اذهب إلى المحتوى
محاورات المصريين

رحله الى الصين


ماجد

Recommended Posts

(1)

أخوانى الأعزاء

بناء على رغبة الجماهير الغفيره ( اقصد الأخت فيروز ) اقدم لكم يوميات رحلتى الى الصين.

بدأت الرغبة لدى فى رؤية الصين بعد عودتى من رحله أخرى الى انجلترا و فرنسا مرورا بهولندا حيث زرت امستردام وفى فرنسا زرت باريس و كاليه و فى انجلترا حيث قضيت معظم الوقت زرت لندن و بلاكبول ( المدينه الصغيره ذات الشواطىء و الملاهى )و ليدز ( المدينه الراقيه و الرقيقه حيث كان عمنا الأفاكاتو و معقل ليدز يونايتد ) و مانشستر ( المدينه الصناعيه الخانقه و معقل مانشستر يونايتد ) و دوفر ( الميناء المطل على القناه الأنجليزيه ) .

طفت الفكره فى عقلى على شواطىء بلاكبول بالذات حيث طفا سؤال الى سطح عقلى : ماذا يوجد على الجانب الآخر من العالم !!

و انا لى طريقة مختلفه فى الترحال فأنا احب انا ارى البلاد من خلال اسوأ اماكنها و من خلال البشر و لو ان هذا لم يكن متيسرا بالكامل و بشكل مرضى فى الصين كما سنرى .

المهم … بعد عودتى لمصر بحوالى شهر جاءتنى دعوه من احد المراكز الصينيه فى مصر (وكنت تعاملت معهم قبل كده بحوالى سنه ) لزيارة احد المعارض الصينيه و عليها ماكدبتش خبر و رحت باعت الباسبور و خدت الفيزا .

يتبع

رابط هذا التعليق
شارك

  • الردود 160
  • البداية
  • اخر رد

أكثر المشاركين في هذا الموضوع

أكثر المشاركين في هذا الموضوع

(2)

اكمل ....

حجزت على طيران اير سنجابور لأنه كان ارخص طيران موجود وكان تمن التذكره حوالى 6000 جنيه ( ذهاب و عوده ) بما فيها التوقف فى دبى و سنغافوره لو حبيت تاخد الطياره اللى بعدها لكى تزور البلد.

قلت فى نفسى و ايه يعنى طيران سنجابور ولا الجن . يعنى هايكون اوحش من مصر للطيران اللى المضيفه فيه بتقولك فيه خذ الميه جاتكو القرف . المهم اتصلت بواحد فى الصين كان وسيط لى فى الشغل و قلتله على الموضوع فاخبرنى بانه سوف يكون متواجد فى المقاطعه اللى انا رايح فيها و اسمها جوانج زو أو جونجزو بعد 3 ايام من وصولى لمقابلتى و طلبت منه يحجز لى فى اوتيل فوافق و بعت لى اسم الأوتيل و باقى مواصفات الحجز.

المهم توكلت على الله و ركبت الطياره الى دبى . و ايه الحلاوه دى . طبعا باتكلم عن الخدمه فى الطياره مش على طاقم الضيافه ( هذا الكلام للرجاله فقط ) لأنهم على قدهم اوى انما مولعين صوابعهم العشره شمع و كان ناقص اقولهم شيلونى ودونوا الحمام او زغزغونى شويه علشان متضايق ( وش واحد مفترى ) المهم فى موعد الأكل حطوه قدامى فانا طلبت من المضيفه اكل فيجترين ( نباتى ) أو سمك علشان مش عارف ديانتهم ايه لقيت المضيفه وشها جاب ميت لون fty:: و حدث هرج و مرج فى الطاقم المهم لقيت البيج بوس بتاع الطاقم جالى و سألنى انت طلبت فى التذكره اكل نباتى فقلتله لأ فأجاب بانه المفروض كنت تطلب و مع ذلك فهيحاول يتصرف و هدأت الأمور ( اكتشفت بعد كده ان سبب الدوشه ان المضيفه تخيلت حدوث خطأ ) fty:: .

المهم بعد الأكل و الذى منه ( شاى عدة مرات و عصير بس و الله ) وصلنا دبى و حاولت ( بقول حاولت ) آخد تأشيره لمدة 24 ساعه اتفرج على البلد و اكمل الرحله تانى يوم و هوبا امسك ياجدع . مسكنا هريدى الداسوس . ممنوع انت فاكرنا ايه هطل ولا حاجه عاوز تزوغ و تيجى تشتغل عندنا حارس امن و تدمر الأقتصاد الهندى و السيريلانكى . المهم حمدت ربنا انهم خلونى قعدت فى الترانزيت لغاية موعد الأقلاع و قولت فى نفسى ارض العروبه ليست موطنى cld: .

