300 ألف جنيه تكاليف فساتين نرمين الفقي

[Mohammad Abouzied]

موقع جود نيوز الجديد/أخبار المشاهير/300 ألف جنيه تكاليف فساتين نرمين الفقي في " ألف ليلة وليلة"

300 ألف جنيه تكاليف فساتين نرمين الفقي في " ألف ليلة وليلة"

لأنها الملكة جليلة ملكة مملكة النساء التي لا يدخلها رجل ومن يدخلها يقتل، لم يستطع المخرج عادل مكين مخرج حلقات " ألف ليلة وليلة " الجديدة أن يرفض لها طلبا حتى لو كان فساتين بتكلفة قدرها 300 ألف جنيه.

النجمة نرمين الفقي تعود في رمضان هذا العام بحلقات تاريخية جديدة هي " ألف ليلة وليلة" مع النجم فاروق الفيشاوي والتي تعود بشكل جديد فهي لا تدور حول شهرزاد التي تحاول أن تشغل الملك شهريار بحكاياتها المشوقة حتى تبعد سيف السياف مسرور عن رقبتها، ولكن ألف ليلة وليلة هذه المرة تتناول حكاية الملكة جليلة التي لا تحب الرجال وتغلق مملكتها علي النساء فقط، وتعيش بينهم، وأي رجل يقتحم هذه المملكة يكون مصيره القتل.

ويتصادف أن يصل إلى هذه المملكة رجل بعد رحلة طويلة ومرهقة وحيث تهم الملكة جليلة بقتله، تسأله أولا كيف فكر في اقتحام هذه المملكة رغم علمه أن من يصل إليها من الرجال يقتل، فيبدأ في حكاياته المشوقة التي سنشاهدها علي مدي ثلاثين حلقة في رمضان، وبعد كل حكاية حين تتصور نساء المملكة بأن أجل الرجل قد حان وأنه سوف يلقي مصيره بالقتل فإن الملكة جليلة تجدد له المهلة حتى الفجر التالي.

ولأن نرمين الفقي تهتم بكل تفاصيل الشخصية فقد تعاونت مع مصمم الأزياء جو للتوصل لأزياء تعبر عن قوة شخصية الملكة جليلة وأيضا أناقتها وشعورها بالأنوثة.

وتعيدنا نرمين بفساتينها التي أصبحت حديث التلفزيون المصري قبل رمضان بأسابيع لأيام النجمة شريهان التي كانت ترتدي اجمل الفساتين والموديلات التي كانت سيدات الوطن العربي يقلدنها.

[فــيــروز]

300 ألف جنيه تكاليف فساتين نرمين الفقي في " ألف ليلة وليلة"

فساتين ب 300 الف جنيه !! :rolleyes:

حقهم يسموها الف خيبه وخيبه :unsure:

[kfaya]

يعنى الحلقة الواحدة يتلبسلها فساتين ب 30 ألف جنية ...... :unsure:

يا دوبك ..... :angry:

الدنيا بقت غلا قوى يا جماعة ...الناس هتاكل بعضيها ... :rolleyes:

[فــيــروز]

يعنى الحلقة الواحدة يتلبسلها فساتين ب 30 ألف جنية ......  rs:

:rolleyes: 

لا اعتقد الحلقه الواحده ب 10 آلاف بس :angry: مش تلاتين حلقه !! و عندنا 300 الف جنيه !! ومعانا عشره من السنه اللى فاتت !! pp: يبقوا كام :unsure:

[Salwa]

طيب........

ولو انه شئ غير طيب بالمرة .....

والرجل اللى انتحر لأنه مش لاقى تكاليف المدرسة ل ابنه ؟؟

والشاب اللى انتحر لأنه ياس من البحث عن عمل وايجاد تكاليف الزواج ؟؟؟

واللى بيموتوا بالآلاف ....علشان مش لاقيين حق الدواء ؟؟؟؟؟؟؟؟

واللى بيناموا من المغرب علشان يوفروا وجبة ؟؟؟؟؟؟؟؟؟؟؟؟؟؟؟؟

اقول ايه ؟؟؟؟؟؟

مسئولين مفتريين ......وجمهور معاق.......

