من وراء إرتفاع وتيرة الأزمات والإحتجاجات كلما أقتربنا من الذكرى الأولى للثورة ؟

[se_ Elsyed]

أوعى حد يقول لي الثوار أنفسهم أو 6 إبريل ولا الجمعية الوطنية للتغيير

نحن الأن أمام وضع ممنهج ومخطط تماماً

هاقول صدفة إن خطوط الوجة القبلي مقطوعة يمكن بقالها إسبوع وأكثر عشان نقص أنانيب البوتاجاز في كثير من القرى والمدن هناك ... حقهم بصراحة .. وخلي الحكومة والمجلس يشربوا خساير بالملايين

لكن اللي مستغرب له ومش لاقي له تفسير .. المشهد اللي شوفته أمبارح ... الاف من أصحاب المعاشات كبار السن يتوجهون إلى مبنى المعاشات الرئسيس في وسط البلد في إحتجاجات تطالب بزيادة معاشاتهم بنسبة 30 % .. وأمهلوا الحكومة فرصة حتى الاحد القادم لإتخاذ القرار وإلا سيتم التصعيد بإجراءات إحتجاجية أكثر وأكثر

مستغرب بقى . مين قدر يجمع كل دول .. خصوصاً إنهم ناس كبار في السن .. قصدي مين معاه الداتا بيز وخلى المغربي يجتمع بالشامي وينزل وهما كبار ومرضى وما يستحملوش البرد ده ؟

- مين اللي ساب البدو يحاصروا المقر المفترش لمحطة الطاقة النووية بالضبعة لمدة 40 يوم .. تخيلوا ؟ من غير ما يعبرهم ويسمعهم ويعرف هما عاوزين إيه لحد مما هدموا الأسوار وفجروا المباني اللي هناك بالديناميت .... تعرفوا إن الجيش إنسحب من هناك ولبسها في الشرطة اللي جريت طبعاً لانها ما تقدرش تقف أمام تلك الحشود من المواطنين ؟ وتعرفوا إن بابا نويل العسكري الشهير بمشمش امر أمبارح بتعويض البدو المنزوعة منهم أراضيهم من سنة 1982 بأسعار اليوم ... أه والله من 1982 .. جريدة الجمهورية النهاردة بتقول إن الخساير حتى الان في مشروع الضبعة مليار جنية ... مش فاهم جابوا الرقم ده منين ؟

- ومين اللي بيذل مصر وبيطلع كل شويه .. أقسم بالله العظيم لسه تصريح حالاً لوزارة البترول بيقول مافيش ازمة في البنزين ولا حاجه والدنيا بيس ... والقاهرة ومحافظات كثيرة اصيبت بالشلل لان مافيش بنزين 80 و 90

- ومين اللي بقى له يمكن 6 شهور في دوامة ازمة الانابيب ؟

- ومين اللي مش راضي يخرج على الشعب ويطرح رؤيتة لعلاج المشاكل وبقى لنا سنة في كده ولو الناس أخدت وعود بحل مشاكلهم تدريجياً وفق خطة زمنية وبأولويات ؟

تفتكروا مين اللي بيحكم مصر أو لما نحب المسئول عن البلاوي دي كلها .. نكلم مين غير 140 دليل ؟

[se_ Elsyed]

السؤال الاخطر

من الذي لم تعجبه ثورة شريفة قام بها شباب مصر وألتحم بهم الشعب كله .. ويريد أن يحولها لثورة جياع ومحرومين تخرب البلد وتجعل عاليها سافلها ؟

[dongol]

أنا من ساعة الثورة ما بدأت و انا أعصابي تعبت و قرب يجيلي الضغط والسكر والقلب من كثر الاخبار الوحشة اللي الواحد بيسمعها كل يوم

لذلك قررت ان ما أشاركش في أي موضوع سياسي عن مصر و هسيبها تولع و تخرب كمان

أنا بقيت غير مهتم

I Do not Care

[ماستر]

المشهد دة بالضبظ زى ما بنلقى حرامى فى الشارع ونطلع نجرى وراة ونقول امسك حرامى, والحرامى دة وهو بيجرى كل شوية يرمى حاجة قدامنا علشان نقع ومنعرفش نمسكة يعنى ممكن يرمى طوبة او عربية خضار او كرسى اى حاجة المهم اننا نتكعبل ونقع,

طبعا مع المفارق ان المرة دى الشعب بيقول امسك عسكرى

تم تعديل 16 يناير 2012 بواسطة ماستر

[wahed_masry]

السلام عليكم

الإجابة يسيطة (ودون الإستعانة بصديق) ابحث عن المستفيد

من الذى إذا انصلح الحال سيحاكم وتقطع رقبته

من الذى مازال فى مكانه يخرب وينهب

من الذى يحميه الجيش

أم أن الجيش يحمى نفسه و 60 عاماً من السلطة المطلقة

تحياتى

[shawshank]

السؤال الاخطر

من الذي لم تعجبه ثورة شريفة قام بها شباب مصر وألتحم بهم الشعب كله .. ويريد أن يحولها لثورة جياع ومحرومين تخرب البلد وتجعل عاليها سافلها ؟

يمكن دي "الخطة ب" اللي حطها مشمش.

