نحتاج وبشدة لثورة شواكيش

[se_ Elsyed]

ثورة شواكيش نهدم بها بواقي الفساد وخصوصاً اللي في مازال في الشرطة

حرام نكون عملنا ثورة رائعة وجميلة زي دي .. وبعد مرور عام يكون العهر القانوني ده موجود ..

- طبعاً كلنا شوفنا التلفيق القذر لتهم حرق المجمع العلمي للأطفال اللي مالهمش ذنب ..

- إمبارح تجمع شوية شباب من ألتراس النادي الزمالك وهددوا إن الشرطة لو ما أفرجتش عن واحد زميل لهم مقبوض عليه فسيقتحموا وزارة الدفاع يوم 25 يناير .. وهو تهديد اهبل من شوية شباب غير مسئولة .. لكن يا ترى إيه السبب ؟

أنا ما كنتش عارف الموضوع إيه أساساً ومين المقبوض عليه ده

- لحد ما أتصل واحد محامي إمبارح إسمه طارق العوضي ببرنامج محطه مصر على قناة مودرن حرية وهو بالمناسبة من ضمن طاقم المحامين المتطوعين للدفاع عن شهداء يناير ضد مبارك وعصابته .. وقال إنه كان أمبارح في قسم شرطة قصر النيل لإنهاء إجراءات الإفراج عن باقي الأطفال اللي إتلفقت لهم تهمة حرق المجمع العلمي .. وقبل ما يدخل القسم بلغه بعد المقربين له إن في شاب مقبوض عليه من ألتراس الزمالك إسمه " شيكا " وياريت يشوف حكايته إيه .. فبيقول لقيت ظابط من القسم واقف مع أحد الشباب عمالين يتكلموا ويضحكوا فقلت اسألة عن الشبا ده حكايته إيه ... فلقيت الولد بيضحك ويقول له أنا شيكا .. ما تخافش يا متر .. انا بالمناسبة طالب في تالتة حقوق .. والشرطة إستدعتني لأنهم بيقولوا إن عندي معلومات عن معرفتي لناس كانت بتوزع فلوس على الشباب عشان يحرقوا المجمع العلمي .. والظابط قال له ما تقلقش ده شاهد وهايروح والمحامي قال له ممكن أشوف أمر الضبط والإحضار . فشافه وقال إن فعلاً الولد مطلوب للشهادة ... فأصر إنه يدخل معاه ويشوف الحكاية إيه

المفاجأة هنا ... إن المحامي بيقول فوجئت بشيء في منتهى الإستهانة بالقانون وبالدولة وبكرامة أي إنسان وبجريمة تُدين ضباط الشرطة أنفسهم ... فلقد وجد أوراق اخرى مجهزينها ومحضر أخر بيعدوه لإتهام هذا الشاب بحرق الجمع العلمي !!!!!!!!!!!

وهو ما يُعد جريمة تزوير فادحة

يعني شيء في منتهى البساطة .. تجيب واحد من بيته وتوري له أمر الضبط والإحضار عشان ييجي يشهد ... وعلى ما يوصل هناك يتحول كل شيء إلى إتهام .. وكله بالمستندات !!!!!!!!!!

فهل هؤلاء فعلاً مؤتمنون على القانون ويريدون تحقيق العدالة بين الجميع ؟