يتبع ....

رابط هذا التعليق
شارك

(3)

اكمل .......

المهم … ركبنا من دبى باتجاه المحطة التاليه و هى سنغافوره و لقيت الطقم تغير لكن الخدمه و المعامله هى هى و سعادتك ممكن تقلع الجزمه و تلبس الشراب ده علشان رجلك تستريح و لقيت الكرسى عليه علامة حرف فى بالأنجليزى و الأكل جه نباتى بالتوابل الهنديه ( مش كارى حاجه تانيه ) و كان اكثر من رائع و عند وصولنا للمطار توجهت الى قسم الفيزات لأسأل هل من الممكن اذا كان يوافقوا يعنى لو سمحوا …. وقبل ما اكمل قالوا .. المصريين ممكن ياخدوا تأشيره من المطار لمدة 15 يوم و اذا حبيت ازيد ممكن بس من جوه البلد . تنهدت تنهيده كبييييييييييييييره .

مطار سنغافورة من اكبر مطارات شرق اسيا و فى المطارات اللى شوفتها لا يفوقه الا شيبوول فى هولندا و نفس النظام و النظافه و الشياكه و الخدمات و احسن من مطار شارل ديجول مثلا بحوالى مليون مره و بالمناسبه مطار شارل ديجول احسن من مطار القاهره بشويه صغننين …………… يعنى نفس النظام ( او عدم النظام ) بالضبط.

الفرق الوحيد بين مطار شيبوول و مطار سنغافوره لن يشعر به أحد الا من كان زيي أى من المدخنين الأشرار . فبعد امتناع عن التدخين فى الطائره لمسافة 6 ساعات ( بين دبى و سنغافوره ) كان لابد و ان اتحول الى سيجاره كبيره cld: و بينما قاعات التدخين فى شييبوول حاجه تشرح القلب الحزين فقاعة التدخين اليتيمه فى سنغافوره تأديب و تهذيب و اصلاح و ماعدتش ياشاطر تعمل كده تانى و وشك فى الذنب و خليك رافع ايدك انا شايفك . حاجه كده زى افران النازى بتاعة المانيا قفص زجاجى علشان الناس تتفرج على القرود ( اللى هم احنا ) و مافيش تكييف ولا شباك هوا علشان تحرم و الدخان جوا عامل كأنك جوه فرن بلدى صاحبه بيشغله بزيت عربيات بدل السولار و دى السحابه البيضا بدل السحابه السوده لدرجة انى ماكنتش محتاج اولع سيجاره انا ممكن اشم بس و لأن الكراسى قليله فعلى رأى شاويش الجيش ساع زميلك و لأن الشبوره كانت شديده فكنت احسس و اعتذر .

المهم بعد التردد على غرفة الذنب و التجول فى المطار حان موقع الأقلاع الى الصين .

و بطقم طيران آخر و بنفس نوعية الخدمه وصلت الطائره الى مطار جونجزو فى الصين بعد حوالى 6 ساعات من الطيران و بعد رحله استغرقت 22 ساعه من قيامنا بالقاهره fty:: .

و بعد تفتيش روتينى و قيامى بتسجيل اسمى و مقر اقامتى بالصين و مدتها و سببها لضابطة الجوازات الصارمه خرجنا الى خارج المنطقه المحظوره . مطار هذه المدينه متواضع جدا فمع هبوط الرحلات الدوليه به الا انه صغير جدا اصغر من اى مطار محلى عندنا او الدول المجاوره و علمت بأن فى الصين اربع شركات طيران محليه تتولى كل واحده جهه من الجهات الأربع ( فهناك شرطة طيران شمال و جنوب و شرق و غرب الصين ) و طائراتهم من النوعيه الأمريكيه و الروسبه .

لاحظت بأن كل أفراد الأمن و الجوازات و خلافه يرتدون زيا أخضر اللون و هناك ملاحظه بخصوص لون الزى سوف اذكرها فيما بعد.

يتبع .......

رابط هذا التعليق
شارك

(4)

اكمل .....

المهم خرجت من المطار لأجد مجموعه من مندوبى الفنادق بانتظارنا و لأنى كنت حاجز مقدما فقد تجاهلتهم و اتجهت للخارج و بحثت عن الورقه التى بها اسم الفندق فاكتشفت اننى نسيتها عند ضابطة الجوازات و لأن الدخول مره أخرى للضابطه شكله اصعب من الحصول على لبن العصفور فقد استخرت الله و توجهت الى اول مندوبة فندق استشيكتها و سألتها عن الفندق الذى تمثله و بعد أخذ ورد وفصال ايضا ركبت سيارة الفندق لنتوجه الى فيوراما اوتيل و هو اسم الفندق .

