اذهب إلى المحتوى
محاورات المصريين

من يدفع الأمور نحو ثورة ثانية مُدمرة ؟


Recommended Posts

دي مش شماتة ولا تصيُد أخطاء

لكنه وضع الامور في نصابها الصحيح

لما البلتاجي يطلع يقول لازم نعترف إننا اخطئنا بإبتعادنا عن باقي القوى السياسية

واللي وصل الأمر للتشكيك فيها وإدعاء إنها بتضرب ترامادول وبتاخد تمويل من بره ....

يبقى لازم ده يُعلن رسمياً .. وتبقى في دعوة رسمية للمصالحة بين كل القوى ... وإعتذار رسمي من الاخون .. وتخليهم عن فكرة التكويش على كل المناصب والمصالح ...

بعدها هايلاقوا كل الشعب معاهم

مش قاعدين على قهوة ولما تحتاجني تلاقيني أنزل أعمل ثورة مع حضرتك

البلتاجى هو المعتذر الرسمى لجماعة الاخوان مثل نادر بكار المعتذر الرسمى باسم السلفية

رجاء من الأخوان والأخوات عند نزولهم ان يتحاشوا اخطاء الثوار ايام محمد محمود

1-لبس عبايات بدون كباسين

2-كل واحد يكون معه سبب كتابى فى تواجده فى الميدان علشان اذا سألنا هو ايه اللى خلاه يروح هناك

3-ان ينزلوا فى اماكن صحرواية بعيده عن المتاحف العلمية حتى لا تتهموا في اشعالها

4-كل واحد ياخد عجلة معاه حتى لا يؤثر نزولكم عل عجلة الانتاج

4-اعملوا حساب ان الحكومة غيرت نوعية الغاز الى كانت ايام الثورة الاولى (لما كنتم فى الميدان)بغازات اخرى ارجو ان تكتبوا عنها هل هى محرمة دوليا ولا غازات منعشة،

5-ارجوكم ان يكون لك شعار اخر غير يسقط حكم العسكر لأن باسم يوسف حيكون متابعكم وحتكون فرصه له ان يجيب فيدوهاتك القديمة عن مدح المجلس العسكرى

6-اخيرا احب ادعوا لكم بالشفاء من المرض العضال الذى بفتك بكل من جلس على كرسى واعتقد ان الكرسى دايم ويعرفش انها لعبة كراسى موسيقية

رابط هذا التعليق
شارك

  • الردود 47
  • البداية
  • اخر رد

أكثر المشاركين في هذا الموضوع

الأيام الأكثر مشاركة

أكثر المشاركين في هذا الموضوع

306676_283265748415387_132780256797271_648573_655819955_n.jpg

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

ده احنا بنرججع لورا مش بنطلع لقدام

لكن لأ

والله العظيم مكملين غصب عن التخين

واللي هايقف في وش الثورة هايتفرم ولو معاه مدافع الدنيا كلها

531218_311046142295009_187337017999256_790068_274377311_n.jpg

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

على فكرة الكسبان من كل الحوار ده الثورة المضادة والعصابة بتاعت النظام البائد

المجلس العسكرى غبى ومبيفهمش سياسة ومش عارف يدير اى حاجه فى الدولة ومكسوف يقول والاخوان متعنتين سياسة ومش عاوزين يسيبوا حاجه لوجه الله والسلفيين اى حاجه فى الكليتش عاوزين يلغوا الانجليزى والمواقع الباحية ويعملوا عمليات تجميل :))

وكل اللى بيحصل ده هايخلى تقول انا اسف يا ... (مخلوع)

ربنا يستر عليكى يا مصر من الايام الجاية

رابط هذا التعليق
شارك

اصحاب المبادى الثابته

مش فاهم الحقيقه الجمله دى نوهائى يعنى

عمال اجيبها شمال يمين عشان افهم معناها مش راضيه تيجى معايا حتى بكل لغات العالم

يعنى ايه اصحاب المبادىء الثابته ومفيش مبدء واحد بيثبتوا عليه

طيب حد من الرجاله يبرهن عملى على الجمله دى ويقول الاخوان ثبتوا فى المواقف كيت وكيت