[raouf]

ارجع واقول تانى

بصرف النظر عن كون مين السبب

وبيد مين

لان معظمنا عارفين ومقتنعين باللى ورا البلاوى دى

بس للاسف احنا اللى ادينا ليه الفرصة

احنا اللى خليناه يضحك علينا ويجرنا للى هو عايزه

يعنى يا استاذ احمد مش عارف ان المجلس العسكرى من زمن كان يقدر يسحل كل الللى بيشتموه وبيحرضوا عليه ؟

كان يقدر وفى نص ساعة كمان ومن غير دية ومحدش هايوقفه ولا من بره ولا من جوه

ولكنه تعامل مع الموقف بذكاء ودبسهم فى مواجهة مع الشعب

سيبك منى ومنك وقول اننا فاهمين ان شباب الثورة ناس محترمة ووطنيين وبيعملوا لمصلحة مصر

ولكن رجل الشارع مختلف فهم نجحوا فى قلب المنطق الى ان يكره الشعب الثوار ويلعن اليوم اللى قامت فيه الثورة

لان عدوهم نجح فى استدراجهم الى الفخ اللى رفض الاخوان السقوط فيه لخبرتهم

يا حج قلنا نمسك نفسنا ونعصر ليمونة على نفسنا ونهمد شهرين تلاتة وساعتها نقول شفتوا ادى 3 شهور والبلد هادية

مانديش فرصة لفرض احكام عسكرية

مانديش فرصة لانسحاب البرادعى وغيره

شفت نتيحة انتخابات المرجلة الثالثة ؟

شفت الفلول واخدين اصوات اد ايه ؟

شفت نتيجة فردى حزب النور فى الانتخابات ؟ والاخوان معاهم ؟

صدقنى يا ريس بيتلعب بالناس الكرة وبيتحركوا زى ما خصمهم عايز لكن للاسف محدش مدى لنفسه ولا عايز يفهم

بيستفذ الشباب ويقول للناس شفتوا اللى الشباب بيعملوه هم السبب والناس بتصدق لان ده اللى نجح فيه الاعلام

هاديك مثال

كل قنوات باستثناء بما فيهم الفضائية المصرية بتسب وتلعن وتنتقد المجلس العسكرى

مش شايف ان ده غريب ؟ وخصوصا الفضائية ؟

انا حاسس انهم بيهيجوا الناس وبتفويت منهم علشان يظهروا امام الراى العام ان الشباب هم سبب المشاكل

بس اطل اطلب نشغل مخنا بدون عواطف شوية وسنرى الصورة كاملة

تم تعديل 16 يناير 2012 بواسطة raouf

[se_ Elsyed]

يعنى يا استاذ احمد مش عارف ان المجلس العسكرى من زمن كان يقدر يسحل كل الللى بيشتموه وبيحرضوا عليه ؟

كان يقدر وفى نص ساعة كمان ومن غير دية ومحدش هايوقفه ولا من بره ولا من جوه

أقسم بالله وقسم أنا مسئول عنه .. لو معاه دبابات وطائرات الدنيا ما كان يقدر .. وكان عملها مبارك من قبلة ..

دي ثقة في الشعب يا عزيزي

يا حج قلنا نمسك نفسنا ونعصر ليمونة على نفسنا ونهمد شهرين تلاتة وساعتها نقول شفتوا ادى 3 شهور والبلد هادية

لحقت تنسى رؤوف ؟؟؟

حصل وفُضت الإعتصامات في أول رمضان عشان العجلة والبسكلتة تدور .. وعدت ييجي 3 شهور والبلد بترجع لورا

ولو بتطالب الناس إنها تهمد عن حقها ... يبقى كان اولى إنهم يهمدوا ويدوا المخلوع فرصة 6 شهور يسلم البلد تسليم أهالي .... فالمخلوع والمجلس العسكري هما وجهان لعملة رديئة يا عزيزي واللي يقول غير كده يبقى بيضحك على نفسه