يتبع ........

رابط هذا التعليق
شارك

الأخوه الأفاضل

ارجو ان تخبرونى لو وجدتوا ان هناك شيىء من التطويل فانا احرص على ذكر التفاصيل لأن احب أن اقرأها فى وصفكم للرحلات و لذلك فاخبرونى اذا كنتم لا تستسيغوا ذلك.

رابط هذا التعليق
شارك

أرجو أن تكمل بلا توقف .. أنا قاعد مربع إيدي و باسمع ... قصدي باقرأ.

مفيش تطويل على الإطلاق .. التفاصيل الغير مهمة للبعض بالتأكيد مفيدة للبعض الآخر ... إستمر و امتعنا cld:

وقف الخلق ينظرون جميعا ... كيف أبني قواعد المجد وحدي

وبناة الأهرام في سالف الدهر ... كفوني الكلام عند التحدي

أنا تاج العلاء في مفرق الشرق ... ودراته فرائد عقدي

إن مجدي في الأوليات عريق ... من له مثل أولياتي ومجدي

أنا إن قدر الإله مماتي ... لا ترى الشرق يرفع الرأس بعدي

ما رماني رام وراح سليماً ... من قديم عناية الله جنده

كم بغت دولة عليّ وجارت ... ثم زالت وتلك عقبى التحدي

إنني حرة كسرت قيودي ... رغم أنف العدا وقطعت قيدي

أتراني وقد طويت حياتي ... في مراس لم أبلغ اليوم رشدي

أمن العدل أنهم يردون الماء ... صفوا وأن يكدر وردي

أمن الحق أنهم يطلقون الأسد منهم ... وأن تقيد أسدي

نظر الله لي فارشد أبنائي ... فشدوا إلى العلا أي شد

إنما الحق قوة من قوى الديان ... أمضي من كل أبيض وهندي

قد وعدت العلا بكل أبي ... من رجالي فانجزوا اليوم وعدي

وارفعوا دولتي على العلم والأخلاق ... فالعلم وحده ليس يجدي

نحن نجتاز موقفاً تعثر الآراء ... فيه وثمرة الرأي تردى

فقفوا فيه وقفة حزم ... وارسوا جانبيه بعزمة المستعد

رابط هذا التعليق
شارك

شوف يا ماجد ..

الأسلوب والكلام لحد هنا جميل جدا

لكن انا انصحك ما تكتبش الموضوع كله مرة واحدة .. علشان ما يبقاش صعب على اللى مش متابعه من أوله ..

يعنى إديها كام مداخلة ..

واصبر شويتين

وبعدين إديها تانى ..

وهكذا ..

وللا إيه يا كليووووووو cld: fty:: ؟

[وسط]!Question everything

[/وسط]

رابط هذا التعليق
شارك

الاخت جماهير غفيره "المعروفه سابقا باسم فيروز" تتقدم باسمى آيات الشكر و العرفان للاستاذ ماجد على هذا الموضوع الممتع

وارجوك قول كل كل التفاصيل وماتسيبش اى حاجه cld:

انا باحب فى موضوعات الرحلات دى اعرف كل التفاصيل ومين قال ايه وشاف مين وكل كل شئ بليز fty::

تم تعديل بواسطة فــيــروز

"أَمْ مَنْ يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاءَ الْأَرْضِ أَإِلَهٌ مَعَ اللَّهِ قَلِيلًا مَا تَذَكَّرُونٌَ"

صدق الله العظيم

-----------------------------------

قال الصمت:

الحقائق الأكيده لا تحتاج إلى البلاغه

الحصان العائد بعد مصرع فارسه

يقول لنا كل شئ

دون أن يقول أى شئ

tiptoe.gif

مريد البرغوثى

رابط هذا التعليق
شارك

أستاذ ماجد ، أكمل باستفاضة زي أول مداخلتين لو سمحت ، الموضوع غني جدا بالمعلومات الجيدة. فأرجوك بلاش كروتة زي ماعملت ف آخر مداخلتين.

بارك الله فيك ،

ها

و بعدين

تم تعديل بواسطة sad_swing2000

قد لا يُرزقُ المرء من فضل حيلتهِ و يُصرفُ الرزقُ عن ذي الحيلةِ الداهي

ما نــالني من غنىً يومــاً و لا عـــدمٌ إلا لــقولـــــــي عليه ... الحـــمـــد للهِ

---------------------------------------------------------

"يعجبني الفأل قالوا وما الفأل قال كلمة طيبة" حديث شريف

رابط هذا التعليق
شارك

أيوه كده .. بارك الله فيك يا ماجد ..