شايف خرابيط مش مبادىء ولا يمكن ان نطلق عليها مبادىء ولو اطلقنا عليها مبادىء المبادىء كده انفرض عليها انها تنزل التحرير

لان احنا قدام هجس رسمى بعلم الوصول . قدام شلل رباعى بالبريد المستعجل

مش هنرضح رئيس من الاخوان والشاطر يطلع فى الميدان

الجنزورى ملوش حل وبعدين الجنزورى ابن تيت

المظاهرات بتعطل الانتاج وبعدين نهدد بمليونيه

فى توقيت برده انهم بيدرسوا قانون منع المظاهرات وعاوزين يفرضوه على الشعب

ومش عارف هنا وضع المظاهرات ال بينوهوا عنها دى موقعها ايه من الاعراب

لاء والمفروض نبقى ايد واحده . ايد واحده من اجل السلطه ولا من اجل مصر ؟ !!!

يعنى المطلوب من الشعب يقف الان مع الاخوان عشان يمسكوا السلطه فى توقيت انهم بيعملوا دتستور ياسيادنا والناس بتنسحب منه عينى عينك

يعنى فى توقيت مؤامرة على الشعب المصرى . بدأوا بقول نعم وانتهت بانسحاب الناس منها

اذدواجيه مميته جدا اصبحت واضحه للعيان

ولن ننسى حقوق الشهداء فى توقيت انتهاك صارخ فى حق الشهداء ال مش هينسوها ومهرجان البراءة شغال الله ينور

ومفيش اى رد فعل لل مش هينسى الحقوق . ومفيش اى تعليق على براءة المتهمين دول خالص حصل

طيب لو فرضا يعنى ان فى هوجه البراءة دى واحد اقتص حقه بيده وسروخ ظابط من بتوع البراءات دول

بالطبع هنسمع منهم التعليقات على بطولات الظابط الهمام وانه كان بيؤدى واجبه ده غير الجنه ال هيحدفوه فيها ده غير الجنازة ال هيشركوا فيها ال هتتعمل عسكريه ورفيع بيه هيشرف الجنازة . قصدى رفيع المستوى

وبعد ما الجنازة العسكريه تنتهى . الصفحات الاولى لجرايد الاخوان تطلب من الاجهزة الامنيه التحقيق فورا فى الحادث وضبط الجانى على وجه السرعه

والمطالبه بالقصاص منه وقتى

لكن جنازات الزباله ملهمشى فيها

هلاقى حد بقى يفهمنى يعنى ايه اصحاب المبادى الثابته

عبيد وصناع الأصنام يكرهون دوما من يقوم

بتكسيرها

رابط هذا التعليق
شارك

أقسم بالله أنا ما مصدق نفسي وكنت مخدوع فيهم خدعة أخدع من خدع هوديني نفسه

الكلام ده في جريدة الحزب الوطني .. قصدي الحرية والعدالة من كام إسبوع لما الإضراب ما كانش على هواهم وكان تخريب وبانديتا وخراب ودمار للبلد وإن مافيش حد مؤهل لإستلام السلطة من المجلس العسكري والبلد هاتروح في داهية يا ظلمه يا ثورجية ونصبر 6 شهور ... 6 بس إيه كتير ؟

522458_10150896610479251_533564250_13054475_896274666_n.jpg

وده إمبارح بس لما بقوا لسه واخدين بالهم من الإضرابات والخراب اللي موجود ولم يدعوا له أحد لكنه نتيجة لسوء الأوضاع المتزايد من أول يوم لحكم العسكر

ههههههههههههههههههههه زي اللي عايشة مع جوزها متهنية ومتستتة إمبارح .. ولما يتطلقوا لأي سبب .. تبتدي تظهر على حقيقتها وتفرش له الملايه وتقول له : لم أرى معك يوم حلو قط .

