قصص واقعية على ضوء الاحاديث النبوية

[pink rose]

السلام عليكم و رحمة الله و بركاته

كل عام و انتم بخير

اللهم بارك لنا في شعبان و بلغنا رمضان

احاديث الرسول صلى الله عليه و سلم و سنته العطرة نبراس المسلم في حياته اليومية

عاوزين في التوبيك دا نحكي عن المواقف اللي حصلت معانا على ضوء الاحاديث النبوية

بمعنى حد فينا طبق حديث في موقف معين و لقي فعلا الحديث اتطبق بالظبط تصديقا لكلام النبي صلى الله عليه و سلم

هاديكم مثال يمكن يوضح المعنى المقصود

حديث الرسول صلى الله عليه و سلم

"من ترك شيئا لله عوضه الله خيرا منه"

صدق رسول الله صلى الله عليه و سلم

طبقت الحديث الشريف دا في موقف حصلي و هو كالتالي

لما كنت باشتغل في المدرسة استدعتني مسؤولة الادارة المالية و اديني مبلغ 24 جنيه و امضي هنا يا ريم

فلوس ايه دي يا مس ماجدة ؟؟

دي فلوس المجموعات امضي بقى عشان اقبض باقي الناس اللي في كشف الشهر دا

مضيت و اخدت الفلوس و انا مش فاهمة مجموعات ايه المهم قولت انزلها بعد شوية افهم لما تكون خلصت شغلها

و فعلا نزلت و فهمت منها ان دي فلوس المجوعات الشهرية اللي بتحصل في المدرسة و بتتوزع زي مكافأه كده بكشوف شهرية باسماء المدرسين اللي بيجوا يحضروا وقت المجموعات

قولتلها بس انا عمري ما جيت بعد معاد المدرسة و لا كنت في المجموعات دي يبقى انا اخد فلوس ليه و انا ما عملتش بيها

الست استغربت اوي و قالتلي يعني ايه مش عاوزاهم ؟؟

قولتلها لأ طبعا اخدهم ليه و هما مش من حقي انا ما اشتغلتش بيهم و سألتها مين اللي بيحضر المجوعات دي و انا اديله الفلوس هو احق بيها

المهم قالتلي على زميل لينا هو اللي بيحضر روحت اتكلمت معاه و قولتله الفلوس دي حقك انا ما عملتش بيهم حاجه

المهم الراجل افتكر اني جاية اتصدق عليه يعني و زعل اوي و حاولت افهمه قالي بصي دا اللي ماشي في كل المدارس و انا مش هاخد الفوس دي

رجعت تاني لمسؤولة المالية و حكيتلها اللي حصل قالتلي خلاص يا ريم خديهم يا بنتي دا في ناس بتيجي تسأل اسمنا هايجي في كشوف المجموعات امتى

قولتلها لا الفلوس دي لو اخدتها هاتبقى فلوس حرام انا مش هاخدهم

المهم قالتلي طيب العامل الفلاني بيكون موجود في وقت المجموعات رحت فعلا اديتهمله و اخدهم

و حمدت ربنا

لقيت مسؤولة المالية تاني يوم بتانديني و تقولي ريم انتي اسمك جه في الكشوف اللي جاية من الادارة التعليمية و ليكي علاوة الشهر دا سبحان الله شوفي انتي رفضتي تاخدي فلوس المجموعات امبارح و النهاردة ربنا عوضك بعلاوة رسمية و من حقك فعلا

مش قادرة اوصفلكم اد ايه كنت مبسوطة جدا بالمبلغ دا و حسيت ان فعلا حديث الرسول عليه الصلاة و السلام اتحقق معايا

يا رب تكون فكرة التوبيك وضحت لحضراتكم

مستنية مواقفكم مع الاحاديث النبوية

و مرة تانية كل عام و انتم بخير

رمضان كريم

[لماضة مصرية جدا]

السلام عليكم و رحمة الله و بركاته

جزاكي الله كل الخير يا بينكي و ان شاء الله يكون في ميزان حسناتك و صدقة جارية

الحقيقة فيه حديث للحبيب المصطفي عليه أفضل الصلاة و السلام بحب اتامله اوي

قال الرسول صلى الله عليه وسلم :

[ يدخل الجنّة أقوامٌ أفئدتهم مثل أفئدة الطير ]

روا...ه مسلم *

قيل معناه : متوكلون وَ قيل : قلوبهم رقيقة

مقدرشي اربطه بموقف واحد في حياتي

لكن دايما بفتكره كل ما الدنيا تضيق عليا اوي و احس ان عقلي فعلا عجز

اتأمل في العصافير و الحمام و أقول يا ربي طب يعني الحمام ده بيطير كل يوم و هو مش عارف هيحط فين و لا هياكل من فين

بس انت بترزقه

و الاقي الحديث للرسول صلي الله عليه و سلم

أقول يا رب ارزقني قلب متوك و مفوض أمره ليك وحد و رامي حموله عليك

و انا كلي يقين انك راح ترزقني زي رزق الطير في السما

طول عمري بستحضر الحديث ده و بدعي ربنا من قلبي اوي

ان يكون قلوبنا زي أفئدة الطير

جزاكي الله كل خير مرة تانية

و نسألك صالح الدعوات

[عبير يونس]

جميل الموضوع يا ريم

مش فاكرة حاجة معينة دلوقت

بس حبيت اشكرك على الموضوع

و لي عودة أكيد بإذن الله

[رضوي]

السلام عليكم ورحمة الله وبركاته

موضوع جميل اوي ياريمو

طبعاً كتير اوي من المواقف بنتبع فيها آيه كريمة او حديث شريف وبنحس بالفرق

يعني مثلاً الحديث الشريف ( لو أنكم تتوكلون علي الله حق توكله لرزقكم كما يرزق الطير , تغدو خماصاً وتعود بطاناً )

لما دماغي بتتشغل اوي في موضوع وبفكر اوي فيه ....... مش بس رزق ...... يمكن موقف معين مش عارفة اتصرف فيه ازاي ........ بفتكر الحديث الشريف دة ..... واقول توكلت عليك يارب وفوضت أمري اليك انت حسبي ووكيلي

وسبحان الله دايماً ربنا بييسر الأمور كلها ...... وبيدبرها احسن تدبير

من أكثر الاستغفار جعل الله له من كل ضيق مخرجاً ومن كل هم فرجاً

دايماً لو اتضايقت اقول : أستغفر الله العظيم من كل ذنب عظيم وأتوب إليه

ودايماً قلبي بيرتاح معاها

ولما بتظلم في الدنيا الغريبة بتاعتنا دي وافتكر إن دعاء المظلوم لايرد واقول حسبنا الله ونعم الوكيل نعم المولي ونعم النصير

وربنا ياخدلي حقي