تسمح لي أعمل كوبي من الرحلات دي وأقرأها في البيت مع واحد توركيش كوفي بعد العشا النهاردة ..

فضلت خيرك عندنا بيتزا ... ولازم أحبس بعد ما أتعشى ...

وشكراً للأخت جماهير .. اللي أستفزت ماجد وأخرجته من حالة الصمت الهريب التي يتسمتع بها الكثير من المحاوراتيين .

الأحـــرار يؤمنون بمن معه الحق ..

و العبيــد يؤمنون بمن معه القوة ..

فلا تعجب من دفاع الأحرار عن الضحية دائماً ..

و دفاع العبيد عن الجلاد دائماً

رابط هذا التعليق
شارك

بناء على طلب المجاميع المهوله من شعب المحاورات نكمل و على بركة الله.

و بالتفاصيل حتى ( بعشرة قروش خس ).

و بدون كروته يا sad_swing2000 من العين دى ودى eey::

(5)

المهم …. ركبنا ميكروباس تبع الفندق و كانوا مجموعه من الأمريكان و الأستراليين ورحنا الأوتيل وفى الريسبشن مع كل واحد المندوب اللى استلقطه و انا كنت اتفقت مع المندوبه على سعر الغرفه و كان 90 دولار فى الليله و الفندق كان اربع نجوم و هو اوتيل كويس لكنى اكتشفت انه كان ممكن احصل بنفس السعر على اوتيل اقرب للمعرض لكنى لم اهتم لسببين الأول انه الأنتقالات من و الى المعرض تتم بمعرفة الأوتيل و هناك اتوبيس كل ساعه و الثانى ان بعد الأوتيل سيعطينى فرصه للفرجه على البلد .

موظفى الأستقبال يتحدثون الأنجليزيه بركاكه لكن يمكن التفاهم معهم . المهم طلعت الغرفه فى الدور 11 و كانت غرفه مريحه و جميله و بها كل ماهو موجود فى اى فندق محترم و فى الطريق للغرفه يوجد مكتب تجلس عليه بنت بالتناوب لمدة 24 ساعه.

بدأ الفار يلعب فى عبى فماهى وظيفة هذه البنت بالضبط ؟ فكلما ترانى امامها تروح منطوره قيام و تعظيم سلام و اكتشفت أن مهمتها هى ترتيب غرف النزلاء كلما خرجوا من الغرف.

اى نعم كلما خرجوا . فاذا خرجت من الغرفه 10 مرات يتم ترتيب الغرفه 10 مرات و بأسلوب يغيظ. فعند ذهابى للغرفه أول مره طلبت بطانيه احتياطى علشان مش عارف الجو بالليل هايكون ايه و كمان علشان ما بحبش التكييف الدافى . المهم بعد اول ليله رجعت البطانيه للدولاب و هنا كانت الطامه الكبرى . فكلما ادخلت البطانيه و خرجت من الغرفه دخلت هى أو النبطشيه بتاعتها و اخرجت البطانيه تانى و تصوروا كل مره اخرج و ارجع لو 5 مرات فى اليوم و لكل يوم لما كان هايجيلى انهيار عصبى . و حاولت افهمها انى عاوزها فى الدولاب فهمت هى انى عاوز بطانيه تانيه .

حتى الورق و المستندات ترتب الأوضه كلها و تيجى عند الحاجات بتاعتك فتنضف تحتها و ترجعها بنفس الترتيب بالضبط و كانها صورت الأوضه لدرجة انى عملت اختبار عجيب لترتيب الورق رجعته بنت الأيه بالضبط . fty::

اول ما وصلت اعطيت الولد حامل الشنط بقشيش 10 دولار لأن مكنش معايا عملة الصين . الولد بص لى و شكله eey:: كان هايموت من الفرحه . و عرفت فيما بعد ان ده بقشيش مبالغ فيه جدا المهم نزلت الأستقبال تانى و سألت اغير فين الدولارات فشاوروا لى على الجهه المقابله و كان مبنى شكله زى بنك كده غيرت من هناك بعملة الصين و اسمها رمم بى لكنهم فهمونى ان حساب الأوتيل لازم بالدولار و انى ممنوع اتعامل مع اى صينى بالدولار و ممنوع اغير الا من عندهم او من اى بنك مش من السوق السودا ء لأن دى عقوبتها شديده جدا .

