مَني فاتورة المحاورات .. لأجود أنواع القماشات

[se_ Elsyed]

أنبثقت الفكرة من تعليق بنتنا جويرية اللوزعية الأتي

و بعدين كمان مش ينفع فرض الحجاب و بس ، ده كمان لازم يوزوعوا اللبس علي الستات زي ما كانوا بيوزعوا الكستور زماان

لكن الدولة مفروض توزع كسوة في الصيف و كسوة في الشتا تنطبق عليها شروط الحجاب

وهنا أمسكت الأدارة بتلابيب الموضوع وقالت " عالبكره "

لكن بما إننا في مرحلة سياسية ديمقراطية ... فلابد أن يتم دراسة الموضوع من كل الجوانب مع الأعضاء ...

وبالفعل تم عقد مؤتمر موسع لطرح وجمع ولزق الأفكار :

جويرية : بما إني صاحبة الفكرة .. فأنا عاوزه مترين قُماش زيادة أعملهم مًلس وطرحه صعيدي عشان لما أنزل البلد عندنا

س س : هانبدأ من أولها ؟ يا ست جويرية خلاص الرؤوس إتساوت في المجتمع ... وإنتي صاحبة الفكرة .. ولا صاحبة صاحبتك .. هاتخدي زيك زي غيرك .. هما مترين ونص تعمليهم جلابيه تعمليهم اعلام لمصر وتنزلي بهم المظاهرات .. إنتي حُره

الغريب : عندنا في الكويت أنواع هايلة من القماش ... وأنا مستعد أورد أجود وافخر أنواع القماش من محلات " غريبكو تيكستيل " وكله بسعر التكلوفه

أبو محمد : يا أخ غريب الموضوع مش سبوبة .. إحنا لسه بندرس الموضوع .. وموضوع التوريد هايبقى أخر حاجه نفكر فيها .. ولازم يبقى هناك شفافية ومناقصة وفتح مظاريف على عينك يا تاجر ..

عادل أبو زيد : فكره هايلة ... وموضوع تقدمي ... ده كان إستهلال لابد منه .. أنا فاكر في الخمسينات إنطرحت أفكار زي دي من الأتحاد الأشتراكي .. وكنا بنروح الجمعيات التعاونية نصرف كستور ودمور وبفته ودبلان وكافة أنواع القماش ... لدرجة إننا كنا بنعمل منها ملايات السرير .

عبير الشرقاوي : ربنا يديك طولة العُمر يا بابا عادل ... بس عفواً حضرتك دلوقت ملايات السرير والمفارش بتتعمل من الساتان والحرير المزركش واللي عليه ترتر وشغل إبره ... تفتكروا هايفرقوا علينا حرير وساتان ؟

تيمور : وليه لأ ؟ أنا هاكلم محمد عادل وأنجي عادل و نصر محروس وكافة كوادر حركة 6 متر إبريل .. قصدي 6 إبريل .. إننا ندعو لمليونية من اللي خمسة بس بيحضروها ونسميها " مليونية البواقي والفُضل " ومش هانمشي من الميدان الا ومعانا الدبلان " .... ويا مُشير يا مُشير إنزل إنزل عالتحرير وهات معاك مترين حرير ....

س س : إنت بتهيص يابني في اي حاجه والسلام ؟ مشير إيه اللي هايجيب لك حرير ... يا بني دول ما يعرفوش غير الكاكي وبس ... وأنا ما عنديش إستعداد ألبس ميري بصراحة

بينك روز ( ريمو سابقاً ) : أنا موافقة على الفوكيرة دي ... وهاكلم أ عصام سلطان ... وكمان الهيئة العُليا لحزب الوسط .. إنهم يتبنوا فكرة توزيع القماش على عامة الشعب .. أنا فعلاً محتاجه حتتين قُماش أعملهم جونيله وبلوزه لمريم .... ربنا يخليها لي يارب

محمد علي : والله عال ... الموضوع قلب جونيلات وبلوزات وناسيين الأغلبية الصامتة والناس اللي قالت نعم للكستور .. قصدي للدستور ... يا أخوان أنا بأقولها أهو .. القماش لازم يكون شرعي .. يعني مش شفاف للستات .. ومش مجرجر على الأرض للرجالة ... وما تنسوش كمان حتت قماش زيادة للرجالة عشان نعملها غُترة .

