برلمانى يرفض إظهار رخصة القيادة بحجة الحصانة.. والضابط يرد "انسى.. ده كان زمان"

[aimen]

وقعت مشادة كلامية بين أحد ضباط المرور، بكمين شرطة على طريق القاهرة- الإسكندرية الزراعى، وأحد أعضاء مجلس الشعب، بعدما طالب الضابط من العضو إظهار رخصة القيادة، فرفض النائب البرلمانى قائلا "أنا عضو مجلس شعب ومعايا حصانة"، فما كان من الضابط إلا أن يصرخ فيه قائلاً "انسى الكلام ده كان زمان هشوف رخصك يعنى هشوف رخصك".

كان أحد ضباط المرور فى كمين على طريق القاهرة- الإسكندرية الزراعى، فوجئ بإحدى السيارات سوداء اللون، تدخل على كمين المرور، وزجاجها معتم "فاميه"، فاستوقفها أحد أمناء الشرطة، طالبها إظهار رخصة القيادة، لكن صاحبها قام بإنزال جزء من زجاج السيارة، وقال له "أنا عضو مجلس شعب"، فقام أمين الشرطة بإبلاغ ماحدث للضابط، فقام الأخير بالتوجه ناحية السيارة، وطلب من صاحبها إظهار رخصة القيادة، فكان رد سائقها "أنا قلتلكم أنا عضو مجلس شعب".

انفعل الضابط بسبب الطريقة التى يتحدث بها العضو، وقال له: "أنت عضو مجلس شعب على عينى وعلى راسى.. وحصانتك جوه البرلمان مش فى العربية.. وبعدين مش كل واحد يقوللى أنا عضو مجلس شعب "هضربله تعظيم سلام وأقوله اتفضل، بلاش رخصة القيادة، ممكن أشوف الكارنيه" لكن العضو كان رده عنيفًا بقوله "مش هطلع الكارنيه ولا الرخصة" فأجابه الضابط قائلا "العربية مش هتتحرك متر واحد إلا لما أشوف الرخص، وبعد إذنك أقف على جنب علشان نمشى الطريق".

بالفعل تحرك العضو قليلا بسيارته، وقام بإخراج هاتفه المحمول، فقال له الضابط بصوت عالٍ "أقسم بالله لو كان آخر يوم لي فى الداخلية النهارده، هشوف الرخص، ولو كان رئيس الوزراء نفسه على التليفون ماهكلمه، هو اللى يشتغل بضمير فى البلد دى يبقى عيب؟".

حاولت "بوابة الأهرام" معرفة اسم الضابط وعضو مجلس الشعب، لكنها لم تستطع، حيث كان الموقف قد انتهى، وبالفعل أظهر العضو هويته الشخصية، ورخصة القيادة، بعد إصرار الضابط على موقفه، وقام السائقون الذين حضروا الموقف، بتحية الضابط، فكان رده عليهم "عايزين البلد تتعدل، والواسطة تنتهى، واللى مش عاجبه يسيب مصر".

عاوزين من عينة الضابط دا كثير ....

وفى نفس الوقت عاوزين نعرف اسم الباشا العضو ...

الثورة مستمرة ان شاء الله

المصدر

الأهرام

[وطني حر]

احنا عايزين نعرف حقوقنا وواجباتنا. ايه اللي لينا وايه الي علينا .

عضو مجلس شعب يجب ان يعرف حدود الحصانه .؟؟ مع ضابط المرور او مع ضابط الشرطه .

وايضا المواطن البسيط يجب ان يعرف حقوقه . . حتي لاتقع في مزبله الامن القديمه .