بعد شويه ابتديت اجوع فسألت على المطعم فأخبرونى بأنه بيقفل الساعه 11 مساء لكن الكوفى شوب شغال طول الليل فطلبت شاى و لأنى كنت عامل حسابى وواخد معايا شوية جبنة رومى و لانشون و بسطرمه و مربى و جبنه كيرى ( الحكومه هى اللى اصرت انى اخدهم معايا ربنا يخليها لى يارب كنت اصبحت مجرد ذكرى لمعده متقلصه )

ملحوظه من القاموس : الحكومه = المدام ...ام العيال و الشعب = انا و العيال

المهم عملت ساوندتش كيرى على مربى cld: ( جربوه و بعدين اضحكوا ) و رومى على بسطرمه و رميت اللانشون لأنه باظ و كلتهم و نمت .

التعديل نسيت

يتبع .........

تم تعديل بواسطة ماجد
رابط هذا التعليق
شارك

هاااااااااا

وبعدين

كمل

حلوة جدا

clap.gif

مٌر الكلام

زي الحسام

يقطع مكان ما يمر

اما المديح سهل ومريح

يخدع صحيح ويغٌر

والكلمة دين

من غير إيدين

بس الوفا

ع الحر

رابط هذا التعليق
شارك

طيب سؤال الأول..

و ما نوع المعرض اللي كنت مشترك فيه؟

و الرحلة دي سنة كااام؟

و

شكرا على الحكى الجميل.. ax:

situations r a matter of mind, if u don't mind, they don't matter
رابط هذا التعليق
شارك

اكمل .....

(6)

صحيت تانى يوم و فكرت انى اطلب مصر و مع ان فرق التوقيت حوالى 8 ساعات يعنى الساعه ثمانية الصبح تبقى فى مصر 12 بالليل المهم طلبت و طمنت الحكومه و طلبت الفطار و كان فطار كونتننتال ( ماشى ياعم يبتاع البيتزا ) شاى و زبده و جبنه و مربى سيبت طبعا الزبدة لأنى مش عارف معموله من ايه و استخدمت مكانها الكيرى و التهمت المربى و الشاى كالارستقراطيين ( فين طبق الفول و البيض بالزبده ) .

المهم نزلت خدت اتوبيس المعرض و رحت المعرض . فى الأول يجب ان تذهب للأستقبال و هناك يطلعوا على جواز السفر و دعوة الحضور و بعدين يعطوا لك تصريح بالدخول . هذا التصريح مهم جدا جدا لدرجة انهم فهمونا انه مافيش حد هايتكلم معانا بدون هذا التصريح ولازم نعلقه طول ماحنا صاحيين خارج الفندق و قد كان. كمان المعرض للأجانب و سكان هونج كونج و تايوان بس و غير مسموح لباقى الصينين بدخوله و الباقى بيسموهم ما معناه سكان mainland او الصين الأم .

المعرض نفسه مكون من عدة مبانى كل مبنى من عدة ادوار و يتم توزيع كتيبات و اسطوانات ارشاديه للزوار تضم كل ما يوجد فى المعرض و بالتفصيل. يضم المعرض كل ما تنتجه و تصنعه الصين اى انه يضم كل شىء ممكن تتخيله فى العالم شيىء حقيقة يفوق التصور. انا شفت باكورة انتاج الصين من السيارات و هى تصنع لتنافس المرسيدس و الجاجوار .

طيب لماذا نرى المنتجات الصينيه عندنا كأسوأ المنتجات . السبب هم المشترين المستوردين . هناك فى الصين اسلوبان للشراء : الأول أن تحدد المواصفات و هم يحددون السعر ثم تناقش انت فى السعر و الثانى ان تحدد انت السعر و هم يحددون المواصفات . المصريين بلا استثناء يستخدمون الأسلوب الثانى ( السعر ) و لأن السعر يكون منخفض بشكل كبير لا يكون تقريبا هناك اى مواصفات . و التاجر الصينى لا يوجد عنده فى القاموس كلمة ماعندبش او ماينفعش كله عنده و كله ينفع المهم الزبون يتعاقد. مثلا مكواه كهربائيه بمواصفات تفوق المكواه الناشيونال سعرها 10 دولار و نفس المكواه بمواصفات لمصر يصبح سعرها 3 دولار .

ايضا هم يعملون باسلوب المناطق الصناعيه و كل منطقه لها العديد من شركات التسويق التى تسوق منتجات المنطقه الصناعيه . و لذلك تجد بائع الدراجات يبيع دراجات لكن لو سألت عن ادوات مكتبيه أو لنشات بحر او طائرات هليوكبتر ستجده يقولك ثانيه واحده و يديلك سعر و مواصفات ووووووو ولن تخلص.