محمد : طب ونسيت العُقال كمان ؟ والله عال ... يا سيد محمد علي إحنا لبسنا في مصر هو البنطال والقميص ... وعُمرنا ما هانبقى وهابيين ونلبس غترة وشماغ وحاجات من دي

الساري : ومالها الغُترة يا أ محمد ؟ طب ليه التجريح ده ؟

س س : يا ساري لا تجريح ولا حاجه ... ترضى حد مصري ييجي يفرض عليكم هنا لبس البنطلون والقميص ؟

الساري : أه أرضى بصراحة

س س : أفحمتني .. طب جاملني وقول لأ من ورا قلبك

سمبا : على فكرة في برنامج على الايفون تدخل له القطن من ناحية ... يطلع لك قماش من الناحية التانية .. وبمية دولار بس

أسد : أنا ضد أي حاجه فيها تقييد لحرية الإنسان ... يعني ليه الدول تفرض عليه نوعية وألوان معينين ؟ ده أسلوب شيوعي واشتراكي مقيت

س س : فعلاً يا أسد ... كنت زمان بأشوف الصينيين وبتوع كوريا الشمالية كلهم لابسن زي بعض ... قال يعني هي ناقصة لخبطه ؟

أبو محمد : نقطة نظام ايها السادة المتحمسون ... عاوزين نناقش الموضوع متر متر .. ونشوف إحنا معترضين على إيه وموافقين على إيه عشان نرفع مقترحاتنا لحكومة أ عصام شرف

فلانه : إسمحوا لي بكلمه من فضلكم ... أنا ضد الموضوع ده ... وعُمري ما اتصور نفسي وأنا واقفه في طابور طويل عريض عشان أخد حتتين قماش ليه ولاولادي .... فبدل البهدلة دي كلها ... ليه ما يكونش عند الحكومة خدمة الديليفري ؟ أو أوبشنز كتيره وكاتلوجات قماش نختار من بينها ؟ .. ليه كمان ما يتوسعوش ويفرقوا علينا قماش ستاير ... أو قماش أوبيسون للصالونات المدهبة وكدهوت ؟

س س وهو يجز على أسنانه : يا فلانه باشا ... بقى جويرية عمالة تقول لك حتة كستور مترين ونص يادوب يكفوا جلابية .. وإنتي عماله تقولي ستاير ويانسون و قطن للتنجيد ... أسكتي الله يرضى عليكي وخلي الشعب يستر نفسه الأول وبعدين نفكر في الحاجات التانية بتاعتك دي

سلوى : ما تعملوش حسابي في الموضوع ده .. الـ Pano ده لإنه عندنا في أسبانيا حلو خالص .. وكمان العرض عرضين

المحتار : لو سمحتوا يا جماعة .. أنا جايلي فرصة عمل في السعودية في شركة مقاولات .. بالنسبة بقى هناك . القماش بيبقى على الكفيل ولا على الموظف ؟ أرجو سرعة الرد

جايلك يا كندا : دي ميزة الدول النضيفة .. إنت أول ما تعمل لاندنج يا معلم .. تلاقي بت كندية زي لهطة القشطة مستنياك في المطار وفي إيدها شنطة مليانه قماش كندي .. إيشي شيفون على فيسكوز على نوع هناك إسمه عضة الكلب .. تفصل وتهيص ويفيض منك كمان

حسام وعنبو في بؤ واحد : طب بالنسبة لغير المتزوجين ؟ هايبقى في قماش جينز ديرتي ولا الموضوع ده للعوائل بس ؟

س س : لأ طبعاً للعوائل يابني .. إحنا ناس أصحاب عيال .. وبعدين إنتو أمركم سهل .. هو منطلون مقطع وتي شيرت ومشي حالك