مفروض الشعب كله يتحد ويمتنع عن مشاهدة هذا العبث ......

ويقولك اصلاح ؟؟؟..اصلاح مين ؟؟؟...هى مين اصلاح دى ؟؟؟

مش اصلاح........ماتت.

[Contra Mundum]

من ينتج هذه الحلقات ? هل هى من انتاج التلفزيون المصرى ام انتاج خاص لشركة ما ?

لو كان انتاج تلفزيوننا المفخم ده يبقى خبر يندرج تحت الاخبار اللى تغم و تفرس و تجيب النقطة ومش اخبار خفيفة. :P

[Lighthouse]

مال سايب :lol:

عندها حق ست نرمين هانم وغيرها :P

[MuslimaEgyptian]

والرجل اللى انتحر لأنه مش لاقى تكاليف المدرسة ل ابنه ؟؟

والشاب اللى انتحر لأنه ياس من البحث عن عمل وايجاد تكاليف الزواج ؟؟؟

واللى بيموتوا بالآلاف ....علشان مش لاقيين حق الدواء ؟؟؟؟؟؟؟؟

واللى بيناموا من المغرب علشان يوفروا وجبة ؟؟؟؟؟؟؟؟؟؟؟؟؟؟؟؟

اقول ايه ؟؟؟؟؟؟

كلام حضرتك فكرنى بخبر مثيل قرأته...وهو عن أجر الممثلين المخضرمين هذا العام عن مسلسلات رمضان...لم أكد أصدق إن البعض سيقبض مليونين جنيه...وآخرين مليون..ثم الأقرب للمليون...

شئ محزن فعلا..فى حين أن مهن أخرى كالطبيب والمدرس لا يتخطى أجر أغلبهم الخمسمائه جنيه...ونيجى عاوزين نستأصل ظاهره الزواج العرفى..والدروس الخصوصيه...طيب ما نصحح الخلل "الأولى" الذى أدى الى بروز تلك الظاهرات؟ ----> مليون جنيه لممثله فى بلد يعانى فيها الكثير إقتصاديا...لا حول ولا قوه إلا بالله...فلا نلومن إذن هذه النرمين بما إننا فى نظام هيأ لها أن تقبض مبالغ هائله كذلك..فمالها وهى بالتالى تتصرف فيه كما تشاء...

يا ريت على الأقل نعكس إستياءنا هذا فى أفعال..ونحاول جاهدين لمقاطعه هذه النماذج...وعدم دعمهم بمتابعتهم فى رمضان...لكى لا نحقق ظاهره الإزدواجيه التى نحن متهمون بها كعرب ومسلمين :P ...وهو إنتقاد شئ، وفعله فى نفس الوقت...وأذكر نفسى بذلك قبل اى شخص آخر بأن أجاهد بأن يكون شهر عباده خالصا لله تعالى...

[yasovinas]

يا اخوانا :) خللو تفكيركم ايجابي (حلوة ايجابي دي) :)

ماهي الست نرمين الله يكرمها ويفتح لها ابواب الفوازير والمساسلات كمان وكمان لما :P بتفصل فساتين ب300الف يعني بتشغل ناس تاخد ال300الف دول :)

يعني هي لو كانت ممثله كحيتي :lol: وعملت لها حتتين دمور على كام جلابيه كستور وخلاص :) كانت ام حسين الخياطه هي اللي لهفت العشرين جنية ودمتم يا جماعه ده تنشيط لاقتصاد مصر

[Tamsite]

300ألف جنيه ؟؟؟؟؟؟!!!!!!!!