كمان كل المنتجات الأوروبيه و الأمريكيه بلا استثناء بها اجزاء كثيره جدا صينيه و ليس لديهم اى حساسيه فى كتابة أى شيء على السلعه يعنى لو قلت له اكتب عليها صنعت فى موزمبيق يقولك اوكى …

كمان مندوبين الشركات جميعهم يتخذون اسماء غربيه بمجرد تعيينهم يعنى مستر وو زى بينج يصبح تانى يوم مستر بيل و كل الشركة تعرفه باسم بيل و حتى لو ساب الشركه وراح شركة تانيه يصبح برضه بيل علشان الأجانب يفتكروا الأسم بسهوله.

عندما سألت عن أجر العامل الشهرى قيل لى لا يقل مرتبه عن 100 – 120 دولار فى الشهر لكنى اشك فى صدق هذا الكلام و ممكن يكون دعايه او شيء من هذا القبيل .

عندما سألت عن شيء يحتاجونه هناك لكى نصدره لهم مقابل ما نستورده بص لى الشخص اللى سألته بصه فهمت منها انى عبيط و روح ياشاطر العب بعيد و أفهمنى بأسلوب غايه فى الأدب ان الصين لا تستورد الا لأغراض سياسيه ( يعنى مثلا زى صفقة السيارات المرسيدس المصرى من سنتين كانت علشان نقول صدرنا للصين بكذا و استوردنا بكذا بدل مانقول صادراتنا للصين صفر )

يتبع .....

رابط هذا التعليق
شارك

الحكومة والشعب معروفين للجميع يا عم ماجد

بس فعلا موضوع الضيافه في اي طيران غير مصر للطيران احسن بكتير اتذكر في مرة كنت مسافر على مصر للطيران (مضطر) فطلبت لحم واحضرت المضيفة لي فراخ ؟؟؟؟

ولما راجعتها ردت بكل سماجه ووجوم كما لو كنت بشحت منها هو ده اللي موجود

طبعا اكلت وامري الى الله

مرة تانيه طلبت دايت ولكن المضيفة وبكل بشاشة وابتسامه عريضه وجميله ايضا اعتذرت فما كان منى الا اني سالتها انت متعينه جديد وطبعا الرد انتم عارفينه

معلش طولت عليكم كمل يا عم ماجد كمل الله يفتح عليك

Yasso.gif

رابط هذا التعليق
شارك

اكمل .....

(7)

المهم بعد الجوله الأستكشافيه الأولى جاء موعد استراحة الغداء . فقلت ياواد شوفلك مطعم ولا حاجه المهم لقيت العيال الصينين كل واحد ماسك فى علبة اكل و بالعصايه و عمال ياكل اشى رز و اشى حاجات خضرا و اشى شوربه سوده قلت فى نفسى فرجت المهم وانا بادور على مطعم لقيت مطعم مكتوب عليه بالعربى حلال قلت بس ياعم رزقك فى رجليك و قربت منه و هوبا لقيت ريحة المطعم كأنى قاعد فى صفيحة زباله و متغطى بيها كمان رحت جارى من جنبه و رحت مطعم تانى و قلت آكل اكل صينى زى اللى فى مطعم الأمم كده المهم لقيت واحد خواجه واقف زيي عاوز يجرب المطعم بس خايف المهم قلتله ياراجل خش و ماتخافش و رحنا داخلين لقيت الراجل اتقرف من منظر الأكل و راح جاب حتتين جاتوه وجه قلت فى نفسى الله يقرفك هناكل جاتوه على الغدا المهم قمت جبت شوية رز و شويه صلصه سودا ( اتضح انها صلصة صويا ) و حاجة خضرا لقيت كل الناس بتاخذ منها و بيضيتين و عصايتين . المهم جيت اكل الرز لقيته مسلوق و بارد و بدون ملح اطلاقا قلت احط عليه من البتاعه السودا دى و بعدين جيت اكل من الحاجه الخضرا شكلها عامله زى القرنبيط بس محطوط عليها زيت قطعت منها حته و جيت ابلعها مش بتنزل …. معلش احاول تانى اجى ابلعها ماتنزلش …. طيب غمض عينيك و حاول …. مافيش فايده . وولاد الجنيه الصينيين نازلين اكل فيها زى القرود . يادى الوقعه السودا . وكل كده و الخواجا عمال يضحك عليا لما وقع فى الأرض من الضحك. رحت راميها و قلت آكل البيض أهوه ده بأه عارفينه و خابزينه . جيت امسك البيضه و باقشرها قام الخواجا الملعون قاللى ايه مش واخذ بالك من البيضه قلت له فيها ايه قال البيضه لونها مش ابيض لكن اخضر فاتح . يانهار اسود ده صحيح البيضه لونها فزدقى فاتح … رحت قايم و سألت الست اللى على الكاشير

- دى بيضه فرخه بالأنجليزى …شاورت لى بما معناه انها مش بتتكلم انجليزى .