[ابراهيم عبد العزيز]

الحمد لله أن مصر فيها هذا النوع من الضباط الشرفاء

ومثل هذه المواقف هي التي تجعلني أشعر أن هناك ثورة قامت في مصر , وإن هناك تغيرا ولو طفيف حدث في هذا البلد

جزي الله هذا الضابط كل خير

تم تعديل 31 يناير 2012 بواسطة ابراهيم عبد العزيز

[hanzalah]

مجلس الشعب لو صادق

يطهر نفسه الاول

يعني يراجع امتيازات النواب واهمها الحصانة

الحصانة تحت قبة البرلمان فقط

في الشارع الحصانة للوحيد للقانون ولمن يلتزم به

وشكرا .. كفانا من عينة هذا النائب الهمام

مصر من غيره افضل الف مرة

يارب يكتر من امثال هذا الضابط الشريف

[ابراهيم عبد العزيز]

وتتمة لتعليقي الأول :

أتمنى من كل قلبي أن تقوم الدولة بتكريم هذا الضابط , ويكون هذا التكريم عن طريق إستقباله مثلا في مجلس الشعب أو يستقبله رئيس مجلس الوزراء في مكتبه أو أي مسئول رفيع أخر في الدولة

والهدف من ذلك لكي نُشجع هذا النوع من الموظفين على الإستمرار على نفس النهج , وفي نفس الوقت نُشجع موظفين أخرين كي يسلكوا نهجه حتى يكونوا في يوم من الأيام مكان هذا الضابط يستقبلهم مسئول رفيع في الدولة وتنزل صورهم في وسائل الإعلام

وبهذا يتسلل شعور لكل موظفي الدولة في كافة القطاعات أن الدولة المصرية تقف داعمة لهم وأن عليهم أن يتمسكوا بثوابت مهنتهم دون خوف أو خشية من كبير أو صغير .

تم تعديل 31 يناير 2012 بواسطة ابراهيم عبد العزيز

[se_ Elsyed]

على العكس بقى

انا ضد العنف تماماً

لكن أشجع أي ظابط بيشوف شغله بطريقة محترمة إن أي حد من العينة دي يقول له إنت مش عارف أنا مين والكلام ده .. إنه يقول له لأ عارف ويمكسه يرزعه علقة محترمة عشان يعرفه مقامة

بلا قرف

[عطر الجنة]

المشكلة ليست فى الضابط فانا على طول بسافر و فعلا ضباط المرور على الطريق الزراعى ما شاء الله عليهم من اسكندرية الى بداية قليوب لكن اللى فى طلعة الدائرى منهم لله

اللى بستغرب ليه ان الدنيا فعلا و افكار الناس اتغيرت فازاى عضو مجلس الشعب يبقى لسه بتلك العقلية ... المفروض هو اول واحد يحافظ على القوانين ... و لو وجد مشكلة على الطريق ينزل يحلها

المفروض عضو زى ده ينحقق معاه فى مجلس الشعب و ممكن تترفع عنه حصانته ... اللى مش عارفه اساسا هى وضعت ليه ... اكيد للتغطية و التعمية على بعض التصرفات

تحياتى

[Om Zayd]

انا عايزة مجلس الشعب يبقى له موقف حاسم

مثل هذه الممارسات -حتى لو بحسن نية- قد تضعف كثيرا ثقة الناس فيه و في التغيير المنشود

بداية -و لو فردية- على طريق سيادة القانون.. ينبغي ان نشجعها

[أسد]

في الواقع

عجبتني الحكاية جداً ...

وعجبني موقف الضابط جداً ...

وأتمنى أن تكون قصة حقيقية ..

مش تعبيرية مثل صور الأهرام التعبيرية

[se_ Elsyed]

دعونا نقول إن من ساعة إحتلال العسكر لمصر بعد ثورة يولية تم تجريف متعمد للشعب المصري وتم زرع قيم غريبة به أصبحت متغلغة لدينا

ونحن كشعب وأفراد وبني أدمين شاركنا في ذلك بلا شك ...

على سبيل المثال

- الواسطة .... واللي له ضهر ما ينضربش على بطنه ...