شوفت فيدوهات مصراوي النهادرة اللي بتعرض لأول مرة واللي أثبت كلامنا عن المجلس حامي الثورة واللي كانو واقف بينظم المرور لبلطجية موقعة الجمل .. الغريبة إن التوجيهات بالبهجوم على الثوار كانت بتتم من فوق المتحف المصري وكل ده واضح في الفيديو ؟

كل قنوات باستثناء بما فيهم الفضائية المصرية بتسب وتلعن وتنتقد المجلس العسكرى

مش شايف ان ده غريب ؟ وخصوصا الفضائية ؟

يا راجل قول كلام غير ده ؟؟

ده بتوع إحنا أسفين يا مخلوع ما شوفتهمش وعرفتهم إلا من خلال الفضائية

الإعلام المصري الحكومي مازل هو بغباوتة ومافيش حاجه إتغيرت يا ريس

[ماستر]

يعنى يا استاذ احمد مش عارف ان المجلس العسكرى من زمن كان يقدر يسحل كل الللى بيشتموه وبيحرضوا عليه ؟

كان يقدر وفى نص ساعة كمان ومن غير دية ومحدش هايوقفه ولا من بره ولا من جوه

أقسم بالله وقسم أنا مسئول عنه .. لو معاه دبابات وطائرات الدنيا ما كان يقدر .. وكان عملها مبارك من قبلة ..

دي ثقة في الشعب يا عزيزي

تأكيد على كلام س س: علشان الناس تعرف ان المجلس العسكرى ميقدرش يخمد الثورة المصرية بالقوة المسلحة

- الجيس الامريكى مقدرش يركع مدينة واحدة ثائرة فى العراق ( مدينة الفلوجة) دة بكل اسلحتة ومعداته والموارد التى لا تندب, هل تعلم انهم استخدم كل شئ حتى الفسفور الابيض وارجع الى تسجيلات الجزيرة علشان تعرف دة كويس,

- الثورة منتشرة فى كل حتة فى مصر (الظاهر بس هو ميدان التحرير علشان تغطية الاعلام لكن لو بصيت كويس هتلاقى الثورة قوية جدا على اطراف مصر زى السويس واسكندرية واسوان) والجيش المصرى بتعدادة وامكانياتة لا يتحمل مثل هذا الانتشار (دة الجيش الامريكى معرفش يعملها فى العراق وفى الاخر قعدوا فى ثكنة عسكرية وسموها المنطقة الخضراء),

- الجيش المصري مكون من الشعب المصرى يعنى فى الاخر الجنود هتفكر ان الى بيضربة او يقتلة او يسحلة دة اخوة وابوة وعمة وخالة وصحبة وهتلاقى يا حلو تمرد بالهبل وطنطاوى وعنان عرفين كدة كويس قوى علشان كدة هتلاقى استخدام السلاح والعنف دائما على مدى محدود ومصغر جدا غرضة التاثير النفسى علشان يجى واحد زى سعتك يقول كدة ويعملوا جدار نفسى ان احنا (اى الشعب المصرى) مش هنقدر نكمل والقوة كلها مع العسكرى مع ان العكس هو الى صحيح

- فية لغة ممكن انا وانت منخدش بالنا منها وهى لغة الدم الى ديما بيزيد الثورة مش بيقللها وحبيبك العسكرى عارف دة كويس جدا فكل ما زادت الدماء زادت قوة الثورة وليس العكس (يعنى العلاقة تناسب طردي مزيد من الدماء يؤدى الى مزيد من قوة الثورة والتفاف الناس حولها)

كتب رؤف:

سيبك منى ومنك وقول اننا فاهمين ان شباب الثورة ناس محترمة ووطنيين وبيعملوا لمصلحة مصر

ولكن رجل الشارع مختلف فهم نجحوا فى قلب المنطق الى ان يكره الشعب الثوار ويلعن اليوم اللى قامت فيه الثورة

الكلام دة كان زمان دلوقتى الشباب على الارض غيروا التكتيك بتاعهم من فضلك راجع كويس حملة كاذبون وكمان سلاسل الثورة وانت تعرف ان كذب العسكرى بدأ يدخل كل بيت وكمان اهداف الثورة الحقيقية بدأت توصل للرجل الشارع البسيط ( فية موضوع كامل فى المنتدى عن الحملة دى ممكن ترجع لية)

تم تعديل 16 يناير 2012 بواسطة ماستر

[ماستر]

يمكن دي "الخطة ب" اللي حطها مشمش.

ممكن فعلا يا شواشنك ليه متكنش خطة الهروب, شغل الشعب بنفسه وكعبله الدنيا على الادارة الجديدة لغاية ما يهربوا ويظبطوا نفسهم