مسكت البيضه فى ايدى و قلت لها زى الديك البيضه دى كوكككوك .( بعلو صوتى غصب عنى فى المطعم )

- شاورت لأ

- قلت لها و انا باشاور بأيدى زى البطه دى بيضه كاك كاآآآآآآآك

- شاورت لأ

شاورت انا امال بيضة ايه الله يخرب بيتك ( قلت لها انا بعلو صوتى )

قالت : كيوى

البيضه طلعت بيضة كيوى ( الطائر المرسوم على علب الورنيش )

رحت جبت حتتين جاتوه ……….

rs: :) :)

يتبع .......

رابط هذا التعليق
شارك

شوف يا ماجد ..

الأسلوب والكلام لحد هنا جميل جدا

لكن انا انصحك ما تكتبش الموضوع كله مرة واحدة .. علشان ما يبقاش صعب على اللى مش متابعه من أوله ..

يعنى إديها كام مداخلة ..

واصبر شويتين

وبعدين إديها تانى ..

وهكذا ..

وللا إيه يا كليووووووو  rs:    :)  ؟

ده انت طيب اوى ياعم esssothegreat

ده فى الأول بس بدى جرعه مكثفه علشان نربى زبون.

بعد كده هاعذبكو عذاب

ولا عذاب الأرمله

:) :P :P

رابط هذا التعليق
شارك

البيضه طلعت بيضة كيوى ( الطائر المرسوم على علب الورنيش )

رحت جبت حتتين جاتوه ……….

:) :P rs: :)

رائع كمل ، الله يفتح عليك

وبعدين موهبة السرد الجميل ده كنت دافنها ومخبيها ليه يارااااااااااجل

تحياتي

:P

سقراط

تم تعديل بواسطة سقراط المصري

<span style='font-family: Arial'><span style='font-size:14pt;line-height:100%'><span style='color: blue'><strong class='bbc'><br />زوجتي الحبيبه ، امي الغاليه ، حماتي الطيبه<br /><br />برجاء تجهيز مايلي يوم وصولي لأرض المحروسه :<br /><br />باميه باللحم الضاني ، محشي ورق عنب ، كباب حله ، قلقاس باللحمه ،نص دستة زغاليل محشيه ، بطه راقده على صينية بطاطس ، وزه متشوحه كفتح شهيه ، صينيه رقاق ، موزه مشويه على الفحم ، سلطة طحينه بالليمون ، مية "دقه" ، ملوخيه بالارانب ، شربة فرخه بلدي بالحبهان والمستكه، برميل تمرهندي............... وكفايه كده عشان انام خفيف.<br /><br />سقراط المصري<br /></strong></span></span></span>

رابط هذا التعليق
شارك

شاكرين مهللين ياعم سقراط ....

و اى خدمه .

اكمل ...........

(8)

بعد الفتره المسائيه رجعت الفندق استريحت شويه و الذى منه و نزلت قعدت فى اللوبى حيث جلست مع مجموعه من النزلاء نتكلم عن انطباعاتنا و كانوا مجموعه من الأمريكان و الأستراليين و البعض من دول شمال اوروبا و لم أرى ايا من النزلاء العرب طوال فترة اقامتى اما لأنهم ينزلون فى فنادق أخرى أو يطيرون لأماكن لهو ليس لى فيها .

المهم أحد النزلاء الخواجات المجانين طقت فى دماغه انه يتمشى ياعم اقعد انت متعرفش البلد … لايمكن …. طيب يمكن يكون فيه عصابة جاكى شان …. مش معايا غير 20 دولار … طيب معاك خريطه … لأ بس حتى لو تهنا ناخد تاكسى .

طيب يالله ياسيدى .. و عليها مشيت مع الراجل . شويه و كل مانقابل حد نلاقيه يروح معدى للرصيف التانى و كأننا جربانين و خايف يتعدى فقلت للراجل انت شايف ايه الى بيحصل . و هو استغرب جدا و قعدنا نفكر فى اسباب اللى بيحصل . و بعدين قربت مننا بنت صغيره بتبيع ورد – على فكره الساعه كانت بعد 9 مساء و ما حدش فى الشارع غيرنا – و فجأه بعدت عننا بشكل مريب فبصيت ورايا لقيت جوز عساكر خضر قاطرينا من امام الأوتيل و منين مانروح ورانا … نقف يقفوا .هل كانوا حراسه لينا ام مراقبه ام الأثنين معا لا أدرى و ان كنت بدأت ادرك طبيعه النظام الصارم هناك ... المهم قلت للراجل قال طب كفايه نرجع الأوتيل.