- تمييز مناصب عن مناصب وكأن مثلاً الطبيب او الظابط او المحامي او نائب مجلس الشعب هو أفضل عند الله وعند الناس من البقال أو الصنايعي او جامع القمامة حتى .. مع إن ده غير صحيح بالمرة .. فكلنا بني أدمين وكلنا يجب ان يكون لنا إحترامنا وكلنا سواء أمام القانون في الحقوق والواجبات ولا يجب أن يتم التمييز بين إنسان وإنسان على أساس منصبة أو وظيفته ... لكن التمييز الإيجابي يكون بما يقدمه الإنسان لوطنه ولبلدة أياً كان عمله

ويمكن كتير من العادات الزبالة دي جاءت من عسكرة الوطن ... يعني لو تعرف لك واحد عسكري في الشرطة يا سلام يبقى أنت كده عديت .. وإنت مش عارف أنا مين وإعرف بتتكلم مع مين ..

وأقول للأسف لأن كتير منا ولا استثنى أحد وانا أولكم كثيراً ما نلجأ لهذه الفساد لإنهاء أمر ما ..

وحكيت لكم زمان إستخرجت رخصة القيادة ... الاول روحت كمواطن عادي .. الظابط قال لي تعالى إمتحن إمتحان نظري عشان أسقطك .. أه والله العظيم .. وسقطني ... وهبدني ميعاد أخر للإختبار بعد شهر وأنا اجازتي أيام فقط.. فقولت ما بدهاش ... فسكرتير وزير التعليم صديقي وجاري في نفس الوقت .. كلمته راح باعت معايا واحد من الوزارة هو اللي ماسك موضوع العربيات ومشاكلها في الوزارة والراجل جه معايا وشوفت العجب والله العظيم

والله يا جماعة العقيد ولا العميد مدير المرور بيقوم له إحترام وكل الظباط بيؤدوا له التحية عشان الخدمات اللي بيعملها لهم .. وعشان علاقاته في وزارة الداخلية مع إنه في وزراة التعليم لكن يعرف ناس في وزارة الداخلية وبيجيب لهم الأخبار من الكنترول .... واحلى رخصة شنجن طلعت للمعلم سين سين .... مع إني باعرف أسوق - واخد بالك يا عطار -

ونفس الشيء لو عندك مخالفة مرورية بالاف الدراهم ... الباشا يلغيها لك بجرة قلم وحسبي الله ونعم الوكيل وخلي الدولة تخسر ملايين في كده

مطلوب تأسيس مجتمع ذو أخلاق من أول وجديد .. لا فيه واسطة ولا حد يتعدى على حد حد ولا فلان ده إبن فلان ومفيم عربيته وVIP

عاوز أشوف الكناس في الشارع يتقال له Sir ونعطيه إحترامه زيه زي أي واحد فينا ...

ده بتوصل الدرجة للتميز بين الناس بملابسهم .. يعني لابس بدلة ... يبقى احلى معاملة .. ولو لابس ملابس شغل وعليها أسمنت او رمل يبقى ممكن أخد على قفايا على أساس إني صنايعي غلبان ماليش ضهر ولا لازمه

[jgeorge]

لو لم يظهر الرخصة يبقى طبقا لقواعد الحصانة الحالة متلبس بالقيادة بدون رخصة

ليه اللماضة بقى

يظهر الرخصة و يظهر الكارنيه طالما انه فى السليم

[أحمد محمد]

المهم بس ميكنش الموضوع موضوع عناد و بس

يعني هو كان أخد الموضوع موضوع عناد و كبرياء علشان النائب رفض في ألاول انة ييظهر الرخصة و بعد كدة سابة يمشي عادي

لآن لازم النائب دا يتأخد مخالفة

المخالفة أنة زجاج السيارة كان فامية و دي مخالفة لقواعد المرور في مصر

و لازم القانون يطبق علي كل الناس و مش علشان هو نائب يبقا الحصانة تجيز لة أنة يعمل أي حاجة و يخالف القوانين علشان الحصانة