مسابقة جديدة .... تعالوا تعالوا

[pink rose]

جت في بالي النهاردة فكرة جامدة جدي(وش جوني في الكبير اوي)

فكرت و قولت احطها فين احطها فين

و اخيرا قولت ابدأ بالمحاورات

ايه رأيكم نعمل مسابقة لعمل تورتات

المسابقة فكرتها ايه

كل شهر مثلا نحط هنا صورة تورتاية

و كل حد هايشترك في المسابقة يحاول ينفذها و يعمل تورتة مشابهة ليها

و يصورها و يحط صورة التورتة اللي عملها هنا

و اكتر تورتة مشابة للتورتة الاصلية

يفوز بوسام شيف التورتات للشهر دا

ايه رأيكم

لو موافقين نبدأ نتكلم في التفاصيل

منتظراكم

[Dreamwithme]

طب ليه التعقيد ده يا بينكي؟ بالنسبة للمعوقين أمثالي هيتفضحوا علي الملأ وبالصور كمان :closedeyes:

أنا هأشترك معاكي بقلبي وهأحاول أعمل فعلا بس لو طلع وحش مش هأحط الصورة

المسابقة دي نتيجتها معايا هتكون يا إما هتخليني شيف بحق وحقيقي وتكسبي فيا ثواب وماما تدعيليك

يا إما برستيجي هيتبعتر خالص في البيت وفي المحاورات بس أنا مالي هأقولهم بينكي هي اللي حرضتني علي هذه الجريمة

ليا طلب ياريت تدي فترة زمنية كويسة للاشتراك يعني أسوع مثلا عشان أخواتك العاملات المتبهدلات يبقي عندهم فرصة يشاركوا

يلا وأدي قاعدة مستنية البداية

أنا اللي شجعني كيكة الكريم كراميل اللي أنتي علمتيني أعملها فياريت تبدأ بحاجات سهلة شوية للمبتدئين أمثالي

[pink rose]

اهلا دريمي

باحييك على المبادرة الاولى في الموضوع

بصي يا بنتي يا دريمي

ان شاء الله لو تمت الموافقة من 5 من الاعضاء على الاشتراك يبقى نتوكل على الله و نبدأ

ان شاء الله نبدأ بحاجات خفيفة جدا و غير معقدة على الاطلاق

و هانسيب اسبوع فعلا للتطبيق

يعني مثلا هانحط الصورة الاصلية يوم السبت

و ننتظر صور الاعضاء تبدأ تضيف الصور يوم الجمعة و معاهم لحد يوم الاحد

و نعمل تصويت هنا او الاعضاء الاخرين الغير مشاكين يقولولنا انهي متسابق قدر يعمل اقرب شكل للصورة الاصلية

و تعلن النتيجة بعدها

و هكذا شهريا او حسب الاتفاق

و بعدين ما فيش حوار المشاركة بالقلب و الكلام دا

انتي اصلا اتشجعتي و عملتي كيكة الكريم كراميل و اظن طلعت جميلة

يبقى اتوكلي على الله يا بنتي و جمدي قلبك

و ان شاء الله هانزلكم المقادير و الطريقة و الادوات المطلوبة بالتفصيل الممل

و لو في اي سؤال حاضرين يا فندم

هاااا قولتي ايه؟؟؟؟

و اديني في انتظار تأكيدك للاشتراك و في انتظار 4 اعضاء او عضوات كمان عشان نبدأ

[Dreamwithme]

خلاص يابينكي أنا معاكي إن شاء الله

ربنا يخليكي للغلابة

[pink rose]

تصفيق جااااااااامد اوي لدريمي اول مشاركة في المسابقة

هاااااااا مين قال اني معاكم؟؟؟؟؟؟

[pink rose]

على فكرة الموضوع مش مقتصر على العضوات من حزب نون النسوة هنا في المنتدى

لا اللي يجرب و يشارك معانا من الاخوة الاعضاء من حزب مذكر سالم اهلا وسهلا

و لو يحب المودام هي اللي تشارك و يحطلنا صورة الانتاج

يا مليون اهلا و سهلا

[لماضة مصرية جدا]

السلام عليكم و رحمة الله و بركاته

يعني انتي عارفة شعار المرحلة

سينجلاوي و اعيش علي اكل الشارع و القهاوي:)

شوفي يا بنتي يا ضنايا

انا عجبتني الفكرة و اؤيدك فيها قلبا و قالبا و كيكة و حاجات كتير فوق بعضيها

و قعدت امخمخ مع نفسي كدهوت لقيت ان اخر انفجار ليا في المطبخ قصدي انجاز يعني كان جولاش بالفراخ في الفرن

ماليش في الحلويات يا كابتشن ريمو الصراحة

هتقوليلي طب ايه اللي جابك عندنا

انا حبيت اشجع اللعبة الحلوة

و اقولك قلبي و ربي راضيين عليكي يا بينكي يا بنتي

ع فكرة

ع الفيس بوك....."رنا" ممكن تعيش معاكي اوي في الحكاية دي

البنت دي فناااااااااااااااااانة فعلننننن...(لولاش هيا كنت اتشردت في الاكل الصراحة)

و فعلن

مع بينكي مش منكن راح تغمض عينيك

و لا تقفل بوقك:)

بالتوفيق يا احلي كيكة في المحاورات:)

[نوران]

بما إني ماليش في عمايل التورتات وسائر أنواع الحلويات :sad:

فأنا هكتفي بالتصويت واختيار التورتاية الفائزة

بالتوفيق لجميع المشاركين والمشاركات

[pink rose]

ايه يا جماعة فين الشجاعة و حب المغامرة

و بعدين انتوا خايفين ليه

و الله هاحطلكم المقادير و الطريقة بالتفصيل الممل دا بالنسبة لكيكة التورتة نفسها

و التزيين هاتبقى الصورة قدامكم تشوفوها براحتكم

اتشجعوا يا جماعة كده و بلاش خوف

ريهام انا هاكلم رنا في الحوار دا بس لما نخلص من مسابقة لوتشي الاول

[pink rose]

الليلة ليلتك يا دريمي :closedeyes:

بس بما اني مريضة و ملازمة الفراش اغلب اليوم تقريبا فا ممكن نعمل حاجه بسيطة جدااااااا و مش بتاخد لا وقت و لا مجهود و طعمها تحفة

كيكة النسكافية

المقادير

بسكويت ماري او اي بسكويت ما يكونش مملح

ظرف كريم كراميل

مغلف نسكافية ال 3 في 1

كريم شانتييه حوالي 2 و نص مغلف

لبن

الطريقة

هانرص البسكويت في الصينية بايركس(صغيرة مش كبيرة)

و نشربه شوية لبن صغيرين

في الخلاط بقى هانخلط باقي المقادير الكريم كراميل و النسكافيه و الكريم شانتيه المحلى طبعا و اللبن بحيث يكون قوامه مش تقيل نقول لين شوية

نضيف الخليط دا على البسكويت و نساويه

ندخلها التلاجة لو عملتيها الصبح يبقى تتاكل بالليل لو عملتيها بالليل يبقى تتاكل تاني يوم

المهم قبل التقديم بقى ممكن ترشي على وشها شوية نسكافيه صغيرين كده بحيث تنخليهم عليها عشان يكون التوزيع شكله لطيف

او ممكن تزوقيها بالعسل اللي في مظروف الكريم كراميل

تم تعديل 11 يناير 2012 بواسطة pink rose