعمل معسكره في التحرير

فريق الطلائع لا يعترف بنظرية المعسكرات وبيقول انه جاهز في أي وقت باوتوبيساته وجمهوره المتميز بروح الجماعة

يعلق علي المباراة المذيع المعروف مولوتوف خليف

كل التمنيات بمشاهدة ممتعة

ونشوفكم بين الشوطين مع الاستديو التحليلي