و احنا ماشيين لقينا محل زى صيدليه كده بس بتبيع قماش و ادوات تجميل و عطور و الراجل راح سايبنى و جرى على المحل … رايح فين الله يخرب بيتك خواجه منخوليا . المهم دخلت وراه لقيت الراجل عمال يشاور على ايده و يهرش لما خلاها حمرا دم و يشاور عليها للعامله و هى مش فاهمه حاجه و لا أنا . طيب فهمنى يمكن اساعدك يقولى ثانيه واحده . آخر ما غلب الراجل شاور على أحد المستحضرات فالست جابته و راح يدفع الحساب فأنا اخذت عبوه اخرى و شاورت للعامله بما معناه ده بيستعمل فيه ايه فجاوبت بما معناه العطس – اى انه حاجه كده زى الفيكس فقلت اكيد الراجل حاسس ببرد فى عضمه و ما صدق لقى محل فاتح يا عينى .

المهم فى طريقنا للعوده وقف الخواجه المجنون و قال لى نركب تاكسى احسن قلت له ده الأوتيل الشارع الجاى قال برضه نركب تاكسى ضرورى . بصراحه انا خفت فالراجل يا اما تعبان جدا و هايموت يا اما مخه لاسع وممكن يقتلنى بس على ايه يا حسره المهم وقفنا تاكسى و رجعنا الأوتيل .

دخلنا الأوتيل و الراجل راح مستأذن مننا و قال هايطلع اوضته و هاينزل بعد 5 دقائق . فاتت نصف ساعه و الراجل منزلش فقلت لزملاؤه انه الراجل تأخر و يمكن يكون تعبان ولا حاجه فقالوا نطلع نشوفه و طلعنا كلنا لغرفته .

بمجرد ما قربنا من الأوضه سمعنا صريخ و صويت من الأوضه كأن فيه أسد بياكل الراجل . المهم جريوا صحابه و طلبوا الريسبشن و الأمن و طلعوا فتحوا الأوضه

فماذا وجدنا !!!!

الفقره الجايه محرجه شويه ….اللى عاوز يقرا يقرأ على مسئوليته :

لقينا الراجل فى الحمام بيصرخ . و الكل هجم على الحمام و انا خفت فاستنيت فى الأوضه متوقع مصيبه و فجأة ساد الهدوء الا من حوار مش فاهمه ثم ناس خارجه من الحمام بتضحك و بتخبط فى الأرض من الضحك و اللى رمى نفسه على الأرض من الضحك و انا واقف كالمعتوه مش فاهم حاجه و شويه شويه فهمت من خلال الضحك انه الراجل كان عنده التهاب فى مكان حساس و لما حط الكريم – اللى هو فيكس بس من الأصلى – على مكان الألتهاب الراجل …………ولّع

من الصعب على الأنسان ان يطلب قدرا أكبر من الضحك مثل ما حدث ذلك اليوم خاصة بعد خروج الرجل من الحمام و هو أشبه بالبكريه التى وضعت مولودا حديثا .

اصبحنا ننادى الرجل بعدها ……..مستر فيكس

اقرأوا الموضوع من الأول و انتوا تفهموا الراجل كان تعبان قد ايه

يتبع .......

رابط هذا التعليق
شارك

رحت جبت حتتين جاتوه ……….

ما كان من الاول :blink:

بصراحة موضوع جميل جدا وممتع ومفيد جدا

بس معليش يعني يا عم ماجد ليه عندك طلب صغير ؟

يا ريت - زي ما فيروز قالت - بالتفصيل الممل

لان هي دي متعة السفر أنك تلم مشاهدات شبه شاملة عن المكان الي أنت سافرت له

مش الي يسافر تقضية واجب يخلص مصلحته وخلاص

و في أنتظار الباقي

:blink: :blink: :blink:

حمو

jihad_19.gif

أتمني أن يأتي اليوم الذي نعيش فيه الديموقراطية , لا أن نكتفي بالتشدق بها .......read.gif

<span style='font-size:21pt;line-height:100%'><span style='font-family:Times'>

خير الكلام ما قل ودل</span></span>

رابط هذا التعليق
شارك

انشئ حساب جديد أو قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لا يوجد أعضاء مسجلون يتصفحون هذه الصفحة

×
×
  • أضف...