محمود البصيلي : قُماش ؟؟؟ بتتكلموا عن القماش ؟؟ الله يرحم أيام القماش المحلاوي اللي خربوه بالكويز والإتفاقيات الصهوينية ... حسبي الله ونعم الوكيل .. حسبي الله ونعم الوكيل

بينك روز : على فكرة .. أنا كلمت أستاذ حماده سلطان .. قصدي عصام سلطان أمبارح وقولت له يلغي إتفاقية الكويز

س س وهو ينظر لريمو شذراً ولسان حاله يقول : إحنا نخلص من 6 إبريل .. يطلع لنا عصام سلطان ؟ ريمو كرفت على حته أركتيكاوية يا رجالة

لماضة مصرية قوي : يااااااه فكرتوني بأيام زمان وأنا صغيرة .. كانت مامه دايماً تقطع حته من ديل أي فساتن عندي وتعملهم لي شرايط للضفاير بتاعتي .. فكان الفستان لازم يبقى ماتشنج مع ضفايري .... وفكرتوني كمان باغاني الطفولة زي " لاعبيني والاعبك وأقطع ضفايرك " ................ صباحكم قصاقيص قماش ملونه كل قصقوصة بتحكي قصة صغنونه ... وش عيله صغيرة ماسكه مقص وعماله تقصقص في فساتين صاحبتها

[Alattar]

في وسط ما انا قاعد جنبي مدير الآي تي..وعمال أكتب كود سيكويل..سيليكت علي ديليت..قعدت أضحك جامد..واحد جنبي بيقوللي مالك ياض..انت اتهبلت؟

جامدة والله يا ريس..و بالنسبة ليا..أنا ممكن أتبني اقتراح الأستاذة فولانة..في موضوع الديليفري ده..و أنا طبعا اللي هشتغل فيه..بس مش بمتوسكيل..لأ...بالعربية طبعا..وان شاء الله التوصيل هيكون فوري في خلال دقايق...حتي لو انت ساكن فين..هدوس علي كل الني آدمين اللي في السكة عشان أوصل بسرعه

أمال....لازم الواحد يشوف شغله بضمير..ده احنا حتي في رمضان

[جويرية]

انا ضحكت من اول ما قريت عنوان الموضوع

لسة اما اقرا كمان و اشوف فيه ايه

[Mr MAGED]

ربنا يضحك ايامك ويفرحك دايما ياأستاذ أحمد .. انت بجد مش ممكن

طب مش عايزين حاجة من دبي ابعتهالكم مساهمة في المشروع الوطني ده

[جويرية]

جويرية : بما إني صاحبة الفكرة .. فأنا عاوزه مترين قُماش زيادة أعملهم مًلس وطرحه صعيدي عشان لما أنزل البلد عندنا

س س : هانبدأ من أولها ؟ يا ست جويرية خلاص الرؤوس إتساوت في المجتمع ... وإنتي صاحبة الفكرة .. ولا صاحبة صاحبتك .. هاتخدي زيك زي غيرك .. هما مترين ونص تعمليهم جلابيه تعمليهم اعلام لمصر وتنزلي بهم المظاهرات .. إنتي حُره

:lol:

صحيح زمان القماش كان بيبقي موحد يتعمل منه هدوم او مفرش او ستارة

[pink rose]

س س الله يكرمك يا خويا ما تنساش عاوزة مترين و نص زيادة الله يكرمك

ربنا رزق اختي بنونو جديد النهاردة

و انت عارف الخالة والدة

يعني لازمن اخد حقها زي اختها مريم بالظبط

و اوعى تقول كفاية متر و نص عشان لسا صغننة

لا نظام القوالب و الانصاص دا كان زمان احنا في ثورة

و زي ما انت قولت الروس اتساوت

اللي طوله مترين زي اللي طوله 50 سم

كلنا مواطنين في هاذوها البلد و لينا نفس الحقوق

و الا هاكلم عصام سلطان يرفعلنا عليك قضية و نبهدلك في المحاكم و انت عارف عصام سلطان بقى ما بيسكتش خالص

كلام بيني و بينك بقى لو زودت نص متر كمان هاشوفك في حوار السبوع

و يجعله عامر

[capitshino]

والله انت مشكلة يا س س .