دول يطلع فيهم كام بريزة ؟؟؟

وفيهم كام سندويتش فول ؟؟؟

و كام رغيف من المدعم أبو شلن ؟؟؟

ويركبوا المواطن مواصلات عامة لمدة كام سنة ، عفوا كام قرن ؟؟؟

ويجيبوا كام شقة في الاسكان منخفض التكلفة ، معدوم الآدمية ؟؟؟

و .......... ؟

و............؟

و بتقولوا البلد دي مافيهاش فلوس ؟؟؟؟؟؟؟ :ph34r:

هع هع هع هع

بلاش نقول كلام يزعل أكتر من كده ، عشان احنا في أيام مفترجة :rolleyes:

كل سنة وانتوا طيبين

ورمضان كريم

تحياتي وتقديري للجميع ...........

[المسروق]

300 الف بس؟؟؟؟؟؟؟؟؟؟؟

[disappointed]

300 ألف جنيه تكاليف فساتين نرمين الفقي

ممممم...

طيب على الله بقى بعد مصاريف الفساتين دى كلّها ما يطلعش المسلسل "نص كم"

bngn:: :rolleyes:

تم تعديل 19 أكتوبر 2004 بواسطة disappointed

[ابو يوسف]

عفواً ,,,

أنا جاهل شوية بالمواضيع دى ...

بس اللى أعرفه ان الفستان ده عبارة عن حتة قماش لتغطية الجسم .. و ممكن يكون مطرز بشوية حاجات تخليه يلمع ...

ممكن حد يشرح لى ازاى فستان يتكلف 300 الف جنيه ؟؟؟

يعنى متر القماش فيه بكام ؟

ومطرز بايه ؟

وبعدين هل معاه كتالوج و ضمان ؟

طيب الفستان ده كام حصان و جر رباعى و الا لأ ؟

وكام سرعة ؟ و ايه أخبار التكييف و الباور والسنتر لوك ؟

أكيد نيرمين بتدور الفستان و تسخنه قبل التصوير !!!!

و بعد التصوير بتركنه فى الدولاب !!!

[Mohammad Abouzied]

فساتين مش فستان وادي عينة منه

[Mohammad Abouzied]

وأدي عينة تانية منه

[Mohammad Abouzied]

السوال هنا اذا كانت الممثلة تصرف ثلث مليون جنية على فساتين مسلسل ثلاثين حلقة يبقى اجرها كام في هذا المسلسل والتلفزيون دا اصلا بينصرف عليها منين :rolleyes:

[أسد]

السوال هنا اذا كانت الممثلة تصرف ثلث مليون جنية على فساتين مسلسل ثلاثين حلقة يبقى اجرها كام في هذا المسلسل والتلفزيون دا اصلا بينصرف عليها منين  :rolleyes:

يعني هي جت على دي ...

معظم التمثيليات والبرامج التي يتم تنفيذها هي إهدار للمال ...

وفلوس بتترمي على الأرض ...

يعني بالذمة ... ألف ليلة وليلة دي اللي بيعملوها ويصرفوا كهرباء ولبس وإضاءة وتكييف .. ده غير الأجور والديكورات (واللذي منه) بالذمة مش دي فلوس بتترمي على الأرض ...

دي كلها حاجات خسارة فيها الفلوس ...

وكل القنوات اللي مفتوحة .. وشغالة ليل نهار دي ومحدش بيتفرج عليها ... إشي حورس وإشي نفرتيتي .. وإشي النيل للمنوعات والدرامة والثقافة والأسرة

واللي فاضل إنهم يعملوا قناة النيل لعم محمد بتاع البطاطا ...

بالذمة مش خسارة حتى الكهرباء اللي بيصرفوها في القنوات الهايفة دي ...

والغريب إنهم مشفرين ثلاث قوات في منتهى الهبل والعبط ... وليس لهم أي لازمة ...

قناة النيل للمنوعات ..

النيل للدراما ...

النيل للرياضة ...