ومش هانصبر شهرين أو أقل لأن البلد هاتخرب حرام عليكو

564626_3140405145980_1140472793_32579585_1746092958_n.jpg

عارف عارف والله

يا ناس حرام عليكم إنتوا لا عاجبكم كده ولا كده ؟

الإجابة : لأ يا حبيبي ... فصاحب الموقف لا يفسر نفس الموقف مرتين على هواه ... صاحب الموقف يعمل لوجه الله مش لوجه هواه .... صاحب الموقف لا يقف في وجه العالم اللي كان بيصرخ ويقول له : يا ناس حرام عليكم كمال الجنزوري زي العيسوي بالظبط وناس ميتة من 15 سنة أساساً ومغيبة عن الوضع والواقع وهل هما دول الوزرا الثوريين ؟ .... يرد هو ويقول : هاتخربوا البلد .. لغرض ما ولحد ما يترستق تحت القبة ويحط كولونيا تحت بطاطته على رأي كمبورة ... ولما تستوي العملية يتقلب على الجنزوري ويقول له : خربت البلد إذهب عليك اللعنه ( وش يوسف وهبي )...

ويلعبها محبوسة مع المجلس - زي شغل اليهود بالظبط -

أقول لكم شغل اليهود اللي هو إيه واللي وضعوا أساسة في التاريخ الإنساني

إضرب فوق فوق فوق قوي .. بحيث لما تيجي تفاوض .. اللي قدامك هايفاصل ويدوحر ويكاسر على رأي إخواننا الخليجيين

يعني

أرمي الأول ورقة رئاسة الوزراء اللي هي لا في الدستور ولا لهم حق فيها حالياً

وأحشر إسم خيرت الشاطر

العسكري يسخن ويخلي ابو الجنازير يرد عليهم ويقول لهم إخبطوا راسكوا في الحيط .... ما تقدرش

يروح ابو الإخوان المصلحجي ضارب في العلالي وقايل : كده .. طب الشاطر مش بتاع وزارات ... الشاطر بتاع سندوتشات .... وهانرشحة للرئاسة والعيل رجع في كلامة إيه رأيكم بقى ؟؟.... واللي عنده حاجه يقولها ويوريني نفسه والميدان فاضي وفارس لفارس

ومش بس كده .. ده الداسطور كمان إخواني .... خليها تخرب

يقوم المجلس راكع على بيادته وقايل : خلاص خلاص حرمت .... إحنا نقعد على المائدة المستديرة ونتفاوض ... الرئاسة والدسطور مقابل السلام ....

يعني فعلاً طنطاوي وعنان إكتشفوا إن الجنزوري متهم في قضية أداب سنة 45 .. وهارب من تأبيدة ... يالا نشيلة وشكلوا حكومة إخوانية إنتم تضم كل اطياف الشعب - الشعب اللي بقى منحصر في الحرية والعدالة والنور طبعاً زي لجان البرلمان والشورى ولجنة الدستور -

بس الله يخليكم ما ترشحوش حد تبعكم وسيبوا لنا الطلعة دي لحد ما خلال الاربع سنين الجايين نجيب واحد زي شفيق أو عمرو موسى أو عمر سليمان نلحق في عهده الميمون تظبيط سبوبتنا العسكرية ونحقق الخروج الأمن وفي نفس الوقت الجيل الثوري الحالي يكون مات او إتشل أو إتقبض عليه وبكده تبقى عملية هجامين نضيفة 100 %

الإخوان إستولوا على البلد من بابها ... وتم القضاء على أي أصوات معارضة وما حدش يلغوص لهم مستقبلاً في سبوبة الحكم .

المجلس العسكري ضمن إن فسادة ومنطقتة ماحدش هجام تاني ينط عليها ويقول له من أين لك هذا ياض إنت وهو ...

وبكده يطلع الجميع مرضي ومتعشي وكل واحد واخد حقه وزيادة

إلا الشعب المصري طبعاً اللي مش موجود على خريطتهم ولا بوصلتهم أساساً

لكن هيهات ... كان عملها السادات الله يرحمه اللي مالحقش يتهنى بالتقييف الدستوري وراح مع اللي راحوا

ومبارك هو كمان مالحقش يتهنى بالمادة 76 بتاعت الننوس

ونسيوا إن من يقرر ومن يعدل ومن يثور ومن يخلع هو الشعب فقط

وإن ربنا فوق الجميع ويعلم مكر الماكرين وبيسيبهم يلفوا الحبل على رقبتهم ويخنقوا نفسهم بنفسهم