[pink rose]

يا نهارك قماش ملون فوزدوئي يا س س

دا انا ما كنتش قريت الحتة الاخرانية دي

اسحبها فورا و الا مش هايحصلك كويس في التوبيك دا

و بعدين كل واحد و علاقاته يا سيدي

ناس تكلم قيادات حزبية معروفه

و ناس تكلم نشطاء حركات

الحق شوفلك حد كلمه بقى انت كمان

[عبير يونس]

ايوة كده يا معلمي

انزل بالمواضيع الجامدة

و الله زمان

من شهور طويلة ما ضحكتش بالشكل ده

رزقك الله سعادة بلا حد

يا سين سين يا بني

:closedeyes:

[se_ Elsyed]

ايوة كده يا معلمي

انزل بالمواضيع الجامدة

و الله زمان

من شهور طويلة ما ضحكتش بالشكل ده

رزقك الله سعادة بلا حد

يا سين سين يا بني

:closedeyes:

الموضوع ده مش بيفكرك بحاجه يا عبير ؟

إرجعي ريوس كده بالذاكرة وحاسبي تخبطي حد ...

عبير يا جماعة كان زميلتي في الجامعة وكانت عضوة بارزة في جمعية الخطابة وياما هريتنا عصايد ... وفي مره كنا قاعدين بنضرب كبدة وسدوق في الكافيتريا وراحت رزعانه قصيدة من قصايدها كانت مسمياها

" وكالة البلح "

أنا لسه حافظها كويس لحد دلوقت لانها كانت قصيدة من النوع اللي مش بيكش ولا يبهت وحاجه مُعمره بصراحة .. كان مطلعها بيقول :

إديني حتة قماش

ببلاش أرجوك مش كاش ..

حرير أصلي مش شاش

والله إنك بكاش

-------------

[se_ Elsyed]

ميرسي عليكم يا جماعة ويارب تكون القصة اللي غزلت خيوطها على السريع عجبتكم

[عماد حمدي]

هههههههههههههههههههههههههههه عنوان الموضوع لواحده مشكلة هههههههههههههههههه

و الله كل سطر أقراه أضحك ، أسلوبك مميّز يا أبو حميد والله ..

ههههههههههههـ

[عبير يونس]

ايوة كده يا معلمي

انزل بالمواضيع الجامدة

و الله زمان

من شهور طويلة ما ضحكتش بالشكل ده

رزقك الله سعادة بلا حد

يا سين سين يا بني

:closedeyes:

الموضوع ده مش بيفكرك بحاجه يا عبير ؟

إرجعي ريوس كده بالذاكرة وحاسبي تخبطي حد ...

عبير يا جماعة كان زميلتي في الجامعة وكانت عضوة بارزة في جمعية الخطابة وياما هريتنا عصايد ... وفي مره كنا قاعدين بنضرب كبدة وسدوق في الكافيتريا وراحت رزعانه قصيدة من قصايدها كانت مسمياها

" وكالة البلح "

أنا لسه حافظها كويس لحد دلوقت لانها كانت قصيدة من النوع اللي مش بيكش ولا يبهت وحاجه مُعمره بصراحة .. كان مطلعها بيقول :

إديني حتة قماش

ببلاش أرجوك مش كاش ..

حرير أصلي مش شاش

والله إنك بكاش

-------------

يا مساء التسييح يا باشا

أنا حاليا في البريك

استنى عليا لما اخلص و ارجع البيت

مااااشي

[MohamedAli]

رائع جداً يااستاذ س س

اسلوبك الساخر يضاهى او افضل من اى كاتب ساخر من المشهورين وبيكتبوا في الصحف

ماتجرب حظك كده وتشوف حد صحفى يخليك تكتب في جرنال مقال ساخر وان شاء الله هتدخل قلوب القراء .. بتكلم بجد على فكره

تم تعديل 21 أغسطس 2011 بواسطة MohamedAli