دي القنوات الجديدة اللي لسه مفتوحة من كام يوم مليانة إعلانات (دليل على أن هناك مشاهدة لتلكالقنوات)

أما القنوات العبيطة بتاعتنا مفيش فيها أي إعلانات على الإطلاق ..

وأكبر مثال على إهدار المال في هذا القطاع ...

إهدار المال في إنشاء مدينة الإنتاج الإعلامي ..

والتي لا يوجد بها إلا إستوديوهات فقط (مراسلين تقريباً) للمحطات والقنوات العربية ... وكل المحطات تبث من دبي ... شفتوا الخيبة الثقيلة اللي إحنا فيها ...

وعاملين فيها شوية ماكيتات لمباني في منتهى السذاجة عبارة عن كام بيت جنب بعض .. وكام شارع .. تظهر في كل المسلسلات بدون تغيير ..

حاجة تقرف ..

وفي النهاية .. تتحول مدينة الإنتاج الإعلامي إلى مدينة للملاهي والمراجيح صيفاً يرتادها العرب والخليجيين ...

وياريتها مراجيح عليها القيمة ...

واستمر صفوت الشريف يضحك على رئيس مصر .. وكليهما ومعهم باقي العصابة يضحكون على المصريين .. ويقولون ..

إنها الريادة الإعلامية لمصر ...

الناس دي في منتهى العبط ...

مابيشوفوش الناس الثانية عاملة إيه ....

[soooo]

ممكن اعرف حاجه ؟؟

هي ألف ليلة وليلة .. شغاله اصلا ؟؟

ولو لسه شغاله .. بتتعرض في انهي قناة ؟؟

ول بتتعرض في اي قناة من قنواتنا المحليه .. بتجيب كام للتليفيزيون والاعلام ؟؟؟

ولو بتجيب كتير زي ما في ناس هاتقول ... انا موظف في قطاع الانتاج ومش باخد في الشهر غير 650 جنيه ازاي ؟؟

يا ناااااااااااااااس .. حد يفهمني البلد دي ماشيه ازاي ؟؟؟

طب وحياة ربنا .. لما اتجوز - لو ربنا اداني طول العمر - .. ولما اخلف - لو كنت اتجوزت وانا لسه فيه الرمق - .. هاخلف ولاد اخليهم لعيبة كورة .. وبنتي اخليها رقاصة .. ولو جبت واد تاني .. هاخليه ظابط

وبكده .. ابقى كسبت التلات حاجات

الشهره .. متمثله في ابني لاعب الكورة ..

والمال .. متمثل في بنتي الجوهرة المصون والراقصه المتمكنه ..

والسلطة .. متمثلة في ابني .. ظابط الشوربه .. عفوا .. الشرطه

ودمتم

[se_ Elsyed]

طب وحياة ربنا .. لما اتجوز - لو ربنا اداني طول العمر - .. ولما اخلف - لو كنت اتجوزت وانا لسه فيه الرمق - .. هاخلف ولاد اخليهم لعيبة كورة .. وبنتي اخليها رقاصة .. ولو جبت واد تاني .. هاخليه ظابط

بقى أنت هنا وانا عمال أسأل عليك في موضوع " زميل تايه يا ولاد الحلال "

بص يا Soo يا صعيدي ياللي من الصعيد الجواني .. مش عشان هناك فئة فاسدة هي من تطفو على سطح المجتمع يبقى نقلدهم ونتخذهم قدوتنا ... فإلى جانب حرمانية عمل الراقصة وما إلى ذلك من تلك الأعمال الهابطة .. إلا إن ما يدريك إن أصحاب هذه المهن سعداء أو مستمتعين بالأموال الطائلة التي يحصلون عليها ؟

[عوف]

مين اللي مصدق ان الملابس فعلا ب 300 الف جنيه

اعتقد انه مجرد باب للنهب والسلب في المال السايب

يعني ملابس تتكلف 3 الاف جنيه وتقيد ب 300 الف خاصة انها تستخدم لمرة واحدة.