مش نفس الكلام ده كنا بنقوله أيام مبارك ؟

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

طيب وايه العمل دلوقتى يا جماعة ؟

الحل في منتهى البساطة يا كابتشينو

وهو إننا نشتغل لربنا ولمصر

يعني لو لقيت شخص مصري مؤهل وكفء إن شالله لو كان بعين واحده يبقى ده أولى من شخص اخر ثقة وعارفينه وإبن حلال .. أنا بودني دي سامع الشيخ القرضاوي في الجمعة الماضية على طول بيقول إن لا مانع شرعي من تولي غير المسلم امور المسلمين طالما توافرت فيه الكفاءة والقدرة ... لان ده كان نفس المبدأ القذر المترسخ منذ نكبة 52 اللي حولت البلد كلها لثكنة عسكرية وبقى كل خرم فيكي يا مصر فيه واحد عسكري بيحكم ....

الحل بسيط وليس رومانسي بالمناسبة ويتمثل في الإلتفاف حول هدف واحد زي ما حصل في الـ 18 يوم المعجزة

الحل بسيط ويتمثل في إنكار الذات .. والإعتراف بالخطأ وعدم المكابرة ... وعدم النفاق وقول ما لا نفعل .. وتذكر جيداً كلام مش قرأنه بس .. لأ ده كلنا سمعناه وأتحدى أي كائن ينكره في : إن الإخوان هاينافسوا على 30 % من مقاعد البرلمان ... لأ لأ 40 بس ... حصل ولا لأ ؟ وفجاة لقيناهم نازلين في 100 % من المقاعد ..

وأصلا ماحدش طلب منهم إنهم يقولوا كده من الأساس .. ولا حد طلب منهم يغيروا كلامهم بعد كده ويفعلوا ما لم يقولوا

والإخوان لا يسعون إلى مغالبة ولكنها ستكون مشاركة ... وشوفنا على أرض الواقع تفسير وتطبيق كلمة مشاركة .... والتبرير اللي بيودي في داهية وبيعمي القلوب البصيرة برضوا جاهز : إنتوا عمركم شوفتوا اغلبية تنازلت عن شيء للأقلية ؟

يا سيدي هو أنا اللي قولت مشاركة ولاعبينا يا طيطه والشعارات دي ولا أنت ؟

الإخوان لا يسعون إلى مناصب ... والان هي حرب ضروس على رئاسة الوزرا وتلميع الشاطر ... وإضرب طموح عالي كمان في الرئاسة .... حصل ولا لأ ؟

وعاوز حد يفسر لي بالله عليكم .. كيف ستجتمع اللجنة التأسيسية للدستور بعد أن إنسحب كثير من الاعضاء والهيئات إعتراضاً على التقسيم الخزعبلي ده .. والإتهامات جاهزة وسمعتها إمبارح إن دول علمانيين ليبراليين متحزلقين مش بيحبوا الإسلام ..... حتى لو كان كلهم مسلمين بالمناسبة لكن ده لا يمنع إننا نكفرهم ونُظهرهم على إنهم من عبدة اللات والعزى

الحل بسيط يتثمل في إننا نسمع بعض ... ونسمع بعض بنية صادقة مش سماع من بتاع الفريق عنان لما كان يجيب الناس ويشربهم شاي بالياسمين ويسمع من هنا ويفوت من هنا .

مازال لدينا امل .. ومازالت الفرصة موجودة للوحدة والتوحد ضد عدونا العسكري اللي مستحلي اللعبة وجاثم على صدورنا وخربها خراب مستعجل وهايسلمها لنا على الحديدة ... بس إحنا راضيين وهانبنيها بإذن الله

لكن لازم نعتصم بحبل الله جميعاً لإن الفُرقة عمرها ما تحقق بناء .... ولإن الخناقات والإتهامات والتخوين ولوي كل شيء واي سيء إلى صراع ديني بين الإيمان والكفر يؤدي إلى نار ستأكل الجميع والحمد لله ربنا حامينا حتى الأن .

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة

×
×
  • أضف...